2012年2月24日星期五

老麥新包...


寫家宴的李鴻章菜式前見到 "突發" 的 "新聞", 所以記下先...


早幾日「麥當當」搞了個活動, 是大家在"面書" 估一下之後會出一款期間限定的包, 這是由全世界好多不同地方的麥當當出過的「特別版」包包當中選出的. 


雖然我個人幾喜歡英國有售的咖哩雜菜包 (早十年前去英國食過), 而另外又有一款韓式燒牛肉包都似乎幾好.  但官方最後決定出的係呢個日本出過, 叫做 "idaho" 的包. 香港就改左個名叫做 'mighty ranger". 其實真正 "idaho" 的意思, 係美國西北部的省 (idaho), 因為該省出名出靚薯仔, 所以又有花名 "potato state", 而 idaho fries 就係炸薯仔磚. 香港做的包今次係加塊薯餅入去足三兩牛肉包, 上鋪洋蔥絲和脆煙肉條. 牛肉下面係芝士一塊和少少甜的牛肉醬汁, 洋蔥面另有甜芥末加醬瓜碎汁.

對老麥又多少有點情意結的. 所以雖然 gourmet burger 開到成行成市我都有時會去食個老麥, 當然有時和女王都會去一下 "tum" 下佢啦.  不過今次出的包和洋蔥圈我覺得可以有不少改進的空間.

既然係賣山幾蚊個足三兩, 就唔該畀多少少誠意啦.  除煙肉夠脆和個芥末醬做得不錯外, 所有嘢都係翻炒,洋蔥包亦只軟不香, 唔夠洋蔥味. 足三兩牛肉唔多 juicy 係一向的事實, 我唔會介意. 不過下面個甜黑椒醬汁和芝士唔夾, 或者咁講, 應該改用 emmental 又或者 montery jack又或者法國式的煙燻芝士 (老麥有用過呢類的芝士架之前, 橫豎都係短期之嘛) 會好好多.

至於薯餅, 始終都係茄汁的朋友, 唔加少少係唔好食的.  所以其實佢可以加返少少同芥末一起用, 又或者改用加入醬瓜碎的 andalouse sauce (個底係白汁加茄醬和蒜茸).

呢度係 idaho potato 的官方網, 入面有o的薯仔配汁的介紹:
http://www.idahopotato.com/

講埋個洋蔥圈 - 兩個字就係 "普通".  不過吃下去比 burger king 的來得大件和鬆一點, 不過比起 triple o 的就差些.  最衰係一定要加大餐焗我飲鬼死咁大杯野飲先有得跟洋蔥圈, 實飲唔晒的.

當然, 一切都係個人意見. 我反而期待下一轉會唔會出埋其他世界各地出過的特別版...

2012年2月22日星期三

新春家宴第二場之 - 古法菜式

一如往年, 新春的第二場家宴是煮給我自己父母還有我的妹妹 (當然還有女王和夫人) 吃的.  不過上星期六下午無啦啦著了涼, 一病時動作都慢了.  而今次因為之前數天要去新界做義務的法律資詢服務做到晚上十點幾才由粉嶺回家 (這是這公司特色之一, 師兄和部分議員相熟所以一班律師都會輪流去幫忙, 遲點有機會再說),  根本沒時間作任何事先的準備.  所以那晚最後要差不多8點45分才開始有得食.  食八道菜後都已經差不多十一時, 加上夫人買了 Jean Paul Hevin的十隻 macaroon來做甜品, 一家人又係咁切切切 (想大家都試到味喎...). 最後食到十二點先散, 女王就更加係作晒反, 成點先訓覺啦...


今次我主要玩復古, 部分是我想整好耐的菜式, 有幾道是以前的廚書所教, 有些是見到之前提過陳榮師傅的《入廚三十年》所載的 「李鴻章接待外使什萃家宴」當中的「四熱葷」菜式.  本entry 先寫部分懷舊菜.

前菜三款:

       玫瑰燻帶子


大型的北海道帶子是刺身用的款式, 解凍後先出水一分鐘以定形和避免瀉水. 之後用老抽,麻油和蜜糖輕輕上色加味, 醃一小時後再用玫瑰花茶, 黃糖, 普洱茶, 白米和幾滴玫瑰露一起煙燻八分鐘.  (點知因為電話響, 遲了三四分鐘收煙火, 搞到糖香中有少少焦味...)

       燒雲腿


是一味好神奇的菜式, 之前試過多次做都不成功, 後來讀到李文基大師的書才知道, 雲腿要先以1:2 的濃冰糖水浸醃三天, 之後用4湯匙生粉開一隻雞蛋的比例開生粉蛋漿, 上粉後炸至外皮變脆後切薄片. 

今次也是用上了老同學班長送的新鮮金腿, 雖然傳統上叫做「燒雲腿」不過現在多數都是用華腿/金腿來做的.

唯一可惜係自己刀工未到家, 趁熱切東西時切得不夠薄, 但係味道鹹香帶點甜, 係下酒的好菜式...

   沙律黃金盞

這個是好容易的菜式. 就是什菜粒用鹽水烚好返晾水, 再混入沙律醬. 外皮是現成的雲吞皮, 用兩個炸籬夾好炸一炸已經定型可以脫殼再炸十來秒已經可以用來當個盞用了.

古法炆石斑

只是超市買回來已 "湯" 好的紅斑, 初時想斬大件再炆但原來斑皮真的好韌, 所以最後只係由腩邊破開變成一塊樣的, 上粉炸好後將事先煮好的炆料 (冬菰片, 燒肉, 炸蒜子, 火腩粒用雞湯蠔油糖稍稍炆過)一同炆煮一會 (五分鐘可矣...) 食得.



蜜糖燒汁雞髀菰西椒炒鴕柳

呢味不算是太 "古法" 的東西, 不過因為家父不吃牛所以炒個鴕鳥給他. 醃和先走一走油的方法和用牛肉差不多, 好快已經熟, 再用少少蜜糖開一些日本燒肉汁來爆炒青椒和出過水的雞髀菰, 最後下鴕鳥肉一兜二炒便成, 加幾粒芝麻好看點. 我初時怕唔夠熟所以有一半左右的鴕鳥肉泡油時間長了一點. 吃得出短時間泡油的是比較嫩滑又腍而且已經夠熟.  下次緊記了.



野菌燒雞

這款是老香港廚書「陳榮入廚三十年」介紹過的.  不過它用草菰而家母是草菰敏感的所以改用了牛肝菌, 仲香添...

春雞買回來先用老抽抹一次. 吊起吹爽後炸一下至半熟, 之後釀入切大粒的牛肝菌, 最後放入爆香薑蔥的砂鍋中, 加入生抽雞湯蠔油紹酒及糖和少少水, 炆八分鐘就已經可以了.  不過可能之前炸得不太長時間, 皮不太像「燒雞」... 但食味加入牛肝菌後係相當一流的.  (註: 初春時節找不到新解porcini的, 只有去上環「菁云」找 "Winnie the 菰" 才有急凍貨. Citysuper 買到的急凍貨都唔夠佢好.)

講住咁多先. 下次就會講另外幾味菜了.

2012年2月21日星期二

好難的功課

問一個問題: 「樹木有時會病的, 那麼, 為什麼樹木會病?  又有何方法保護它們?」 

答就容易, 不過要用純文字以外的媒介向3 歲的女王介紹, 仲要使她可以之後回學校「教」返老師呢, 就真係相當有難度喇. 


之前已聽過不少人說過現在香港的家課不是給學生做的, 是給家長做的.  之前和女王都做過一些「親子家課」不過都係好輕量級的; 但今次要找的圖片呢, 一係就好核突 (一些壞掉的樹木和蛀樹的蟲或者真菌點都唔會好靚o卦), 一係就不能清楚地解釋.

女王學校近來是學習植物, 樹木就是當中一大項, 而上星期亦已經做了家長義工帶女王同另外的學生一起和靚女班主任去了維園觀察, 就是回來後的功課了.

最後這個週末我找來了一堆不太爛的樹, 不太大的蟲, 不太嘔心的寄生毒菌, 還有一棵乾枯得來易見又唔太乾的樹.  當然還有一隻啄木鳥和一位樹木專家檢測時的相片.  用了我幾個鐘... @@" 最後凌晨時份差不多癱倒在書房椅子上, 是女王無啦啦怪叫 (她有時凌晨會在自己房扎醒, 見無大人在旁陪睡就會大聲叫我們) 才叫醒了我...  之後還要教她邊張相打邊張相...

死喇, 而家已經咁, 遲點仲多功課以至於小學時真係不堪設想...!

2012年2月20日星期一

車氏粵菜軒

老朽好幾天沒上來, 因為公司多了新類別的工作, 同時事業上有些東西要考量一下, 而且早前接受一份小小的網上結婚雜誌訪問, 所以也用了點時間, 加上4月的新人都夠鐘入紙之餘又突然多了幾對新人想我幫手, 所以真的忙過不亦樂乎.

當然, 事業上進一步的發展, 要用不少時間, 但相信 (也希望) 繼續下去會有好成績.  所以都要用多點時間去諗.  不過這個是老朽的竇口, 所以點都會上來走一走的. 

同時地, 我仍然是幾個專業團體的法律顧問, 其中一個團體在每次開大會後都喜歡去灣仔的一家菜館吃飯, 就是車氏粵菜軒. 

這館子出名, 最先的是因為是歌星車沅沅的家人開的; 而之前只聽聞最好是焗酥皮叉燒飽, 原來他們還有不少菜式做得頗精緻, 值得一試.  可惜因為是和人家的 committee 去吃飯, 所以無機會影相拍照. 

當晚的菜式有幾款都不錯, 最記得的幾道包括魚湯浸花蛤.  除了一定有的胡椒外, 隔得很清的魚湯中還加了香芹和白蘿蔔提鮮, 清爽之餘味足, 吃後不覺得有多少味精 (起碼不覺得嗆喉).  很精彩的做法.

另外一款豉油皇煎大蝦, 和「阿翁」做法不同, 阿翁是用竹串起變成直身去乾煎的, 是一個比較老式的做法, 煎出來的蝦是直的, 而且味道比較濃, 蝦肉本身可能因為用花竹蝦的關係, 肉多卻有點「重」, 在阿翁處食一隻之後像吃了幾隻的感覺. 是一種「飽足」的食製.  但這裡的做法應該是泡油後, 已將殼開邊的大蝦身會彎起來, 部分頭部會切去方便吃, 也不用泡油 (蝦頭不處理好就泡油會有「爆蝦眼」的濺水情況). 但我懷疑他們將蝦頭也拿去煮豉油汁, 所以才會那麼鮮而又不見有蝦頭上碟, 但他們用的豉油卻是十分的輕盈, 而且隔油係完全恰到好處, 蝦有汁無油, 色淡而味足, 吃完一隻又一隻, 倒是顧不了「法律顧問」的嘉賓身份, 連 "隊" 五隻, 都想不來有無連其他人那份都吃埋.  只記得吃下去, 誇一點說, 像似係騎上了一架單車在原野上奔馳, 輾過地上的小石時有「彈彈下」的感覺, 但不會覺得阻礙, 而蝦味也沒有被搶去.  總之是就是我怎說也形容不來...

而最特別的仍然是叉燒餐包, 是用墨西哥包的那款奶酥脆皮的.  一上桌是熱得燙手又燙口.  不過真的外脆內軟.  主人家又訂了好幾碟, 吃不完我們幾位幫手的律師和嘉賓還又食拎.

當然, 食得人家茶禮就不只是飲飲食食的簡單, 開會人家的法律問題比我們幾位義工律師想像的要複雜得多. 看來要屈多幾餐才可以「回本」... wakaka...  XD

2012年2月6日星期一

爺爺的廚書

不說大家可能不知道, 我爺爺當年曾經當廚師, 而且是個八十年前的西廚. 

他和祖母早在八十多年前結婚, 婚前他曾在當時內地的內河船任水手, 後來婚後見行遠洋郵船收入不錯, 便去了走美國船當管房, 後來更曾在羅斯福號當候鑊 (大約是三廚), 有份接待這位二次大戰時的美國總統 (仲收左總統上船派的一支雪茄...).   自此他便愛上煮東西吃. 不過他曾經自言, 當時後生仔唔多肯學習, 大廚畀機會佢都唔識把握, 最後無在船上待到升 sou-chef (二廚) 已經走了.  係後來自己又買些廚書來自學一下, 再次燃起他煮食的熱誠.

爺爺曾當過好多不同的職業. 行船儲到錢後更曾經和人夾份開酒樓和戲院, 不過都是被騙損手離場, 後來因為他略懂英語 (咪係船上學返來囉...) 所以去了YMCA 當年的外國人宿舍做管房, 雖然人緣極佳但卻苦無成就, 他自己回想時都覺得不無可惜. 

但際遇始終不減他對烹飪的興趣 -- 大概我喜歡煮東西吃都是由他「隔代遺傳」使然吧! 我知道他因為祖母不喜歡吃他煮的新菜式 (可能太古怪了), 有時他會找個得閒的時間躲在家後門樓梯位, 開個火水爐就煮將起來, 自得其樂.  在我細細個時, 他也會帶我去屋外的馬路邊, 那兒有棵大樹和一些石壆, 兩爺孫 (後來加入了我妹妹) 就會一邊食他做的餅呀, 唔知咩古怪包呀, 香腸呀咁, 一邊數車仔, 也一邊講下當時完全聽不明的做人道理...

我上個月意外地在書店碰上了香港數十年前一位大廚寫的專欄廚書《陳榮入廚三十年》. 看得津津有味, 之後記起曾經見過祖父一些廚書, 是教西餐的. 有小部份散失了. 卻在我那喜歡儲東西的父親手上留下了不少.  我便央老爸找來給我.

又畀佢找到喎~!



拿上手, 聞到的是樟腦的氣味, 看到的是數十年前的字句, 例如「沙律」 (SALAD) 當年譯作「洒辣」, 「市祖」原來是 "Stew" (燴煮); 另一本是全英文的, 八十年前識多少英文已經好勁, 成本書都係查字典後的解說.  還有一本是教煮不同形式的咖啡的.  當中有不少現在好少見到, 但如果上WIKI 可以找到的外國菜式, 連「西多士」的做法也是正宗法國那款 (即是要用軟包 brioche 索晒牛奶才加蛋煎, 而不是現在香港式的純蛋漿炸).  心想如果爺爺當年學晒的話, 在當年開一間小的西餐廳真的不愁沒外國人來幫襯...


不過, 際遇就是這樣. 爺爺雖然說不上有成就, 卻是個大好人, 為人設想的程度是難以令人想像的 (例如我們一家當年住在地下那層, 他會將舊雨傘拿出去屋門外叫其他住戶如果無帶傘的話隨便用, 又會主動幫送貨到樓上的人開門, 如果樓上無人仲有代收服務). 

或者, 這是人心不古, 又或者, 我學不懂廚書的所有菜式; 但當我翻開爺爺廚書的一刻, 我就看到他在不遠處生個火自己煮食, 一邊數車仔和講道理, 又一邊叫人隨便用他的雨傘...

2012年2月3日星期五

2012新春家宴第一場

新年的首場家宴, 和去年一樣是宴請老友大俠的.  今年他太太要上班, 只他自己來拜年和探女王.  不過女王就好乖巧, 知道大俠識舞獅又識功夫, 就想問他點樣可以舞獅, 所以和他好快已經玩得熟絡了.

今年煮的時間不太多, 只是之前一晚做點預備的洗切功夫; 所以做的都不是太花巧的東西:


雛鳳還巢  (玉堂手撕花彫雞) 

聽名字已知道, 本意是一道新娘回門 (回娘家) 的菜式, 用一般醃法加入多點的花雕去醃雞肉 (雞髀), 蒸10分鐘脫生 (不要全熟, 除非想當全冷盤食法) 之後起肉, 手撕出一條條肉來.  其他作料包括手切甘荀絲和手切西芹絲, 西芹先放涼的雞湯中浸半天入味. 之後排出如下面的巢型, 中間加上煎蛋皮絲 (懶的話可以買日式超市的現成蛋絲) 和雞肉, 砌起之後可以當涼拌, 而因為女王不太吃生和硬的菜類, 所以砌好後包上微波保鮮紙再合蒸三分鐘使西芹變軟身. 

食法是像新加坡和馬來華人近年復興客家新年菜式的「撈起」. 因為已用雞湯和花雕去入底味, 無需要一定加入醬汁才撈的.  新正頭又好食又好意頭又好玩.


麒麟鮑片

更簡單的菜式, 就是: 1) 隔夜浸冬菰, 切斜片; 2) 之前一晚將上方的金華火腿切薄片, 用冰糖先蒸透兩次 (每次約15-20分鐘, 棄去鹹火腿水); 3) 5頭的罐頭蠔皇鮑魚, 又係打斜切片. 

將 1) 2) 3) 排好, 一起蒸 5 分鐘, 之後將鮑魚的汁加熱後淋上面即成.



乾炸二鬆 (酥炸金菰拼乾炸芋絲)

這道可是有點工夫了.

金菰之前一晚切好後和芋頭刨絲一起放在當風處吹一晚爽身和收水, 先炸芋絲, 滾油再加點凍油, 之後慢火下一半芋絲, 即時用筷子在油鑊中攪拌, 如有見芋絲黐埋的就即用筷子分開 -- 因為芋絲就算吹了一晚都好易黏貼著的. 要待炸到少少企身才可由得佢慢火炸至唔見有水泡浮起, 就可以盛起隔/吸油, 之後炸埋另一半就可以了.

金菰呢就煩少少. 可能係我功夫未到家. 最後我是逐條放入炸漿和油鑊中才讓它慢慢炸的. 因為一上炸漿就好易糊在一起了. 炸一碟金菰用了十分鐘有多...

兩款素食炸好後排個太極形上碟就食得... (不過排得唔係好靚, 因為金菰炸起太長唔似太極形)

我煮開了一小碗做西檸雞的汁料當蘸醬, 免得次次都用桔油. :)





還有一道大地魚湯灼菜心苗 就是用稀釋一點的清雞湯加入一茶匙流浮山和各大食海鮮的區域都有售的大地魚粉, 用來灼菜後加少少幼的薑絲在上面.  這道菜沒有拍照.

準備的工作不算太繁瑣, 當然老友食到咀舔舔, 仲話要佢那位煮西餐好叻的細佬 (過兩個月找我證婚的) 回請我一餐.  到時有得食的話再作報導.  ^^

2012年2月1日星期三

o係伯大尼做一日神父...

在一個月內走了兩轉伯達尼/伯大尼證婚監禮, 一般來說不是很特別的事. 始終伯大尼是個好好, 好靚, 也是一個「爭崩頭」的婚禮場所. 不過當中一場中舉行了一些比較特別的儀式, 所以倒是值得記下, 讓新人參考也好, 自己當紀錄也好.


早幾個月收到個email, 是想問有無律師懂得以天主教或基督教形式主禮的.  原來新郎是菲律賓人 (唔好以為係阿四, 佢在某大投資銀行做 head 的), 新娘是新加坡華僑不過不太懂中文, 而他們因為一些個人原因而未有去教堂行禮, 所以想以「菲律賓式」舉行天主教婚禮.

老實說, 老朽真的未試過這類婚禮, 他們說又有讀經又希望有點講道 (!) 的, 但這個正中老朽的做法, 只是他們竟然要求「可唔可以講多o的, 長o的...」呢樣呢... well, 老朽唔係神父, 講一兩分鐘不是問題, 再長的話怕人會訓著喎...!  :)  但當然, 有要求的新人, 是對自己婚禮的一種執著, 老朽知道他們緊張流程, 所以問他們會不會想在之前多開一個會議為他們 finalise 一下流程.  他們十分高興有此安排 (咁當然係因為我係「私房菜證婚律師」才可以咁做啦, 只係加三幾百就用多我成個鐘喎...). 將有關的資料全部都畀晒老朽, 連當日的其他時序都問埋我意見, 咁既然人家咁信我, 又唔係用多好多時間, 所以 "半賣半送的" 幫埋佢地手, 蝕少少當幫人算了. 

由於是外地人士, 處理的文件會比較繁複, 好在都搞得切. 不過他們有樣特別的傳統, 是中國文化會有, 但估不到他們也一樣有的, 就係 "行禮前新人不會碰面", 而因為他們是全西式禮儀, 沒有 "接新娘" 的環節. 所以行禮前新娘就一直待在自己車上 (奇怪... 不是有間新娘房的嗎?  伯大尼的實Q 話無喎... 遲點有機會幫他們一位工作的同事證婚, 真要問問先.) 而所有臨場的確認就因為新人不能碰上, 所以都要講兩次. 

他們的禮儀是全西式的, 所有姊妹都在前慢慢行.  新人希望我像神父一樣介紹他們, 先說幾句, 之後就是請雙方母親來進行「燃燭禮」 (即是由母親代表先點起兩支小蠟燭, 到禮成前再由迎人本身拎起小蠟燭去點中間的大蠟燭, 這是部分教堂, 尤其係外國還有的儀式)  再請朋友做見證 (讀經證道).  這些對於我這個前輔祭當然無難度了. 

原本新人想再加入一些民族元素例如由好友為他們戴上一條特別的圍巾之類的, 但因為需要在主禮前跪下 (咁我唔係真係神父嘛) 而作罷.


因為多了幾篇經文, 所以比較長時間, 不過都係半小時左右, 而一宣佈禮成, 第一個撲出的, 竟然是伯大尼的實Q...

「呢度係歷史建築, 唔點得火呀~!」


(後記, 我初時以為伯大尼因為星期日有聖公會的崇拜而可以點蠟燭, 但原來是沒有的, 而且當年復修後原來差點火燭所以去年年中起就不准生火了)

 

2012年1月31日星期二

守歲 & 開年

已經是年初八, 開市了, 一切也回復正常. 

今年的桃花是碰上了多年前買過, 又靚又好彩頭的那一年的花檔.  之前留了電話, 有兩年找不著, 今年無打去反而找回了, 還要是檔主首先認得我.  所以只用了比市價低一點的五百多元就買到心頭好.  正所謂頭由好到尾, 老朽買花是想放到元宵節的, 所以初一二的花比較 "生", 而到初六起就真是芳華正茂, 今年希望真有好意頭, 而且也見到結了桃子.

這是初一晚拍的...


到初六已經很不同了...


屋企老習俗是有守歲的, 而且年初一也一樣會食齋, 叫做合家作福, 雖然老朽是教友, 但老父拜祖先倒是有參與的. 只是夫人比較 "現代化", 見老人家無咩意見 (兩老又順得個家嫂放過佢) 就一早帶女王跑回家去睡, 年初一才上來, 老朽就一定會和妹子一起陪著老人家的.  而且也一定會在拜祖先後先吃一點齋才點自己家睡一會, 又去和老人家拜年了. 

另一樣習俗就是開年, 先祖父是有做點生意的, 也將攝影檔留給老父「發揚光大」. 因此我們也有年尾做尾禡 (即「尾牙」), 年初二就會凌晨做「開年」的拜祭和開始吃肉 (無錯,又係拜完後吃的, 始終... 雞和燒肉都係新鮮吃比較好味...) :P

問過一些朋友, 守歲已經不是和家人一起, 而且跑了出街去玩了.  老朽倒是覺得, 你當我老餅好, 大男人好, 守歲是個不應廢除的習俗. 至於凌晨開年, 就是老朽覺得十分好玩和有意思, 一家人聚在一起的一個盛典.  就如一位每年都做蘿蔔糕給我的老友所言: 「新例不用加, 舊例不可違」,  當然, 或者只是我個人對老家的情意結, 但的確, 每次有呢o的 function, 我都覺得藉著節日, 就和家人連成一起了. 

女王就一向都係夜鬼, 也好喜歡節日的活動 (她今年有幫手炸芋蝦架!!)  唔知過兩年大個左之後, 帶佢上老家開年 (「幫佢開年...?」 XD) 的話, 夫人會不會也想來湊熱鬧, 免得自己孤伶伶在家等初一呢...

2012年1月24日星期二

團年飯

說過了團年的情, 就記一下自己的團年吧.

夫人那邊, 即係外父母的團年飯, 因為姨仔癌症剛癒, 不便去外父母家 (那兒比較狹小和... 不知何解外母家比較多雜物和稍為...邋遢 (又唔係好離譜既...). 便去我家好了. 請保姆姨姨煮兩味普通點的. 外母會用白水浸魚和蒸雞.

原本我是想做些蝦蟹菜式的, 不過因為是星期五, 還要上班. 而且姨仔不太想食其他海鮮 (想戒口戒耐少少喎); 所以就炆個柱候骨, 煎個中式牛柳; 另外想用南乳煎腩片的, 不過她說不能吃醃製食品 (南乳), 所以我便改成薑蔥煎, 南乳汁另上好了.

點知, 前幾天問老友買了些海味, 意外留了一整包急凍海參 (8支一斤那些) 在公司的一個保冷袋中, 足足一天.  記得時已經解了凍, 所以臨場就整多一味蔥燒遼參, 和再做一點百花遼參 (是釀蝦的) 給我自己父母之後一天團年時吃了.


柱候骨 - 是腩排斬件, 用返柱候牛腩的方式去炆, 炆之前先出水和用薑蔥爆一下, 再爆柱候醬後加冰糖紹酒, 包尾加麻油和少少老抽上色.  為左索汁, 再加點豆泡.  不過吃到一半才記起無影相, 算了.


中式牛柳 - 由於家中無大紅醋, 所以色比較深. 這西汁就是用一份鎮江醋, 五份糖 (!!), 一份茄汁, 一份半蜜糖開成蒸開的. 牛柳件用生抽急汁糖紹酒麻油生粉還有少少水醃半天, 爆香洋蔥絲加牛件煎起, 之後就加汁「一兜二炒」即成.  想唔韌就要落少少本, 買靚少少的牛柳如安格斯之類, 請超市幫你切簿件 (快熟嘛!).


煎腩片- 南乳汁是一件南乳搗爛加糖麻油和少少紹酒, 再加一兩滴蠔油而成的, 至於加幾多糖就要視乎你件南乳有幾鹹, 之後又係蒸渦O的糖就可以了.  腩肉要買超市的, 因為切得好點, 切細方件後百鑊煎, 出油之後就落薑蔥蒜一起爆, 同時下點鹽巴, 最後加入南乳汁, 又或者當蘸汁另上.


蔥燒遼參 - 買來的是細支的, 已經好乾淨, 洗一洗之後一樣用滾水加薑蔥酒煨 (開蓋煮) 第一次去腥, 十分鐘左右, 放一會後復用蒜子爆香後加入雞湯, 少少蠔油和半塊片糖煨十五分鐘, 加蓋又煮十分鐘後焗十五分鐘, 再開蓋煮至收汁咁滯, 便加入約十條左右洗好及切開一半 (可以用叉由頭至尾「拉」成蔥絲) 的蔥段, 猛火炒幾下之後熄火焗十分鐘等蔥味滲入海參, 埋芡便可以了.


百花遼參 - 呢樣繁複少少. 海參去腥後只用薑蔥雞湯慢火煨至入味, 之後撈起放涼, 再釀入蝦膠 (唔自己打喇...) 蒸十分鐘, 打個薄的蠔油芡.  第一次整時我貪方便先釀蝦膠再煨, 為免蝦膠唔夠火路會霉我用大火了. 又怕海參會瀉所以只煮一會, 點知一開蓋就見到蝦膠因為直接受熱所以脹起來, 唔美觀囉...

當然, 老媽子又好, 外母又好, 都煮了不少菜式, 不過我要記下的當然是自己煮的那些而已... ^^"

2012年1月21日星期六

Go!Go!Go! 新春糕糕糕...!


去年新年整過一次芋頭糕, 加的粉不太對, 而且芋頭太重身, 水份多, 蒸起來死實實的. 今年就自己改一下份量, 又參考了好幾本專業廚書, 主要係將粘米粉和粟粉比例改少少. 再用多一點點的水.

同埋今年有樣醒, 就係先蒸一底迷你版, 之後試過OK喇先去馬.  因為糕一日未蒸, 一日都有得救的.  果然 - 撞鬼後來先醒起, 原來蒸第一底開粉漿前, 因為夜晚所以女王訓左, 但係又無啦啦醒左, 問我咩事唔訓喎... 又話要去廁所之類的.  所以... 最後我唔記得左在粉漿加鹽呀... 0.0  (好在就係試左一底先, 之後就記得喇...)

其他有關的食譜之類, 去年有交帶, 但網上不少記載都好正, 不一而足.



老朽係一個比較「鹹」的人 (!), 今年就係第一次蒸甜糕 - 馬蹄糕.  做法簡單直接, 100g 馬蹄粉, 開300ml 生水, 另外 120g 砂糖 (用紅糖好看點) 加入另外 300ml 左右的水煮成糖水. (按此比例可自行加減), 加入少少馬蹄碎 (兩三粒的份量). 熄火撞入一半的馬蹄粉漿, 快速搞拌, 一自再將另外一半生馬蹄粉漿加入搞勻, 好快會開始變得好黏稠, 跟住放埋入糕盤蒸廿分鐘就得了.  專業廚師想加色同香少少, 會加少少吉士粉, 家用就唔使都得喇.



馬蹄糕係十分易整的, 不過建議如果第一次整的話, 買日本城一o的細細個糕盤 (無蓋的, 要自己加保鮮紙保存) 好了. 我這個食譜份量可以整到三個細細底的. 

至於蘿蔔糕, 硬係覺得姨仔老公的母親大人和的老友鮑魚先生整得好O的, 我老媽子整齋蘿蔔糕就有一手, 年糕就係我外母的強項, 大家夾手夾腳就成雪櫃都係糕了... @@"  當然, 最喜歡的, 都是大家成家人 (甚至幾家人) 夾手夾腳的時刻...

2012年1月20日星期五

團年

不是單一項記事, 而是記情.

為新人證婚多了, 見不少在婚禮上的感動位, 新人有時會流著淚去多謝家長和家人多年的照顧. 

的確, 那天是特別的一天, 那刻是特別的一刻.

然而, 婚後是否真的願意, 又是否真的能夠一直 keep 到和伴侶一起, 也繼續和自己家人維持一個真的是"一家人" 的關係, 又是另一回事.

今年百事可樂不知用幾多錢, 請了好幾位中港台的大明星拍了個廣告, 當中用百事和樂事著片等等的「食字」位多得有點吃不消, 是十分「內地」的廣告.  不過當中的 concept 我極之欣賞.

你記得小時候父母對你說的一句特別話, 一件特別事, 或者一件特別的東西嗎?  長大以後, 會不會就讓其他的記憶蓋過了小時的印象? 

不同的地方有著不同的世情, 內地人時時去外地打工, 回家過年是件大事.  但我們身在香港這福地, 要回家就不是易得多嗎?  而今早聽到一宗交通意外, 坐朋友車回家的男人就被一個醉駕司機撞死了.  當然, 他從不會知道, 他以後也回不了家.

身為一名「老豆」, 好易就可以體會到張國立在廣告劇中的心情.  這個廣告讓我感動. 我沒有收百事任何錢或利益, 但衷心多謝他們. 最抵死的是, 這廣告最後的署名, 是「一群在百事工作的年輕人」message 就是「我們已在回家的路上了, 你呢?」



學會珍惜, 不要給機會自己去後悔...

2012年1月15日星期日

超錯與超蠢


任何人呢, 間中都會做些蠢事, 有時蠢的程度真係匪夷所思的. 

聖誕前的一通電話, 帶來一宗小生意, 是一宗刑事案. 案中兩名被告已經認罪, 希望找位大狀幫手求情. 大概是「干擾汽車」和「無獲授權下駕駛車輛」之類.

案情透露, 事發時兩人相約, 分別駕電單車去一個地方再轉乘其他車輛去, 去哪就不重要, 最緊要是本身不是去做任何犯法的事.

好了, 一人早到泊好自己的電單車, 見到旁邊有另一架不知何人的電單車泊著, 車匙竟然還插在車上, 還連著車尾儲物箱的匙.

早到者不知是八卦還是怎樣, 拔出車匙, 開了尾箱, 翻了一輪見沒啥特別, 便把尾箱再鎖上, 車匙插回車的發動掣上. 

這時另一遲到的也來了, 泊好自己的車過來, 早到的大概是告訴了他有個「傻佬」泊了車忘了車匙之類的. 這遲到的便去看看, 又不知何解的, 竟然跨上了這電單車, 撻匙駛出來兜圈. 或者是見無人又好玩吧, 便駛去隔鄰街, 這時才發現自己原來已經遲了, 便求其放下了車在隔鄰街旁, 兩人便匆匆走了.  忘了車匙的原車主回來, 當然在自己的泊車位置找不到車, 也就報警了.  而警方也好快找回了失車, 因為就咪o係隔離街囉...!

當時無人知道, 整個情況都被旁的變電站閉路電視拍下. 

數天後, 警察找到了其中一位, 他主動承認了是開了人家尾箱, 於是被捕.  他妻子致電開車的那遲到者, 他當然嚇得魂飛魄散, 即刻跑了去警局自首.

整件事看來都是不可能發生的事, 偏偏卻發生了.  好在法庭見他們紀錄良好, 而感化官報告也相當 (直頭係罕見地咁) 正面 (他們認罪當日由當值律師計劃代表, 他合理地向法庭申請取感化報告並交由正式代表律師處理 [即係老朽和相熟的為食大狀] 所以才會有此報告). 在大狀求情下, 兩人都是被罰社會服務令, 加上罰款便將社服令酌減. 

蠢就不是我自己說的, 而是當事人在法庭和法官自己都說的.  至於係咪真係蠢同有幾蠢, 就大家自行評價喇!

2012年1月13日星期五

親子入廚輕鬆煮 - 酥皮卷卷卷...


女王成日都鍾意食o的香口野 (有邊個細路唔鍾意丫...) 上次去學校旅行時整了那酥皮後, 就一直念念不忘. 夫人亦想知道究竟老朽係點整的.  雖然老朽試過搓酥皮但係完全唔成功, 而且功夫, 好玩程度和價碼不成正比 (老朽本身不是極喜好整餅的) . 最後決定, 都係學外國好多節目的廚師一樣 - 買現成酥皮算了...

呢款酥皮餅呢, 仲可以畀新婚的夫婦們一個 impress一下你老公/老婆的機會, 因為好易得來又好味. 

詳細的酥皮製作過程可以參考呢度:
http://www.wikihow.com/Make-Puff-Pastry
http://www.youtube.com/watch?v=Zg-ybzGok3U&feature=related

現成酥皮又好, 自己搓又好, 總之就有件酥皮啦... 之後就灑粉在工作板/平薄砧板上和件皮上, 再 roll薄佢 (如果無麵粉棍的話用高身樽, 我試過用長身廚房紙筒都得!). 薄到 1-2 mm 就o岩架喇.

之後可以準備餡料, 可以係...

- 切碎晒的煙肉 (唔使先煎/炒) 加入茄汁和 basil葉碎

- 炒香的洋蔥磨菰碎加少少忌廉湯底 - 切勿開稀, 做餡的話要好稠的, 唔係一焗就會瀉水.

- 叉燒粒加少少叉燒醬

以上幾款可以用來整批仔, 切大約4吋4吋的酥皮, 餡放中間, 用蛋漿掃邊, 對摺封口 (用叉子尖壓實批邊), 批面掃些蛋漿就可以放入已經鋪好錫紙掃了油 (橄欖油可矣, 防黐底) 就可以入爐.

如果好似我咁想簡單點又畀女王都玩埋一份的話, 就好似以下咁:



一款就係 Basil 煙肉碎, 另一款係買回來的香草醬 pesto. 仲有兩款無show到的係用黑松露醬加橄欖醬 (olive pulp), 唔建議用100% 松露醬因為太香太搶味. 我建議最多用一半松露醬, 少O的仲好, 其餘份量都係橄欖醬.  最後一款係買回來的蕃茄吞拿魚醬.

我就叫女王大約平均地塗上薄薄一層, 之後切開約一吋左右寬條, 兩邊卷埋 (想要簡單點, 好似我就叫女王直頭可以就咁卷起) 細細粒咁, 開口在底, 又或者用蛋漿封口;

如果係就咁卷起的話, 就又係排在掃了油的焗爐錫紙上, 中間要留一倍的位置等佢發大. 頂上掃點蛋漿焗起來會金黃點.  如果係兩邊卷的話就打橫放, 發得靚點.  (我就係無打橫, 所以發起後有點歪...)

預熱焗爐至190-200 度後, 焗 15 分鐘左右便可以了. 喜歡吃芝麻的話可以掃上蛋漿後加一點點芝麻同焗.



可以係餐前小食, 前菜, 下午茶, 整定焗返熱當早餐... 之類之類...

女王食咁食, 因為其實都有點熱氣, 所以... 食左幾次後女王有點喉嚨發炎呀陰功...~!

2012年1月12日星期四

正能量達人之 - 第二步曲

幾個月之前 (大約都有大半年了...) 老朽寫過有關專業調解員 (mediator) 的課程.  老朽上了之後就開始排隊考試, 因為坊間似乎認受性最高的就是香港國際仲裁中心 (HKIAC) 的考試, 而且如果在 HKIAC 考取資格後, 是可以向香港律師會申請豁免再考律師會那 Panel 的.

因此, 這個panel 也是香港各大可有資格給予「認可調解員」的團體中最多人報考的, 也因此我去年4月左右報, 一排....... 就等到十一月尾才有得考.  據我認識有份參與評核工作的資深調解員所言, 是因為人手不足, 他們作為資深調解員每天工作本身都有一定繁重, 但作為「考官」他們不單要付出一整天的時間來為考生監考和評核 (後面有詳述), 而且可以得到的金錢補償是比他們當調解更少的. 

背景就係咁, 所以其實去年11月就已經考了三天的試.  形式係好似 role play 的. 每天會有三輪考核時段, 每名考生 (surprisingly 原來只有三份一左右是律師, 多數係其他行業的從業員和專業人士) 只會在其中一次當被考核的調解員, 另外兩場就要做「戲子」, 當有爭拗當中的一方, 而且須按一份預早由總考官定下的 guideline 行事 (不過事後發現其實真係有不少考生會有 over-act的情況, 我以為係同班同學 practice 時才有人玩野唔跟 guideline 畀流料, 點知原來考核都有人玩, 仲係專登玩, 而且其中一人玩的係我!!).

當然over-act 的不會是我, 因為累死人的話對自己其實無咩好處. 所以每次我 act完之後考生都會來多謝我的 (唔係我點可以在我那班上取得導師的「最佳演員獎」呀...)  , 不過其他人唔係咁諗呢...

考是考幾天的, 任你報幾多日, 規則訂明三年內只可以共考六天, 而當中最少要有兩次是得到評核官的推荐 (即係"合格").

我第一天考的就是碰到一位這樣的 "戲子". 當時我還以為她好好人, 後來過了那天, 有另一位做相同角色的朋友和我傾開, 才知道原來她根本是倒過來over-act的, 我平日都好老脾, 但我聽到老友咁講, 我即刻問返相熟考官, 得到的是相同的答案 -- 當時就真係激到彈起, 怕自己被人累死的.  不過後來才知道, 原來我那位考官都知道這個問題, 最後覺得我處理這麻煩人做得不錯, 所以都 "pa" 左我. 哈哈.

第二天遇到的是好parties, 不過衰在考官係出了名的殺人王.  其 comment不公程度是難以想像的, 我原本直頭打算上訴. 其他認識的考官一聽到這考官的名字, 畀了兩個忠告我: 1) 佢肥梗你架喇, 唔好奢望; 2) 佢既comment可以不理, 因為和大部分其他考官的就算唔係相反都唔係大路野, 聽佢講下次撞其他考官係死梗的.  :P

第三天呢, 遇到個正路的考官, 也遇到兩位之前已認識的 parties. 但這位考官太正面, 當時反而在考完後 (是有個考官畀 comment 時段的) 根本只有讚無彈, 搞到我仲驚. 我問返佢係咪真係咁好, 佢竟然答: 「我真係咁覺得喎, 我畀唔到咩更加改善既意見呀~!」當然, 呢位考官就的確係高分 "pa" 我的. 

當然, 可能有些人哥見到呢篇文會覺得「好小事唧」; 不過為我來說, 你當我蠢又好, 當我亂講又好; 畀完皮幾野之後其實真係覺得幾大期望, 最後我可以一著夾中無浪費金錢, 真係還得神落.  我知道, 和我一起練習的同班人士, 過半都係最多只有一次 pa, 要下次重考, 而按一位考官說, 報重考要等多八個月......... @@"

今次算係執身彩; 但當然, 之後會唔會有調解的生意, 又係後話了...

2012年1月10日星期二

跨年家宴 2011-2012

除外父一家的中餐外, 一如往年到大除夕, 老朽都會煮一餐西式的給父母, 食到跨年倒數再添些小食才去睡的, 今年女王也第一次咁夜訓倒數埋先睡, 佢就當然作晒反啦...

今年的 menu 是...

沙律-
松子仁鮮帶子茴香 (fennel) 沙律配柑橘橙汁, 係之前在看意大利煮書時見到有類似的, 自己做一次. 帶子是北海道大粒的刺身種, 開邊略煎就上碟. 柑橘橙汁就係榨汁後加入鹽和少少胡椒, parsley後用橄欖油打勻而成



鮮無花果意大利火腿沙律脆餅(紅糖黑醋醬) - 是用買回來的 crostini 餅, 放上小塊的 parma後加一小件新鮮無花果, 再glaze上一些自己煮的 basalmic cream. (errrr... 原本係煮來送給細細妹的, 不過自己試味又試味, 試試o下自己食晒... sorry... ^^")


餐湯-
洋蔥絲清雞湯 (加入了茴香那硬到唔食得的莖去煲的, 好香...)

主菜-
海鮮盤 (Citysuper訂回來的, 好大個...有麵包蟹有龍蝦半打青口半打海螺仲有半打大蝦)
煙燻法國走地雞 (馬會出品, 係由生煙熟的, 用焗爐低溫翻熱就食得, 仲非常好味...)

香蒜牛肝菌玉米粉 (polenta)

牛油炒菠菜

[以下三樣係原定菜式, 最後因為食海鮮同雞已經飽了所以留到1/1中午才煮...]
-意式蕃茄醬煎黑豚柳
-燒和牛肉眼
-檸檬鹽燒鱸魚排 (都係普通煎下燒下咁啦, 係個魚就用檸檬鹽擦勻, 兀一天後只煎有皮那邊, 煎脆後加入雞湯, 蓋上後「蒸」五分鐘使魚柳肉嫩滑僅熟, 之後打開蓋使皮再次變得脆身, 之後加上數片輕輕炸過的鼠尾草 sage點綴一下)


甜品
焦糖燉蛋(CrèmeBrulée ) - 呢樣就真係夫人的傑作了.  因為買了噴火槍, 好好玩...

之後倒數時吃的是例牌的日本式東西為主:  伊達卷 (加入魚漿的甜蛋糕), 丹波黑豆 (甜的) 和築煮魚, 還有一款又是 taste italia學的... 炸意粉...



是用幼身意粉煮好隔水, 之後將蜜糖加入切到好碎的果乾, glaze 上去後再灑些開心果碎和玉桂粉.  個 feel好聖誕新年的...

2011對我是個好怪的年頭, 公司多多事實, 最後離開了, 但又多了很多不同類型的客戶, 而自己煮野食又明顯有更進一步的 "功力", 女王又突然好似大個左好多咁.  再加上臨年尾和朋友搞了點小生意 (但又有些怪問題...唉...)  , 不過又畀我考到 mediator 調解員喎 (此乃後話...) 這年實在是活得... 唔.... 用「太精彩」來形容都是對的...