女王下廚

之前在學校, 已從老師身上得知女王有試過將麵包塗上牛油和灑上碎糖, 是為 "fairy bread", 是澳洲小朋友之間頗為出名的 party 小食. 試過在家做一次, 女王也懂 "教返我地" 去做.

上星期復活節放假, 臨放假前一天是女王學校生日會. 那天會比較遲上學, 而當日因為保姆姨姨請了假, 我便也請一天假來陪個女, 順便設計了一份她會愛吃但又有營養的餐單, 也希望她幫手做些準備工作 (這是老師也贊同的). 最後和女王決定以她相當喜歡的 thomas 火車頭 (雖然佢而家鍾意米奇多少少) 做藍本, 做了一份「火車維修站」出來, 不過因為隻碟唔夠大同埋唔夠平, 所以排盤做得有點亂.

先看一下成品去 visualize...



當中的...

火車軌: 香草牛油燒大蝦串, 用一丁點鹽/胡椒粉將虎蝦肉醃了一會, 串起用橄欖油煎至大半熟時搽香草牛油, 之後放入爐低火焗 8 分鐘至牛油融掉便可以了, 不要過火, 唔係的話蝦會硬身.

火車: 忌廉磨菰 (用了 porcini 牛肝菌) 酥皮盒 (vol au vent), 是搓了現成的酥皮, 和加入一些酥皮碎做車身的裝飾, 旁邊的碟皮想厚身的話要加到五六層才夠高. 我只用了四層 (費事整得太大份食唔晒), 餘下未完全解凍的酥皮盡快雪好下次用 (不要等到差不多解完凍才切酥皮, 否則會好黏, 之後就起不到好的酥了)

忌廉就只是用了一罐金寶湯, 開得稠一點, 加上用蒜炒熟的磨菰片煮滾便成.

那煤炭車卡就是: 脆烤麵包條; 做法是將麵包切成方形飛邊, 之後叫女王塗上牛油後再切成條 (切野梗係我做啦), 之後就叫女王搬來那張企凳, 慢火燒熱平底鍋後熄火, 叫個女將麵包條放入鍋中, 輕輕用鉗掃鬆; 不過呢個時候其實女王隻手仔有一次輕輕掃到鍋邊, 有少少熱, 不過無事. 待差不多煎好時就由我取出.



煤炭: 藍莓乾, 可以話係女王至愛之一. 是由她放上去用麵包條砌起的車卡的.

火車轆: 鹽煎對半切開的大帶子. 快火煎野梗係我做返喇.

女王到吃的時候, 因為自己有份整, 食得得別多, 也特別快; 而且也十分開心 (梗係啦, 仲有o的包同埋酥皮都脆脆地!)

不過有樣野就一定要同佢講o既, 就係說明平日不可以自己上爐頭, 一定要有我們大人看管著才可以. 又提起之前辣到一下的事讓她明白.

讓小孩可以參與做東西來吃, 是讓他們吃得更好的一個好方法. 今次都可算係大成功, 仲可以下兩星期回學校幫手講故事時 (係呀, 開學時我和夫人都話幫手, 我講故事, 夫人就幫手搞生日會; 上星期靚女班主任打來請我返去講的) 畀老師睇o下晒o下命... wakakaka...

宵夜精選 ^^"

身為為食鬼, 又點可以唔食呢?

不過近三數星期, 已經被不同的朋友, 親戚, 甚至女王的醫生說老朽比過年時更肥了一截, 似乎, 真的要節制一下食量, 和自己最愛的宵夜了...

呢幾款係早幾星期的 "舊作", 其實, 食少少都得o卦?

吞拿魚治變奏 1 - 炸多士加烤七味粉



是用一塊麵包, 先炸到脆和無油, 之後塗上吞拿魚, 唧上沙律醬和灑上七味粉後用火槍燒至少少焦, 味道有點辛辣和苦 (因為燒過), 但係七味粉中的芝麻燒到好脆.

吞拿魚治變奏 2 - 西多士

中環某老牌 "蛇竇" 見過這款西多. 依樣胡蘆的做一次. 竟也似模似樣, 其實就是港式的西多, 只是花生醬換成了吞拿魚沙律醬. 一樣是加糖膠吃的. ^^



之後到貴價野出場... 松露雲吞



其實是上月買來給東亞運義工頭那班嘩鬼食, 但係最後食唔晒, 所以買了也沒有煮到.

就是用加了少少鹽和橄欖油的滾水灼煮了 ravioli, 之後趁熱熱地撈一下 (一丁點可!) 白松露鹽, 松露油; 和最後加在面的黑松露醬. 因為其實都幾大隻, 食數隻已經好滿足了.

記住, 因為煮的時候已經加了少少鹽, 所以用的松露鹽好少已經夠. ^^

學寫字 & 學... 影相?

學校例牌的, 到學期尾開始就會開始教執筆寫字.

以前我們一代, 是由長輩 "開筆" 後直接開始寫簡單的字同 "一", "水", "牛" 之類的. 現在什麼也講循序漸進, 所以上兩星期就收到一張紙, 說是會逐步教女王用筆, 之後就是學 "點點" (為圖畫點上芝麻), 圓圈 (為小魚加氣泡或者畫餅仔), 直線 (畫雨水), 曲線 (畫意粉); 還有另外一套教材用來訓練手指的活動. 都幾好玩.

女王樣樣都 ok, 就唯獨是畫圓圈有點難度, 總畫成一粒豆子的樣子, 彎彎的. 有少少怪. 也好好笑, 不過為鼓勵她, 我一樣會說 "幾好啊"; 而老師也一樣會給一個印仔 (不過畫得靚其實會有兩個印仔的).

呢期復活節, 女王都用不同物料做了不同的平面或立體的復活蛋. 當然, 少不了的多數會用她最最最愛的藍色做主色. 似乎她的 art sense 又強了. 學校要些交通工具圖片, 和她一起看網頁找了一些後, 忽發奇想 - 不如自己影啦. 於是就和女王 (當然 with 夫人) 一家三口去了中環碼頭, 以下作品全為女王操刀...





都算係咁o卦, 兩歲九個月影o既, 仲想點? :P

以和為貴: 正能量達人之極致 ． 認可調解員

去年香港法院開始強烈建議民事訴訟的與訟各方在訴訟進行期間 (或者之前) 進行一個調解的過程. 相信有不少行家都已經知道了. 而且亦有不少律師 (想) 加入成為調解員的行列.

其實老朽之前對調解只是一知半解, 因為我自己一向 handle 案件都係 "以和為貴", 絕大多數都能 "自行" 調解成功, 所以未試過整個程序. 不過一來有老闆推荐我去學習, 二來有客戶想我了解完之後向他們講解, 三來上完課程後可以得到每年必修的專業進修學分 (CPD) 之後成年唔使上 course 不特止, 而且一上就一星期, 得了的分數連下年度都 cover 了近半. 不過價錢也相對來說很高, 要八千個大洋.

既然報了就去試一下, 好在公司不用的請假上這個連續 5 天仲早過返工時間的堂.

唔上由自可, 一上才知, 原來大家以為 "吹吹水" 就可以做的 "和事佬" 一點也不簡單. 除了有特定的 protocol 要跟之外, 同時 "扮中立" 又要使本身勢成水火的雙方也有興趣 + 誠意聽你坐低發 up 風, 一點也唔容易. 而且, 就是因為雙方都係唔開心的來 (唔係都唔使打官司啦係嘛!?), 所以對對家一定有好大戒心. 如何在一天之內使大家由面左左變到 "面右右" (我胡謅的) 就係當中的妙處.

最基本的, 是 always 都要正面地看一件事 - 係任何一件事, 又唔可以得罪人.

呢一樣, 老朽倒是幾有信心的. 因為我本身可能是宗教使然, 都係正能量偏高的. 不過怎樣高也是人, 也有脾氣, 學做調解員就是要連這一點點的脾氣也要放下. 要做到呢樣, 簡直就似係出家修行的. 唔係正能量達人, 真係唔會做得到, 又或者說, 唔會做得好. 呢個做法尤如係將正能量達人的能力推至極限.

course 就上完, 同班同學都相當好傾, 下一步就係睇o下幾時有試可以考, 才可以被認可, 因為近年多人考, 所以合格率聽聞是故意下調的. 而且, 考試本身也要收費. 似乎律師會呀, 仲裁機構呀之類都幾豬籠入水了...

磯煮鮑魚

日文中 "磯煮" 的意思, 就是用醬汁加上海苔 (所以叫 "磯") 慢火去炆東西. 雖然煮的時間不會像中式老火一樣煮個多小時, 但也會煮上半小時左右.

日本好多個縣也有出產鮑魚, 或者一些可以用來 "磯煮" 的東西, 多數係螺肉, 貝類, 但有樣係他們都幾出名的, 就是 "磯煮大豆", 似乎下飯下酒也可以的.

上星期在街市偶爾見到有些大連鮑比一般的大一點, 便叫老闆秤了半打來試做一下. 我是自己回家剝殼的, 因為初時想連鮑魚肝都煮埋來食 (唔怕 "食屎"!); 如果唔想煩, 沒時間又信得過魚販 (怕佢呃秤) 可以請他們代勞.

一向比較少提供詳細做法, 不過有老友想知道o下, 所以寫埋. 做法都幾簡單, 我是在之前報紙讀過後睇埋日本的網站後自己又研一研就有呢個煮法. 呢個世界煮野永無千篇一律的, 自行發揮才是王道.

材料是

- 鮮鮑魚半斤至一斤

- 用來煮烏冬的木魚湯 (可以用粉或者用湯底也可以, 自己有時間煲仲好) 用湯底的話請開稀一點, 請參考樽上說明係用來 "煮", 而不是用來 "點蘸" 冷麵的濃度, 多數係 1開6份水又或者1開8的.

- 昆布三兩塊

- 小香信 (冬菰仔) 幾隻, 可以不加的

- 三幾件大根 (白蘿蔔)

- 味醂

- 日本醬油

- 砂糖或黃砂糖 (我用了三溫糖)

湯底以蓋過鮑魚和配料為合, 至於落味的比例大約是 500ml 的木魚湯會用 10-15g 左右的昆布, 約 100ml 的味醂, 50-100ml 的醬油 (要試味, 初時下 50, 慢慢加), 5 湯匙左右的糖 (黃糖會甜少少, 可比白糖下少一湯匙)

做法

先將鮑魚拖一拖水, 待三兩分鐘 "死晒" 之後取出洗淨和擦去邊位的泥 (先拖滾水取其小命, 可以保持肉質較嫩, 如先擦的話鮑魚會受驚收縮, 之後要十幾分鐘才可回復軟身), 如係無請魚販去殼的話就自己挖出鮑身, 去內臟和鮑魚咀, 如想食埋肝的話就小心取出鮑肝.

將水魚湯開好加入昆布和白蘿蔔及香信, 凍水落鮑魚, 煮滾後收至細火煮約 20 分鐘, 熄火焗 10 分鐘, 再開細火, 邊煮邊加入味醂, 糖, 醬油, 搞勻後試味和較味.

呢個時候如果你有留低鮑魚肝的話可以加埋落去, 之後上蓋煮 5 分鐘左右, 再焗三幾分鐘後, 便可以開蓋再開中火等汁慢慢收至稠身就得. 但鮑魚肝要再煮多十幾分鐘先會入到味.

煮起後可以即食, 趁熱熱地... 一起煮的蘿蔔和香信甚至昆布都食得的.



又可以雪凍佢, 大半天至兩天後再拎出來放至室溫, 竟然仲入味 (凍食會無咁鹹的), 而且仲神奇地有少少溏心的煙韌效果 (當然唔係真係溏心到可以 "鋸刀" o個隻啦)!



呢樣係真正好野, 夫人一向唔食隔夜野都照食多隻. 而且真係唔難整; 所以值得一試!

大茄子 - Aubergine

一向是個 "中廚", 不過近大半年來好喜歡煮一下西式的東東. 而當中又以意大利菜比較是心頭愛. 因為一來相對來說簡單直接, 二來雖然我不愛吃芝士, 但女王和夫人愛吃, 而她們又愛吃意大利 pasta 之類; 而且女王和我也十分喜歡吃蕃茄, 所以煮意大利菜加上意粉 (各式啦) 是近日星期六日沒太多時間慢慢煮幾味中菜時所煮的東西.



在一本英國印, 介紹意大利菜的雜誌中抄來改版的. 是上蛋漿煎起了的切件 aubergine 大茄子, 原作是加上烤過的 mozarella 芝士, 現在我就改了煎豆腐扒, 每層之間塗上了蕃茄粒和蕃茄意粉醬煮成的 puree, 最頂加上一片蕃茄頂, 圍邊就用了一些 pesto (意大利 genoa 出品香草青醬) 和剛才的茄醬; 再配以 pesto 炒意粉 (我和女王則是蕃茄醬撈長通粉 penne); 為了避免太 "齋", 加了一些烤脆的煙肉粒, 烤出來的豬油就用了一點來煎豆腐扒, 所以塊豆腐好鬼香...

意想不到的是女王食完一小碗又加多一小碗, 仲係咁食茄子 (一向唔太喜歡的), 可能因為蕃茄煮得幾好吃吧. 夫人就急不及待的開始了吃, 所以搞到碟茄子 stack 連相都未影就亂o左, 上面張相係夾硬砌返起再影過的...

我自己那碟因為畀女王 "蹂躪" 過, 更加不能入鏡... :P

女王金口語錄 (2011年3-4月)

雖然姨仔 confirm o左個瘤係惡性o既. 而且比想像中大o左少少 (成 10 cm 喎...), 仲散o左一粒好鬼細o既去另一條上身 lymph node 度 (真衰...); 不過問o左 prognosis 都幾樂觀, 所以大家都鬆o左少少又多o左o的o的正能量. 等下星期準備開始電電電電電, 電鬼死晒o的癌細胞... 永無翻兜, 阿彌陀佛, 天主保佑... XD

同時, 呢幾星期女王都多多野講... 節錄部分如下...

1) 國子監靚女班主任引述女王話「爸B煮o野食好好食呀, 不過媽咪就剩係識煮通粉」 (資料來源:接放學的麻麻) (其實唔係, 只係夫人近大半年都無咩時間煮, 次次都係我爭住煮, 所以廚藝退步了)

2) 女王:「爸B送個晴天畀你丫!」(已經 "送" o左畀媽咪, 所以送埋畀爸B)
我:「多謝呀~ 咁個晴天o係邊度呢 (望上天, 作指示狀) ?」
女王:「o係電視廣告度!」

3) 剛剛戒片的女王在麻麻屋企 "度假", 有晚突然跑去姑姐側邊叫 「要噓噓呀~!... 嘩! 嘩! 快o的呀, 就來頂唔住喇!」

4) 原來女王唔鍾意用 "獅王牙膏", 之前睇廣告又鬼殺咁嘈要用, 而家一刷牙刷o左幾下就會喊晒口咁叫「唔玩喇! 收工喇!」

真係都唔知畀佢激死定係笑死... 但係如此下去, 我怕女王太 "精叻", 變o左o的無童真的 "港童" 就弊...

結．fun．結．分...

先說 "分".

姨仔剛被驗出患上 lymph node 的腫瘤. 未知係良定惡.

係, 就係剛剛結婚那位.

因為之前我在醫院工作過, 馬上問了有關的朋友們. 當然, 最 "好" 的結果, 係 "只係肺癆". 但大家都知, 其實係腫瘤的機會也很高.

她和新婚的夫婿拔少心情還可以, 因為我 check 過, 以現時得知的病情, 如果真係癌科的話, 她的治癒機會很高; 不過有樣衰, 就係逢係 lymph 的話就切不得, 只可以化/電兩種療法雙管齊下. 雖然現在的新藥副作用細得多, 但都要捱一輪, 但總算是有希望.

外父外母的反應就相對來說大得多. 去年初外父患過前列腺癌, 也是因為初期發現了腫脹, 看醫生才知不是一般的脹大, 所以早早治療, 所以他聞癌色變.

我知道這是一場要大家一起去打的仗, 早兩年夫人有位同事 (倒不是我證婚的) 的太太就是新婚後不久發現癌症, 已經晚期, 幾個月後不在了. 夫君大受打擊, 辭職旅行去, 做了個浪人. 雖然不是第一身, 但卻極替拔少擔心, 他的壓力一定很大. 在私下電話中他聲顫顫的說看到電視, 見到人家老夫老妻拖著手, 自己突然覺得, 和姨仔會否有機會去到呢一日呢...他們, 會不會被病魔分開? 連我聽到我都忍不住眼紅紅.

可以對他說的是, 上天安排他先和她走在一起, 才給予這個考驗, 不是用來懲罰任何人, 而是要堅固他們, 也為使他們可以互相扶持. 因為, 兩個人去面對, 比一個人面對為好. 他, 有這個使命.

我所擔心的, 反而是, 如果真的是一場持久戰的話, 作為丈夫的支持, 可以頂得幾耐? 會不會在三數個月後便影都唔見?

最近 "又" 有一對我證婚的新人找我, 說他們要離婚了.

不知幾多百對我見證的新人之中, 是第三對. 或者仲有些是我不知的.

我不怕在我的 blog 中說有客要離婚會 "唔老黎", 因為是我真心想說的話.

其中一對, 我知當日的新娘有可能有看我的 blog 的, 我不知現在的她還會不會想追討什麼. 但我是極不希望聽到這些事的. 我想她/他們先冷靜一會. 因為這時, 就是火遮眼的時候. 不冷靜下來, 只會有更多更多的人受傷.

又或者, 有時新人會慢慢忘了我在婚禮上勉勵的說話. 有時我不禁問: 「是我不能讓他們把我的話刻在心板上嗎? 是我不能在他們開始之時就好好地指引嗎?」

我知客觀來說, 證婚律師幾叻都只係一個 service provider, 不是家長. 不可能有咩可以要求的. 不過, 我心內的確你 "la 住 la 住".

兩個人要分開, 本身已經是一個傷害, 有時, 當局者會覺得好辛苦, 因為要解開一個令自己不開心的心結, 談何容易? 但要解決, 不一定要將所有自己要的東西全都取回. 家事法庭也有法官說過, 兩個人分開時, 不可能將所有東西都變回像無結過婚一樣, 因為, 這個是一個回憶, 不論你承認也好, 不認也好, 開心也好, 不開心也好. 它也存在過, 而且, 也一定曾讓你快樂過. (好難想像法官會咁講野呀可? 但的確, 我聽過)

兩個人在一起, 會不斷, 不斷的接受各式的考驗, 這是所有人結婚之前都應該知的事. 我在多次婚禮上也有重申. 這個是一定要知的事實, 而婚書也不是一張紙, 而是一個承諾. 十年八載前婚姻率下降, 就是因為當時人不太喜歡 "承諾". 但近年來似乎多了人認同這個一生承諾的重要, 所以結婚人數又升了.

但既然認同, 就唔該認知面對. 有問題, 是一起去面對, 不是分開就可以解決了的.

你以為我和夫人也是由頭順到尾的麼? 我們也會有拗撬, 也曾經暗肘會不會分開. 但經過數年下來, 大家開始慢慢覺得, 自己生存不能沒有對方, 而且和對方的家人也開始產生了 bonding, 縱然這個 bonding 有時也會備受考驗.

如果你要結婚, 想清楚; 如果你要離婚, 更應想清楚. 所有決定了回不了頭的事, 都一樣.

***

再說 "fun".

見證過的新人中, 也有很多過了一年半載後就會有小孩; 和不少新人也成了朋友, 在 facebook 也好, email 也好, 都會知道他們懷了小朋友.

最近一個月就已經有三位我見證的新娘子做了媽媽; 每次, 我也會有一段特別的祝福 email/message 給他們.

因為見證了一次 "一生的幸福" 後, 再見證小生命的誕生, 是個極之奇妙的感覺. 簡直有點像... 做了契爺的感覺. 而且, 很希望這個感覺可以一直漫延下去; 感染更多的人.

畢竟, 人生一定是希望多於失望的.

又一間...

前天見到一間都幾大o下的證婚公司 奇妙姻典 無啦啦結業, 一看之下, 發現原來 2009 年 又係 4 月初的時候係另一間 2in1 執笠之時, 當時老朽寫下了一些小貼士, 可以參考一下 這裡...

今次又來一間, 好在相關的律師行家還有良心, 已經 engage 了他們的都照樣為新人證婚, 不過地點就要另擇了.

作為一個都有返少少社會責任o既證婚(監禮)律師, 見到呢個情況呢... 既然如此, 老朽也不妨開個方便之門. 如果你是 book 了奇妙姻典的新人的話, 又或者認識這些新人的話, 可以找我幫手證婚, 如果時間合適的話, 我可以以我收開的一半價錢來幫他們 (唔收又唔得, 因為我已經好 full o下); 條件係一定要給我看到之前 奇妙姻典 的單據. 我也可以開返張單給新人以作日後有需要追討之用 (well, 雖則多數都未必追到... @@") 不過證婚場地我就真係提供唔到 (除非上我工作的律師樓...), 可能要返擺酒地點才行了.

重申一次, 老朽從不在此賣任何廣告 (因為以在下的工作量來算, 實在無必要), 今次肯蝕本賣大包純粹因看了報紙見到有不少新人頭都大埋, 而又知道有其他行家也一樣願意收平價幫手 (咁我都唔算標奇立異丫嘛) 所以才有此打算.

總之就希望所有新人都順順利利啦!