2009年3月31日星期二

突然有感 (唔係新詩來的)

而家係晚上十一點四十五分

老朽仲在公司

剛才和老闆 & 客戶食飯, 之前仲整一單老朋友證婚

明早九點半上庭, 代其中一位老闆, 見高等法院大法官

五小時前臨出去證婚老闆先畀齊文件我 (頂!)

同客食完飯仲要回公司睇文件 (睇到悶咪打o下 blog)

今晚回家女王應該已經訓著覺了

可能仲有文件要睇同埋準備

仲有, 老朽夫人應該會留返女王o的碗畀老朽洗 (算啦, o岩o岩打返去, 夫人幫女王清緊 poo poo)

但係老朽一定一定會樂意咁做 (雖然可能一路洗一路自言自語媽叉兩句)

因為我愛夫人, 我愛女王

講完 :-)

真的值得讚揚嗎...?

原本忙得很, 但一定要寫這兩句:

擇自生果報:

馬 路 邊 做 功 課   窮 男 童 有 出 息

內 地 各 大 網 站 近 日 流 傳 一 張 名 為 「 公 路 邊 寫 作 業 的 娃 」 的 帖 子 , 帖 子 中 包 含 了 6 張 相 片 , 拍 的 是 重 慶 一 名 小 男 孩 蹲 在 雲 陽 縣 清 水 鄉 村 公 路 旁 的 水 溝 內 ( 圖 ) , 不 管 車 輛 經 過 、 灰 塵 撲 面 , 他 依 舊 以 溝 渠 為 凳 子 , 公 路 石 壆 為 桌 子 , 認 真 地 做 功 課 。 照 片 令 許 多 網 民 動 容 。 有 人 心 酸 , 有 人 大 讚 「 這 娃 日 後 有 出 息 」 , 「 這 就 是 我 們 農 村 孩 子 的 模 範 呀 ! 」

好簡單的一句 - 讚甚麼? 窮孩子有意讀書 "改運", 偏偏遇著一個窮困和貧富懸殊的社會, 有啥模範? 對比著昨日同樣報導的內地貪污疑犯高官, 中國的地方官還有人性嗎?

每天內地不同的電視台都會播放各式明朝清朝的劇集, 述說貪官如何被貶被裁, 點解o的人仲唔醒...? 在內地, 小恩小惠倒也罷了, 但係大貪特貪而眼見一路之隔的窮孩子無書讀甚至無飯開, 一樣無動於衷...

朱門酒肉臭, 路有凍死骨, 老朽雖然成日食食食, 但係點都無呢班人o既狼子之心, 因為我係人, 人係做唔出呢o的事的.

2009年3月29日星期日

奇景...!!

在老朽夫人訓練下, 前晚女王食奶時畀老朽發現此奇景...



加上見到女王一次過出多三隻牙仔...睇到老朽眼都突埋!

其實, 問心o個句, 老朽有少少唔捨得由得女王躺在 hi-chair 上自己食奶 -- 雖然呢個係一個進步, 但亦代表女王已開始慢慢進入一個新的階段 -- 老朽以後好難抱著她慢慢餵, 近距離的細看她了... ><"

2009年3月27日星期五

今個星期食o的乜!?

不爽的宵夜...

早兩晚宵夜, 是自煮的公仔麵, 不過不加湯料, 改用 xo 醬, 金蒜和之前大狀友人送的黑油膏當撈麵. 味道是不錯的, 卻吃得不爽 -- 點解會深夜肚餓呢? 就是因為之前食得唔夠, 點解食得唔夠呢? 就係因為無食飯, 而陪大老闆去了一位老牌大狀的辦公室參加一個紅酒會. 老闆叫老朽做 "尚膳監", 主理下酒的小吃.

老朽已經不是第一次做此工作, 亦做得不亦樂乎; 不過今次大狀那邊有一位女大狀, 平日都係粗聲粗氣那種的, 她在紅酒會開始時, 一見到老朽準備的食物便說道 - "你買的東西無一樣係我食的"

老朽買的就是一些潮式鹵水鵝肉, 內臟, 豬頭粽, 炸魚皮, 當然還有一些西式火腿 (選了 San Daniele), 芝士 (用了大老闆愛吃的 Cambozola).

其實老朽之前也買過類似食品, 大家都覺得不錯. 今次卻因為此女大狀公開說出此一句, 一班羊群人 (包括我老闆) 便也好似覺得老朽係千古罪人似的, 盡量不去碰老朽買的下酒小吃, 大老闆更加係覺得 "瘀皮".

本來好端端的一個開心聚會, 本來對方的老牌大狀開了極好的紅酒 (1983 Latour, 1995 Ducru-Beaucaillou, 2000 Gazin), 本來老朽可以開開心心的過一晚, 因此一句, 成晚不知幾多說話聽, 吃的東西都係背脊骨落.

愈吃愈覺得不爽, 連帶此碗本來做得不錯的麵也吃得像嚼蠟.


新景園

星期六, 無咩節目, 仍要上星期六班的老朽去了灣仔春園街的新景園飯店, 為的是一盒...



炸豬排.

不知大家聽過沒有, 不過他們的港式炸豬排真真真真真...係極之好吃, 每天有專人鎚鬆豬梅排. 雖然老朽買兩盒炸豬排飯 (當然要和夫人分享啦!) 已經用了港幣七十二個大洋 (加底飯盒 $50, 另加一塊排 $22), 但仍大呼值得.

北角鳳城

老店一間, 已經被各大食評寫到爛了, 其實太子, 北角, 還有由新光集團經營的其他店都不是相差太遠, 因為說穿了就是三師兄弟在不同地方分了家. 今晚老朽的中學同學本是為了一位剛由外地回來小住的老友記洗塵, 打算往渣華道街市東寶, 之前提過的準新郎 "班長正" 卻忘了訂位, 大夥去到東寶齊齊 "開汽水咁聲" 之餘, 便改行去了鳳城.




之後仲成班人去了老朽已經年多兩年無去的地方 -- 酒吧... 大家一邊傾一邊玩骰盅, 好快已經玩到成點鐘... (特此鳴謝老朽夫人批出 "假釋批文" 兼頂晒成晚女王起居飲食...)




又想起, 其實老朽本星期還和公司客戶食了金鐘 Conrad 的 Nicholini's, 另外又有大狀請了去蘇淅會所吃了他們的燻蛋和超正煎八寶飯...

睇睇o下, 原來呢個星期倒也過得不壞呢... 心情又即刻好返好多了...

2009年3月26日星期四

兩個口

在這裡看得久的朋友們都知道老朽之前有一件案對住兩個無律師代表的人, 老朽直頭憎到佢o地死. 仲要撞著個官係唔睇文件又唔記得自己講過咩的 "奇官".

好不幸, 昨日又見到佢o地. 而原本半小時的指示聆訊變成三小時.

捫心自問, 老朽真的沒有準備不足之處, 不過對方自恃無律師, 所有問題一律 "扮無知", 而有關法官則繼續她的嚇人本色.

此案是為銀行追債, 當中涉及數種不同的借貸和利息計算方法 ,老實講, 有部份利息老朽覺得銀行是收得取巧了一點, 但有另一些卻是有例可尋的.

最頂癮的是呢位法官 "明屈" 老朽, 說老朽上次聆訊同意了某某利息的計算方法, 而事實上老朽從無如此做過 (收少十幾萬息喎大佬, 老虎蟹都唔同意啦!), 而因為上次聆訊最後法官明令老朽計算多一次, 於是老朽便順其指示作出新的計算 (即係 "我唔同意, 但你係官, 你叫我咪計畀你睇囉"), 並且相當相當努力的做了法律研究工作, 最後找到數隻英國上訴庭和樞密院的案例, 在有關文件上援引出來.

法官大人就係咁, 問老朽 - "我o既記錄就係咁, 不如你聽返上次錄音丫"

法庭一向會將所有聆訊錄音以便日後查閱, 但事實上多數只會在日後其他相關案件用作佐證 (如交通意外索償者會索取意外司機的不小心駕駛案件錄音資料), 在同一案件審理時, "回帶" 聽之前的錄音比較不尋常, 而且有少少似 "落個官面" (即挑戰法官之前的筆錄) 的意味, 我輩上得庭多的行家極少會如此要求.

但是今次真係明屈, 老朽想了一會, 回道 "謝謝法官, 我希望聽返".

法官呆一呆, 或者覺得 "大你唔到添". 之後便休庭叫老朽和對方 (那兩條 pk) 一起等等, 自行聽取有關錄音. 法官退席後, 老朽仲畀那兩條 pk 串, 叫我叫出面的 "阿四" 等多陣啦, 無咁快!

那位是我的好同事, 專責法庭文件工作, 有時多文件的話也會請你幫手拎o下篋; 我一聽到對方的言論, 真係火都o黎埋, 喝一句 "咩阿四呀, 佢係我公司的法律行政員! 唔該你講野尊重o的!" 佢仲想駁咩 "阿四有好多意思o架" 之類, 佢個妹 (另一 pk) 見勢色不對, 便向我們賠個不是.

找了好一會, 最後找到那段, 卻是老朽從未有同意過有關的計算方法, 法官當時說 "你們雙方無簽過呢就唔可以收此利息" (事實上樞密院案例講明可以收, 但當時無案例在手) 老朽當時是說 "我返去 check check". 之後法官下令 "你返去(用新方法)計埋個息畀我"; 老朽回 "得, 無問題".

對方係賴皮到極點的人, 就算聽到咁都唔會和老朽一起向法庭指出她有錯; 於是老朽只有自行向在場的書記提出, 有和我們一起聽到的書記便回到內庭 (斷估都有同個官講佢記錯了), 之後便出來說 "法官遲少少自己聽返, 之後會找你們, 一陣佢出來會畀其他指示..."

超!!! 無 "吉士"!!!

2009年3月22日星期日

兩場婚禮

這兩天忙這忙那, 幾乎忘了自己有個 blog.

去年尾的一宗案子, 法援臨時縮沙, 我方大勝之餘, 還有一條訟費尾巴; 不只保險公司, 連我自己也覺得不可以放過對方; 原本雙方已經 "起晒鋼", 如箭在弦, 準備下星期為了訟費一事再次對簿公堂, 卻是柳暗花明; 前晚大大大老闆漏夜以手提致電, 謂有關方面的極高層 「無啦啦」打佢手提, 並聲稱 "以和為貴, 萬事有商量" 云云, 至昨日兩個巨頭傾了五分鐘, 整件事便作個了結, 我方繼續大勝, 雖然稍退半步以保全局, 亦已經贏了有關方面 「九條街」; 老朽倒也真的見識了大大大老闆的 「江湖地位」; 可惜箇中過程與和解的詳情, 因為屬於雙方 "無損權益" 的商討, 老朽無法在此分享, 只可以說句: 正義長存. 阿彌陀佛...

是日星期六, 亦是清明之月前最佳的嫁娶日子, 今日就有兩對新人由老朽證婚. 而因為最近 "忽然" 重拾攝影樂趣, 而且與新人熟絡, 故央得兩對新人同意, 老朽在證婚之餘也權充半個攝影師; 而也為了他們又購入了 Nikon 的 105 micro 人像鏡... (其實係自己想買!)

說回今天, 兩對新人, 一對日間在康文署的公園行禮, 另一對傍晚在酒樓註冊 (老朽最不喜歡一天趕跑多場證婚, 故自訂每天不會為多於兩對新人監禮). 公園那 pair 是文靜而且害羞的一對, 卻是細心得很; 他們就是多次去公園觀摩其他新人行禮後才找到他們要的各式婚禮服務 (包括老朽的監禮也是在數月前他們見到小弟 performance 才找我的), 所以基本上他們找來的, 都是新人已經滿意的人選.


有心無意, 今天老朽監禮時的一段話, 又整喊了新娘; 仲畀佢話我唔早o的畀佢知我講乜. (呵呵... 早o的畀你知邊有呢個效果呢... 而且早o的我都未知自己講咩嘛, 次次我都係臨場發揮o既) 新郎卻o係度陰陰咀笑騎騎, 覺得老朽畀了個機會他幫新婚太太抹眼淚.

傍晚的新人是一對救生員, 是友人的友人; 之前老朽幫他們入紙辦手續時覺得新郎雖然高大有型 (真係幾型o下o個隻!) 但就是個黑面神, 老朽當時真係驚不知是否得罪了他, 後來問新娘又話唔係; 今天才知道原來新郎哥是個冷面笑匠, 唔怪得 "乙水" 到個咁靚o既新娘啦... (原以為女孩當救生員梗係粗豪o的啦, 點知老朽又跌眼鏡, 呢位救生員新娘直頭係古典美人 feel. 不過因為老朽趕住回家和夫人帶女王出去買春裝兼食 pizza express (圖為他們的甜品 Bonnaffe Tortino 梨子香蕉撻) (咁大得快o的衫唔o岩著就要買o架啦...), 唔係的話禮成後一定留多陣影多幾張相!

2009年3月20日星期五

領袖訓練第一擊 - 團隊精神

說回上星期的東亞運義工領袖訓練. 地點係由另一位義工委員 sunny 兄商借出的測量師公會會址, 位於中環. 因訓練由早上到下午, 老朽已經打定主意, 中午去 ifc 找好東西吃.

玩了一整天, 為的只是兩個遊戲.

早上就是讓大家矇起眼睛, 在看不見又不准發聲的情況下, 分組將自己得到手的一張號碼紙和同組人的其他號碼紙排次序. 呢個所謂遊戲, 老實講, 目的係為了使領袖知道 "事先溝通" 和 "長期帶領" 的重要性, 不過用了前後一整個小時去做呢樣o野, 而且由頭到尾不准出聲, 除了難度外, 其實有點和付出的時間不成正比, 講得唔好聽就係 "無聊".

好喇, 之後的就是是日戲玉 - 扮外星人找有關一個國家的資料, 三小時後用自己方法 present 出來.

我們分配到的是韓國.

我們一組都是義工領袖, 唔知點解, 和他們好像已經拍檔好耐咁, 大家題目一到手, 已經自動分工, 而且分工十分細緻, 將資料搜集分為 "歷史" 和 "文化" 兩 part, 之後大家再集起來研究 present 方法, 與此同時, 老朽和另一位組員就回到老朽也在中環的辦公室 (規則寫明不准乘車跨區), 用上網設備 download 了韓國的劍舞和跆拳道的 video 用手上的 ePC 到時播放, 亦準備了文房工具以供使用.

這就過了一個食飯時間, 最後老朽除了一個麥香雞外, 啥好東西也沒進肚. (仲要發現麥香雞而家無加價, 但係塊雞薄了一半!!!!) 但是深深感受到團隊合作的精神和快感.

我知有不少組別也故意到相關的國家餐館用膳找當地人套料, 不過, 這樣卻不及我們和部分其他組別找資料的team work 和誠意.

到下午 present 時, 老朽重操故業- 司儀和口述介紹. 其他組員就負責表演. present 時間只有五分鐘, 所以我們互選出的 leader 要 mark 時間拿捏得準. 雖然 - 最後老朽一組並未奪得 present 獎項, 但係得著已經不少.

是日老朽第一次舉出新的相機為大家拍照, 之後 upload 上 facebook. 一日之內多了十幾位朋友.

唔... 如果老朽到東亞運時帶的那 team 有呢班咁醒呢, 就真係還得神落了!

2009年3月19日星期四

颱風三級制

前兩天的事, 使到寫 blog 都慢下來...

其實老朽去了花展, 試了新相機, 仲上了東亞運義工領袖的特別訓練第一節.

不過寫這些前, 昨日聽到天文台終於出了 "颱風三級制", 本來老朽覺得甚是高興, "香港卒之都用呢個制度了!". 豈料無啦啦又有議員高談闊論大聲疾呼, 話新制度混淆視聽云云.

其實將颱風分為不同強度, 在外國設之已久; 倒是不明白為何香港遲遲未有此制度. 當然, 外地的熱帶氣旋警告多數沒有像香港的細分為1-10 號. 而是以 "警報" 或像日本的 "注意報" 及 "警報" 去作一個籠統的分野. 然而, 讓市民知道一個熱帶氣旋的強度, 老朽覺得是有必要的. 議員們無事找事來嘈嘈閉, 想也未想, 目的就是鬧o下人, 有時都幾好笑.

其實打風是有好多背後的知識的, 如果有興趣, 可以去 "地下天文台" , 該處有不少天文和氣象愛好者交流. 老朽也是他們的小小會員, 不過卻是正在學習的階段.

點解有興趣睇打風? 當然係因為數年前風季希望唔使返工所以學睇天氣圖開始了! 點知睇睇o下又有o的興趣, 咪又搵書睇o下囉.

2009年3月16日星期一

整定...

雖然一向對自己秘書的工作不是十分滿意, 不過知道她在進步中. 縱然我講過 "你走我未必會留你", 但我覺得我會畀機會她去進步.

可惜一場金融海嘯, 使進步中的她也不能逃過厄運.

我講得太多, 或者會有人以為係我炒佢o係度弄虛作假, 所以我決定唔講咁多.

祝好運, 我會為你祈禱的.

咁又有無人會為我祈禱呢... 我由今天開始要 share 秘書喇...!!! 妖!

2009年3月15日星期日

自煮行動

話說昨日下午, 老朽打算炸份西多士, 問夫人食唔食, 夫人話 "你o的西多都唔似出面o個o的o既".

整整o下, 夫人聞到香味, 放低女王在 playpan 上走來廚房問: "我o個份呢?"

"你話唔食o既"

"食呀, 食呀... 你好快o的整添呀..."

"..."

老朽今次炸西多時, 雖然用料都係普通麵包, 不過用了正式法國 le pain grille* 的傳統方法 - 在蛋漿入面加了鮮奶, 所以香味和一般整開的有別. ^^

夜晚, 在夫人 request 之下, 燜了一煲柱侯牛腩, 雖然夠晒焾, 但因為切得唔靚所以無影相, 而且一拎上檯夫人已經開動, 完全無理過老朽...

即管又試o下拋磚引玉睇o下有無高人可以指點o下... 燜牛腩老朽都係用一般的柱侯醬, 不過會先用老抽, 紹酒, 糖, 生油, 生粉去醃, 煎香一下再燜; 而且唔會切開, 到上檯前先切再熱一熱. 另外, 燜的時候放一點點冰糖在中間, 時間上就係中火滾起汁料後轉慢火燜 45 分鐘, 之後熄火焗 30 分鐘, 之後再開火 30 分鐘, 焗 15 分鐘, 之後切件後回鑊燜一陣熱返, 食得, 應該已經夠晒焾. (雖然我唔鍾意蘇施黃, 不過呢個方法係佢推介, 係幾好o既)


又想知o下, 有無高人覺得呢個做法係咪得呢? ^^


* le pain grille 唔係間餐廳名, 而係法語 "Grilled bread" (燒烤麵包) 之意, 亦即我們所說的 "西多士", 不過正式法國是用軟包 brioche 吸好了蛋奶漿後煎香, 不是炸, 也沒有用花生醬做餡 -- 雖然老朽覺得港式西多仲好食...! :)

是日精選

破產了... =.=

2009年3月12日星期四

四個婚禮一個葬禮...

老朽三月認真忙... 公司今日無啦啦有少少 "地震", 而三月也剛好是 "四個婚禮一個葬禮" - 老朽會主持四個婚禮, 和在一個葬禮上幫手.

好友翡冷翠小姐的母親大人罹患癌症多年, 因為發現得太遲而未有採取手術醫治; 上月底終於安詳地撒手塵寰; 身為天主教姊妹的伯母, 走前還趕得及接受神父的臨終傅油 (即以祝聖的香油由神父按在額上, 以作祈求天主照顧這位隨時會回到天家的病友), 而且教得一對兒女乖巧有成, 大抵可以說是無憾了.

教友的殯葬禮主要分開守夜時的 "守靈彌撒" 和大殮時的 "逾越聖祭", 當然還有之後的 "安息/追思彌撒的". 老朽不是第一次出席教友的守靈彌撒, 卻是首次為一位家人都不是教友的先人做點幫忙的工作. 而因為家人都不是教友, 故不會以聖祭 (彌撒) 方式, 而以 "祈禱會" 形式進行.

翡冷翠小姐一早已聯絡了聖堂的神父, 而很多天主教堂也有 "善別小組" 來協助白事的進行, 尤其係幫助一些非教友家庭, 而其中最重要的角色就是安慰和為家屬提供心靈上的輔助.

老朽早前已和先伯母生前有參與的聖堂善別小組的 Ann 姐溝通好, 知道他們會由開始到火化先人遺體也會幫忙, 於是安下心來, 昨晚便去到紅磡的 "大酒店" 參禮.

例牌, 靈堂橫幅為「魂歸天國」 (其實老朽以為會用 "懿範長存" 或者 "息勞歸主" 的); 左右輓聯為
「莫愁歸土無生日
還有昇天復活時」
加上酷愛攝影的翡冷翠小姐拍了一張台灣山地的花田照, 用了來襯她為亡母作的新詩, 印成卡片, 使靈堂的氣氛由 "哀痛" 緩和至 "傷感" 和 "希望":

《念母》

您是鵝黃, 您是嫩綠, 您是漫山遍野的春天
鵝黃如您你溫柔, 潤飾了我的生命
嫩綠如您你氣息, 鋪蓋了我的道路

愛有多重? 愛並不重
愛有多烈? 愛並不烈
愛, 輕如露
它不似澎湃的江河, 毀了河岸,
露水卻靜悄滋養了繁花, 綻放生命

我於您, 是懷中的寶寶
您於我, 是心靈的守護
何時、何地, 我想您, 您就對我揮手
您想我, 我就對你微笑
如風吹向群山, 群山齊聲在和;
如蝶伏於春花, 春花婉約在迎
我們就是這樣無間地呼應著
曾經有您的晝夜, 空氣香甜如蜜餞
今天, 您成了我的耳目, 成了我的鼻息
跟我一秒一分觀賞人間的喜樂
與我一呼一吸享受生命的豐盛
我的命脈源於您, 我的心也永遠載著您, 滿足了
往昔如此, 來日如此, 如天地永恆. 我信



一直以為感性而且弱不禁風的翡冷翠小姐會哭得死去活來, 但堅強的她除了致悼詞一刻哭了幾分鐘外, 整晚都相當鎮定, 她說過 "媽媽不喜歡我哭, 她走後一天, 我應承了她不會哭, 之後便夢見她笑著和我們吃自助餐, 所以我會繼續不哭" -- 這理由倒也使得.

將軍澳的施神父率領善別小組來到, 我和 Ann 姐再談一會, 便幫手搬o下凳派o下書仔 (整整o下都有近百人來參與祈禱會呢).

神父著用的白祭衣上, 加用了紫色的聖帶. 天主教會一向多用的顏色有:

綠 - 常年期平日使用
白/金/紅 - 喜慶 - 包括大殮日的逾越聖祭, 代表亡者已然隨耶穌同死同生, 在天國安享復活的喜樂
紫 - 期待, 等候, 懺悔 (即聖誕前一個月, 復活前一個多月的四旬期, 還有下葬前夜的守靈彌撒

加上靈堂的白花, 一片安詳... 先伯母一定含笑九泉.

神父講道, 稱中國人一向不喜提及死亡, 然而, 死卻是一個必經的階段. "怕死", 只是因為不知道死後的去向, 人認清了, 就不怕了.

老朽同意到加零一, 聖保祿宗徒致格林多前書提到: 《因為我們現在所知道的,只是局部的;我們作先知所講的,也只是局部的;及至那圓滿的一來到,局部的,就必要消逝。當我是孩子的時候,說話像孩子,看事像孩子,思想像孩子;幾時我一成了人,就把孩子的事丟棄了。我們現在是藉著鏡子觀看,模糊不清,到那時,就要面對面的觀看了。我現在所認識的,只是局部的,那時我就要全認清了,如同我全被認清一樣。》(格前 (基督教版本作「林前」) 13:9-12)

不過老實講, 講就容易, 死喎... 點可能唔驚得o架. 所以, 信友們可以做的, 就是祈禱, 使人得到平安, 有了平安, 自然就不怕未知之事了...

加了自己的小小分享, 希望大家不嫌. ^^"

2009年3月11日星期三

得饒人處...

世事認真成苦海 得饒人處且饒人...

話說今天老朽有一單人身傷害案件要上庭, 之前已經和對家的律師溝通過. 今早十一時準備到達灣仔法庭.

10:55, 書記說對家未到.

11:00, 書記說對家未到.

11:05, 書記說對家未到. 法庭是流水作業式的, 港英時稱為 "經歷司" 的聆案官有權聽其他 case 先.

老朽唔係玩野之人, 本來大可以就咁坐著等, 呢個亦係部分律師的做法, 因為對方不到的話, 是日的所有訴訟費用將會浪費, 亦要由對方, 甚至對方律師個人負責... 不過老朽決定打電話給對方.

原來對家真係無來. 而為免出事, 他立即飛的來了. 11:30 到達開始審理.

來到才知, 原來他們的法院通知寫錯了別的日期, 是由法院發出時寫錯的. 聆案官一聽到係自己錯, 即時乜火都收晒.

老朽心中慶幸剛才無 "玩野", 否則的話, 今次未必可以贏對方的訟費 -- 因為係官錯, 而官係唔會認錯的. 只有更高級的官才可以說他們錯 (呢個係法院的 practice, 好難解釋...)

另一方面, 對家也多謝了老朽不下三次, 明言 "呢單野有得大家傾!" (即和解)

吁, 一個電話, 大家 happy!

***

老朽公司位居中環某銀行總行樓上.

呢兩星期, 日日樓下都聽到雷曼苦主中午的市威, 每天不多不少, 三個半小時. 日日用大聲公自動播放, 聞說仲有人收錢來幫手叫口號, 十分落力.

呢幾日仲勁, 找來了一些佛教的像做法事的音樂梵唱, 加埋銀行領導的相片, 一於咒死佢為止.

老朽聽o左兩日, 突然醒起, 他們播的是《藥師佛讚》.

老朽係天主教徒, 不過家父係正式的佛門俗家弟子, 所以自少其實都聽唔少佛經梵唄, 亦知道部分的用意; 再問問家父, 果然得到答案係...

《藥師佛讚》係用來消災解難, 祝壽納福用的.

......原來一班苦主, 用心良苦, 咒人不成仲幫銀行領導祈頌作福, 延年益壽. 銀行領導大班真係多謝佢o地都來唔切. 好心要咒人都做o下 research 先啦!!

2009年3月9日星期一

是日晚餐 (簡單版)

是日晚餐... 涼涼o地, 夫人叫我整 oden (關東煮) 喎...


最緊要係個湯, 計正應該係用昆布煮湯, 可以落o的骨頭 (香o的), 之後將湯加入木魚花, 最後加入日本醬油同味醂較自己o岩o既味; 次次問《悅鮨》的老闆&師傅 "基さん" 點樣煮好, 佢都會話 "煮乜鬼丫! 落來我舖頭我 "畢" 一煲畀你啦!"

其實方便少少o既可以用海鮮湯素煮開水加昆布; 再懶o的可以好似我們今次咁, 買一包包的湯粉煮湯底; 最懶鬼的話去日本超市買 "紀文" 一包現成的濃湯開水算了.

整好湯底, 開始煮時可以先將白蘿蔔同埋菰菌類汆水先, 同時先在湯底放入蒟蒻 (可以煮耐少少入味) 慢火煮. 如有用稱為 "布巾著" 的日本年糕腐皮包就此時放入湯底. 之後將已汆水之材料放入. 此時加入熟蛋 (當然係另外烚熟)同埋日底炸魚蛋/魚片, 滾返起之後就食得.

***

同場加映, 是日女王成長管理局偵察組拍得此圖:
勁呀! 女王終於識用飲管飲水喇!!!

呢節特別新聞報導完畢, 有關女王o既最新消息本元帥... 呀... 唔係, 係本台會再作跟進.

2009年3月8日星期日

又係元朗證婚...

呢期真係開發大西北, 今晚又係去元朗幫新人監禮證婚, 間酒樓仲只係上次那間隔兩條街.

本來不打算接的, 不過新人說肯去元朗的律師不多, 跑到屯門註冊處又費時失事, 所以希望我幫忙, 既是如此, 在交通費補足的情況下 (咁幫人都唔好蝕丫...) 老朽倒也樂得走多轉.

今晚的新人是對搞笑新人, 男的風趣度達老朽的八成 (已經好勁了!) :) 女的是個圓潤的小可愛 (不過真的唔係肥); 聞說他們是從網絡上認識的; 如此說來, 這是老朽認識的第二對開花結果的網絡情緣了.

今晚新人找來了花仔花女, 初時老朽倒真的有點擔心, 不過一對三四歲的小朋友委實是可愛, 而且不太像現在那些小孩 "串串貢"; 老朽好放心將新人的戒指枕交給你們, 不過他們的 daddy 臨行禮前竟對老朽說 "一會兒由我個仔處取得戒指後, 請畀呢兩粒糖佢..." 說罷像極了毒品交易般將兩粒糖放在老朽手.
(攝影師先誇張, 我話佢o地知行半教堂禮, 有花仔花女時, 他們直頭想暈低, 原來新人無交帶過, 驚小朋友行得太慢 - 雖然事後證明他們的速度都 ok 明快)


唔知幾時喬喬女王可以做花女了... 昨晚第一次帶了她去飲宴 (那對新人是親戚, 一見到老朽就話 "唉呀, 唔記得o左你係律師, 早知搵你證婚唔使今日去註冊處耷雨啦"), 成晚做o左幾圍親戚的主角...

講返今晚, 證婚在無驚無險不過 OT 的情況下進行 - 因為遲了開始之餘, 司儀係臨時拉伕, 老朽同埋攝影師要係咁做提場! 出到來, 今天本身已經清涼的天氣, 在元朗這晚上的寒風下更加蕭煞, 在想不到有咩想食的情況下, 致電老友, 仙人指路, 今次去了水車館街食了呢樣o野...

係肥叉頭拼金錢雞飯.

年紀屬 "中坑" (三十開外者) 或睇過老朽之前舊文的會知道金錢雞係咩. 唔知的話請 copy & paste 找 yahoo 問問.

是日金錢雞夠古早味 - 夠肥不過唔夠香, 雞肝也是中上貨, 卻未至絕品黃沙的地步; 而肥叉頭也頗肥, 卻又唔係好肥, 所以食完之後硬係覺得未夠喉, 上車回家前走了去便利店買了古怪小食如下... (卡路周打蜆湯味粟米條同埋菠蘿味粟一燒 (!!))

老朽其實仲有少少咳, 不過今晚心情幾好, 所以在夫人和女王都睡了後 (即係而家!), 開了一瓶普通的澳洲 Cabernet Merlot, 找來了那 "卡路" 和用黑松露搽小 crackers (好襯o架!), 一邊打 blog 一邊飲...

所以唔該有邊位睇到有打錯字的話 -- 同踢波帶士巴拿o係身一樣, 係好正常o既!!

2009年3月4日星期三

昨晚宵夜...

在不爽的時候 (見另文), 一定要做些東西 "氹" (tum) 一下自己.

今晚就在凌晨時分, 炒了一隻蛋, 因為係西式做法, 所以打蛋時加了一點點橄欖油; 燒到隻平底 pan 紅了, 起鑊時用了少少橄欖油加上了一小片牛油 (不能用植物牛油, 香味遠遜), 牛油溶化後加入蛋, 即時收細火, 再不斷用匙在鑊上 "發o下發o下", 十秒後熄火, 繼續 "發o下發o下", 一邊上碟, 夠晒滑...

之後加了一點點東西...

日前在 citysuper 買了一小罌的黑松露醬 (black truffle pate), 百多元有 90 gram. 當然, 主要成分為黑菌類, 之後才是黑松露和浸泡的葵花籽油 (百多元有 90g 的純黑松露? 食懵你呀!), 就咁一小匙, 加在熱騰騰的滑蛋面, 是給自己最好的禮物.

只用了三十分一的松露, 一元有多的雞蛋 (嫌少就加多隻啦唔該), 港幣六元有咁 "矜貴" 的宵夜, 邊度搵呀...

心情即時好返唔少!

不爽...

昨天和今天感覺頗為不爽, 因為我尊貴的秘書又病了.

不知是老朽條命係不會有好秘書或者是我太 "焾善", 老朽一直都係秘書 "恰到上心口". 自問由頭到腳都不是苛刻的老闆, 之前遇到的秘書都成了好友, 現在仲日日 MSN 傾計, 個個都話想回來幫我手 - 不過要大老細加人工先得 -- 即係o徙氣...

現在的秘書, 她不是不工作, 而是太多麻煩的事; 從去年初起, 身體突然差了, 在公司暈倒, 之後係佢私人感情問題, 跟住識新男友, (仲諗住替佢高興啦, 點知...) 突然懷孕, 之後結婚, 放產假, 生埋年尾回來, 之後身體也不好, 兩星期左右病一次. 老實講, 初時老朽次次都會打畀佢問候一下, 現在已經多到老朽都麻木了, 大老闆亦開始問我 -- 佢又病了? 無出口的一句就係 "今次係「病假」, 定係「假病」呀?"

講真, 我相信我的秘書, 正所謂用人勿疑, 疑人勿用, 但係我亦不是第一次畀佢呃我, 只係之前一次佢同我道歉, 我覺得 - 算了, 既然佢其他方面還算幫到我手. 不過她的英文程度係不及之前兩位的, 之前一位秘書的英語超勁, 有時仲可以改正我文法上的錯處 (因為老朽是用把口去 "寫" 信讓秘書輸入電腦的, 正是 "出口成文", 又點會無一兩個錯位呢). 不過勁人自然有人挖角, 她如今已是上市公司老闆的私人助理, 月入二萬有多了.

其他同事也說老朽的 "容忍度" 甚高, "如果我係你一早炒o左佢啦" 之類說話不絕於耳, 但係老朽覺得, 工作上的合作不是人人可以, 雖則呢位秘書在公司間有 "打甂爐"狀態 (即 "烚o下烚o下"), 體弱多病 (呢個唔係炒人理由來o架嘛... 雖然使老朽的工作更麻煩); 但係佢平時的工作亦算交到貨; 所以老朽從來沒有想過主動 "出擊" -- 之不過如果有一天她向我呈辭的話, 老朽二話不說, 定會開定大門恭送 - 也起碼大家留個好印象嘛.

老朽自問未能像老友兼行家桃花島主一樣的狼起心來, 如有問題的話手起刀落, 或者, 呢個係老朽o既不善之處...

2009年3月2日星期一

是 (昨) 日節目 - 證婚篇


除了食食食, 老朽去元朗的主要目的就是為一對新人監禮證婚.

今晚的一對新人是老朽去年 12 月另一對新人的朋友, 他們原本是去註冊處行禮的, 不過後來發現時間不足, 而碰巧見到老朽上次的監禮過程所以找小弟幫忙.

地點是元朗大商場內的一家新酒家, 老朽去到的時候幾乎盪失了路, 正找不著之際, 有一名笑容十足的肥仔跑過來, 叫道 "老朽!" (英文名), 我只覺得此肥仔面善得很, 卻點都醒不起何處見過...

他倒知老朽是去證婚的 (無啦啦星期六晚著西裝拎個律師篋, 呢個形象直頭深入民心了...) 反是老朽先說句對不起, 真的一時記不起他的名字, 佢話 "我係司徒呀!" 老朽問埋路後就匆匆逕往酒樓去了, 行行o下才醒起, 那位不就是早幾個月在大埔行禮的新郎哥嗎!!!

老朽第一次替人監禮時, 新娘知老朽是教友, 便央老朽替他們祈禱; 老朽雖然不是神職人員 (做過輔祭算唔算? :) ) 但自此之後, 老朽每次收到新人行禮前交予的戒指時, 都會暗暗祈禱...

「主, 求你降福一對新人, 使佢o地白頭到老, 也求你降福呢對戒指, 使新人可以藉著此信物, 記起你的恩惠, 更求你派遣聖神, 藉我的口, 讓一對新人明白婚姻的意義...」

老朽每次證婚前, 都會找些東西來 "借題發揮" 說兩句, 說回是晚新人, 有兄弟告訴老朽, 他們是在上夜校班時在途上的公車認識的; 老朽於是在宣佈禮成時, 說道... (大概啦, 我都係祈禱後臨時想出的話, 唔記得咁多了)

「一對新人在車上認識, 由公車開始, 今天, 他們來到一個中轉站, 他們沒有選擇下車, 反而廣邀大家上車, 見證他們彼此的承諾; 呢架車, 會一直開下去, 帶領一對新人走往一個未知的地方, 但係呢個地方有幾靚, 要一對新人自己去營造, 你們願意的話, 呢度可以係一個天堂, 但係建造天堂是要付出的, 時間, 精神, 各樣的犧牲... 你們今日在我們面前承諾會一路開呢架車, 所有在場的親友都會為你們 "加油"...

祝福你們, "路路暢通"...」

***

禮成後食埋飯, 趕回家中湊女, 不過回到家中, 第一時間是上網開了 facebook, 找回 "仙人指路" 的司徒伉儷 (不錯, 老朽和多數新人都會交個朋友的, 不少都 add 了 "面書"), 說句謝謝 & 對不起...

2009年3月1日星期日

是日節目 - 飲食篇

昨日 (28 號) 由朝食到晚, 也由朝 "玩" 到晚, 所以分開 "飲食篇" 和 "證婚篇" 兩文來記載.

是日中午又係 "自由人" 時間, 因為要返半天工是也, 一支公本來想走去食九記牛腩或者九記對面的著名 "茄牛通 + 脆脆" 大牌檔, 卻見到一大奇景 - 九記外已有四十多人排隊等下午出爐的爽腩, 而大牌檔更有近百人在排! 心想 "唔係呀嘛..."

雖然家父都算是他們的熟客, 但因不是和他老人家一起, 老朽又費事 "響朵" 以免犯眾憎, 所以都係作罷. 但又見到九如坊歌賦街尚有一間 "銀杏館", 乃係由一班長者負責樓面工作的 "良心企業"; 亦已有不少媒體介紹過. 老朽其實一直都不覺得呢間會好食, 但今天都係抱住即管一試的心態走了進去. (之前見蘇施黃食得咁高興, 其實個人對她好感一般)

南瓜忌廉湯的確係麻麻o地的, 但係又膽粗粗的叫了有羊架的什扒餐 (老朽不嗜羊, 卻也吃得下); 上菜時亦係普普通通的 "港式餐廳" feel. 但係配上了薄荷 jelly 後, 那羊架竟然變得嫩滑鮮美, 一點也不會 "嚼蠟", 而且食味竟拍得住遊艇會會所頗負盛名的羊柳! 其他如雞扒肉腸之類的雖然只係不過不失, 但係個羊架真係 "殺晒"!! 的確係超水準之作. 對呢間o野即時另眼相看.

更抵死係佢單尾送上了一小杯香港 feel 的o者喱, 為呢餐添上一個完美的句號. 唔係講笑, 真係推介得過. 不只為推廣良心企業, 而且真係幾好食.

值得一提的是老朽見到此餐廳內的侍者都係年紀較長之輩, 他們都極有禮貌; 而客人們亦受感染而使到成間餐廳都好 "祥和"; 但係, 各客人回到家中對住自己的長輩時, 又能否有此禮貌呢?

食完後經過蓮香樓, 醒起夫人喜歡他們的蓮蓉雞蛋糕, 走進去買一個時剛見到一位新娘子和家人在搬一盤 "回禮大茶", 即是過大禮時女家回給男家的一 set 較特別的喜餅, 和一般買得到的不同, 會有成底的鬆糕大發, 仲有脆脆的狀元餅. 新娘子望住呢底o野好似完全唔知咩事咁, 於是老朽又忍不住搭句咀話呢o的係回畀男家祭祖告知納聘禮成之用, 其實都幾好食 - 不過最好數日內食完囉.

***

晚上在元朗證婚後, 本是和老蝦皇爺和其他 friends 入天水圍食聞名已久的客家菜, 但係因人數不足而改去食元朗西菁街的 "士林牛肉麵".

老朽一向愛吃女紅燒牛肉, 不過台式麵就興趣一般, 好就好在呢間仲有其他飯類可選. 一行三人就叫了...

紅燒牛肉湯麵
紅燒牛肉乾撈麵
茄子肉燥飯
紅燒豬腳
鹽酥雞扒

值得畀掌聲的是他們的紅燒牛肉和鹽酥雞;

一般食紅燒牛 (以牛腱為主) 都係橫紋切以求弄斷牛筋, 較易入口; 但此處 "夠膽" 直紋順切, 但入口一樣即化, 老朽都服o左佢o地. 至於鹽酥雞就炸得非常香脆, 和台灣正宗的相比係香港食到最似樣的一處了, 友人也謂次次水準都可以保持一樣係最難得的.

是日就係咁, 飽晒, 之後去了食個杏仁糊甜品都係當作點綴一下, 使一餐飯變得完美而已. 但係個雞扒真係回味無窮也!