2009年8月31日星期一

After the time to say goodbye...

同事的事, 表面上是解決了; 她走的時候雖然不開心, 但係我們都好言相勸, 我也主動和她傾了差不多半小時. 不過, aftermath 永遠不會是一天半天的事.

其實由開始決定o左做呢一件事, 我已經知道會有好多 adverse 的 comment.

但係, 我一向都係希望慢慢去解決的, 從來無諗過愈來愈麻煩.

我一直都不希望做一個衰人, 但今次, 似乎這隻不生不死的貓, 我食硬了.

我已經向同事等人交代過係我和那位同事唔夾, 所以不能再找她幫我手; 而事實上, 她在幫我手時雖然 「甩晒轆」; 但我也覺得她是有機會和其他人合得來的. 因此有需要的話, 我不介意為她推荐. 但 termination 的細節 (即係用何方法去 "郁" 人)上, 的確不是我希望的程序; 而是制度上的安排.

不過, 到了我今天回到公司, 似乎大家出來的版本又不同了. 大概部分同事一邊聽過是我的決定, 但又聽o的唔聽o的, 於是又以為係公司的決定. 我已經講過, 公司之前問過我會不會在另一位律師辭職後找這同事幫手做我秘書, 我已說過, 在經過之前一段時間的合作後, 我決定不會的了. 因為我和她實在未能成功合作, 雖然我心底覺得, 呢位(舊)同事係 "乖女" 來的.

今天不少同事繼續問起, 老朽就只會話 "係呀, 同佢工作上太唔夾" 算了, 因為, 呢個話埋都係事實來的. 之但係, 似乎我講出來, 部分同事不太相信, 或許, 平日的老朽, 太喜歡說笑, 也太 "親民" 了; 大家估不到, 原來老朽可以板起臉來.

傳回老闆耳朵, 老闆之一又召了老朽, 再照一次肺, 說老朽處理不善... 但是, 公司之內, 老朽聽埋聽埋, 總有些好心做壞事, 諗埋o的 "屎橋" 的人, 今次大概又係被同事亂諗o野, "過了一棟"...

天呀, 我真的只是將事實講出來, 同事不信, 老朽有何奈何呢...

總之, OK, 這樣的話, 我決定唔出聲住喇. 要做的事, 已經太多也太煩. 經此數日, 老朽又變得 "化" 了不少.

2009年8月29日星期六

Time to... Say Goodbye...

積壓了多個月的頭痕事, 今天來個解決.

打這篇的時候 (以 blogger 時間為準), 公司的 admin 正準備有關的離職通知文件給那位我 "頂" 了一段時間的 "小半位秘書". (我之前曾經覺得是 "半位", 但慢慢發現她根本無想過會當我的秘書, 甚至連她自己現任老闆離去後都無想過幫我的), 大概到這篇 publish 的時候, 也是她收到信的時候.

我最初一直都覺得, 她也是太忙, 所以也一直包容著; 而且公司體系內她也不算是我的秘書. 不過, 過了一兩個月後, 當大家都知道她現任老闆要離去, 而公司有可能安排她幫我手時, 她依然像完全沒有理會過我的一樣, 只是需要時幫我打字 (仲要打幾次都錯) (其他的我已在之前某些 entries 提過), 其他的一概不會理. 幫手擋無聊電話的是另一人, 也無人會在我去了開會或上庭時代通知找我的同事和老闆.

想過會不會是自己的問題? 但一直以來, 我和所有的秘書小姐和書記先生的關係也極佳, 大約, 有機會來我 blog 看的也會知道, 我基本上係 "林到死" 的一份子. 而且, 我問另一位即將成為律師的同事, 會不會日後找這同事做秘書時, 這位新晉律師也立即耍手擰頭. 那大概都不會是老朽太不近人情了吧?

上星期其實老朽已經發現有一件已完成的案件其實已經準備好其他文件, 就是未匯報給大客戶和開單收錢, 不過計起來, 我將有關的文件錄音帶交給這同事, 已有兩個月時間!! 有關的事件細小到毛鱗, 但卻確實是她不對; 好了, 正準備放棄, 自己取回來打字時, 大客戶就打個電話加個傳真來追問這兩個月來 "坐o係度做乜". 正因為事件細微, 老朽在交給同事後便未有記下 (點都估唔到打封信兩個月都出唔返來o卦!?!?); 而大客戶, 就當然係找大老闆, 一壓下來, 老朽就食了兩天的死貓 (雖則我承認了 "失察之罪"), 照肺照了兩天 -- 但這同事完全沒有覺得是她有問題呀o下!

"好來好去", 一直是老朽的希望; 今次, 老朽也是這樣想, 不過今天, 一會之後, 大概會比較難; 畢竟, 今次是老朽同意下公司才會有這決定的... 但我仍覺得, 這位同事, 如果再用點心的話, 其實也不難在職場上找到合意的工作, 始終她還是一位頗有禮貌的人; 老朽, 也會為她祈禱. "同我唔夾o者, 或者有第二位人士會夾呢..."

就等過一天半天, 再上來講返最後結果如何吧...

2009年8月27日星期四

認真的 casual 試酒會

非正式的學品酒, 斷斷續續已經學了近十年. 但是連基本紅酒的十幾個大區都未學得晒, 更遑論幪瓶試酒 blind tasting 了.

在各位飲食前輩家中又好, 出外又好, 自己又好, "黐" o左唔少酒飲, 不過想起來, 從未試過真正的試飲 port 砵酒. 今次適逢好友翡冷翠小姐的公司舉辦 Taylor's Port 的垂直試飲, 好友叫到, 點可以唔玩埋一份?

提起翡冷翠, 她算是個幸運的人, 喜歡藝術飲食攝影, 就打著一份有得食有得影的工作, 在飲食界中翹楚之一的公司做 promotion manager; 上次提過一位老人家蒙塵, 她就是那位將漂亮的花卉相和新詩在卡上印在一起的孝順女.

說回試酒, 既然友人說是幾 casual 的, 還可以和朋友一起去, 那就即時呼朋喚友, 今次叫來的是一班大狀友好, 也包括有飲食達人在內的一班. 齊齊操去會場. 聽講還會和西班牙產地同步試新的 port 呢!

點知入到會場, 原來是這樣的陣式:



呢個, 係正式試酒和酒評人打分會的格局; 細問之下, 原來是日有一半是各地的傳媒, 我們只是因為好友, 所以獲邀, 在坐的有不少是酒評人和香港侍酒師會的大哥大姐; 初時, 有點點嚇著了; 好在慢慢大家傾開, 而且酒過三巡後, 大家都熟絡了點, 雖然格局依然, 人卻放鬆了不少.

有人會問, 砵酒都有新唔新? 無錯. 正是. 多數 port 都是不同年份溝出來的酒; 因為 port 本身就是 fortified wine, 即在基本紅酒上加上一定份量的 "糖水" 和烈酒, 經過摻合和儲存而成的酒, 所以不論味道和色澤上都會較一般紅酒為深, 濃. 點解有款這樣的酒就是歷史原因, 稍後再講.

但每隔數年 (三至四年左右), 如果酒莊見該年他們的葡萄質數高的話, 他們就會在試釀初酒之後公佈該年會有 "年份酒", 這個做法叫做 "declare", 其實日本清酒的大杜司 (杜司/氏為日本釀酒人的意思) 有時也會在有 "靚米" 之年釀年份清酒, 好多時是專門釀來比賽用. 2007年就是西班牙的好年. 所以在 2009 年初酒釀起後便在上星期 declare 了, 也入了 half bottle 來香港做試酒. (入半瓶裝的原因多少是因為酒有點 "聚合性", 愈大支酒, 愈可久放陳年; 但倒過來說, 就不適合當新酒去試飲, 所以試飲新酒的話, 最好用細支)

砵酒, 老朽自問認識不深, 而且酒經過 fortified 後, 對我來說較難真正試出大分別; 這晚試的就有 1994, 2000, 2003, 和 2007 的酒.

一般飲餐酒, 多數先飲新再飲舊, 但這次的試酒, 因為新的 port 真的較 "烈", 所以放在最後, 以免影響 "口感" (palette). 但覺就算最舊 1994 年的酒, 仲係口中有爆發力, 而且有點濃香的亞洲辛辣香草味, 其他的雖然較甜, 但也更加 "啃"; 問同步直播西班牙的釀酒家, 才知有年份的靚砵酒原來是陳夠三十年才是最佳的年份, 現在就算飲 1994 年都是嫌早! 而且一般人的思想, 就是砵酒是餐尾酒; 但正式來說, 他是餐酒, 而且開酒後的 "透氣時間" (breathing) 比紅酒要長好幾倍. 真係唔講唔知也...

是晚大家都飲到 high high 地, 大家都無用到檯面上的 spit bucket (即試酒用吐酒桶), 因為大家都覺得, 年份砵酒不易有, 更不應浪費!

最高興的是, 翡冷翠小姐在最後將開了未飲過的兩支尚未正式上市的 2007 送給我們; 更高興的是, 基中一位大狀說要答謝老朽帶他們來試酒, "的" 了老朽上山光道晚飯去也!! (翡冷翠小姐知道後直叫道 "試酒係我安排的, 點解我無得食馬會呀呀呀......?!")



(橄欖油低溫浸煮三文魚腩及浸煮原隻法國鵝肝, 山光道會所打呲廳)

***

砵酒的起源, 其實係和打仗有關; 當年英法打了場 "百年戰爭", 打打停停玩足一百年, 英國之前一直由法國輸入紅酒, 因為法國酒的水準高而且酒質穩定, 但一打仗, 茂四都唔賣畀你啦, 所以轉去西班牙搵酒; 點知原來西班牙的酒 "唔襟撞", 搭完船後酒質差得很, 想了又想, 英國佬就想起其他舊的弱酒的古法, 就是加入烈酒和糖份, 使酒質和 "骨架" 較穩定; 豈料一試之下就創造了歷史, 試出個砵酒來 (當年大概未識得用砵酒來焗生蠔吧...).

2009年8月21日星期五

女王爛 gag... (真人真事)

1) 英文班

(夫人和友人 high tea 中)
朋友: 我有個 friend 話 bb 細細個就要訓練佢講英文喇! 係呢, 你有無o係屋企同個女講英文o架?

夫人: ...(沉默良久) "baby" 算唔算o架?

2) yes man

(老朽和夫人齊齊同女王玩緊, 女王一味指住前面 "er" "er" 聲)

老朽: 你係咪要水水呀?

女王: (點頭幾次)

老朽: (拎杯水畀女王)

女王: (耍手, 再手指指)

老朽: 咁你係咪要睇電視呀?

女王: (點頭幾次)

老朽: ........
........ 咁你係咪想玩呀?

女王: (點頭幾次)

老朽: 係咪想行街街呀?

女王: (點頭幾次)

老朽: 係咪想去巴布亞新畿內亞呀?

女王: (點頭幾次)

老朽: 咁馬達加斯加呢?

女王: (點頭幾次)

老朽: 你訓覺啦你!

女王: (點頭幾次)...

2009年8月19日星期三

"Ba... Pi! Ba... Bi!!"

時間: 星期一早上八時左右.

地點: 老朽睡房

人物: 女王, 老朽 (皇太后返早已經出門口)

(開場, 老朽死豬咁訓在大床上打鼻鼾, 女王都訓在側邊床仔, 慢慢郁郁o下, 有被仔蓋著)

女王: (細聲)... 唔, 嗯... 嘩... 娃娃...

老朽: "咕......"

女王: (仲係細聲) 娃娃娃...

(此時, 鬧鐘收音機細細聲響起, 開始播緊「晨光第一線」)

女王: (慢慢大聲) 娃娃娃... 吁... 丫! 丫!

老朽: ("典典o下") 唔... 唔...

女王: 嘩! 嘩, 娃! (已經係40分貝講o野聲)

老朽: (卒次醒o左) 阿事頭, 老豆我執相執到三點, 畀我訓多陣先得唔得....

女王: 唔... (好大聲)

老朽: (頂唔順慢慢坐起身, 按熄鬧鐘) 好喇好喇... 係咪開奶, 想食奶奶喇?

女王: (點頭幾次)

老朽: 咁你叫我先丫!? 唔係無得食 (竟然無人性到想訓返)

女王: ... ...

女王:... 爸..... pi!! 爸... bi! (第一下係 'pi", 第二o下先係 "bi")

老朽: (乜事都無, 睡魔即走, 醒晒, 記得上星期要拎住奶樽 "tum" 好耐女王才會叫 "ba bi" 的) 係喇係喇... 即刻開... (高速摺被)

女王: 嘻... 嘻... 咦... (四萬咁口)

老朽: (走埋女王床仔, 伸手) o黎喇!

女王: (伸手, 抱住老朽) 爸... bi!

(是幕完)

2009年8月16日星期日

婚禮相...

諗諗o下好似係第一次影教堂行禮的結婚相.

加入了總堂的攝影組後, 其實影幾次都係大禮儀, 反而之前好多時會去的結婚典禮就未去過. 碰巧今次係早前領洗的禮儀時認識的花路士先生和貓貓小姐大婚之喜. well, 和新人唔算真係好熟, 不過他也在 fb 邀請了老朽去他們的婚禮和幫他們拍些照片.

巧就巧在那天早上就是被夫人 ko 了一o野, 說我近來外出太多, 又影相又教堂又證婚又工作之類之類的, 留下她一人照顧女王, 有點不爽, 被 ko 了就當然要扮死狗, 老朽那天就乖乖地做好了所有的家務才外出去教堂, 就係因為咁, 人家行禮是下午兩點, 之前應承了早點到為新人影些特寫, 和跟他們的專責攝影師 tony 大師學o下o野的; 但最後卻到行禮前五分鐘才到教堂. 趕到氣咳... 真係好可惜.

正是影相容易出相難. 見證了一對新人浪漫一刻, 一個多小時就影了三百張相, 揀出來的可以接受的, 大約一百張左右.

數碼相就有呢樣特色, 真係不知道是好還是不好. 就是 - 後期製作.

以前家父每一張幫人影的結婚相, 都會晒出來之後慢慢用看鑽石那種 "10倍鏡" 去仔細看, 之後用尖毛筆點水和粉色紙, 砂紙, 還有小刀片去修飾一張相, 慢慢執. 現在, 乜都係用 DSLR, 用 photoshop, 但工夫不比以前少. 有心製作一張靚相的攝影師, 會用心用時間慢慢將一張相裁切, 之後調較光暗, 陰影, 加特別效果如常見的柔焦, 轉黑白或泛黃色, 有些也會將主體再用其他方法襯托出來, 總之試完又試, 數碼相好就好在一切可以重來, 但也因為這樣, 每張相在 "執" 的時間也增加不少, 像老朽一樣的業餘人士, 每晚可用的時間也只有三兩小時的話, 每天可 "執" 的相片只有數張至十數張... 如是者, 一百張, 起碼就要用幾星期了.

怪不得出面的攝影師都說, 好日子後要差不多兩個月才可以有相睇了...





***
後記... 其實有了自己家庭和小朋友後, 要認真地影相, 真係好難. 老朽之前提過 miss 了的十年, 現在看起來, 就有點像乘的士下車後才發現留下了東西在車上, 仲要唔記得車牌, 都唔知點先追得返. 加上近來工作又有好大的時間壓力, 日日回公司就救火一樣. 想 "偷o下雞" 在公司執一兩張相都無機會.

2009年8月9日星期日

皇太后牛一特別行動情報 (Part II) 暨 世上只一人合資格吃的 Macaron (大佬篇)

神秘禮物在此:



太后是個 macaron 迷, 自從老朽四五年前在香港首次食到後, 一介紹給當時還是女友的太太試, 她便愛上這甜得不得了的小圓餅; 嚴格來說, 這款是法國眾多不同款式的 macaron 中稱為 Macaron Parisien 的. 當時香港只有 Chocolux, Antique 會做, LGB 還未開香港店, 其他的也只有少數酒店餅房會做來作裝飾用, 看來只是杏仁粉和蛋白砂糖的配合, 但其實是一份極難掌握製作技巧的東東. 法國的廚師網也將其以不同的 recipes 定性為 "Moyen a Tres Difficile" (Medium to Very Difficult)

老朽今次為了希望讓太后有個難忘的生日, 之前漏夜在家中廚房等她睡著後試製了十多次, 次次都係失敗, 不是粉糊太 "瀉" 就是成不了形, 一不就是焦了, 還有就是起不了裙邊, 次次最後老朽都要將還吃得下的失敗作吃掉; 不留痕跡還要將有時有焦糖味的廚房通風整晚, 食到成肚都係杏仁粉...

知道細細妹璐大師都係好此物者, 向其求救; 她一邊笑老朽簡直係危險得像在 "差館整白粉"; 卻好心幫我找到了一間在天后的 cooking/baking school, 仲拍心口同大佬齊齊學 (仲幫我影相以作證物添...); 不過影還影, 大家都狼狽得很, 而且原來師父那天的份量改動過, 連他自己的產品都起不了靚裙邊; 大部份同學的也一樣, 反而老朽的算不幸中之"小幸", 有小部分有點 "短得不能再短" 的迷你裙; 雖然一定不及格, 但還可以交差給夫人...

首先是打蛋白 (加了 cream of tartar 使其更挺) 打到企身. 企身到大約咁樣 (呢張係老朽自家做時影的, 上課時老師加了色素).




之後是混合杏仁粉和糖霜再搞至 creamy 狀和讓空氣均勻進入至滑身, 入唧袋唧成圓餅型,




放在一旁, 吹乾表面後入爐



最後呢...




成品如此, 後面整得靚好多, 深色的是師父早兩天的製作, 他說這個才是像樣的, 以作 sample... 至於我那些就真係最靚已經係咁喇... 而 solo 那些, 留返去她網誌看吧, 哈哈... ^^"


和細細妹提過, 每個整 macaron 的人, 心中也有一個 "吃馬卡龍的人" 存在, 這個人, 可以是默存心中, 也可以是已知的人. 老朽一早 confirm 了, 吃的對象當然是夫人. 夫人也一早表明「我就是那人了」, 更揚言「我唔係係人送野都收o架!」. 所以老朽在製作時, 必定心無旁贅的為了她而整 (雖然都整得唔好....) -_-". 至於細細妹, 突然想起一句聖經...





現在已經是由睡夢中醒來的時辰了,因為我們的救恩,現今比我們當初信的時候更臨近了 (羅13:11)



不知這句對她來說有無用, 或者比當時聖保祿宗徒的意思有更深層的意義; 不過, 睡醒的意思有好多種, 醒了以後, 其實是可以比睡著的時候更堅定不移, 又或者, 一覺醒來, 發現原來之前的, 只是為自己準備日後更好的, 不一而足. 但是, 最為重要的, 還是 「睡醒」, 就要「清醒」. 不要讓自己進入後戰國時期, 自己混亂自己, 不然的話, 有咩 "依郁" 時, 恨不得回頭太遲. 還有, 最最最緊要的, 是 "唔好畀自己沉".



其實這句不只是細細妹合用, 或者, 係人都o岩的...

皇太后牛一特別行動情報 (Part I)




話咁快又一年, 去年太后牛一撞正女王出生無耐, 加上奧運大晒, 最後決定在家中由老朽整和牛薄燒, 燒到老朽 "騰出騰入" 廚房, 剛滿月的女王同埋仲算係坐緊月o既太后睇見老朽咁樣竟然o係度笑.



今年唔同喇, 女王大個o左好多 (雖然只係一歲), 所以決定放低女王畀太皇太后幫拖湊一晚, 出去二人世界.




中午先請太皇太后和太太上皇仲有皇姑飲茶, 因為下午要他們照顧女王嘛 (雖然他們樂得和女王玩足一天), 之後切了個 - 魔鬼蛋糕 -- 因為太后話次次都食 "天使", 想試魔鬼版呢.











二人世界第一個節目, 竟然係去 BB 展....... 不過多人到呢... 所以最後我們死懶鬼, 打去畀個入o左場的朋友問她見到些甚麼, 發現我們要買的東東加埋平都不超過兩舊水. 但係入場要五十大洋的話, 那就是說我們要行餐跑才慳百五大洋, 但卻犧牲了太后珍貴的生日時光; 所以太后最後決定 - 去 shopping! -_-"




老朽一向都不是 shopping 愛好者, 其實不太知道為何行來行去就會好開心, 有無人答到我呢o下... 我連買自己喜歡的相機和槍仲有酒的時候, 都不會看超過半小時的...




夜晚, 就係去o左太后一早話想去的潮州店食凍蟹.




本來是托教會老友鄭總理去上環老店訂位的, 不料他老人家上了內地公幹 "食大茶飯", 加上請教了香港飲食界巨巨巨巨巨擘黃大狀, 謂近年來上環最著名的兩間兄弟鬩牆老店已經 "跌 watt", 陳勤的蟹又無其他店的靚, 又不想去九龍創發和華苑, 所以最後, 決定只去平時去和同事午飯的百樂正店, 貪其坐得企理算了. 留了隻蟹, 廿兩重, 剩蟹竟然要六舊水, 無法子, 斬到一頸血...



其實真係唔太想畀o的老店屈, 不過香港就奇在最靚的蟹已經被老店們要了, 自己整凍蟹幾叻都無用. 二人仲食了個紅燒翅, 鹵鵝片等 "大路野"; 不過始終懷念多年前上環兄弟店之一的螺片 - 入面個副肝!




多謝太太上皇/太皇太后幫手湊住女王; 老實說上一次已半年前了. 這數月來, 其實我知道太后有時會不開心, 因為老朽沒有了秘書的日子, 其實繁忙多好多, 自己的工作做不完還要看那幫手同事打到亂晒籠的信, 近月來晚晚都不能在女王晚餐前回到家中, 加上自己真的很很很希望做一個似樣的影師 (不過太太近期不太喜歡做我的練習毛豆, 可能驚熱吧...) 所以間中星期六都會出去影下相 (其實一個月只有一次, 但一個月也只有四個星期六), 下午也會晏一些回家中. 週六上下午的湊女責任都落在太后身上.






所以決定了每月也抽一兩天和太太去拍o下拖, 好在元老院四大長老都通融通融 (哈, 或者他們想我們找個機會幫女王整多個細佬都未定... :P ), 幫手照顧女王.





至於今年的生日禮物... 可以算是相當成功的... well, 除了個靚靚皮包外, 就是... 賣個關子先!




2009年8月5日星期三

自煮行動新一期...

數星期以來公私兩忙, 加上夏日炎炎, 少了自煮, 但總不成使自己廚藝退步嘛. 所以挖空心思搞些夏天菜式出來...


這是個突然想起的菜式, 只是在日式超市行行重行行時, r 到頭爆突然見到凍櫃有些日本腐皮, 便想到填些酸酸辣辣的東東進去; 於是便用柚子醋醃雞絲, 加些泡菜絲進去.

不過食落覺得腐皮本身太甜, 但因為不能水洗關係, 可能要將其他材料的味道做得再淡一點會好些. 現在的重味了點, 下飯就一流, 剩食驚食到口渴... :P



買到些急凍青衣柳, 又不想像以前一樣的炒球, 所以便買個脆漿 (懶, 費事自己開) 炸起了, 之後一半做椒鹽, 一半較個糖醋汁 (鎮江醋兩份, 黃糖一份半 (我今次用了2湯匙和1.5湯匙, 因為不需要太多汁), 少少薑蓉少少蒜蓉), 煮起汁少少杰身後落炸好魚件快手兜幾下, 一上汁便收起, 唔係的話驚佢會腍返就o徙心機了.

呢味出乎意料的好食, 可能係之前用 "鷹炸粉", 而家呢隻係因為 "鷹" 唔再有得賣, 所以買回來試的, 但係開得仲好過鷹, 不過貴少少.


冬瓜火腿夾, 此味當然是夏令菜了. 好多人都煮過, 但或者未夠味, 原來冬瓜切件後要先煎香一下, 再用上湯餵一會 (又不能太熟), 最後才和已先煮過水的火腿 (否則火腿太鹹) 夾著來蒸; 簡單版可以是只用火腿茸, 那就無需先煮了.




哈, 這款是時常在美心吃到的 XO 醬珊瑚蚌炒菜苗, 幾乎大部分套餐也有的. 做法簡單得要命, 只是記得珊瑚蚌解凍洗淨後要用鹽擦過再洗一下 (記得是一位老師傅提過的, 防止有孱呀或者污物殘餘 - 雖然珊瑚蚌未必有), 之後再用鹽胡椒粉加 "底味", 醃好後用薑蔥水先灼大半熟, 不要過火否則一陣回鑊和菜苗爆炒時會太腍.

再次地拋磚引玉, 有高手駕臨請多多指正就好了! ^^


2009年8月3日星期一

近廚得食食食... (街外篇)

好一陣子沒有為大家送上本元帥有何美食落肚了.

先說說街外篇. 吃過太多, 只能夠將部分 post 出來.

一班在九龍某醫院的舊同事, 有天打來問老朽, 說是太耐無聚一聚, 找個午餐一起吃些好東西. 想了一會, 因為要就地點, 所以最後揀了九龍尖東的帝苑 Inagiku. 自從在 ifc 開了分店後, 老朽也未回過老尖正店食, 而且去到帝苑, 九成九都係去 Sabatini 食意大利菜的.

Inagiku 以天婦羅起家, 至今他們的海膽天婦羅依然是香港可以吃到的第一家.



和一位大狀在灣仔在某官司正審前和解了, 高興起來, 索性去了 Grand Hyatt Grissini 食 lunch, 鄰桌就坐了歐陽應霽先生, 真想跑過去謝謝他提議給我的靈感, 成功做出了溏心燻蛋!



是日吃的是蒸石班, 卻和中式的完全不一樣, 但老實說, 今次做得極滑, 想像中西菜不懂弄魚的, 今次真的跌了眼鏡, 高分之作.

另外就是外地友人回港, 找了其中一位世家子弟幫忙去了蘇浙會訂菜, 食了好久未嚐的真經典.




前面的是京蔥扒鴨, 後面散景是紅燒圓蹄, 再後的其實是海參鍋巴, 那晚還有好幾味老式滬江大菜, 可能因為世家子弟家人為前高官, 所以訂起來特別得到會所照顧也未定.



公司見習律師畢業 "坐正", 就要答謝老朽和某大狀之前教她東西; 故意約我們要請我們食飯. 雖不好意思, 但既然推不掉的話, 就跑了去銅鑼灣 Lawry's 食燒牛肉.

好怪 此物在美國極受歡迎, 但在香港只是一般, 其實, 是相當相當不錯的. 他們的粟米忌廉更是絕世佳品, 還有他們的 yorkshire pudding (可能有朋友會記得之前我去一間中環 soho 的店子, 也有此供應, 但 lawry's 做得更好); 值得一提的是他們的待應, 是一檯由一位專責的, 她還是著上了正式的 "女僕" 衫. 而他們也有多種不同份量的 prime rib, 老朽的是約 8 onz 的 "English Cut".

當然, 老朽四圍食, 一定不會只吃貴價東東, 始終, 香港最地道的味覺, 在街上更易找到.



這是天后的順豐排骨麵的上海排骨, 後面就是雞絲冷麵. 這排骨, 因為老朽夫人娘家就在這附近所以知道, 後來才見原來此店不少名人就為了他們的炸豬扒 (排骨) 而來, 和灣仔的新景園兩店可說是中式炸豬扒的兩大巨頭. 而最近卻是因為要參加 "差館造白粉" 的偉大工程而再次食到. 如果細細妹蘇璐見到就可能會鬼殺咁嘈後悔上次無來食了. (車, 不過佢都少o左過來我 blog 探我o既!) :P



炸雞髀, 一向係老朽至愛之一, 但多數香港的店子都做得太乾身, 甚至 "柴皮", 最得好又鎖住肉汁, 真是 juicy 的, 老朽首推灣仔 "樂景". 此店 "兜踎" 得很, 卻是臥虎藏龍之地.

其實吃過好的地方還有不少, 但篇幅所限嘛, 介紹住部分先. 下次再 post 幾味呢排自己整過幾味夏天的好吃菜式... ^^"

2009年8月1日星期六

主教公署公告...

27/7/2009

任免令: (節錄)

茲奉湯漢主教諭,公布任免令如下:

二零零九年九月一日起生效

周景勳神父免任香港薄扶林露德聖母堂區主任司鐸,並出任香港跑馬地聖瑪加利大堂區助理主任司鐸。

葉定國神父出任上述露德聖母堂區主任司鐸。

苑祥斌神父接替保天祿 (B. Bottigliero) 神父,出任新界上水聖若瑟安老院駐院神師。保神父將退休。

二零零九年十一月一日起生效

劉德光神父免任新界沙田聖本篤堂區主任司鐸,並接替陳志明副主教,出任香港中區及半山區座堂堂區主任司鐸。


***

第一件事: 恭喜定國! 雖然同你傾計唔算好多, 亦知你一向都係 cool 人, 但係當年做關社 "坐館" 時, 同你傾多o左; 你有 heart, 我都知o既, 我地成班老輔祭都知o既. 由你升執事, 晉鐸, 在大堂呢個 "九反地" 工作, 一直都被人覺得你太太太 cool, 而家 "坐正" 喇, 成間堂旨意你, 我們一定會祈求聖神嘉佑, 等你上智滿溢的.

第二件事: 好喇... 卒之都來了, 心跳得突然好快, 好快... 簡直係電車男入面, 成班網友見到電車男出手後, 放晒煙花咁叫道 "kita!" (來了) 一樣...

老實講, 等這一天, 等好久了. 有不少人說你太圓太政治, 太後生也太滑頭. 但是, 的確是你當年在我最最最霉最唔開心最多煩惱時, 重新帶我回來大堂的. 你永遠不會知道, 你當年叫修女找我的那一句話對我有多重要; 你曾經為我這隻亡羊放棄了九十九隻羊, 你為了我被爺爺鬧, 你為了我被其他 "老鬼" "串". 是的, 我回來了.

知道你一定不可能讀到這網誌, 卻希望你不會推辭我的小禮物, 日後, 或者會有機會合用的. 我知道, 你一定收到不少差不多的東西, 正是多一件唔多, 少一件唔少, 但, 這是代表了我的感恩, 我知道, 天主借你的手在我身上行了大事, 真的是大事. 沒有你, 我不可能有今天.

日後見到你的機會少了, 希望找你吃個飯不會推我吧, 我還會整燻蛋和 panna cotta 你食的.

在公司打網誌, 竟然打到淚盈於睫, 好在掩了門, 無人見到, 不然的話瘀死.

我知道 "阿公" 有做事的法則; 但是卻更加希望, 今次有機會在你遲少少 "趴地" 一刻, 也在你旁 "趴地" 為你拍一張趴地照...

從講道台上望, 見到的, 是這個畫面吧...?