春天自煮行動

又到春天時節, 天氣開始濕濕悶悶的, 煮東西有時諗一輪都唔知煮咩好.

夫人想食蟹, 記起之前做過用蟹來煮粟米羹, 因為貪方便用了雪藏的蟹肉, 雖然夫人覺得 "有肉感" 卻完全 "無鮮味". 這個我自己也覺得抵打的. 因為, 其實就算 "偷雞" 都應該要放一隻細的鮮蟹, 才會有 "蟹殼素" (鮮味來源, 當然不是藥用的蟹殼素).

今次是夫人想食海鮮, 所以就做一道炒蛋白出來, 一早買了一大盒北海道的急凍刺身用帶子 (是上月地震前的, 可以 keep 到 2012), 找了幾隻出來汆熟了切粒, 再買一隻半斤花蟹, 蒸熟拆肉. 怕夫人和女王不愛腥, 所以將海鮮用炸過的薑片和少少紹酒少過僻腥. 其實未必一定要此工序的.

蛋白用了四隻, 加上三幾湯匙雞湯和幾湯匙的濃生粉水, 攪勻後慢火炒 (一定要慢火才會滑的), 中途加入熟蟹肉和帶子兜幾下便可以了, 食時加少少烘過的松子和鎮江醋或者蟹醋便可.



相後面的是 "頭抽煎焗雞髀", 仲簡單: 雪雞腿洗淨後無需醃, 用個砂鍋燒到極熱後少少油爆香幾條蔥, 薑片和乾蔥後直接下雞腿, 煎香一面後反轉, 四周都 "碌" 一下煎香後就灒入少少頭抽 (三幾湯匙夠了, 又唔係整豉油雞) 和落一兩湯匙砂糖, 煎多陣蓋蓋, 等四五分鐘後見勁出白煙就熄火焗十分鐘 (因為怕雞腿太厚難熟), 之後反轉再煎兩三分鐘又焗十分鐘後就食得了.

再來的是一味早兩三年開始煮的 - 金華紹菜卷. 就是用少少冰糖蒸了華腿幼條後包入已經輕輕灼過的娃娃菜中, 排好後再用少少冰糖碎蒸十分鐘左右. 易做得來幾好看, 請客也可以做.



再來一味是扮 "大良野雞卷" 的, 是用雞肉加入少少洋蔥馬蹄, 包進腐皮卷起, 慢口半煎炸的比較香口, 也可以蒸熟後只煎香腐皮就無咁熱氣了. 記住不要 "過火", 我今次就係過了少少, 所以有點 "鞋口".



好在女王喜歡吃 (脆丫嘛) 送飯送得唔錯. ^^