順利過渡? (副題: 生日重要o的定係結婚重要o的)

三月尾除了是財政年度尾之外, 也是老朽在公司每年 "續約" 的日子.

係呀, 我們有不少行家也是每年續約, 因為名義上我們需要每年 "跑數" , 跑到的話就過關, 跑不到的話老闆有權唔畀你續約.

早大半年前, 老朽已知道今年的 file 不太多, 可能是 "僅夠跑" 那款, 又因為有數隻 "特長 file" 中間不可以先問客收中期律師費 (有些律師行有此習慣, 不過可惜我們不是...), 所以做就大把o野做, 錢又有不少未會即時收到的. 亦因為自知仍有能力接多點工作, 所以晨早在去年 6至8月已不下十次問定各位老闆拎 file. 不過收到風, 竟可能是大老闆故意不讓我處理太多案件, 那就是說, 故意使我跑不足. 所以一早估到, 公司去年轉大老闆, 又大裝修, 用去不少 "庫房開支", 而且和另外一位律師傾過, 估計今年我們大家都不會像香港大圍一樣有人工加了. (秘書和其實同事倒還有機會)

果然, 都未知跑不跑得到數的早幾星期 (剛過年後), 已經收到大老闆秘書送來下一年度的合約, 就是說, 預o左你下年要繼續做, 不過, 如我早料到, 的確係一毛錢也沒有加. 不像往年, 大老闆先派小老闆來遊說, 又問o下你滿唔滿意之類; 今年直頭請大秘書放低份約就算. 而老闆也不是沒有話的, 大概就是 "你又咁多證婚 cases, 而且又有間大保險公司客係入你的 commission o既, 呢度已經抵返晒啦" 之類.

無錯, 證婚係入我的數, 但係用去了放工後和週末時間又點計 (雖則我好喜歡證婚的感覺 :P)? 而那間保險公司客也的確係我撈回來的, 早幾年已經是我客戶了, 不過畀你班大帝做到人家話我地貴, 去年年尾我做埋 sales 講到牙血都出埋先再次撈到個客回來, 上兩星期仲要又幫他們說多了一些 file 回來 - 而且所有我的客戶, 不論是證婚的客戶或是大客, 所有律師費也有大大半是公司的 profit, 我只是分了一點點作為 commission (雖然 well... 如果多 file 起上來那 "點點" 其實都幾可觀的); 我心想: "抵返晒? 抵你條命就差唔多!" 呢個 commission 又係你地定o既. 定o左之後我要攞又唔 happy, 想點?

但正所謂做生不如做熟, 而且老朽深知, 我部分客戶 (也包括那間保險公司) 也是因為我公司在人身傷亡訴訟的行內是頗有盛名的才找我, 所以唯有一個忍字, 仲要笑晒咁多謝佢地 "畀機會我繼續o係度幫手".

大老闆對老朽一向都係古古怪怪, 要你幫手就扮晒o野, 唔係的話真係睬你都傻; 但這個離譜程度昨天突然因為一件小事而升高.

話說早排有日原本老朽下午在公司有一單行家 "彈" 過來的證婚, 是一對年紀比較大的 "新人", 是在公司簽紙的. 約了下午四點正.

三時正左右, 大老闆秘書走過來問我 "你四點用最大的會議室用多久? 會係幾多人? 有無機會轉房?"

老朽如實回覆, 因為是證婚, 人家都會希望有一間比較像樣的結婚地點, 大會議室比較 "似樣". 證婚嘛, 一對新人加兩個見證人加律師加幾個親友 or 攝影師, 八個九個囉...

最後大老闆說 "你用完就 "打發人家走" 喇; 如果佢地四點未到的話我照用間房o架喇; 咁你o的客就要係咁意等幾個字, 無所謂啦可?" (!)

搞了一大輪, 最後原來他好緊張咁要我間大會議室, 竟然係為了臨時幫另一位老闆搞個生日會!!!

好在我的客最後有另外的安排所以改了一天才簽紙o者, 唔係的話我夾o係中間點交差? 那一刻, 真係有少少火. 不過我呢o的正能量達人, 好快又無事了.

我知大老闆和老闆關係好, 也是想所有同事一齊切個餅輕鬆一下. 但係我那件係工作喎. 乜個餅切遲十五分鐘會融晒o架? 遲o的食會誤o左吉時乎?

(話得說回來, 生日的老闆係好人來的, 我都真心祝佢生日快樂o既!)