2012年3月30日星期五

台灣之行 - 食食食同埋食

剛剛由台灣回來, 第一件記下的,當然是... 食!  (也因此特別長...)

沒多少人去台灣會不喜歡吃的.  老朽就更加當然了. 

因為係公司付款, 師兄畀錢的, 所以公家吃的都還可以, 簡單就是:

第一天:
中午- 故宮博物院的「故宮晶華」, 吃廣東式合菜和兩道宮廷菜
晚上- 五角船枝 (新派台灣菜) - 士林夜市

第二天:
中午- 九份老街自費
晚上- 大鼎活蝦 - 饒河街夜市

第三天:
中午- 高記小籠包

就咁看下去好似無咩咁, 其實一吃之下真係唔講得少!

故宮的其實是由老朽付款請同事吃的, 因為一早知道這裡不太便宜 (原來廿二人要一萬七千台幣!), 而師兄和公司公數已經出了不少, 所以我就拍心口付了今次的這餐.

吃的只是一般的「團餐」, 不過加了兩道故宮博物院展品造型的食物: 「翠玉白菜」和「多寶格點心櫃」; 你話真的好好吃又不是, 不過真的好特色.




之後像旅行團的去看了忠烈祠禮兵換班; 竟然碰上了連台灣老友也說好少見的「跌槍」. 那位衛兵就真的失禮街坊了. 台灣朋友說這個兵會被罰一天假期 - 已經是便宜了...

晚上吃的「五角船板」聲稱是新式台灣菜但似乎吃下去是不錯的, 卻是香港的廣東味.  只有醃破布子蒸魚和一味素菜做得最特色.  就在這時, 我一位台灣老友來訪, 嚇到我又嚇到同事... (詳見另文)

是日最大節目就是去士林夜市.  其實士林區已經轉了型, 不過入面有蓋的食檔倒不如外面的多人. 吃了的有...

大腸包小腸 (糯米腸包台式香腸), 大餅包小餅 (薄餅皮包香蔥脆餅底), 檸檬愛玉冰, 蚵仔煎 (吃過的都知道台式蚵仔煎是濕濕糯糯的, 和潮式的蠔烙有好大分別), 鼎邊趖 (是一款湯浸著米粉卷和肉燕/魚丸/金針等的, 清清地的用來解酒是不錯的), 魷魚羹, 還有炸旗魚排和刈包. 

那天本來是腸胃不適的, 連去到故宮博物院也要借廁所, 少了十五分鐘的參觀; 但晚上一去到夜市就鬼打都無咁精神, 連續作戰都不知幾爽! 吃完和幾位同事還行了好一會, 見到下雨才打個的回飯店去,

比較抵死係當天下午氣溫有廿八度, 我穿了冬天衫就梗係熱死啦.  不過台灣一下雨就都冷下來了.

台灣的小吃都很便宜, 便宜得像蔡瀾前輩說的「令人發笑」。幾十至一百台幣一件東西, 只是港幣十元八塊已經食到你飽晒.  而且那邊很多都是「古早味」的幾十年老店; 在香港, 要找一家小吃開了十年唔執笠都唔係容易!

飽到飛起的回酒店. 明天又來...

是九份.

2005年去過, 又是下雨的, 使人望下去更加「悲情」; 不過吃的買的卻一點也不像. 而且大家都興高采烈的在做生意, 於是又和幾位同事一起分來吃了...

魚丸伯仔 (係好煙韌的魚丸仔), 芋圓, 烤墨魚香腸, 油蔥粿 (是一大盤的清糕灑上大量炸蔥茸, 切下一片片再加上蔥茸甜醬油膏煮的醬汁吃), 還有我的至愛, 少不了的紅糟肉圓 (仲買走了六個回香港吃).

可惜是見到有潤餅 (薄餅皮捲著菜絲和香腸等) 卻開始太飽吃不下. 只有去買幾塊烏魚子和陶笛當手信, 之後又買點牛肉紙 (薄牛肉乾), 海苔鱈魚片和薑母茶, 還有李儀 (李家三房) 的一點點鳳梨酥用來向夫人「交差」 (她喜歡吃香港沒得賣的那些) 已經又夠鐘閃人.

因為天氣差, 沒有去原定的基隆拍照, 只在九份影 (其他香港人見到我又換鏡之類的, 好多人叫我幫佢地影相); 方便那晚又吃過, 而且還讓我有時間找台灣的老友.

先去的是吃活蝦, 是蝦湯胡椒蝦還有鹽酥蝦, 加上一些菜的又飽一半, 剩下一半就是留在饒河街夜市吃的.

今次吃的是: 鹽酥七里香 (哈, 係雞PET PET!), 醬烤魷魚, 炸卜肉, 最出名的胡椒餅 (比較辣, 不過肉地和蔥份量比例好好, 皮也厚薄適中), 冬瓜茶, 雞內蛋 (是一檔賣麻油手撕雞兼賣的). 

但今晚的戰鬥力似乎下降了不少, 加上感冒底的咳未清好所以吃的不太多... -.- 倒是要休息一晚後, 最後一天才再戰小籠包.

去的不是鼎泰豐, 而是另一家有分店, 也做得不錯的「高記」, 不過覺得他們的水準雖然不錯, 卻和早年吃過的鼎泰豐有點分別, 不知是否心理作用了... 反而之前去了老友介紹的永康街手抓餅就好吃得很. 但原來, 一吃完高記已經夠鐘去機場, 去不了永康街另一端吃度小月和買京兆尹甜點和醬料啦...




2012年3月27日星期二

因愛之名 In the Name of Love...

(我不是說郭天王的歌啦... )

早兩日收到一通電話, 是位女士, 打我手提. 

「喂唔該老朽律師丫」
「我係」
「我呢, 係去年11月.. 日阿 Kathy的朋友呀... 我想結婚找你證婚」
「好呀, 恭喜晒! 你好日子係...」
「盡快啦, 我們兩個都想快, 因為我老公香港簽證期唔係好長, 佢係英國人, 打 Rugby Seven 來左香港睇波」  (o下?!?!)
「咁呀, 你明早上來我公司我即刻準備文件啦」

我見到準新郎時都覺得幾得意, 竟然仲著住一件 Rugby tee.  對一對他的護照, 見到他成日都來香港, 想必是見女友吧...

(以下原為英文對答)
「你職業係...」
「我做 costs accounting的, 而家無做」
「見你成日來香港, 咁你來香港是...」
「為了她」

原來他一早已經是香港常客; 也一早預備好在香港睇波時求婚. 而且抱住「破釜沈舟」的心態, 竟然連英國份工都辭埋, 諗住直頭來香港由頭開始.

「香港個市唔係真係咁好咋喎」
「我知, 但我想見到她」說是眼睛閃閃亮的散發著一陣光芒 (真架!) , 同時我又望一望新娘, 眼中的光芒是一樣的. 

「唔一齊返英國行禮, 英國地方靚咁多」
「我知道英國行禮地方環境一定靚o的架, 但係我都想佢在香港搵工, 所以我想和他盡快結婚」

唔怪得之感動到新娘啦... 係我都冧啦.  願意拋開一切又唔介意重新開始 (最緊要係新娘唔覺得又或者唔介意丫嘛) 我已經見到呢對將會係 happy couple...

2012年3月23日星期五

由一隻咖哩蟹講到霸權

(此篇發表時, 老朽人在台灣, 是一早 preset好的...)

太太和我老媽子有一個共通點, 就是都極喜歡吃蟹. 而奇怪的是, 太太最喜歡吃的是馬來式的咖哩蟹.

一般香港可以吃到的是泰國式的, 就是多點青檸, 香茅和用辣椒那款, 比較刺激; 至於馬來式的, 會比較 creamy 和會用些蛋加入去煮, 亦相對少辣.

很久以前我們是去「蕉葉咖哩屋」吃的, 但執下一間, 執下又一間, 原來已經全線收皮. 之後已經好久沒有吃過.

早排發現杏花邨商場有一間直頭叫「馬來咖哩屋」的, 又找到了, 去到, 點知, 原來那天係他們的 last day, 因為舖位被地鐵收回, 似乎要改租給大點的餐飲業吧... 所以, 他們已經不會再買入蟹這些貴價食材了.

是不是全香港都是這樣, 大商場大業主一用加租來施壓大家就無計可施呢? 大概, 當年反領匯的一班人現在都說「一早講左啦」之類. 而大家都會覺得「早知唔買領匯啦, 咁衰」. 但當時, 又有誰估到, 現在政府竟然夠膽帶頭在原本是平民殯儀館的地方加價呢...?

算了, 都係講返隻蟹; 最後, 我都係回去自己吃開馬來菜的灣仔「莎巴」. 他們的菜單是沒有咖哩蟹的, 不過我知他們有做. 所以就打電話去問, 他們最有性格的是, 如果那天的蟹質量差的話, 他們會臨時回個電話叫你不要來的. 所以我都訂了兩次才有得吃.


加兩份油酥餅和一份印尼沙律「加多加多」Gado Gado, 兩個人剛剛好. 飽晒, 食完後咩霸權一時間都忘掉了...

2012年3月22日星期四

聖.哥傳

自己多年來一向都好少睇漫畫的. 尤其係日本漫畫, 基本上都比較少接觸.  甚至試過被朋友譏笑我「無童年」的...

老友鮑魚先生就是個漫畫迷, 而且也是個哲學人, 更加是個宗教的小小研究者.

對, 和我一樣. 因為我本身雖然是天主教徒, 卻因為家父的關係, 自小已經接觸佛教, 而且對其教導亦有興趣.

就是這樣, 上星期鮑魚先生打電話約老朽在一次證婚前吃飯, 就"隊" 左一套給我, 說「我搵勻全世界都唔知有邊個識得同我去笑呢套書架喇, 整套畀你笑下」

當晚我開始看, 已經笑到不行了.

能夠貫通兩門宗教後將有關的事跡, 人物, 神話等結合來輕鬆表達, 而又絕不會有侮辱兩宗教的任何成份, 作者中村光的筆觸果然恰到好處.  由大笑到會心微笑又再變回大笑, 對於這兩個宗教有認識的人一定會覺得有一種莫名的親切感, 但又不會覺得有離經叛道的感覺.

明天公司就會有大半同事一起去台灣旅行 (對呀, 公司出錢的, 這年頭肯這樣做的公司大概不多了); 正思量著除了手提電腦和相機外, 帶不帶未看的那本聖.哥傳去機場看... 早上 6時集合乘8時飛機, 真的第一次... 我倒怕會在機場笑出聲來畀人以為我係傻o既...

2012年3月16日星期五

3.11 一週年之 - 好日子

和夫人一起陪女王去完堆沙比賽後, 便飛回家中換返件戰衣同埋拎起個證婚架生篋, 開始跑兩場的半天.  女王呢就當然由夫人帶住去食好野啦!

因為自己八卦和想真的為日本災民祈禱, 所以故意換好衫後到香港時間1:46分 (日本時間2:46) 時和日本全國一起, 我在香港的電視前默禱.  跟住才記得, 自己已經夠晒鐘兼未食飯... 最後還是餓著肚子出門算了. 我咁多脂肪無咁快暈低既!

其實今天我真的希望新人們可以在這喜慶的日子記住一點有意義的事. 所以我想了好一會, 應不應該用其他的東西做我的禮成前對白?  想了好久, 我還是決定冒一次險, 因為的確這是我好希望帶給新人的信息, 所以... 死就死啦...  (大吉利是...!)

「... 3.11, 這是個好日子. 也是個對全世界都有特殊意義的日子. 這個意義不在於有任何的大事或動盪, 而係繫於一句話『珍惜眼前人』. 因為今日新人今日只係第一日, 仲有好長的將來, 學懂這句話為你們來說至為重要...」

希望新人 (也是看過這裡的blog友) 不要介意, 因為我真的好希望你們會珍惜對方, 珍惜一切...

不過到了夜既一場證婚就截然不同了.  因為筵開數十席之餘老人家又多, 而又因為新人那天晚上疲態畢露, 還有點小意外 (好在無事) ; 所以就用了來做個引子, 對咁多老人家, 如果仲以3.11 做話題的話畀人掟雞蛋都似.

2012年3月14日星期三

3.11 一週年之 - 又來堆沙比賽

去年3.11, 我還在舊公司, 聽著電台看著電視和直播, 一幕幕生命流逝的影像還記得十分清楚. 

今年3.11, 日本正在復元, 而我也已經在新公司, 而且即將接受一項新挑戰. 

今年3.11 是星期天, 早上先要去石澳海灘參加女王學校的堆沙比賽, 點知無啦啦冷峰殺到.  3 月中早上竟然只有十一度... 仲要落埋雨, 唔係一早畀左三百大洋參加/交通費, 同埋夫人話想和其他家長聯絡一下的話, 真係費事去. 

不過唔係我話架, 我們想出門的時候, 電話響起, 係我們被安排的6組家長中最細那位幼兒班的.

「唔好意思呀, 我個女病左呀, 來唔到喇, 同埋另外一位幼兒班既都來唔到... 希望你幫我同學校講聲丫」

即係得返4個家庭...

去到, 見到的是只有一對家長和一個和女王同班的同學在劃定的方格內玩沙, 心叫不妙... 過了一會按學校通告打給另外兩位家長.  結果係有一位唔來又唔出聲 (唔係話病左, 而係話「唔來喇」, 真係夠晒負責任...) 另外有一位就話自己駕車來緊, 但背景是屋企的電視聲囉...!

呢個時候, 女王去年的英文班主任「女神」(well, 個名係另一位家長 (一位媽媽) 改的, 因為佢個仔當呢位英文老師係女神喎... 都OK靚女既) 行過, 我一野截住佢 (更待何時? 哈哈..) 問我們可不可以join 其他的組, 而原來就剛有另一組也只有兩個家庭到了. 所以問准學方後「女神」都說無問題. 

今年話說係以"2012奧運" 做主題, 我都無點想過, 只想跟大隊, 點知一問之下, 發現原來只有我們一家是去年有參加的經驗, 變了其他5個家庭都睇我頭... !

唯有以上次女王畫的「奧運旗」做辦, 說 "不如整火炬啦".

最後大家傾了一會, 變了是整個平整沙堆, 上面用水桶做出五環, 另外做多一個堆就做火炬. 

當然, 呢個係無辦法中的辦法. 我意思是想支火炬平平的斜放. 點知有兩位家長好有型咁話可以做到支 「沙火炬」企起來! 我一聽到真係覺得太神奇了吧...?

既然大家都有idea, 我呢o的最順得人的就梗係費事 lead 住啦.  大家照開工, 當然, 我一早知道, 沙粒點整都無可能變得到一支上昫下窄, 又或者起碼一字直身型而上面有個彎彎曲曲的火而唔倒下的.

最後, 當然個"火炬" 變了做似一座山的樣子, 我知那兩位家長好努力, 最後佢地都有少少後悔, 但唔衰都衰左, 都費事怪他們了.  既然見到個天開始下雨, 仲唔快快手手完事之後等評判一來講完就即走啦.  橫掂整得咁核突根本無任何機會拿獎啦; 而且...

因為3.11 是好日子, 我下午和晚上都有兩對新人要行禮呀~!

比較瘀既係... 學校每個家庭派發的小食包, 被我不知情又無睇野情況下留了在沙灘, 後來死死氣去問reception拎過... 浪費左囉!!

2012年3月13日星期二

爸爸的喜帖

繼爺爺的廚書後, 家父執屋時發現一張好大張的喜帖, 還有一份長長的「嘉賓提名」, 是70年代父母結婚時的「產物」.

當時的喜帖內, 用的字眼和現在的雖然大同小異, 但現在的 "謹訂於" 當年會用 "謹詹", 即是由玄學家計過擇過而出的. "詹" 就同 "占".  這份帖我自己結婚之前看過一次, 當時我因為覺得個字好型, 曾經想用 "詹" 字, 不過夫人說 "你咁寫出面無人識睇你, 仲以為你印錯" 而作罷.  而另一方面, 在下款之上, 現在好多人都不知道 "承嚴/慈命" 的意思. 

其實當年發帖是一定不會由一對新人自己發的, 因為結婚必須要 "父母之命", 因此絕不會是新人的名字放在下款. 而為突顯家中三代同堂以振家聲, 新人如有祖父母在堂的就會在父母名字上加上 "承嚴/慈命", 當為是奉「父母的父母」之命而成婚的.

而之前的喜帖, 因為只用中文, 所以打開後的另一面有時會無啦啦見到有個 "速" 字, 之後隔一行又有個 "玉" 字, 最尾仲有一行 "恕乏介催"; 這幾行字的意思, 有兩種不同的說法, 其一是留位, 原來 "速" "玉" 的意思是 "速移玉步", 就是當天早點到; 而另一個說法就是 "速" 代表早o的到, 而 "玉" 就是先行敬謝你們的禮物/禮金之類, 其實即係提客人, 記得做人情的意思了. 

當然, "恕乏介催" 就相對明顯: "請原諒我不再提和催促你們來了". 

同時間找到的就是一份嘉賓提名, 家父一位現已作古的世叔是當年 "國民黨年代" 的立法委員, 也是一位詩人和書法家; 他為了那「嘉提」題了字, 也作了一首詩.  以現時的社會來說可能覺得有點無聊, 不過當年對還是殖民地的香港來說, 不少人就會覺得是一份榮譽.  怎樣也好, 那題字是十分工整有力的.  而整份題名冊當中見到的人, 也不少是已經一樣作古的.  父母讀起來卻像再經歷當日的時刻一樣.  母親也說要找回她女家擺酒 (對, 當年比較少"聯婚" 而是先由男家擺 "迎親宴", 之後到回門時女家擺 "于歸宴") 時的綾緞布匹題名錄出來.  搞到我和夫人都想拎返自己當天的出來睇... 



的確, 不少人結婚幾年後慢慢就會忘記當天的興奮和心情, 或者, 大家都應該定時定候拎返當天的東西出來回味一下, 「提醒」一下自己...

2012年3月9日星期五

你結婚定我結婚呢下...

這兩天除了要應酬新的某上市公司客戶 (係呀, 做埋 listing/commercial deals and acquisitions/corperate finance 呀我而家) , 還有兩對新人, 一對是已經準備好註冊的.  另一對就是上星期「入紙」. 兩對都... 有點「頂癮」.

註冊那對一早說是只想上來我公司簽紙就好了. 後來再告訴我想找個坐得下廿人左右的地方.  老實說, 敝號最大的會議室都係坐下十人而已. 香港律師行比較少有如此大的地方.  因此我建議他們去找間中環的酒樓或酒店 function room 之類的.  他們也十分同意.  不過我數次說明只是因為地方問題, 而且我沒有和任何酒樓有任何利益上的關係.

最後新郎打來說找到一間老字號又靚裝修的酒樓還包了一間房, 太太的外家也覺得「企理」的. 心想也替他們高興, 因為找到一個自己喜歡的場地, 無論係幾大幾細都係理想的. 

到了好日子, 他們是擺中午, 十多位親友的. 我去到場地. 見到的是一間細房和一張特大桌子, 放了大桌後地方頗細, 我原本提過想他們放的另一張方形證婚桌就當然放不下來了.

呢個時候, 見到塊面有少少唔高興的新郎哥, 佢第一句竟然係 (雖然都係細聲o既) 「阿律師你叫我 book呢度, 搞到間房咁細連行都行唔到呀...」

我心想... 嘩, 唔好講到我咁「叻」得架... 我幾時「叫你」BOOK 呢度呀... 更甚的是, 你唔係真係咁大件事打左個電話就算呀, 起碼都來寫定菜睇下個場丫... 

不過咁, 之前接觸開, 我都深信其實唔係佢想燥, 九成九係老人家又或者姨媽姑姐話佢準備功夫唔好所以佢變左燥底啦.  既然係咁, 我咪一招太極講句「我去過呢度幾次都無咁細喎, 可能今日真係好日子呀」, 自己又唔係責任人, 亦唔會累到新郎. (唔係點講呢, 認又死, 擋又死, 但係又無理由食死貓嘛).  當然, 到了正式行禮時, 老朽的功架都算做「降服」到一對新人.  所以佢地最後又笑晒咁, 真係唔畀佢地激死都笑死. 

但真正係激死的唔係呢一對. 係另一對.

話說之前有一位新娘是看了她友人結婚後想找我幫忙, 但因為太遲撞了期找不到我證婚的; 不過後來她介紹了好幾對新人找我而沒有找她自己當時的律師. 輪到呢對呢...

事情是: 新娘未夠21歲, 按法例要父母/監護人簽字同意結婚, 不過她的父母又已經離異, 她是跟父親一起的, 不過出世紙不知是否去了母親那邊, 而父親也一早不見了當年的離婚法庭命令和管養令.

因為明知這些文件是必需的, 所以比起遞交擬結婚通知書更早的時間, 我已經提醒了新人要找回當年的紀錄, 又或者去家事法庭補領. 但到差不多要準備通知書時, 得到的答案竟然是新娘父親「咩都無做過」!

當下我真係頭都大埋. 邊有人咁 hea 架... 叫你去做一年事, 而且係相當重要的事. 仲教埋你點做呀, 去邊度拎呀之類. 提左四五次, 成兩個月喇... 都可以無件事咁. o個位你個女來架喎, 真係佩服. 最後, 又要上來教多一次, 之後拎到後又要上來我公司多一次. 點知...

上來時, 又發現張出世紙不在身邊, 所以又來多一次.

到今次有出世紙了. 點知...

新娘竟然係之前一晚玩得太夜, 唔知醒起身所以連 sales 工都無返!

我唯有叫佢去拎返張出世紙下午再來, 過來之前打電話給我等我安排回公司狀.  而剛好那天我中午有其他新人的事要辦所以遲了去食lunch.  到左一時半我準備走了.  呢個時候電話響起.  我心想, 你們現在過來我去食飯回來剛好.  點知... (又一次點知)

「我在係樓下呀」

喂大佬呀... 點就你咁多時間呀...

我並不是覺得他們要我等呀又或者時間有問題, 而是他們的態度, 好似唔想理咁. 真係要問一句: 大佬, 你結婚定係我結婚呢...

今次真係繼上次超hea新郎 (即係由母親和姐姐代辦一切, 咩都無主見那位) 後又一傑作喇...!

2012年3月7日星期三

naughty 2? naughty 3?



女王近幾星期無啦啦變得比較扭計, 打從情人節後不久就開始食得慢, 又多了講大話. 亦比較硬頸, 而自己訓覺去到凌晨又往往會醒來走過來喊晒口要我陪佢訓一陣 (有時我真係ZZZ 費事佢再煩, 所以抵唔得頸都過了去佢在佢張子母床訓左).  正所謂大家的naughty 2, 女王就 delay 到3歲才出現... -.-

其實, 我知這一天總有一日會過去, 而且到時我將會好懷念而家佢扭住要我陪的日子; 不過矛盾得來, 我也知道, 女王是要訓練獨立的.  而且有時賞罰分明之餘, 決定了罰就不可以心軟回頭.  好像昨晚一樣, 之前我說過晚飯吃得快點可以食生果 (女王好在都鍾意食生果的).  不過之後她扭計, 在飯後等我切生果時 (無錯, 夫人一向都係唔會切, 由我做埋的... 點解就唔好問喇... XD) 做功課, 用蠟筆填色, 做得好快. 不過就一手都係蠟筆色.  原本好地地去洗手的, 不過見到夫人和姨仔講電話講到上床上面, 於是又爬上去整污糟我張床. 我好聲好聲叫女王下來洗手唔聽. 之後「嚴正聲明」請佢下來也不理. 最後我發出最後通碟, 說如果不立即去洗手就沒有生果吃. 

一向女王一聽到我數「1 2 3」就會好快照做.  但今次似乎她真的想挑戰我的權力.  一動也不動, 還扮聽唔到的; 真係火都來埋.

OK, 既然你玩, 我陪你玩. 我洗好生果後真的只叫夫人去食. 自己也吃. 而且講明叫夫人吃完, 不要留給女王. 

個女初時還以為我只係講下算數. 因為差不多每天她最後都會有生果吃的.  但今次我決定要雷厲風行.  夫人輕聲問「留返一兩件畀佢啦一係」亦畀我正式拒絕了. 我叫夫人吃完後將隻碟show畀女王睇, 證明真的吃完了.

呢個時候女王知道真係"領左野". 開始喊, 而且都幾大聲. 我重申一次之前畀了三次機會她都沒有珍惜, 差點兒沒有搬出聖經來解說. 在我「義正辭嚴」的解釋, 和夫人慢慢的從旁解說下, 女王沒有再哭; 加上我醒起剛才提過他做功課好快. 所以當時是決定「獎」她一粒西梅乾 (pitted prune) 的.  所以女王止了哭, 不過我解釋了我只是因為剛才的做功課才會獎. 

之咁, 這兩天除了較扭計外, 女王倒有一件做得不錯的. 就是學校功課.

即將舉行的是學校的「堆沙比賽」, 而又有一個小小poster比賽附帶, 主題係"2012奧運" 喎, 我們當然是交由我那位當設計師的妹妹, 即係女王姑姐帶領我地一齊整. 出來真係好鬼靚又不失童真 (女王係好substantial 參與的), 搞到佢在開放日交作品時想收埋唔交添...

不過, 唔知有無人知道, 三歲在學校仲有撒尿算不算正常?  老朽當年的確去到幼稚園還有三兩次撒尿的... 女王又一樣, 早兩天又有一次.  學校仲換條紙內褲佢著不過著得好差, 又無抹乾, 搞到當日接放學的麻麻一見到已經聞到一陣味, 所以今天老朽燢燢地打了去學校問阿靚女班主任「姐姐 (校役嬸嬸) 當日係咪好忙?」

2012年3月5日星期一

惡頂...

其實都係為了抒發一下.

之前都有提過幾次, 我和夫人兩邊家人都係好和氣的. 就只是外父比較多聲氣和在家中霸道和「老細」一點, 喜歡老點外母大人. 但人係好人的.  起碼能在本地銀行做幾十年升至至榮休, 至少都唔會係神憎鬼厭一類了. 

不過回到家中, 有時真係都幾難頂的.  每次架電腦有事, 不是辦公時間內即時打來找我就是找兩位襟兄弟; 多數最後都要我竄去佢屋企幫手才作罷的.  這倒無咩所謂. 不過有時他的炮仗「火燭」性格真係幾令日煩擾的.

一向星期一下午至傍晚的時份都係由外母幫手照顧女王的, 因為保姆姨姨會放半天假.  而上星期一晚突然翻一下風, 外父打來, 一劈頭便說「外母o係你屋企冷親呀, 而家食唔到飯就訓左, 你屋企呀, o的窗呀, 入風架, 『次次』佢去完你度返屋企就病, 阿妹 (我姨仔) 又係, 『次次』去親你度返去又病咁; 你檢討下啦」

我唯有好好笑容咁講「我真係唔太知點做好. 我會諗諗」講完講埋拜拜收線.

跟手我同太太講聲, 我真係頂唔順. 咩叫做「次次」都病, 同埋咩係「檢討」? 我有咩做錯? 或者佢覺得外母一星期兩晚來湊孫唔高興搞夜左佢食飯. 但其中一晚係佢地全世界過來吃的, 因為呢邊地方大少少. 而且乾淨少少, 方便剛好返的姨仔.  另外一晚其實係女王太扭計唔想婆婆走住, 婆婆又衰心軟自己唔走.  至於o的窗入風, 我真係唔知如果我隻窗真係入風會點. 一早爛左啦...

夫人一見到我個樣已經知唔對路, 我都同佢講「好在係我聽, 如果係你聽的話, 佢一定勁鬧」

我慢慢講, 「老實講, 我真係唔知佢打來咩事, 鬧完就收線; 我係佢女婿, 我好尊重佢, 亦知佢性格係咁. 但係咁唔代表佢o岩, 外母好人縰左佢幾十年, 我唔得, 對唔住; 我諗你當我小氣又好, 你當我想「隔一隔」又好, 我會叫我阿媽幫多幾天手, 來緊兩星期請你叫外母唔使來喇. 當畀佢休息啦, 外父講到佢病成咁」

夫人都好明白, 所以佢都同意.  而第二天晚上, 夫人話我知外母打畀佢, 叫佢同我講聲對唔住.  因為原來當時佢係頭痛但係未訓, 咩都聽到晒, 而且其實係有食飯不過食少左; 同埋「可能係外父輸左股票, 見佢又訓左無人出氣所以打來」同埋「同時間又打埋畀姨仔又o係佢面前數我屋企幾唔掂」.

我原本想建議打畀外母, 但最後都係由夫人代勞, 因為我知道外母一聽到我講野就會又講對唔住. 我同夫人講我真心的受不起, 怎可以叫一個完全無做錯同埋只係錫個孫o既人為左一個唔合理的人與事去講對不起呢...? 

更抵死的是, 當外母講完兩句後, 外父話要和夫人傾.  其後她告訴我...

外父第一時間問「阿老朽 (佢另外會叫我小名的) 係咪好唔開心呀... 你媽媽話我做咩話佢喎... 其實我都係.... (之後係一連串的解釋同埋再次抦 點解我屋企可以「咁大風」)

不過當佢後來聽到我話「兩星期唔使外母過來」時, 佢又知自己玩大左. 

佢咁大男人又咁「老爺」當然唔會打來同我講對唔住. 不過佢知我之後一天會和夫人女王和我屋企一家去南丫島食飯.  而那天碼頭又撞過車來.  佢就沒頭沒腦的打給我話「哎呀碼頭撞車呀... 你地無事嘛, 唔會係你啦... 你地行過真係小心呀, 唔好行咁埋o的行人路邊呀...」

當然我知道, 佢無啦啦一定唔會打來咁講野的, 都係探下風..  咁我一早都講明, 我唔係嬲個人, 而係嬲件事.  既然你打來, 咁我都應該有正面回應O既...

「無事無事.  得架喇, 我地會小心o的, 我提埋佢地呀下... 多謝晒呀『公公』(扮女王叫佢)」

大家笑下, 當無事.  唔通繼續面左左咩...