2010年2月28日星期日

鳳體違和...

寫了一半小食篇, 點知女王上星期開始病倒, 發了幾天燒, 而且醫生話耳道有點發炎. 所以一直和夫人一起照顧著女王, 而我們兩個也相繼被女王 "噴到", 一齊中招, 一家大小齊齊睇醫生食藥, 好不熱鬧. 雖則醫生早說不是豬流, 但是成家人都病了總不會是好事, 所以一邊死頂著要照顧女王之外, 呢幾天都停了沒有 update 個 blog. 加上女王過兩星期要準備去幼兒園 interview, 不有點擔心才怪...

雖然我知道這裡讀者絕對不多, 都是些好友居多; 不過都是想說一句: 我未死o架...

這兩天比較慶幸的事就是老闆之一 (一向是比較好人的三數位老闆之一) 告訴老朽, 說今年未 "跑" 夠的數 (即開了單, 但未收到律師費的 case) 可以暫時不用特別去追了, 因為公司中的大數已經 "夠撐", 故老朽可以鬆一口氣, 將餘下的數目留待四月新財政年度才 "入數", 那下年就不用那麼惆悵了. ^^"

至於而家, 當然是早點去睡, 明天仲要和夫人一邊照顧女王, 一邊 "強化" 女王的英文聆聽能力, 還要多集中說一兩隻故事來 "入腦"... (聽說 interview 時不會要女王說英語, 畢竟只是歲半人仔; 但卻會向她說英語試試她的理解能力, 還會問她平時聽過甚麼故事之類的); 正所謂有備無患, 雖然備得遲了點, 真係 "好過無丫"...!

2010年2月22日星期一

迎新春自煮行動 - 熱盤

已經是新年的第七天 "人日" (後記: 出得 entry 來已經第九天, "玉帝日"...) , 人人生日, 生日快樂!

其實老朽呢兩星期都有煮到一o的菜式, 除了出街之外, 點都要 keep 住廚房有工作嘛!

在新年前, 老朽 (試) 煮過的新菜式有:



香檳沙律骨拼乳香骨 - 一時貪 "健康", 用了一字排, 初時想無咁肥, 但其實一字排即是整金沙骨那種, 係用來煮或者炆的, 今次用炸的話唔多得, 比較韌和 "鞋" 口. 不過食味就相當不錯. 下次用返腩排應該無走雞了.

兩款的煮法有點不同; 沙律骨是普通地醃好個骨後上粉炸, 之後打個白酒/香檳沙律汁芡 (白酒/沙律醬/醋/糖/胡椒和少少鹽) 上面. 而乳香骨就是先灼大半熟個骨, 之後再用南乳+紹酒+生抽+糖較個醃汁出來, 浸那已灼的骨件半小時後再上蕃薯粉炸. 這個是由私房菜老闆 jacky yu 的 "乳香腩片" 改過來的.




金華玉樹雞 - 話晒都係新年; 弄一樣比較有 "大菜feel" 的菜式都好.

其實我的方法也不繁複, 金華火腿用 "上方" 位, 先切片, 加入細半碗冷開水蒸二十分鐘. 那火腿汁可以留用, 而火腿亦會變得無咁鹹. 以阿一的高足李文基師傅所言, 火腿汁用唔晒仲可以留低放雪櫃, 但上面浮著的油是香味源頭, 不要倒掉.

冬菰一樣浸軟後切片, 而雞呢, 去骨後有兩個做法: 1) 切件先, 之後醃好, 同時用少少濕生粉醃, 那蒸起來的雞會滑好多, 或者 2) 原隻/半隻用雞湯浸熟才切件和金腿/冬菰排盤打芡.

我自己用的是第一款, 有朋友說浸雞不易鞋口; 不過這樣的話雞雖然滑但吸不了火腿和冬菰的味, 中看不中吃. 如果真係想雞滑而又有火腿味的話, 可以先浸半熟之後才切件, 再和蒸到一半的金腿排盤繼續蒸上一會. 最後用火腿汁和麻油埋一個薄的亮芡. 但呢個方法實在係比較 "柯 gor(6)", 所以我只係將雞蒸至僅熟 (10 分鐘左右) 之後打芡算了. :P



家常鹽爆蝦仁 - 一個比較簡單的菜式, 蝦仁用急凍都可以, 不過當然新鮮最佳, 始終急凍後的蝦味道差一大截.

要爽脆的蝦仁的話, 鹽/胡椒粉/生粉醃好蝦後就一定要泡油 (灼水/飛水始終差點點), 之後再用薑蔥辣椒起鑊爆一下已泡油的蝦仁, 落多少少鹽 (如想食重味下酒的話); 有人話用少少白醋醃會爽, 我試過 ok 不過今次未有再用, 蝦仁已經好爽口.

而因為過年關係, 又弄了大堆小食, 下篇再述...

2010年2月18日星期四

老麥生日會

自小已經好想在麥當當搞個生日會, 因為十歲八歲時, 曾經有一次有同學仔邀請去, 但當時不知何解, 學校自己那班出了個壞蛋王, 專喜歡搞事, 更喜歡搞當時是班長的老朽. 而不幸地老朽當時是隻鵪鶉 (今日仍是), 那次生日會的邀請卡, 竟被那壞蛋王同學沒收, 並以極之惡死的方法 (今天仍記得那惡形惡相) 威脅小老朽寫下一張 "轉讓書", 將我去生日會的 "權利" 轉給他. 當時又不知道為何完全不覺得壓根兒那壞蛋沒被邀請的話是無得去的, 於是就簽下了; 而雖然最後同學說只會請我和其他 "好同學" 去, 但當時的小老朽為怕壞蛋王報復, 真的不敢去那生日會...

鏡頭一轉, 已是廿多年後, 東亞運中最熟的那班義工領袖, 當中一位最近生日, 不知是另一位搞笑還是 "玩o野', 說為她到老麥搞一次生日會. 卒之, 真的在秘密情況下, 一班義工領袖穿著整齊制服, 為那生日的靚女義工帶來了一天的驚喜.

以前一位秘書告訴過我她曾經在老麥做 "麥當當姐姐", 原來都有不少大個仔大個女去搞生日會, 緬懷兒時的玩意, 又或者像老朽一樣, "彌補" 一下.

不過, 玩玩o下又覺得原來老麥o的遊戲, 的確係幾好玩, 大人大姐玩一o的都唔覺得白癡, 不過就難為今次的老麥姐姐竟然在老朽問問題時當我犯規 (話我無聽書喎... ><") 罰老朽薯條塞鼻唱生日歌 (罰則係自定的, 唔關姐姐事...)

[ps, 我舊秘書靚過今次的老麥姐姐好多, 嘻嘻! 我知你有睇我 blog o架!]

2010年2月17日星期三

又來食呀...

打從去年尾和一班嘩鬼去了鹿鳴春後, 一直都未有甚麼特別 "食而甘之" 的地方, 直到一月尾義工局大老闆 JP 請去他集團的金鐘力寶軒.

之前一向覺得他們的出品有點未能登極的感覺, 大概係因為老朽在食方面一直都是比較 "老鬼"; 樣樣都老實說, 做得不錯, 但無一樣特色到使我拍爛手掌的菜式.

今次去到, 初時也如往年一樣, 覺得是普普通通的一間潮州館 (最多係企理些); 而事實上他們的工夫不差, 只是沒有一處驚喜 -- 直到... 最尾 "單尾" 的一味 焗黃鱔炒飯. 飯焗好後加上醬油一起在韓式石鍋上撈勻, 這方法比起用傳統煲仔更易有飯焦但又不會難煮, 連幫手上菜的靚姐姐都做得來 (當然滋味和原煲焗的確是兩件事); 吃下去, 黃鱔全無腥味, 但醬油香又不會蓋過鱔味, 已經單尾所以好飽但係都食晒全碗.



上兩星期 "尾禡", 雖然入了迪士尼證婚 (之前另文提及); 但回家後和家人食飯, 媽媽做了一道 "叉燒汁炒豬頸肉". 是切丁來炒的, 她沒有用來煎或焗而炒, 竟然簡單地突出了豬下巴和叉燒醬香味, 連我都想學來煮!



為了辦年貨, 去了上環 "陳意齋"; 買了好一會後, 見到有一樣好久不見的東東 -- 鴨潤牛肉乾, 就是一塊鴨肝 "撻" 在牛肉乾上燒成, 不過價錢大約是貴普通牛肉乾30-50 %, 而且顏色 "黑猛猛", 一點也不討好, 不過吃了一塊後自此愛上了它...



老朽愛煮點東東大家都知, 但點心和西點就真的投晒降, 故此早前向細細妹 solo 求救, 她就送了一本他們公司的 "團年菜" 食譜讓我參考; 她更無啦啦送了一架 thomas 的火車公仔畀女王, 又更送了一套江獻珠前輩的食譜書給我, 為表答謝, 除回贈了一套西式實用食譜 calendar 和小盒朱古力外, 兩兄妹就跑了去 tonkichi 食炸豬扒.



他們當年還是細店, 老朽已經留意到他們, 當時他們的沙律還是未有沙律油供應的; 到今時今日, 出面的食家前輩都來介紹他們, 於是門庭若市, 如今好像鹿鳴春一樣, 不訂位沒得吃了, 相當可惜. 不過水準依然, 因為炸 tonkichi 是要恆溫低溫; 他們會用電爐來控制, 而且連打麵包糠的機和包也是日本空運, 如此 "泵本" 點會唔爆棚.

末了且說說 solo 公司的那本書, 入面有不少特色而不太麻煩的賀年菜式, 不只團年飯, 時常合用, 我就是學那兒的炸蛋散 (不過學得唔好, 另文再述...), 本書只是十元正, 集合了好些名家的食譜精華, 在三聯等地有售, 好抵, 快o的買...(幫你賣足廣告喇o卦...)

揀年花...

這篇一早應該出了, 等到年初四來寫是因為時間關係, 雖然有點明日黃花, 但或者可以留待下一年時大家作個比照參考, 又或者多多指正.

揀年花老朽不是專家, 亦試過有 "中招" 的; 不過跟著家父 "玩玩o下", 又聽埋聽埋一點點, 或者分享一下也可. 或者如果你是第一年買花又不知怎樣揀, 可以大家研究一下.

水仙 - 多數人也知道分 "企頭" 和 "蟹爪" 兩種切法, 而當中又有 "單托" 和 "雙托" 的種類, 不過單雙托就是天生出來的; 但老朽外母 "界" 水仙多年, 也試過一次是同一個頭內有一菖雙托而其餘是單托的.

揀水仙就是看 "菖" 的數目, 當然愈多愈好, 也愈貴. 但可以的話, 揀些葉深綠而較短的, 那開花時就不會阻擋了花身接受陽光的比例了. 而花菖也是較為飽滿, 漲卜卜的為佳, 內裡會有較多花數.

桃花 - 不論你是想放在桌上又坐於地上, 以下數點也可以留意:

1. 花色 - 以深桃紅為上佳, 愈淺色愈代表受陽光不足

2. 花數和蕾數; 以及上下分佈情況 - 當然是愈多愈好, 不過又要看看似乎是 potential 的花蕾數目, 才可以知道這花是否 "襟擺"; 而最好就是整株花的上下皆有花, 不過比較少, 多數係近底的花會比較疏.

3. 花型 - 多數年晚的桃花已有些開放中, 可以觀察已開的花是否工整無缺

4. 大小 - 一般而言, 桃花在開花期第一浸會比較大朵, 尤其係當花還在泥土中時, 到斬下來賣之後再開的花會慢慢比較小. 而回到家後如見花附近有好多綠葉的話也可以摘除, 因為如綠葉太多會吸掉花的養份.

5. 花身和花瓣是否堅挺 - 有些花雖然大, 但是花瓣偏軟, 也就是吸光和水份不足, 買時可以的話避免買花瓣已變軟身的, 因為就算再畀光和水有時未必可以回復原狀.

6. 樹身 - 買的桃花由1年至3,4年樹身都有. 如果是原枝的話多數係 1-2年身, 如果 3 年樹的多數已有樹膠在樹的中幹; 而現在有不少木桃花都是以接枝方法在老樹上接上新枝. 有人說會影響樹的整體美觀但老朽買過幾次都無問題, 仲開得好靚, 既然係討個彩頭的話也算達成目的, 個人就覺得無必要一定要找原身樹幹了.

吊鐘 - 如今已經好少人玩吊鐘花做年花了, 不過家父自小已經喜歡. 所以也略懂一二; 吊鐘外珍比較 "薯仔", 因為鐘花都收在花蕾內, 葉又少又細, 樹枝也不像桃花的密, 所以未開花前外型不太討好. 而揀吊鐘花時家父說就看花蕾和樹身是否勻稱實淨; 花蕾夠多之餘也要夠大, 有時一蕾內含 9-12 朵鐘花的; 而有時 (比較少見) 花鐘頂的紅色會變成青色, 別以為青白色不好意頭, 這稱為 "銀鐘" 的其實少見, 也更好意頭.

不過說到底, 買花有時真的講 "撞手神", 上面的都只是之前看過試過的個人經驗, 又係那句, 老朽仲有其他花種是不認識的, 還請有人見到的話指教一下就幸甚幸甚喇!

2010年2月14日星期日

東梨東梨...!

呢句係女王所講的 "恭喜恭喜"... 呢期在我們一家人 (包括自己和夫人兩邊) 中係最 hit 的 "潮語".

當然要先在此祝各位路過的, 又或者新知舊雨新春大吉, 周年旺相, 從心所欲, 福杯滿溢...

不知多少年沒有在年三十晚行花市, 全因為怕迫人; 而我的桃花也因為比較大株, 為免人碰人出事所以也如往年一樣, 早兩天去了買 (加上今年天氣差, 太暖了, 花都比較早發, 所以早點才可以揀到心頭好). 而今年因為老父凌晨祭祖時間推遲了點, 所以雖然未能和夫人 & 女王一起前往, 也叫做走一轉最迫人的維園, 也去了支持自己中學師弟的檔攤.



不過走到年宵, 見到的是有點旺丁不旺財. 無辦法呀, 都是天雨惹的, 大家都無心戀戰, 統統都是行多過買, 走過見到有整株, 或者大一點桃花的人也欠奉. 而家父鍾愛的吊鐘花, 更是全維園只有一檔, 一樣未見門庭若市. 睇住o的花慢慢地開著, 見到花檔主個愁樣, 倒替他們擔心. (話分兩頭: 咁點都愁唔過昨晨的車禍, 一下子一對10多歲的姊弟便父母雙亡, 呢個先係人間慘劇, 那位肇事司機才是千古罪人! 去年又是一單醉駕, 今次的就係打瞌睡!)

窗外遠眺寶馬山, 雖然天色發白, 但是霧鎖香江, 有點估不到虎年會有一個 "麻麻地" 的開始.

心願除了那新春大吉, 周年旺相, 從心所欲, 福杯滿溢, 更重要其實是 - 祝大家平安.

2010年2月11日星期四

人生七十古來稀

上星期是家父七十大壽.

現在, 相對來說真的比較少人會去 "擺大壽", 不過作為子女, 老豆既然想高興一下, 當然樂意 (well, 加上佢老人家話將收到的禮先用來填數, 有餘額先由我們出呢... 咁對於不是富有的老朽和妹妹來說都係呢個年關中減輕負擔的方法嘛)

不過他老人家相當即興, 去年中說擺, 但想揀地方又拿不定主意, 豈料到了決定的時候才發現那天是黃道吉日中的吉日, 大部分他想設宴的 "好地方" 已經滿了; 加上他由五六圍, 加下又一圍, 加下又一圍, 去到最後是 16 圍, 人家擺結婚酒都無咁多也. 所以左揀又試, 小弟又四圍打o下問o下的才揀到合和中心的一間似樣而出品又不錯的酒樓.

請來的是父親大人七十年來的好友同事親戚, 由小學同學 (!) 開始, 連他中學的老師 (身子尚算不俗) 也有, 加上父親大人當年在戲劇界也有涉獵, 一眾中英的第一代老臣子到賀; 而當年他任職公務員時的高官老闆也有不少十分賞面, 於是愈搞愈大, 後來政府的幾派工會又都說出來幫手又做攝影又做司儀的 (因為他當年其中一項工作就是在各工會間斡旋, 是謀士說客之一), 所以最後我除了付款和 confirm 菜式之外都無咩要做了.

現代人已經少搞壽酒, 所以來的客人都讚我和細妹. 父親是我世上最尊敬的男人, 呢個好多身為子女的都係咁諗; 但說到孝心, 其實慚愧得很, 工作和湊女已經佔據極大部分的時間, 所以很多時都是父親提醒我才記得有事未做. 所以多多少少都有點甩轆情況. 不過, 自覺能夠為父親辦一場壽宴, 是我的福氣. 那晚連我自己和女王都 hyper 了, 女王更加無啦啦 (罕見地) 在陌生人面前跳跳扎的, 又識拜壽 (不過說成了「卜如東 loi, 就比文山」笑到爺爺見牙唔見眼).

成晚最 "頂癮" 的是16圍訂的兩箱紅酒竟然在開席後無耐已經飲完 (直頭似耶穌加納婚宴一樣...) 經理說 "剩下兩支了"; 於是母親大人就叫我 "你去買啦", 哈哈... 尚幸樓下百佳還有特價的 wolf blass yello label shiraz, 容易飲得來又平, 掃了一箱 -- 點知後來只喝掉一瓶, 有無人想要? 平價推售...

2010年2月10日星期三

女王近月大事紀

寫下來, 讓自己也記得這兩個月發生咩事...

1) 就因為一月中時去健康院, 姑娘問一句 : 「佢仲用緊奶樽飲奶呀?」 所以我們決心要女王轉用杯, 仲遵醫囑用我們的 "大人杯"; 於是一個唔該就由那天起, 女王就無躺下來飲奶, 不過開頭幾次是相當相當痛苦的. 因為之前我們每天三次就是畀個樽, 她就會乖乖飲完之後叫我們 "收樽". 但開首數天, 基本上女王見到杯子已經不想喝, 後來夫人想出 "絕計" 一條: 橫豎醫生都建議喝少點奶而吃點麵包, 而女王又十分喜歡麵包香味, 那就索性用包點著奶才吃, 之後要喝一口奶才繼續有包食. 這條 "橋" 用了數天後倒也算幸運, 女王有時只吃包但又會因為口乾, 主動飲幾口奶. 而且晚上還 "順便" 因為晚飯加了碼 (而家食大人碗一碗有多的飯和送了) 而不再在 11 時飲奶才睡, 戒掉了宵夜.

(另, 後來發現, 好多其他 bb 都還是用奶樽的! 有點點像被健康院 "謴" ("昆"的正字) 的感覺)

不過, well, 而家女王飲奶時, 一定要睇實, 否則一檯一地, 甚至一身都係... -_-"

2) 女王開始似老豆, 即係愈來愈長氣. 講的說話可以講好長, 有意思的都可以有七八個字; 仲有, 上星期去爺爺麻麻屋企要走時, 無啦啦叫道: "唔捨得爺爺" 之後跑去抱住爺爺對腳; 嘩... 呢招極度煞食!

3) 唔知係咪見得保姆姨姨做家務多, 女王有時又係無啦啦會突然說 "拖地呀~!" 之後自己走去拎個好輕o既紙拖把去拖地, 有時 "碌" 了個球去梳化底就會搵長竹之類去 "撩", 還趴在地上好似找東西的, 好在保姆每天都會拖地, 不然手仔腳仔一定污糟晒!

4) 另遵醫囑, 開始讓女王用小牙刷來刷牙 - 不過, 女王唔識吐水嗽口, 次次都吞掉, 每次刷牙就像飲水一樣 (所以一定係用冷開水的)... -_-"

5) 比較使人 "頭痕" 的一樣o野係女王竟然開始識得 -- 講條件. 之前叫她說話又好, 做甚麼東西都比較聽話, 近來就好多時故意地反叛, 只有去到 "唔理佢" 的時候, 她才會乖乖地做返; 又或者要提供玩具之類給她才聽話. 最近例子有 solo 姐姐 (定係姨姨呢?) 送的 「媽媽茲」火車頭 (thomas), 有時要靠佢才叫得郁女王... 唉...

忽然有感...

好多人以前話周啟邦兩夫婦古古怪怪, 又愛出風頭.

人走了, 好似不少人都覺得, 佢都 "收晒火" 了.

以前我都一樣有這感覺, 因家住中區, 而他們身在南區 (摩星嵿左近), 所以要去其他地方好多時都會取道羅便臣道或堅道, 亦因此好多時都會路過我老家附近. 次次見到, 我都會覺得他們怪裡怪氣.

現在再想, 其實他們鶼鰈情深已五十多年, 人前人後都係一樣; 回看現在社交圈, 有幾多人可以好似他們一樣呢? 莫講話所謂 "名人", 連我們這些凡夫俗子都難得有情人. 看來, 倒要向他們學習學習才是. (我講真o架喎)

周老先生, 我會為你祈禱的.

2010年2月7日星期日

點解咁傻...? vs 救人一命

前幾晚又聽到一宗產後抑鬱導致新任媽媽和僅僅兩個月大的 bb 自殺的新聞.

自從做了 "老豆" 之後, 對於這種新聞極之敏感, 看到新聞的那夜亦睡得不好.

又想起了之前一篇提到 "點解上主唔使人有個更好的方式" 的問題. 一直問, 一直問, 點解有人要咁傻? 懷胎十月, 幾難得先大吉大利生了個可愛的嬰兒; 完全不能明白為何會一下子變得如此殘忍, 媽媽, 你不記得你還有個愛你的老公嗎? 你不記得我還在你肚子內的時候, 你幾希望見到我真人嗎? 為何因為你害怕, 就帶我走?

我一向是個大情大性的人, 夜闌人靜的時候睇到呢o的新聞以至於 youtube 等都會睇到眼紅紅. 其實, 我都曾經想了好久, 因為在夫人懷著女王到尾幾星期時, 的確情緒比較大波動, 連聽講座都會無啦啦喊起來, 所以老朽都曾有一段時間進入極高度戒備. 或者, 一點點的個人分享可以幫到你, 你, 或者你...

for 準媽媽/不開心的媽媽:

- 找朋友或者屋企人傾多o的計, 傾咩都好, 因為人好得意, 99% 的人當你講唔開心事的時候, 對方就算佢自己有咩問題, 都會好言相勸和提醒你.
- 如果開始覺得自己成日唔 happy, 在你 happy 時應該向人透露一下自己好多時唔 happy
- 如果有陪月/工人的話, 相信她, 用人勿疑; 你自己細個時都無陪月/工人啦, 咪又係咁大!
- 相信你老公, 99.99% 老公不會因為你生了後有那 1% 機會走樣而嫌棄你的. 剩下的那 0.01% 老公, 如果佢有機會嫌棄你的話, 請他付款幫你去瘦身, 否則唔好咁多 "嘰嗄"; 如果又嫌棄又唔畀錢, 呢o的男人應該係佢死, 唔係你去死. (我講真o架! 雖然絕對唔係叫你去殺o左佢)
- 相信你老公, 佢真係好愛你的.
- 數據上, 香港 bb 存活率之高, 世界可算首屈一指, 連錢都唔使擔心, 因為就算你真係拎綜援, bb 都有額外的 allowance 的.
- 時常記一下, 你如果真係出o左事, 你老公會點? 係咪想佢陪你/&bb 跳埋落去?
- 有宗教信仰的話, 多點祈禱或者頌唸佛菩薩名號, 須知道世間道上, 天主/神是愛, 就算佛說無常亦非消極, 反而係希望大家學會接受, 因為懂得接受才是解脫, 死絕對不是解脫.
- 產前多點和其他準媽媽接觸, 又或者多點上網在各大討論區/kingdom 之類和其他媽媽交流.


其實, 準媽媽有時真係未必咁易控制到. 反而準爸爸可以多點留意:

- 老婆一定有唔開心的時候, 真正的用多點時間和她傾計. 又或者一起祈禱.
- 產後一兩個月的 "夜更", 一定係老公當的, (想埋身餵人奶的另計, 或者可以先行泵出入定先, 如果唔夠奶水的話請夜晚用奶粉) 你有時間鬼咁夜上網唔通無時間換片餵奶? 如是者慢慢你會想幫 bb 戒夜奶o架喇, 仲會好落力咁幫佢戒, 哈, 一舉兩得.
- 陪老婆 (請o下假啦間中!) 去產檢 & 聽 talk, 尤其係有關產後抑鬱的 talk. 如發現在聽 talk 時佢有唔開心的話, 請多加留意.
- 在家中安裝窗花, 唔使梗晒但係最好有鎖
- 如果預計多人探你們的話, 安排分散時段但留時間給她休息.
- 如果預計不會太多人來的話, 在你有機會留下媽媽和bb 在家前, 在窗前/廚房/洗手間準備小紙條, 上面寫有一o的鼓勵, 甚至肉麻的說話 (我的確有準備過的, 但後來因為夫人情況不差, 而且陪月都幫到手, 同埋兩邊老人家和我夾定了總有人幫手所以上天保佑唔使用)
- 如要工作之類, 多點打電話回家, 一樣係講o的鼓勵 or 肉麻的說話, 不需要介意老闆點諗, 老闆在你心中橫掂多數都唔係好人, 唔爭在多一樣半樣. 亦唔好怕肉麻.
- 高危時期視情況, 有時可達兩三個月以上, 各位老公自己執生.

呢個 list, 一定唔係 exhaustive 的, 有咩想到不妨分享一下...

***

另一方面, 上星期土瓜灣塌樓後一天早上, 我在東廊乘車時見到消防署的 CV (茶水車), 係 loaded 的, 好多 "架生", 之前都未見過 loaded 的 CV的. 相信都係去緊那災場, 或者係剛完成任務返局之類 (我唔 sure, 請各行消防的師兄指正); 記起電視新聞上看到, 第一架到場的消防車 (唔知係咪細搶喇), 那班消防一下車, 真係好似九秒九咁衝上去災場, 即時用手挖呀, 挖呀, 又係咁問 "有無人呀!?" 見到都要為他們對生命的尊重致敬.

在東亞運時拍著一位行消防的亮哥, 問過他 "你見到燒到埋身, 又或者成班災民傷者, 你唔驚o架咩?" 他的答案就係 "真係唔會o架! 你一見到就會衝埋去, 呢個係我地消防o既本能, 我地有氧氣就會畀人吸, 有事就畀人走先, 真係唔會識得驚"

"真係唔會識得驚" 同埋 "真係唔驚" 係兩件事. 消防, 都係人, 一樣有家爺仔 "也母", 但係香港的消防員真係值得一讚, 甚至一讚再讚!

不要以為只有消防員有料到, 香港的救護員 (佢地自己戲稱 "豆腐員") 也一樣有 heart. 在 facebook 看到一段片, 見到一名救護員在 open day 用輕鬆手法介紹裝備, 真係有咁o既知識都要有咁o既 heart 才會做到的.

看!? 咁多人都在拯救生命, 老套o的講句丫, 難道你要放棄生命嗎??

2010年2月4日星期四

天佑海地

說天不佑嗎? 又不是, 說是天佑嗎? 更不像.

同樣是7級大地震, 一樣死傷枕藉, 但中國四川2008年5.12地震後扒出的生還者為數更多於位於一國首都的海地太子港.

不得不讚中國的國力和「子弟兵」的克苦和能力.

但說回海地, 好端端的, 怎麼個一大早就死了幾萬人, 而且國際的行動都遲於其他事故. 其中一個奇怪的現象, 或許去海地和中國無邦交. 而負責趕去救災的美國又處處以自己行先, 連無國界醫生的飛機也一天內三度不獲降落 (當時太子港機場已由美軍接管). 至於當地的軍警, 好可惜自己都搞唔掂. 維和部隊又要先救出自己同袍(都唔知咁做o岩唔o岩... -_-)...

更使人沮喪的就是總統府都塌了, 連總統一家都成了難民; 而更不幸的, 則是這個八成天主教徒的國家的主教座堂也塌了, 還壓死了太子港的 "四柴" 總主教*, 而代理主教就失蹤 (恐怕兇多吉少...)

在地震後兩天看了 google 的衛星地圖, 依然是用著災前的那張, 風和日麗. 過多幾天再看, 已經見到太子港一片黑色似是焦土的地方, 尤其是海岸線一帶.

過了數週, 再看一遍, 又有點不同, 雖然依然很多地方都塌了, 不過焦土已經清去不少, 但海邊依然有大量 (不知何解) 沉沒的船隻殘骸和貨櫃, 地面依然有不少未及修護的裂縫; 路上仍然又很多臨時帳篷.

其實我到今時今日也未能完全理解為何上天要給予世人災難和如此的死亡. 我自己曾寫道類似: 在世間的死亡為上主來說不是終結, 只是一次搬家或移民行動, 去一個不回來的地方, 享一個不同的樂, 甚至是為下一代準備這個地方.

但是, 如果真是這樣的話, 可不可以使人有一個容易去接受死亡, 又或者生離死別的方式? 作為一個教徒, 呢個結, 也不易解.

思想上去考量呢個問題, 佛家會不會答得更好?



* "柴" 是指主教牧徽上的垂絮層數, 一般而言神父不會有牧徽; 到主教才會用帽邊有三層絮的牧徽, 總主教 (即 "大主教") 會有四層, 樞機就會有五層, 但教宗牧徽不會用帽, 而用代表 "聖統制" 的三層冠.

2010年2月2日星期二

他(們)約我去迪士尼...

第二次去迪迪尼為人證婚.

上一次是一個極之凍的冬日下午, 去了他們酒店的公園 "涼亭". 為的是舊同事, 晚上仲飲埋, 第一次領教他們的 "摩利菌龍蝦湯".

今次呢, 新人是朋友介紹的朋友 (不過而家都算變了朋友啦), 本身自己的友人也是早幾星期找老朽證婚監禮的; 還「情商客串, 不另收費」的幫他們擔任了頭幾分鐘開席前的司儀 (講幾句o者, 雖然有說證婚律師不太應該變成司儀, 不過幫o下人又有何所謂?) 既然是星期六晚上, 本來再幫手都無問題, 不過一早約了屋企人晚飯 (其實30/1 晚係 "尾禡", 家族算係做生意的, 所以恆常都會一起晚飯) 又無理由不去, 所以只可以為他們擔任頭場司儀.

新人既然無特定司儀, 於是一開場便以報新聞的方式來出那段 "片頭", 並且不用介紹新人入場, 因為在 "片頭" 尾段新人自己介紹了自己入來, 別開生面, 都相當有心思. 唯一有點出乎意料的是那天他們完全沒有找兄弟姊妹, 所以早段時份覺得有輕微的甩轆情況 (哈哈, 他們切 "真餅" 倒真的遲了一個小時), 幸好迪迪尼有一樣好, 就係佢地每一場婚宴也會有個 "wedding planner" 扮演部分控制的角色, 使新人可以比較輕鬆, 而 (開始賣花讚花香了) 老朽也算是頗有經驗的證婚律師, 所以和他們夾得好, 新人在無需要給太多指示我們已經 "知訂".

不過到 "埋檯" 之前, 老朽見到一個人, 可以算係我的偶像.

係人稱 "麥 sir" 的麥潤壽先生.

後來新娘提起, 才知麥先生算是新娘在媒體學上的 "啟蒙老師"; 至於老朽自己, 則是因為數年前為天主教會的一個年青人活動做司儀, 那次的嘉賓正是麥 sir (雖然老朽自己現在不是常有機會聽他的節目); 因而結緣, 不過之後只是在其他教會活動見到碰面時點點頭, 未有深交 (始終心理上和偶像係有點距離的).

今晚突然見到麥 sir, 心中其實係有點突如其來的緊張. 因為麥 sir 的口才和急才比老朽的那些 "二打六" 口才好多了.

卻是因為我一向證婚也不希望太呆板, 每次都有點新東西鼓勵新人, 所以心想... "麥 sir 晚晚都咁勁急才鼓勵人, 一陣聽到我的所謂鼓勵說話可能會覺得我無料到" 所以在上台前突然出了一滴汗, 咪話唔驚...

但係一秒後, 理性重新控制局面, 記起當年 interview 做見習律師時回答老闆問 "上庭你會唔會驚o架" 的一句話...

「你唔可以驚, 個客係旨意你o既, 你驚咪累死佢!?」 這是十二年前老朽的答案.

老闆當年就係憑呢句話請了我. 今天, 呢句話猛然警醒了自己.

好在上天保佑, 無在麥 sir 面前出醜, 否則之後 "仲使出來行o既!?".

不過, 就因為新人遲了開始, 所以結果老朽飛的的回到老家食飯, 已經係晚上9時半的事了... =.=

這個是迪迪尼 ballroom 外天花水晶燈...



呢張就係重遊上次 08年下午凍到飛起時迪迪尼戶外證婚的場地, 晚上著燈都幾浪漫...