打風打著 old seafood

上星期打風, 打到八號波. 全城大半上班族亟待救援, 希望打風打來本年度最後一次的打風假.

望到了, 四點話六點掛波. 大部分打工仔都整裝待發的, 約定麻雀腳.

老朽公司, 當天大老闆剛剛不知發完何等神經, 只拋下一句: "住離島o既走先啦o下" 就回房中閉關. 結果全公司幾十人, 除了兩位真的住離島的同事外, 全部乖乖安坐, 連大老闆的大秘書也不敢噤聲半句, 如斯壯烈, 有如抗日時長沙會戰, 「八百壯士死守四行倉庫」一樣; 直到五點半, 大家才一仆一碌的回家.

可惜, "大家" 不包括老朽和大雄, 還有數位"烈士". 都是在晚上七時半左右才走的.

而走的時候, 老朽路過一個當風的街口, 一陣狂風, 老朽一看, 簡直是「死神四」的劇情: 有個罐在迎面飛埋來! (其實 "只" 是可樂罐乙個) 老朽便使出 matrix 的招數, 倒退加扭腰, 避過一劫.

風就打完, 但工作照舊, 在尚未有新秘書的日子 (即早幾日), 有時工作都會幾猛盯. 加上呢個世界, 係有好多 "old seafood" 的 - 即行家之中的前輩, 但依仗自己係老鬼, 有時行事就亂來.

老朽有一宗案子, 是屋苑漏水的; 屋主是有錢大戶, 雖然彬彬有禮不過總有點有錢人脾氣. 這個老朽不怪.

怪在這位仁兄有一位也是做律師的朋友, 老一輩的, 大概是已經 "上晒岸唔使做" 那些. 就出來 "仗義執言". 在老朽未收到有關保險公司指示前, 個人代表了有錢屋主, 和屋苑交涉.

屋苑又係衰o既, 見屋主唔找漏水數 (因為老行家話畀屋主知有得打同埋等保險公司喎...), 竟然靜靜雞走去釘契, 即在屋契上註冊了一份文件, 註明 "此屋主欠債", 使屋主不還清就不能賣樓.

這下屋主可氣得炸了鍋, 但他那位老行家朋友又只係 "得把聲" 話屋主無辜而且可以提請法院打贏屋苑方面, 一直又無實際行動幫到他; 待數星期後老朽收到保險公司指示後, 卻走出來 "也文也武"; 叫老朽 "做呢樣, 做o個樣". 其實, 對有關保險和漏水這類案件, 可說是狗屁不通. 這案看來屋主無辜, 但已有旁證, 指出相對來說, 屋主是有責任的, 再 "撐" 下去而不嘗試和解, 只會更加拖長時間和加重律師費.

老朽尊重他是前輩, "畀幾分面", 無當面提出; 但其實, 行規是每位人士同一事件內, 只可有一位律師代表. 而這個就是老朽 (屋主是透過保單已需要和老朽合作的). 這位老行家當然知道, 但係又要在老友 (即屋主) 跟前扮有型, 就只有隔數天就來 "指點" 老朽如何行事. 老朽聽他電話已經聽到想 "吸線". 本身已經大把工作的老朽, 還要聽這位 "上晒岸加大得閒" 的前輩指點, 真係「獲益唔少」, 唔該晒!!

但呢期最一額汗的, 算是最近的另一宗 "禁制令" 案件, 不過事情尚有少少才 "埋尾", 故老朽暫且按下不表...