醫院啊...

最近有位一向相當壯健的親友工作時在辦公室突然 "碌低", 這位身為公務員的長輩, 當然是被送進某政府醫院.

簡直就是電視劇情, 行將退休, "行消防", 頭痛呆滯兩三天, 之後返工暈倒, 送入醫院後發現腦中有個大瘤, 尚未知道良性惡性.

老朽曾在醫院工作, 所以還認得一些舊同事, 於是有勞照顧; 雖然絕不是有任何特權, 只是某位教授級醫生工餘時 "加把咀" 來會診, 不過心理上, 親友的家人已經覺得好安慰, 而醫護們的態度, "家人說比平時好得多" (老朽覺得都係心理, 因為現在醫院前線同事的態度多數已經很不錯).

不過態度有進步是一回事, 工作上不小心就是另一回事.

想起的是最近接二連三的事故. 有些是被投訴, 但更多的是醫院「主動投案」; 不過坦白就不一定從寬, 不知何解, 每次受靶的不會是出錯的員工, 而一定是管理層. 明明有指引有方向有上堂有監管, 當出事時就要鬧無指引無方向無上堂無監管.

人皆有錯, 當然, 醫護同工們一錯, 真係可以 "累死人", 所以一向 day one 開始的訓練都係三個字:

"要。小。心"

另外又有三個字: "跟。guide。lines"; 仲有三個字: "唔。錯。得"

好喇, 錯了. 仲係錯完又錯.

管理層唔係唔鬧得, 但係, 試問話 "監管不力", 又如何可以 "監管有力" 呢? 大部分醫護人員都屬於 "唔炒得" 之輩, 那有何懲罰可言? 管理當局, 最多都應該只落得個 "人手不足, 肥上瘦下" ; 但人所共知, 政府的醫護人員工作相當辛苦, 人工較高也合理; 他們也要由專業去管理的, 所以要內部升人, 如果升上去, 人工不加的話, 誰願意當這吃力不討好的勞什子管理工作?

不錯, 部分管理人員的薪酬, 確是過高, 減他們一成人工, 大概可以每兩位養多一位前線員工; 假設有一百名這樣的 "高層" 的話, 那全香港就可以多養五十位前線員工, 分佈四十四間醫院, 每間多一位也不夠, 杯水車薪, 又 "做得o的乜?"

政府, 一係請多o的人; 請唔到的話, 唔該前線同事, 醒少少先啦... 呢幾次無死人, 或者死因唔關事, 唔係次次咁 "不幸中大幸" o架大佬!! ><"