2012年4月26日星期四

最佳短片

連續幾星期當中有幾天, 在證婚時看到兩段都是由新郎自家製的 "成長片段"... 或者準確點來說, 是一些有關一對新人的片段. 當中, 有好專業的製作, 也有一些是比較 「自家製」的. 但總的來說, 總會為賓客, 又或者新娘子帶來一點驚喜.

不過, 有時人就有樣弊病, 就係太鍾意和其他人分享自己的事, 而忽略了賓客的感受.

有一對新人, 都是很喜歡去旅行的, 拍拖十多年來, 一起去過的地方不下二十個. 有些還要去兩次的.  於是新郎就想將去過的地方都介紹出來,  那段片, 看得出原意是想 show 個地球出來, 之後 zoom 埋去一個地方, 要出幾張相, 之後就好似搭飛機咁又去到另一個地方又 show幾張.

但係他們去過的地方實在太多, 當20個丫. 每個地方出的相都有10張8張. 8x20 已經有160 張相. 每張相又慢慢出, 5秒左右啦. 160x5秒, 再除以60的話, 那段片, 是13.3 分鐘. 已經可以去參加奧斯卡紀錄片了 -- 仲未計開頭另有兩分鐘係成長的相. 當中只是相, 相,相, 也是沒有其他片段的.  而那首背景的歌, loop 完又 loop, 老朽在台前, 一路看著大家的反應, 見到出席的賓客是長輩多的.  由開始時大家看得識得笑, 到最後那幾分鐘已經變成死魚咁眼. 難怪到「卒之」播完後, 台下是完全沒有掌聲的, 因為, 大家都已經悶到不知是否完了.

又有一位新郎, 將自己的求婚片段放入去, 地點是在一間卡拉OK定係的士高之類的, 總之是包了場吧.  據在場而當天又有幫手求婚大作戰的兄弟姊妹所述, 氣氛一流, 而我都感受到, 浪漫係好浪漫, 同埋有動作, 起碼無咁悶, 但弊在新郎忽略了一點, 就是拍片的地方好暗, 而播片是用大熒幕的, 看起來會更暗. 就係因為咁, 大家根本只聽到新郎的自白和一班人在後面喊「嫁畀佢! 嫁畀佢!」 仲有「咀佢! 咀佢!」 (新娘一定係含羞答答地點頭, 係唔會聽到聲架喇) 加埋一連串的掌聲. 至於樣呢, 條片拍起來太黑, 真係留返新人進場入來見真人先見到喇.

之不過呢, 又有時有新人的確是非專業人士而能夠指出一條很好, 又不太長的短片的.  記得之前在數碼港見過一次.  好像也曾記下過的, 整段片長近15-20 分鐘, 但看完後大家都反應熱烈, 老朽倒真的佩服一對新人.

其實, 若干程度上, 新人只要以自己是客人的感覺去設想的話, 那段片就不會太長.  老朽自己當年段片都好多人拍晒手掌架. 因為六分鐘內, 用快鏡影左好多籌備時的片段, 又搵埋嘉賓來講幾句, 以七八年前來說, 好新穎架喇!

另外, 就是生動, 記住, 大多數都覺得自己睇返自己的相無咩o既, 但係你試下連續睇人家的相睇五分鐘你都未必頂得順.  雖然你係主角, 都唔好迫人睇你咁多硬照丫... 得o既話, 一係短少少, 一係多少少得意o野, 唔係的話, 你自己都悶啦, 對唔對?

2012年4月22日星期日

春夏菜式 - 香橙士的球

復活節最尾一天煮的菜式之一. 那天早上去了玩 (詳見上篇), 沒太多時間準備, 所以煮了一道蒸的紅蔥頭火腿蒸雞 (女王同夫人都話整得好滑呀) 和下面的 "香橙士的球", 成功使女王食多點牛肉 (一向她覺得牛肉韌).

"士的" 就是 steak的意思, 即是牛扒粒.  這味菜之前在酒樓見過是 "芒果士的", 我就用了女王愛吃的橙. 不過時間關係, 沒有自己切新鮮橙, 而是用了罐裝橙, 有時間的話自己切, 鮮橙是好味得多的.

做法係相當相當簡單, 先買超市的牛柳粒 (我今次見 citysuper 的 short-rib粒有特價, 又幾夠肥所以用了, 原本來想去買一塊細的 tenderloin/rib-eye切粒的), 用少少生抽, 喼汁, 糖, 麻油, 生粉及少少水 (水醃牛係一定的, 正路有時間的話仲應該先下水, 少少蛋白和生粉先醃10分鐘等水份滲入才下其他醃料的) 醃1小時左右, 之後準備定一支日式燒汁, 另外切好橙 (淨肉不要「衣」). 

用中大火爆香薑片後先下牛肉粒, 兩面各煎一分鐘後 (唔好太耐, 唔係會韌) 兜幾下, 即下少少燒汁 (兩湯匙左右), 再炒兩下兜勻後熄火, 即下燈肉再用餘熱兜兩下, 上碟後就灑少少芝麻, 靚晒!


2012年4月20日星期五

超級無敵小器鬼

這篇, 大概不算是「工作絮事」吧... 因為是舊公司的事了.

上月中某星期六, 是送女王去學音樂班的時間吧, 收到一通電話, 是一位以前在醫院行政部工作的舊同事打來, 問我一位舊老闆, 就是以前提過的 "好人老闆", 問題是 "佢係咪一個起碼有你咁上下的律師".

(按, 「好人老闆」只係稱呼, 佢的確曾經係舊公司老闆中算你最好那個來的)

這問題我可摸不著頭腦了. 問下去才知原來因為醫院要有一種法律問題想多找一間律師行幫手, 大約是工傷類的吧. 醫院找了我舊公司才知我沒有再在他們公司做, 大老闆就推介了這位老闆. 可能是醫院不了解好人老闆其實是工傷科的專家, 所以找我問.  當然, 就算我無做又好, 點都好, 我都說了 "他當年是我師傅之一來的, 好掂架" 

醫院舊同事還想再問, 不過因為要入電梯, 我之後再找他. 但之後打兩次電話都接不上, 又唔知咩電話來的, 竟然無得留言, 那就sms 他請佢覆我算了. 等一天半天再找他好了.

之後一天是好人老闆生日, 雖然我離開公司時多少和他有點齟齬, 但畢竟曾是我師傅之一, 他和每年一樣 sms/whatsapp 他說聲生日快樂 (雖然 「鴻飛哪復計東西」, 不過講開又講去年我生日我已經無做, 好似佢無祝我呢, 唔太記得了 ,只記得我每年年初一都向舊大老闆拜年, 年年都係留言候覆, 今年就無覆我了), 點知收到的回覆係:

「多謝; 喂大老闆話早幾天你有個醫院舊同事問起你我係咩人, 佢話你無覆佢, 想點?」

我眼都突埋, 即刻覆返 "咪覆左囉, 話你係我師傅, 神級喎!"

再收到的短訊係 "哦, 唔該晒; 其實我真係唔多信大老闆的, 我同你講笑o者"

即刻打畀醫院舊同事, 今次又打到喎; 咪即刻問咩料呀大佬, 打畀你唔通又無得留言. 個死佬就係度賠笑.  佢都估唔到舊公司老闆會咁大反應的  (當然, 佢唔知我同舊老闆炒大鑊).

整件事, 明顯係舊的大老闆的問題; 佢小器已經出o左名, 之前睇過我呢度o既都知架喇. 但係佢又夠厚面皮喎真係! 迫o左我大半年之後迫埋我遞信 (唔係的話我會等去年年尾部署好點才走的), 同你好好關係呀而家? 我老奉幫你架?  我幫好人老闆唔係話因為咩, 而係因為一來我覺得佢算係我師傅, 我不少打官司方面的真功夫皆由佢而來, 二來係因為我心存口德, 點都好唔會講大話唱佢.  幫好人老闆係我自己意思, 但後面呢位大老闆真係唔知點做大老闆o既. 講衰少少, 真係痴痴地.  正所謂幫你就人情唔幫你就道理.  仲想我點呢真係, 燒埋炮仗送埋叉燒飯好唔好? 

諗深少少, 其實小器的是不是我呢?  哈.

2012年4月17日星期二

復活節「後遺症」... 「工傷」

先提一下在今年復活節期間老朽的「節目」:

6/4 (星期五): 兩場證婚
7/4 : 和女王去沙灘堆沙吃飯, 晚上回教堂的夜間禮儀 (即入門聖洗聖事, 湯樞機主禮) 做攝影師.
8/4: 上午去公園玩, 下午去一個有 Thomas/Barney的卡通人物 concert (o的飛好貴呀~!)
9/4: 上午至中午和女王夫人& 爺爺麻麻姑姐去沙田踩單車.  晚上煮飯仔.

其後在上星期六14/4 來多次香港公園一日遊.

以老朽來說, 基本上以上節目無咩太特別, 不過以一向潺弱的夫人來說, 似乎就多了點.   但... 今次有事的, 是老朽, 還有女王.

女王在14/4 去完公園後病了. 一般來說她三歲後好少病, 只係有時有點咳. 但今次似乎係重症的感冒, 星期日去了看醫生後, 星期一和昨晚 (星期二) 凌晨都有嘔吐, 不過女王好醒, 三歲半人仔都覺得自己想嘔而識得先用手掩著趕去洗手間, 比起三歲時的老朽嘔到成床都係強得多. 不過見她喊著說「真係好辛苦呀」時, 心真的痛了.  去公園後冷病, 唔多唔少我們也有點責任, 一早沒有準備毛巾墊背來玩, 之後換衫又因為公園下過雨, 沒有地方, 只好去金鐘酒店洗手間換, 就係咁中招. 

但中招最勁的, 係我.

每年的夜間禮儀都係全教堂攝影組最忙的時候, 五個組員全員出動, 為百多位新入門教友拍照. 不知是否老了, 還是一時不慎, 拉一拉到右側的腰位, 當時只係痛一痛, 即刻無事.

8/4 去公園都無咩既. 走來走去, 未覺自己有咩樹.

9/4 呢, 踩單車就一早預左係租兩架家庭車, 我踩一架載夫人&女王, 妹子 (女王姑姐) 踩一架載我兩老的, 但可能太久沒有踩過, 而且更未試過踩家庭車, 原來... 真係好重的.  叫做起到步踩到算了, 仲在沙田食埋自家製野餐; 點知回程時碰到一個冒失的小童, 我剎車兼響安佢都照衝埋來, 於是我再次少少拉到右邊. 當晚都係少少「冤痛」搽下那隻"平安膏" 諗住搞掂, 點知...

隔成個星期, 星期六去公園抱了女王一下, 想聞那桂花樹, 就係咁中招... 星期日 (15/4) 晨早痛醒, 連行路都有問題, 點郁都唔得, 還要去朋友的婚禮觀禮 (大會堂), 下午更要主持兩場證婚.  即時找一位之前在一宗中醫失誤案中為我方作證的專家, 點知醫師又放假  (後來他SMS 我原來遺下了電話在家)  好在我有個懂少少跌打的老豆. 唯有飛車 (連搭的士都痛呀...) 去找他.  真估不到, 到了七十歲人, 竟然仲要為三十多歲的兒子捽跌打酒, 做仔的我真係唔好意思.

勉強頂到兩場證婚, 這時才找到醫師, 約了星期一去看症.  得出來我結果是...

1) 真係急性拉傷, 貼幾日膏藥搞掂.

... 但係醫師話因為我其他手腳活動正常, 而背脊位置在醫術叩擊下右側中間有痛, 所以, 可能係...
...
...
...
2) ... 有腎石, 偶然被我拉一拉而引發痛楚.

o下?!?!?! 

我這個「o下」不是震驚, 因為就算真係的話都唔係難醫; 只係覺得, 醫師/醫學真係博大精深, 我記得以前在醫院工作時知道, 上腹痛如果劇痛滲至背位, 原來竟然可以係爆了大動脈瘤, 得返三幾個鐘頭可以做手術唔係命都無 (所以多數都救唔返). 

最後醫師話叫我貼了幾服膏藥, 之後再看看會不會仲有痛, 有的話就可能真的是腎石了.  到時再算.  最開心的是聽到醫師話唔使戒口丫嘛!! 

哈... 為教堂和女兒而「工傷」, 有無得claim 呢...  (當然無啦...) -.-

2012年4月12日星期四

有 heart 到連我都感動的新人...

老朽不是每一對為他們證婚的新人都會記下, 反而是會記下一些自己特別有記憶的.

其實這篇我想寫好久了, 但提筆後真的不知道怎樣繼續和埋尾. 因為其實我知道, 大多數的新人都希望自己的婚禮會有一個美好回憶, 而心目中都會有個大約的楷模. 亦會跟著這個心目中的楷模前進和努力.

而近年來多了新人, 尤其是新娘, 會比較有時間和精神去自行處理部分的事務和自製一些物品, 即是 "DIY".  不少都頗有水準.  當然, 也有見過一些比較普通甚至 lousey 一點的, 但新人的心也是值得欣賞的, 起碼比我自己和夫人當年強得多了. 

但有一對新人, 老朽可以就是有幸可以為他們服務的, 就是頗為著名的 blogger, mcwin (阿雀). 

在她的 blog中記下的婚禮, 她讚過老朽, 今次不是回饋或是為他們戴高帽, 不過老朽真的在他們身上感受到一股幸福的氣流.  而且一直的溝通都係好正面, 他們又係成日笑的新人, 感染得為他們服務的人也會輕鬆不少.

不少新人也會給我這感覺, 因為我一向都當新人係朋友, 不單是客戶; 但可能是因為在他們籌備過程中老朽有少少微不足道的意見參與, 而且我一直也是 being informed. 所以更加了解他們兩個的進程, 也從而提升了自己的參與度.

他們的DIY, 簡直是媲美專業的 production house. 而且新郎查理斯先生也是罕有的人種 -- 真架... 佢由求婚用的城堡, 大至場地佈置, 小至當天的 candy corner 和 sign board 之類都係自己搞掂. 基本上就係 elegant中見微知著.  見到他們為婚禮的付出, 再在場聽到他們的對話, (唔計他們在上的律師樓辦理入紙申請時送我兩小包好好吃的日本果子) 還有他們在行禮前交給我的自製證書套, 已經知道, 他們對待婚禮就像是一份給對方最重要的禮物一樣.  咁有 heart 的新人, 老朽點會唔幫手?

既然是著名 blogger, 老朽當然不會, 也不應在自己 blog disclose 他們的DIY 有幾勁, 各位看官自己看吧, 包你睇到目瞪口呆! 

... 當然, 我唔建議新人特登以佢為榜樣, 無謂畀壓力自己, 因為他們的 art sense真係得天獨厚, 結婚, 最緊要兩個人能夠一起走過, 樂在其中, 那你都會是有heart的新人.

mcwin blog: http://blog.yahoo.com/mcchar-mcwin/articles/page/1

2012年4月11日星期三

台灣之行 - 咖哩酥

好少可我吃過一款東西後, 會記掛得如此厲害.

說的是台灣之行在九份見到的李儀餅家.  他們的鳳梨酥固然好吃. 但我最最愛的是他們的咖哩酥.

當時只是見到, 沒有試吃, 但買了盒小的 (6件) 回香港一吃之後, 我一個人兩天內幹掉了四件.

他是用香而不辣的咖哩粉配上免治豬肉做餡, 之後加上一份鬆化得要緊的外皮. 要差不多三百台幣一盒例牌12件的, 但一吃難忘, 而又因為他們不加防腐劑, 只可放幾天,所以又要放雪櫃.  因此, 香港沒有這款產品出售.

但實在是太好吃, 所以最後我竟然在 Facebook 找朋友問有無人去台灣, 幫我買一盒. 

好在剛剛有位之前婚禮做司儀而認識的朋友, 他自己去台灣影結婚相所以就替我買了.

堅係好吃, 強勢推介...

2012年4月5日星期四

台灣之行 - 有朋自遠方來...

雖然今次是公司出錢去台灣, 不過因為早前提過, 老朽在一向有玩的一個網路遊戲上認識了幾位台灣友人. 而且可能因為大家都是年紀稍大的「男人老狗」又做晒老豆, 所以都變成了好友.

今次去到台灣, 一下機第一件事就是去拜訪了我們曾合作的一間台灣律師事務所. 據他們所言, 在台灣做律師其實不算是很高薪的職業, 一般來說在香港當律師, 生活不算好發不過都應該無大問題的, 但在台灣似乎就真的只比一般打工仔稍為好一點, 因為競爭大, 而且司法好多時取決於法官而非留待雙方律師的信來信往, 所以工作量會少於香港律師.  但眼見接待我們的律師都"好型", 大概他們是比較企理的一群吧.  而且他們都十分好客, 竟然找間大 conference room 來, 準備了各式西點 (好精緻o架!), 像個 mini 自助餐的, 更泡了極好飲的黑糖桂圓茶; 但因為我們要趕往吃故宮, 所以大家就算見到好好吃都只敢淺嚐.  而交流都是大家傾下講下, 不算真的是開大會的.

這個算是一下機對台灣人好客的印象吧... 至於我自己的朋友就更加不得了...

其中一位在去年曾來過香港工幹數天, 當時我還在舊公司打工, 也抽了時間帶他去品嚐台灣比較少有的潮州菜 (因為他人在灣仔又去會展開會, 所以去了佳寧娜).  他一回台灣就告訴了另外的老友說在香港找到一些台灣沒有我菜. 所以今次我去到他們也就一定要帶我去找吃的云云. 

在第一天我打了電話給另一位朋友「校長」(因為他是遊戲中的訓練軍團團長, 本身又曾當補習老師), 他告訴的他那晚未必可以出來吃飯或去夜市, 不過會嚐試再相約.  而到那天傍晚我們在五角船板吃飯時, 竟然有人來到我們兩圍檯中找我, 原來就是他耶!  他說原來不好意思怕那晚或第二天找我不著, 和另一位朋友商量後覺得怎也應該找我見見面打個秋風的; 所以特地駕車去買了老天祿和李製 (即清朝最初做鳳梨酥的「李鵠」大兒子) 的鳳梨酥給我. 雖然不是甚麼超級矜費的東西, 卻真的是心意.

這個人情我擔不起呀.

碰巧第二天的行程版天氣影響, 去不了基隆; 所以大家打道回台北後, 我便不和其他同事去西門町, 轉而聯絡上兩位朋友, 在這個下午由他們帶路, 去了公館區 (台大附近) 飲杯咖啡, 吃「臺一牛奶」的紅豆湯 (不過這裡說是台灣第一的紅豆湯, 倒不及香港娥姐或者鏞記的了...), 喝了超人氣台陳三鼎的焦糖奶茶 (說是人氣旺得稅局來查了, 這個就是他們最強的人氣指標, 而他們店頭倒真是多人排隊得要警察維持秩序的), 又吃了大學口的胡椒餅 (個人覺得這個餅皮太厚, 原來是因為太多汁, 但肉餡是極好吃的, 又沒有饒河街的那麼辣, 兩者各擅勝場).  這些都是兩位友人特意為我去排隊的心意, 最後更由校長載我去買只有台灣才出, 又不會出口的「噶瑪蘭威士忌」的 Solist 系列 (是舊老闆介紹的, 我買了支 sherry桶給自己, 又托同事幫我帶一支 bourbon桶的送給教堂老友, 才港幣七百不到而已, 已威士忌來說十分超值).

如此好客, 真的有點不好意思; 我早叫他們來香港, 由我帶路回敬.  誰說網上識的朋友沒有誠意?