學校大聯盟之二 - 聖誕嘉年華

旅行後又過多一個月.

如是者女王病o下又好o下咁, 竟然已經差不多聖誕節了. 上兩星期, 正當老朽元帥府準備搞裝修搞到火紅火綠之際, 某日收到國子監班主黃老師的電話, 除了提及女王在校被同學不小心 (定係有心呢..?) 用手指刮到面珠燈少少損之外, 就是:

「女王好叻喎, 我叫同學跟我講野, 佢跟得最好, 可以做司儀呀」

當天外母大人接放學時也收到同一訊息, 不過當時我不以為然; 直至上星期中, 一家人為準備搬上我老家, 夫人為清假期時也順便休息一天兼執拾一下, 有空就帶女王回校, 回校時聽到老師說「下星期聖誕表演, 我們會找女王做她班中代表司儀, 因為她講得好好, 只係一句簡單的開場白, 你們在家可以再教一下, 我會將內容交給你們」

之但係同日下午, 我又收到電話:

「唔... 啟稟太上皇, 我們原本係搵o左女王下星期做司儀的; 不過呢, 頭先佢見到校長來睇綵排都好怯場, 即刻唔敢講, 所以呢, 我地都搵定後備o既, 但我們都會繼續試用她, 可以的話都會希望女王當日可以出到聲; 不過都已經找了同學幫手, 如果, 萬一的萬一, 到時見到不是女王做司儀的話, 萬勿介意」云云...

那場表演, 家長是可以去參觀的; 我雖然有點失望, 不過學校都有難處, 大家都切忌迫他們, 畢竟, 只係兩歲人仔啊! 當然, 老師未有將有關的司儀稿內容再交畀我地.

之但係, 那日晚上, 女王食食o下飯無啦啦突然講...

「歡迎爸爸媽媽o黎睇我地o既『聖誕嘉年華』! 請大家細心欣賞」

唔通就係呢句?

於是, 我地都心存少少希望, 開始鼓勵女王講一下. 不過女王有時又醒過籠, 竟然「請大家"大" 心欣賞」, 又或者扮晒o野唔肯講. 所以, 我們的希望, 的確不很大的.

好了, 到了正式表演的一天. 時間是中午 lunch 左右, 大概是方便家長抽時間來看吧.

先和遠道由加拿大回來探親的大細妹 O記一家食飯 (之後另篇再述) 再趕回學校, 雖然早到十分鐘, 但正面的小椅子已經被其他家長更早來霸了. 真不夠他們勁!

好在都還有幾張第一行的位置, 方便影o下相. 好快就見到成班小朋友出來了. 亦聽到班主任請其他老師帶司儀出來, 的確, 那是女王和另一位同學一起的. 女王見到我們時, 竟然識得微笑打招呼但係又不會衝出來, 我已經覺得佢好叻了.

呢個時候, 佢同那同學 (都係女仔) 去到台前, 老師拎著咪, 請了「今日o既小司儀」出來. 幾十個家長個個似足國務院記者會的, 舉晒機等開 show.

另外那位同學原來是負責英文的, 不過只聽到好細聲的 "Welcome, daddies and mammies... xxx, yyy, zzz... Enjoy the show".

之後到女王了.

呢個時候, 有一位都見過 "出o左名" 比較內向和不太懂表達的男同學突然 "嘩" 一聲哭起來. 女王被打窒一下. 但之後就開始微笑一下, 講出...

「爸爸媽媽... 呀... 歡迎各位爸爸媽媽o黎睇... 我地表演... 聖誕嘉年華... 嗯... 請大家細心欣賞」

一o的都唔覺怯場, 而且, 雖然少少窒, 但係好清楚!! 而且, 仲講得多過在家練習時喎!

唉呀突然好想衝出去攬住女王呢...! 好叻叻呀~! 對住幾十人講野喎! 我自己細個時有玩唱歌比賽 但第一次在台上說話已經是5歲的時候, 也是繼承爺爺十歲時上台的天份.


之後就係正式開始唱歌了. 最落力的依然係班主任, 初時所有小朋友都掛住望住自己家長, 無咩點跳, 慢慢 warm up 後就不同了. 大部份同學仔都開始有o的動作, 女王就係細幅度但係郁得好快, 另外仲有幾位真係天生跳舞天才來的. 又唱又跳直頭上身一樣. 同開始時直情兩個人咁款.

學校都算公平, 開初那隻歌的時候, 女王被安排企較後位置, 到了後半開始時, 老師就會將前後兩排互換. 不過有兩個同學就可能因為想見到自己父母, 不斷的走到中間, 擋住女王, 老師見到又好笑喎, 聯同校長一起 "執" 返佢兩個去側少少的位置.

都估到著到聖誕咁款跳舞會幾熱, 也見到有些同學著住大大套動物衫就成身濕晒. 估不到女王著小精靈的披肩加聖誕帽一樣身水身汗, 跳到尾聲時仲開始放蚊同埋少少「流灘」. 跳完之後簡直像虛脫一樣無咩反應, 看來那天下午佢去到婆婆家中食飯前應該會幾好訓...