2009年11月30日星期一

直擊東亞運 (29/11)

今天是老朽第一天到東亞運義工的 VIP office 報到.

點知碰上女王有兩聲傷風咳, 為了和夫人帶她去睇醫生, 竟然第一天 duty 便遲到了幾分鐘, 比較樣衰.

到達時, 根本可說是 "一舊飯", 因為完全不知道我們要 support 些甚麼, 蓋因多數貴賓不會在十一月尾咁早到. 不過可能因為未熟習, 而且大會無就我們 "如何提供協助予貴賓" 定下指引, 只說樣樣 "執生"; 於是一班義工領袖, 還有一班更辛苦的受薪員工 (有些是政府部門借調來的) 就得慢慢學起, 和在發現問題時大家想個解決方法.

到了下午, 大家已經想到頭都爆, 還要找一兩位原定到來接待貴賓, 一時間失蹤的義工朋友 (好在搵得返).

今天只是有數位貴賓到港, 貴賓有時問幾個問題, 例如北韓的團長無啦啦找 "服侍" 他的義工問明天可不可以臨時加個練習時段給他們的足球隊 - 這原不是我們的工作範圍, 不過貴賓問到, 我們基本上係無得 say no 的. 於是就要四圍找負責足球的工作人員, 仲有場地人員. 又有些 "老細" 們突然改變行程, 說明天甚至後天才來港, 一早 set 好的車輛和人員又要 "洗牌玩過".

set 一個 system 的雛型, 加上仲有好多未知的人和事, 撐到傍晚已經有點累了, 找來咖啡乙杯, 繼續頂硬上. 見樓下做住宿和負責其他義工同工登記的 "同事" 暫時比較清閒, 有點恨癢癢的; 但還是繼續頂到十點... 不過, 此時才來多兩位北韓大哥的問題, 又搞多半粒鐘, 連埋安排明早抵港的貴賓車輛, 最後近十一時才 "落更".

-- 但是, 區區數位貴賓下我們已經開始有點手忙腳亂, 難以作出 planning, 真不知到了過幾天多了好多義工來開工和當大量貴賓 (老細) 時, 大家仲會不會這樣想.

之咁, 我們落更時, paid staff 才集得齊明天的貴賓時間表, 開始安排明天義工的人手, 看來他們又要在酒店通頂工作了... @@"

2009年11月27日星期五

一年一度一牛一

其實已過了兩個月, 不過今年的生日平淡得來又得意, 所以自己也要記下來.

食了幾餐, 其中和夫人去食了灣仔「蟹增盞」, 其中一個原因是和夫人早兩年去新加坡沒有去吃當地的胡椒蟹, 她怨了我成年, 之後有 bb 又唔敢食蟹, 搞o左幾年終於有得食.

不過, 全晚最好吃的不是蟹, 而是這隻頗有睇頭, 不過無咩尿蝦肉味的瀨尿蝦...



蟹就, well, 其實唔差不過. 可以再好o的. 最正反而是他們合炒的蔥, 煨過雞湯的, 比蒜更好吃...

可惜當晚他們無晒酥炸鮑魚仔, 否則真想試一試如何鮑魚可以炸.

之後就跑了去食第一次試的雪花冰, 比想像中要好得多 (似乎我住得背...)



另外和家人在農曆生日去了食齋; 這個是老朽的傳統. 雖然身為「天主門生」, 不過既是 「母難之日」而家父又是篤信佛教的, 那就食茹素一天, 當是積福又好, 清腸胃也不錯.

去了灣仔老店東方小祗園, 他們素菜做得老式, 不花巧, 而最愛的卻是每次都望好耐的素與齋二字, 真的好有意景, 看後心境都平和o的.


而最愛的, 就是他們的炸芋卷, 是一道不易做得好卻又賣不起貴價錢的東東, 愈來愈少齋菜館肯花這個心機. 這兒的就是那 "古早味".

仲有仲有, 唔漏得o既一餐, 就係某天早上收到一個 email 有張咁o野:



係細細妹 solo.

見佢玩得咁高興, 趁 lunch, 整返張回覆先:



內容大家未必睇到, 不過唔緊要, 總之得啖笑, 又有最愛的 dough ball 食, 仲想點.

原來真係仲有得想點的, solo 送了張紙給老朽:



竟然是一張男士美容的 prepaid coupon! 哈哈, 老朽都好久無做男士 facial 了, 因為怕 treatment 後泥足深陷不斷進貢給美容公司 (因為其實 facial 後的話係舒服o的的!) 在此再謝謝細細妹!

自己細妹就送左幾樣o野, 有半數其實是畀我送給女王用的. 但有一樣就令我哭笑不得:



整 macaron, 老朽之前咪學o左囉... 你都有份食, 除非你想女王都學埋一份o者... =.=

至於最 "好吃' 的禮物, 就是來自夫人的 Jean-Paul Hevin 朱古力...

雖然 valrhona 一直說 Jean-Paul 是用他們的朱古力豆, 不過他們者間的出品到入口時, 感覺完全不同, v 是極幼細的絲質感覺, 而 jp 就是帶點點微微濃味細塵粒感覺的另一款, 而且他們有幾款是「巨粒型」的, 吃下去感覺極之滿足; 兩者都是百年老號, 爭來做咩, 不如好似我同夫人咁, 兩樣都買 (不過其實... 好貴... 只買了十多粒加兩大件, 分成數袋, 已經唔見o左四百大元...) 不過拍下的照片一時間找不回來, 未有相睇.

2009年11月25日星期三

老朽牛一壓軸節目之女王出巡之海浪公園 暨 進步大事紀

天氣上兩個星期無啦啦凍晒. 再之前都仲係晒到汗流浹背, 而就在那星期, 和夫人和家人一齊走了去海浪公園為外母大人 "賀壽", 也作為老朽生日的壓軸節目之一 (不過其實老朽係十月生日的) 少不得的當然是女王出巡的大陣仗.

好在夫人三姊妹各有男丁 (男友/老公) 幫拖, 帶多點女王專用糧水羅傘車馬都無問題. 不過女王天生燥底, 行兩行 (用車仔o架喇! 都唔使佢自己行) 已經熱到標汗, 成個額頭仔濕晒. 不過就相當雀躍, 成日見到o的人 (但係對其他海洋生物無咩興趣, 有點悶樣) 就指指點點鬼殺咁嘈, 講o的似大人又似 bb 話的東東, 笑到我們飛起.

不過這兩星期女王有點頑皮, 直頭去到有 "頑劣" 那種; 可以有時覺得不愛吃飯就吃一口吐一口, 給她吃我們的飯也一樣 (之前她不愛吃 bb 飯, 要吃我們的普通飯送); 問題係她又不會覺得肚餓, 看在眼裡, 心痛得很, 鬧過 "tum" 過玩過 "翳"過, 一律行唔通. 加上老朽和夫人懷疑由女王傳染了輕微的感冒, 這數天真的頂佢唔順, 有時吃不了也作罷.

不過女王這兩星期出多了六隻牙仔, 而且說話就突然有進步, 講多了好多東西, 自己識講好或不好. 得與唔得之類, 而且真的好像已經聽懂了我們絕大部分的意思. 不過反應就有時非常特別, (唔扭計時) 笑到老朽和夫人碌晒地.

原來 bb 說話是逐隻字加上去的, 現在女王可以自行連續說三個字, 又或者在引導下連續講四個字.

蝦... 幾時可以唸返首唐詩呢o下...?

2009年11月22日星期日

給妙妙的信 - 小小後記

最後一對新人都決定照樣在今天行禮.

部分原因是他們問過為原準新老爺辦白事的師傅, 他們說新老爺未了的心願就是看不到文哥成家; 所以希望照樣註冊. 另一方面有個有點無奈 (卻又有點幽默...) 的原因 - 他們的戒指已經刻了今天 - 2009.11.21 - 的日期.

不過當然, 今天出現的, 只是一對新人和他們雙方的家人, 還有專程由外地飛回來, 本來飲喜酒變了奔喪的新郎兄姊們; 在另一間酒樓 book 一間房, 真正的 "簡單而隆重". 而也是老朽第一次見到證婚時全人類清一色穿黑色衣服的婚禮.

好在老朽父親當年在政府任職時曾兼任政府部門的 "典儀司" (即部門福利主任不成文的 "兼職"), 就是為部門的紅白二事籌備; 故老朽有此 "顧問", 便將應做的流程向新人解釋了.

正如之前提過, 老朽每次證婚都會有一兩句說話向新人講的, 每次也不盡相同 (咁先 touching o架嘛! 收你幾千銀交行貨唔係我o既性格), 今天, 我見妙妙怪委屈的, 知她一定是在這兩星期受了不少壓力, 於是便借呢個 issue 講了幾句, 點知講到一半妙妙同埋阿文兩個都畀我搞喊o左 (雖然老朽o既 short note 都唔係第一次搞喊新人o架喇! 哈哈); 當然, 他們的淚水, 多不在於我的言詞, 反而是他們壓力的釋放; 想到呢度, 竟然連老朽都有點語塞, 因為我自己都為之鼻酸... 幾乎講唔落去. 好在 "專業壓倒一切", 頂埋那十多秒的 short note. 唔係成為第一個證婚證到自己喊o既律師, 幾樣衰!

妙妙和阿文之後話希望遲o的搞返掂晒o的事後補擺酒時請埋老朽去飲, well, 我一向幫人證婚唔會飲埋o架喎; 不過今次唔知點解, 老朽有點想去 (當然會做人情!) 的感覺... 唔... 如果妙妙o的姊妹夠多靚女的話, 都可以考慮o下o既! 呵呵呵呵! :D (唔好畀老朽夫人聽到!)

2009年11月20日星期五

傑出義工...

相信不少人都未必知道, 香港是全世界其中一個最多義工比例的地方. 大中小學婦女組織長者中心工商機構都有不少義工的組織, 有自發的, 有由老闆帶頭的, 也有由政府推動的.

老朽在機緣巧合下在義務工作發展局當個小小 sub-com 委員, 有機會跟各路的義工前輩學習; 也碰上了有機會參與今年的香港傑出義工的籌委和初選時 review 的工作.

重要的 interview 當然留給正式的評委去做 (當然係一班社會賢達, 還有我妹妹當年的偶像黎明), 我們只是初選出一班被 interview 的義工朋友們.

這個工作, 其實相當艱鉅, 不是說他們的質素平均, 又或者是大家都好好 (或者好差), 而是有個問題, 就是做義工, 多數不會有特別的紀錄, 因為既是義工, 就是不計報酬的. 那就是說好多時 "做o左都無人知". 但無人知無紀錄又點知你真係做o左呢? 而有做義工的朋友們又因為不計回報, 要問起來查證就有相當的難度. 而且要平衡一些人, 尤其是有知名度的人士, 他們做義工的背後有沒有一些他們一早知又或者附帶 (fringe) 的金錢或名利得著而去衝量他們的努力及成果, 就更加添了評審的難度.

老朽今次真係學習多於一切, 見到最後的結果, 和一班付出多年努力的義工 (有些老實說, 未有在老朽初選之列入圍, 不過有不少其他初選評審持不同意見吧). 也覺得為推廣香港的義工運動, 搞個獎來贈興都好.

圖為評委黎明先生 MH 接受贊助人范除麗泰大紫荊勳賢 (唔好問點解搵佢, 老朽負責搞手都唔知點解, 不過佢篇演說老實說講得相當不錯) 頒贈紀念品.



得獎人各單未放上網, 哈... 暫時未有消息.


p.s.: 今屆有一隊由四川來訪的抗震義工嘉賓出席頒獎禮; 老朽覺得他們才更值得表揚!

2009年11月16日星期一

給妙妙的信

hello!

今天忙得很, 一次過跑下午和傍晚的兩場證婚, 在九龍城寨證完 wargame 友, 和其他友人等影相時, 收到你電話, 一看來電號碼已知, 心想, 下星期就是好日子的你, 梗係打來 confirm 你們的 "特別版" 誓詞啦!

「喂阿妙? 咁遲打來o既, 我o岩o岩證完另一對呀!」

電話傳來的, 是一把沉重的聲音.

「老朽呀... 唔... 我們婚期要改了」

「啊...!? 你們...無事嘛」

「阿文 daddy o岩o岩走o左, 心臟病發...」

世事, 就是這樣突然. 老朽都真的是第一趟遇到這情況, 都呆了好一會. 但是, 再想一下, 你和阿文現在最需要的是大家的支持...

阿妙, 認識你可以說是奇怪的過程, 去年你為哥哥找個律師去一間佛會證婚, 經過朋友找我而且已說會叫你大佬再找我 confirm, 不過同時地他同一天已 confirm 了另一位律師所以作罷; 倒無想過差不多半年後, 你們會找我, 說自己要結婚了, 和你一談就像一見如故的, 之後和你仲有文哥傾了好長的電話, 仲 add 埋 facebook. 突然聽到你這消息, 真係諗唔到畀咩反應...

「那我當然無問題, 你們其他的 supplier 呢? 他們點樣? 有無事要幫手?」

「除了租車外, 其他都 ok, 連酒樓都話可以幫我們 hold 起最長一年」

又難怪, 下星期 (09年11月21日) 是下半年中上佳的嫁娶日子. 不過你們今次真的是特別例子呀... 都可以通融一下吧?

千萬不要被今次的事嚇到. 誠如你 facebook 所講, 你都當自己是他家新抱, 老人家只是未及飲你杯茶, 是儀式上的一個遺憾, 但不要怪責自己, 更加不要想到要是自己的婚事危害到他, 因為根本沒有這樣的事. 緣起緣滅, 自有自然的定律, 我深信, 你叫做 "叔叔" 的準老爺很希望飲到你呢杯茶, 只是時也命也, 要以酹酒以代之; 你準奶奶也從無怪過你, 反而, 大家都應該多謝你, 你在這期間, 由你知叔叔發病起, 阿文的心情一天差過一天, 你好多時要獨自準備婚事的籌備, 而且有時也要忍受一下阿文的脾氣 (當然, 佢都唔想的!) 仲要安慰他和家人, 夾在中間的壓力, 一定不好受.

叔叔現在真正的安息了. 雖然你們的大日子要改期, 不過我相信你們一定能撐得過去; 到時你們必定會以更佳的狀態去迎接這天的. (相信叔叔都唔想你們殘晒咁結婚吧...!?)

老朽八拜
15/11/09

ps: 搞掂晒你叔叔的事後, 記得將你們的出生時日給我再幫你們夾日子, 當幫朋友, 我無所謂的. 不過入境處話雖然好同情你們的處境, 但下次一定要再入紙申請, 也要再收 $305, 法例所限, 他們好想通融都辦不來... 而且要我幫你們出信去他們 office 取消你們的證明書 (呢 part 我會搞o架喇! 放心).

開估

本來有另一篇 post 會在中間用來開估, 不過今天突然有些事, 我另外那篇證婚有關的 post 會轉話題.

謹此開估:

1) yahoo 那邊的 lafama 100% 答o岩晒! 我就係咁答佢地.

2) 又係 lafama 答得o岩. 我都係咁話, 不過... 呢對新人又真係基督徒來的, 佢地咁都問, 咁先奇!

3) 其實完全唔會有 "唔老黎" 或者 "唔吉利" 呢回事; 只係呢對新人覺得 "轉車" 唔老黎喎...! 返而唔係人人知, 或者唔係人人做o既係: 出車時, 要畀兩封利是, 第一封畀司機當係討個吉利; 第二封放車內稱為 "壓車利是", 最後都係司機o既其實, 不過意頭上架車會開得定o的o既...

4) 大部分人都會答 "頭尾手腳畀返男家" 作 "覆命" 之用; 但係, 原來有o的 "專業" 的大妗竟然話 "應該由頭到尾切開, 一半畀返男家! 我聽到都呆晒...

2009年11月13日星期五

真係幾好笑... 所以分享下...

網友 solarman 的文章, 就算老朽少做轉貼今次都要引一引... 睇完真係在 office 笑左出來...

http://hk.myblog.yahoo.com/jw!mia9VdqBHxvSihMmqlAKjJVToA--/article?mid=25525&suc=1

2009年11月11日星期三

證婚 & 臨記 wedding planner...

又到十月十一月的時節, 開始多朋友結婚.

也當然, 會有些是找老朽證婚的友人. 不過老朽已經無幫他們做 wedding planner 了, 因為, 委實是無時間.

連寫 blog 也少了時間, 回好友的 blog entries 也少了. 就是因為工作和最近影得相多, 又有好友結婚會幫手影相, 而東亞運的義工同工又有大學畢業的; 大夥又柴娃娃的去影些古靈精怪的畢業相; 影完, 又要執一下.

話雖是說老朽不再為友人擔任 wedding planner, 但新人有問題的話, 總會出一下手. 其實好多新人初時都說 "我們一切從簡", 但係搞起來, 愈弄愈多 "花臣", 又或者愈來愈多人出聲畀意見搞到大家好煩的, 相當常見. 而當中有七成人左右最後都係 "愈搞愈複雜", 而最後就搵老朽問一大堆問題 "叫救命".

秋冬時節就是最多新人拉埋天窗的日子, 呢期老朽晚晚都為新人答和 planner 有關 service 的問題, 有時答到凌晨時份還在答 email. 不過老朽其實相當高興, 因為新人朋友們信你, 甚至當你係顧問以至於好友才會問你嘛! 不過, 當中有不少其實幾好笑, 求其舉幾個例...

1) 當司機的兄弟和太太鬧交, 直頭想搞離婚添, 佢仲做唔做得兄弟?
2) 有位姊妹佢男友屋企有位九十歲老人家過身, 佢係咪唔做得姊妹?
3) 租車租三個鐘的話, 下午轉坐兄弟車會唔會唔吉利?
4) 回門豬應該點切?

畀著係你們, 你覺得這些問題的答案應該是甚麼呢? 見到的話, 不妨留言; 下次開估. ^^

2009年11月10日星期二

自煮行動 - 西餐篇

其實已經兩星期無自煮, 上週就是因為教堂事忙, 本週就是因為友人攝影外拍和外母大人生日去了 "海浪公園", 而且女王同行, 簡直係像天子狩獵一樣的大陣仗, 執執理理, 兩天不得安寧. 尚有大學莊友結婚, 身為廣告創作總監的他們在金鐘大擺盛宴, 當晚除請了一隊外籍人士 jazz band 來之外, 老朽最覺得嘆為觀止的就是三十多圍之中, 竟然有一半以上的檯是坐了不少 "靚仔靚女", 盛況不下於明星結婚. 可能是因為新人都交遊廣闊, 自己都係標緻之人, 那晚宴會, 唔食都大把人可以睇. 可惜係:

1) 老朽莊友, 也就是夫人的莊友, 夫人當晚當然也是座上客, 而夫人更當然也是其中一位靚女. ( :P )
2) 嫂夫人是天主教友, 也一定是在教堂行禮, 可惜當天早應承了東亞運義工友人們幫手影畢業相, 未克參禮, 身為教友有點遺憾.

廢話不談, 說回兩星期前煮的西餐. 是在某天為舊同學下午證婚後, 和夫人一起到西式大型超市買的料子.

大家都見到, 老朽甚少煮西式的餐膳, 總覺得自己是個 "中廚"; 不過見友人煮完之後 present 得很好, 心想, 無理由自己煮不到的. 所以看看書又看看之前拍下的照片. "扮晒o野" 的試一次.



這是為夫人煮的鱸魚 - Grilled Sea Bass with dill, served on Cream of Polenta with Haricots Verts on a lemonhoney and ginger reduction

買了些法邊豆, 而我們都好喜歡吃意大利粟米粉製成的 polenta; 魚的做法是先煎脆有皮那邊, 再用錫紙圍著魚肉 (中間魚肉就可以 keep 到嫩滑了), 內裡用海鹽, 黑椒, 檸檬汁和刁草醃過, 放進焗爐焗十多分鐘, 再用頂火再將魚皮烤多一會使之回復脆口.

係個汁最難搞. 想了好一會, 記起魚可以配檸檬, 而檸檬可以配蜜糖; 蜜糖又可以搭薑, 所以用這三樣東西混起來收個汁放面.



Tower of Seared Tuna on Polenta Cake served on bed of Haricots Verts, tossed with Mirin-Soy-Horseradish sauce

自己就喜歡吃吞拿魚 (鮪魚). 有個做法是只將魚煎至半熟. 今次在煎好後切粒, 放進模內壓一壓, 再將 polenta 煮杰少少, 入另一個掃了少少橄欖油的模, 凍後便會成為一個 polenta cake. 底先放上法邊豆墊底. 而個汁就係用了天后 "悅壽司" 基哥找回來一隻極極極極極品日本味醂 ; 加上日或醬油煮成的. serve 時頂部插一小枝 thyme 草.

第一次煮有 presentation 的西餐, 我諗, 其實唔太靚, 不過西廚新手來說, 都算有少少交代o卦...

2009年11月4日星期三

東亞運義工制服 & 我的 "組仔"

上幾星期收到 email 通知可以去取義工制服, 而義工領袖們是先取的 (因為顏色不同, 領袖是藍色的, 義工同工是紅色的). 雖然一直也覺得我們不算是 "領袖", 反而像個 "聯絡人" 或是 "召集人" 多點, 不過名稱如此也無辦法.

套衫係 vivienne tam 設計的, 而同中國國家隊衣一樣, 是李寧牌贊助, 所以之前大家都覺得應該會幾型仔.

昨天去取得制服後, 心情真的涼了一大截.



這不是老朽的照片, 是網上找來的. 不過套衫就是一樣. 看起來, 又像 lego 人, 也像個馬場清潔工 (因為馬會贊助 logo 太大). 向好處想, 也有少少像 "神州" 航天員. 總之不像運動會義工.

這還不止, 我們還收到另一電郵, 叫我們打電話給一班義工同工, 是我們的 "組仔組女".

但細看下, 那十多位同工他們的工作不是和我一起的, 那就是說, 我在正式工作服務時, 根本不會見到他們. 那找他們幹嗎?

明查暗訪好幾日, 終於知道, 原來我們是他們 "行政上" 和 "聯絡上" 的領袖, 要聯絡他們是為了發佈訊息多於現場的 supervision.

但總覺得, 這個制度有點怪. 愈來愈多奇怪問題, 這東亞運, 搞下去會不會出事呢o下...?

2009年11月3日星期二

奉主名而來的, 當受讚美

要來的, 始終要來. 要走的也一定會走.

天空上的月光很圓, 看起來, 也更使人沉思.

陳志明副主教在主教座堂的九年任期完成了. 交給新任的劉德光神父. 大家都極之捨得得. 不過副主教 (vicar general, 簡稱 VG (花名就係 "污豬")) 大人話, "有捨才有得", 而且他 "又唔係去o左唔返". 所以看起來, 大家都係笑著去面對.

但是, 這是表面的大家. 內裡其實連污豬大人自己都好唔捨得. 愈近十月尾, 愈發現大家愈少提及. 只有污豬大人自己過兩天就提提堂區的禮節司和輔祭等, 還有數天之類. 但是, 據禮節司大人田少透露, 連他自己也說到眼泛淚光. 人, 始終是人.

十月三十一日晚, 全城在哈囉喂的時候, 我們 "大堂" 就在做個夜間禮儀 - 紀念十月玫瑰月完結兼諸聖瞻禮前夕 (即是萬聖節的正統來源) - 就是聖母像出遊, 由神長和教友抬著聖母像走出教堂到街上 "繞場一周" 回聖堂. 而之後污豬大人宴請了一眾過去有幫過他堂區事務的教友吃餐飯, 老朽敬陪末席之餘也幫手拍照. 席上, 安排了些教友分享對污豬的感受, 泰半以上, 說得雙眼通紅, 有不少更摟著污豬大人哭個不停, 搞到老朽自己都眼濕濕.

之後十一月一日, 就是 "新舊主任司鐸交接儀式". 老朽兩天都在影相, 卻不由自主的想起多年前他透過 "雙木修女" 找老朽回主教座堂; 後來怎樣在老朽最無助, 工作最不順心, 信仰最低潮時他的說話和鼓勵, 不是他, 老朽不會是今天的老朽.

就在兩位神長交接儀式中, 老朽再也忍不了, 一邊拍照, 一邊雙眼卻已被淚水灌得昏花, 連影相也有難度. 難為污豬大人仲向劉神父說 "佢地呢班攝影組好 pro o架!"

"以生命影響生命" 是污豬其中一句名言, 的確, 你完全做到了, 老朽就是被拯救的一群; 如今你有更進一步的任務, 老朽雖然極之捨不得, 但也相信, 上主一定藉你拯救更多的人, 也相信, 劉神父好快會融入大堂的 (有點奇異的) 文化中... 上主, 我知你一定會照住我o地o既...!