上兩星期一邊趕救火一邊趕湊女, 成個人都死死o下. 火救熄了大半的時候, 也係時候放縰一下自己, 食多少上品美饌才再對得住自己.
和送桔油大狀打了一場必輸但又不打不可的官司, 為答謝大狀幫手頂了那一庭, 故特別去了銅鑼灣 "勝手" 吃其 shabushabu 和串燒. 選此店是因為是 solo 姐推介過的新店, 也是她舊同事靚仔 kenny 的店, 而且見過食物照片後覺得係一間應該 "會一會" 的店子. 而大狀亦頗係咀刁之人, 故找了他來試菜咁試. 之前忘了他們電話, solo 姐想幫我打過去, 老朽卻特別說明要試其真味, 當街客自己打去訂位可矣.
一到步, 抹一把汗, 好在有訂位, 原來小店十數個位都差不多全滿.
先試了 shabushabu 的鋤燒 (sukiyaki) 湯底和鯛 (立) 魚湯底. shabu shabu 一般是用清湯加昆布, 故日本名店多用日高昆布, 又或是羅臼昆布, 不然就是利尻昆布; 因為花樣不多, 唯有在昆布下功夫. 不過店主 kenny 和添哥用 sukiyaki 底, 再加入了其他材料較味, 將原本濃烈的汁底變成火鍋可用的湯料 (須知火鍋一定愈煮愈濃, 較得不好的話很快就會過鹹). 一試, 還是很對味的.
為了試菜, 不叫其實好鬼抵食的 lunch set, 而散叫了黑豚, 美國牛, 和牛, 大蜆, 春菊 (日本之"塘萵菜"是也), 還有不知是不是讚岐的烏冬. 和牛好吃之餘 (滑得來唔膩先至抵死!), 連美國牛也叫人有極大驚喜, 反而本身其實肉感甚佳的黑豚相比之下失色了一點, 至於大蜆就非日本貨, 賣出來比較貴, 不過還是相當厚身, 也提高了魚湯的鮮味.
老朽不是一味誇讚之人, 此店另有不少串燒, 不過用料多數非日本空運, 又或者是師傅為迎合口味而調過了汁底 (例如以當日雞肝的水準, 其實可用鹽燒, 但師傅無問就用了汁燒, 有少少浪費了那塊黃沙閏), 一般叫來下酒倒是不錯的選擇, 只食串燒的話大概尚有更佳店子可去; 加上老朽友人曾是老店南蠻亭老闆之一, 老朽亦嘗過不少可比日本的佳品; 在香港, 雖然他們不差, 而且肯變通 (他們那天就在研究如何燒日本蕃薯可以更香) 老朽還是偏好西環嵐川等舊店.
但話得說回來, 他們燒鵪鶉蛋係一絕, 全部僅熟, 皮則剛焦, 幾達日本國內大師傅的水準, 惟是師傅信心不夠, 又下了燒汁, 其實用鹽燒, 旁加少許蘸汁可矣. 而他們的幾款燒魚也做得不錯. 可以一試.
在 kenny 和添哥面前唔知醜班門弄斧了一大輪才回衙, 想起仲有好幾款料子未有機會食, 因此亦會再去試.
***
自煮行動再次展開. 今次弄了薑蔥"煀" 牛腱和溏心燻蛋:
"煀"牛腱和紅燒不同, 係較有咬口和帶韌之物, 如想食軟焾者則應以慢火炆. 唯一留意的是要快火後焗三分鐘, 以及一定要用金錢腱才夠香
而個燻蛋就係用雞鴨蛋, 煮至僅熟後煙燻. 至於何謂溏心, 則處處不同, 連個煲幾大都有影響的; 不過可以參考的是: 咩蛋都係凍水下蛋, 加蓋煮沸; 雞蛋由煮沸起計 3 分半 (一定係4分內) 拿起, 之後數秒後沖凍水防止內裡熱力煮過火. 鴨蛋則由煮沸起計半分鐘之後熄火焗 3 分鐘後才拿起, 之後也是沖凍水. 反覆試驗 (亦因此上個多星期食了好多蛋...) 此法的話, 溏心機會達 8 成幾9 成. 燻蛋因為溏心, 不能用刀切, 一定要用線 "界", 不過相中界得唔靚...
那晚還有一個特別, 但不是人人愛的甜品:
叫做甜燒白. 係用五花腩整的甜品, 係, 無睇錯, 係五花腩.
老朽多年前在佐敦「蜀山傳菜」食過, 此店結束後在香港竟成絕唱. 好在舊同事 KK 太太為四川人, 去年地震後致電慰問, 得悉家中無恙後, 便轉談此甜品, 得其傳授.
四川不同地方有不同製法, 但大同小異 - 五花腩要先出水, 再走嫩油, 之後切件並開半邊釀入豆沙; 另外同時要蒸好糯米飯, 趁熱將砂糖打入飯中, 再以釀好之五花腩放飯面, 再蒸半小時便成. 甜飯吸了豬油, 更加香甜 (怕咩o者, 湯圓咪又係糯米加豬油!!)
此亦係四川過年時 "九斗碗" 當中必備之甜食, 今年震後, 政府亦特別在過年時製出九斗碗給三孤災民, 還算他們間中都做返o的好事...
***
當然, 老朽無忘記一些之前去過的店子...
近年來香港不知何解好多人鍾意食正式美式大大個的漢堡包, 老朽食過不少, 大抵都是不錯的店子; 但最愛的依然是開業十多年, 尖咀 Langham Hotel 的 "Main Street Deli"... 最愛的, 還有他們餐前送的酸瓜 kosher dills 同埋酸椰菜沙律 coleslaw.
今日和同事為了一點友人的事去了尖咀, 中午時份無去食 burger, 卻去了北京道一號的胡同.
此店裝修靚, 但食物更有質素, 係貴, 但係做得相當不錯. 而眾多已經多次食過的菜式, 因為好吃所以再吃, 但這味 "草綑牛" 真係第一次食, 用的應該是腩骨位, 燒得好腍但不失牛味. 係幾強勢的推介... 不過亦係 "強得滯", 兩三個人食完呢味都唔使點食其他o野. 他們最特式的, 還有那中式廁所, 黑得要命, 真奇怪晚上去喝酒後要解手的話怎可能直線行得返出來...
差點漏了, 再去了 valrhona 買朱古力, 今次他們拎了兩條都是 39% 的給我請我試食, 因為還在 "beta testing", 是未有得賣的...
***
最後介紹的, 是一個身為 bb daddy 必定成日有得食的東西 - 粥仔.
女王愈食愈多款式, 但係晚晚都唔敢煲得少, 於是老朽晚晚有宵夜. (夫人唔太鍾意食粥 -- 尤其係你睇埋下文之後)
女王的粥仔, 多數都係加了料內去一起煲的, 最初只是加點菜, 現在又加點肉, 女王吃得不知幾高興, 聽起來卻是倒胃口多過開胃的 -- 菜心瘦肉粥, 蕃茄雞粥, 節瓜青筋魚粥 (!!), 三文魚菠菜粥... 聽起來還未夠倒胃口的話, 看起來夠了... 因為所有東東都會切到茸一樣, 而且無調味, 加了綠色菜後就像 "鬼口水" 似的. (所以唔出相了)
但是, 自己加o下味之後, 唔... 可能食慣o左了, 原來, 係幾好味的, 仲有, 近數月來學了日本人, 在粥仔中加入 "ふりかけ", 即係 "飯素", 像粉末似的味料, 一加了, 學蔡瀾話齋, 甚麼古靈精怪的都變成天下美味!
沒有留言:
發佈留言