第一個父親節隨想 II - 女王登基一週年文告暨 "何謂父親節快樂"...

之前一篇有關父親 crossover 攝影的網誌得到各位師兄姐的鼓勵, 感激得很.

今日就係父親節, 第一次見到女王的父親節...

去年今日, 老朽正在盤算下星期太太預產期到了, 但毫無動靜, 乜事都無, 定過抬油, 女王心跳好似無咁易摸得到... 真係畀佢嚇到飛起, 好在醫生 check o左無事, 於是, 父親節那天老朽便砌起了女王的床仔.

係到佢就出來時, 諸多事實古靈精怪, extra 使多我幾皮o野不特止, 幾乎玩出禍來, 終極一招臍帶繞頸致胎心律不正 (行內稱 type 2 dip), 要做緊急手術 "稱" 佢出來.

好老實說, 老朽以前不是一個喜歡小朋友的人, 我都不止一次和朋友這樣說. 但好奇怪, 當我第一眼見到女王時 (雖然成個男仔咁樣), 一種奇怪的感覺湧上心頭, 亦係一個好神奇的感覺...

由初時有點手忙腳亂地照顧, 到現在99.99%的事都可以好快搞到; 這時才想起, 原來, 又一年了...

卻見都仲係間中手忙腳亂的... @@" 因為次次出街, Petrina I 就會四圍看四圍搞, 坐唔定o個隻的. 問題係佢仲係唔應該食濃味o野, 所以而家要出去食飯的話, 有時都幾頭痕, 又要自己食, 又唔可以畀佢搞... (當然, 見佢似老朽咁為食係好高興o既)

過去一年, 經歷了好多, 轉變大到想像唔到... 其實, 真係整個人都變了. 因為責任不同了. 好多人都係做o左 daddy/mommy 後先會知. 而家點講, 未為人父母者, 都係唔明.

辛苦, 好辛苦, 但係而家係想起女王 Petrina I 都會笑到見牙唔見眼; 以前成日見人話有個小朋友就咩都唔記得晒, 一直唔信, 現在才知, 原來真係會咁樣o既.

仲有一樣, 就係以前睇電視新聞, 成日見o的人話有咩願望呀咁, 個個都係話 "仔女健健康康啦, 聽教聽話啦". 一直都覺得人咁答好 "行", 而家你問老朽同一個問題, 我o既答案就係...

"仔女健健康康啦, 聽教聽話啦"...

父親節快樂!