第一個父親節隨想I - 我有資格叫自己做攝影師嗎?

老豆過兩日上大陸影相, 借o左支輕身 Gitzo 腳架畀佢用.

七十歲人了, 影了五十幾年相, 當中有四十年是用來搵食的. 現在卻說自己功力不夠, 要去上堂.

老朽早日和友人飯聚 (犯罪?) :) 時傾起才醒覺, 自己浪費了足足十多年時間, 之前不肯承認自己是喜歡影相的人, 大概是因為十多歲時的例牌反叛性格使然, 你愈鍾意影, 愈叫我拎起架機影, 我愈唔聽. 所以有好長時間, 老豆好擔心日後o的 Hassel, Rollei, Leica, Voiglander 以至於成堆 Nikon/Cannon 仲有 Zeiss 鏡, 百年後要拎去陪葬.

和夫人, 或當年還是女友的夫人影了不少的相, 都只係因為佢話想我幫佢影, 從不是我主動想影的. 不是有兩位老闆大半年前的 "毒害", 我今時今日都唔會買 DSLR 來玩. 更加不會發現自己由一個喜歡亂評人o地相的人, 變成個喜歡攝影的人 - 或者, "原來是個喜歡攝影的人".

但一拎起機, 已經知道自己學藝不精, 枉老朽當年幫老豆拍廣告硬照打光打了好幾年, 根本乜都學唔到, 應該話, 係無去學. 所以, 就算教堂搵我做攝影師, 我對住主教, 只夠膽自稱 "爛鬼影相佬", 一點也配不起 "影師" 這個美名 (當然, 更不屑現在阿茂阿壽都叫自己做影師).

到現在, 他拎住架舊舊地o既 400D 學玩 DSLR, 問返我何謂白平衡 (我都答到一舊舊), 亦已經拎唔起 Cannon 的 "小白IS"了, 我才驚覺 - 好難再要他四圍走教我影相了. 好多事, 係返唔到轉頭的. 還好, 問老豆借佢以前o的巨炮舊鏡來用時, 見到他眼內有一絲的希望和喜悅閃過, 遲, 還不算太過遲.

已經決定, 慢慢地要 "毒" 我的女王, 讓她慢慢地去想, 點解佢老豆會喜歡攝影, 也想她知道, 佢老豆我好後悔, 好後悔.

想跟老豆說聲: 「對不起, 我遲了」還有, 他為了我們一家, 也放棄了話劇這個大大大興趣三十年, 尚幸麥秋和馮祿德兩位前輩近年請家父 "出山", 我才有幸見到他踏台板 (對上一次, 我還在媽媽肚子內...), 希望他繼續可以有演出的機會, 大概, 多點念台詞可以幫輕一下他開始忘記東西的陋病.

也順帶多謝一下毒我的老闆們, 也謝謝看到這篇而又有影相的友人們, 你們未必知道你們對我的鼓勵和評語有幾重要, 老闆們也大概看不到這篇, 但我真的心存感激.