雷曼不再好兄弟...

早兩天帶囡囡回已搬了的老家，經過某傳統豪宅區，例牌有一堆物業地產公司之類. 近幾個月都已經水靜河飛，不只門庭不再，簡直係陰森荒涼。

唯獨某行門外貼出一聯，覺得幾得意，書曰「雷曼不再好兄弟，唯有磚頭跟一世」。

初讀甚為搞笑，但細想背後，倒是笑中有淚。淚的不是雷曼苦主慘，而是整個市場。

細想一下，就算現在買了層樓，最多也只是一堆磚頭陪你一世，仲係要你供得起先至係. 否則的話，跟你一世的只有銀行，收數公司還有執達吏。

今年年初市道還是雄起得要命，當時已想，無可能一時間那麼好的，大概都只會係虛火，不過說出來，信的人不多。但係區區見到今次海嘯，香港人似乎已經學精了，大部份人不再盲目，不像 97 98 年的好似全城都愁雲慘霧的。因為上次跌得傷，大家已經知道變幻原是永恆。

但另一方面，身為雷曼苦主的人，有一半卻有怨天怨地，話銀行「老點」欺騙。

不是就苦主唔慘。說實在的，銀行職員想你買，當然會說中聽的說話，將風險說得低 -- 而事實上，全球的金融機構都信雷曼這百年老號 -- 而最後，當百年招牌被拆，員工只有拎住個牌返屋企當紀念品的時候，大家就會想：「銀行呃我」

賺錢的時候，你們又有無想過叫 「銀行早知呃我多o的啦」呢? 世上又豈會有毫無風險的投資? 買的時候又為什麼唔 "拏大對眼" 看清楚呢?

輸打贏要，始終係人的劣根性。