為了六千元而心口痛

今年的財政預算案認真甩轆, 簡直係去到人人拍檯的地步.

一個大頭佛下來, 都不知是誰建議將那六千大元都放入 MPF 之中, 到三十年後大家退休之時, 不知可否買到一碗雲吞麵?

沒有退稅倒還說得過去. 始終交稅是公民義務, 總不成年年也有回贈, 這個我接受. 但將錢交給基金佬我就有點反感了. 分明是利益輸送嘛!

好了. 在眾人一口之下, 政府立場又軟化. 不過今次畀人話無 guts.

呢樣我又覺得過份了一點. 始終人家開首有錯失, 現在你當他是從善如流又好, 知錯能改又好. 有得收就算了.

當然, 基金問題和經濟以至於住屋房價等等, 通通未解決, 也不能用這六千大元 (甚至另外的六千元退稅) 解決. 但這個不是由政府可以解決的問題. 而且, 講得唔好聽一句, 唔係市場賣呢樣賣o個樣都賺錢的話, 政府邊度有咁多收入來派糖?

我是不滿這份預算案的, 但既然政府有改變, 再話也沒用, 最不喜歡的, 反而是現在就走出來認頭邀功的一些保皇友仔, 和那些仍然不斷地只有鬧鬧鬧的假民主人. 他們都是來撈油水的. 最賤精的我反而覺得是他們.

講開鬧鬧鬧, 今天見到特首昨日被 "技術性擊中" 後去驗傷, 又被人話做戲. 更說他中午被襲晚上才去醫院又有問題. 這個倒可以解釋的. 因為遇襲的一刻, 人受的傷不是割開性的話, 傷患是不會即時察覺的. 正如好多時少少的碰撞後, 到晚上回家才見到有瘀傷一樣. 如果這樣又有錯的話, 那衝上台的又會是什麼? 難道就是英雄?

特首的修輕微, 係人都知, 如果係議員或者爛仔, high 親下都一定鬼殺咁嘈話要驗傷, 咁點解你驗得, 人家驗就唔得?

呢班人狼到衝上台, 當時係辛亥革命的紀念活動. 他們口口聲聲說是 "翻版革命", 我看來就是乘機搞事兼毫不尊重中山先生. 先烈們是為人民一心的前仆後繼, 他們就是未問情由打o左先講. 雖然我一向不喜歡一些官員, 對曾特首也沒有甚麼好感. 但他們當時是香港的代表, 是公職人員, 無啦啦打人 (仲扯保安o既領帶!) 點都講不過去. 仲要掟飯盒, 我係佢屋企人都覺得 "養佢o徙米飯".

唔知點解, 睇到電視那一刻, 我竟然有少少想那些保安用那些拉帶欄杆 "鐘" 埋去那示威者的想法... 我都覺得幾爆!

廚魔 - 分子廚房

已經是過農曆年前的事了.

一月的元旦大餐之後, 因為 "有朋自遠方來", 所以要招呼一下. 多年老友由美回港參加婚禮兼玩了幾天, 老朽先帶他去 "食豬扒", 打算先去灣仔新景園和銅鑼灣 "tonkichi" 的, 不過那天其中另一位老友飯腳在中環走唔甩, 所以最後食了中環的銀座梅林. 這是後話, 另外再找機會講.

這位老友都係飲食分子來的, 他有其他友人提議去灣仔試一間米芝蓮二星的 "廚魔" (BO Innovation). 因為當時我和夫人 & 女王還在老家住著, 女王有人睇住, 好易就取得夫人的批文了. ^^"

我們叫的是一個 chef tasting menu. 當中有三款不同的選擇, 我們所揀的是每位港幣 $1200 的那款, 另外六人 "夾份" 叫了兩人的 wine pairing (每人份 $600, 即 $1200 六個人分), 旨在每位都有得飲少少 (因為見他們酒的份量也頗大杯).



大部分的菜式也十分精緻和出色, 但當中最使老朽印象深刻的就是呢個 "蝦米", 聽聞是得獎的菜式. 是用蝦米磨粉後加入蝦籽油用來撈麵或者意大利麵; 今次的配菜是隻意大利來的大蝦.



呢款真係擊櫛讚賞的.

尚有一隻蠔, 是用薑蔥加入液態氮變成凍粉後, 變得好似薑蔥蠔的感覺. 好清好爽.



全晚他們真正叫作 "份子" 的就是這一粒東東:



原來這粒似湯圓的係小籠包, 入面都是湯汁, 外面的紅線原來是薑和醋混成後的 jelly.

至於酒, 我自己有記下. 是一些極少見的酒, 有些連葡萄名也未聽過. 不過特別過頭, 有點摸不著頭腦.

一晚下來, 感覺好 impressive. 好味程度係 90 分. 至於為何不是 100 分, 大概就正正是因為他們做的是份子料理. 老朽想極也想不通, 點解要將天然形態改變去使人覺得新奇呢? 就算係西班牙的 el bulli 我也是這樣想. 可能這個是老朽的 "老式思想" 作祟吧...

可是, 有機會的話, 我是會再來這裡的, 因為不計他們的 presentation 的話, 東西依然是好吃的. 不過, well, 貴o的囉!

過新年之四 - 新春第一大煮

有朋自遠方來, 不亦樂乎.

新年多數是出外吃飯, 又或者是長輩家中吃, 未有什麼機會再煮. 倒是上星期日有老友來拜年, 一早說好留他們來吃飯; 順便讓我玩煮飯仔. 是夜菜式是:

煙燻太爺雞

(唔記得影相, 因之前煮過多次了, 要看做法可以去呢度)

因為已經成年未做過燻雞, 之前一天先做一次給家人試一下. 母親只說一句: "燻味不夠甜" 我再嗅一下充滿煙燻味的手, 覺得自己去o左機舖多過做燻雞, 那就是說, 燻糖不好和不夠了.

的確, 那次是用得太少普洱茶葉和用的片糖只是普通片糖, 而且量不夠. 媽媽真厲害!

好了, 既然如此, 今次是用了原蔗糖 (即冬前東莞原蔗造出的新糖), 加上了日本三溫糖, 用的是金雞冠鐵觀音加七子普洱茶餅的碎, 還有少少玫瑰花茶來做燻料的.

果然, 出來的味道無與倫比. 老友大叫好吃.

***

松子桂魚



這是我第一次做的菜式, 先參考了酒家的出品, 又讀了江獻珠前輩的大作之後才 "膽粗粗" 的試製, 因為老爸愛吃魚, 故此就算出來的貨式不夠好都唔會無人食. :P

其實是自己唔夠膽, 買了細條一點點的, 應該買大型的那些桂魚就好了, 容易起肉得來, 後來才知炸起縮埋細了三分之一, 吃起來不夠過癮. (咁初時唔知整得好唔好味驚食唔晒嘛!)

買魚是請魚販起肉的, 講明要將魚頭連魚骨留低, 可以使擺盤時靚些. 魚肉先用少少鹽擦去皮上的潺, 之後下基本的底味 (不需太重手, 因為表味還有酸甜汁), 醃好洗一下就要用刀割出鑽石紋. 切的時候留意不可以太淺 (好多時怕切斷就反而切得太淺), 之後抹到乾一乾就上粉炸熟. 當然, 上粉時要拍一下使魚身鬆開和拍出多餘的粉; 魚頭/骨也一樣上粉炸起後排直盤. 如果魚是大條的話可以將肉切開幾件才 "界花", 一炸時就會妖縮變成一個一個球, 那就會比較似松鼠樣, 亦因此, 大條的會叫作 "松鼠魚".

今次開酸甜汁比較懶, 無次前做古法咕嚕肉時的壓山楂來開汁, 只用了茄汁, 喼汁和黃糖, 爆香青椒後下汁煮一煮就落埋蕃茄, 將汁淋上魚身後洒些少烘過的松子仁就成了.

又係估唔到都幾好味, 早知真係買條大條的桂花魚了.

***

金腿荔茸酥丸拼鍋貼石斑



金腿荔茸酥丸好久之前做過, 就只是將芋頭蒸熟去皮後壓茸, 加入少少鹽, 糯米粉或熟澄麵, 還有生油, 和已經蒸過的金腿茸搓丸, 拉一下油 (7 成油溫可矣, 最後開大火逼油) 就已經開始起蜂巢了.

至於鍋貼石斑, 就是而家好多人食的 "蝦多士" 或者 "鍋貼明蝦" 的古老版本. 一樣是用隔夜麵包切成骨牌型後把已醃過的石斑肉拍上生粉和蛋漿炸一炸 (不可太熱, 否則麵包好快燶), 美觀一點可以加一小片芫茜, 當炸鍋的筷子夾下去覺得夠脆便可以了反轉炸多一會, 好快的. 不要等已經開始深啡色才起鑊, 餘熱會使件包更深色的.

***

北菰海參炆膠筒



又估唔到之前買的膠筒發起後咁多, 每條竟然可以分到三件骨牌大小的, 用三四條已經夠吃了, 餘下無用到的放回冰格.

先用雞湯炆已浸軟的冬菰, 之後加入糖和蠔油和少少水 (自行試味). 今次我幾乎炆乾水, 好在見到便即時加了水和湯. 之後加入海參 (石參就耐一點). 原本想買發好的刺參 (citysuper 有現貨, 不過幾貴, 五百大元得四條) 但又撞o岩那 sales 去了食飯, 而自己浸發又太煩, 又要去灰火燒之類的. 最後都是用了急凍的澳洲海參算了. 但炆得太久, 海參太腍了, 幾乎溶掉. 而到加入已經發好我花膠件後再炆一小時左右, 到時再試味較汁底味便可以了.

因為友人太太不吃蔥, 所以用了一點點京蔥起鑊僻腥和將青檸葉切絲放煲面. 這是學李文基師傅的做法的. 友人吃過後覺得好對味, 我自己都覺.

***

秀珍菰露荀炒鮑角



卒之有樣係比較容易的. 秀珍菰露水飛水後留用, 用罐頭的大頭湯鮑魚切角合炒, 下個有味的薄芡掛一掛便成.

有人說過, 如果你有位朋友是你願意為他開一罐包魚的話, 這人一定是你好朋友. 而的確, 今餐我自己都覺自己超水準表現. 好在無失手... ^^"

過新年之三 - 女王大事紀

幾則女王新聞報導.

1) 宮內廳發言人證實女王首席醫官診斷, 經過數月來的診治, 女王被認為患上季節性氣管敏感, 並有哮喘初期病徵. 每冬天時便會有乾咳, 以晚間比較嚴重. 醫官已開服幼兒常見氣管藥 "青蛙糖" Singulair 服用. 然而家人一直不希望這是事實, 正循多方面了解病情及如何根治.

2) 於農曆新年期間, 女王多次被發現於向親朋戚友拜年時過份慢熱. 初時見到人時完全呆滯無反應, 使父母及爺爺麻麻 & 公公婆婆頗為尷尬. 不過通常到一餐飯尾聲之時, 女王就會 warm up 完畢, 變得生龍活虎; 教人哭笑不得.

3) 女王自去年十月起參加了一個初級美術班; 是電視大台名咀司儀在康怡所辦的教育機構提供的. 上了十多堂後, 女王愈來愈有 art sense; 據國子監靚女班主任老師都說她一做 art work 就好有心機, 「逐件黐好晒先肯收工」 (係咪即係阻住老師放學呢o下...?). 其實去學畫, 是因為我們不想她不斷的上不同的班去夾硬 "谷" 學呢樣o個樣. 不過, 按夫人透露, 她的同事一個二個都放晒o的仔女去學英文學數, 搞到夫人心驚膽跳, 謊死女王日後唔夠人爭, 正想著春天時再給她學英文之類... 大家有無提議?

4) 上文提及, 國子監班主任和老朽傾偈, 事原就是學校的 "開放日", 他們說是 "探究日", 說穿了就是讓有意報讀的 "準羊牯" 來看看, 一如去年我們帶女王在 interview 前去一次一樣. 今年就是安排在春節前; 女王由老朽陪同下按時回去, 其實就如一般上課差不多, 不過他們的主題是 "慶典" (就返就來新年), 但作為幼兒的他們最鍾意都係慶祝生日, 所以學校就為他們安排一個 "bear bear 熊生日會", 唱生日歌時, 就畀老朽發現了他們首先唱的, 竟然是韓文生日歌 "San-il-Chukka-Hamnida" - 早排女王在家中唱時被麻麻用 view cam 拍下, 我們當時都唔信... - 原來靚女班主任話係有一位同學父親是韓國人, 所以教了他們唱.

5) 同日, 老朽發現靚女班主任係特別喜歡女王的, 直頭係攬住來錫那種, 而女王又係特別喜歡黐住呢位班主任 (班主任話可能因為佢地兩個都鍾意藍色喎... 真係離奇兼無厘頭!), 都好, 好在夠靚女... 但係玩到唔捨得走, 老朽知道女王的老師們 (其實 in general 都幾靚女o下o架!) 之前一晚在校準備 "晒冷" 的 work done 做到夜晚十一點幾, 有點於心不忍, 所以便直接叫女王快點回家, 阻住老師收工呀之類. 其實, 我愈來愈知道, 做幼師真係好辛苦的, 除o左教學生外, 仲要搞埋呢o的好似無線節目巡禮咁款的 show 來幫學校搵客, 都咪話唔慘, 唔係真係好喜歡小朋友的話真的做不來.

5) 上星期尾爺爺打來講有關和親戚拜年的時間安排, 女王又係例牌搶電話, 但係今次不論在洗碗的老朽還是在女王側邊吹頭的夫人都聽到呆晒...

「喂...? 你係爺爺呀...? 係呀... 唔, 食o左飯喇 (不過無問 "你呢?"); 爸b... 爸b o係廚房洗緊碗... 呀... 媽咪呢, o係度吹緊頭呀!... 哦... 你等等o下... (轉過頭向廚房叫) 爸b!! 爺爺搵你呀.!」

那間中出現的感覺來了, 就係...

「真係大得好快... 幾時會唔要我地呢...」 :(

6) 到親友團拜時, 女王開始和其他親戚的小朋友玩 ipad, 真係大件事, 玩過後真係返唔到轉頭. 老實講, 我到今天都未正式玩過 ipad, 不過就聽到女王除o左玩 London Bridge 外, 成晚笑得最癲最大聲就係玩 ipad 之時... @@"

分享一個小故事...

見到讀到的任何人, 一定會認同這故事. 不是做人父母的, 卻未必明白.

新正大頭唔係太想亂 po 東西, 不過這篇普通到唔普通的麥兜, 真的讀到我眼濕濕. 如果你係做人仔女, 又自覺睇完呢篇之後有少少懊悔或者唔開心o既話, 那我恭喜你, 你良知未泯. 快o的打個電話畀你父母, 起碼請佢呢個星期六日飲餐茶, 買件衫畀佢, 甚至下星期情人節約佢食飯啦...!

當然, 如果身為仔女的你睇完之後係好開心的話, 你未必係喪盡天良, 相反可能你係人中典範, 已經對你父母好好喇, 咁我仲恭喜你.

不過, 如果你撫心之後, 覺得其實你都唔係對你父母 or 屋企人好好, 但係你又無咩反應, 無動於衷的話, 我都無咩好講, 係溫馨提示一下, 行雷閃電出街時小心o的. 係咁.


麥兜小故事 ─── 媽媽，假若我很不同

過新年之二 - 芋頭迷; 芋頭之謎...

去年第一次試作芋蝦, 初時第一批炸得不夠, 好快返潮; 第二批就成為朋友間的搶手貨. 部分原因是因為芋頭靚. 去年容易買到輕身和夠粉的.

今年有幾位朋友和同事指定要我炸芋蝦給他們. 結果在壓力下, 找不著好的芋頭, 成件事就差得遠了...



雖然睇落無咩. 不過一刨芋絲時已經 feel 到, 「點解咁黐手...」. 因為雖然芋頭買回來後已經放了幾天 "收水", 但中間竟然仲有水份. 所以炸的時候要特別慢火, 但係到食落的時候有差不多一半一是中間尚有點點韌的 (即係未收好水), 一係就有些太乾, 乾到有點焦的, 變得硬了. 真正似樣的鬆身芋蝦只有一半左右...

上一篇提過夫人愛吃芋頭糕, 又咁o岩今年除了買到一底鴻星的千絲糕外無咩人整, 所以就膽粗粗的自己試整一次.

看了不同的食譜. 自己又參詳一下. 最後決定的做法是:

芋頭斤半左右, 切開後一半切粒 (1 cm cube 左右), 一半蒸半小時後才去皮, 搓成芋泥.

冬菰 蝦米 浸軟後切幼粒, 最大不大過半 cm 的.

珧柱浸軟, 拆成最最幼的絲

臘腸和少少臘肉也切幼粒

另有蔥花和炒過的白芝麻備用

我先將料炒香 (炒時加入一下的生抽, 一茶匙糖 和少少酒 & 胡椒粉) 後放一旁, 之後芋頭 & 芋泥加入小半茶匙的五香粉, 少少雞粉和一茶匙鹽及少少生抽, 胡椒粉爆香少一會, 之後就將一杯 (即 170cc 左右 水加入同煮一會 (細火). 同時用 1.5 杯粘米粉和 1.5 杯生粉過篩混好, 加入兩杯左右的水開成粉漿 (就係呢度少少出事...睇到尾就知), 加入芋頭鑊中, 又加埋大半之前已炒香的臘味料 (留返少少差不多成糕後放面靚o的), 繼續慢火煮至少少滾 (唔好大滾, 否則生粉/粟粉好快結埋), 搞一下後便將水狀的 "糕料" 裝上蒸盤.



呢個時候我一早準備是會做到兩底的, 因為我隻鑊加蓋後可以用筷子架起一次蒸兩底, 點知這時才發現糕料開起後竟有三底之多... (雖然係 8 吋 x 吋半的細底) 所以要蒸多一次才做完三底.

大火蒸半小時後打開少少蓋, 灑上剩下的臘味, 再蒸十分鐘左右, 加上蔥花和芝麻...



哈, 初時擔心料太稀不成糕, 點知到蒸好後一切...

似乎實淨得滯, 煎就會好好煎囉. 不過食落就會覺得硬了點. 而且, 因為臘味用得太靚太香, 而芋頭又唔夠靚, 所以芋香不出. 不過呢個結果已經比較我想像中好. 下次再做就落少一半生粉, 多少少水和粘米粉, 應該好好多...

過新年之一

一年一度, 恭喜發財!

呢幾星期的 update 速度比之前聖誕期間更加慢, 大概是因為裝修之後回到家中, 要 unpack 和執拾的東西太多. 而且裝修後送家具來發生了大問題 (遲點再說...), 加上要準備過年的東東. 所以自己記事的速度也慢下來.

但係當然都要去買花的, 始終係 "做生意" 之人, 放桃花是最好的選擇. 而且我一直也覺得, 在家放年花是增加 festive mood 的最佳方法之一.

今年買花時都好 "撞手神", 一早找了一間早年買過的, 因為我要找 6 呎花 (棟起那大瓶座地時共約 7 呎高左右), 所以一早問定. 點知那好人老闆話 "今年 6 呎花賣晒喇".

就係咁, 嚇到我年廿九拿拿聲去搵. 而一見到有一間 ok 的就入了去.

老朽之前寫過揀花的基本要領, 今年好奇, 自己講講o下都唔記得o左部分. 但見到人家好有誠意的開價四百五十 (一般 6 呎都開我 6 百了), 有少少驚係生貨 (怕太遲開花) 不過膽搏膽, 見到花色可以, 而蕾也頗密, 便還價二百二十 (係呀, 通常還第一口價要好狼o架). 她竟然有再還, 即是說我開得不是太低. 最後三百六十成交下了訂. 我趁她包起紅紙時四周看一下.

之後才見到其他有些檔口的花比我那株大些. 不過有時既然是撞手神, 便寄望回家後可以好好睇睇了...

雖然今年的花比去年矮了三幾吋, 不過望望o下又幾均勻, 所以都開心o的. 到了年初一就是第一朵滿開的日子, 非常應景, 而且仲有排開.



外母大人一樣好好心機的 "界' 了水仙給我, 還有兩件是給我父母 (即係襯家) 的...



今年水仙幾好, 因為看下去葉都比較短小, 花可以受多點光和水, 會更加亮麗.

不過, 今年無時間準備太多東西. "渣" 一聲已經到了年卅晚, 連全盒的糖果也是年廿九晚才去么鳳買的. 不過見到他們今年有一款開心果是由伊朗入口的. 素知中東是出產果仁的好地方, 見到的是小粒的, 比大家吃開美國的深色許多, 價錢又一樣, 便買回去試一下. 一試之下, 原來味道是 "濃縮版". 連外父都猛讚好. 既然一樣價錢, 都推荐大家一試.

老朽又一向愛吃蘿蔔糕, 今年因為姨仔老公拔少母親做得好, 所以再次央她老人家做一底; 豈料老人家不發功尤自可, 一發功就真係千軍萬馬, 做了一底十吋糕來, 最勁係竟然係三吋深, 簡直係業務用的一底大蘿蔔糕; 加上好友鮑魚先生年廿九凌晨專程由荔景千里送鵝毛的駕車來我家樓下將他另一底又係勁正o既蘿蔔糕送上, 今年不愁無蘿蔔糕吃; 不過, 夫人一向對蘿蔔糕興趣不大, 反而愛芋頭糕, 所以老朽就要諗諗計...

證婚偷食!!!? - 之一...

係呀, 偷食.

我真係講食o架, 唔係你以為我想講咩呀?

好多時我都會在證婚後自己去吃個飯, 一來因為不少時候都已經夜了, 二來就是有時都會希望可以 "鬆一下".

上月初去銅鑼灣的一間酒店為一位朋友的朋友證婚. 他們有很多親友都有小朋友, 所以就出了四對的花仔花女, 而且都一起來 march in. 所以事前準備用了不少時間.

另一方面, 新奶奶也是電視大台的甘草演員, 多年在演藝圈打滾所以認識了不少娛樂圈的明星和導演監製等. 他們不是想遲到, 不過因為工作比一般人更加難就時間, 所以收工時間也難. 但是老人家也想自己的多年同事出席, 所以事前已告訴過我, ... 一定會比較夜.

我倒無所謂, 當玩一下. 不過夜了之後想找地方吃東西倒要想想.

記起在世貿中心有間海南少爺, 聞說海南雞飯不錯, 而且時常有人龍排隊, 既然夜了, 人龍應該短了吧.

去到已是 9 點20分左右, 果然只有三個人在排 (都仲有三個喎!), 十分鐘不到就有得入去坐.

一坐下就送上一小碟醃菜, 原來是梅子石榴. 不過他們用的不是泰國石榴, 而是中國的, 比較硬和多核. 香港做這東西最好的似乎仍舊是囍宴的 jacky...



叫了肉骨茶和海南雞飯, 原本還有些小吃想叫, 但一個人不可能吃完, 所以只這兩樣.

那雞飯的感覺是有點像新加坡文東記吃到的那款, 是比較細緻的 (我個人喜歡那兒的雞飯, 而逸群是比較 "crude" 的, 另一種的感覺, 當然, 最 "幼細" 的雞飯一定是當地文華酒店咖啡廳的出品). 這裡飯的口感是煙韌的. 油湯也算足夠, 不過那碗用舛小壺盛上來的湯就怪怪地, 似乎是缺少了點腫雜的口味.




新加坡的雞飯例牌跟了濃醬油 (黑油膏), 薑末和帶酸的辣醬, 不過這裡的辣醬的確是十分, 十分辣的...

到了那肉骨茶, well... 成件事... 係唔夠重味囉. 在新加坡吃到的, 不論肉味和藥材味都極重, 這兒的可能為了遷說香港人, 所以 "改良" 了. 卻是變的不倫不類了. 但那油炸鬼就o岩 - 是 "林晒" 的. 正宗就是這味道了.





順帶一提另一次去了石峽尾一間酒樓證婚. 之後記起有朋友提過在白田村和大坑西的有一間「品香」於是又係一支公去了食.

他們有多款好得意的東西, 其中一樣是南乳炸豬手...



他們說今天剛開始做出來, 吃下去的感覺是 - 爽! 而且味不太濃, 下酒下飯也好.

同時見到有幾位自己在做義工和法律顧問的團體當中幾位同事, 雖然不同 department, 不過見他們幾個一直隔檯註我. 所以我便主動請他們一起吃了 (橫豎一個又吃不完). 因為, 始終分享是最好的...

《小太陽》

不知何解和女王玩時唱起兒歌來. 之後就唱起了之前我自己小時候在幼稚園時代參加學校的歌唱比賽曾經贏過獎牌的歌來. 分別是 《小羊兒來到青草地》和《小太陽》.

我自己就對 《小太陽》特別有感情, 因為當時是 1980 年左右, 我還在讀高班, 家中剛剛添置了一部小的錄音機, 由我開始參賽起, 每天就唱一次, 家父就會錄起來重聽 (他自己小時候也是喜歡唱歌的, 所以會訓練我唱兒歌, 真的會聽來再教我哪兒要吸氣, 發音咬字等等), 認真得很, 一點也不 "流灘". 現在有些舊錄音帶還在.

想想o下忘了歌詞, 上網一找, 才知原來是顧嘉輝和黃霑兩巨頭的合作作品, 一邊唱著, 又聽住女王跟住我唱, 除又有點掛住黃霑先生外, 更加憶起細個時候家父的教導, 又好笑, 又想喊, 有點眼濕.

歌詞就如下...

太陽像那大紅花
在那東方天邊掛
圓圓臉兒害羞像紅霞
只是笑不說話

太陽像個大南瓜
在那高高天空掛
照得滿山樂融融
草兒發嫩芽

大嘴巴，笑哈哈
落了也要往上爬
敬它，愛它
我把心願交給它

太陽倦了便回家
夜裏休息少驚怕
明晨月兒落旭日重來
依舊往上爬

竟然還可以在 youtube 找到原唱路嘉敏姐姐的錄音...



仲有仲有, 仲有一首, 就係《樂韻播萬千》, 係小時候去音統處搞的學生音樂會必會聽到的主題曲. 現在差不多每年都會有個新的 remix 版出來...



不知未夠三十歲的人對呢o的歌有無印象呢...?

「元旦大餐」

搬了上老家暫住已經大半個月, 我知道夫人有時睡得不好, 大概是因為他們家也在裝修中, 搬去同大廈的別層時, 暫住的房間比較多雜物, 而女王有時也會半夜起來找我們要抱 - 可能是因為附近晚上的街道有點吵 (有超市在凌晨落貨), 又或者自己不習慣.

不過不打緊. 因為有麻麻和姑姐, 還有爺爺在, 她多數時間, 尤其係放聖誕假的時候也是開心的.

好快又來1月1日. 以往每年也是他們來我家, 由我煮西式的除夕晚餐給他們吃, 然後在我家倒數的. 今年因為上了他們家, 所以便順理成章在他們那邊煮. 而又因為這個他們也是租回來的單位有個大的煤氣焗爐, 所以今年便做了這個「焗雞焗雞焗焗雞」出來了:



買的是法國的走地春雞, 不過見到皮不會是焦脆的, 因為我用了意大利式的做法:

雞洗好之後用一般西式做法醃半天: 欖油, rosemary, thyme, 檸檬皮和少少檸檬汁, 鹽, 我還再加入了一些白松露鹽; 香草的莖就扎起放入雞腔內; 焗盤邊不規則的排了些伴菜: 新薯, 蕃茄 (用了細個但比車厘茄大些的), 西芹, 洋蔥, 還有一兩角的檸檬. 預熱至 200 度C後, 將幾片夠肥的意大利 pancetta 煙肉鋪上雞面, 焗半小時至 40 分鐘左右. 因為有煙肉蓋面, 所以不會焦 (雖然有焦會靚o的), 但又會有油香, 而且肉會極之嫩滑. 吃時灑些 parsley 上面. 下次又可以考慮焗好後拎開煙肉高火再焗一陣...

另外也弄了個日式海帶長腳蟹沙律, 炸了兩片 Pork Schnitzel, 烤個和牛西冷, 還有做個煎焗大西洋鱈魚. 一家六口 (連埋女王) 飽晒.

另外, 之前看英國田園廚師 Nigel Slater, 見到他做過一道簡單的甜品:



上面的不是蟹柳, 而是大黃 "rhubarb" (中藥是乾製品, 西餐就是做新鮮的), 見到有得賣於是買回來照做. 就是當蘋果批一樣, 買個凍酥皮, 解凍後搓開擀薄後鋪上切開的大黃條, 加上黃糖或蜜糖, 放入 220度C 的爐焗 20-25 分鐘便成了, 而另一面的就是普通一點的蘋果批, 不過少做所以焗完好乾身, 不知如何可以使蘋果片焗完可以唔乾身呢...

但係焗雞和整酥皮餅 (雖然係用現成酥皮) 係我好想試做的. 今次一次過整到, 最開心的應該係我了... :)

聖誕 2010 之 - 米奇唔夠阿 pooh 揮

來到迪迪尼的第二天...

一覺醒來, 原來已經是9 點半, 都幾過份呀o下.

又要梳洗又要換衫又影o下相仲要準備 check out, 竟然要 10 點幾先落去食早餐, 好在呢期酒店o既早餐可以食到11點, 唔係就真係閣下自理喇.

食埋早餐, 又已經 11 點幾, 出到去迪迪尼, 哈, 又12 點, 好快又要食飯... @@

呢個時候, 可以玩o既只有排一次木馬, 之前就梗係要去拎o左 winnie the pooh 的 fast pass 先啦. 點知我拎的時候架機神神地, 「插極唔出野」 (!) 張 fast pass 唔見影, 最後都係要 staff 幫我 "禁" 出來.

時間關係, 又係食飯的時間, 因為昨日請酒店 front desk 幫手訂了 corner cafe (就是那間次次都食唔到的小鎮大街餐廳), 但係老實講, 食完個自肪早餐, 邊有咁快肚餓丫! 所以, 最後就係食o左個沙律加個意粉 (主要畀女王食) . 更抵死係食食o下開始第一輪的巡遊, 女王又掛住睇, 仲跳晒舞咁 (因為去過的朋友都可能記得, 大街餐廳係睇到巡遊的. 只不過我們唔係窗口位, 睇得唔清楚), 食得仲慢...

好容易食完, 即刻去玩木馬 (又好在無嘔...), 因為女王細個, 坐木馬有點難度, 所以夫人就 "霸" 了兩個 "馬車"之一 來坐. 雖然我知道, 女王是喜歡坐馬多點的.

玩完後又夠鐘去 winnie the pooh adventure 坐蜜糖罐啦. 初時都無事, 但女王好怕黑, 入了去見到跳跳虎後開始黑, 女王直頭企起身話想走, 嚇到我地飛起. 最後, 又係匿埋o係夫人懷裡過了那三分鐘, 只偶爾抬頭望o下o的公仔.

捱完五分鐘左右的車程, 女王出來又生龍活虎, 最頂癮係又o係度扮唔驚, 真係 "勁搞笑"...

好喇, 又三點喇, 三點半巡遊, 而四點先有下一場 "小小世界", 五點半先有米奇金像獎喎... 點算好...?

好在見到花園影相那邊, winnie the pooh 唔太多人, 馬上一定大細衝入去. 一路排那 15 分鐘, 一路女王竟然係咁對住隻 pooh 叫 "我好鍾意你呀!" (!)

好喇, 卒次排到, 我叫女王你試o下跑埋佢度啦. 呢個時候, 佢就開始怯喇, 哈! 最後都係我地抱佢埋隻 pooh 度.

呢個時候我記起昨晚坐火車時, 行到呢邊, 小小世界的火車站剛好就係呢邊後面, 我們當時見到阿 pooh (唔知係咪呢位仁兄/姐喇) o岩o岩收工轉人, 行返入去時, 行到死死o下咁款, 直頭係垂頭喪氣 look; 另一方面那隻 goofy 就一樣收工, 他首先見到我地架車o的人o係度揮手, 於是一邊回應, 一邊拍那死老豆咁款的 pooh, 於是那 pooh 又即刻好像入o左電咁, 係咁揮手... 其實, 佢地真係慘, 一日未返到入後台的 area, 隨時畀人點相.

講返影相, 女王影多幾張後, 又竟然肯拖住阿 pooh 喎, 我地又點會肯放過呢個機會, 係咁影佢同阿 pooh 兩個. 一邊當然讚佢好叻識自己拖住阿 pooh 啦.

就係咁, 夠晒鐘睇第二轉巡遊. 呢個時候夫人肚餓買o左一杯爆谷. 順理成章女王就第一次嘗試食, 大家都估到佢當然係食到唔停口, 最後到睇完巡遊去小小世界時, 要我夾硬 "生吞" 1/4 杯爆谷, 一邊食一邊諗起o的競飲大賽o的參賽者...

好喇, 又係上船的時間, 初時女王見到又係排一輪之後上架野度都有o的驚. 不過好在, 小小世界係好夠光o下o既. 加上一路唱一路唱都係《世界真細小》同埋加入o左 Jingle Bells, 女王好開心跟住郁晒手又 mind o下咀唱咁. 我就反而突然有少少懷念黃霑先生...

玩埋呢個之後, 其實女王已經就來 "碌低" 訓著. 看來餘下想去的地方都係凍過水o架喇. 不過行過城堡前的其中一檔小賣檔口時, 女王突然醒晒, 原來見到係史迪仔的自動吹肥皂泡機. 我見到仲有 pooh 的, 夫人都覺得今次無買咩畀佢好似唔太似去過迪迪尼咁. 於是問女王係咪好鍾意. 佢梗話係o架. 於是, 一架 pooh 泡泡機入手.

不過精神o左一陣之後, 換來的當然係更倦. 見已經係佢下午茶的時間, 所以快快手買件 cake 畀女王食, 哈, 又咁o岩撞到 duffy 熊仔影相後 "收工" 經過. 女王仲想撲埋去, 但人家收工又點影得o架. 所以我都好通氣地叫女王同 duffy 講拜拜同埋自己加多句 "辛苦晒!" :P

整整下原來都已經５　點幾, 快手買了兩隻水晶 pluto 同埋城堡畀我個妹 & 老媽子 (佢地都勁鍾意水晶), 就飛奔上車返酒店.

原本係想坐返迪士尼線出市區的, 不過夫人說話頂唔順. 而時間都的確係晏o左好多的. 所以, 最後決定都係忍痛 call 的士. 而當然女王在開車無耐後, 已經訓到好酣...

ZZZ...

聖誕 2010 之 - 不愛煙花愛米奇

聖誕假期來到最後一天, 自己和夫人請多兩天的假期, 為的是帶女王去她一早說過想去的 "米奇屋企".

原來女王一早知o個度叫做 "迪士尼" 的. 而且成日話要同winnie the pooh 呀, 米奇之類影相同埋玩. 所以就趁住氛入面那 "米奇雪亮聖誕" 未完就入去玩一次. 又因為知道帶住女王, 行動一定會比較慢, 更為不希望太趕 (話晒放假丫大佬...), 所以索性請了兩天假, 住埋酒店.

因為早兩年女王未出世時和夫人去過, 當時住的是舊式維多利亞建築的迪士尼酒店, 所以今次就選擇了那間新 look 一點的甚麼 "好萊塢" (hollywood!) 酒店又試o下, 好在一早打電話去 book, 原來真的十分爆. 又不住不知, 原來:

1) 呢間平一大截 (不過房內設備都差一截, 此乃後話), 海景房的假期 price 都係千九大元左右.
2) 呢間都一樣有自助早餐食, 不過無米奇出來, 那間就有, 貴百多元一位; 後來都覺那邊的東西多選擇一點, 但呢邊原來都幾 ok 了.
3) 那間細些, 由 reception 行回房的路程短些. 呢間好似行極都未行到. 原來呢邊有六百幾間房, 那邊房大, 就只有四百間.
4) 兩間酒店和樂園都有 bb 車可以租用, 一樣係港幣六十大元一天. 不過樂園就要畀多份按金.
5) 呢邊個 reception 大少少. 同埋多旅行團 (尤其係內地) 入住, 可能因為平少少.

說回當天. 我們是搭地鐵迪士尼線入去的. 不過打算食過午飯才入, 而女王就幾乎在車上睡著, 差點看不到迪士尼線車上的公仔. 但一到出了迪士尼站見到牌樓上的米奇公仔, 女王就知道, 原來講o左咁耐, 今次真係來到了! 立時女王的睡意都消失, 跑呀跑的, 便先到了酒店 check in.

抵死的是, 明明說下午3時有房, 我們到達時差一點點就到時了, 但 front desk 說原來房間 "有點技術上問題", 要我們等到 4 點 (咪即係未執好囉!!). 夫人又好心, 說既然來玩, 不介意 "hea" 多點, 便說和女王先去找東西吃, 我登記完去快餐店找她們好了.

呢個時候, 女王問 「爸b呢?」

「佢要畀錢錢呢!」

「點解呀?」

我回道「因為米奇未整好我地間房, 所以要等一陣畀埋錢先」

「點解呀?」

「因為要玩就要畀錢哥哥先囉」

「點解呀?」

「咁唔畀錢無得住同埋玩喎」

「點解呀?」

卒之解到無得解, 我便有少少無奈笑說「咁米奇都要開飯o架!」

立時櫃檯傳來一陣笑聲, 幾個職員 (他們所有會面對客戶的都叫做 "演藝人員") 包括幫緊我手的哥哥仔一齊忍不住「卡」一聲笑出來.

「點解呀?」

「......媽咪你快o的帶佢去餐廳啦...!」 (媽咪 (夫人) 都笑緊)

之後那餐下午茶一吃已經4點正, 上去取房後才醒起, 女王之前係極之想睡的, 為免一陣入去樂園訓著無得玩, 我們決定 - 一家大細眠一眠先! (好明顯, 係我同太太好眼訓吞 pot 啦...)

不過女王見到咁多米奇, 初時都好興奮, 搞好耐先肯訓.



聽過朋友提醒, 要帶女王的枕頭和被袋, 有佢自己陣味佢會訓得好o的. 雖然證明不了但係的確女王好安穩地在加床的那床仔中訓了一個小時有多. 即係話我們坐得車入返樂園的時間係 - 6 點有多了... -.-

原來今年聖誕期間, 迪士尼傍晚會有多一個節目, 就是關上大街的燈光, 再用煙火效果慢慢將燈光重新點起, 說是米妮送給米奇的禮物喎... (但米妮又點識變魔術呢...? 奇...!)

點知, 一開始有煙火, 女王就覺得好大聲, 好驚, 要伏在井我們的懷裡. 結果, 呢一刻咩相都影唔到, 等我仲裝o左支 50mm f/1.4 想幫佢影o的人像...

天寒地凍, 睇完呢個嚇親女王的煙火後, 都已經 7 點, 所以又走去住o下火車, 打算跑個圈, 等女王看一下整體的景象後再入幻想世界, 希望可以在晚飯前玩個木馬什麼的, 再去睇煙花 (其實佢咁驚仲睇唔睇到呢o下...)

點知, 原來女王連火車都驚... 因為那觀光車會經過冒險世界, 夜晚燈光弱了, 有點黑, 女王又畀個不安樣出來. 我知道, 又 "領野" 喇...!

雖然後來入了幻想世界後, 女王終於都識得笑, 但係因為怕遲無位, 我們最後都決定, 只去那什麼 "皇室宴會廳" 食飯便去睇煙花了.

記得這 "宴會廳" 是食西式快餐的. 因為訂不到大街餐廳的位置 (三年前夫人也一樣訂不到...), 所以又跑了來. 夫人吃的是個 burger & chips, 我就是個什扒餐, 一齊再分少少給女王. 不過女王仲有少少咳, 所以登把軟了的薯條才給她. (都仲係咁死貴, 兩份餐食o左百六蚊...!)

聖誕的煙花是在晚上 9 時才放的. 之後樂園才休息. 因為多人, 而音響效果又勁. 所以... 女王果然係一開始就勁驚, 基本上係完全唔肯睇, 連她最愛的顏色 - 藍色的煙火也不看.

連帶, 我o的相都影唔到 (咁無帶腳架係咁o架喇... 都唔太關女王事的).



o係有少少覺得搵自己笨的情況下回酒店, 幫女王洗澡, 佢又好野, 雖然應該已經好倦, 但還和麻麻 & 婆婆講o左電話, 仲話好驚o的煙花...

希望女王之後一天會覺得好玩o的啦...! (見另文)

聖誕 2010 之 - 我的十大證婚場地

一般的情況下, 聖誕節和復活節期間, 老朽不會去為人證婚, 因為身為教友, 這兩個節日是最多教會的事務要去幫手的. 而且通常在這些長假期之中我也會找一兩天煮個比較豐富的小家宴給父母 or 外父一家.

不過今年有些特別.

大半年前一位教友找我, 說他那位未領洗的弟弟希望找律師在數天假期當中一天為他們證婚. 地點是 Grand Hyatt 酒店.

唔... 這個是老朽 "集郵" 的 "收藏品" 之一. 所以, 當下就應承了. 最後亦無後悔, 因為和新人認識多了後, add 了 facebook, 見到他們的結婚照片, 才第一次見識到 grand hyatt 的總統套房是甚麼一回事... 家庭有 support 的確係唔同... 不過, 呢篇睇到尾你就知...!

至於何謂 "集郵" 呢... 是這樣的, 證婚有不同的地點, 老朽一向都不介意去任何地方證婚 (之前都有 entry 提過, 去過公園, 私人地方, 酒吧和人家屋企, 甚至是祠堂證婚). 不過自己心目中, 是有一個想去的 "十大場地" 的. 包括: (講明先, 只是個人想去的地方, 也不是說這些地點特別 "高貴", 是沒有特別原因的)

- 四季酒店大 ballroom
- 半島酒店 salisbury room
- 半島酒店 7 樓露台
- grand hyatt 酒店 ballroom
- 淺水灣酒店
- 淺水灣海灘
- 伯大尼教堂
- 金鐘香格里拉酒店香島殿
- conrad grand ballroom
- the one 的煌府 (貪佢條橋夠得意)

想下想下其實仲有幾個的. 不過係咁意 list 出呢十個先. 證埋今次, 只剩下四季 ballroom 和淺水灣海灘未證過. 去年聖誕原本是有人找我去四季的, 但就是因為開初說的理由, 我推掉了. 至於金鐘 island shang, 其實係因為我自己當年結婚在那裡擺酒, 而淺水灣海灘嘛... 其實, 是老朽和夫人十多年前還是學生時, 第一個度過情人節的地方... (面紅了...) 一個情意結而已...

grand hyatt 那晚的確係相當, 相當o既衣香鬢影的. 有不少大家不太認識, 但見到個樣又會覺得好熟口面的社會名人都到賀. 新郎家長是世家, 做大生意的, 識埋識埋自然成村人. 但另一方面, 這晚的新老爺就真係幾 "頂癮" 喇...

正所謂有辣有唔辣, 世家子弟自然比較多家庭的規典, 而這位新老爺就真係當中之極了. 我當然了解他是第一次當老爺, 緊張一些好正常, 但好多時候, 可以人家就得佢多, 佢唔自覺地過了火位.

證了唔知幾多百對新人, 老朽真係第一次試一去到會場, 新老爺極其 "主動" 兼 "權威" 地告訴老朽 "阿律師呀... 我呢, 就覺得個婚禮呢, 應該咁樣行法..." (之前和新人一早傾晒, 老爺係唔係而家來加把咀嘛...) 好在佢所 "覺得" o既野同我同新人傾開o既無咩大分別, 所以都未有出事.

之後就 "o黎料" 喇. 新人已經畀佢點到暈陀陀, 我要向他們做個 final briefing 同埋解釋香港法例 "一夫一妻制" 的條文. 呢個時候有兄弟通傳 "有長輩話有人等影相, 畀多三十秒律師喎".

我不以為然, 繼續 briefing.

廿秒後另一位兄弟好 "驚青" 地跑來, 說 "有 daddy 話唔等喇, 要叫新人出去影相, 最多畀多十秒律師咋"

即刻, 平日極之林善的老朽真係火都o黎埋, 用相當沉實和粗線條的聲線哮道「話畀佢知, 律師解釋緊法律要求同埋條文, 邊個都唔阻得, 唔係就行唔到禮!」那併兄弟畀我嚇一嚇, 就走去找那位老爺了. 我就當然即時變返個 nice look 繼續和新人講解.

當下有幾個在場的兄弟 & 姊妹笑住拍手, 原來, 他們齊齊畀佢點來點去, 都忍了一整天. (當然, 我一解釋完就即刻找回那位兄弟 "salum", 佢都知我唔係想話佢的, 因為, 佢都係忍o左成日的一份子...) 但當然, 到我親自面對新老爺的時候, 說話就比較客氣些, 話晒都係教友的父親, 而且, 正如上面講過, 我是體諒他的心情的.

講開又講, 呢排都見到有o的朋友的朋友結婚, 在 facebook 見到人家的相, 有時會見到一些行家在證婚, 總會覺得 "點解唔搵我呀!" 的感覺, 這感覺, 尤其在如果新人找的是所謂 "出名" 的 "星級" 行家時就更強烈. 因為, 老朽自知 (唔係自覺) 我功力和他們相比有過之而無不及. 尤其係知道一部份所謂出名的行家的做人處事方法之後...

不過, 細想一下. 又有點不同的想法. 始終, 不同人有不同的要求, 十個人有三個覺得你好, 又或者, 仲有四個覺得你還可以, 而另外的幾人, 大概就會覺得有別人好過你了. 你不能要求 100% 的人覺得你係最好的, 否則, 這個世界只有你一個律師好了.

或者我都係想得太多了. 根本, 我自己就無咁多時間出來為更多新人證婚 (要 maintain 設而家的 quality 喎!). 最近在處理三四月的新人, 剩係搞佢地約開會都搞到頭都大埋... 仲有一堆打電話來問我年尾和出年年初的朋友們, 加埋自己平日要 "跑數" 的工作, 真係連電話都覆唔切人家...

聖誕2010之 - 平安的 mulled wine

可以說是恆例了, 平安夜是舍妹生日, 所以在家搞 party, 不過今年最特別的是, 我和老家兩邊都 "家不成家", 都在裝修. 加上其中一位舅父舉家外遊, 今年妹妹的生日會變o左個縮細版. 不過都好, 唔使訂咁多野食就自然唔會食剩咁多了.

但雖然人少少, 吃不了整隻火雞, 我都一樣訂了一大件火腿. 聖誕節吃的, 最好是烤 virginia ham, 因為是用丁香來調味的, 那味道和玉桂一樣, 就是 "聖誕味". 近年見馬會自家烤的那個都是用古法將火腿打上幾十支 "丁香釘", 不過今年馬會竟然只提供 6 kg 的 gammon ham, 只好轉去 citysuper 訂 2.5 kg 的 virginia ham (以前馬會那個係 1.8kg, 剛剛好); 難得是他們也一樣用了丁香釘而不只是掃上丁香水, 不過竟太大件...

另一樣係馬會o既極品就係佢地o既自家製鵝肝醬, 每年就只有這時候會有得訂, 500 大元但係有成 kilo; 堪稱全香港最抵. 一早知一家人食唔晒呢, 所以就和老友食家鮑魚先生分了一半.

今年是在中環老家的會所 book 了間房來開 party 的, 因此回教堂幫手也快了. 而今年, 我不再任性說要去影相, 而是再次擔起 "接待+保安" 的工作.

今年, 真係大話夾好彩; 年年都有人要搵醫生呀, 暈低之類. 今年連醫療輔助隊甩左底無派員來幫手但係無人有事又無人暈, 真係執身彩.

我們一班 "secu" 好得意, 每次大禮之後都會去中環的其中一間 "翠華" 食野聚一聚. 就算今年我好飽和返屋企仲近也一樣會去.

25 日, 又回到教堂, 不過因為遲起身, 參與唔到彌撒. 咁究竟我返去做咩呢...?



其實係 blog 殺兼故友 kuB 弄了個薑餅人和聖誕鐘給女王, 叫我回教堂取的. 好得意, 真係好型呢...! 多謝晒!! ^^ (佢O既薑 & 玉桂味比出面買到的勁好多O架! :) )

夜晚就和女王 &夫人去了中環　Press Room 食飯, 好耐無飲過 mulled wine 了, 叫了一杯, 真係天寒地凍都唔驚...

連我自己都發現, 原來我整個聖誕都是食食同埋食... @@"

周年紀念

已經唔記得o左寫自己生日的 blog; 不是過了結婚周年去了食個凍到僵的 grand hyatt poolside grill 所以想寫返, 根本自己都唔記得o左自己生日去了哪.

其實老朽是天秤座的, 所以十月就是生日月, 不過, 做了三十幾年人, 有時對於生日都有少少麻木; 但人有時就係應該找些東西來開心一下才對, 所以正日就和太太去了慶祝 (女王就暫由麻麻托管半天), 食飯的地方是多年前去過念念不忘的日本正宗懷石, 我們當年結婚酒店樓下的「灘萬」 (nadaman).

已經三年有多無去過了, 上次去是 lunch, 再之前和女友 (夫人是也) 去食懷石已經是結婚前的事了. 最近在 facebook 見到友人去食 (仲係個個月去!), 又「勾起條筋」, 而夫人又竟然心有靈犀, 告訴老朽說準備生日去食灘萬.

灘萬可以說是幾乎每間香格里拉也會有的日本餐廳, 當中的懷石是香港吃到比較像樣而價錢又不是太貴的那款.

因為夫人不太吃魚生, 刺身大都跑到我肚去, 食到飽.

至於禮物, 就收到一份巨型的 segafreddo 家用咖啡豆, 以每天兩杯左右份量 expresso 的我, 足足喝兩個多月了...



說回聖誕前的結婚周年, 因為夫人多次想去食 grand hyatt 的池畔 bbq, 但都未能如願, 所以今次一早訂了, 點知那晚就正是氣溫急降加落雨的晚上, 戶外食 bbq, 認真 "滋味".

初時以為他們今晚不開了, 但下午打來又說照常; 去到時見已經是寒風加細雨, 難得夫人說這個夠浪漫, 咪照去囉.

見到的確係好多人, 細問之下原來今晚有兩間公司搞 annual dinner (成五百幾蚊一位, 呢兩間公司都幾豪o下...), 酒店話今晚實有人來, 而且其他酒店食肆已經 full house.

即係話, 其實酒店係因為 "實有人來" 而缺定開場的, 而唔係因為天氣不差...

不過呢, 雨真係愈來愈大, 而且開始見到有坐在池邊的人問酒店要大毛巾來蓋上.

其實那處是十分好吃的. 頭盤先有極大量的海鮮, 有蝦 cocktail, 翡翠螺, 花蟹, 龍蝦, 琵琶蝦... 剩係食呢堆都抵 (其實係食呢堆最抵!) 他們可以配的醬汁有幾款是他們自行調製的; 食落真係一個字 - 鮮!

仲有那十款不同的沙牛和自配沙律, 用真正 Romain heart o架人地...

他們仲有一些很不錯的 proscriutto (ham), 吃落應該不是 parma 但係好夠濃味 (雖則意大利腿中我自己喜歡 san danielle 多些, 鮮味重一些). 更加攞命的是 grand hyatt 有兩款特別的肉醬 - 自製的 salmon pate 同埋 liver pate. 配以他們那個外脆內軟的農夫包, 食到呢度都已經飽了一半有多.

相比下,他們的主角今晚稍為失色, 因為扒類不應太乾. 他們是烤得好, 不過是晚大家都怕了跑來跑去. 雖然他們有 staff 在露天位置為客人打傘. 所以肉類明顯是乾了一點.

的確係愈來愈大雨, 而且突然間覺得好凍, 原來是後面一檯人可能受不了太凍, 提早離開. 再食多一陣, 我都覺有點不舒服, 寧可早點走好了.

最後, 我真係冷傷風了一晚...