超錯與超蠢

任何人呢, 間中都會做些蠢事, 有時蠢的程度真係匪夷所思的. 

聖誕前的一通電話, 帶來一宗小生意, 是一宗刑事案. 案中兩名被告已經認罪, 希望找位大狀幫手求情. 大概是「干擾汽車」和「無獲授權下駕駛車輛」之類.

案情透露, 事發時兩人相約, 分別駕電單車去一個地方再轉乘其他車輛去, 去哪就不重要, 最緊要是本身不是去做任何犯法的事.

好了, 一人早到泊好自己的電單車, 見到旁邊有另一架不知何人的電單車泊著, 車匙竟然還插在車上, 還連著車尾儲物箱的匙.

早到者不知是八卦還是怎樣, 拔出車匙, 開了尾箱, 翻了一輪見沒啥特別, 便把尾箱再鎖上, 車匙插回車的發動掣上. 

這時另一遲到的也來了, 泊好自己的車過來, 早到的大概是告訴了他有個「傻佬」泊了車忘了車匙之類的. 這遲到的便去看看, 又不知何解的, 竟然跨上了這電單車, 撻匙駛出來兜圈. 或者是見無人又好玩吧, 便駛去隔鄰街, 這時才發現自己原來已經遲了, 便求其放下了車在隔鄰街旁, 兩人便匆匆走了.  忘了車匙的原車主回來, 當然在自己的泊車位置找不到車, 也就報警了.  而警方也好快找回了失車, 因為就咪o係隔離街囉...!

當時無人知道, 整個情況都被旁的變電站閉路電視拍下. 

數天後, 警察找到了其中一位, 他主動承認了是開了人家尾箱, 於是被捕.  他妻子致電開車的那遲到者, 他當然嚇得魂飛魄散, 即刻跑了去警局自首.

整件事看來都是不可能發生的事, 偏偏卻發生了.  好在法庭見他們紀錄良好, 而感化官報告也相當 (直頭係罕見地咁) 正面 (他們認罪當日由當值律師計劃代表, 他合理地向法庭申請取感化報告並交由正式代表律師處理 [即係老朽和相熟的為食大狀] 所以才會有此報告). 在大狀求情下, 兩人都是被罰社會服務令, 加上罰款便將社服令酌減. 

蠢就不是我自己說的, 而是當事人在法庭和法官自己都說的.  至於係咪真係蠢同有幾蠢, 就大家自行評價喇!

正能量達人之 - 第二步曲

幾個月之前 (大約都有大半年了...) 老朽寫過有關專業調解員 (mediator) 的課程.  老朽上了之後就開始排隊考試, 因為坊間似乎認受性最高的就是香港國際仲裁中心 (HKIAC) 的考試, 而且如果在 HKIAC 考取資格後, 是可以向香港律師會申請豁免再考律師會那 Panel 的.

因此, 這個panel 也是香港各大可有資格給予「認可調解員」的團體中最多人報考的, 也因此我去年4月左右報, 一排....... 就等到十一月尾才有得考.  據我認識有份參與評核工作的資深調解員所言, 是因為人手不足, 他們作為資深調解員每天工作本身都有一定繁重, 但作為「考官」他們不單要付出一整天的時間來為考生監考和評核 (後面有詳述), 而且可以得到的金錢補償是比他們當調解更少的. 

背景就係咁, 所以其實去年11月就已經考了三天的試.  形式係好似 role play 的. 每天會有三輪考核時段, 每名考生 (surprisingly 原來只有三份一左右是律師, 多數係其他行業的從業員和專業人士) 只會在其中一次當被考核的調解員, 另外兩場就要做「戲子」, 當有爭拗當中的一方, 而且須按一份預早由總考官定下的 guideline 行事 (不過事後發現其實真係有不少考生會有 over-act的情況, 我以為係同班同學 practice 時才有人玩野唔跟 guideline 畀流料, 點知原來考核都有人玩, 仲係專登玩, 而且其中一人玩的係我!!).

當然over-act 的不會是我, 因為累死人的話對自己其實無咩好處. 所以每次我 act完之後考生都會來多謝我的 (唔係我點可以在我那班上取得導師的「最佳演員獎」呀...)  , 不過其他人唔係咁諗呢...

考是考幾天的, 任你報幾多日, 規則訂明三年內只可以共考六天, 而當中最少要有兩次是得到評核官的推荐 (即係"合格").

我第一天考的就是碰到一位這樣的 "戲子". 當時我還以為她好好人, 後來過了那天, 有另一位做相同角色的朋友和我傾開, 才知道原來她根本是倒過來over-act的, 我平日都好老脾, 但我聽到老友咁講, 我即刻問返相熟考官, 得到的是相同的答案 -- 當時就真係激到彈起, 怕自己被人累死的.  不過後來才知道, 原來我那位考官都知道這個問題, 最後覺得我處理這麻煩人做得不錯, 所以都 "pa" 左我. 哈哈.

第二天遇到的是好parties, 不過衰在考官係出了名的殺人王.  其 comment不公程度是難以想像的, 我原本直頭打算上訴. 其他認識的考官一聽到這考官的名字, 畀了兩個忠告我: 1) 佢肥梗你架喇, 唔好奢望; 2) 佢既comment可以不理, 因為和大部分其他考官的就算唔係相反都唔係大路野, 聽佢講下次撞其他考官係死梗的.  :P

第三天呢, 遇到個正路的考官, 也遇到兩位之前已認識的 parties. 但這位考官太正面, 當時反而在考完後 (是有個考官畀 comment 時段的) 根本只有讚無彈, 搞到我仲驚. 我問返佢係咪真係咁好, 佢竟然答: 「我真係咁覺得喎, 我畀唔到咩更加改善既意見呀~!」當然, 呢位考官就的確係高分 "pa" 我的. 

當然, 可能有些人哥見到呢篇文會覺得「好小事唧」; 不過為我來說, 你當我蠢又好, 當我亂講又好; 畀完皮幾野之後其實真係覺得幾大期望, 最後我可以一著夾中無浪費金錢, 真係還得神落.  我知道, 和我一起練習的同班人士, 過半都係最多只有一次 pa, 要下次重考, 而按一位考官說, 報重考要等多八個月......... @@"

今次算係執身彩; 但當然, 之後會唔會有調解的生意, 又係後話了...

以和為貴: 正能量達人之極致 ． 認可調解員

去年香港法院開始強烈建議民事訴訟的與訟各方在訴訟進行期間 (或者之前) 進行一個調解的過程. 相信有不少行家都已經知道了. 而且亦有不少律師 (想) 加入成為調解員的行列.

其實老朽之前對調解只是一知半解, 因為我自己一向 handle 案件都係 "以和為貴", 絕大多數都能 "自行" 調解成功, 所以未試過整個程序. 不過一來有老闆推荐我去學習, 二來有客戶想我了解完之後向他們講解, 三來上完課程後可以得到每年必修的專業進修學分 (CPD) 之後成年唔使上 course 不特止, 而且一上就一星期, 得了的分數連下年度都 cover 了近半. 不過價錢也相對來說很高, 要八千個大洋.

既然報了就去試一下, 好在公司不用的請假上這個連續 5 天仲早過返工時間的堂.

唔上由自可, 一上才知, 原來大家以為 "吹吹水" 就可以做的 "和事佬" 一點也不簡單. 除了有特定的 protocol 要跟之外, 同時 "扮中立" 又要使本身勢成水火的雙方也有興趣 + 誠意聽你坐低發 up 風, 一點也唔容易. 而且, 就是因為雙方都係唔開心的來 (唔係都唔使打官司啦係嘛!?), 所以對對家一定有好大戒心. 如何在一天之內使大家由面左左變到 "面右右" (我胡謅的) 就係當中的妙處.

最基本的, 是 always 都要正面地看一件事 - 係任何一件事, 又唔可以得罪人.

呢一樣, 老朽倒是幾有信心的. 因為我本身可能是宗教使然, 都係正能量偏高的. 不過怎樣高也是人, 也有脾氣, 學做調解員就是要連這一點點的脾氣也要放下. 要做到呢樣, 簡直就似係出家修行的. 唔係正能量達人, 真係唔會做得到, 又或者說, 唔會做得好. 呢個做法尤如係將正能量達人的能力推至極限.

course 就上完, 同班同學都相當好傾, 下一步就係睇o下幾時有試可以考, 才可以被認可, 因為近年多人考, 所以合格率聽聞是故意下調的. 而且, 考試本身也要收費. 似乎律師會呀, 仲裁機構呀之類都幾豬籠入水了...

搶救永利街?

卒之搞掂.

見到政府 "擒擒青" 辦事.

見到成班人在慶祝.

見到張大導像嫁女的宣佈喜訊.

見到各黨各派齊齊開香檳.

見到大家的黃絲帶隨風飄揚.

...
...

惟獨大家都見不到的是, 永利街的居民, 一家大細又好, 獨居長者又好, 個個對住一層層賣不去的舊樓, 愁眉苦面個樣. 個個一聽到唔收, 想起外牆加內牆都甩晒油撲起晒, 即時變了個西樣出來.

一套電影, 一班明星, 一群政客, 一窩蜂的香港人. 大家有無想過已經無啦啦賣了出去仲要蝕本的業主? 又有無想過因為你們一句 "保育" 而家要住危樓, 又或者一撮要忍受一定會被壓低的售價 (都起唔到新樓, 舊樓價值遽減, 政府一向出手低, 唔係變賤價係乜?) 的業主, 住客?

你好彩, 層樓唔係你住o既. 要對住此等危樓的又不是你們.

老朽少時家住堅道附近, 又有個 uncle 在永利街開印刷店, 就是成日有人影到門面那間; 兒時好多時都會去玩一下, 打o下躉, 又或者幫屋企人印小小東西時去取貨, 當然過年還去食那可能帶點墨跡的糖果 (他們永遠會有個全盒放在印刷機旁), 和逗他們用自家印利是封的利是.

從未聽過永利街的街坊和各位 uncle antie 等不想被收購, 他們大部份都希望早點換個好環境 (當然最好就同區附近啦!). 現在這樣一個搞法, 真不知要拖到幾時, 難為大家還好似抗戰勝利一樣. 連對切身的人也沒有關懷, 你們說保育, 有無問過當事人o架? 還說關懷社區? 放屁!

中環堅道多年來都有一種特色樓, 就是地勢關係, 地基和地下打在永利街或者必列者士街, 而起到四樓時用一條短橋將大廈的 "正門" 接駁到堅道 (因為堅道以前是半山區, 用 "堅道" 作名賣樓貴得多, 所以一定會連接堅道). 這些短橋都起得古色古香, 但近二十年的重建都拆掉了9 成; 那些真經典不理, 現在就來談保育那兒, 我相信有一半的 "保育分子" 連必列者士街係邊都未知!

時代既要進步又要顧及傳統, 在地少人多的香港其實永遠是個兩難. 現在唯一可以指望的, 就是政府可以找到一個合理的方案出來; 希望還在那兒的 uncle antie 同埋小朋友可以找到安居之所.

真心希望, 香港人可以清醒o的.

你使唔使戴假髮的?

老朽開始有o的甩頭髮 (年幾大丫嘛!) 不過唔係講呢個問題.



網友閒人乙問老朽有關律師戴假髮的問題, 老朽就不如在此分享一下.



都係拋磚引玉, 如有行家或大狀 (例如陳大狀) 到此一遊的話, 見到老朽所言有錯或者講漏者, 有勞不吝指教, 以正視聽也.



其實係大律師 (訟務律師) 先會戴假髮的, 而且係區域法院或以上級的公開庭才會戴, 如果係 "內庭聆訊" (即多數用來解決法律觀點或有關司法程序之爭拗) 之類, 就不用戴, 亦無需穿袍. 所以各裁判處的律師都唔會戴假髮的. (例外就是當裁判處的法庭因為上級法院 "爆棚" 而被徵用 "當" 成區域法院時)



假髮分幾類, 1) 大律師假髮; 2) 御用大律師典禮用假髮; 3) 法官假髮 (幼細o的, 比較銀灰色o的); 4) 高等法院以上級法官典禮用假髮. 2 同埋 4 就係長長的垂到肩上, 平日他們都會用返自己的短假髮開庭.



點解戴呢就簡單講, 一千年前英國律師唔戴假髮, 法官亦不會戴, 反而坐堂時係會戴方形頭巾, 圓帽; 假髮係幾百年前的 "上流玩意", 由皇帝話 "呢o的似係官式o野喎" 開始, 律師到庭打官司時就開始戴起來,



法官方面, 自從皇帝話戴o左型仔之後, 法官的守則亦改成要戴假髮, 而且整多樣 "典禮假髮" 出來. 反而方形頭巾, 圓帽就開始唔戴, 只保留頭巾在隆重頒令時戴 -- 亦演變至今只有在宣佈死刑時戴的黑色頭紗. 而圓帽就 "縮細" 至今日法官假髮頂頭的一個小圓凹位.



或者可以參考o下呢度 (我都係參考呢度咋):

http://legal.edeandravenscroft.co.uk/EvolutionOfLegalDress.aspx

呢間係英國的皇室御用製袍師 Ede & Ravenscroft 的公司網頁, 詳細介紹了各式法官和律師衣著的演變.

筆攻不公

兩單大新聞, 一是落馬洲六命車禍, 二是三鹿案件宣判.

先講三鹿, 一句講晒 -- 死的是殺人者 (奶站落毒者). 不過點解有人殺人唔使死? 仲有一大班驚阻住京奧的省市官員呢? 唔好話重判, 連 charge 都無, 會唔會離譜o左o的呀!!

唯一可以一讚的, 是今次的審訊過程中, 多次讓記者採訪, 到判刑時甚至每半小時派員向記者報告, 不過依然不讓家屬內進 -- 但, 這些不都是一早應該做的嗎? 為何有人可以想鋏制他人可以去到這個地步...? 真真不明白.

法制被政治影響, 在當今世上還有效地執行的, 大概也只剩下中國, 北韓和極少數的地方, 奇就奇在, 倒也還有不少人真的不覺得這是一個問題.

落馬洲一撞, 人人都話酒後駕駛和危駕導致他人死亡的法院判例過輕. 這點老朽倒是101% 同意. 其實若干程度上, 在路上將自己和他人的性命亂在賭注, 不是誤殺是甚麼? 終身停牌, 我認為已經是最低刑罰了. 不判返三幾年以上, 一班喜歡開車前係要飲兩杯的司機們會收手嗎? 一班枉死的冤魂又會安息嗎?

六個家庭, 一下子就這樣散掉了, 悲... 仲要就過年添啊... (><)"

以和為貴

《易經》第六十一卦 中孚：豚魚吉,利涉大川,利貞.即以誠信取得吉利的意思.

老朽多數案件都是為保險公司抗辯人身傷害, 但也有小部分是為傷者追討賠償的. 早兩年有位客戶就是因為作為其他案件的證人而認識, 不幸這位先生後來遇上交通意外, 頸脊受傷, 於是找我幫手索償. 他家境相當一般, 故此便申請法援, 並批出予老朽.

這官司一直被對方的一間保險公司拖長, 到後來, 這位客戶的部分駕駛執照更被吊銷. 失去了部分的謀生技術. 於是他開始變得消極. 但此時, 對方才計來一筆一早應該來的金額.

太遲了, 這位客戶原本還會考慮收取這少數目的賠償, 但現在他日後的生活也開始有問題, 又實在難以就此了事.

不過他自己也愈來愈鑽了牛角尖, 而且總覺得自己的生命被人拖累; 但是對方的賠償提議又不吸引. 如是者, 僵持了一年. 直到最近, 案件即將正提開審, 我又三催四請的; 雙方的差距才收窄, 上星期尾還費盡了唇舌, 真係說到牙血都出埋, 才撫平了客戶的心情, 接納了一筆其實已經不錯的金額.

老朽好多時都覺得, 做人呢, 有時唔好去得太盡. 或者你覺得自己好慘, 但客觀因素往往就是不會如你自己所願. 見這位客戶早前成個人落晒形, 一邊替他家人擔心, 一邊也替自己的案件擔心 - 因為如果未能和解, 而最後由法官聽審後得出的賠償額比對方的和解提議更低的話, 正式審訊時的雙方訟費是要由客戶支付, 或又賠償額中扣除. 那就會出現「水瓜打狗」 - 唔見一大截的情況, 到時受影響的不只是他一個人, 還有家中等他開飯的家人. 齊齊「食蕉」. 現幸而雙方終於可以和氣收場, 老朽都鬆o左口氣.

上面一段, 好似平鋪直敘, 大概吸引不起大家的興趣. 不過工作就係咁, 好多時沉悶得要命. 如果餐餐都係緊張刺激的話, 老朽一早心臟病發死了!

無常...

有一點點的不快. 不太因為工作.

這兩日都在法庭, 就因為上星期有提訊的案件卒之都要正堂審訊.

對面突然撤銷了法援, 最後該名我個人覺得相當蠱惑的巴藉人士在無律師的情況下自己上庭.

在這情況下, 原本我是可以申請即時暫緩案件, 因為對方可能會浪費我們的律師費. (連法援都唔 show 佢, 佢又無錢, 明顯係因佢隻 case 根本無可能贏我們) 在暫緩時, 要等待原告將部份或者全部我們的律師費先交付法庭以作 “保證金” 才可繼續. 此法為普通法內重要一環, 原意是保障被告人不會被無謂地浪費律師費 – 即 “畀人誣告, 但係贏o左都要蝕律師費” – 的情況發生.

但問題來了… 其實原意是好, 但根據普通法, 如果案件遭到暫緩, 那法庭就不可就案件作出任何判決, 包括訴訟費的判決. 亦即是就, 我們在暫緩的情況下, 不可以贏回我們的律師費, 也未能向法援取回未撤銷時的律師費.

就係因呢個原因, 我和大狀商討後, 決定不提出此項申請. 始終申請分分鐘仲衰過唔申請. 寧可等待真正判決時, 盡量向臨場 “無義氣” 抽身的法援署索償.

在開庭前, 大狀和老朽吹吹水, 講起大家的子女. 講講下去了談由懷孕到出生. 大家都覺得當中會有不少的神奇事會發生, 而當今醫學雖然相當昌明, 不過 – 有不少事是難以預計的.

這點老朽十分十分同意. 也聽過不少平時無事無幹, 健康得很的準媽媽, 腹中小朋友總會扭扭計, 還有些不幸在媽媽懷內已經走了. ><”

早幾天看報紙, 看到內地有個準媽媽, 因為和她的媽媽在購物時和人爭執, 被購物中心的人一腳踹中肚子, 下腹當場流血, 而小寶寶就這樣走了. 還有早兩個月一位香港的準媽媽, 在網上受了邀請, 去了另一個 “假” 準媽媽的家中, 後來被此精神有問題的假準媽媽刺了一刀, 雖然這媽媽無大礙, 緊急開刀取出的bb 至今也不知道還在否…

這又想起, 或者有朋友會想起十多年前有一件轟動一時的縱火慘案, 就是石峽尾匯豐銀行案, 當時一名以為自己太太紅杏出牆的莽夫帶著易燃液體到那分行找一位剛好不在銀行的職員質問, 當質問不成時就點著液體, 豈料意外打翻, 人人奪門而逃, 但當時銀行的密封設計, 加上電門在保安系統下自動鎖上, 櫃檯內13名職員只有一位因為在洗手間內而逃過大難. 燃燒出來的濃煙, 造成11屍12命慘劇 – 當中有一名是有三個月身孕的準媽媽. 至於那莽夫, 以我記憶, 事後因誤殺被判二十年的精神治療.

以前已經覺得這些事件很慘, 現在有小朋友, 更加覺得有時人生真係無常.

連作為有宗教信仰的我都會問一句, 神做了甚麼, 為何不阻止慘劇發生? 然而, 神賜給人的不只是現在的快樂, 更重要的是 -- 「平安」. 但或者, 今天我已談得太多, 或者留待下次有機會再詳談這些比較沉重的理論.

至於現在, 或者讓大家為所有未出生的 bb 祈禱, 希望上天照顧他們和各位準媽媽, 不論如何, 總有平安.

彰顯公義...

昨日老朽本來就好開心, 因為成功地贏了一位對頭了好多年的外國律師. 這位行家在行內已經頗為出名 - 出了臭名 - 因為每次對戰他都係 "無得傾" 之流. 而且每樣事都係自己留到最後一刻才做, 之後就會刁難其他人為何遲滯. 到法庭時態度又極其傲慢, 連法官和書記都不放在眼內, 但又處處小心, 他做事雖然 "癲"; 不過癲得來又 "無位你入", 對住佢真係又愛又恨.

老朽早在多年前在醫療法律界工作時已和此人對手, 當時已經有少少想 "一把火燒o左佢間律師樓" (當然係誇張其詞之說 - 看官萬勿將老朽當為暴力之輩). 今次仇人見面分外眼紅. 事關此人之客戶在一件極可能由他自己導致的交通意外中數度在警方面前更改口供, 並謂自己是巴藉人士不懂廣東話, 被警員誤導等. 而事實上據警方資料, 此人已經來港40年, 而且廣東話流利過你同我.

不知何解, 此人竟然可以取得法援署的援助, 一直到最近準備正式提審, 對方律師 (即對頭人) 才向法庭透露其實一直未有法援支持至正式審訊.

於是對方提出押後正審, 但昨日就被法官拒絕. 老朽初時當然高興, 故仲走了去灣仔某酒店享用大早餐乙份 (見圖)

慌你唔死, 法援今日更進一步在此最後關頭撤銷援助.

本來作為辯方, 待悉對方無法援是好事. 但此時其他所有方面已經如箭在弦不得不發, 突然撤銷援助, 將導致我們陣腳大亂 - 蓋因以上述案情, 基本上我們一定 "贏梗", 而堂費 (即雙方訟費) 則由輸掉一方全付. 但此原告財力相當不足 (不然最初就唔會批法援畀佢啦), 現在法援突然撤銷, 但法庭又已經明令排期正審 (仲係下星期喎!) 那往後的訴訟費用 (剩係延聘老牌大狀都十幾萬o架...) 又邊個畀呢? 難道由應該贏晒官司的保險公司客戶畀? 法援今次在太遲的階段才撤銷, 可否以懲罰的方式要求其付款又言之過早. 想到呢度, 加上昨晚女王無啦啦突然在家母監管下毫無原因地擦損眼角 (但係又唔痛, 亦無流血, 女王又無喊; 家母當時仲嚇到呆o左剩係識打電話畀我). 搞到老朽而家心中都幾煩...

乜公義係咁樣彰顯o架咩...? ><"

錢...

早兩天到一位相熟的大律師辦公室開會 (大律師或稱訟務律師, 因其業務主要是出庭抗辯為主, 並非因其特別「大」) , 見到以下一文, 以秀麗的行書書上和裱在牆上, 撮之為要:

錢,味甘,大熱,有毒. 偏能駐顏,采澤流潤,善療肌寒,解困厄之患,立驗.能利邦國,污賢達,畏清廉.貧者服之,以均平為良.如不均平,則泠熱相激,令人霍亂.其藥,採無時,採之非理則傷神.此既流行,能召神靈,通鬼氣.如積不散,則有水火盜賊之災生;如散不積,則飢寒困厄之患至.
一積一散謂之道,不以為珍謂之德,取予合宜謂之義,無求非分謂之禮,博施濟眾謂之仁,出不失期謂之信,入不妨已謂之智.以此七術精米煉,方可久而服之,令人長壽.若服之非理,則弱志傷神,切須忌之.

此為唐代張說先生所著之《錢本草》, 一看或以為是「得啖笑」, 久而啖此文, 會覺得其味甚豐...

錢, 不重要嗎? 一定不是, 而是對待舷態度要小心. 講得容易, 老實說, 我自己行起來也覺甚難... 因為老朽本身有多少「享樂型」, 有時真係 "使o左先算" o個隻...

但有錢唔使, 亦非正道, 最近外父無端惹了一個前列腺癌, 雖然尚算初期, 理應以手術可以根治, 不過醫返都嚇餐飽.

外父平日比較慳吝, 雖然未到孤寒那類, 但幾乎從不使錢去玩樂, 我在想, 今次一個病來, 大吉利是講句, 可能以後無咩機會四圍去玩, 儲埋咁多錢 (都應該唔會少的), 倒頭來可能還是無用.

... 以此理論, 我係咪應該去買返枝恨o左好耐o既 MP40 呢..... (MP40 為德國二戰手提機槍, 近兩年電動氣槍出了新版)

公平抑或公正 (第二回...)

估唔到又要寫多次呢篇.

早數月前為銀行出庭對住呢兩位茂四. 今日又再次被他們成功押後.

其實元凶唔係對面, 而係個官. 突然主動出擊的問一些對方無提出過的案情. 即時口啞... 法官大人, 你幾時變o左對面o既律師呢?

但無法子呀, 銀行事實是可能計漏了數. 法官都即時指出要由律師 (即老朽) 代為計數實對律師不公. 但對面兩位茂李之一就乘機寸寸哄, 仲不斷咁話老朽散o左庭一定o係出面吹口哨. 更無啦啦 "老作" 話銀行十幾年前曾應承佢會減佢利息云云... 明明之前問晒無抗辯要再加, 今日又提出此新奇 idea. 最慘係法官唔知食o左咩早餐, 竟然又批准佢提出新理由. 仲要銀行找一下當年有無人應承過咁話.

老朽自問是希望公平公正, 起碼都公正丫. 但係此人面目表面正常, 但一開口就得罪人. 老朽今次因為銀行計漏數, "形勢比人強", 唯有再次讓案件押後, 等銀行解畫. 不過我暗地裡已經決定, 如果此人日後輸掉 (幾乎係100%會輸的), 所按揭樓宇未及還債的話, 老朽必定會提請銀行考慮進行破產訴訟. 實行告到佢甩褲.

好老實說, 我真係好少咁燢, 但這樣賴皮的人, 點講都係離譜.

大家拭目以待, 我放長雙眼睇條 pk 點死...

法庭雜記... 公平抑或公正? (之一)

今日係其中一間銀行客戶一單 case 上庭的日子. 本案一再被押後，原因只因為對方欠債者不斷的以自己不是律師為由，一次又一次的推諉。

觀乎其言行舉止，不是律師但可以用法庭術語，而且存入的宣誓書 (即行內稱為「誓章」者) 雖以中文書成，其公正企理真令我輩狀師瞠目。相信其背後已有律師或律師行辦事的朋友教路。

第一次上庭已經是去年8-9 月的事，當時我一時好人，他們向我說想與銀行接洽還款，便覺得應給予他們機會。我以往也有這樣做而多數人也真的與銀行「講數」，更可以獲得利息寬減 (銀行唔係想整死債仔o既!)。不過好可惜，我今次，畀呢兩位老兄跣o左一o野。之後他們更用其他理由如申請法律援助 (大佬呀，你有兩層樓在手點法律援助呀！？咪玩啦！)，向法庭投訴銀行計數出現問題等等。 結果法官也無可奈何，為免自己被投訴，唯有不斷的畀 adjournment (押後)。以前做律師可以好威，而家？對住呢o的我們稱為 "in person" 的大哥大姐，真係俯首稱臣都來唔切。

基本上，我想講的，只有一個「頂」字。頂！