清醬味醂焗肉排

早兩星期六, 一時想不到煮甚麼, 想起之前曾經做過一道炸的一宇排做得不滿意, 於是想再做多次. 但去到街市時見到有些賣相很不錯的腩排, 便買了回家才算.

點知夫人話自己喉嚨有點不舒服 (夜睡喎! 但佢又無睇波, 真奇...) 所以炸不成了. 唯有做一道炆的. 但又不想太濃味, 所以便亂打亂撞的去試一次新東東, 不過試完後竟然覺得相當好味, 搞到一向不會將份量記下的我都要記下今次自己做過乜...

腩排斬大件 (手指咁長) 出水煎香; 之後再用薑蔥, 還有兩粒八角, 一小片桂皮來起鑊; 將腩排放回炒兩下後落料炆. 用的是 2-3湯匙的頂抽 (即雙璜頭抽), 2湯匙白砂糖, 1湯匙左右的花雕, 因為想有些甜酒味, 於是加入約 2 湯匙左右的味醂 (即係之前提過, 悅壽司老闆送的那些極品味醂) 再加水到面炆1小時, 之後熄火焗半小時, 再炆十多分鐘, 最後焗多十多分鐘就食得.



中西廚作烘或者炆都有個共通的 rule, 就是烘/炆完後要關上蓋蓋焗一會, 中廚沒有特別解釋原因, 只說是會 "林" 些. 但西廚說的就是 "redistribution of juice" 所以會更 tender. 而的確, 運用之妙在一心. 這些大道理是全世界通用的. 煮東西時不妨都參考一下...

心電圖

女王呢, 由出世時開始, 醫生都聽到話心臟有點雜音.

一般人聽到可能會有點驚, 而有醫學常識的人聽到或者會擔心是不是有機會有水漏呢?

老朽夫人就係驚呢樣, 所以女王出生無耐, 去政府健康院和去私家醫生診所打針時已經問有無需要去醫院詳細檢查. 所有醫生當時都話幾年之後應該會變回正常的.

不過早排去私家醫生取份用來證明健康的入學報告時, 女王首席醫官鄒醫生就說「我都覺得係 functional murmuring, 即係就算有雜聲都無事的, 不過兩年都仲咁明顯就少見些」.

一聽到, 老朽當然覺得無問題, 但夫人就騰晒雞, 過了幾天, 忍不住和老朽說, 不如叫我之前在醫院的舊同事找個兒科看看. 又或者照o下心電圖之類.

雖然我真係覺得無需要, 不過既然夫人如此擔心, 就順一下她. 打了個電話找舊同事. 他們說以前老朽的老友某院兒科阿一姐楊醫生已經退休去了環遊世界, 不過現任的阿頭蘇醫生「唔知點解」仲記得我, 於是為夫人安心, 而且仲有保險 cover 大半, 所以就用了他們新增的 "政府醫院私家病人計劃" 帶了女王去睇.

那老朽當然要帶女王去醫院, 當探舊朋友也好嘛!

身為香港兒科學院理事的蘇醫生極之好人 (雖然我真係唔記得幾時和她開會認識過...) 她說女王的心跳雖然多數無事, 不過真的比一般的 functional murmuring 來得大聲, 所以都親自帶我和女王去照心電圖和照超聲波, 老實說, 女王初時都好驚, 不過佢驚就係唔識反應, 成碌木咁, 所以醫生以為佢好乖... 但後來和醫生護士玩了一會後, 女王就熟晒仲笑晒... 倒真的未見過有人一路照心電圖一路笑o既...

嚇人相一幅:



一路照, 醫生都好細心, 仲同老朽講起當年的小小部分工作 (老朽這才記起幾時幫過他們手), 女王就差點睡著 - 因為照超聲波是要關燈醫生才看得準電腦屏幕o架嘛! 照完了, 女王仲問 - 貼o係肚臍o的貼紙呢!?!? (其實係 3M 的心電圖導電貼)

好快, 蘇醫生已經話 - 乜事都無, 唔使返來覆診喇!

即係話, normal, 無 diagnosis, 而無 diagnosis 的話, 好似 claim 唔到保險喎...!!! 呢幾千銀咪凍過水!?

突然有少少想問返夫人...「喂好似係你話要去睇o架咋喎可?」

極品世界杯小食之 - 雅支竹蒜蓉多士

又是意大利友人店子的出品.

去食意大利菜, 好多時都會有一款前菜小食 "Bruschetta", 是烘到極乾的麵包多士, 有時會加入香草, 而上面就會在食時加上用蕃茄, basil, 蒜茸和橄欖油制成的醬汁, 灑上少少鹽. 找來這網上照片參考一下:



不過今次看世界杯, 西班牙 vs 葡萄牙一場時, 吃的不是這個醬, 而是意大利北部近南法地區的一款 artichoke (雅枝竹) 蒜油醬.



不過呢款包, 如果用來睇波食的話, 一來要自己搽, 二來呢, 食多三幾塊呢, 就係幾 "un" 胃的. 只宜乎上半場食, 否則食完不久就睡覺, 消化不掉反而會不舒服... :P

極品世界杯小食之 - 香橙鴨胸

記得早陣子老朽弄了一條日式煮鴨胸嗎? 當時只是用了半件, 尚有半件, 一早想過弄個香橙鴨胸來吃.

之前電視節目「美女廚房」中, 有多次那些明星 model 等想在食物中加入橙味, 就成個橙或者切開放入去煮或者伴碟, 結果都變了垃圾味. 其實這不只是她們沒有下廚或留意廚房的運作, 而且她們根本無留意生活的細節, 大家都可能知道, 橙吃剩後, 好快會變成一陣垃圾的味, 就是橙中間那層皮 (白白地色那層) 作祟.

真正煮橙味的東西, 下的橙味不外這三樣: 橙汁, 橙青 (即最表面橙色的表皮碎), 還有橙酒.

鴨胸解凍後其實也不用醃, 就咁煎起了皮那邊等他出油後才加鹽和黑椒粉, 之後就是落橙青 (可以用 "狗牙刀" 或者磨茸刀即時刨下去), 之後就是橙汁 (半個可矣), 待汁收一收的時候就可以落橙酒, 還可以將煎 pan 打斜「放火」.

鴨胸不用太熟, 少少粉紅就最好. 不過我整呢味那晚就是德國對澳洲的世界杯小組賽. 就為了擺得靚, 身為德國躉的我錯失了兩球德國入球!





食鴨胸, 不論是煙燻即食或者煮的那些, 都可以配些甜醃紅洋蔥茸. 對味得很. 我是在意大利雜貨店 Il Bel Paese 找 Massimo 買的, 認識他十年了, 由第一間小店到現在六七間分店, 賣的都是高檔的意大利和南歐雜貨凍肉紅酒等, 是他教曉我飲意大利 tuscany 和 chianti 酒的. 可惜, 意大利今次世杯提早出局, 呢兩星期都唔敢找 Massimo 住...!

紙包雞包紙包包包紙雞包紙包紙包雞包包包紙包雞

好多個月前, 看祖師爺的《食經》讀到有 "紙包雞". 是廣州民園酒家當年名菜. 用來包雞的紙, 查實是吸滿油的玉扣紙. 包好已有味的雞件後炸熟便成. 而之前看《麥兜》當中麥太搞笑版, 教「煮」的就是這個東東.

一直無人講過紙包雞經此一炸, 應是脆皮還是不脆, 因為油經過包裹後是不會弄脆東西的, 原因是油炸時要一邊炸一邊接觸適度的空氣才會使食物水份抽走.

自己貪玩的弄了一次, 味道甚為不俗, 就只是用生抽薑蔥酒等下味, 醃好後包來炸. 不過炸好後雞件是對味的, 就是不脆, 但滑得很, 也有油香.



一直都忘了自己弄過這一味, 但又以為自己弄錯了, 所以一直藏拙; 早幾星期讀到有文章提起, 才知原來的確是滑和香, 但不會脆的, 這才放下心頭大石, 夠膽再在此班門弄斧.

不過如果有師兄做過這雞而又可以做到皮脆的話, 有勞不吝賜教. 因為連呢個效果都做到的話, 那這雞就真是完美了... (不過, 咁同炸子雞有咩分別? 用張紙包起來是不是就是不想它太脆呢o下...?)

收信呀~!

這兩星期公司突然多了好多新的 case. 忙到差點喘不過氣. 不過忙都好, 起碼年尾應該不用怕要 "撲水/file" 來交數給大老闆. 同老闆們熟是一回事, 但交數呢碼事, 他們是十分認真的. 唯有這數個月辛苦一點, 不用到時太擔心好了.

這數星期好多天都好熱o下. 而大熱天時仲要跑去郵局 (話近不近又不太遠, 但要行廿多分鐘...) 原因就是收到通知要收一封掛號郵件, 而剛好郵差來派信時女王保姆正替女王洗澡, 無暇開門, 郵差以為無人就走了.

相信大家都有試過收掛號信, 又或者小包裹之類. 當然有不少也試過派不成, 之後信箱收到一張卡, 要去郵局 "換領" 的經驗.



這個經驗, 是個很特別的心情. 因為郵局從來不會, 也不能先告訴你那郵件是甚麼, 連形狀也不可以. 於是收的時候就有一個期待的心.

今天老朽就是拿著這樣的一張卡, 跑到郵局去取件. 之前試過收到才知原來 "只是" 銀行寄來了替換舊卡用的信用卡. 這回搞了半天, 職員把一份小枕頭大小的東西交給我. 看見一眼才見是加拿大的一位老友寄來的. 心中感激 + 感動之餘倒有點大概知道是甚麼了.



之前加拿大冬季奧運會, 老朽一直想找一件紀念的 tee 呀之類. 雖然老朽沒去到溫哥華, 但卻 "跟足全程" (電視), 所以也希望多件衫. 而另一方面, 大細妹 O-雲已說為我找來了一件義工領袖的衣服, 今次的是一件衫, 意想不到的, 是老友也記住女王了. 送來一套四隻的冬奧吉祥物給女王玩的...



看來女王都有排多玩具了... ^^"

脆皮東星柳

好耐無煮西餐了. 之前看過一套 Eating Under the Sun, 是英國一位名主持人 Nadia Sawalha 四出讓世界的三星廚師們出難題, 要她煮出一些這些名廚在渡假時在世界某地吃過的難忘菜式; 而在最後一集中, 她就去了意大利的 Florence, 由英國為女王煮 souffle 煮到頒 OBE 的 Michel Roux 出題, 其中一道他喜歡的菜式就是油封乳鴿, 而吸引我的就是那美麗的擺盤和配菜 - 一隻肥大的荷蘭種茄子 aubergine. 用了其中最肥的一個 chunk 用來墊起了主菜後, 另外一些配菜就墊在開邊的另一半茄子上. 好靚, 也好吃.

在 citysuper 就找到了這款的茄子, 貴就貴了點, 要廿元一隻; 不過詳見下文便知值得.

早幾個星期天, 老朽為了女王有魚肉可吃, 就買了些 chilled 的東星斑魚柳, 那順理成章大家都吃魚, 另外有一隻雞髀就簡單地加上香草和橄欖油入焗爐烤來吃. 再買了那隻 augergine 茄子, 一小條 zucchini 和一隻薯仔.

那魚柳上了點點味和撲了粉後就煎起了來做主菜; 而女王和夫人又愛吃薯仔, 所以切了細丁加鹽加 rosemary 烤了一些, 最後決定放另一邊的茄子上. 汁就用了青檸榨汁加上糖漿煮個 caramelized 的 sauce 出來, 再灑些新鮮 parsley 碎 (用了來烤茄子剩下的)



都不過不失吧... :) 而那茄子, 是加點鹽和橄欖油入焗爐高火焗熟的. 吃下去到中心位, 竟然帶一些像吃糖蕃薯的甜味, 女王直頭食完再食, 仲愛吃多過食石斑. 難怪咁貴都仲賣了這麼久!

父親節 2010

不知道之前有沒有在此提過, 夫人在生女王之前, 可能因為 "基因突變" (!) - 其實係荷爾蒙影響, 無端端多了個粉瘤症候; 當時找了醫生用 i&d (incision & drainage) 的方式清了基本發炎的部份就算了. 因為不想帶住女王開刀.

不幸地那個未清晒的粉瘤, 早兩星期又再出現, 煩擾著夫人, 又再發炎, 搞到像隻鵪鶉蛋的大小; 所以最後 "的起心肝", 走去開刀. 就在父親節前夕. 查實是好小的手術, 不過一來夫人一向 "蛇瓜", 二來老朽也正好乘機放假小休; 故便也請了假, 也叫了鐘點姐姐 & 女王麻麻及婆婆湊著女王, 我就陪著夫人去醫院.

既然有保險 cover, 當然揀了港島最 "方便" 的養和. 他們裝修後每張床都多了部「電視+電腦二合一」; 老朽就在夫人入了手術室時用來上網和看高清台. 都好方便, 不過好似打不到中文... -.-




而因為夫人做手術後一天避免舟車勞頓; 而老朽也一早希望為身為佛教弟子老父煮一餐素菜, 所以便有了這套 "素宴 2010" 的出現.

首先是頭盤:

涼菜五味
甜: 糖醃紅茄 - 是用糖粉和糖霜來醃日本蕃茄, 記得先浸一下熱水去皮才入雪櫃, 最後食前才用篩放下糖霜
酸: 胡瓜福神漬 - 之前提過的一樣, 但就不用酒或味醂 (全素), 醋的比例加多點點才夠酸
苦: 冰鎮涼瓜 - 用了台灣白玉涼瓜, 切開去籽後先飛水, 放涼後再用糖, 麻油和梅粉醃
辣: 辣子蘿蔔 - 用的是日本大根, 切丁後都係用鹽醃一會出水, 再用汕頭白醋開同等份量的糖; 放入蘿蔔丁後加進約十顆開邊的乾辣椒仔
鹹: 鹽鹵豆干絲 - 豆干買回來後切幼絲, 飛一下鹽水後放涼入雪櫃, 食前再加入少少台式蔭油膏和麻油撈勻

後面的是糖醋素脆鱔 (之前講過了) 和素湯的湯料, 是北菰合掌瓜燉野生竹笙; 之前完全未試過做素湯, 結果竟然好香好清, 仲用了部份來做埋芡的湯底:



寶蓮踏雪 (口磨甘荀馬蹄西芹玉蘭生菜包配炸米粉底) - 就是炒粒粒了, 不過用了網皮炸個「兜」; 美觀好多:



法海蒲團 (一品冬瓜會髮菜生根) - 其實法海蒲團是有兩款做法, 另一款就是用腐皮包起素料紅燒來做那蒲團; 今次是用上湯蒸冬瓜件, 再用蒸冬瓜出來的湯加入素蠔油去炆髮菜和生根球, 最後埋芡後再蒸一會便可:



登極浮屠 (鮑魚菇扒白玉茄) - 用的是素蠔油芡, 白玉茄切件炸熟後砌成塔型, 取其漢白玉浮屠的意思:



明珠寶盒 (紅燒蘿蔔釀芋盒) - 就是炸芋盒了, 是將江獻珠前輩的 "帶子芋盒" 變了素食版; 就是一早用上湯底加入素蠔油, 糖等料煮成汁, 慢火將切好的蘿蔔丁 (有挖球匙的話更好, 不過既是食素, 就隨喜算了) 炆到變透明, 再釀入芋盒炸熟:



無量舍利 (馬六甲西米) - 煮西米其實都幾考工夫, 要以「凝結但用匙一畢就鬆」才合格; 煮的時候一過火即刻變成一 pat pat; 好在記起好耐之前在「喜宴」請教過當時仲未好出名的 jacky yu; 他說煮十分鐘後見到西米慢慢變大半透明, 之後熄火焗三四個字到透明就可以過冷河入模; 果然好掂. 配椰漿和熱水座到變稠的椰棕糖食:



不過另外就是因為夫人術後醫生建議幾天不要抱女王, 所以老朽今個父親節的節目就係照顧佢兩個... =.=

牛油果入饌 - Guacamole

一向都一分喜愛食牛油果 (鰐梨/鱷梨/油梨); 用來配雞或鴨來做沙律, 又或者用來放麵包都十分好吃; 不過買時見未夠軟身就要等餐飽才有得食. 價格也不算貴, 十元八塊食兩餐都得. (雖然在產地 (墨西哥/印尼等地) 只賣港幣約 10 元已經一斤!)

牛油果其中一個產地是南美的墨西哥. 而他們有一個吃法就是將牛油果弄成半醬半細粒, 加入橄欖油, 蕃茄, 辣椒碎和蒜頭/洋蔥/香草(份量個人喜好啦, 不過香草不要多), , 最後灑點點海鹽或者岩鹽混起來吃, 叫做 guacamole. 用來做 taco 或者麵包的沾醬簡直一流. (香港有時買不到墨西哥的香草, 也不是個個愛吃其中的一款孜然粉, 所以有時用歐芹 (parsley) 和少少 basil/rosemary 算了)

今次做的時候加入了一點點罐頭蟹肉; 最好用來點 plain 的 taco 又或者 nachos:



要美觀的話就可以落模 (今次用了四方形模), 模面要塗少少橄欖油以免黐住脫不了模. 但橄欖油不可以太多 (不論是加入去撈或者塗模內的也是), 因為橄欖油都好香, 太多會太膩, 也會蓋過牛油果的香味.

因為想給女王試一下用來塗麵包, 所以今次無加辣椒. 女王食到唔夠食鬼殺咁嘈... 係咁要多o的麵包.

苦瓜與 pizza...

上星期東亞運的一班嘩鬼義工頭又出來聚會, 今次是將任爸爸的 "百萬圓桌" 愛德華王子的牛一.

今次又是找來他太太 "欺騙" 他去另一個飯局, 而今次我們的地點就去了 pizza hut; 才知道原來他們也有生日 party 的. 仲有得自己 "整 pizza" - 就是在已塗上茄醬的餅底放上 pizza 料, 不過別妄想可以 "要幾多放幾多", 是有份量限制的, 他們說「放得太多, pizza 底會唔熟o既」. 流定堅無從稽考.

因為夫人想讀o下書準備考政府的試 (轉唔到工都想玩o下喎...), 那天不去了, 但老朽又想女王出去玩玩, 仲要試多點那支新鏡頭呢! 所以最後決定 "單刀" 帶女王出去.

成功到著後, 發現原來 pizza hut 的生日會都幾得意. 是像 "包場" 後叫東西吃, 和可以整幾個 pizza; 不過整 pizza 就比較 "行貨": 是兩個已經搓好發好仲壓好的麵團, 連茄醬都落好, 仲加個圈圈用來圍起個邊不會沾到餡料的. 大家就是將已分配的餡放上面, 低能得很, 卻又好好玩. 因為簡單, 連女王都玩埋一份. (鳴謝東亞運義工頭「怒el」幫手抱住女王, 女王又肯跟人喎!)



但當問道可不可以加多點料時, 他們的回覆是: 加多點就會使個餅底唔熟o架喇!

呢個理由到現在我都說服不到自己去信, 頂底火的話點會唔熟得o架, 咪玩野啦...

anyway, 我都知道 pizza 餡係有一定的份量, 太多是不好吃的, 呢個是多年前拜讀蔡瀾先生大作時得知. 後來去意大利旅行時問過店子的人, 都說是太多不好味.

當然, 食返大家「有份整」的 pizza 外仲有其他 order 的東西了... 不過食完呢個 "下午茶" 後夜晚真係唔使食飯.



另外, 呢兩天"天口燢", 我們弄了苦瓜湯, 可能是苦瓜煲後不太大味, 女王竟然鍾意食喎! 同埋呢幾星期女王的應對無啦啦有極大進步, 除發音有不準和有時倒轉來說外 (「爸b唔要食」變成「唔要爸b食」), 好多時都有問有答, 答得仲好得意, 笑鬼死我地...

「有味橄欖油」 - infused olive oil

很久之前, 已經在網上和不同的店子內見過有人將橄欖油加入不同的香料味道, 一直都想試, 因為見到到靚, 所以以為好複雜. 在網上見過製法, 一般都是用新鮮的香草浸入橄欖油, 因為橄欖油不能長時間高溫去煮; 不過因為新鮮香草有少少水份, 所以只能放一個多星期, 之後慢慢就一樣會變壞. 呢個稱之為 「生浸」.

最近看電視的 discovery travel & living, 見到另一集的 take home chef 澳洲型仔廚師 Curtis Stone (之前整士多啤梨 flambee 也是他的點子) 又整了一支 infused oil 去畀 "客仔" 點包食. 做法是將喜歡的香草切碎, 放入橄欖油中慢慢熬熱出味, 但不可以變成滾油 (因為之前有另外的電視節目話橄欖油滾起的話會釋出毒素, 而且又無理由變了 "炸香草" o卦?). 放涼便可. 入瓶後可以放十多天. 此為「熟浸」.

最後一款做法是網上看外國的網頁學的, 就是用全乾的香草, 要全支的話就要自己用 "food dehydrator" 去弄乾. 之後再浸呢就浸幾天後用得, 可以放好耐. 此法稱為「乾浸」.

不論是何種方法, 得出的油, 會自然有淡淡的香草味 (多數用蒜和 rosemary, 有時也會用 basil); 但不會太濃 (要濃o既不如用返成支香草煮送好過啦...) 除點麵包外, 撈 pasta 也是不錯的.

早幾星期是細細妹生日, 老朽就決定整兩支, 送一支給她當禮物. 最後老朽 mix 了 "熟浸" 和 "乾浸" 的技巧, 因為可以買到現成的乾辣椒和蒜, 也會用一點乾的 rosemary 碎加入去; 但為美觀, 也會放兩支新鮮的去煮, 和放其中一支入瓶.



煮好後原來都要放好久才會涼下來; 之後便是入瓶了. 就似外國超市買到的一樣, 會放入香草一支在中間.



但係, 煮完之後呢, saucepan 中尚有香草和油在底, 為求「環保」, 故唯有...



用返隻鑊炒兩隻蛋當宵夜咪得囉!

新裝修, 舊招牌

公司大裝修和搬房已經全部完成, 連個新的大書櫃都入埋房了, 以後放 file 多點地方, 最緊要係, 大櫃都有門, 唔似書架咁, 一亂少少就畀人 (尤其係比較愛靚的好友老闆) 指住來話... :)

在好友老闆爭取下, 房中加設了射燈, 除了光猛不少外, 對於我呢種 classic 人都覺得比較似律師的房間. 之後可以在房見客 (尤其係證婚的客, 一對對的上來) 都不會覺得太樣衰... (不過呢, 始終房都係稍細, 可以的話都會用返會議室, 再加上... 而家客人坐在前面時會被遮住塊面, 詳見下述)



正在物色一幅字或畫, 最好是有點輕鬆的禪意的, 之前都有提過想找蔡生或萬荷堂主幫手, 但暫時都未有定案.

另外就係自費為慶祝搬屋搬廠搬寫字樓, 買了個 Philips 22" 16:10 的 professional mon. 雖然唔係 同 "執相 pro mon" EIZO 一樣用 IPS panel, 但係質素已經好高, 用了 spyder 執色後睇相都會好靚.



當然, 就係因為呢個 mon 太大, 遮住了坐我前面的客人... 哈哈哈哈...

為甚麼要證婚

講明先, 呢篇 entry 都幾長o架o下! :P

不是問大家為什麼要找律師證婚, 而是從老朽的角度, 看看我, 又或者一個律師為什麼要幫人證婚.

首先, 當然是金錢, 律師都係人, 律師都要開飯. 呢句係一定o既事實, 話唔係就一定係呃你o既. 不過因為要湊女王, 又不忍心星期六日丟下夫人自己看管, 所以我接證婚的 job 不多, 不少都推給行家了.

但普通一個律師, 為公司辦事的話, 每小時收費 (公司數, 並非自己收) 由二千多到三四千不等, 證婚收的價錢, 整個 package 一般也是由二千多到四千左右, 又要開會見新人又要出差行來行去仲要等餐飽o既 (有幾多對新人真係準時得o架...唔通下下子要收人 OT 錢咩, 自己結婚時咪又係遲晒開席...!), 加起來兩三小時的總工作時間. 而且證婚多數是晚上或辦公時間之外. 這條數, 不化算.

不過說回來, 不少律師都覺得證婚 "無咩風險", 工作上較輕鬆, 所以即使收得比其他 case 來平也值得的.

老朽一向喜歡 "當官" 的感覺, 覺得為新人證婚, 就像是一個 "官定" 的角色, 也是莊嚴的一個角色 - 縱然這角色好多時都有輕鬆的一面. 但不少人, 也有時會有些新人, 覺得證婚律師只不過是他們婚禮中的一個 "服務提供者", 有些行家也是這樣想的. 也有新人認為我們的服務不過爾爾. 還不是 routine 的講兩句, 聽誓詞, 簽個字之後收錢走人.

對不起, 老朽不是這樣想.

當然, 我們提供的, 的確是「服務」; 然而, 婚姻和婚禮是莊嚴神聖的, 就在新人簽字一刻, 法律上他們連在一起, 一聲 "合法夫妻" 就是他們日後生活在一起的憑證. 有資格說出這話的, 是一個由法律和政府制度認可的人物, 不是在商場內又或者在街邊找到的服務可能比擬的. 因此, 老朽雖然在證婚時也會有一兩個 "gag 位", 但對那些每次也說著相同 gag 或者爛到爆的那些 (例如簽字時 "望o下隔鄰那個係咪自己o個個先, 唔好認錯呀, 簽o左咁就一世o架喇!"), 老朽就覺得好反感. 這些話不是不可以說, 但不應是出自正在監禮中的律師口中. 平日係點無所謂, 但由開始說出「o係兩位未結為夫婦之前, 本人o係職責上...」一刻起, 監禮的律師就是莊嚴的官方代表, 可以輕鬆, 但我覺得, 絕不可以輕佻.

又有些新人有時會提出一些比較少見, 又或者特別的要求. 因為他們覺得, 新人是 "服務使用者", 當然有權叫 "服務提供者" 作出任何他們認為合理的服務. 最常見的就是要事先見律師才決定是否找他.

老朽對此不反感, 因為見一面, 知道要找的律師口才和態度, 是合情理的.

但有時, 見到面後, 新人就會問老朽好多有關整個程序的問題, 試過一問便是一小時, 老朽亦清清楚楚的解釋了各項程序和要留意的事, 還加了少少以前幫朋友做 wedding planner 所學到的東西. 老朽之前已說過, 答問題可以, 但希望不要在未 confirm 前由過大禮問到三朝回門的所有程序. 用了這麼多時間, 新人卻說「我地考慮一下再找你」當然, 之後就去如黃鶴了.

又試過有一對新人, 在問了老朽的價錢後, 相當不禮貌地說「點解你覺得自己可以收呢個價」.

係呀, 我一般來說, 我的價錢和最當紅的那幾位行家, 相差無幾. 但遇有經濟能力真的不佳的, 又或者真係好友推介的, 老朽在不影響公司情況下打個折, 時常都有.

但另一方面, 律師會規定, 不能說自己比其他律師的工作來得好. 所以老朽只可以回答說「我覺得我的工作係值呢個價, 我包o左 abcde, 而且我不會 "走場", 即一晚做幾對新人...」 之後那對新人就沒有找我了. 老實說, 我也不想幫這對新人, 如果你想找平的律師, 坊間大把. 我自己知自己的定位, 和可能是 "較貼身" 的 service, 也包括了 wedding consultancy, 因為我當年曾經幫過幾十對新人做 wedding planner, 有時還幫人影埋結婚相. 你們找我還和我傾了這麼久, 就是覺得我可以幫到你們. 如果你覺得我的 service 夠好還要問這問題, 那你就算最後願意付這個價錢, 老朽也不希望見到你黑口黑面的. 我寧可不接這生意.

結婚是開心事, 但好多香港人搞結婚搞到面燶燶的, 連老朽自己當時都係一樣, 還差點因為兩邊老人家一些不必要的堅持搞到結唔成. 我就係知道呢點, 好希望以過來人的身份多點幫新人. 因此我的 "服務" 一向都包埋所有有關婚禮籌備的 consultancy service, 呢點相信全香港千幾二千個監禮律師都係得我一個做到喇o卦. :P

不少朋友或找老朽證婚的都說老朽用的十多款誓詞「幾特別」, 其實說穿了還不是加入一些教會的元素, 希望新人多點浪漫, 也多點承諾.

老朽特別推荐新人用的誓詞是這樣的:

「我請在場各人見證, 我xxx, 願以你xxx 為我合法妻子；並許諾從今以後，無論環境順逆，疾病健康，我將永遠愛慕尊重你，終生不渝。」

這是老朽和夫人當年在教堂行禮時用的誓詞。

每次為新人證婚監禮, 就像自己經歷多一次當日自己在天主前宣誓一樣. 也重溫一次. 每次一聽到, 都暖在心頭. 因此, 我十分感謝天主給了我這機會去 refresh 自己對夫人作出過的承諾.

可能, 呢個先係老朽喜歡為人證婚的最主要原因...

想起這些, 也說了不少廢話, 就因為上星期為好友的弟弟證婚, 禮成後新娘的爸爸媽媽走過來捉實我的手, 說老朽在禮成前的一小段話說中了他們的心聲 (每次證婚我都會即場想起一些合那對新人的說話, 老實說連我自己事前都唔知會講咩)



ps: 證婚律師多數都不會留下食飯的. 但上星期好友那餐因為太多高記師兄弟了, 盛情難卻 (我除o左超特價仲做足禮o架!) 單尾的叉燒蔥油撈麵勁正! 好少可去飲有呢樣野食的... :P

花雕蛋白菜式對聯 「半步麒麟踏醉湖, 一樹梨花壓海棠」

食得煎炸東西多, 有時總會來些清淡的.



先用三隻蛋, 只用蛋白, 加入雞湯 (蛋白:湯大約係 2或3:1)和雞油 (有的話), 打勻 (不要打到起大泡)之後加上保鮮紙, 中火 (和一般大火蒸的菜式不同) 蒸 5 分鐘左右; 另外蒸好星斑柳 (厚切的, 可在 citysuper 或 great 等地買到) (連皮); 放上蒸好的蛋白面, 加上少少已經 "過火" 的花雕便成事.

至於 「下聯」:「一樹梨花壓海棠」 , 就係花雕雞油蛋白蒸松葉蟹腳, 耍先將蟹腳蒸至半熟, 之後將大半蛋白蒸好後, 就將蟹腳加入蟹水和餘下蛋白及湯一起蒸至熟, 而蒸蛋白的做法和之前提過一樣, 才不會弄散本身極滑的蛋白得來又會使蛋白有蟹味. 最後排盤上碟時贊上一點點熱花雕和蔥花. 不過我今次用的碟太小了點, 排蟹腳時 "虛白位" 不足, 而且蟹水因為貪心之故, 用得太多, 導致整碟成品尚有點未蒸得夠身, 和構圖不夠美觀.



不過食味是相當好的. 而整副不工整, 不過好玩好食的對聯就成為:

半步麒麟踏醉湖
一樹梨花壓海棠

日式汁燒鴨胸

想煮鴨已經很耐, 但都一直無機會找到好的鴨件/鴨胸. 最後都係 "的" 起心肝, 買了件貴價貨 rougie.

做法是簡單到無止的, 因為鴨皮極多油, 所以用皮那邊白鑊煎一分鐘左右, 再反另一邊煎. 煎完就拎去放落汁底之中. 至於個汁呢, 就係簡單o既 "醬油:清酒(料理酒):糖", 比例大約係 2:1:1.5. 其實還可以落少少味醂的. 個汁不用太多, 剛蓋過鴨件面就成.

煮滾後放入鴨件, 中慢火 8 分鐘左右已經 ok 了. 之後將鴨胸取出切片, 同時間開大個火, 個汁自然幾分鐘後會收稠, 淋回鴨胸上就已經食得了.

整道菜太簡單, 無技巧可言 (所以本篇 blog entry 好短), 唯一就是 "以本傷人", 因為法國或匈牙利的鴨胸雖然比內地貨貴得多, 但真的比較好食, 質感不太硬之餘亦不會太大陣鴨臊味.

食時可以加少少芥醬. 而我就再加點日本的海草沙律伴碟. 可以下飯又或者用來送酒都相當唔錯. 整的時間短, 直頭可以世界盃時一路睇住食呀!