學校旅行x2

不經不覺, 原來已經兩星期無寫這裡兩星期了. 

真係太忙, 公司又忙, 屋企又忙, 而且女王有的音樂和英文班又一係考試一係就有些小比賽.  真係多野到PK.

還有就係學校的旅行, 原本是定在11月尾的, 仲要錢都畀埋, 那天夫人請不到假, 又不想我一條友帶女王, 所以請了母親大人, 即係麻麻, 同埋「打自己工」的姑姐當天一起去.  點知就係去到出發那天早上, 落雨落到音樂農莊水浸, 去不成.  仲要係臨出門口才收到學校老師打來說場地通知去不成.  更抵死的就係已繳付的旅遊車費不設回水, 成90蚊一位架大佬...

仲有仲有, 因為一直都覺得旅行食來食去都係三文治同雞翼, 簡係係折磨加沉悶, 所以我和女王一起弄了好些美食, 計有...

京醬蜜餞鴨絲青瓜比得包;
迷你熱狗;
磯燒帶子/鮑魚仔;
松葉蟹粟米沙律 (配melba toast); (由女王負責同我一起拆蟹肉同埋撈醬, 仲有加海苔架)
梅子車厘茄串.  (由女王加梅粉架)

那天早上就真係成屋都係野食了... 因為麻麻和姑姐都已經到我家, 所以最後都係決定.. 在家中食晒佢!

 

 

又過了一星期, 學校就來了一張通告,  就是旅行會改在下一星期三舉行, 即係12月5日. 

 

為避免重覆食物, 所以又諗左部份新野, 除了鮑魚仔和梅子車厘茄外, 就變成了...

 

香菰扎肉蛋絲法式三文治

三文魚茸魚子/雞肉沙律脆皮撻仔

荷蘭白蝦仔粟米露荀沙律

 

值得一提的是個撻仔我整多左十幾隻用來和女王一起請老師食的. 而撻皮係用左 Citysuper 現成的撻仔. 45元有十幾隻, 貴但係易用.

 

有時就係咁邪, 今次到我同夫人都去到喇, 點知呢... 都係有雨! 不過就唔算太大, 所以學校話照去喎. 但係就堅係凍, 大家都震震地.

 

去到音樂農莊, 雨時大時細, 不過好在之後慢慢都停左. 但係部分活動地點就積左水, 都係玩唔到. 不過玩到既幾樣好似踩高蹺, 巨型層層疊之類女王同同學就玩得好開心. 仲整左竹蜻蜓 同彩沙樽 (雖然個沙樽好快就亂晒籠)

 

 

都玩唔夠個半鐘又話食野了. 因為想搵埋老師, 所以我們專登去到最大的有蓋地方吃. 女王同夫人都吃得好開心, 好在佢地都覺得好食. 之後我同女王 (夫人要看住我們的物品) 就拎那盒整多左既撻仔去找老師, 剛好校長都在, 仲好.  正所謂雞髀打人牙骹軟丫嘛. 難保日後使唔使校長老師唔知幾時幫手架嘛, 當然, 仲要教女王尊師重道也是主要原因啦. 

 

 

當老師見到我們拎住野食來時, 有部份不知道去年我們做過小酥皮批的就會以為又係三文治之類. 但有幾位曾經吃過老朽手勢的就已經在估今年係食咩了.  他們一見到我的小撻仔, 已經覺得好得意, 仲用手機影相. 我估應該都幾好睇的. 而食亦係唔錯架 - 其實三文魚醬係在Citysuper買的. 至於雞沙律呢, 就係Mark & Spencer 出品. 我試過覺得正才用的.

 

食完又玩過, 不過今次就係私伙的吹泡泡, 仲要有老朽同女王今年的英文老師 - DANIEL (無錯, 係個男的, 仲要係大隻佬來架!) 一齊玩. 所以女王玩得更開心. 至於夫人, 呢個時候當然係去喳流灘, 幫手在旁影相, 影到夠鐘返歸算了.

朗誦比賽(二) - 女王的教室

承上文, 既然是去到 K2, 學校亦有安排可以自由參加一些朗誦比賽的話, 夫人就想何不借此機會讓女王玩玩, 又可以多張 cert, 一下唔覺意仲可能有個牌之類的.  老朽都覺得係時候讓女王接觸了. 所以就報了名.

因為我們遲了一點決定報名, 所以其實只有兩個多近三星期的練習時間, 但女王一天之內好快已經上口, 將那幾句的兒歌背得出來, 好快我也加入了動作, 而女王亦跟得好好. 三天之內已經可以見得人.  不過仍然未似是真正的朗誦. 

當時老朽想, 其實都差不多了. 所以只是 keep 住每天練幾次, 到後來離比賽只有半個星期, 女王就表演給也參加過不少次朗誦比賽的姑姐 (即係我個妹), 才由她發現女王的技巧應該讀得更似朗誦.  我驚起來上網睇下, youtube 的確有些朗誦的片段, 看起來亦真的和女王有少少分別.  另外, 又不知是否老朽太久沒有比賽, 竟然沒有教女王先要報題 - 這是校際必要做的.

當時因為只有三天就比賽了, 只有硬著頭皮, 教得幾多就幾多, 又唔敢谷得太勁; 否則到時發台瘟又有反效果.

比賽是在一間藝術書院舉行的, 分了好多組, 似乎都幾多人參加的. 女王呢組都好多人, 三十人左右.  當中仲有一位係女王去年的同學添.

比賽倒是順利, 我見到不少人原來是背得不熟, 又或者掛住去記而忘了要自然流露的; 當然有些就直頭係戰鬥格, 一睇就知你久經訓練又或者係天生異稟的, 不過女王就中規中矩啦. 所有都好自然, 不過呢... 竟然臨開始前佢「打思噎」呀...! ><  一路都無咩事, 竟然就係最尾一句時就窒左一下.  當然 -- 佢亦都係無報題.  但係女王好輕鬆, 好自然的感覺, 我都覺得好神奇. 

好了, 最尾是評判老師給少少意見, 第一樣就係... 「好多小朋友都無報題喎」我就知... 弊...!

不過, 之後評判問各位家長教得辛唔辛苦時, 竟然絕大部分家長都話原來好難教.

這個是我意料之外的, 因為我一直都以為唸幾句野, 有幾難呀... 女王都係一天上口啦.  原來, 呢個只係我好彩呢!

當然, 最後都係最想知的就係結果. 當然, 如我所料, 女王沒有冠亞季, 三名優異獎呢, 都係無份, 但係當我轉頭找返分紙, 再對一對樓下優異獎的分數時, 我就真係耷心口了...

女王因為都算高分, 所以都有個「豬肉獎」仲有個牌, 我一看... 女王係85.3分, 優異獎那位同學係85.5分...

0.2 分... 如果我教女王報題, 又或者唔係咁o岩打噎的話, 應該優異獎就已經係囊中物了...

不過, 有時真係整定的.  我見女王都有興趣, 我諗都真係可以幫佢繼續 develop 一下.  但又唔想畀咩壓力佢.  真係頭都大.

但講開又講, 女王係好有興趣溜冰的, 但係佢的動作學得比較慢, 好多時唔肯放膽去試, 溜半呎又轉腳, 似「行冰」多過似「溜冰」, 雖然教練話佢好少跌但係亦即代表佢太「穩陣」了.

朗誦比賽 (一) - 老朽小時候

老朽的父親在我小時, 大約是幼稚園時吧, 就有給我在學校參加校內的比賽, 最初就只是兒歌比賽, 不知是否參加人數少, 總有個第二三的獎牌的. 

後來到了小學一年級, 某天我在教育電視 (當時也是在英文店播的, 我好細個時已經見到有得做, 有時我爺爺已經給我看一些一件級的) 見到有人唸書唸到好得意 (當時不知道係朗誦), 之後就問過也有唸下詩的父親, 說這是唸詩云云. 

後來學校課程中有一課新詩, 好像叫做《盪鞦韆》的, 碰巧老師叫了我去讀, 不知道是否鬼拍後尾枕, 我便嘗試用我在電視見到的方法去唸了.

當時我記得住班同學都以為我是個怪物, 因為我讀書的方法太怪了. 高低聲線, 抑揚頓挫, 懶有感情的, 我自己讀完, 自己都覺得太怪了點. 而同學都在竊竊私語取笑我. 我還站著, 當時小小的臉蛋開始發熱發紅; 卻聽到老師說「這個就是讀這詩應有的方法，這叫做「朗誦」」仲問我邊度學返來, 我就說是電視和父親教的.  後來老師不知何時就在放學時「抓」了我父母問左幾樣野, 就這樣, 改變了我整個在高記的時代, 更差不多改變了我一生.

首先是在十月時說十一月會有個 "Speech Day", 就是畢業典禮, 話說各傳統的中學每年的「士必除低」都會請個猛人呀, 勁既校友之類來做嘉賓的. 那一年就請了當時還叫做市政局的主席, 張有興太平紳士, 而每年學校都會找個小朋友來送份禮物給那嘉賓 (我那年係隻銀碟), 我小一那年就是找了我. 

找上我的原因是因為我英文成績不錯 (老豆由幼稚園開始訓練之故), 個樣又幾可愛 (當年呀下...)  但原來有個 task 就係要送銀碟時講一段英文, 大意是多謝張主席大駕光臨, 謹此代表學校送上小禮物, 祈為笑納; 並希望主席不介意為本校師生訓勉和送上一天的假期. 

其他野都明, 而學校每年 speech day後都的確係有一天假期的; 但點解要個嘉賓送一天假期就真係一個謎了.

那次經過一個月的地獄式訓練後 (梗係啦, 一年班鬼識咁多英文咩), 出來效果按後來做了小學校長 (兼後來在東亞運義工時做了我「組女」呀!) 的那位老師說, 相當不錯.  亦因為咁, 她徵詢了家父後便選了我入學校的朗誦隊, 負責中英新詩獨誦; 而家父也相當鼓勵我參加不同的校內外朗誦比賽, 包括校際朗誦節.

當年是沒有話用這些比賽來入學校的, 因此家父的目的純粹是希望我多參與外面世界的比賽來訓練公開說話的膽識和技巧, 回想起來, 大概家父一早已覺得我係出來用把口搵食的人吧...

比賽把我訓練得大膽, 但同時校內差不多所向披靡 (因為老朽曾參加小學校內中英朗誦加鋼琴比賽, 竟然意外地三項都取得冠軍, 一年就一冠一亞一季, 導致學校改了例, 指明每位學生只可以參加最多兩項賽事), 和多次的校外公開賽勝利 (雖然遺憾地從未為校在校際朗誦節最終的決勝時捧盃) 也使小老朽開始有「囂士」的感覺, 雖然家父多次提醒, 但小學時代的我又怎會知道呢. 不是到後來在外面被人寸返轉頭, 老朽都未知死. 

是朗誦讓我變得硬淨, 也是朗誦讓我變得謙卑, 因此, 我覺得讓女王也接觸朗誦, 是應該的.

台灣蔥油餅 vs 蔥餡餅

唔係講笑, 呢樣都係老朽有時出去工作做得好夜時的 comfort food 之一.

 

我估不少人都見過超市有隻「蔥烤餅」賣的. 就是少少似印度那款 Roti Canai又或者係台式抓餅那款, 係急凍的, 用易潔平底pan 一煎就食得. 仲可以自行加料例如加少少吞拿魚呀之類的上去.又或者加隻蛋同蔥花 (即係煎好塊餅, 之後再煎蔥花蛋, 打好蛋落鑊的時候再將塊餅蓋上去使其貼實).

 

早排某百貨超市做台灣食品節, 竟然又找到一款這樣的東東...

 

 

因為見到張相入面o的蔥係包在餡料的, 即係同一向的不同. 又唔係貴, 好似係35大洋6隻. 一試無妨. 

指明係慢火少油去煎的. 同 roti canai差不多. 每面煎三分鐘左右就變得好香, 不過側面會少少爆, 漏了一點蔥汁出來整黑個餅同隻鑊.  result 如下:

 

吃下去外脆內軟, 而且蔥花仲係半生的好香又有汁 (不過中間部分餅皮都少少未熟得透, 試過幾次不同火路都係咁 少少美中不足). 堅係抵吃的東西.  不過不知道平時邊度有得賣了...

堅揪無比的喜帖

相信大家都收過不少不同形式的喜帖吧?  當中大部分在飲宴後你都會丟棄的, 因為真係無咩好 keep.  而又有幾多係你會留下的呢? 相信無咩幾張.

老朽收過的帖之中, 之前是有兩張是我一定會 keep住的. 一張就是一位中學同學所發出的, 他是個創作人, 又是廣告設計創意總監 Creative DIrector. 更是個戲劇界的活躍份子, 他的家族又是開紙行的, 所以呢, 就設計了一張超巨型 Poster 出來, 這 poster簡直就是一張電影海報來的, 同 泛藍的monotone作底, 拍攝背景是日本京都, 就是一對新人一邊牽手在街頭跑步回望的照片, 相片係故意「鬆郁朦」但又認得出是新人, 電影的上映日期當然就是新婚日子, 放映的 「電影院」就當然係擺酒的酒店和行禮的教堂, 之後其他林林總總資料都是寫到似電影開 show似的. 呢張係經典, 仲係用特製膠珠地海報紙精印, 看來成本都要成三四十元一張. 不過... 真係好大張, 要 keep都幾阻地方.

另一張就係我一位證婚認識的老友, 「著名新娘 blogger」阿雀 mcwin. 她和當時男友 (即係老公) 的DIT 技術係超人水平的. 見到真係以為係PRO 的製作架. 當中最窩心的是她每張帖都係自己製作和加工貼上閃石.  見到都覺得有 heart 的. 呢張又係我一路都keep住的喜帖來的.


半年前, 當剛知道夫人懷著那沒有來的二皇爺時, 老朽收到一位身在加拿大的超級老友「天蠍先生」的 facebook message. 說是在9月要結婚了. 

這位天蠍先生同老朽有幾老友呢... 他在老朽當年結婚時他是專程由加國飛回來做我兄弟, 而且又是兄弟中其中一位有幫人做 planner的經驗的老友, 我結得成婚, 天蠍先生功居首座. 

這下我可難為了... 因為到我決定飛還是不飛的時候, 就是我們剛失去二皇爺的那日子. 老朽當然知道, 用這向老友解釋, 老友一定明白的.  但人家紅事當頭, 又怎好意思去用這個理由推呢? 

想了好幾星期, 最後也是硬著頭皮向老友稟明來由; 當然, 老友係一點都不介意的, 但這反而加深了老朽的內疚.

時間好快又過了幾個月, 雖然老朽都係去不了加國 (因為夫人中間的調理我都要自己睇住... 她一向都真係幾依賴我的), 但老友都一樣寄了他的帖子來給我留念. 打開一看...

 

是大富翁. 哈哈...

真的好有心思, 將日間觀禮和夜間晚宴的地點都變了地契, 而地圖教點去呢就用火車站標示, 回覆就成了 "機會" (或稱「大眾寶藏」) community chest.  好精美呢!

天蠍先生這是基於真老友的一份尊重, 為老朽來說, 是不能再找到的好友才會做到的. 所以老朽當下決定, 就算飛不了去加國參與, 也要待他們回香港時用飛機票的價錢煮出世紀佳餚, 希望一方面賀他, 另一方面賠不是.  這才可報老友尊重於萬一也.

一個醫生的婚禮

香港都有無千無萬咁多醫生, 究竟一個醫生搞婚禮會有幾特別?

其實, 說穿了, 一點浮誇或特別也沒有, 不過真誠, 感人.

醫生是個男的, 婦產科出身, 但在公私兩方面的醫療系統也有工作. 所以朋友特別多, 而且, 當年我在醫院工作的時候, 是我的同事, 又是一位特別「搏殺」的醫生.

大家都無在醫院工作後, 我們都是間中聯絡, 不過大家都係為食之人, 所以成日都約埋食日本野同飲下紅酒.  不過老朽結婚比較早, 無得好似佢咁易可以成日去法國睇酒莊. 

佢就好彩喇, 搵到個又鍾意同佢一齊飲又玩得又同佢一樣咁 sporty 仲要係靚女既女友, 天作之合啦.  就係咁, 呢粒鑽石王老五去年就找我想我幫佢證婚喇. 

因為同時間佢亦找我幫佢有份工作的私人醫療機構搞下融資之類野. 所以早排真係日日都「睇醫生」.  一直以來我都覺佢係一個超人, 但原來, 超人都有感性同細心的一面.

雖然因為工作上太忙, 結婚事宜都交了畀女友做, 但係佢背後安排都幾特別. 

除了晚宴有整喊迎娘的送禮外, 日間的證婚都有些插曲係好溫馨的.  不過大家初時都唔覺, 要到禮成後醫生的「真情對話」才聽到.

首先, 醫生找來他求婚時的法國酒莊紅酒, 而且找來了一支「大炮」係RP 100分的. 寓意要有段100分的婚姻, 而後來才知道, 原來幫他們的三對花仔花女都係佢「經手」接生帶來呢個世界的, 他們負責的是引領後一對新人進入他們的新世界. 

更加令人意想不到的, 還有他提到他父親時那種敬佩的神情.  醫生朋友一向都係「硬淨人」, 但提到退休而在座的父親時, 講講下都講到眼紅紅, 仲自稱要學佢一樣咁勁可以「泰山崩於前而不懼於色」.

或者, 文字上看不到當時在座一眾的神情, 但老朽聽完佢呢十分鐘剖白後, 對醫生朋友印象即時由「老友」變成「敬重的老友」.

呢位老友都已經好細心了, 但另一位更「老」的老友就使我更加敬佩, 也為自己不能去他在外國的婚禮而自責... 詳情下篇再述...

好難搞的蕃茄肉碎蛋

近兩星期真係多野做到不似人形, 真係成日都要搵o的 comfort food先得. 

年尾多證婚又一件事. 但係因為小弟唔知係好彩定係唔好彩, 竟然呢個時候有客想搵人做大型企業融資和想上市... 更加抵死係我個上市客竟然又有o的專門知識可以幫到我師兄 (即係大老闆) 個上市客使佢可以重新考慮上市計劃, 大家好似一拍即合咁真係唔到你話唔邪...  所以真係忙到發左瘟.  真係做到無停手, 同師兄兩個傻佬閂埋門講起, 大家一自慶幸貴客光臨, 另一自又想起會好辛苦, 分分鐘連屋企都唔使返 (但係有時間寫 blog?!?).  又講起大家當年的歲月, 堂堂大男人竟然講到眼濕濕...

講返早好多個星期的事了. 是夫人想老朽做的一道家常簡單菜: 蕃茄肉碎蛋

老朽的做法係先煮好肉碎, 之後加入切細的蕃茄一個和茄汁, 之後加糖調味. 同埋加返大件少少的蕃茄; 直到呢度做法都仲係大路既.

之後炒的蛋呢, 我自己偏好炒黃埔蛋, 即係熱鑊凍油, 打好蛋後傾下鑊, 之後慢慢鏟起一塊又一塊的剛熟的蛋皮, 再和肉醬汁一起會一會就上碟. 

不過夫人愛好的做法就係將蛋炒到散晒之後再加入肉醬煮至蛋開始實 (少少老) 才上碟, 佢話咁樣撈飯好食喎 (佢好少用其他送菜來「撈飯」的).  呢樣係我所不好的. 但無辦法, 夫人係老細, 最後就變成了以下的一大碗:

吃係好吃的, 起碼夫人和女王鍾意, 至於我自己呢... 咪照食囉, 唔係點呀?!? :p

宴客菜 - 鮑魚一口酥 蔥燒一字排

上星期有老友的太太到訪探女王, 順便來吃個飯, 問了一大輪去邊間吃之後, 原來嫂嫂係想來我家找老朽下廚煮幾味. 既然遠道而來, 當然要特別招呼, 即刻三天內訂菜單, 因為是中午又不想吃得太多, 所以以多點小碟為主:  五小碟是:

鮑魚一口酥

江南萵荀

 

鍋貼帶子

 

糖醋腐皮卷

冰鎮橙花梨子

之後有個燉湯: 松茸無花果老雞燉宣威腿

三大盤是:

彩雲追明月

乾蔥頭抽生煎雞

蔥燒一字排 

當中小碟的鍋貼帶子就是蝦多士, 但改用少少蝦膠加生粉貼著開半的大帶子來炸; 而腐皮卷就是簡單地買一盒響鈴回來, 用百二度焗爐焗住迫出油來, 也使響鈴脆身, 之後煮個糖醋汁收結, 食時淋上面就可以了. 橙花梨子就是用鴨梨切片後泡著已加入少少紅糖和薑汁的鮮橙汁, 在雪櫃中泡個一天就可以上碟了.

至於鮑魚一口酥就是用罐頭鮑魚切至好細的幼粒, 加入香芹和香菰也是切幼粒; 落少少鮑汁, 糖和蠔油埋芡做成餡, 之後用買來現成的撻皮, 又係焗香之後裝住, 上面再放一小隻即成鮑魚仔作裝飾 (其實當然都食得既) 就可以上碟了.

燉湯是簡單又好味得很的, 因為阿嫂話想飲好點的湯, 所以就做了這道, 只是用了「菁云」買回來的乾松茸泡水後燉, 也買了一盒雲南宣威腿骨, 用一件出水後加兩大片同樣地方買的雲腿片來同燉, 不過時間就頗長, 先在前一晚燉三小時, 食的早上再燉兩小時就好正了.

主菜的彩雲追明月就是先打開鶉蛋放入小碟蒸熟, 再用四色蔬菜 (甘荀絲, 菠菜, 金菰, 紫椰菜) 分別用雞湯餵熟後排盤, 再將熟鶉蛋放上去蒸幾分鐘後埋個雞湯芡便成了.

乾蔥頭抽生煎雞之前做過, 但今次隻雞明顯唔多靚, 煎起食味不足. 

蔥燒一字排就有好多不同做法, 我今次係原件一字排買來免切 (不想次次都切一條條太易炆到太鬆散), 爆香後先再爆大量蔥和幾片薑, 之後放入肉排再加調好的汁料:  叉燒醬三湯匙, 生抽老抽蠔油片糖紹酒樣樣少少, 之後加水開始炆, 大約四十分鐘後熄火焗, 又係同樣道理, 之後又開火半小時又焗十分鐘, 最後轉去砂鍋中, 倒埋個汁就可以到食時先至熱返, 原鍋上檯. 

果然今次的肉無咁鬆, 但亦相當腍滑, 而且汁料帶少少甜可以下飯, 今次都算無試錯菜...

珍惜...

兩星期沒有出 post, 因為因事去了馬來西亞數天, 回來上三天班就碰上國慶中秋假, 本來係十分愉快的事. 

然而, 這兩天差不多整個香港都在愁雲慘霧中. 

中秋前一天, 我就在24小時內經歷了大堂的嬰兒領洗 (我幫手做攝影師) , 為兩對新人證婚, 又見到一班盲人長者, 仲有出席了一位好友 - 細細妹 - 她父親的安息禮拜, 仲要碰上中秋節, 就好似一天之內見盡生老病死一樣, 就似當年佛陀一樣, 當下我已經無啦啦在fb說過, 真係要珍惜眼前人.

點知只是一天之後, 更大的震撼就出現在所有香港人眼前. 

當晚是太太外公生日, 九十多歲仲好壯, 食完晚飯大家看煙花, 看完走的時候就聽到有意外, 當時都未知咁大鑊.  愈夜就愈得人驚.  原本那晚我在煮一餐2/10 的飯, 因為有老友太太回香港探望, 但這餐飯, 愈煮愈心沉, 愈來愈唔開心. 當凌晨炆緊野同燉緊煲 "松茸無花果老雞燉宣威腿" 的時候, 開始聽到新聞話有小朋友罹難, 這刻, 我真的自然流了一行淚...

父母失去孩子, 又有孩子失去父母, 這刻的我腦中浮起的是黑夜水中一班人在掙扎的恐怖鏡頭. 不知何解, 這幕影像竟然像是我自己經歷的一樣, 使我毛骨悚然.

當然, 我知道上主自有安排, 而且我們幾時回上主的身邊,也是天經地義的. 但是人又是那麼脆弱, 在這剎那我們可以不動容嗎...?  當下的祈禱, 就是說... 「既然天主你願意人去有此經歷, 懇切地求你幫助死者得到安息, 回到你身邊; 傷者得到醫治, 而生者也得到平安 (其實和湯樞機在特別彌撒中的祈禱差不多...) amen」...  後來, 也加了這麼一句: 「感謝上主為我的安排, 也求你照顧和賜福給所有救人的英雄, 讓他們也得平安」

我們信亡者的義人「在今日就要和主同在樂園裡」 (cf 路加福音23章) , 反而在想... 那幾位小朋友, 會不會有天使陪他們, 不致孤獨...?  上主, 你可以昭示一下嗎...?

華豐熟茶腿

又到了食的時間.

今年中秋又是試月餅的時候, 不過因為工作和下星期要半官式的飛幾日, 所以試的幾十款月餅都試得好趕.

在此間, 有一晚放工行過中環一間老字號燒臘店「華豐」. 此店老過老朽多多聲, 當年是自己一幢大廈的, 地面是店舖, 樓上是工場, 更加自晒臘腸, 到秋冬時節行過樓下都聞到香味, 中秋時都會自製月餅, 我記得我吃的第一個「四黃蓮蓉」便是他們的出品.

到後來他們被拆卸重建後, 改開了另一位置; 搬完又搬, 最後到現址.  現時當為燒臘茶餐廳的做法. 不過 -- 愈來愈貴, 雖然, 都仲係幾好食.

而他們是有一款東西一直都是靜靜的躺在店舖一角, 不太起眼, 用個密實櫃蓋著, 上面有塊牌, 寫著「華豐熟茶腿」.  用的就是原隻金華/宣威火腿, 加入多量的冰糖和茶葉一起和著蒸至熟後再放涼吹爽.  亦因為可以送酒下茶, 所以又叫做茶腿. 

他的吃法其實和Parma Ham  之類的差不多, 因為已經熟了, 所以係「就咁食」.  不過呢, 食味會比較鹹, 真係要送酒下茶先得.  不過那種鹹香又真係幾引人的.

幾十蚊買了二兩來吃, 倒是有點兒時見到大人食而自己無得食的那種風味呢.

又放(完)暑假了...

其實暑假都放完了, 但今年女王的活動都幾多; 若干程度上, 可能是我們開始希望她掌握多些不同的課程之後準備在K2 開始搞女王的 profile/proforlio了. 所以畀幾樣特別的東西她去學. 同時亦希望不會給任何壓力她.  畢竟, 她只是四歲.

因為女王在假期內都成日喊話悶, 所以都會帶她去下太空館呀, 行下呢度去下o個度之類的.  不過奇就奇在, 竟然無帶佢去沙灘玩, 亦只係去了一次樓下泳池游水咋喎... 睇返轉頭我自己都覺得怪. 

另外當然也有學些古靈精怪的東西, 例如一個「英語煮食班」, 點知呢... 一星期內的三課, 竟然 (雖然只係女王話我知) 只係用英語同女王玩同埋畫下畫, 放已經焗成麵包的麵包入焗爐翻熱, 將薯仔放入雞湯中搞拌之類.  我 appreciate用英文教她和畀活動, 不過成千銀三堂呢, 對於已經學過醃肉同埋煎麵包做蒜茸多士同埋炸芋蝦的女王來說, 實在係太過小兒科了.

除了玩下英文煮飯仔外，仲有一樣我想了很久的活動… 溜冰。

女王因為家居港島東區，好多時都有機會去太古城的溜冰場，見到人家溜冰溜得好睇所以一早想學了。 而因為我自己都叫做識識地，所以都好想她學，而太太亦覺得無壞，見到暑期班不貴… 九百大洋六堂… 就幫她報了。其實頭兩課我地都怕她會因為跌得多而想放棄，但係都有好幾位小朋一起學，所以女王在群體壓力下，雖然跌過三幾次但係一點都無想過唔學，而且在取得暑期班證書後仲話要繼續，當然，暑期班按亞洲冰聯課程是不會"溜" 的，而是一步步的行著。到暑期後的正常班才開始有溜的動作。 而溜冰呢瓣可以話唔算係用來爭小學的科目，當然，有張證書都會拎去用，但主要真係想女王學得開心。

而女王一直都係住在家中，只是好多時會去爺爺麻麻家中玩大半天，今年就係想她去玩下過下夜，結果當然係大成功，不過就難為了女王成日冤住嘅姑姐囉… 我同太太就梗係可以多了輕鬆時間啦！

呢個暑假亦係一個「動物暑假」, 因為女王有份暑期功課係講暑假做過咩的, 初時想為女王加點活動, 所以就去了一個在機場博覽館的動物農莊, 女王初時好驚o的馬架. 點知後來屋苑搞個「騎術體驗」, 係去一間騎術訓練中心餵馬和騎馬的, 我們試著就參加了.

最初都和之前一樣, 女王係好驚的, 遠遠的望著就唔驚, 但係隻馬一想哄埋少少就驚, 連太太都驚埋一份 (其實佢先最驚!) 我就當然無有怕啦 (其實唔知點解), 仲主動買包大粒甘荀去餵馬添 (教練話甘荀同蘋果係馬既點心糖果喎); 原來都幾得意, 隻馬會用咀前哄你隻手之後舔走粒甘荀的, 畀馬鬚拮的感覺好怪, 夫人同女王後來都想試, 女王卒之都在我們的「大力」鼓勵下成功餵到隻馬仔. 起碼好過大部分小朋友, 佢地絕大多數都餵到成地係.  我見仲有咁多剩低, 咪同教練講聲拎晒去我逐隻餵囉.  餵到班馬係咁望實我仲有無, 仲搞到我成手都係馬口水... @@"

好喇, 之後到騎馬喇, 我們都叫做係咁意騎下啦.  點知女王又唔知咩事鬼咁雀躍喎, 一戴起頂馬帽就好似上左身咁, 騎到唔想落來; 最後因為有一位小朋友太驚唔肯騎, 所以畀了個機會女王騎多次走多兩個圈. 

既然係咁的話, 下年或者應該畀佢去雙魚河試多兩次 (在馬會雙魚河 old clubhouse 可以一舊水畀小朋友騎十分鐘行大沙圈- 話晒都算係奧運馬術場地丫嘛); 真係有興趣的話先考慮畀佢六歲真係學囉. (太太已經即刻諗... 呢o的冷門野, 唔知入小學加唔加分呢...)

金華盛宴 II - 主菜/甜品篇

老朽總算不負所托, 在上完各款不碟後, 出到去廳一睇, 九成九的食物已經被那班蝗蟲消滅了. 只特別各留下了一份半份給我, 總算對得我住...

之後就是主菜和「單尾」還有最後的甜品了. 

花雕蛋白蒸蟹鉗 - 自己一早買的急凍巨蟹鉗因為聽錯誤會了餐飲業龍頭老總指教而煮得過了火; 最後黐晒殼; 幸得老總伉儷同阿一首徒基大師相助找來生拆十二隻 (仲幫我用薑汁雞湯入埋底味) 畀我用 (不過貴得多... 幾十蚊一隻; 基大師話原來解凍後加底笪, 用薑汁雞湯餵五分鐘已經得了), 加入已加了雞湯和花雕的蛋白, 包起保鮮紙蒸8分鐘就似樣了. 要留意的是蛋白不要太大力打至起晒泡, 否則蒸起來唔夠滑.

龍鬚星斑柳 - 之前做過簡單版的, 今次就係完整 "director's cut" 版:  星斑柳切條後醃一小時, 之後泡嫩油, 加入熟華腿絲和蛋絲, 中間再加少少紫蘇葉和一些日本櫻花蝦粉 (所以粉紅色), 食時撈埋就得.

頭抽味醂焗肉排 - 之前做過, 都係「停打停打停」的炆焗工夫, 不過今次用多了點黃糖, 味道不錯但可以鹹多少少.  (半日前炆好, 放涼後雪一陣, 食前連汁用砂鍋再炆焗十分鐘)

鮑汁蝦子五頭花膠 - 煮過好多次, 今次都係用鴨包肚, 但係今次呢兩件真係好好好厚, 要慢慢煮先入味, 否則面頭軟爛入面仲係韌就o徙晒.  不過臨食前才記起唔記得帶蝦子去... -.- 最後就只用了原汁加蠔油黃糖老抽麻油推紅芡上碟, 不過大家都話好味.

腿茸津白卷 - 又係之前做過多次的菜式, 不過今次除加了華腿茸外還加多了一條西式火腿在中間, 多點咬口. 食的時候應該用雞湯會一會才上碟的; 但當時係尾聲, 煮到好懶, 所以只係叮返熱那盒之前一天已經用湯灼過放涼卷起的津白, 再用花腸剩下的汁撈埋上碟算了... 有點... 流灘 feel... :)

紅蔥頭上肉蒸走地雞 - 新鮮走地雞以鹽糖乾蔥茸紹酒少少蠔油生粉醃半天, 蒸前加入生華腿小片, 大火蒸十分鐘已得, 如蒸12分以上會鞋口的 

單尾:  燒豬油撈飯跟大孖頭抽/九龍醬園老抽皇 - 呢樣係我早兩天決定加的, 呢班男人老狗, 唔食飯又點得呢, 所以我向相熟燒臘檔訂了一支燒豬油, 只係 20 大元已經大大支, 佢仲好有心 (定係意外?) 用支整燒味用的玫瑰露樽洗過後裝豬油, 殘留的玫瑰露味加入豬油中, 加上黃雙如 "有食緣" 買來的大孖盆晒生抽同埋九龍醬園金牌老抽皇, 簡直係天上之物; 有當晚出席老友在 fb 留言 "x街！點解可以好食成咁？我諗玉皇大帝同王母娘娘呀 八仙呀 太上老君等人閒時都係食呢啲..."

你估下係咩來...?    初時有人以為係白飯, 其實... 係發好既燕窩!!   死味.. 四百大元一兩, 買左四兩發起直頭誇張, 相熟藥材店果然無欺場. 

太多燕窩了, 杏汁反而唔夠, 煮出來似碗粥多過似燕窩; 每人仲可以整多碗就咁既冰糖官燕. 食完仲有半盒整唔晒留左畀班長之後食... 真係變態...

 

 一食就食到十點半有多成十一點. 但係食的開心, 煮的仲開心... 因為今次有班長夫人和太夫人幫手洗碗丫嘛!!

 

(其實, 我一路已經諗緊下次再和朋友聚會時煮咩呢...)

金華盛宴 I - 前菜篇

以下係一次「癲癲地」的經歷.

去年尾有位舊同學 (「班長」) 在上海買了半隻金華火腿, 斬開一件件, 就送了一件一斤多裝的給我.  老朽無以為報, 唯有請他將自己的一大塊 (二斤左右) 真空包裝的交給我, 想出了幾味用華腿的菜式來答謝. 班長一聽就覺得好正, 仲話佢找幾個最要好的同學來, 我煮, 他們出錢請埋我食.

初時只是六人晚宴, 後來加到8人, 10人, 最後是12人, 菜式亦由4小碟4大盤, 整整下我唔知發咩神經話變了做8小碟6大盤, 仲有加個甜品.  最後更加癲起來, 當正自己係私房菜廚師咁, 當天做了兩道用即日找到的食材的獻禮, 由我自己出錢. 所以最後我都畀左大半份錢出來的. 

而為準備今次宴會是去班長家中舉行的, 我買了好多個密實盒, 因為不可能一個人即日煮十幾樣出來架嘛!  所以有1/3菜式是準備好的成品, 翻熱可食, 有1/3 是半成品, 加入一些生料後蒸/炸/煮就可上檯, 還有1/3 是由生料煮的, 要多點時間. 

而廚具方面, 我有一套刀是在外使用的, 包括一把日式「旬」的7吋大三德刀, 可用作菜刀, 一把德國 WMF 的7吋西式大廚批花刀 (平日家人也用), 一把孖人牌的 5吋有鋸齒萬用刀, 和新買的一把日本「關孫六」木柄8吋柳葉刀 (魚生用).  另外也帶了一隻鉗, 一隻四兩炒殼, 一隻大炸籬, 一隻大膠匙可作基本鑊鏟用. 還有炸用大筷子一對.

以下就是菜單了, 有些是我之前做過的菜式, 有些就不是...
1) Hors D'oeuvre/Amuse Bouche (廚師獻禮)

   -脆華腿絲鹽燒松茸
   -紫蘇梅醬雙色刺身

小碟:
2) 燒雲腿拼燻溏心蛋
3) 鹵水花菰
4) 江南蒿荀
5) 柚子胡椒薄燒牛
6) 磯煮大連鮑
7) 金華鬼馬釀百花
8) 洋蔥叉燒酥
9) 梅子蓮霧

主菜:
10) 紅蔥頭上肉蒸走地雞
11) 龍鬚星斑柳
12) 頭抽味醂焗肉排
13) 蝦子紅燒五頭花膠
14) 花雕蛋白蒸蟹鉗
15) 腿茸津白卷
16) 杏汁燉官燕

脆華腿絲鹽燒松茸 - 先用冰糖蒸好華腿絲晾乾食前白鑊烘到脆身, 再以橄欖油鹽胡椒煎香松茸薄片 (正路打直切, 但我怕唔夠所以斜切), 配合溫室青瓜片同吃.  (即場製作)

紫蘇梅醬雙色刺身 -  當天早上見到有不錯的三文和吞拿, 各買一條後切粒, 用火槍燒下個面之後撈入紫蘇葉 (大本的「大葉」) 絲再加少少柚子醋和日式梅子醬便成. (即場製作)

  

溏心燻蛋 - 都是鴨蛋來的, 今次燻得不錯, 亦係天主保佑全部都係溏心的. 加上些松露鹽同吃.  (當天凌晨製作)

磯煮大連鮑 - 就是之前做過好多次的那款了.  今次好似細隻左少少.  (三天前製作好)

 

燒雲腿 - 都係之前做過的, 但今次用濃一點的冰糖水反而不夠, 而火腿件亦不夠, 我自己買來多一件細件上方加入去, 不過班長那件我切得太大, 糖水味入唔到中間, 炸起來仍是十分鹹, 反而係因為大夥都係送酒, 佢地覺得 OK.  (四天前開始浸糖水, 即場炸和切)

滷水花菰 - 用了李錦記鹵水做底, 比正常再開稀些後加入花椒一把, 八角兩粒, 丁香一枚, 冰糖一小粒, 玫瑰露和花雕各少少, 薑一片, 煮滾後放入已浸發花菰仔煮廿分鐘後放涼再煮十分鐘上色. 不過糖下得不夠, 結果我覺得太濃, 但送酒一班大哥就覺得好正.  (兩天前製作入味)

 

江南萵荀- 就是上海菜那款了, 之前做過, 就是刮去外皮至見到清澈青綠色的心後滾刀切塊, 抓鹽半小時讓他自然出水後壓去水份, 加入少少砂糖, 魚露, 麻油就食得, 也可以多放半天才食一樣爽脆.  (一天前製作)

金華鬼馬釀百花 - 之前做過了, 就是蝦膠/墨魚膠釀入隔夜油條炸好切件, 不過今次加入了用冰糖蒸透的火腿茸.  (火腿兩天前蒸好, 其餘即場製作)

洋蔥叉燒酥 - 買來肥叉燒切幼, 洋蔥和香芹也是切幼, 之後加入少少蠔油, 叉燒醬和蜜糖炒香, 再埋個生粉芡使餡料有筋性; 放涼後用威化紙對摺 (唔兩層會溶架張紙) 包起餡料, 卷好後上蛋漿麵包糠炸至金黃色便可 (餡料一天前製作, 即場開粉包起炸)

 柚子胡椒薄燒牛 - 即時用買來的火鍋肥牛片加少少鹽/胡椒煎起卷埋, 加入日式柚子胡椒醬就可以了.  (即場製作)

 

梅酒蓮霧 - 之前做過好多次, 都係廿粒甜話梅焗熱水後加糖和梅酒, 放涼後加入切開的蓮霧和青蘋果, 呢樣女王都覺得好正. 所以出發前拿了幾條給她.  (酒精成份好低咋)  (兩日前製作)  上了這道用來清清口後, 我便坐下來食左先, 之後才再準備上主菜.  下一篇待續...

 

我的鎮靜劑

做了所謂的老闆後, 每天要都對著不同的人, 更加多不同的怪人, 由公司內部的, 到公司以外的, 由生客到大客, 事無大小, 唔係去師兄度就係去我度.  無辦法, 老闆得兩個, 但我們律師行的規模漸漸加大, 已經到十幾位律師的地步, 仲要 take up 兩個見習律師做 principal (我不敢叫自己做師父, 因為自知未夠班).  幾乎每天都是一頭煙的過.

 

而且仲有仲有, 每月都會去幾個不同的義務法律咨詢點幫手, 當然, 有時會接到少少生意, 但更多時是幫到別人, 當然是開心的, 但當中也有不少是「咒怨凶鈴」的份子, 也就是說, 本身遇到不幸或不公的事, 和法律大纜都無關係的, 都想搵律師傾.  我想, 我應該去讀返要心理學證書先得.

 

上次去某咨詢點, 有位人士就說自己被一位前管理員騷擾, 原因是那人工作不佳, 在苦主投訴下被炒了, 但「懷疑」他深心不忿找人來時時騷擾苦主; 但問問下有點不對路, 一問...

 

「你點知佢地係一齊呢?」

「唔知架」

「你有無見過呢班騷擾你的人和那前管理員一起?」

「無喎」

「咁... 佢地點騷擾你? 」

「佢地車上望住我, 搞到我好驚要落車囉」

「你有無人陪你? 有無問過呢班人? 有無證人?」

「有呀, 我個女見過」

「可以叫你個女來做證嗎?」

「佢唔肯來架」

「咁你點證明呢班騷擾者同管理員一夥呢?」

「.... 唔知呀... 唔係呢... 佢地係一齊架!仲有呢, 樓下呀, 樓下有人又係望住我搞到我好驚架! 」

「同車上的同一班人?」

「唔係呀, 另一O的人呀, 佢地真係好多人架... 個個都同管理員一齊『伏』我架...」

 

講到呢度, 你係我都想一腳伸開呢位阿巫. 但係又唔得, 惟有請佢要找證人, 叫佢個女來接佢走...

 

幾乎每次都會有一位這樣的人, 又或者純粹搵你呻下的人.  真係啼笑皆非, 問你怕未...

 

加加埋埋咁多野, 真係有時都會眼火爆, 而且好多時未食晚飯就要去呢o的咨詢點. 有時就食份三文治之類的.  回家亦已比較夜, 十點幾左右啦. 只可以拿拿聲沖個涼, 陪女王玩一陣就要「暗」佢訓, 之後我才可以一邊和夫人睇電視傾下計, 一邊煮點東西來吃. 

 

別人或者師兄 (佢都係坐好多個咨詢點) 點減壓我唔知, 不過很多時, 美食對我來說就是快樂, 也是使我有回動力的「鎮靜劑」所以有時我會煮點couscous, 有時就是買些靚女腿回來加點意粉, 也有試過是 Penne 長通粉撈松露醬/鹽加些雜菜, 好吃得來簡單. 

 

呢期有時都買到些西班牙 iberico 火腿, CitySuper  好多時都只有全橡果餵食的 bellota級, 就咁食當然正, 有時呢, 唔使次次都去到咁盡既. 今次買的是次一級的 recebo, 就是橡果和穀飼的.  而且係「草鞋」位, 即是近臀部較肥的, 切了粒.  就咁食會太肥, 所以爆香了用來撈少少煮意粉用的茄醬就十分之 "comforting".  變成了我的 comfort food 了. 

 

 

當然, 食完之後, 第二朝都係要搏殺, 不過心靈上會好過些, 起碼再見到騎呢怪時, 心中只要想著西班牙火腿呀, 松露呀就會無咁想一腳伸出去了...

超懷舊菜式 - 雞子戈渣

為了準備上兩篇提過的火腿「宴席」, 老朽找了不少傳統的烹飪食譜和書藉, 在陳榮師傅的《入廚三十年》找到了一道很懷舊的菜式: 雞子戈渣.

在其他北方傳下來的食譜中, 都是用雞蛋而不是用雞子 (睪丸) 的, 因為北方是叫蛋做「雞子」, 而「戈渣」既沒有戈, 也不是渣, 而是「鍋炸」的異音.  但無論陳師傅或是祖師爺特級校對, 他們寫的都有加入雞子的.  但北方菜譜都沒有加入, 而是只用雞蛋, 上湯和頗大量的粟粉開漿慢慢煮杰就會成為半糕狀, 這時入容器放涼後便可以切件或者切成欖核 (菱形), 上乾粉炸香便可.

記得早年的「大廚出馬」, 富豪軒的陸師傅重現過這道雞子戈渣, 而改了不用雞子而用金華火腿, 改叫「金華戈渣」; 當時我想這正可以作為班長火腿宴的小碟之一, 所以便試作一次.

用了四隻雞蛋, 加入四湯匙粟粉打勻, 再加入金華腿茸兩湯匙左右, 同時煮滾兩碗開稀了的清雞湯 (因為腿茸已有鹹味, 不用再加重味了); 將蛋漿生粉撈勻後加入滾緊的雞湯中, 收細火慢慢鏟勻循; 這時會見到個湯變得好杰好杰, 因為雞蛋和生粉開始發揮凝結作用, 這時入盒放室溫一小時後再入雪櫃大半小時後便可以起出凝固了的戈渣, 切好上粉就炸了.

結果係咁樣既...

吃下去味道不錯, 雞蛋香出晒來. 感覺是外脆, 內軟, 有點像豆腐搓爛的感覺;  不過火腿味不太夠. 但細想一下, 這道菜工序的確比較複雜, 不太適宜「外賣」去別的地方才炸.  因此最後修訂菜單時用另一款 炸的小碟代替了這道. 但女王吃這個吃到唔捨得放手先至激死.  :).



三星的榮譽

夫人生日, 一向都會去食好野的.  今年就去了「探」多年前中環 Ritz Carlton 意大利餐廳 Toscana 主廚 Bombana 自己開的餐廳 Otto Mezz 8 1/2.

雖然一向都好欣賞 bombana 的手藝, 不過倒真心覺得佢未必值三星囉... 始終呢間係全世界唯一一間在意大利境外的 Michelin 3 Star Italian Restaurant.  夫人對他們期望甚殷. 

雖然, 今晚沒有失望, 卻不算得很有驚喜; 不知是否我們當了他們已經是三星, 所以put 得太高; 又或者是因為他們的水吧今晚甩晒轆, 連畀杯熱水都搞我十五分鐘? 

講返野食先. 我要了個他們出名的 truffle egg cocotte (原碟焗蛋加松露).  吃慣了冬季松露又或者歐洲, 尤其係意大利 Alba 地區的重味松露, 對於現在的 Australian Winter truffle (因為南半球現在是冬季) 可能會覺得太清淡.

真正上菜前, 也和不少西餐廳一樣來個 Hors D'oeuvre, 又或者叫 Amuse Bouche (廚師獻禮), 今晚的是一片西班牙 iberico ham 配上一片加了火腿碎和鹹芝士焗的小圓酥.

我的 cocotte 來了.  和之前吃過一樣, 交到差有餘. 只是香氣差一點點.



夫人就要了他們的 degustation menu, 第一道是加了松露的芝士意粉



之後夫人的 degustation menu 就上了一道哈密瓜汁做底的火腿卷, 中間還有數塊薄荷葉.  而因為我沒有叫湯, 所以 table manner 上餐廳給了我一隻沒有東西的 show plate, 也沒有給任何餐具.

她還有一道蝦, 不過我真的忘掉了是怎樣煮的...



而這個時候的叫的一小道 prima piatti -  half portion 的蕃茄海鮮小貓耳朵 (occhiette). 今次個海鮮湯非常清鮮, 蜆仔和蝦味很足但又不搶味.



我的主菜是烤 line catched 鱸魚柳. 我覺得十分滑, 配搭亦得宜.


夫人的是她最愛: 烤和牛西冷.


夫人的甜品給我吃了, 是水蜜桃 jelly 加半個桃配雪糕, 因為她不吃桃的. 而我就另外叫了一份五色朱古力 (又 creme brulee, 又mousse 又雪糕之類的), 食到「舔舔利」; 當然最後還按憤例加上了生日快樂的字眼, 另外亦上了幾款 petits fours:

不得不提的是當晚我 order了一款紅酒　－　不過是甜酒來的... @@"  

就是 ricioto della valpolicella.  有層次但是相對來說不太明顯, 好 straightforward.  亦是我們今次晚餐的一個句號.

消暑孖寶 - 冰糖燉冬瓜 & 冰花馬蹄露

早兩年按「特級校對」祖師爺的《食經》整過 "冰糖燉冬瓜".  是開個冬瓜頂之後去囊, 加入二兩冰糖 (大約一斤瓜配一兩冰糖)  就咁燉兩個鐘而成的. 簡單到發瘟又好食到發癲的. 

呢幾星期咁熱, 而且夫人調理身體都已經夠一百日了, 所以都可以食涼o的的東西.  所以就燉了一次, 係連女王都鍾意, 不過佢鍾意飲冬瓜水, 食軟棉棉的瓜肉似乎不太喜歡.  而今次我加了點湘蓮; 不過燉得不夠鬆; 可以下次先用糖水煮一煮才燉會更好.

另外還有做的是冰花馬蹄露; 又是簡單製作; 其實只係用兩湯匙馬蹄粉開入已經煲好, 四碗水左右的熱冰糖水 (可以先加入喜歡的馬蹄粒/片同煲), 搞勻後 (係唔好起馬蹄粉粒而已) 食之前可以滾起後加入打起的雞蛋一隻, 隨即熄火同埋再次搞勻就會起蛋花咁就食得了.  極之簡單, 連埋切馬蹄都只係十幾分鐘之嘛.

預告: 夫人生日勁嘆三星米芝蓮; 仲有老友聚頭老朽煮出15道宴客菜... 不過呢期忙, 真係唔知幾日出唔出得切 blog... :P

夏日煮意 - 焗排骨

好一陣沒有寫吃的和煮的. 其實不是沒有煮呢!

夏天是個「有食懶煮」的季節, 卻也是善用「唔使睇火」的焗爐的季節.

早前英國 BBC 田園廚神 Nigel Slate 示範過一款"Sweet and Hot" 的蜜糖八角蠔油焗排骨, 我試過一次的確幾好, 不過我用少了些八角和黑椒.  他的方法是先用大量蜜糖和黑椒碎, 加入兩粒八角和一兩湯匙蠔油 (係呀, 佢在BBC 示範時仲係用李錦記架!), 放入排骨 (Spare ribs) 醃半天後用相當低火 (100 度左右) 焗 90 分鐘, 到排骨僅熟後再反轉, 用極高火 (220度) 燒焦排骨面. 

我的做法有點不同, 因為避免太長時間烤焗點都會比較乾身, 所以我用了錫紙包住醃好的骨, 用180度焗 25 分鐘後打開錫紙再高火焗10分鐘, 再熄火攤10分鐘才吃.  變成「銀紙蜜糖蠔油焗排骨」

味係好味的, 但係夫人吃下去就說「唔夠香口囉.」  的確, 因為我沒有像中式煮法一樣先爆香o的骨囉. 咁都畀佢食得出... 真係無野好講...

另外在報刊見到 Jacky 大廚提供了一個香橙焗BB骨的做法, 覺得都幾簡單所以又試下, 不過我又改動了少少.  先用一整個的橙皮青 (即係切出來橙色部份, 白色的「底皮」不用) 鋪在已爆香的排骨上, 加入少少生抽, 少少喼汁, 半個橙的橙汁撈勻醃幾小時左右之後連埋橙皮和汁, 用錫紙封好後用180度焗30 分鐘, 之後又係打開, 拎走橙皮和倒掉油之後又用幾湯匙蜜糖, 一匙喼汁, 另外半個橙的橙汁校成汁水掃面, 打開焗十分鐘, 又反轉又掃汁焗十分鐘; 再反再掃兩次後熄火由佢靜焗十分鐘就食得.  食的時候可以加少少 terragon 或者 parsley 香草.  今次的橙味真係好勁, 都係因為用多橙皮的原因. 女王當然好鍾意食, 仲成半條咁拎住咬添!

「四年一度體壇盛事」拉雜談 (II)

行文之時, 倫敦奧運已經曲終人散, 就是殘奧會在兩星期後開始. 

一大輪的迷思, 包括裁判的不公, 還有一班運動員的表現. 實在是看得人匪夷所思.  首先見到的是南韓的女子重劍選手申雅嵐, 加時最後一秒時相方同分, 而就在最後的一秒, 被上屆冠軍, 德國的海德曼連刺三劍後才發現最後一秒沒有被「啟動倒數」.  最後在場的最高負責人, 即是瑞士國際劍聯派來的 Technical Delegate (兩年多前在這裡有關東亞運的 blog entry 提過, 所有有關一項運動的任何紛爭都是這 TD 就了算的) 在廿分鐘後決定將分數照給德國, 那就是說, 南韓選手輸了準決賽, 最後和中國爭銅牌.  當時她就來個淚如雨下, 鏡頭影著孤獨的她一個倚劍坐在比賽劍台上哭泣, 整個場除了紅綠兩色的比賽指示光管外都是黑漆的, 堅係淒美. 

那麼, 究竟中的那劍是何時被刺的呢? 

首先重劍和花劍不同, 賽例是容許雙方同時互相刺中後大家一起得分的. 就是因為這樣, 兩位選手多次「同時」 (可能是只有0.1秒的差距) 刺中對方.  而到決勝同分時, 賽例是如果加時同分的話就要抽籤, 抽中的那位如果加時都係平手的話就會自動贏的.  而申雅嵐就是抽中了好籤.  所以最尾一劍有問題, 對於她又或者整個南韓隊來說都是不可接受的.

我真的剛好錄下了那段片, 而我的觀察是, 那劍是剛剛一秒外就中的 (當然, 我「目視檢測」當然可以錯), 但全場的觀眾都為她而鼓掌, 大概知情的不只我一人吧... 就除了那班來自歐洲的裁判外.

現在再來分是非對錯已經太遲了, 國際劍聯之後後了聲明道歉 (大概是知道領左野吧...) 當然, 奧委會是不會道歉的, 因為錯的不是他們, 或者, 聲稱錯的不是他們. 

但又如何? 牌就畀晒喇, 整個特別獎畀佢, 老實講係我都唔受.

羽毛球就仲抵死, 一班女雙選手個個在八強怕之後遇到中國強敵, 個個故意輸波, 又故意得太明顯, 結果齊齊被羽聯叮走, 即時DQ.  運動員賴制度, 教練就賴運動員, 但係教練本身係咪真係咁清高呢... 真係你自己諗喇... 包括中國在內的運動當局, 一向都係本著「人可以輸, 但制度唔可以輸」. 犧牲的, 當然就是運動員了. 

中國今屆都幾多運動員「犧牲」的.  體操啦, 男子跳水啦. 根本大家是來奪金的. 奪了銀就好似死老豆咁, 無牌既雖然唔使送去勞改但係就慘過乜.  呢個制度, 造就了強國, 亦同時使人腐化, 更叫人唏噓.  我真的在想, 其實, 會不會正是因為這個制度, 才在連續兩屆都見到傷到完全跑唔到的劉翔...?  (唔係話佢假傷, 而係覺得, 可能一早就已經知道傷, 但身為ICON 兼九萬幾個代言人的他, 出場已經係 $$, 跑唔贏就係跌 $$, 所以一不做二不休, 來個跑唔到但係跳勻全場, 仲有 gimmick過跑贏. 
成名使人煩惱, 劉翔同是, 美國菲比斯也如是, 吸埋毒都仲翻到身仲成為奧運史上最多牌的運動員, 急流勇退係不錯的選擇. 不過, 後路會不會和中國選手一樣?  還是起碼都夠錢開間游水學校呢就佢自己先知喇.

有位老友是旅居英國的香港人, 他今次申請到做GAMES MAKER, 即係義工, 恨得老朽牙也癢了.  就是當年京奧不能去做義工, 真係囉囉攣到今日, 真係慘... 我同太太講「下屆要諗下去巴西做義工了」, 換來的是「你唔係嘛...」... 真係灰...

同場加映, 男子雙向飛靶射擊賽, 最後是英國選手大熱勝出, 但當中最留意的是一位卡塔爾槍手, 每次一輪到他就會手震, 震到連電影都影住係咁搖, 係咪驚成咁呀大佬... 最後畀你拎到個銅牌, 返鄉下真係要還神, 下屆仲有得你玩的話, 唔好咁驚青喇...

下屆唔知仲有無得玩的, 還有全場最老選手, N 朝元老, 日本一位馬術選手, 是71歲的伯伯了.  首次出戰是1964 年東京, 上屆京奧也有份, 今次一出場, 真係全場鼓掌, 最後排第七, 但已經贏晒掌聲; 希望他老當益壯, 四年後2016再見啦!

女王四歲了...

年年如是了, 女王四歲.

時間真的過得好快, 好像是早幾天才出生似的, 原來「似水流年」. 今年「生日雙週」活動頭炮是和夫人 & 女王去悅鮨找老友基哥, 請他燒一件醬油迷你吞拿魚壽司給女王吃 (當然還有其他的東東); 我估佢燒件赤身 (maguro) 啦, 點知基哥燒了一件醬油大拖羅畀女王食. 個衰女就真係識食呀, 係咁話正. 梗係啦, 拖羅呀陰功... 成舊水一件就咁畀佢「牛 o趙 牡丹」的, 似乎浪費o左少少囉... 其他野當然係我食得最貴啦, 夫人最愛都係燒個銀鱈西京漬最多都係兩百大洋.  但那天呢... 原來食左千五大洋呀...!  @@"   (基哥係咪見我幾個月無蒲頭收貴左我呢...)

除了壽司當然有蛋糕, 仲有三個咁多, 因為正日我們去了 pizza express , 之後買個細的和她吃, 等女王知道係正日, 而且係希望之後的星期六和家人又吃一個.  還有一個是和其他親友一起開個小型 party時吃的. 

或者會問, 咁細個使唔使咁多個生日會呀... 其實問心那句, 唔使, 始終係 materialistic左少少既... 不過正日我們想有少少活動所以出了去. 和兩邊襯家一起吃了一餐和民後又無理由唔切個蛋糕o架... 但係我那邊的親友比較多小朋友, 而且是女王最愛一起玩的幾位, 但外父又唔鍾意同一班唔熟的 (即係我阿媽那邊) 親戚一起, 所以又無理由叫佢一起來.  無辦法下就唯有一開三了.

例牌的, 親戚們都好客氣, 講明真係大家聚下食下玩下, 唔好買咩禮物來, 但係都會收不少禮物的.  總之就收到成屋都係, 連玩具化妝檯都有張.

今次party 就都係簡單地揀了美心外賣算了, 橫掂大家都唔係點旨在食架喇.

突然之間, 幾星期內, 又覺得女王高了點, 頭髮長了點, 她一向頭髮長得慢, 比較難扎辮. 但六月開始就好似好多頭髮咁.  連幫佢沖涼洗頭都洗耐左.  亦卒之可以如夫人所願幫佢扎辮啦!

不只頭髮, 更加是好說話開始長得來有少少紋路 -- 雖然呢o的紋路都要思考下先估到女王其實想講咩. 但這個已經係一個大大大的進步了. 

吃了三個月的麵

標題大概嘩眾取寵了點.  老朽並不是連續三個月要吃麵.  而且有一間麵店, 老朽找了三個月才找到機會去吃; 嚴格來說, 是「重吃」.

當年在醫院工作時, 試過幾次由大埔乘的士去粉嶺, 為的就是這兩款東東:

是聯和墟的「群記肉圓豬手麵」. 

他們也是間好有性格的店, 一向都係早開早收. 5點幾打烊, 但其實去到5點時好多野都已經無得賣. 當然包括最出名的牛肉炸卷同埋白鹵豬手.  之前是中午時份去的, 原來, 已經是八年前的事了.

近幾個月經師兄委託, 都有去北區的一些區議員辦事處當義務的律師, 給街坊解決一些簡單的法律問題 (對他們來說就不簡單了), 或者偶爾會有一隻半隻成了客戶, 又或者轉介去法援幫手的. 也因此多了去新界區; 但卻是放工時份前後, 所以幾次再故意經過群記, 一係就已經上了舖, 一係就賣晒想吃的, 只吃了一碗肉圓和一碗做得不太好的柱候牛腩.

最後卻是因為為一位朋友的家人去醫院簽一份文件而中午去了北區, 工作完了後當然是飛去群記, 第一時間向那位已經見了我幾個月, 每月一次的阿姐點了炸卷和豬手麵. 

豬手麵是白鹵水, 比較清, 但一點「豬燥味」也沒有, 而且不太軟又不會太韌, 爽爽的維持了多年的水準. 

炸卷呢... 好似以前滑少少, 而家個牛肉硬係覺得老左o的o的咁多.

但依然好吃, 冷氣超弱, 食到身水身汗但仍然覺得風味十足的. 堅係讚!

「四年一度體壇盛事」拉雜談 (I)

點解標題唔用「奧運」? 正正是我用這標題的原因...

多年前, 人人講起都會用「奧運」這個字的, 但自從2004年悉尼那屆開始, 開始有人用版權法來「私有化」呢個名. 而呢個「人」並非別人, 正是國際奧委會.

現時的規定是, 如果用在廣告或直接宣傳上, 就一定要是當屆奧運的贊助商 (即得到主辦國奧組委同意), 又或者得到國際奧委會同意才可以用「奧運」又或者「奧林匹克」呢o的字.

法律是法律, 但係個人會覺得, 醒係醒喇, 但係醒過龍.

奧運不是全球盛事嗎? 不是人人都可以接觸嗎? 因為個廣告用左呢個字就告人, 係咪真係咁需要保護利益呢?

無錯, 部份事的確不可以做, 例如可口可樂拎左獨家百事就唔可以用個字來搵錢, OK fine, 應該既. 但係連個商場搞下氣氛都要管, 會不會過份左...?

***

今年「倫奧」, 開幕典禮 (唔鍾意叫「開幕式」, 好怪) 係幾好睇; 好多人拎來同中國08年比, 不少「逢中必反」的人仲不斷加鹽加醋, 就英國的做得「人性化」, 唱國歌用一班著睡衣的傷健小朋友又話比中國楊沛宜/林妙可的「歌唱祖國」好幾多幾多.

誠然, 英女王肯出面玩, 係大突破亦係不可能在中國出現的事. 因為文化不同. 但單因為這個不同而覺得英國比中國來得好就未免武斷了.

另外, 唔係好明點解女王上機時係同 James Bond, 但係入場時係同王夫囉... :P

國歌呢, 只是不同人的看法, 我覺得傷健小朋友唱國歌不錯, 但用修改過的《歌唱祖國》(原曲就真係太革命, 唔太恰當)  引國旗入場也不錯呀! 國歌其實可以是用最莊嚴的方法去演譯, 這個不可能是錯的吧?  開幕典禮上花錢 (雖然中國的確係花得太多...) 也好難話做錯吧...?

不過, 提起花錢, 中國的奧運場地四年來慘遭荒廢是不爭的事實, 連香港部份東亞運場地也是. 這個都是大部份辦奧運的國家那些冷門項目場地的結果; 不過, 中國北京的就真係離譜左喇... 棒球場變了外地勞工的營地, 五隻殘晒的福娃被用來掛臭衫; 激流獨木舟的人工河長滿雜草 -- 其實可不可以改來做水上運動場, 又或者改到變左水上樂園呢... @@

至於鳥巢, 真係點搞都唔掂, 因為保養委實是太貴了... 但當過京奧義工的朋友, 大概都會覺得極之無奈吧... 當年熱烈喧鬧的競技場, 今天變了荒廢的野地.  中國幾時才可以有比較完善的計劃呢...

蛋卷

早幾年在電視見到蘇絲黃推仲北角一間「德成號」蛋卷, 一向覺得她推介的不會太差 (但其實她彈到飛起的也有很多不錯的店!) 後來不知何解夫人想起, 話好想食, 但一直無買到, 因為幾次經過都話「賣晒」又或者已經打烊.

早前夫人小產後, 在「坐月」時提過好想食幾款東西, 包括灣仔百事吉餅店的沙琪瑪和這款蛋卷, 我當時只有時間去買沙琪瑪, 提早經北角時卻已見到大大條人龍, 後面根著一個後生仔, 手持一牌寫著類似「是日派完籌」, 根本是無可能買到了.  知道有得「訂」的, 不過一問, 就說訂的那批要中秋後才有貨 (!) 要食就要早上來排隊買了.

到了上月中, 找到一天是早上無會開又唔使上庭的, 於是和秘書講聲會遲返後, 九點十分去到排隊, 在前面已經站了十多廿人. 我排的位置已經去到兩間舖位後的鳳城酒家旁的一間電器店, 不過大家都好守紀律, 自行排得好好的.

到九點半, 都幾準時, 人龍開始郁了. 排了好一會後, 到了門口, 見到有張檯貼了張紙說「售罄」, 應該是用來放在門口「擋駕」的. 而這時候, 那位後生仔又出來舉牌了, 就只在我後面四五位人士之後. 好險!

入去一望, 最人限買四磅, 話知你點計, 總之四磅.  不過我之前試過的椰絲味今日無整 (真有性格!) 所以買了三罐一磅裝原味, 加一罐都未知好唔好吃的牛油味. 承惠二百二十三個大洋.

試味後, 果然係鬆化得出奇, 而且蛋香係好新鮮既.  不過有少部份係突然有少少唔夠鬆的. 但夫人吃下去後覺得好味, 她自己覺得 (都有紋有路既...) 係因為太新鮮, 有少少未放夠涼就入罐, 所以好鮮味但係有少少唔會好鬆脆.

話知佢啦, 最緊要佢開心, 有相畀佢睇埋排晒隊. 話咁快三日食完一罐, 已經食第二罐了. 不過始終都係唔想放太耐. 有一罐我拎左返公司大家食. 食過都話勁正. 

今次都算排隊都排得值既...