第三隻...

兩則女王新聞:

- 據外電引述老朽夫人報導, 是日女王對腳裝上了第三代 AfterBurner Turbo I 型摩打, 以平均速度每秒 0.25米爬行, 即4秒前爬一米, 最高速度達每秒 0.4 米, 即 2.5 秒爬完一米. 老朽夫人並稱, 早知帶女王去玩爬行比賽贏返幾條尿片回家幫補一下云云.

- 老朽是日早上觀察所得, 女王開始有第三隻牙仔在下顎前端形成, 並開始對老朽沿岸一帶之糧倉構成威脅, 故老朽已提醒府上所有民眾盡快完成家中各項入貨措施, 並除時準備乾淨軟身牙膠, 以防女王來襲時可以減少損失.

呢節女王新聞報告完畢.

又係心 "翕" 的新聞...

老朽原本想休息一天, 準備呢期開始又旺返的證婚工作 (過o左年嘛!), 不過睇到報紙兩單新聞, 忍不住要寫寫...

是日生果報:
狗 娘 養 俄 女
苦 命 童 遭 冷 落 　 只 懂 吠 四 腳 爬

當 孟 買 貧 民 窟 居 民 高 呼 「 我 們 不 是 dog 」 ， 俄 羅 斯 3 歲 女 童 馬 季 納 （ Madina ） 卻 肯 定 是 「 小 犬 女 」 。 媽 媽 酗 酒 ， 爸 爸 離 家 出 走 ， 馬 季 納 自 小 由 家 中 狗 狗 做 保 母 ， 凍 了 攬 狗 狗 取 暖 ， 餓 了 啃 骨 頭 充 飢 。 真 的 「 狗 娘 」 養 下 ， 她 漸 漸 不 懂 人 說 ， 見 到 陌 生 人 ， 四 腳 爬 爬 ， 只 懂 吠 個 不 停 。 媽 媽 無 情 ， 狗 狗 有 情 ， 「 小 犬 女 」 的 故 事 ， 道 盡 酗 酒 國 度 的 悲 哀 。 ...

(其他文字請自行參閱生果報)

另一單:

不 忍 雨 中 倒 立 乞 討
「 最 美 店 員 」 送 6 歲 乞 丐 套 餐

怎 樣 才 是 最 美 麗 的 女 孩 子 ？ 江 蘇 常 州 延 陵 西 路 周 二 中 午 大 雨 滂 沱 ， 一 名 小 女 孩 在 街 上 倒 立 行 乞 。 一 名 在 時 裝 店 任 店 員 的 少 女 ， 上 前 與 她 交 談 幾 句 後 ， 便 走 進 旁 邊 的 麥 當 勞 快 餐 店 ， 花 了 約 半 日 的 工 資 買 來 一 份 快 餐 給 她 吃 。 有 網 友 拍 下 這 感 人 的 情 景 ， 網 友 們 大 讚 ， 這 善 良 少 女 就 是 「 常 州 最 美 女 店 員 。 」 ...

(都係o個句: 其他文字請自行參閱生果報)

***

唔知你睇完有咩感想喇, 我剩係覺得 -- 乜世界有o的咁殘忍o既人o架...

過年時, 在家附近的街道, 見到兩個狀似媽媽的女人, 一個抱住bb, 另一個抱住個一歲多的孩子, 兩人在不同地點行乞, 但同時也是在身旁放了一盒維他奶, 大概是給 bb/小孩喝的.

九成九, 都係由集團操縱的內地行乞團, 分分鐘, 呢o的女人根本不是細路的媽媽, 甚至可能是拐帶回來的.

老朽好少咒人, 因為好折福的, 但係畀我見到到班冚家富貴, 我實咒到佢無天裝, 無地葬... 妖! 真係燢...

...

那日回到家中, 我和夫人幫著到厚一厚靚一靚拜年戰衣的喬喬換衫仔時, 忍不住抱她埋臉旁說...

...「衰豬知唔知你好幸福呀... 唔好再扭計喇o下...」

三隻癲狗...

如果你是社民連的粉絲, 對不起, 我正是說那三位議員.

今日財爺發表預算案, 預o左無驚喜, 尤其對於中產, 更加無咩希望; 唯一最高興係加煙草稅, 真係要食o既唔該畀錢, 戒到o既唔該即刻戒, 相信政府收入起碼應不會減少得幾多.

當然, 聽到無咩益到低下層的市民, 社民連三傑自動開火, 蕉都一早準備好, 行動快過飛虎隊.

例牌, 玩幾分鐘, 齊齊被趕, 出去飲茶.

夫出去飲茶者, 並非老朽亂蓋, 其實老朽雙親已多次在星期三下午立法會會議期間, 見到三人 (有時兩人) 在中環立法會附近的 "皇廷匯" 嘆返個特價一盅兩件. 雖然老朽雙親年至花甲, 但總不至於一次過認錯三人吧?

老實講, 一向對黃毓民的言論甚有好感, 至今仍是. 之前在商台的節目, 雖然毓民先生鬧得口沫橫飛, 但他說話言之有物, 比起大班那些有佢講無人講的所謂 "名咀", 高出不只一班. 但奈何今屆立會, 和梁國雄癲埋一份.

梁國雄倒也不是省油的燈, 文筆其實相當相當不錯, 正所謂口誅筆伐, 如投戈, 如匕首; 他功力頗深; 但係往往以 "公民抗命" 去為自己的暴力行為辯護; 另一方面, 如果有時間翻看去屆立會紀錄, 你會發現, 梁議員除了鬧人外, 其實無咩實質提出過. 做警察的朋友們試過, 梁議員在見到有記者時就會發難和警員對抗, 但記者一走, 他立即乖過你同我, 仲同警察講 "得, 我自己走".

咁就係公民抗命, 哦!

陳偉業係小弟最最最不敢恭維的一個. 之前在醫院工作時, 他往往會帶一些所謂 "苦主" 到醫院示威, 老朽印象尤深的是幾次所謂 "竄改醫療紀錄", 陳議員帶埋幾位死者的子女呢度去o個度去, 後來發現根本那位老人家是其他自然原因過身的, 而且所謂 "按鐘無人理" 完全不成立 (相信係老人家因為 dementia (神志不清) 而記錯, 事實上醫院的喚人鈴如果當值護士不理會的話, 係會愈來愈大聲, 大到樓上樓下都聽到, 而且刺耳得很的, 唔理唔得). 後來警察更查出, 那些 "家人" 根本大半年來從無探望過自己父親, 其心想何事, 大家都估得到, 此等不孝子, 本已可誅, 不過陳議員未審事件, 已經大吹大擂, 到後來警察和死因庭查明事件後就銷聲匿跡, 隻字不提此事, 咁做議員, 唔好意思, 我都識, 不過我做唔出.

一向對政府高官多少有點同情, 人o地可以無理暴力, 但佢o地唔得, 返屋企打枕頭倒還可以. 曾俊華今日話佢o地 "無聊幼稚" 已經畀o左面投佢o地票的市民, 但係, 老朽覺得, 香港立法會有它的莊嚴, 不論你同意與否, 你入得去你就要守最基本的議事規則, 將香港搞到台灣立法院咁下下子全武行, no way!

估o下係乜...

一罌咁o既o野...

... 話說老朽身為天主教友, 明天(2月25日) 是四旬期第一天, 即係耶穌受難前四十天, 按教會傳統會有 "聖灰瞻禮", 即將去年受難節前一星期教堂派的棕櫚枝燒成灰, 之後點在前額以作紀念, 教友亦應守齋和做克己 (即節制自己的生活去為他人著想之類).


說回上面那支東西, 其實是潮州人的桔油. 香港食潮菜的炸蝦/蟹棗時, 一般會奉上一碟甜酸醬, 有時係梅膏醬, 但其實真正的潮州 "架己冷" 係會用呢隻桔油的. 那... 和守齋又有何干係呢..?

當年工作時, 高醫生就係介紹了我們一班同事食呢隻桔油, 發覺清香甜美, 比一般的蘸醬來得清而甘, 更能帶出蝦蟹的鮮味. 後來得知上次送 "廣祥泰老抽" 的那位大狀的太太原來是潮州人, 而且娘家開設香港某大潮州菜館, 故冒昧一問; 大狀有心, 老朽以半斤鏞記揀手鵝肝腸相贈, 換來此罌由潮汕家鄉帶來之桔油.

說了半天, 即係關守齋咩事得o架...? -- 其實就咁, 守齋呢, 我們不可吃紅肉, 而且不可吃得太飽. 而桔油呢, 可以蘸煎炸食品外, 和蝦蟹本身已是絕配, 故今晚老朽雖未有開油鑊炸東西, 卻在 Citysuper 買來了熟的大虎蝦一袋用來配桔油 (真不知是為桔油買蝦, 還是蝦是主角了), 今晚先舀了小碟試試數隻, 發覺果然襯得很; 那明天就算守齋都有好東西, 在祈禱中也不忘滿足也!

另, 有關天主教四旬期守齋的資料: http://www.catholic.org.hk/v2/b5/know/aknow_02.html (鳴謝主教座堂禮節司田少提供...) :)

最後一輪面試...

早兩星期收到義工局的 email, 話想老朽繼續幫手做 last 一 round 的東亞運義工 interviewer. 仲話今次 in 特別多人, 而且一次開十組 group... 似乎有點趕, 日期由3月7日去到3月22日, 總共 6 days. 上星期尾又補多個電話來話急 call -- 因為唔夠人幫手 in.

當然, 老朽極想幫手, 但係撞正 3 月, 比較多證婚 (咁結婚都係星期六日多嘛), 又要湊女, 仲有早幾日咪話收到個 email 話義工領袖 training o既... 又係撞時間... 我都未知去唔去到呢.

其實 in 義工自己係好開心的, 仲開心過返工搵錢, 因為大家都係出心做事的人; 仲記得之前其中有一次 interview, 當中有一位有禮而且長得很標緻的女生, 有一位 interviewer (是女士來的, 說穿了避免誤會) 暗暗在紙上寫了 "禮儀小姐!" 四個字加個感嘆號; 我們幾個 intervieweres 都忍俊不禁, 齊齊爆笑, 但係又要忍住, 搞到一班義工 candidates 望住我們搲晒頭.

不過今一水已經係三月, in 得來 train 得來, 已經 10-11月... 12月就係東亞運喇喎, 會唔會急o左少少呢...?

大佬, 乜突然間, 成個 game plan 好似落雨收柴咁趕o既... 有o的驚喎...!

女王出巡 - 銅鑼灣

老朽和夫人都剩下不少假, 所以是日下午就請了假, 帶了喬喬往銅鑼灣走了一轉.

其實出到去都已經5時, 加上女王又要開餐, 查實只係去了 haagen daz 食雪糕同埋去為女王揀o的春裝. 而去 haagan daz 的原因, 就係因為早前收喜帖, 入面的不是餅卡, 而是一張五十大元 (咁大把!!) 的雪糕券. 今次真係 "執條襪帶累身家"...

呢個就係女王一見到個雪糕 tea set 的動作...

個 tea set 減埋價後都要百多元, 不過老實講, 好耐無和夫人出來食 tea 了, 貴一貴都大呼抵食...

女王今日心情大靚, 見到咩都笑一餐, 包括 Mothercare 入面o的紅色衫仔... 點解就無人知了...

搬竇計劃...

老朽的 "鐵竇" 改建為正義道 101 號後, 會增設別館, 慢慢地 "可能" 會搬至 yahoo - 貪那邊以中文較多, 而且留言可以容易地管理, 暫時未知道那邊的測試會是怎樣, 但呢度仍然會係主力, 不過兩邊的留言版都已經開放, 而到真係搬竇時亦會在此知會, 謝謝.

yahoo 的正義道 101 號別館: http://hk.myblog.yahoo.com/oldlord-nail

《旅遊集誌》發佈會

一班工作人員話今日在旺角一間樓上 cafe 搞個新書發佈會, 也邀請了出版社和幾間網上 & 平面報章傳媒作個小小報導.

與其說是發佈會, 不如說是作者 & 友人交流會.

老朽卻臨時被征召入伍做了半個司儀, 而後半部分就因為大家四圍找出席的作者們拍照和簽名, 所以影唔切相. 這相中上面的是今天我們的發佈會上用的名字牌, 當然不是說老朽是唯一的作者了.

打開書本的頁首, 是一格格作者的筆名, 45 位作者 (有三 "位" 是三對人來的, 而又有一位用了兩個名字, 所以 43 格卻有 45 個名字) 今天到了三分之二, 大家開開心心的交流了數小時, 或許, 老朽會盡量找齊無到的來簽名的 -- 可惜, 有一位卻永遠找不回來了...

...
...

...思誦, 我們素未謀面, 只是大家在網上有些微的接觸, 大家現在卻是在新聞上得知你的離去 - 作為神的子女和僕人, 你可算是做到了本份, 絕不會空手見主了, 連走的時候也是在服務著... 你的離去, 在香港引來十多天的迴響, 之後便發生了四川大地震 -- 我知道, 如果你還在我們這兒的話, 你一定會馬上去四川事工/服務的. 或者, 呢個就係上主讓你休息, 我相信祂應該都會滿意你了... 希望, 你會一直為全香港, 甚至全世界的義工們在你的地方代禱.

你走了大半年, 你的網頁依然絡繹地有訪客留言, 從而也知道你的紀念基金開始運作了, 大概, 你在另一個地方也會為這而感到安慰吧...?

http://www.royto.com

約克郡布甸

英國人統治香港百多年, 一班英國紳士到今時今日都 "傳頌" 著他們成功將英國的文化和文明帶來香港, 包括法律, 金融體制, 政府架構, 當然少不了的下午茶文化.

但除了下午茶外, 英國人卻有一樣文化是完全沒有帶過來的, 就是他們的飲食文化. 老朽就是覺得呢樣係英國佬最失敗的地方.

如果說他們帶了飲食過來, 但香港人不接受, 倒還罷了, 但問題是香港人根本不知道英國人食甚麼過活; 到現在, 還有 99% 的香港人也說著英國人只會吃炸魚薯條和煙肉, 叻少少的還會記得他們好多時食薯泥, 青豆和鹹牛肉罐頭.

其實英國人的飲食, 遠不只於此, 雖然和歐洲相比, 沒有了法國菜的幼細, 意大利菜的五味紛陳, 甚至德國菜的豪邁, 卻有一種很獨特 (獨特到有點說不出) 的文化.

去過英國留學的朋友, 大概會記得被 "強迫" 在中學飯堂食過的肉批, 又或者係烤雞. 而老朽雖然未放過洋, 卻倒也接觸過一種叫 Yorkshire Pudding 的食品.

本身不是大家想像的 "布甸", 因為其實是一塊頭的麵包, 烘得外面是少少焦脆的, 中間外皮有少少凹陷, 盛著一點燒汁, 而內裡則是鬆軟的纖維, 通常是和燒牛肉加上醬汁一起吃的.

在銅鑼灣一間美式燒牛肉店 Lawry's 吃過, 做得好好; 曾留學英倫的友人說比英國的更好味, 因為外皮脆得很.

中環 SOHO 最近就開了一新店, 名字就叫 Yorkshire Pudding. 今天原本想約老友桃花島主一起試菜, 卻原來佢老人家今日放假, 唯有自己一人前往.

叫了一個烤豬腩肉 (因為晚上約了媽媽家中啖牛, 所以早上不食牛, 費事咁燥) 上碟時果然係有點雜亂...

還好這 Yorkshire Pudding 加上 gravy 後雖然無 Lawry's 的香脆, 都還算是不俗, 唯一係等待時間較長, 差不多 20 分鐘, 因為烤焗個包需時. 驚喜的是碟上伴菜的炒雜菜附上了兩小塊英式的炸豬皮, 香口得很. 誠我輩 "聚脂兵團" 之福!

吃過這包後其實已經好飽, 但秉承老朽 "甜品使人開心" 的大道理, 還點了一份 Sticky Toffee Pudding - 今次係似 brownie 的蛋糕, 上面淋上了拖肥漿, 旁加一塊 clotted cream (打至比較硬身的忌廉) (最傳統的食法就是用 clotted cream 加上面食, 會香滑少少, 現在多數人食呢類o野時都會加雪糕). 呢味野, 味就十分不錯, 不過硬是覺得不夠拖肥漿呢! :)


食到飽一飽, 馬上起程回家準備瘋狂購物, 因為屋企附近的百貨公司做緊嬰兒用品節, 要去掃貨給女王哦...

(不過今餐張單差不多二百九十大洋, 似乎貴了點...) -_-"

好戰份子...

已經三年無打 wargame 了.

八年前第一次收到律師樓的一點 commission, 跑了去旺角廣華街買了一支電動氣槍, 是奧地利的 AUG (說出來大部分朋友都唔知係乜, 不如畀張型仔相你們睇o下... 張相好似係老友菲利大王影的, 連我都覺得都算係 ok 型喎 - 因為遮o左大半邊面!)

之後就自己一個人膽粗粗去打 wargame, join o的氣槍店的團, 不過一直都無固定的槍友.

打 wargame 最最最講求的不是你支槍有幾勁或者係裝備有幾型, 而是自律, 因為不論是我玩開的 BB 彈或是油漆彈, 都需要有自己中彈後 "認死" 的規定. 不過好多時人就係有人性, 好多時都玩到火起, 就是因為有人中彈不認死 (唔好話呀, 漆彈都可以唔認o架!). 直到後來 (差不多 2002 年了) 在網上碰上一班玩得比較公正的老友, 就開始了參加他們的 "隊伍".

一班老友, 不講究衣飾 (老朽一向鍾情德軍制服, 不論是二戰或當代, 但其他朋友真係雜牌軍, 咩都有), 但玩得認真之餘, 知分寸, 好多時更有 "未打先死" 的現象 - 即明知自己死梗, 無謂中彈痛多一o野, 故提早認死之謂.

隔一兩星期就打一次, 當時的老朽, 比現在身形 fit 得多.

不過到 04 05 年結婚後, 打少了, 有時兩個月先打一次, 蓋因夫人不喜星期日無人陪. 而自年多前夫人有喜, 懷了女王後, 更加完全未有步入戰場, 擁有的成排氣槍都開始缺油生鏽, 慘不忍睹!

究竟, 老朽幾時先有得再打 wargame 呢...? 不如大家來個競猜遊戲, 猜中者有神秘獎品乙份...

又係醫院...

蘇利民昨日都認真忙, 不過可能係佢自己想o既, 一次過玩晒兩單, 唔使煩幾日.



其實馬學章醫生食呢隻都唔知係唔係死貓, 不過可惜佢係高層, 或者死者的死因真係未必一定關事 (正如老朽之前所說), 但係佢 "解畫" 的形象工夫做得不到家就唔係第一日知o架喇... 老朽當年已經覺得, 由醫生去管一間醫院, 佢識醫人, 醫得好叻, 但係讀個不長不短的管理 course 就去管一千幾百人, 會唔會兒戲o左少少呢... 反而急症室的部門主管吳醫生, 老朽倒相信他有點點無辜. 老朽依稀記得當年曾和吳醫生就著其他事故開會, 覺得他其實是一個好醫生, 不過今次事件發生在 A&E, 為他來說, 實屬不幸而已.

昨晚搭車聽電台, 老朽一向不太喜歡商業一台傍晚的清談節目, 嫌那女主持太過尖酸, 不過昨晚倒聽到一句較為中肯的說話 - 就是 「今次事件, 大概不是真正的錯失; 而係一個缺乏同情心的表現」不過, "缺乏同情心", 未必係導致一個人死亡的原因, 所以就算有關的家屬循民事途徑索償, 亦不一定可以得到甚麼.

至於東區醫院, 簡直係一場驚世鬧劇. 查實殮房的員工工作好多時都相當 "千差" 已經係眾所周知的事, 咁若干程度上, 佢都好有o的 "慘" -- 因為他們的工作不能夠救人 (可以話係成間醫院唯一完全和救人無關的部門), 而且無任何特別的挑戰, 待久了, 自然會變得因循, 一因循就容易出錯, 而且老朽不能排除有時為了掩飾自己平日工作都做得不齊, 便老作自己在何年何月何日何時根據本身工作的範疇做過何種工作 (例如將廢物運走), 但原來那天根本無做過這工作 (即係 "吞撲"). 但追問起來又不敢說自己 "吞撲", 於是, 成班警察便被他老點了去找垃圾, 找了成個星期, 其實係去了運吉.

有人會問, 點解而家咁多醫療事故呢? 老朽告訴你, 其實以前都多o架, 只係有事無人知之嘛! 又或者, 港英年代做愚民工作做得好呢! 唉!

呢樣小食... @@"

在金鐘的 "偉大" 見到, 即管一試...

原來都係普通 onion rings... 其實個味同o係 Burger King 食完全唔同... 雖然都唔差, 不過見包o野幾得意所以都影上來... 十八大洋, 抵唔抵就真係見仁見智喇...

女王官式照...

有朋友 msn 同埋o係佢o地自己個 blog 話我擺得女王相少得滯... 而家補幾張先... :p

(下次有留言唔該o係我呢度留丫各位大佬... 唔係好難追返你們講咩o架...) :)

呢張係老朽夫人影o既 "爆度" 相... 得啖笑o既.




呢張明顯係過年時用來呃利是o既戰衣...







早兩日天氣無啦啦回暖, 整張性感少少o既玉/肉照先...

睇住先啦, 唔係睇蝕晒我個女王呀... 嘿嘿! (車! 巴閉!) =.=

義工 training...

呀.......

呢次真係捉蟲...

剛剛收到以下的 email...

香港2009東亞運動會義工計劃

義工領袖培訓邀請

香港2009東亞運動會義工計劃將舉行義工領袖培訓課程，讓義工領袖更能掌握管理義工的技巧及提昇活動統籌的知識，同時加深對服務情況的了解。現特致函邀請您出席培訓課程如下：...

...
...
...
Volunteer Service Management 義務工作管理
2009年3月7日 (星期六)1000—1730 (2節)旺角社區會堂
或 2009年3月22日 (星期日)1000—1730 (2節)中環測量師公會

Volunteer Service Risk Management 義務工作風險管理
2009年3月8日 (星期日)1000—1730 (2節)中環測量師公會
或2009年4月26日 (星期日)1000—1730 (2節)中環測量師公會

Group Management and Supervision 團隊管理及督導
2009年3月14日 (星期六)1000—1730 (2節)旺角社區會堂
2009年4月19日 (星期日)1000—1730 (2節)中環測量師公會

Leadership and Team Building 領導才能及建立團隊精神
2009年3月15日 (星期日)1000—1730 (2節)中環測量師公會
或2009年3月29日 (星期日)1000—1730 (2節)中環測量師公會

有點頭痕... 日日都係全日, 我驚問唔到老婆大人申請喎... 仲要湊女呢..., 同埋有兩日仲要證婚監禮添... 有無得分半日咁上o架... 同埋, 義工風險管理... 以前我教人呢樣o架喎... 有無得免役呢... @@"

情人節的節目...

1) 證婚
2) 煮飯
3) 湊女
4) 發燒...!

今日下午去了薄扶林的伯達(大) 尼堂證婚. 介紹我的是教會的朋友, 不過因為雙方都無領洗, 故不在教堂行禮, 卻見到不少教會的朋友到場.

不是第一次去這裡了, 不過之前都是以朋友的 wedding planner 或者兄弟的身份出現, 今次站的位置不同, 感覺也很不同, 以主禮的身份站在昔日的祭台上; 總是覺得自己像是和百多年前的法國外方傳教士和神父在對話神交一樣, 「感覺良好」.

今天的新人, 男的係成熟型, 真係型o個隻, 長髮加鬍子卻一點都不老餅或者 "縷憂"; 新娘子係相當之小鳥依人的可愛女生, 他們年齡相差十多年, 但係外表睇唔出.

到禮成之後, 新人 "發表重要講話", 反而係新娘說出了一句 "我多謝 daddy mummy, 佢o地畀o左個好好的榜樣我, 我要做得比你們更好!" 一邊講, 一邊見到有喜悅的淚水滲出, 說話不多的新郎好細心, 今次帶了紙巾 (之前幾次的新郎哥, 提o左都唔記得帶...) 老朽覺得呢一剎那, 恨自己無帶相機去捕捉呢個浪漫的一刻.

回到家中當係係煮飯仔. 是日菜單極之簡單, 只係之前整過覺得不錯的西餐...

日式番茄沙律 (加日本醬油汁加洋蔥即成, 反而係番茄要買日本溫室那種)
番茄湯 (純粹係開罐頭 -- 又係番茄!)
美國西冷扒配迷迭香焗新薯 (太太話整塊和牛太肥喎, 美國扒有肉味o的)
甜品就係... 哈哈, 竟然畀我搵到康怡吉吉島超市有急凍的 Macaroon 賣! 而且一百蚊有12件. 4 款味包朱古力, 桑子, 開心果和檸檬. 解凍後一開...



當然, 同中環 Antique, Chocolux, 仲有 Gouter de Bernadaud 比, 梗係差少少, 但係一舊水十二件, 仲想點?

奇就奇在, 吃過飯後, 無啦啦覺得成身軟晒, 之後探探熱, 又一百度, 無啦啦又病過...!! ><" (剛剛吃睡了兩小時, 所以仲寫到野... 之後又倒頭大睡!)

給太太的信

宜:

我們今年會過第一個三人行的情人節. 帶著喬喬都好難四圍去了, 不過, 好在你一向都不大喜歡各大餐廳, 每每在情人節就用個 set menu 屈你食o的你一向不愛吃的東西. 所以打從結婚開始, 每年都是我為你下廚的. 卻又唔係好知點解, 唔係你整畀我食o既?

往後, 我們還會有許多個三人行, 甚至四人行的情人節, 當然, 我不介意每年都為你準備, 只要你不介意吃. 或者, 要等好幾年後, 大概待孩子(們)長大些, 我們才會有二人世界的時刻了... 又或者, 可以帶埋孩子出去, 甚至請人睇住先...

我們十四年前認識, 你記得嗎? 你後來告訴我, 當時第一個反應係 "乜我個拍檔咁矮o架... 仲諗住彈琴o既男仔好型添!". 我當時的第一個反應, 就係 "乜我個拍檔咁樣炳o架... 仲諗住彈琴o既女仔好有氣質好靚添!"

不知從何時起 (大約是成莊人去 camp 吧?) 大家的感覺不同了. 你後來說過, 兩個人在一起, 係 "感情+感覺". 人一定係以感覺行頭的, 但日子一久, 有感情才可以扎根. 當時的我比較薯頭, 聽到你一番話, 覺得你好 "高"... 感覺突然來訪, 就因為人是感性的動物, 所以會中招. 而你卻是例外地特別感性的獅子座 --

要男生說「我愛你」係極度難為情的, 但在你訓練下, 我有時不用等情人節也會說, 因為表達出自己的真感覺時, 內心的難為情其實係來自真實的愛的感覺. 而就因為你喜歡, 所以我當年對著鏡不知練習了多少千遍, 使自己不再面紅, 才對住你說出來...

記得嗎? 我們不是由開始至今都是無風無浪的... 在97年, 有幾個月我對你突然無晒感覺, 只是當時我沒說出口, 不過我曾經想過, 我們會否就此玩完? 而到 98 年情人節後, 你突然告訴我, 說你也對我沒有了感覺, 而且心中就是覺得我們不可能走在一起. 不過, 一星期後, 你又突然話我知, 你找回那感覺了... 當時我覺得奇怪, 不過, 細想一下... 既然是感覺, 可來可去, 只是多用時間去將感情扎根, 到現在, 感覺和感情竟然可以像榕樹一樣, 一邊在地下生長, 一邊在地面上也長出氣根來. 老實說, 有點始料不及, 因為畢竟, 你是我咁大個人的第二位女友 (由拍拖前你也知道的哦!), 而我則是你第一個, 也是最後一個.

仍鍾愛煲港劇的你, 昨晚一邊抱著喬喬, 一邊淌著兩滴眼淚看著陳豪用口香糖幫黎姿吊返起隻戒指; 你問我世上有無真的幸福指環. 我隨口的答案是「斷估 Mabelle 有出o卦!」... 然而, 有一句無講出來的, 就是...「幸福指環, 我們兩個不是都已經戴著嗎?」 這戒指, 有著天主在聖殿內的祝福, 也因為這樣, 我們便成了少數現代依然每天戴著指環上班的人.

Tiffany 的人告訴我, 五年可以去打磨一次, 不會怎樣磨蝕戒指的. 不過, 大概我們不會去打磨了, 這些年來的印記, 還有家務留下的痕, 也是我們在一起的證據. 在不知多少年後, 不論是我走先或是你先回天父旁, 我也希望這些回成為我們回憶的一部份.

Be my Valentine...

老朽, 2009

二十四橋明月夜

新年, 過了新十五, 少不免有一大堆的春茗.

因為幫了一些團體和專業組織作義務的法律工作, 故都在受遨請之列, 但因為女王的關係, 今年多數都辭謝了.

有一個卻係不可能推的, 就是我公司為某位大大大客搞的一次, 每年一度, 已經三年在鏞記, 那末老朽就當然走唔甩, 一來酒好菜好, 二來老朽必然係寫菜之人, 三來老闆下令 (雖然o岩o岩照過肺) 無得唔去也.

呢一餐不算太奢華, 但因為之前去過幾次, 要想出部分有新意的菜餚, 諗到頭爆, 最後在行政經理兼禮賓司威哥和 Catherine 姐幫忙下, 寫了數味珍品小吃和一隻 "網球拍", 菜單如後:

四小碟 -
秘製燻蛋 (與江浙的燻蛋不同, 蛋黃不溏心, 卻係加入了其他材料攪拌過填回蛋心)
欖菜烏魚扣 (為台式小吃, 係烏頭的胃灼熟再拌欖菜和麻油)
肥燶叉頭 (想不到上次一役後鏞記仲敢畀叉燒我食... 但今次, 的確係夠肥了)
爽滑魚皮 (我食過, 但老闆未, 所以再叫)

燒鵝半隻 (鏞記有個不為人知的傳說, 就是有部分高層人士可以直接入廚房烤箱揀燒鵝, 是晚的燒鵝姑真係勁勁勁好吃!)

香茜陳皮燉鴨湯 (講明用三十年陳皮, 加上燉透的芫茜, 下火之餘沒有了芫茜的草味, 一絕!)



廣肚公扒豆苗 (廣肚公者, 大鰵魚之花膠公也; 花膠分公 "也母", 公肉厚宜燒扣, "也母"薄闊合煮湯. 是晚係鏞記甘老闆開倉, 將已無貨之巴基斯坦大公膠取出奉客, 我輩在此拜謝!)

二十四橋明月夜 (呢個就係今晚的 highlight, 出自蔡瀾和金庸的「射雕英雄宴」, 書中記載了原料卻無詳細製法, 係由金庸和鏞記合作 "卒" 返個菜譜出來的, 係用原隻金華陳腿開邊挖二十四個洞, 填入豆腐球蒸, 前後需三天的時間製作; 食味係想不到的超絕品! 豆腐滲了火腿香但不過鹹, 原著係食完豆腐後不食火腿的, 但咁食法未免 "折墮" o左o的, 故現在鏞記會將火腿片出下酒, 又或者斬開等食客帶回家煲湯煮粥, 因為火腿只經蒸熱, 食味仍在)

乾煎金蠔 (又係想不到, 鏞記都找到巨大的金蠔; 雖然老朽較喜歡大榮華東翁廳的「爽蠔」, 但今晚的金蠔已經係讚不絕口了)

煙燻大鷹倉 (本來鏞記廚房講明唔整呢味, 因為新年前後太忙, 最後威哥和 Catherina "翳" 佢o地先肯整... 和馬車會 (此味之龍頭) 比, 是次鷹倉較清淡, 但上色係用原天然的甘荀榨汁而成, 而且魚身肥美, 老朽不太喜食魚也不客氣地食了兩大件)

單尾加上了原煲臘味飯呀, 甜品呀生果之類不在話下. 加埋是晚開了 La Mission Haut Brion 1996, 是晚一餐, 不用問價錢, 但求客戶開心, 老朽已經阿彌陀佛了. 難得係客人不只合意, 更加係喜形於色的道謝, 鏞記今次又記一功...

不過, 次次都食鏞記, 老朽驚冷落了其他以前食開的老店呢... 大概都係時候回訪其他舊友了...

《旅遊集誌》正式出版!

終於都見到有得賣了...

各位大哥大姐到此一遊的話, 請到各大書局多多支持! 雖然文筆無各大文豪甚至各大 "blog 豪" 咁好, 但係幾十人集起來的力量, 都值得大家一下掌聲吧...? :)

抱著你...

原本好眼訓, 不過剛剛發生的事使我想寫一寫...

這幾天我阿女王都係開始鍾意企在她的床仔上, 雙手扶著床欄, 又不知何解, 這兩天好像唔使訓咁, 日日訓加埋都唔知有無十個鐘, 叫人多少有點擔心.

今晚又係咁, 食埋11點幾那支奶 (足 7 安 (210ml) 了), 之後開始 "卒眼" "搲頭" "耷耷頭" -- 都是些嬰兒代表想睡的動作. 於是就抱她入房, 點知搞足半個鐘, 女王都係想起身, 按佢返落床就喊... 企起身呢就尖叫同埋笑... =.=

最後, 我都係投降, 都係要抱.
(至於老朽夫人, 因太倦關係, 老朽著她先睡. 並非夫人麻木)

抱著行o下行下, 又走出露台睇o下街. 等了十多分鐘, 終於一頭裁在老朽膊上, 睡著了.

或者, 其實女王不是曳曳, 也不是想表演佢而家識企, 可能, 她只是想說「爸爸, 抱抱!」 (寫到這裡, 老朽竟然開始眼濕濕...)

但通常, 做父母的總想嬰孩早點可以自己睡. 所以有時會避免抱得太多. 不過, 人就係鍾意矛盾 - BB 細個時你想佢快點大個, 大個呢, 就會想佢好似細個時咁... 唉!

不過, 抱著她時, 女王又會望望o下, 之後就會好嗲咁俟過來. 老朽一定會珍惜呢一幕, 因為, 可能幾年, 又或者十年八載之後, 女王都唔會再 show 我抱了.

又, 老朽和夫人有個特別的動作, 就是每天就算好辛苦又好, 病緊又好, 都一定會和她來一個擁抱.

早前外國有個 big hug 的行動, 傳了過來香港, 雖然回應的人不多, 卻是很受落.

人好奇怪, 生出來就會有依賴性. 在擁抱時, 你知道和你擁抱的人在支持你, 人也會變得安心, 踏實.

不如大家都考慮o下搵個人來抱抱丫!
(老朽估明天如果無啦啦抱著老媽子的話, 佢一定會大叫「吁! 衰仔, 撞鬼咩你!」)

九星連珠 加 金星凌日

都說過年是聚首的好時機, 千年不會見的朋友都會約在一起.

上星期尾又被大老闆照肺, 話要 review o的 work 喎... 其實即係迫倉, 仲畀o左好多唔係好難聽但係相當有骨的說話, 最抵死係佢話 "你跟我咁多年, 我真係覺得同你有o的感情, 不過呢... (下刪一萬字)" 谷住一肚子又唔係勞氣, 但係又唔係順氣o既感覺, 走了去赴一個難得的宴會:

一班十五年前畢業的中學同學, 在其中一位快要結婚的成員班長正策動下 (不過又唔係派炸彈喎), 找到十幾位出來, 又碰著他們有意去鏞記, 於是老朽便提出由小弟訂位及寫菜, 每位以 HK$400 以下為限. (其實都已經幾貴了...)

重要的不是食了甚麼 (雖然圖中的 "鳳舞金錢" (吊燒雞拼金錢雞) 和其他菜也是好吃得很), 而是這聚會只約了幾天, 竟然可以集齊十多人浩浩蕩蕩的操入鏞記, 這不是幾百年一遇的九星連珠是甚麼?

十三人 (後來再來三位, 合十六件男生) 竟然飲了六支酒, 以老朽來說, 算多了. 不過無拍下酒樽的列陣情景, 因為酒樓不想阻地方而收走了吉樽. 小弟貢獻一支甜白酒 Gewurztraminer, 金醫生拎了一支由波都五大家族在智利擁有的赤霞珠 (Cab Sauvignon), 剛剛開公司做廣告 Creative Director o既雞東就豪少少, 開了波都名莊 "Mark 哥" 的副牌, 還有搞手班長正拎了三支澳洲 Barossa Valley 來, 老朽已經不太記得有無飲齊咁多支酒了... 不知是否飲大了, 老朽竟又應承了班長到其大日子時會免費監禮證婚... @@"

席上真係杯盤跌宕, 成班 "麻甩" 狼狼藉藉而且放浪形骸, 始終大家都係男校出身... 大夥雖然已經略為學有所成或者都搵到啖食, 但都忍不了粗口爛舌不堪入耳 (嘻嘻... 連我都係!). 早知叫鏞記強哥幫手找個靜少少的角落, 搞到失禮大庭廣眾, 累埋用名訂位的老朽丫嘛... -_-"

成班蝗蟲食極唔厭, 張單真係水蛇春咁長.

***

金星凌日, 雖然無九星連珠咁誇, 但係指的就是另一班就是大學時代的合唱團成員. 當中的幹事會友們 (簡稱 「莊友」) 到今天, 少說也已經三數年無聚在一起 (對上一次, 大概是05年尾 "老細" 大婚之喜...) 原來, 一晃已是十年前有多畢業了...

人稱 "老蝦皇爺" 的老友 "狂人" 講過一句經典 "無事應常聚". 小弟現在好多時都會記著這句, 因為你總不知道, 下一刻會遇到的事, 人, 總希望無憾; 亦因為咁, 大概都係時候找一班莊友出來 (一來為小女 Petrina 的利是錢打算打算!) 聚一聚... 當中又有些已經有小孩的, 還好老朽的元帥府執通之後還可以坐下十來人, 否則無位放 bb 車就真係唔好意思.

太耐無見, 話題沒有變得生疏, 或者係因為有 facebook, 大家多了可以傾談的東西, 之前已經在 facebook 傾落幾句的朋友, 又繼續傾傾傾, 老朽當然又係開了油鑊炸了些小吃等大家邊食邊傾, 又估不到, 一陣已經過了四小時 (成班 bb 仲輪流食奶, 壯觀得很).

加多句, 我們莊, 齊莊十九人, 十二女六男, 竟然可以發展到四對人拍拖 (包括老朽) 而當中有兩對結婚 (也包括老朽), 雖然有兩對散o左, 但係, 都算係個紀錄了...

不知道大家有沒有發覺, 每次相聚, 末了大家總是希望快點又再搞多一次, 傾傾講講一大輪, 多數最後又係無o左件事, 卒之又係等返三五七個月, 甚至三五七年才又搞一次九星連珠. 今次見完, 無出來的又話要搞多一次, 且看等下次這些 "天文奇景" 又要等幾耐了!

廣祥泰豉油 vs 私製蠔油

香港都有不少人愛吃海南雞飯, 不過知道海南雞分星馬泰幾種不同口味和醬料的人不多, 知道用邊隻醬的人更少.

新加坡的海南雞飯以文華酒店, 逸群和文東記為首, 他們用的都是一隻黑黑甜甜的老抽來蘸雞, 廣祥泰算是此 "黑油" 中的佼佼者. 濃濃甜甜的, 「掛」在雞上, 而另外也可作炒正宗粿條用 (正宗粿條即係潮洲話 "貴刁", 其實並不辣, 反而是甜豉油味的). 上次鏞記會的大狀之一早前往新加坡走了一轉, 老朽提供了數個美食地方, 大狀謂答謝小弟故千里送鵝毛, 等小弟都可以在家中自製星城海南雞.

浸製海南雞倒是知配方而未正式試過, 或者試完 ok 的話再分享. (成年前的那篇《燻雞》都係試了兩次覺得 ok 先敢 post 出來)

老友鮑魚先生每年都會和小弟互送古怪食品, 聖誕節老朽已送了半份 (都成半 kilo) 的馬會鵝肝醬, 有來有往, 鮑魚先生在農曆新年前將一罐 "電油罐" 交給小弟, 是之前試過一次的流浮山朋友自己製作的蠔油的 "完整版", 另加鮑魚先生家製蘿蔔糕一底.

此電油罐去年試過, 清甜蠔味, 世上無雙 -- 老朽唔係誇張, 呢 "罐" 蠔油, 可以打低晒乜記物記, 連九龍醬園或者鉅利又或者廖氏等等都未必係佢對手. 今年有幸再次食到, 真係福份!

呢幾日都係就咁淥菜點蠔油食算了! :)

《旅遊集誌》...

老朽自問文筆只屬一般, 不過有鋪癮係鍾意寫o下 (而家係打下) o野. 亦因為咁, 一位屬超級哈日但不崇日的同事大雄 (www.nobitaworld.com - 不過佢而家少了 update) 撩起下, 便和幾十位網友一起, 每人寫幾篇散文, 講下自己對旅遊的感受, 書本訂名為《旅遊集誌》.

書印成點未有機會看, 不過因為主編為老朽同事, 故已看了初稿. 老實說, 外表只係一般吸引, 不過始終係老朽和一班朋友共同 "生" 出來的 "仔", 點都希望佢就算唔大賣都唔好得我們自己小貓三四隻, 或者, 更希望的是多點朋友看過書本的介紹後, 不吝用幾十大元來買下一本, 當做善事也好 (我們會將部分收益捐至慈善機構, 或者係幫其中一位作者 -- 就是去年去蒙古做義工不幸意外身亡的那位) 或者都會有點得著...

或者, 可以先看看書的封面: http://travelologybook.blogspot.com/

生日快樂... :)

前日係人日, 人人生日, 加上老家搬至新地方後數月都未曾 house warming. 所以母親那邊一行廿人就在人日那天光臨老家. 而為免家慈勞累, 故 order 了美心盤菜.

本來是想去鴻星 「打盤」的, 不過價錢偏高, 一班親戚未必識欣賞; 而美心中菜的盤菜就細得滯, 反而美心快餐部有個盤菜加燒味拼盤 & 蠔油四蔬加埋個八寶鴨 plus 雞煲翅都只係千三大洋, 所以就住 budget, 唯有將心頭稍稍調低.


舍妹成日都古靈精怪 (同老朽一樣), 今次就搞作 (訂) 了一個蛋糕, 雖然 「只」是美心, 不過請睇o下個生日牌... (因為時間關係, 影得好差... 不過都見到o既... 就係一個蛋糕盤菜!) @@"

成廿人, 但係竟然食剩了半隻八寶鴨... 如果真係得一圍檯咁多人的話, 後果不堪設想...