真是一個十分難忘的週末.
不是因為去了證婚之類, 而是因為女王入了醫院.
是一家人下午去了一位年紀相當大的親戚的家, 到達時為下午四時前, 那位親戚見天熱就切了些橙給我們. 老朽就將橙用女王御用食物剪再剪開, 女王就在人家的梳化上等食, 夫人睇住.
無啦啦夫人走去搵口水肩, 無手扶住女王, 女王就更無啦啦向前走一步, 打個筋斗跌落地, 頭先著地.
時間, 就像定格一樣, 老朽兩隻手都是橙汁, 呆了. 夫人也呆了, 卻未意識到是自己闖的禍. 女王就已經大哭起來.
不過, 過了數分鐘, 女王已經收聲; 老朽把一小塊橙肉給她, 好快就又跑又跳.
誰知這只是事件的開端.
下午五時, 回到家中開餐食奶, 食晒, 好地地. 也成功地 "嘔氣".
之後, 麻煩來了. 過了十多分鐘後 無啦啦女王開始勁喊, 連抱著也喊; 有最愛的 winnie the pooh 在也一樣喊; 這是極少見的事. 哭了好一會, 之後一下咳聲, 當時老朽抱著, 已知不妙, 嘗試打側女王, 近2安的奶連同一些之前未消化的橙肉傾瀉而出. 嘔完, 女王 & 老朽衫上都有. 要換衫.
換衫後, 女王依然好扭計, 由夫人抱著在床上休息. 豈料三分鐘後突然又嘔過, 今次嘔得仲多.
又換衫.
大家估得無錯, 幾分鐘後, 再嘔多一次; 如是者嘔了五次.
在第二次時, 我們已覺得好擔心, 始終是撼到頭部後的嘔吐, 所以都要看醫生. 不過, 老朽已經夠晒鐘起程去證婚, 仲係荃灣, 由港島東過去都要不少時間的. 而呢個時候, 就需要女王成長管理局元老院出手了.
點知, 近o個個 (外母大人) 無人在家; 遠o個個 (家母) 就 shopping 緊成手o野; 所以老朽唯有將一早執家的證婚工具帶在身, 和太后一起飛奔到最近 -- 而星期六晚又有開門的兒科醫生處 (首席醫官鄒醫生星期六只開半天...)
總覺得, 好鬼邪, 女王多數有怪事時, 都係星期六日, 仲要醫生休息時, 才要嚇我們半死的. 這次也不例外. 卒之找到的那位兒科醫生說: 「應該無咩事o既, 佢只要唔係愈來愈喊得勁或者愈來愈呆滯的話, 腦壓都應該無事,或者腦部應該都無積血o既, 都未必使去醫院照 CT/MRI; 不過如果佢仲再會無啦啦自己突然嘔的話就小心o的囉」
呢句野都未講完, 女王就自發性即時嘔畀醫生睇; 好在太后有個大型口水肩有個兜在前面畀女王戴住 (預o左佢會再嘔), 無再整污糟件衫仔; 今次連中午的 ABC 粉都嘔埋出來!
醫生都呆o左幾秒, 之後補飛: 「點都好啦, 寫定封信你去養和睇o下有無野再跟進啦o下!」 (明顯卸膊)
呢個時候, 女王姑姐 & 麻麻趕到, 老朽於是唯有即刻飛的的去荃灣證婚, 一自打埋畀對新人.
成個過程, 老朽雖然知道最後一定無事, 但係 "養兒一百歲, 長憂九十九", 又點會唔擔心呢...? 一路坐車, 一路打畀女王姑姐; 知道他們在等的士時女王又嘔多一次, 整污糟埋麻麻件衫; 排前面的人心地好, 馬上讓他們上車先.
老朽到達證婚的場地時, 因為係飛的的, 所以還算趕及之前應承過新人的 "早1小時到"; 馬上 "上身", brief 司儀, 新人, 準備戒指, 和酒樓captain 傾, 搵埋影相師傅傾流程呢o的老朽覺得一定要做的工作; 只係到新人換衫準備時打了個電話給女王姑姐跟進o下.
不過因為新人都係遲了開始 (九成新人都遲o架喇, 其實正常); 所以到老朽證完婚已經係晚上9時10分了.
其實, 原本在下午知道女王要睇醫生時, 老朽可以請行家幫手 "救急", 不過就要累人家印過所有結婚證書 (每個監禮律師的證書都有特定編號, 不可用其他人的證書), 而且新人又會點諗呢? 他們信任我, "委以重任"; 我要在最後關頭放棄他們? 老朽又做不到, 而且要做得更好, 因為我知道, 人家 "旨意你", 世界也不會因為女王病了而停下來, 他們一生人一次的大事, 還是要我去幫忙的.
老朽絕不是在晒自己有幾 pro, 反而係覺得有點矛盾; 在女王有事時不能一直陪伴, 哪怕只是中間的一兩小時, 老朽也覺得太對不起了. 好在回到家中時 見到元老院四大資政除了家父 "爺爺" 要準備今天的外影活動而無來外, 都到齊了, 女王又已回復走來走去跳跳扎, 知道養和醫生看過後覺得無事; 而女王應該 "有咩都已經嘔清", 所以無需留院.
不過我們昨晚還是輪流唔訓看著女王, 老朽就是 "通頂" 更的; 所以一晚下來, 倦得很. 要去睡了... 明晚還要應酬大客, 又不知去哪裡食o的可能係背脊骨的 "美食" 了.
