「謝罪宴」之「小滿漢席」

去年二皇爺事件的時候, 或者有人記得我因此而不能飛去加拿大出席 (或參與更為貼切) 我可算其中一位歷來最要好摯友之一「百揆兄」的大婚日子。呢個真係老朽的一大憾事 -- 蓋因百揆兄當年在我登科之日專程由加國返港擔當戥穿石角色，更臨時拉伕做了半個 wedding planner.  我結得成婚多少都係百揆兄的功勞。

亦因此我是真的十分內疚的。

我無咩叻, 只係有心煮下野食, 唯有在百揆兄和嫂嫂回香港時, 煮一頓比較像樣的飯餐，希望乞求仁兄寬宏大量。當然, 百揆兄一早沒有介意我不能飛過去，卻是更使我不好意思。 因此為了那份歉意和尊重，我就想用滿漢席的方式來上菜。


因此得悉他們一月回香港後，便早於去年12月在由金邊回香港後，就開始準備菜單，亦如真正的滿漢全席一樣，添置了部分全新的食具杯碟等。  另為表誠意，老朽特意找來香港飲食界某行內聯會的巨頭，他的師父就是當年有份在國賓酒樓辦日本電視台委託的滿漢全席的飲食界前輩，查詢了部分滿漢全席的資料。先用兩星期左右的時間準備材料，但發現找不到廿八頭或以上的乾吉品鮑魚，所以最後要找飲食界一位專交半成品鮑魚給高級餐廳的老友幫手提供半成品。亦因為想用白鴿蛋, 找來了一位米芝連星級廚師朋友, 央他為我找這罕見的食材. 最後他只用了一天就找到了 (酒店米芝蓮大廚出馬係唔同既...) 雖然, 每隻要承惠廿個大洋...

早在宴會前五天，老朽已經使出十二成功力開始工作，亦隔晚先用三隻雞慢火贅四小時煮出特清的高湯備用。菜單如下:   (有 * 者為北京仿膳飯莊考究真正滿漢全席菜單的菜式)

香茗到奉: 獅峰龍井*

乾果二品:
- 暹南腰果 -腰果先浸鹽水後晾乾再焗至熟, 放涼後熱起白鑊, 放入腰果後加入炸過的金不換葉碎, 香茅粉和乾辣椒碎, 係咁用白鑊慢火炒五分鐘, 灑上青檸汁後再炒多三分鐘, 放涼食得.
- 五香杏仁* -以杏仁浸鹽水後加五香粉椒鹽焗香, 不過今次鹽水淡得滯...




攢盒一品 (九款):

醉雲白肉 - 五花肉買來盡量公整的一條, 以快刀切薄片後汆水再灼熟, 放涼後以糟鹵浸半天, 去掉大半的糟鹵後上碟.

拌蟲草花 – 蟲草花洗淨浸溫水至軟身後汆水, 放涼後加入鮮抽,少少紅糖和麻油拌勻即成, 食時可加芝麻.

蟹油黃瓜* - 就是魯菜的拍黃瓜, 小黃瓜去頭尾後先拍鬆, 大概去籽後切粗件, 抓鹽出水後加入蟹黃油 (當然可以自己整, 但美味棧韜哥有款做得唔錯既, 幾十蚊一樽 現成用已經得了)  撈埋食得.

帶子龍袍 - 大的刺身帶子先去枕出水, 之後排整齊, 每隻之間用生粉水塗抹讓每隻貼好, 之後用腐皮包起捲實, 以牙籤固定兩邊, 整條落鑊中火炸一陣再切開一件件便可. 食時喜歡的話可以點喼汁.

梅子蓮霧 
蜜燒雲腿
陳醋海蜇 – 這三味之前曾經介紹過做法, 不贅

糖醋荷藕*- 只是買來細頭的蓮藕刨成薄片炸成, 不過應分兩次炸, 今次第二之炸太猛火少少過左籠. 之後用糖醋汁(爆香少少薑末後以黃糖:鎮江醋1:1.5煮成)

椒鹽蝦乾 - 將大隻的本地蝦乾係咁意浸一浸水後加上椒鹽高火焗一陣就會有煙韌感覺; 但如果想變成脆口就可以低火焗廿分鐘.





膳湯一品:淮杞竹笙松茸火膧燉雞 – 此湯為先前做過, 今次的是「加強版」: 先隔晚用三隻雞慢火煲四小時以取清如水的高湯, 再以淮杞竹笙松茸及宣威腿骨及雲腿中下之火膧位燉多四小時。同時將部份高湯留起以作「開水豆苗」之用。 (不過最後大家太飽, 食唔到豆苗)


御菜四品上:



怪味牛腩 – 係買來坑腩頭節, 有少少崩砂位連住的), 試著加入些柱侯醬爆香, 但又加入清湯蠔油和海鮮醬還有生抽冰糖等， 又係炆焗半天後就夠腍了。「怪味」是因為他又不像清湯，但又不似柱侯腩。




 紅燒海珍* -
- 原隻吉品 - 因為遲了開工, 竟然發現家中已無廿八頭或以上之吉品,而且發唔切, 唯有向現飲老總 Louis 求救, 好在老總有半成品供應, 而且比小弟做的更專業, 解凍後
- 八頭廣肚 - 廣肚係老友峰哥之前供貨的, 呢件係同一批之中最厚身的; 發起來甚有睇頭
- 蔥燒遼參 – 刺參就中左招, 發好後為求形靚, 去石灰時大意留了些在扣位, 吃起來大失雅興, 罪過罪過…同上的是露荀,比上菜膽新穎少少. 亦係 Louis 老總建議.



餑餑一品: 仿桃花泛 - 桃花泛本來是明朝宮廷菜式, 為酸甜海鮮鍋巴, 是次用山楂乾舂成碎後加入山楂餅, 白醋及茄醬; 再以興渠(洋蔥)青豆蝦仁入饌成羹用來和鍋巴同吃. 原作應是將滾熱的羹湯淋上鍋巴面的, 一淋下去時應有 "滋滋" 聲, 紅紅白白的似桃花, 因而得名.



御菜四品下:
燕扒鴿蛋 - 得海景軒米芝蓮星級大師梁師傅供以一打鴿蛋, 因鴿蛋低脂低膽固醇但高營養，又十分難求 (一只鴿約十五日才下一隻蛋), 就算找到也動輒十多廿元才得一隻, 因其易碎故不能烚, 而要隔水蒸熟才去殼, 再用雞湯餵過成半透明狀; 另外發好半兩白燕盞, 以高湯浸住燉半小時後用以埋琉璃芡鋪於鴿蛋之上, 以添食味及口感



糟溜魚片 – 用的是花尾躉, 以細半支酒糟蛋白生粉醃魚片一夜之後拉油, 同時爆香薑蔥末將另外的酒糟加糖和生粉水推成芡, 後再下魚塊「溜」過上碟。
 

 另御菜四品本來尚有以下兩道, 已經準備好但當時客人已經好飽所以沒有上菜，分開了由客人「帶福還家」

- 茶燻仔雞 – 亦係之前做過多次的; 但今次因為大家都飽晒而未能上桌。

- 開水豆苗* - 此味應和鴿蛋同上，但同樣地因各人太飽而時間亦夜故未有上桌, 一如上述, 應以濃味而清的高湯煮豆苗, 狀似開水,味濃如羹為上.

原本我是邀請下午4點半開始客人來到, 之後傾下食下, 晚上7點開始食大菜的. 但係客人不知道原來我的安排是這樣, 大家都遲了, 成6點半才到達, 7點才開始上果仁和前菜; 所以呢晚大家食到晚上十一點仲食唔晒o的野.  最後我拎埋隻燻雞出來畀佢地「聞下」, 似乎大家都後悔點解當天唔早o的到... 哈哈哈哈...

 

 

 

 

十年．生死兩茫茫

上兩星期過年前數天秘書小姐一早 whatsapp 我, 說要探一探佢 daddy 之後遲少少回公司. 

一向都無聽聞佢尊翁有何問題, 故回到公司後順手一問, 秘書小姐已經即刻眼紅紅, 之後抽住來喊到收唔到聲.

原來係佢尊翁突然發現肺癌, 仲係四期, 醫生都話發現得遲, 無咩好搞.

當然, 好言相勸傾了幾句, 還介紹了一位老友, 他的父親早年也是發現末期的癌症, 但不知是中醫還是西醫, 又或者係個人意志, 老人家真的捱多了好幾年, 睇住老友結埋婚才含笑御鶴。

人, 就是那麼化學。無人會知幾時發生咩事.

近數天就是見到新聞開始提起十年前香港的沙士一役。想起當年, 真的還有點驚悸。

當年老朽就是在醫院的行政部工作的。每晚回到家後就是一大輪的消毒, 每天就是戴住個口罩返工. 當時老細人面廣, 我們這部門早已有自購的口罩, 而在前線同事通知下我們後方的只要用　surgical mask 就可以, 無需要用 N95.  但有天放工時就發生了一件令我們一大班同事覺得好啼笑皆非的事.

當年我們如果是夜了放工, 多數是幾位同事一起 call的士回家的. 也是當時開始有 "折頭的".  但同時當天可以早點走的話, 我們就會住醫院的一架來回地鐵站的小巴.

有一天, 我們一班同事十多人一起, 大家都戴住口罩, 放工經過街頭時, 就見到一位男士, 他是戴著一個N95 口罩的, 不過... 前面卻用剪刀剪了一個成吋的大洞, 插著一支點著的香煙!!

就在一刻, 我們成架車的同事都當入了長隆動物園一樣, 齊齊望住那位不知道成了我們的主角的男士. 而且就像極了一個充滿了氣體的球一下子戮破一樣, 整架車都歡笑起來.

當時就是這個香港，成了個「最好的時代，也是最壞的時代」。當天，香港沒有九七回歸以來的怨氣；大家雖然都隔了個口罩做人, 卻沒有了隔膜；因為帶了口罩看不到個咀, 也聽得不真實，卻使人面對面傾談時用心用眼。家人不知何時有事, 大家更珍惜。

回看一下，人在災難中的抗逆力，有時是不可思議的。不希望沙士重臨，有時卻希望人會懂得回望當時的情景。

突飛高棉

又搞左成個幾兩個月先有少少時間寫呢度, 因為呢個月真係又繼續忙到癲左. 除左公司一堆野之外, 更加神奇的是... 無啦啦收到師兄指示要飛柬埔寨金邊一趟.

其實係有客戶想在金邊開廠, 同時間我的醫生客也可能在那邊開間實驗室降低成本. 所以在師兄的另一位客戶介紹下, 認識了一位在金邊的律師. 亦因為師兄要同日飛內地見客, 這個神奇的任務就交了給我和他一位助手 (無錯, 我比較少飛, 所以師兄亦派了助手幫我手, 同時亦可以 "昅" 住我無講錯野...)  今次之行就是想打好關係, 先作個親善大使.

之前用了 email 聯絡了幾星期, 一到步就會找他. 但奇就奇在, 我們一出海關就已經見到呢位都幾年長的律師站在禁區入面等我們, 仲即刻話「上車先講」.

出面等侯的, 係一架美國總統坐過的吉普車 Cardillac. 一架咁既車在柬埔寨出現, 我真係覺得勁勁勁神奇.

之後見到有警察埋來收左司機兩蚊美金, 就知道呢度係有錢大晒既.

另外仲嚇親既係, 就係呢個時候, 車上那位年長律師告訴我們說有人話認識我們, 想代他去機場接我們機. 但一看名字, 我們聽都未聽過.  後來有金邊的朋友證實我們的電郵應該已經被「竊聽」. 大概有當地的人以為我們是有米商家所以想來巴結, 綁架倒應該是不會的. 不過小心為上. 整個行程都由當地律師安排好了.

後來愈來愈覺得神奇, 就是這架車和這位律師, 在金邊是完全通行無阻的. 我們還是那晚才知道, 原來這位是其中一位柬埔寨皇室的律師, 而且和政府關係極佳, 他又請我們去他的「其中一個莊園」飲椰青.  而且又叫司機用另一架車帶我們四圍去.  仲買到一包「高棉花生」 - 原來真係幾好吃的, 回香港後 blind tasting後發現仲正過萬里望!

我們倒是覺得, 金邊市中心是十分繁榮的, 但又有些舊舊地的建築物穿插其中; 有點像旺角和油麻地的地區. 而金邊律師也和我們說, 這只是近數年的成果, 因為再之前, 還是滿地白骨, 四處饑民的.

那天兩餐都係食中菜, 可能係因為當地律師怕我們吃不慣當地菜式啦. 而且其中一餐是在市中心一間賭場酒店吃的. 用的都是美金, 計起來和香港的普通菜館差不多, 服務倒是不錯的.

時間關係, 我們今次只可以有時間拜訪一些官員, 但其實我就好想去吳哥窟影相, 不過公務在身始終不方便.  但神怪 (兼有點嚇親) 的是, 這位律師說可以臨時為我們安排探訪法官, 但就沒有預約, 而是他打個電話後就叫了上訴庭的庭長去到他的 office後園, 而且是那位法官到了後還要在他後園等我們傾完才一起出去.  而到第二天就更神奇, 他在完全沒有預約下就車我們去了那邊的終審庭和司法部, 即時就獲得終審庭首席法官還有檢察總長的接見了. 更搞笑的是檢察總長還請我們吃... 蕉!! 仲係我地四個人連埋佢一齊圍住張會議檯一齊食!!  (喂唔係講笑, 那隻皇帝蕉真係幾好吃)

雖然係走馬看花, 不過倒還有機會一試當地菜式的, 就是第二天下午的那餐, 原來高棉菜和泰北菜都好似, 係比較偏酸辣的, 吃開泰菜的都不會抗拒. 而且他們有款辣蝦醬堅係好食, 用來下飯一流! 我仲不知廉恥地吃完問當地律師可唔可以買或者食多碟, 有點失禮.

一直以為那天是傍晚回香港的, 因為每天金邊只有一班機到香港, 那天的是傍晚機, 而且因為已經是21/12, 即係做冬那天. 所以我都預左屋企人食到尾我才到. 點知...

成個金邊機場國際線那晚就係呢班港龍機delay, 2025才飛, 港龍話會畀餐券我們食左先.  但係咁夜先起飛, 飛兩個半小時仲加埋慢一小時的時差, 即係話我要22/12 凌晨先到香港呀... 又會咁"蹺" 今年你21/12冬至呢... 唯一好在係有 WIFI 可以用手機上網, 而且似乎無咩網路限制; 我同同事就唯有一路玩手機, 一路對住機場餐廳的那碟 fish & chips 兩個傻佬一齊做冬了...

學校旅行x2

不經不覺, 原來已經兩星期無寫這裡兩星期了. 

真係太忙, 公司又忙, 屋企又忙, 而且女王有的音樂和英文班又一係考試一係就有些小比賽.  真係多野到PK.

還有就係學校的旅行, 原本是定在11月尾的, 仲要錢都畀埋, 那天夫人請不到假, 又不想我一條友帶女王, 所以請了母親大人, 即係麻麻, 同埋「打自己工」的姑姐當天一起去.  點知就係去到出發那天早上, 落雨落到音樂農莊水浸, 去不成.  仲要係臨出門口才收到學校老師打來說場地通知去不成.  更抵死的就係已繳付的旅遊車費不設回水, 成90蚊一位架大佬...

仲有仲有, 因為一直都覺得旅行食來食去都係三文治同雞翼, 簡係係折磨加沉悶, 所以我和女王一起弄了好些美食, 計有...

京醬蜜餞鴨絲青瓜比得包;
迷你熱狗;
磯燒帶子/鮑魚仔;
松葉蟹粟米沙律 (配melba toast); (由女王負責同我一起拆蟹肉同埋撈醬, 仲有加海苔架)
梅子車厘茄串.  (由女王加梅粉架)

那天早上就真係成屋都係野食了... 因為麻麻和姑姐都已經到我家, 所以最後都係決定.. 在家中食晒佢!

 

 

又過了一星期, 學校就來了一張通告,  就是旅行會改在下一星期三舉行, 即係12月5日. 

 

為避免重覆食物, 所以又諗左部份新野, 除了鮑魚仔和梅子車厘茄外, 就變成了...

 

香菰扎肉蛋絲法式三文治

三文魚茸魚子/雞肉沙律脆皮撻仔

荷蘭白蝦仔粟米露荀沙律

 

值得一提的是個撻仔我整多左十幾隻用來和女王一起請老師食的. 而撻皮係用左 Citysuper 現成的撻仔. 45元有十幾隻, 貴但係易用.

 

有時就係咁邪, 今次到我同夫人都去到喇, 點知呢... 都係有雨! 不過就唔算太大, 所以學校話照去喎. 但係就堅係凍, 大家都震震地.

 

去到音樂農莊, 雨時大時細, 不過好在之後慢慢都停左. 但係部分活動地點就積左水, 都係玩唔到. 不過玩到既幾樣好似踩高蹺, 巨型層層疊之類女王同同學就玩得好開心. 仲整左竹蜻蜓 同彩沙樽 (雖然個沙樽好快就亂晒籠)

 

 

都玩唔夠個半鐘又話食野了. 因為想搵埋老師, 所以我們專登去到最大的有蓋地方吃. 女王同夫人都吃得好開心, 好在佢地都覺得好食. 之後我同女王 (夫人要看住我們的物品) 就拎那盒整多左既撻仔去找老師, 剛好校長都在, 仲好.  正所謂雞髀打人牙骹軟丫嘛. 難保日後使唔使校長老師唔知幾時幫手架嘛, 當然, 仲要教女王尊師重道也是主要原因啦. 

 

 

當老師見到我們拎住野食來時, 有部份不知道去年我們做過小酥皮批的就會以為又係三文治之類. 但有幾位曾經吃過老朽手勢的就已經在估今年係食咩了.  他們一見到我的小撻仔, 已經覺得好得意, 仲用手機影相. 我估應該都幾好睇的. 而食亦係唔錯架 - 其實三文魚醬係在Citysuper買的. 至於雞沙律呢, 就係Mark & Spencer 出品. 我試過覺得正才用的.

 

食完又玩過, 不過今次就係私伙的吹泡泡, 仲要有老朽同女王今年的英文老師 - DANIEL (無錯, 係個男的, 仲要係大隻佬來架!) 一齊玩. 所以女王玩得更開心. 至於夫人, 呢個時候當然係去喳流灘, 幫手在旁影相, 影到夠鐘返歸算了.

朗誦比賽(二) - 女王的教室

承上文, 既然是去到 K2, 學校亦有安排可以自由參加一些朗誦比賽的話, 夫人就想何不借此機會讓女王玩玩, 又可以多張 cert, 一下唔覺意仲可能有個牌之類的.  老朽都覺得係時候讓女王接觸了. 所以就報了名.

因為我們遲了一點決定報名, 所以其實只有兩個多近三星期的練習時間, 但女王一天之內好快已經上口, 將那幾句的兒歌背得出來, 好快我也加入了動作, 而女王亦跟得好好. 三天之內已經可以見得人.  不過仍然未似是真正的朗誦. 

當時老朽想, 其實都差不多了. 所以只是 keep 住每天練幾次, 到後來離比賽只有半個星期, 女王就表演給也參加過不少次朗誦比賽的姑姐 (即係我個妹), 才由她發現女王的技巧應該讀得更似朗誦.  我驚起來上網睇下, youtube 的確有些朗誦的片段, 看起來亦真的和女王有少少分別.  另外, 又不知是否老朽太久沒有比賽, 竟然沒有教女王先要報題 - 這是校際必要做的.

當時因為只有三天就比賽了, 只有硬著頭皮, 教得幾多就幾多, 又唔敢谷得太勁; 否則到時發台瘟又有反效果.

比賽是在一間藝術書院舉行的, 分了好多組, 似乎都幾多人參加的. 女王呢組都好多人, 三十人左右.  當中仲有一位係女王去年的同學添.

比賽倒是順利, 我見到不少人原來是背得不熟, 又或者掛住去記而忘了要自然流露的; 當然有些就直頭係戰鬥格, 一睇就知你久經訓練又或者係天生異稟的, 不過女王就中規中矩啦. 所有都好自然, 不過呢... 竟然臨開始前佢「打思噎」呀...! ><  一路都無咩事, 竟然就係最尾一句時就窒左一下.  當然 -- 佢亦都係無報題.  但係女王好輕鬆, 好自然的感覺, 我都覺得好神奇. 

好了, 最尾是評判老師給少少意見, 第一樣就係... 「好多小朋友都無報題喎」我就知... 弊...!

不過, 之後評判問各位家長教得辛唔辛苦時, 竟然絕大部分家長都話原來好難教.

這個是我意料之外的, 因為我一直都以為唸幾句野, 有幾難呀... 女王都係一天上口啦.  原來, 呢個只係我好彩呢!

當然, 最後都係最想知的就係結果. 當然, 如我所料, 女王沒有冠亞季, 三名優異獎呢, 都係無份, 但係當我轉頭找返分紙, 再對一對樓下優異獎的分數時, 我就真係耷心口了...

女王因為都算高分, 所以都有個「豬肉獎」仲有個牌, 我一看... 女王係85.3分, 優異獎那位同學係85.5分...

0.2 分... 如果我教女王報題, 又或者唔係咁o岩打噎的話, 應該優異獎就已經係囊中物了...

不過, 有時真係整定的.  我見女王都有興趣, 我諗都真係可以幫佢繼續 develop 一下.  但又唔想畀咩壓力佢.  真係頭都大.

但講開又講, 女王係好有興趣溜冰的, 但係佢的動作學得比較慢, 好多時唔肯放膽去試, 溜半呎又轉腳, 似「行冰」多過似「溜冰」, 雖然教練話佢好少跌但係亦即代表佢太「穩陣」了.

朗誦比賽 (一) - 老朽小時候

老朽的父親在我小時, 大約是幼稚園時吧, 就有給我在學校參加校內的比賽, 最初就只是兒歌比賽, 不知是否參加人數少, 總有個第二三的獎牌的. 

後來到了小學一年級, 某天我在教育電視 (當時也是在英文店播的, 我好細個時已經見到有得做, 有時我爺爺已經給我看一些一件級的) 見到有人唸書唸到好得意 (當時不知道係朗誦), 之後就問過也有唸下詩的父親, 說這是唸詩云云. 

後來學校課程中有一課新詩, 好像叫做《盪鞦韆》的, 碰巧老師叫了我去讀, 不知道是否鬼拍後尾枕, 我便嘗試用我在電視見到的方法去唸了.

當時我記得住班同學都以為我是個怪物, 因為我讀書的方法太怪了. 高低聲線, 抑揚頓挫, 懶有感情的, 我自己讀完, 自己都覺得太怪了點. 而同學都在竊竊私語取笑我. 我還站著, 當時小小的臉蛋開始發熱發紅; 卻聽到老師說「這個就是讀這詩應有的方法，這叫做「朗誦」」仲問我邊度學返來, 我就說是電視和父親教的.  後來老師不知何時就在放學時「抓」了我父母問左幾樣野, 就這樣, 改變了我整個在高記的時代, 更差不多改變了我一生.

首先是在十月時說十一月會有個 "Speech Day", 就是畢業典禮, 話說各傳統的中學每年的「士必除低」都會請個猛人呀, 勁既校友之類來做嘉賓的. 那一年就請了當時還叫做市政局的主席, 張有興太平紳士, 而每年學校都會找個小朋友來送份禮物給那嘉賓 (我那年係隻銀碟), 我小一那年就是找了我. 

找上我的原因是因為我英文成績不錯 (老豆由幼稚園開始訓練之故), 個樣又幾可愛 (當年呀下...)  但原來有個 task 就係要送銀碟時講一段英文, 大意是多謝張主席大駕光臨, 謹此代表學校送上小禮物, 祈為笑納; 並希望主席不介意為本校師生訓勉和送上一天的假期. 

其他野都明, 而學校每年 speech day後都的確係有一天假期的; 但點解要個嘉賓送一天假期就真係一個謎了.

那次經過一個月的地獄式訓練後 (梗係啦, 一年班鬼識咁多英文咩), 出來效果按後來做了小學校長 (兼後來在東亞運義工時做了我「組女」呀!) 的那位老師說, 相當不錯.  亦因為咁, 她徵詢了家父後便選了我入學校的朗誦隊, 負責中英新詩獨誦; 而家父也相當鼓勵我參加不同的校內外朗誦比賽, 包括校際朗誦節.

當年是沒有話用這些比賽來入學校的, 因此家父的目的純粹是希望我多參與外面世界的比賽來訓練公開說話的膽識和技巧, 回想起來, 大概家父一早已覺得我係出來用把口搵食的人吧...

比賽把我訓練得大膽, 但同時校內差不多所向披靡 (因為老朽曾參加小學校內中英朗誦加鋼琴比賽, 竟然意外地三項都取得冠軍, 一年就一冠一亞一季, 導致學校改了例, 指明每位學生只可以參加最多兩項賽事), 和多次的校外公開賽勝利 (雖然遺憾地從未為校在校際朗誦節最終的決勝時捧盃) 也使小老朽開始有「囂士」的感覺, 雖然家父多次提醒, 但小學時代的我又怎會知道呢. 不是到後來在外面被人寸返轉頭, 老朽都未知死. 

是朗誦讓我變得硬淨, 也是朗誦讓我變得謙卑, 因此, 我覺得讓女王也接觸朗誦, 是應該的.

台灣蔥油餅 vs 蔥餡餅

唔係講笑, 呢樣都係老朽有時出去工作做得好夜時的 comfort food 之一.

 

我估不少人都見過超市有隻「蔥烤餅」賣的. 就是少少似印度那款 Roti Canai又或者係台式抓餅那款, 係急凍的, 用易潔平底pan 一煎就食得. 仲可以自行加料例如加少少吞拿魚呀之類的上去.又或者加隻蛋同蔥花 (即係煎好塊餅, 之後再煎蔥花蛋, 打好蛋落鑊的時候再將塊餅蓋上去使其貼實).

 

早排某百貨超市做台灣食品節, 竟然又找到一款這樣的東東...

 

 

因為見到張相入面o的蔥係包在餡料的, 即係同一向的不同. 又唔係貴, 好似係35大洋6隻. 一試無妨. 

指明係慢火少油去煎的. 同 roti canai差不多. 每面煎三分鐘左右就變得好香, 不過側面會少少爆, 漏了一點蔥汁出來整黑個餅同隻鑊.  result 如下:

 

吃下去外脆內軟, 而且蔥花仲係半生的好香又有汁 (不過中間部分餅皮都少少未熟得透, 試過幾次不同火路都係咁 少少美中不足). 堅係抵吃的東西.  不過不知道平時邊度有得賣了...

堅揪無比的喜帖

相信大家都收過不少不同形式的喜帖吧?  當中大部分在飲宴後你都會丟棄的, 因為真係無咩好 keep.  而又有幾多係你會留下的呢? 相信無咩幾張.

老朽收過的帖之中, 之前是有兩張是我一定會 keep住的. 一張就是一位中學同學所發出的, 他是個創作人, 又是廣告設計創意總監 Creative DIrector. 更是個戲劇界的活躍份子, 他的家族又是開紙行的, 所以呢, 就設計了一張超巨型 Poster 出來, 這 poster簡直就是一張電影海報來的, 同 泛藍的monotone作底, 拍攝背景是日本京都, 就是一對新人一邊牽手在街頭跑步回望的照片, 相片係故意「鬆郁朦」但又認得出是新人, 電影的上映日期當然就是新婚日子, 放映的 「電影院」就當然係擺酒的酒店和行禮的教堂, 之後其他林林總總資料都是寫到似電影開 show似的. 呢張係經典, 仲係用特製膠珠地海報紙精印, 看來成本都要成三四十元一張. 不過... 真係好大張, 要 keep都幾阻地方.

另一張就係我一位證婚認識的老友, 「著名新娘 blogger」阿雀 mcwin. 她和當時男友 (即係老公) 的DIT 技術係超人水平的. 見到真係以為係PRO 的製作架. 當中最窩心的是她每張帖都係自己製作和加工貼上閃石.  見到都覺得有 heart 的. 呢張又係我一路都keep住的喜帖來的.


半年前, 當剛知道夫人懷著那沒有來的二皇爺時, 老朽收到一位身在加拿大的超級老友「天蠍先生」的 facebook message. 說是在9月要結婚了. 

這位天蠍先生同老朽有幾老友呢... 他在老朽當年結婚時他是專程由加國飛回來做我兄弟, 而且又是兄弟中其中一位有幫人做 planner的經驗的老友, 我結得成婚, 天蠍先生功居首座. 

這下我可難為了... 因為到我決定飛還是不飛的時候, 就是我們剛失去二皇爺的那日子. 老朽當然知道, 用這向老友解釋, 老友一定明白的.  但人家紅事當頭, 又怎好意思去用這個理由推呢? 

想了好幾星期, 最後也是硬著頭皮向老友稟明來由; 當然, 老友係一點都不介意的, 但這反而加深了老朽的內疚.

時間好快又過了幾個月, 雖然老朽都係去不了加國 (因為夫人中間的調理我都要自己睇住... 她一向都真係幾依賴我的), 但老友都一樣寄了他的帖子來給我留念. 打開一看...

 

是大富翁. 哈哈...

真的好有心思, 將日間觀禮和夜間晚宴的地點都變了地契, 而地圖教點去呢就用火車站標示, 回覆就成了 "機會" (或稱「大眾寶藏」) community chest.  好精美呢!

天蠍先生這是基於真老友的一份尊重, 為老朽來說, 是不能再找到的好友才會做到的. 所以老朽當下決定, 就算飛不了去加國參與, 也要待他們回香港時用飛機票的價錢煮出世紀佳餚, 希望一方面賀他, 另一方面賠不是.  這才可報老友尊重於萬一也.

一個醫生的婚禮

香港都有無千無萬咁多醫生, 究竟一個醫生搞婚禮會有幾特別?

其實, 說穿了, 一點浮誇或特別也沒有, 不過真誠, 感人.

醫生是個男的, 婦產科出身, 但在公私兩方面的醫療系統也有工作. 所以朋友特別多, 而且, 當年我在醫院工作的時候, 是我的同事, 又是一位特別「搏殺」的醫生.

大家都無在醫院工作後, 我們都是間中聯絡, 不過大家都係為食之人, 所以成日都約埋食日本野同飲下紅酒.  不過老朽結婚比較早, 無得好似佢咁易可以成日去法國睇酒莊. 

佢就好彩喇, 搵到個又鍾意同佢一齊飲又玩得又同佢一樣咁 sporty 仲要係靚女既女友, 天作之合啦.  就係咁, 呢粒鑽石王老五去年就找我想我幫佢證婚喇. 

因為同時間佢亦找我幫佢有份工作的私人醫療機構搞下融資之類野. 所以早排真係日日都「睇醫生」.  一直以來我都覺佢係一個超人, 但原來, 超人都有感性同細心的一面.

雖然因為工作上太忙, 結婚事宜都交了畀女友做, 但係佢背後安排都幾特別. 

除了晚宴有整喊迎娘的送禮外, 日間的證婚都有些插曲係好溫馨的.  不過大家初時都唔覺, 要到禮成後醫生的「真情對話」才聽到.

首先, 醫生找來他求婚時的法國酒莊紅酒, 而且找來了一支「大炮」係RP 100分的. 寓意要有段100分的婚姻, 而後來才知道, 原來幫他們的三對花仔花女都係佢「經手」接生帶來呢個世界的, 他們負責的是引領後一對新人進入他們的新世界. 

更加令人意想不到的, 還有他提到他父親時那種敬佩的神情.  醫生朋友一向都係「硬淨人」, 但提到退休而在座的父親時, 講講下都講到眼紅紅, 仲自稱要學佢一樣咁勁可以「泰山崩於前而不懼於色」.

或者, 文字上看不到當時在座一眾的神情, 但老朽聽完佢呢十分鐘剖白後, 對醫生朋友印象即時由「老友」變成「敬重的老友」.

呢位老友都已經好細心了, 但另一位更「老」的老友就使我更加敬佩, 也為自己不能去他在外國的婚禮而自責... 詳情下篇再述...

好難搞的蕃茄肉碎蛋

近兩星期真係多野做到不似人形, 真係成日都要搵o的 comfort food先得. 

年尾多證婚又一件事. 但係因為小弟唔知係好彩定係唔好彩, 竟然呢個時候有客想搵人做大型企業融資和想上市... 更加抵死係我個上市客竟然又有o的專門知識可以幫到我師兄 (即係大老闆) 個上市客使佢可以重新考慮上市計劃, 大家好似一拍即合咁真係唔到你話唔邪...  所以真係忙到發左瘟.  真係做到無停手, 同師兄兩個傻佬閂埋門講起, 大家一自慶幸貴客光臨, 另一自又想起會好辛苦, 分分鐘連屋企都唔使返 (但係有時間寫 blog?!?).  又講起大家當年的歲月, 堂堂大男人竟然講到眼濕濕...

講返早好多個星期的事了. 是夫人想老朽做的一道家常簡單菜: 蕃茄肉碎蛋

老朽的做法係先煮好肉碎, 之後加入切細的蕃茄一個和茄汁, 之後加糖調味. 同埋加返大件少少的蕃茄; 直到呢度做法都仲係大路既.

之後炒的蛋呢, 我自己偏好炒黃埔蛋, 即係熱鑊凍油, 打好蛋後傾下鑊, 之後慢慢鏟起一塊又一塊的剛熟的蛋皮, 再和肉醬汁一起會一會就上碟. 

不過夫人愛好的做法就係將蛋炒到散晒之後再加入肉醬煮至蛋開始實 (少少老) 才上碟, 佢話咁樣撈飯好食喎 (佢好少用其他送菜來「撈飯」的).  呢樣係我所不好的. 但無辦法, 夫人係老細, 最後就變成了以下的一大碗:

吃係好吃的, 起碼夫人和女王鍾意, 至於我自己呢... 咪照食囉, 唔係點呀?!? :p

宴客菜 - 鮑魚一口酥 蔥燒一字排

上星期有老友的太太到訪探女王, 順便來吃個飯, 問了一大輪去邊間吃之後, 原來嫂嫂係想來我家找老朽下廚煮幾味. 既然遠道而來, 當然要特別招呼, 即刻三天內訂菜單, 因為是中午又不想吃得太多, 所以以多點小碟為主:  五小碟是:

鮑魚一口酥

江南萵荀

 

鍋貼帶子

 

糖醋腐皮卷

冰鎮橙花梨子

之後有個燉湯: 松茸無花果老雞燉宣威腿

三大盤是:

彩雲追明月

乾蔥頭抽生煎雞

蔥燒一字排 

當中小碟的鍋貼帶子就是蝦多士, 但改用少少蝦膠加生粉貼著開半的大帶子來炸; 而腐皮卷就是簡單地買一盒響鈴回來, 用百二度焗爐焗住迫出油來, 也使響鈴脆身, 之後煮個糖醋汁收結, 食時淋上面就可以了. 橙花梨子就是用鴨梨切片後泡著已加入少少紅糖和薑汁的鮮橙汁, 在雪櫃中泡個一天就可以上碟了.

至於鮑魚一口酥就是用罐頭鮑魚切至好細的幼粒, 加入香芹和香菰也是切幼粒; 落少少鮑汁, 糖和蠔油埋芡做成餡, 之後用買來現成的撻皮, 又係焗香之後裝住, 上面再放一小隻即成鮑魚仔作裝飾 (其實當然都食得既) 就可以上碟了.

燉湯是簡單又好味得很的, 因為阿嫂話想飲好點的湯, 所以就做了這道, 只是用了「菁云」買回來的乾松茸泡水後燉, 也買了一盒雲南宣威腿骨, 用一件出水後加兩大片同樣地方買的雲腿片來同燉, 不過時間就頗長, 先在前一晚燉三小時, 食的早上再燉兩小時就好正了.

主菜的彩雲追明月就是先打開鶉蛋放入小碟蒸熟, 再用四色蔬菜 (甘荀絲, 菠菜, 金菰, 紫椰菜) 分別用雞湯餵熟後排盤, 再將熟鶉蛋放上去蒸幾分鐘後埋個雞湯芡便成了.

乾蔥頭抽生煎雞之前做過, 但今次隻雞明顯唔多靚, 煎起食味不足. 

蔥燒一字排就有好多不同做法, 我今次係原件一字排買來免切 (不想次次都切一條條太易炆到太鬆散), 爆香後先再爆大量蔥和幾片薑, 之後放入肉排再加調好的汁料:  叉燒醬三湯匙, 生抽老抽蠔油片糖紹酒樣樣少少, 之後加水開始炆, 大約四十分鐘後熄火焗, 又係同樣道理, 之後又開火半小時又焗十分鐘, 最後轉去砂鍋中, 倒埋個汁就可以到食時先至熱返, 原鍋上檯. 

果然今次的肉無咁鬆, 但亦相當腍滑, 而且汁料帶少少甜可以下飯, 今次都算無試錯菜...

珍惜...

兩星期沒有出 post, 因為因事去了馬來西亞數天, 回來上三天班就碰上國慶中秋假, 本來係十分愉快的事. 

然而, 這兩天差不多整個香港都在愁雲慘霧中. 

中秋前一天, 我就在24小時內經歷了大堂的嬰兒領洗 (我幫手做攝影師) , 為兩對新人證婚, 又見到一班盲人長者, 仲有出席了一位好友 - 細細妹 - 她父親的安息禮拜, 仲要碰上中秋節, 就好似一天之內見盡生老病死一樣, 就似當年佛陀一樣, 當下我已經無啦啦在fb說過, 真係要珍惜眼前人.

點知只是一天之後, 更大的震撼就出現在所有香港人眼前. 

當晚是太太外公生日, 九十多歲仲好壯, 食完晚飯大家看煙花, 看完走的時候就聽到有意外, 當時都未知咁大鑊.  愈夜就愈得人驚.  原本那晚我在煮一餐2/10 的飯, 因為有老友太太回香港探望, 但這餐飯, 愈煮愈心沉, 愈來愈唔開心. 當凌晨炆緊野同燉緊煲 "松茸無花果老雞燉宣威腿" 的時候, 開始聽到新聞話有小朋友罹難, 這刻, 我真的自然流了一行淚...

父母失去孩子, 又有孩子失去父母, 這刻的我腦中浮起的是黑夜水中一班人在掙扎的恐怖鏡頭. 不知何解, 這幕影像竟然像是我自己經歷的一樣, 使我毛骨悚然.

當然, 我知道上主自有安排, 而且我們幾時回上主的身邊,也是天經地義的. 但是人又是那麼脆弱, 在這剎那我們可以不動容嗎...?  當下的祈禱, 就是說... 「既然天主你願意人去有此經歷, 懇切地求你幫助死者得到安息, 回到你身邊; 傷者得到醫治, 而生者也得到平安 (其實和湯樞機在特別彌撒中的祈禱差不多...) amen」...  後來, 也加了這麼一句: 「感謝上主為我的安排, 也求你照顧和賜福給所有救人的英雄, 讓他們也得平安」

我們信亡者的義人「在今日就要和主同在樂園裡」 (cf 路加福音23章) , 反而在想... 那幾位小朋友, 會不會有天使陪他們, 不致孤獨...?  上主, 你可以昭示一下嗎...?

華豐熟茶腿

又到了食的時間.

今年中秋又是試月餅的時候, 不過因為工作和下星期要半官式的飛幾日, 所以試的幾十款月餅都試得好趕.

在此間, 有一晚放工行過中環一間老字號燒臘店「華豐」. 此店老過老朽多多聲, 當年是自己一幢大廈的, 地面是店舖, 樓上是工場, 更加自晒臘腸, 到秋冬時節行過樓下都聞到香味, 中秋時都會自製月餅, 我記得我吃的第一個「四黃蓮蓉」便是他們的出品.

到後來他們被拆卸重建後, 改開了另一位置; 搬完又搬, 最後到現址.  現時當為燒臘茶餐廳的做法. 不過 -- 愈來愈貴, 雖然, 都仲係幾好食.

而他們是有一款東西一直都是靜靜的躺在店舖一角, 不太起眼, 用個密實櫃蓋著, 上面有塊牌, 寫著「華豐熟茶腿」.  用的就是原隻金華/宣威火腿, 加入多量的冰糖和茶葉一起和著蒸至熟後再放涼吹爽.  亦因為可以送酒下茶, 所以又叫做茶腿. 

他的吃法其實和Parma Ham  之類的差不多, 因為已經熟了, 所以係「就咁食」.  不過呢, 食味會比較鹹, 真係要送酒下茶先得.  不過那種鹹香又真係幾引人的.

幾十蚊買了二兩來吃, 倒是有點兒時見到大人食而自己無得食的那種風味呢.

又放(完)暑假了...

其實暑假都放完了, 但今年女王的活動都幾多; 若干程度上, 可能是我們開始希望她掌握多些不同的課程之後準備在K2 開始搞女王的 profile/proforlio了. 所以畀幾樣特別的東西她去學. 同時亦希望不會給任何壓力她.  畢竟, 她只是四歲.

因為女王在假期內都成日喊話悶, 所以都會帶她去下太空館呀, 行下呢度去下o個度之類的.  不過奇就奇在, 竟然無帶佢去沙灘玩, 亦只係去了一次樓下泳池游水咋喎... 睇返轉頭我自己都覺得怪. 

另外當然也有學些古靈精怪的東西, 例如一個「英語煮食班」, 點知呢... 一星期內的三課, 竟然 (雖然只係女王話我知) 只係用英語同女王玩同埋畫下畫, 放已經焗成麵包的麵包入焗爐翻熱, 將薯仔放入雞湯中搞拌之類.  我 appreciate用英文教她和畀活動, 不過成千銀三堂呢, 對於已經學過醃肉同埋煎麵包做蒜茸多士同埋炸芋蝦的女王來說, 實在係太過小兒科了.

除了玩下英文煮飯仔外，仲有一樣我想了很久的活動… 溜冰。

女王因為家居港島東區，好多時都有機會去太古城的溜冰場，見到人家溜冰溜得好睇所以一早想學了。 而因為我自己都叫做識識地，所以都好想她學，而太太亦覺得無壞，見到暑期班不貴… 九百大洋六堂… 就幫她報了。其實頭兩課我地都怕她會因為跌得多而想放棄，但係都有好幾位小朋一起學，所以女王在群體壓力下，雖然跌過三幾次但係一點都無想過唔學，而且在取得暑期班證書後仲話要繼續，當然，暑期班按亞洲冰聯課程是不會"溜" 的，而是一步步的行著。到暑期後的正常班才開始有溜的動作。 而溜冰呢瓣可以話唔算係用來爭小學的科目，當然，有張證書都會拎去用，但主要真係想女王學得開心。

而女王一直都係住在家中，只是好多時會去爺爺麻麻家中玩大半天，今年就係想她去玩下過下夜，結果當然係大成功，不過就難為了女王成日冤住嘅姑姐囉… 我同太太就梗係可以多了輕鬆時間啦！

呢個暑假亦係一個「動物暑假」, 因為女王有份暑期功課係講暑假做過咩的, 初時想為女王加點活動, 所以就去了一個在機場博覽館的動物農莊, 女王初時好驚o的馬架. 點知後來屋苑搞個「騎術體驗」, 係去一間騎術訓練中心餵馬和騎馬的, 我們試著就參加了.

最初都和之前一樣, 女王係好驚的, 遠遠的望著就唔驚, 但係隻馬一想哄埋少少就驚, 連太太都驚埋一份 (其實佢先最驚!) 我就當然無有怕啦 (其實唔知點解), 仲主動買包大粒甘荀去餵馬添 (教練話甘荀同蘋果係馬既點心糖果喎); 原來都幾得意, 隻馬會用咀前哄你隻手之後舔走粒甘荀的, 畀馬鬚拮的感覺好怪, 夫人同女王後來都想試, 女王卒之都在我們的「大力」鼓勵下成功餵到隻馬仔. 起碼好過大部分小朋友, 佢地絕大多數都餵到成地係.  我見仲有咁多剩低, 咪同教練講聲拎晒去我逐隻餵囉.  餵到班馬係咁望實我仲有無, 仲搞到我成手都係馬口水... @@"

好喇, 之後到騎馬喇, 我們都叫做係咁意騎下啦.  點知女王又唔知咩事鬼咁雀躍喎, 一戴起頂馬帽就好似上左身咁, 騎到唔想落來; 最後因為有一位小朋友太驚唔肯騎, 所以畀了個機會女王騎多次走多兩個圈. 

既然係咁的話, 下年或者應該畀佢去雙魚河試多兩次 (在馬會雙魚河 old clubhouse 可以一舊水畀小朋友騎十分鐘行大沙圈- 話晒都算係奧運馬術場地丫嘛); 真係有興趣的話先考慮畀佢六歲真係學囉. (太太已經即刻諗... 呢o的冷門野, 唔知入小學加唔加分呢...)

金華盛宴 II - 主菜/甜品篇

老朽總算不負所托, 在上完各款不碟後, 出到去廳一睇, 九成九的食物已經被那班蝗蟲消滅了. 只特別各留下了一份半份給我, 總算對得我住...

之後就是主菜和「單尾」還有最後的甜品了. 

花雕蛋白蒸蟹鉗 - 自己一早買的急凍巨蟹鉗因為聽錯誤會了餐飲業龍頭老總指教而煮得過了火; 最後黐晒殼; 幸得老總伉儷同阿一首徒基大師相助找來生拆十二隻 (仲幫我用薑汁雞湯入埋底味) 畀我用 (不過貴得多... 幾十蚊一隻; 基大師話原來解凍後加底笪, 用薑汁雞湯餵五分鐘已經得了), 加入已加了雞湯和花雕的蛋白, 包起保鮮紙蒸8分鐘就似樣了. 要留意的是蛋白不要太大力打至起晒泡, 否則蒸起來唔夠滑.

龍鬚星斑柳 - 之前做過簡單版的, 今次就係完整 "director's cut" 版:  星斑柳切條後醃一小時, 之後泡嫩油, 加入熟華腿絲和蛋絲, 中間再加少少紫蘇葉和一些日本櫻花蝦粉 (所以粉紅色), 食時撈埋就得.

頭抽味醂焗肉排 - 之前做過, 都係「停打停打停」的炆焗工夫, 不過今次用多了點黃糖, 味道不錯但可以鹹多少少.  (半日前炆好, 放涼後雪一陣, 食前連汁用砂鍋再炆焗十分鐘)

鮑汁蝦子五頭花膠 - 煮過好多次, 今次都係用鴨包肚, 但係今次呢兩件真係好好好厚, 要慢慢煮先入味, 否則面頭軟爛入面仲係韌就o徙晒.  不過臨食前才記起唔記得帶蝦子去... -.- 最後就只用了原汁加蠔油黃糖老抽麻油推紅芡上碟, 不過大家都話好味.

腿茸津白卷 - 又係之前做過多次的菜式, 不過今次除加了華腿茸外還加多了一條西式火腿在中間, 多點咬口. 食的時候應該用雞湯會一會才上碟的; 但當時係尾聲, 煮到好懶, 所以只係叮返熱那盒之前一天已經用湯灼過放涼卷起的津白, 再用花腸剩下的汁撈埋上碟算了... 有點... 流灘 feel... :)

紅蔥頭上肉蒸走地雞 - 新鮮走地雞以鹽糖乾蔥茸紹酒少少蠔油生粉醃半天, 蒸前加入生華腿小片, 大火蒸十分鐘已得, 如蒸12分以上會鞋口的 

單尾:  燒豬油撈飯跟大孖頭抽/九龍醬園老抽皇 - 呢樣係我早兩天決定加的, 呢班男人老狗, 唔食飯又點得呢, 所以我向相熟燒臘檔訂了一支燒豬油, 只係 20 大元已經大大支, 佢仲好有心 (定係意外?) 用支整燒味用的玫瑰露樽洗過後裝豬油, 殘留的玫瑰露味加入豬油中, 加上黃雙如 "有食緣" 買來的大孖盆晒生抽同埋九龍醬園金牌老抽皇, 簡直係天上之物; 有當晚出席老友在 fb 留言 "x街！點解可以好食成咁？我諗玉皇大帝同王母娘娘呀 八仙呀 太上老君等人閒時都係食呢啲..."

你估下係咩來...?    初時有人以為係白飯, 其實... 係發好既燕窩!!   死味.. 四百大元一兩, 買左四兩發起直頭誇張, 相熟藥材店果然無欺場. 

太多燕窩了, 杏汁反而唔夠, 煮出來似碗粥多過似燕窩; 每人仲可以整多碗就咁既冰糖官燕. 食完仲有半盒整唔晒留左畀班長之後食... 真係變態...

 

 一食就食到十點半有多成十一點. 但係食的開心, 煮的仲開心... 因為今次有班長夫人和太夫人幫手洗碗丫嘛!!

 

(其實, 我一路已經諗緊下次再和朋友聚會時煮咩呢...)