2012年7月28日星期六

蛋卷

早幾年在電視見到蘇絲黃推仲北角一間「德成號」蛋卷, 一向覺得她推介的不會太差 (但其實她彈到飛起的也有很多不錯的店!) 後來不知何解夫人想起, 話好想食, 但一直無買到, 因為幾次經過都話「賣晒」又或者已經打烊.

早前夫人小產後, 在「坐月」時提過好想食幾款東西, 包括灣仔百事吉餅店的沙琪瑪和這款蛋卷, 我當時只有時間去買沙琪瑪, 提早經北角時卻已見到大大條人龍, 後面根著一個後生仔, 手持一牌寫著類似「是日派完籌」, 根本是無可能買到了.  知道有得「訂」的, 不過一問, 就說訂的那批要中秋後才有貨 (!) 要食就要早上來排隊買了.

到了上月中, 找到一天是早上無會開又唔使上庭的, 於是和秘書講聲會遲返後, 九點十分去到排隊, 在前面已經站了十多廿人. 我排的位置已經去到兩間舖位後的鳳城酒家旁的一間電器店, 不過大家都好守紀律, 自行排得好好的.




到九點半, 都幾準時, 人龍開始郁了. 排了好一會後, 到了門口, 見到有張檯貼了張紙說「售罄」, 應該是用來放在門口「擋駕」的. 而這時候, 那位後生仔又出來舉牌了, 就只在我後面四五位人士之後. 好險!

入去一望, 最人限買四磅, 話知你點計, 總之四磅.  不過我之前試過的椰絲味今日無整 (真有性格!) 所以買了三罐一磅裝原味, 加一罐都未知好唔好吃的牛油味. 承惠二百二十三個大洋.



試味後, 果然係鬆化得出奇, 而且蛋香係好新鮮既.  不過有少部份係突然有少少唔夠鬆的. 但夫人吃下去後覺得好味, 她自己覺得 (都有紋有路既...) 係因為太新鮮, 有少少未放夠涼就入罐, 所以好鮮味但係有少少唔會好鬆脆.

話知佢啦, 最緊要佢開心, 有相畀佢睇埋排晒隊. 話咁快三日食完一罐, 已經食第二罐了. 不過始終都係唔想放太耐. 有一罐我拎左返公司大家食. 食過都話勁正. 

今次都算排隊都排得值既...

2012年7月24日星期二

十號風球下


時間是2012年7月24日凌晨三時半, 那個突然來, 又突然增強的颱風 vicente, 掛的是十號風球.


上一次打「十號波」, 已經是1999年的事, 當年是約克, 打來時是在香港登陸的. 記得當年剛有寬頻一兩年左右, "地下天文台" 也是老朽常去的網站. 不過當年未有 fb 等工具, 所以絕對無今次的「墟冚」. 今次的十號, 是鋪天蓋地的網路提示.  大家也還在談論明早會否需要在「三號烈風信號」下上班. 同時間, 老朽有位朋友就被困在大埔的火車上, 就剛剛是在電纜斷時的那班車, 所以車內斷了供電, 又下不了車, 唯有等人救, 大家都在上 fb 將自己的慘況 po 出來.  po po 下已經三小時有多, 還在車廂等人救, 可能是因為手提電話電力下降,  大家開始少出 post 了.

(剛剛是03:35, 改發八號東南)

仍然記得當年睇電視, 真係有 "掛起個風球" 的場面. 十號風球是個十字,加埋「紅綠紅」的燈號.  現在呢, 只有 "信號生效", 可能我是年紀大吧, 聽起來很沒意思.

又有朋友住長洲的, 他說在吹到成間屋都動. 因為颶風 level 就是在吹襲長洲.

當年老朽在中環山上老家, 因為是在地下那層, 出面有個小花園也是樓上的人的通道, 每逢八號風球都會和當年還是孔武有力 (雖然細粒) 的家父一起搬那些輕物的花盤下來地面有蓋地方. 如今老父已難以發力, 不過好在收購後搬了去中環山上另一個有大露台的地方, 剛才電話聯絡時知道露台雖然有點水浸, 卻應付得來.  否則老朽就累了家妹要幫老父執手尾了.

工作呢, 又係怪. 剛巧有樓宇買賣要成交, 個客趕不及在掛八號前上來律師樓簽文件, 咪焗住延遲一天嘛. 又碰著個麻煩客, 和同事炒了幾句後, 明天要老朽和大師爺親自處理.

天文台話就話「八號會維持一段時間」, 不過為免輸畀李氏力場, 都係早點睡好了...

2012年7月19日星期四

知國情而論國情

「國情」一詞, 近日就是鬧得沸騰.

短短地湊一下熱鬧, 得悉天主教會和各大基督教會下年都不會推出國情教育這科, 一般而言, 可會是心都涼晒, 起碼唔會畀人話親左親右. 

不過問我內心, 我倒是十分贊成有「國情教育」的. 

看官且慢踩台; 老朽意思是有「國情教育」, 不是「愛國教育」, 更不是「愛黨教育」.

大家可能都記得, 小時候學校張書單水蛇出咁長, 但最後買了之後會真正使用的只有八成, 另外的科目又或者課題就會由老師畀所謂「補充紙」加以「補充」. 至於本書, 到學期尾開始暑假之際 , 還見到有三分一係無教空白之類的. 

我相信, 極左又或者親左的教師, 在香港不會多於五分之一吧? 其餘的五分之四, 大可以用這個機會, 堂而皇之的將六四呀, 大躍進的饑荒呀, 李旺陽事件呀之類的都寫下去, 作為「補充」, 讓下一代知道, 薪火相傳; 起碼比書中只「係咁意」提提「我爸是李剛」事件來得妙, 我都還未提「三權分立」之類的好處 (好似話書中將民主概念和三權分立的理論只描黑不繪白嘛). 

我看哪, 歷史是愈辯愈明的, 哪會怕那班奇人異士只靠一本書就可以改寫?

2012年7月17日星期二

「香」的結婚證書...

老朽近數月的業務, 有少部分變了「商業法」和「商業訴訟法」。嚴格來說, 係「多元化」左. 而且都有時要上一上內地開一些「吹水會」, 不過都係一天起兩天止的會.

除了吃到一碟雞味極佳的「紅蔥頭蒸土雞」外, 還認識了一些在內地政府部門工作的朋友, 其中一位在開始接觸後不久, 見到我名片上有「婚姻監禮人」的 title. 已經問我如果想在香港結婚有何手續. 

當下我便問這位「後生仔」有何特別原因想在香港結婚, 包括是否女友是香港人, 又或者親友是不是有好多香港人所以想在香港註冊, 答案統統不是.

有人或者會覺得, 點解問咁多, 叫你做你就做啦. 但老朽覺得, 找我證婚就是希望我幫手, 我唔知你點解搵我幫手的話又點幫你手呢...

點都好, 都會照幫, 而且一定會「施展渾身解數」...

點知...

又話想7月註冊, 鬼咁 urgent 入晒紙, 跟住前日收電話...

「唔知遲少少先註冊得唔得呢... 我女朋友呢... o岩岩有左呀...」 (順帶一提, 女朋友憑證件的相片見到, 係超級靚女一名, 呢位政府部門朋友倒有福)

「... 呀... 喂恭喜呀下...幾多個月?」 (初頭個"呀" 字真係一時間唔識點反應)

「真係O岩岩知, 而家先8週」 (乜唔係怕小器唔會咁快話人知咩?)

「都OK, 可以等多幾星期等佢身子穩定少少才來香港囉. 個日期可以就到9月中的 (因為他們 6 月中才入紙)」

當然, 我心就諗, 與其騰晒雞搞咁多野, 係咪真係咁想來香港呢邊註冊呢?  難道張證書香o的咩...

2012年7月13日星期五

同珍南乳燒雞醬


上星期有位新娘在某大forum出了一篇blog entry 是提及老朽的證婚服務, 好在真係有讚無彈, 細看之下原來是老朽提過, 和牧師一起證婚的那對. 真的好高興他們的感恩, 更欣賞他們歸榮耀於上主, 因為老朽從來只覺得, 自己能為新人帶來正面的婚姻訊息, 只是作為上主工作, 不是自己有幾叻... 不過, 的確地, 呢位新娘出了 post後帶來了好幾通 email 和好幾個電話, 加上本星期有單急得來怪的東西 (遲少少會有篇 post講的... 因為實在值得一提).  所以寫 blog 也慢了不少.

但人依然係要食的, 早兩個月在一場甚麼公益團體的周年晚宴上, 為他們做法律顧問的老朽抽獎中了個細獎, 是一個同珍醬油莊的小禮包, 有一支他們的優質蠔油 (即係靚少少那款), 一瓶弄瓣醬 (點餃子吃剛好)和一瓶「南乳吊燒醬」.

成份細看之下, 竟然是沒有南乳的, 原來是用南乳的成份調出來的醬, 細字說用三湯匙醬配三茶匙糖攪勻來醃十二隻雞翼過夜後可以用焗爐 190 度火燒二十分鐘就得.  於是我買了隻雞, 殼起肉後用來燉個竹笙花菰湯, 其他就用來做這之的南乳燒雞.

成品是這個樣的  - 我用了錫紙包著來焗, 另外打開高火燒十分鐘.  最尾也一樣是熄火先待十分鐘才吃.

味道不錯, 但稍稍淡一點, 後來我再買了一些雞翼和雞髀, 發現將這醬加半件真南乳, 再加少少紅/黃糖搓勻來醃就會有極佳效果 (比只用南乳和糖更好味),

同場加映一味比較清淡的 - 梅菜蒸菜心.  原作應是用芥蘭的, 但夫人不吃芥蘭, 所以就用了菜心.

菜心先灼一灼, 之後再和已浸水的梅菜心 (加少少糖) 和少少薑絲放在一起 (梅菜鋪面) 蒸八分鐘就ok了. 清清地亦可下飯, 用來配埋南乳燒雞的濃味十分匹配.



2012年7月11日星期三

睇奧運, 睇X線

2008年北京奧運, 係人都有得睇. 當時有線電視不能在電視上直播, 但京奧增加了一隻叫做「網上平台」的. 給了他們一個小彩頭. 而中國最時興的是「穩定壓倒一切」, 所以免費電視台完全未驚過.

今次倫敦奧運就大件事喇. 因為有線畀左億幾出來, 當時成立左唔係好多年既OBC (Olympic Broadcast Committee) 講明要分畀免費電視台睇.  有線當然唔係傻O既, 即刻趁香港政府話發免費電視台牌, 乘機入紙, 仲 set up左一間好似好獨立既公司準備做免費電視台, 諗住用四年時間點都申請到喇o卦.

點知, 香港政府就真係咁「立」, 竟然四年都出唔到個牌. 有線亦發覺中左招;但因為奧委會同冬奧不同, 講明要分畀免費台播. 但有線用了億幾出來, 點可以蝕呢... 所以唯有在廣告之外的地方下工夫. 例如分畀無線時一係收錢, 一係焗佢播有線連埋的廣告. 

當然, 無線作為一哥, 霸道左幾十年, 次次都係「睇奧運, 睇無線」, 今次咁樣點啃得落? 一拍兩散, 更加下令所有節目, 包括去倫敦取景既香港小姐在內, 全部不得有任何奧運的五環或者字樣出街. 全面封殺.

亞視就好少少. 原本諗住平平地買返來, 初時和無線罕有地聯成一線, 點知後來畀有線用平價一招打中. 和無線又反面, 最弊係後來先發現, 因為亞視訊號在廣東一帶都收得好清, 變左自動向香港境外發訊號呢樣就會違反有線的合約條文, 所以技術上又係出事...而家好似話奧委那邊搞掂0左廣東的電視台但係亞視又話未收到通知.  更抵死係無線話「我地而家直接同奧委會傾」,擺明當有線係死既. 

好喇, 打生打死一輪, 香港政府一路扮晒野唔出聲, 話呢o的係商業討論, 最後到奧委會都出聲喇, 政府就走出來好似想做中間人咁, 其實都唔合係咪唔想自己發免費電視牌呢樣瘀到爆既野畀奧委會知道, 怕淪為國際笑話.

歸根究底, 最初做錯的是香港政府, 有線最錯的就係信錯政府以為坐定粒六. 無線就從來無以觀察的利益著想, 亞視就一向二奶命無野好講.

且看臨尾兩星期有無野出, 唔係的話, 奧委會出聲都一樣神仙難救. 因為有傳聞係奧委會開放自家國際頻道訊號畀免費台, 但係咁樣的話可能會違反和有線的合約, 都唔合點賠.

係, 我係有有線的, 但係見到香港呢兩個月成個城市都好似無咩奧運氣氛咁, 硬係覺得唔多似樣, 畢竟, 有o的 event look forward to的話, 人會開心點的. 

2012年7月4日星期三

父親節素宴 - 主菜篇

承上文, 講完前菜, 都整返篇主菜篇先...

主菜已經盡量唔整太多, 但係買的料有時又好難買得少, 或者留低生料太耐, 所以最後都整了不少的份量... -.-

這是炸的素魚 - 先用芋頭和薯仔蒸熟壓泥, 但因為純澱粉比較寡和鬆, 所以加入了一大把切碎晒的金菰和蠔菰增加質感和實淨度. 之後用一張鮮腐皮打開, 先塗些生粉漿包入一張大的壽司紫菜增加一點「魚腥味」再塗生粉漿才將已經蒸熟的「菰/芋mixture」包入中間, 包成魚形 (最尾留位, 用廚剪剪開部份成散開金魚尾) 放涼成形後切件, 猛火略炸一分鐘便夠香口了.  排盤之後用素茄醬 (沒有的話可以茄膏加糖醋煮成 - 因為街外的茄汁多數加了蔥/蒜粉, 不是真齋來的) 蘸食.


少少清清地的, 來一味冬瓜玉匣 - 味道有點兒上海菜的味, 是用了一圈冬瓜蒸好, 之後另外將硬豆腐切粒, 加入日本滑子菰, 甘荀粒和雪菜粒, 「餡料」先出水用素湯餵一下, 埋芡淋在蒸冬瓜上就成.

簡單又可以早點做好的「節瓜素肉煲」- 自己真的比較少用素肉, 成日覺得都係人工野, 不過今次呢款「素牛腩」質地幾好, 本身味道也不差 (之前媽媽買過) 所以才用的.  是先以素上湯炆了節瓜和素肉, 之後加入切件了的罐頭蠔菰, 加入素蠔油和糖較味炆半小時, 之後可以原煲放埋一邊, 食之前熱返再埋生粉水芡就可以上菜了.


「風雪一帆僧」- 是之前提過「陳榮入廚三十年」中的一味; 是用粗露荀 (我用了白露荀) 和粗的菜心中間一條, 加入浸發好的雪耳以上湯餵透後再用水豆腐壓碎加味埋芡, 一點也不難的.


食到呢度一家六口已經飽到郁唔到, 原本準備的黑糖薑茶湯圓都可以唔使整了.  不過是晚因為老豆遲了來我家, 搞到9點先開到飯, 八菜一湯慢慢食, 食得來都已經十點半開外... 食完又坐一陣佢地才回家, 女王又同佢地玩到癲晒咁, 卒之都係成十二點先肯訓覺... @@"

2012年6月29日星期五

父親節素宴 - 前菜篇

一如往年, 父親節我會先和外父慶祝, 之後才在正日為佛門弟子的家父煮一養全素宴. 今次訂下的菜單是四前菜四大菜, 再加個湯. 或者先說說湯和四前菜啦...

煮全素有幾個要解決的問題,  一是不能用有肉的上湯, 而要煲定個素湯, 不論之後的做菜和燉湯都要用它. 二是不能用酒, 三是不可以用蠔油而要用素蠔油, 四就麻煩了點, 就是用的醬料都要先看看會不會有五辛 (蔥蒜韭薤渠), 例如市面上幾乎所有茄汁都有洋蔥加入的, 那就不能用了.

最後決定用的是先用大豆芽一斤, 粟米三條,冬菰六隻,一堆冬菰蒂, 薑四片, 還有一些煮菜時用剩的白蘿蔔和蓮藕. 慢火煲成一大煲的, 暫不加鹽下味.

燉湯是用了之前買落的急凍松茸, 還有正氣的淮山杞子. 湯很清因為是加入素清湯燉兩小時 (即係蒸) 出來的. 用的大容器竟是早兩年馬會聖誕食品用來盛巨型鵝肝醬的 1kg 鵝蛋型大瓷盅. (!) 



前菜是四款, 第一道是冷盤來的; 係「水晶蕃茄拼橘子溜藕片」; 藕片先在早兩天前出水五分鐘至大半熟, 之後將鮮橙一個榨汁, 加入少少橙皮青, 一茶匙砂糖, 少少水和半茶匙白醋慢水煮滾, 之後隔渣放涼, 放入藕片後用密實盒置雪櫃內浸泡兩天.  呢樣後來才知道原來也是中國太空人今次的食物之一. 我只是在大陸的一些專業用廚譜內找來的, 自己再改一改煮法而已 (原作是用來浸泡山藥的).

而蕃茄就是先在兩天前製作「水晶」- 就是蕃茄 granita (粗粒沙冰), 意大利沙冰的傳統做法是不用攪拌器, 而只是用原材料 (今次當然就係一罐飲用茄汁) 倒入密實盒, 放冰格內冷藏; 每半小時至大半小時取出, 用鐵叉攪拌剛成冰的茄汁, 之後又放回冰格, 至四五次後就可以雪過夜, 之後硬了的冰只要少少解凍就會變返做冰沙而不會結成一舊, 好好玩的) 之後選一些大個圓形而飽滿的車厘茄, 輕輕在底切大十字紋後浸熱水至皮鬆開, 之後去皮和去籽又置雪櫃內; 上盤供食時就先放上蕃茄, 之後打開蓋加入沙冰, 和藕片一起擺盤就 ok.


「無樹菩提」 - 這味擺明係食字的. 用的是白蘿蔔, 挖出球來以上湯餵至入味, 撈以麻油上碟.  一般白蘿蔔如果要咁整的話要先以薑和糖出水; 今次買的是靚得來無渣的日本大根, 諗住一定好甜唔使出水, 點知就係出事. 味道入味後有點點甘甘地澀澀地的味道. 不太理想.



跟住來兩款炸的: 酥炸牛蒡絲 - 就係將牛蒡刨皮後切幼, 一切出來就要浸開了少少白醋的凍水防止變黑, 炸時用毛巾/廚紙吸乾水份後加入糯米粉和麵粉對半, 當為上乾粉後加入味椒鹽; 滾油收細火落鑊炸兩分鐘左右撈起, 放涼一會後翻炸十數秒瀝油就成了. 食之前可以再加點椒鹽的.

蔭油茄子 - 就是簡單的將一條幼身茄子切段後加少少味, 再包上脆漿後炸三四分鐘, 之後亦係放涼一會, 再回鑊猛火炸半分鐘, 排盤後在每段茄子上淋上少少台式的黑豆豉油膏 (即「蔭油膏」) 和灑上用來吃大阪燒/鱆魚燒的紫菜碎便可.


這幾味菜式 (除了蘿蔔因為材料問題「中伏」外) 似乎得到家父和各位家人的喜好, 不過唔知係咪前菜食得太好, 所以下篇介紹的主菜食左大半晚都食唔晒... XD

2012年6月26日星期二

潮爆的懷舊婚禮

有兩位一向都「好有諗頭」的朋友都在近月結婚, 分別都找我為他們監禮, 而他們的婚禮 (同埋場婚宴) 都係走懷舊 feel 的. 而且大家都係搞得好有心思, 再加上兩位都係有點「文化界」背景的人, 自然有不少朋友自動請纓幫手.

兩位都自己剪了幾段片, 講一下自己的心路歷程, 也找了好些朋友一起玩 (其中一位差點找了我做其中一個角色, 不過我以「證婚律師咁玩法唔太好吧」婉拒了, 事後見到段片咁好笑, 我自己都不知幾後悔).

他們用的是一個好簡單的 backdrop, 只是用一大塊好像舊式板間房的那款布做的. 非常簡單, 不過好令人有深刻印象.  中間亦用了圓形的中式字型去寫上「XX聯婚」, 至於新娘, 就是穿著舊式旗袍, 整晚也沒有任何西式的新派裝置, 而新郎就著到成個「呂奇」咁款. 連兄弟姊妹的 look都係懷舊的.  至於段片, 當然都係懷舊 look 啦.

至於另一對新人, 本身已經是個搞藝術的人家, 亦係我中學同學的細佬, 而且又係香港搞「二次創作」的中堅份子; 他們用的是「邵氏片場」, 中間大大個好似邵氏 logo 的, 就寫上他們的姓氏. 在場外就擺了一個縮細版的舊式酒樓外牆會用那款巨型花牌, 好搞笑.  仲有仲有, 他們整了一把假的「屠龍刀」來切那假蛋糕...! 

十分喜歡新人願意花心思為自己的婚禮做準備, 有時人不一定是有心機或知識去搞咁多 artistic野, 不過既然有呢個 talent的話又無謂浪費丫.
PS: 那晚係除了我自己結婚那晚之外, 第一次以證婚律師 (和大佬朋友) 身份坐主家席, 因為同男家幾十年朋友, 已認識晒佢屋企人; 個感覺好得意... 連之前在其他婚禮合作過的攝影師見到我埋席都呆左.

2012年6月21日星期四

惹味菜式 - 乾蔥頭抽生煎雞


上兩星期進入了夫人調理的後三星期, 所以吃的東西開始可以比較濃味和比較「大補」, 其中有一味是我在之前一本專業飲食界的雜誌見到的三個字「生煎雞」. 

自己想想下就想到用太太喜歡吃的乾蔥來做這道菜式了.

為了「調理」, 所以用的是新鮮雞. 我想, 如果真的只是為求「有得食」的話, 用冰鲜雞或者雞扒大概也可以吧, 雖然食味會差很遠. 不過做法其實又真的不難, 而且效果甚佳, 好食到唔停得口, 所以都寫來推介.

材料就是: 鮮雞一隻起肉, 可以叫雞販代勞. 乾蔥五六粒切細 (多o的仲好). 個雞殼/腳/少少柳肉就可以留返來燉下湯呀, 煮下湯底之類.

雞先用普通料 (鹽, 糖, 少少老抽, 薑汁, 少少生粉) 醃好, 同時準備個汁, 大概係兩三湯匙的頭抽, 開同等份量的紅糖/黃砂糖攪勻, 加入少少紹酒, 幾滴麻油和幾滴鎮江醋. (我個人發現加入去幾好食)

起平底易潔/陶瓷煎鑊, 爆香乾蔥後將雞 "肉向底皮向面" 放下, 煎兩三分鐘, 反轉 (皮向下) 又煎多三分鐘後蓋上鑊蓋, 收細火煎焗四分鐘左右, 打開蓋, 灒入開好的頭抽糖汁, 開中火繼續煎, 將開始有焦樣的乾蔥逐少移走 (費事整到有燶味而已), 直至收到個汁大半乾就可以了. 雞皮到時會散發微微的焦香.

今次呢碟所謂自創的菜式就大成功了. 夫人&女王都不知幾鍾意食, 食到想搶我碗內那些.  尤其係個皮呀下...


2012年6月18日星期一

簡單又上得大檯的 - 麒麟星斑球

一道簡單得無得再簡單的「上大檯」菜式.

當然, 準備工夫係有的. 就是先買些星斑柳, 以 citysuper的比較好. 其實不比自己去買斑貴幾多. 仲可以請人家幫你切片.

回家洗一洗後可以印乾, 再用少少鹽糖胡椒粉醃一會, 同時呢浸起幾隻冬菰, 打斜切片, 亦切好幾片薄薄的金華火腿片, 用少少冰糖蒸十五分鐘左右.  亦切定少少薑絲.

之後就好似以下的, 梅花間竹的將料子排起. 因為碟細, 我排得密少少. 



再放上去蒸, 其實大約十分鐘已經OK. 蒸得太耐會鞋口的.

如果碟內有水的話 ,可以側側地倒掉便可.  這是一味上得大檯又易得很的製作. 最花時間的, 大概已經是切火腿片了.  :)

2012年6月15日星期五

特長的誓詞

當新人知道我為他們證婚時可以自訂誓詞, 不少都好興奮地說要自己寫一篇驚天地又泣鬼神, o岩細路又o岩大人的誓詞出來.

而當執起筆時, 不少新人都會呆了... 「寫咩好呢...」

其實, 誓詞無一定的限制, 好多網上有的版本都可以作參考的. 不過就似乎忌太長了.

有一對新人, 整個婚禮都搞得十分有型有款, 在大酒店舉行, 主人家都有頭有面的. 我亦為他們度身訂做了一些程序去配合新人的 specific instruction "盡量 grand o的".  而他們整體的效果都十分 grand.

不過來到誓詞一 part就有點甩轆了.

新人是經歷過離合才走在一起, 而且亦有兩年時間做「太空人」分隔異地, 好不容易可以共諧連履, 所以他們希望在誓詞中和賓客分享一下. 而他們又想為對方保持神秘感, 所以是各自書寫自家誓詞, 到結婚前兩天才給我 approve 和印出來.

我一收到兩個 email 已經心叫不妙, 兩位似乎都十分緊張對方, 所以不約而同地, 誓詞都比較「肉緊」 (well, 又未去到肉麻o既...) ; 不過就住他們以往的事, 似乎分享得太多了點, 每人都有百幾二百字, 印起來半版有多了.  所以我都分別致電他們問清楚是否真的想如此說.  似乎兩位都幾堅定.  

就係咁, 他們做了整個 "好 grand婚禮" 中最搞笑的對白. 

或者, 他們不介意, 那就最好啦, 始終係為對方真心準備的誓言, 之不過其他親友呢, 忍唔到係好正常o既.  因為他們一講到「見唔到你成年, 掛到死呀」之類時, 原本好莊嚴的場面都即時爆笑起來. 而聽到對方秘密地為自己準備的誓詞時, 似乎自己都爆笑了. 

當然, 全世界70億人只有我一個係知晒雙方的原意同埋雙方的誓詞的.  諗到呢度, 我無爆笑, 不過就會心微笑囉.

2012年6月11日星期一

簡易小吃- 叉燒饅頭

記得這味是上月母親節時弄給外母的家宴當中一道餐前小吃. 


容易得要緊, 但又見得人, 只是買兩款東西: 少少叉燒請師傅盡量切薄, 和超市的蒸饅頭一包.  呀, 還有少少麥芽糖和叉燒醬. 

先將饅頭打橫一開三, 之後一半蒸, 一半炸, 同時將麥芽糖和叉燒醬座水煮成濃汁 (其實好少已經夠) (唔好明火煮, 好易燒焦), 將叉燒薄片蘸上汁料後放入兩塊切薄了的饅頭中間便成; 美觀點就用條韭菜花拖拖滾水扎起就得了.  之後將蒸和炸的梅花間竹分開放來排盤即成.

美味又實用的材料, 俯拾即是, 只要稍動腦筋就可以做出人人讚賞的小吃了.  (好似電視教煮送的口吻...) :P

2012年6月8日星期五

你想的行禮地點.理想的行禮地點

「拋個身」出來證婚幾年, 真係好多「估你唔到」的地方都試過.

當年有一篇提過, 去法定古蹟的祠堂證婚, 以為好經典, 原來更經典都有...

以為去個沙灘的盡頭證婚好遠, 原來更遠都有...

以為去人家學校證婚好懷舊, 點知更懷舊都有...

去到差不多沙頭角的祖居為了讓老人家可以見證行禮, 呢份心意, 我就算行遠o的, 晒到飛起都無所謂, 為的是欣賞新人的孝心.

去到卡拉 ok, 也試過替人證婚 (哈, 咪之前提過的 「因愛之名」的外國人囉!), 但搞笑的是卡拉OK 係唔可以 mute 左背景音樂的. 所以一路都有人唱住歌囉.  但原來卡拉 ok行禮呢, 人家係會送支汽水香檳畀主人家 toasting用架. 佢會有 staff吼住見到你有律師到呢, 就會準備好. 係不另收費的.

差點要去醫院證婚, 但其實我一樣無所謂.
試過有新人在酒店工作, 於是 book 他們一起工作的地點, 仲要在個羅馬式泳池邊, 堅係好好好靚, 雖然當時我諗, 會唔會一陣掟我落水...  XD

點解無啦啦「有感而發」? 就係因為有一對出年的新人找我, 問我去邊度行禮最好.  其實, 去邊度行禮, 並唔係話要好豪或者好有型. 因為一對新人有自己的經歷, 有自己的想法. 從來沒有人說過, 你一家要邊度行禮, 咩方向先可以白頭到老.   不是自己覺得舒服便已經是最理想的行禮地點了.

2012年6月6日星期三

港英餘孽看 64.23

先說一說六四這天我是怎過的. 

早前提過, 公司的人事現在也有部分由老朽主理的. 當中最難搞的是一位「因財失義」的律師.

詳情不贅, 只道是這位律師雖然本身都好多客戶在手, 不過工作方式和對同事的行為實在幾難頂, 而近一兩年在公司的聲名也很差, 所以我們決定「郁佢」.  不過不知是師兄心存厚道還是有其他原因, 炒律師一向是「即走」的, 今次卻丫「三個月通知」, 導致這位律師不少時間來「玩野」.  而負責善後的, 正是老朽.

她的 last day 就正正是六四. 往年都只在家中自己悼念的我, 今年突然覺得, 可以的話盡量到一到吧.  不過這位阿姐因為玩野, 所以執拾都勁慢.  但又特別多東西, 而公司為怕她帶走不可帶走的文件, 又決定由老朽去「監視」佢執野.

用兩天時間, 執了廿三個大文件箱東西, 她房間細細, 倒真是佩服她可以放那麼多東西的.

亦因為咁, 使我那晚遲到了.

我可算是個港英餘孽來的, 因為我本身是喜歡「君主立憲」制. 這兩天看電視, 不斷見到是女王登基鑽禧的活動, 基本上係想飛埋過去的.

我不是不喜歡共產黨, 起碼它的理念係好好的. 我也是個香港的保皇派.  但我作為中國人, 不輪是甚麼看法, 也不能當六四沒有出現過. 更不可以當著一堆堆血腥的圖片大聲說沒有死過人. 學杜文澤話齋, 我喜歡人仔, 也會去賺人仔, 但休想用十四億市場去叫我忘掉六四. 

老朽可不是出名政治人物, 所以無需要顧忌去六四晚會會「政治不正確」. 大概, 不少保皇正宗的人其實內心也是想悼念的吧! 只是礙於身份和前途, 不能訴之於口.

怎也好, 老朽最後雖然遲到, 但都算是那十八萬人中的一份子 (不過我看現場覺得點都唔只十八萬囉...). 試想想, 當年一班本來是大好棟樑的人, 因為覺得要站出來而出了來, 也因為覺得「人民子弟兵」不會殺人民而倒下.  而那班子弟兵, 我老是覺得, 他們當時根本不曉得是殺害手無寸鐵的學生的. 所以網上不少論壇之類的, 到現在, 他們對當時「平暴」都絕口不提. 彷彿怕人知道自己有份屠城一樣. 

見到愈來愈多來參加晚會的人說不同鄉音的普通話, 就是說, 其實不只香港人民, 中國人民也沒有忘記;  想忘記的, 是現在的政府.

政府繼續不准發聲, 為什麼?

你記得你自己小時候, 什麼時候不想人提起你的事? 

對了, 就是當你自己都知道, 自己做的事不對的時候. 如果做得對, 怎會怕人提?

不過, 現時去做「平反」的動作, 可能還早了些.  中共嘛, 大概都等所有六四時的領導人都死了後, 就會出來說「六四事件定位有修正的空間」了. 信不信由你. 

是時候回家看電視直播英女王的登基鑽禧彌撒了, 彌撒中, 又會不會有多少人為六四的死難者祈禱呢...