過新年之一

一年一度, 恭喜發財!

呢幾星期的 update 速度比之前聖誕期間更加慢, 大概是因為裝修之後回到家中, 要 unpack 和執拾的東西太多. 而且裝修後送家具來發生了大問題 (遲點再說...), 加上要準備過年的東東. 所以自己記事的速度也慢下來.

但係當然都要去買花的, 始終係 "做生意" 之人, 放桃花是最好的選擇. 而且我一直也覺得, 在家放年花是增加 festive mood 的最佳方法之一.

今年買花時都好 "撞手神", 一早找了一間早年買過的, 因為我要找 6 呎花 (棟起那大瓶座地時共約 7 呎高左右), 所以一早問定. 點知那好人老闆話 "今年 6 呎花賣晒喇".

就係咁, 嚇到我年廿九拿拿聲去搵. 而一見到有一間 ok 的就入了去.

老朽之前寫過揀花的基本要領, 今年好奇, 自己講講o下都唔記得o左部分. 但見到人家好有誠意的開價四百五十 (一般 6 呎都開我 6 百了), 有少少驚係生貨 (怕太遲開花) 不過膽搏膽, 見到花色可以, 而蕾也頗密, 便還價二百二十 (係呀, 通常還第一口價要好狼o架). 她竟然有再還, 即是說我開得不是太低. 最後三百六十成交下了訂. 我趁她包起紅紙時四周看一下.

之後才見到其他有些檔口的花比我那株大些. 不過有時既然是撞手神, 便寄望回家後可以好好睇睇了...

雖然今年的花比去年矮了三幾吋, 不過望望o下又幾均勻, 所以都開心o的. 到了年初一就是第一朵滿開的日子, 非常應景, 而且仲有排開.



外母大人一樣好好心機的 "界' 了水仙給我, 還有兩件是給我父母 (即係襯家) 的...



今年水仙幾好, 因為看下去葉都比較短小, 花可以受多點光和水, 會更加亮麗.

不過, 今年無時間準備太多東西. "渣" 一聲已經到了年卅晚, 連全盒的糖果也是年廿九晚才去么鳳買的. 不過見到他們今年有一款開心果是由伊朗入口的. 素知中東是出產果仁的好地方, 見到的是小粒的, 比大家吃開美國的深色許多, 價錢又一樣, 便買回去試一下. 一試之下, 原來味道是 "濃縮版". 連外父都猛讚好. 既然一樣價錢, 都推荐大家一試.

老朽又一向愛吃蘿蔔糕, 今年因為姨仔老公拔少母親做得好, 所以再次央她老人家做一底; 豈料老人家不發功尤自可, 一發功就真係千軍萬馬, 做了一底十吋糕來, 最勁係竟然係三吋深, 簡直係業務用的一底大蘿蔔糕; 加上好友鮑魚先生年廿九凌晨專程由荔景千里送鵝毛的駕車來我家樓下將他另一底又係勁正o既蘿蔔糕送上, 今年不愁無蘿蔔糕吃; 不過, 夫人一向對蘿蔔糕興趣不大, 反而愛芋頭糕, 所以老朽就要諗諗計...

證婚偷食!!!? - 之一...

係呀, 偷食.

我真係講食o架, 唔係你以為我想講咩呀?

好多時我都會在證婚後自己去吃個飯, 一來因為不少時候都已經夜了, 二來就是有時都會希望可以 "鬆一下".

上月初去銅鑼灣的一間酒店為一位朋友的朋友證婚. 他們有很多親友都有小朋友, 所以就出了四對的花仔花女, 而且都一起來 march in. 所以事前準備用了不少時間.

另一方面, 新奶奶也是電視大台的甘草演員, 多年在演藝圈打滾所以認識了不少娛樂圈的明星和導演監製等. 他們不是想遲到, 不過因為工作比一般人更加難就時間, 所以收工時間也難. 但是老人家也想自己的多年同事出席, 所以事前已告訴過我, ... 一定會比較夜.

我倒無所謂, 當玩一下. 不過夜了之後想找地方吃東西倒要想想.

記起在世貿中心有間海南少爺, 聞說海南雞飯不錯, 而且時常有人龍排隊, 既然夜了, 人龍應該短了吧.

去到已是 9 點20分左右, 果然只有三個人在排 (都仲有三個喎!), 十分鐘不到就有得入去坐.

一坐下就送上一小碟醃菜, 原來是梅子石榴. 不過他們用的不是泰國石榴, 而是中國的, 比較硬和多核. 香港做這東西最好的似乎仍舊是囍宴的 jacky...



叫了肉骨茶和海南雞飯, 原本還有些小吃想叫, 但一個人不可能吃完, 所以只這兩樣.

那雞飯的感覺是有點像新加坡文東記吃到的那款, 是比較細緻的 (我個人喜歡那兒的雞飯, 而逸群是比較 "crude" 的, 另一種的感覺, 當然, 最 "幼細" 的雞飯一定是當地文華酒店咖啡廳的出品). 這裡飯的口感是煙韌的. 油湯也算足夠, 不過那碗用舛小壺盛上來的湯就怪怪地, 似乎是缺少了點腫雜的口味.




新加坡的雞飯例牌跟了濃醬油 (黑油膏), 薑末和帶酸的辣醬, 不過這裡的辣醬的確是十分, 十分辣的...

到了那肉骨茶, well... 成件事... 係唔夠重味囉. 在新加坡吃到的, 不論肉味和藥材味都極重, 這兒的可能為了遷說香港人, 所以 "改良" 了. 卻是變的不倫不類了. 但那油炸鬼就o岩 - 是 "林晒" 的. 正宗就是這味道了.





順帶一提另一次去了石峽尾一間酒樓證婚. 之後記起有朋友提過在白田村和大坑西的有一間「品香」於是又係一支公去了食.

他們有多款好得意的東西, 其中一樣是南乳炸豬手...



他們說今天剛開始做出來, 吃下去的感覺是 - 爽! 而且味不太濃, 下酒下飯也好.

同時見到有幾位自己在做義工和法律顧問的團體當中幾位同事, 雖然不同 department, 不過見他們幾個一直隔檯註我. 所以我便主動請他們一起吃了 (橫豎一個又吃不完). 因為, 始終分享是最好的...

《小太陽》

不知何解和女王玩時唱起兒歌來. 之後就唱起了之前我自己小時候在幼稚園時代參加學校的歌唱比賽曾經贏過獎牌的歌來. 分別是 《小羊兒來到青草地》和《小太陽》.

我自己就對 《小太陽》特別有感情, 因為當時是 1980 年左右, 我還在讀高班, 家中剛剛添置了一部小的錄音機, 由我開始參賽起, 每天就唱一次, 家父就會錄起來重聽 (他自己小時候也是喜歡唱歌的, 所以會訓練我唱兒歌, 真的會聽來再教我哪兒要吸氣, 發音咬字等等), 認真得很, 一點也不 "流灘". 現在有些舊錄音帶還在.

想想o下忘了歌詞, 上網一找, 才知原來是顧嘉輝和黃霑兩巨頭的合作作品, 一邊唱著, 又聽住女王跟住我唱, 除又有點掛住黃霑先生外, 更加憶起細個時候家父的教導, 又好笑, 又想喊, 有點眼濕.

歌詞就如下...

太陽像那大紅花
在那東方天邊掛
圓圓臉兒害羞像紅霞
只是笑不說話

太陽像個大南瓜
在那高高天空掛
照得滿山樂融融
草兒發嫩芽

大嘴巴，笑哈哈
落了也要往上爬
敬它，愛它
我把心願交給它

太陽倦了便回家
夜裏休息少驚怕
明晨月兒落旭日重來
依舊往上爬

竟然還可以在 youtube 找到原唱路嘉敏姐姐的錄音...



仲有仲有, 仲有一首, 就係《樂韻播萬千》, 係小時候去音統處搞的學生音樂會必會聽到的主題曲. 現在差不多每年都會有個新的 remix 版出來...



不知未夠三十歲的人對呢o的歌有無印象呢...?

「元旦大餐」

搬了上老家暫住已經大半個月, 我知道夫人有時睡得不好, 大概是因為他們家也在裝修中, 搬去同大廈的別層時, 暫住的房間比較多雜物, 而女王有時也會半夜起來找我們要抱 - 可能是因為附近晚上的街道有點吵 (有超市在凌晨落貨), 又或者自己不習慣.

不過不打緊. 因為有麻麻和姑姐, 還有爺爺在, 她多數時間, 尤其係放聖誕假的時候也是開心的.

好快又來1月1日. 以往每年也是他們來我家, 由我煮西式的除夕晚餐給他們吃, 然後在我家倒數的. 今年因為上了他們家, 所以便順理成章在他們那邊煮. 而又因為這個他們也是租回來的單位有個大的煤氣焗爐, 所以今年便做了這個「焗雞焗雞焗焗雞」出來了:



買的是法國的走地春雞, 不過見到皮不會是焦脆的, 因為我用了意大利式的做法:

雞洗好之後用一般西式做法醃半天: 欖油, rosemary, thyme, 檸檬皮和少少檸檬汁, 鹽, 我還再加入了一些白松露鹽; 香草的莖就扎起放入雞腔內; 焗盤邊不規則的排了些伴菜: 新薯, 蕃茄 (用了細個但比車厘茄大些的), 西芹, 洋蔥, 還有一兩角的檸檬. 預熱至 200 度C後, 將幾片夠肥的意大利 pancetta 煙肉鋪上雞面, 焗半小時至 40 分鐘左右. 因為有煙肉蓋面, 所以不會焦 (雖然有焦會靚o的), 但又會有油香, 而且肉會極之嫩滑. 吃時灑些 parsley 上面. 下次又可以考慮焗好後拎開煙肉高火再焗一陣...

另外也弄了個日式海帶長腳蟹沙律, 炸了兩片 Pork Schnitzel, 烤個和牛西冷, 還有做個煎焗大西洋鱈魚. 一家六口 (連埋女王) 飽晒.

另外, 之前看英國田園廚師 Nigel Slater, 見到他做過一道簡單的甜品:



上面的不是蟹柳, 而是大黃 "rhubarb" (中藥是乾製品, 西餐就是做新鮮的), 見到有得賣於是買回來照做. 就是當蘋果批一樣, 買個凍酥皮, 解凍後搓開擀薄後鋪上切開的大黃條, 加上黃糖或蜜糖, 放入 220度C 的爐焗 20-25 分鐘便成了, 而另一面的就是普通一點的蘋果批, 不過少做所以焗完好乾身, 不知如何可以使蘋果片焗完可以唔乾身呢...

但係焗雞和整酥皮餅 (雖然係用現成酥皮) 係我好想試做的. 今次一次過整到, 最開心的應該係我了... :)

聖誕 2010 之 - 米奇唔夠阿 pooh 揮

來到迪迪尼的第二天...

一覺醒來, 原來已經是9 點半, 都幾過份呀o下.

又要梳洗又要換衫又影o下相仲要準備 check out, 竟然要 10 點幾先落去食早餐, 好在呢期酒店o既早餐可以食到11點, 唔係就真係閣下自理喇.

食埋早餐, 又已經 11 點幾, 出到去迪迪尼, 哈, 又12 點, 好快又要食飯... @@

呢個時候, 可以玩o既只有排一次木馬, 之前就梗係要去拎o左 winnie the pooh 的 fast pass 先啦. 點知我拎的時候架機神神地, 「插極唔出野」 (!) 張 fast pass 唔見影, 最後都係要 staff 幫我 "禁" 出來.

時間關係, 又係食飯的時間, 因為昨日請酒店 front desk 幫手訂了 corner cafe (就是那間次次都食唔到的小鎮大街餐廳), 但係老實講, 食完個自肪早餐, 邊有咁快肚餓丫! 所以, 最後就係食o左個沙律加個意粉 (主要畀女王食) . 更抵死係食食o下開始第一輪的巡遊, 女王又掛住睇, 仲跳晒舞咁 (因為去過的朋友都可能記得, 大街餐廳係睇到巡遊的. 只不過我們唔係窗口位, 睇得唔清楚), 食得仲慢...

好容易食完, 即刻去玩木馬 (又好在無嘔...), 因為女王細個, 坐木馬有點難度, 所以夫人就 "霸" 了兩個 "馬車"之一 來坐. 雖然我知道, 女王是喜歡坐馬多點的.

玩完後又夠鐘去 winnie the pooh adventure 坐蜜糖罐啦. 初時都無事, 但女王好怕黑, 入了去見到跳跳虎後開始黑, 女王直頭企起身話想走, 嚇到我地飛起. 最後, 又係匿埋o係夫人懷裡過了那三分鐘, 只偶爾抬頭望o下o的公仔.

捱完五分鐘左右的車程, 女王出來又生龍活虎, 最頂癮係又o係度扮唔驚, 真係 "勁搞笑"...

好喇, 又三點喇, 三點半巡遊, 而四點先有下一場 "小小世界", 五點半先有米奇金像獎喎... 點算好...?

好在見到花園影相那邊, winnie the pooh 唔太多人, 馬上一定大細衝入去. 一路排那 15 分鐘, 一路女王竟然係咁對住隻 pooh 叫 "我好鍾意你呀!" (!)

好喇, 卒次排到, 我叫女王你試o下跑埋佢度啦. 呢個時候, 佢就開始怯喇, 哈! 最後都係我地抱佢埋隻 pooh 度.

呢個時候我記起昨晚坐火車時, 行到呢邊, 小小世界的火車站剛好就係呢邊後面, 我們當時見到阿 pooh (唔知係咪呢位仁兄/姐喇) o岩o岩收工轉人, 行返入去時, 行到死死o下咁款, 直頭係垂頭喪氣 look; 另一方面那隻 goofy 就一樣收工, 他首先見到我地架車o的人o係度揮手, 於是一邊回應, 一邊拍那死老豆咁款的 pooh, 於是那 pooh 又即刻好像入o左電咁, 係咁揮手... 其實, 佢地真係慘, 一日未返到入後台的 area, 隨時畀人點相.

講返影相, 女王影多幾張後, 又竟然肯拖住阿 pooh 喎, 我地又點會肯放過呢個機會, 係咁影佢同阿 pooh 兩個. 一邊當然讚佢好叻識自己拖住阿 pooh 啦.

就係咁, 夠晒鐘睇第二轉巡遊. 呢個時候夫人肚餓買o左一杯爆谷. 順理成章女王就第一次嘗試食, 大家都估到佢當然係食到唔停口, 最後到睇完巡遊去小小世界時, 要我夾硬 "生吞" 1/4 杯爆谷, 一邊食一邊諗起o的競飲大賽o的參賽者...

好喇, 又係上船的時間, 初時女王見到又係排一輪之後上架野度都有o的驚. 不過好在, 小小世界係好夠光o下o既. 加上一路唱一路唱都係《世界真細小》同埋加入o左 Jingle Bells, 女王好開心跟住郁晒手又 mind o下咀唱咁. 我就反而突然有少少懷念黃霑先生...

玩埋呢個之後, 其實女王已經就來 "碌低" 訓著. 看來餘下想去的地方都係凍過水o架喇. 不過行過城堡前的其中一檔小賣檔口時, 女王突然醒晒, 原來見到係史迪仔的自動吹肥皂泡機. 我見到仲有 pooh 的, 夫人都覺得今次無買咩畀佢好似唔太似去過迪迪尼咁. 於是問女王係咪好鍾意. 佢梗話係o架. 於是, 一架 pooh 泡泡機入手.

不過精神o左一陣之後, 換來的當然係更倦. 見已經係佢下午茶的時間, 所以快快手買件 cake 畀女王食, 哈, 又咁o岩撞到 duffy 熊仔影相後 "收工" 經過. 女王仲想撲埋去, 但人家收工又點影得o架. 所以我都好通氣地叫女王同 duffy 講拜拜同埋自己加多句 "辛苦晒!" :P

整整下原來都已經５　點幾, 快手買了兩隻水晶 pluto 同埋城堡畀我個妹 & 老媽子 (佢地都勁鍾意水晶), 就飛奔上車返酒店.

原本係想坐返迪士尼線出市區的, 不過夫人說話頂唔順. 而時間都的確係晏o左好多的. 所以, 最後決定都係忍痛 call 的士. 而當然女王在開車無耐後, 已經訓到好酣...

ZZZ...

聖誕 2010 之 - 不愛煙花愛米奇

聖誕假期來到最後一天, 自己和夫人請多兩天的假期, 為的是帶女王去她一早說過想去的 "米奇屋企".

原來女王一早知o個度叫做 "迪士尼" 的. 而且成日話要同winnie the pooh 呀, 米奇之類影相同埋玩. 所以就趁住氛入面那 "米奇雪亮聖誕" 未完就入去玩一次. 又因為知道帶住女王, 行動一定會比較慢, 更為不希望太趕 (話晒放假丫大佬...), 所以索性請了兩天假, 住埋酒店.

因為早兩年女王未出世時和夫人去過, 當時住的是舊式維多利亞建築的迪士尼酒店, 所以今次就選擇了那間新 look 一點的甚麼 "好萊塢" (hollywood!) 酒店又試o下, 好在一早打電話去 book, 原來真的十分爆. 又不住不知, 原來:

1) 呢間平一大截 (不過房內設備都差一截, 此乃後話), 海景房的假期 price 都係千九大元左右.
2) 呢間都一樣有自助早餐食, 不過無米奇出來, 那間就有, 貴百多元一位; 後來都覺那邊的東西多選擇一點, 但呢邊原來都幾 ok 了.
3) 那間細些, 由 reception 行回房的路程短些. 呢間好似行極都未行到. 原來呢邊有六百幾間房, 那邊房大, 就只有四百間.
4) 兩間酒店和樂園都有 bb 車可以租用, 一樣係港幣六十大元一天. 不過樂園就要畀多份按金.
5) 呢邊個 reception 大少少. 同埋多旅行團 (尤其係內地) 入住, 可能因為平少少.

說回當天. 我們是搭地鐵迪士尼線入去的. 不過打算食過午飯才入, 而女王就幾乎在車上睡著, 差點看不到迪士尼線車上的公仔. 但一到出了迪士尼站見到牌樓上的米奇公仔, 女王就知道, 原來講o左咁耐, 今次真係來到了! 立時女王的睡意都消失, 跑呀跑的, 便先到了酒店 check in.

抵死的是, 明明說下午3時有房, 我們到達時差一點點就到時了, 但 front desk 說原來房間 "有點技術上問題", 要我們等到 4 點 (咪即係未執好囉!!). 夫人又好心, 說既然來玩, 不介意 "hea" 多點, 便說和女王先去找東西吃, 我登記完去快餐店找她們好了.

呢個時候, 女王問 「爸b呢?」

「佢要畀錢錢呢!」

「點解呀?」

我回道「因為米奇未整好我地間房, 所以要等一陣畀埋錢先」

「點解呀?」

「因為要玩就要畀錢哥哥先囉」

「點解呀?」

「咁唔畀錢無得住同埋玩喎」

「點解呀?」

卒之解到無得解, 我便有少少無奈笑說「咁米奇都要開飯o架!」

立時櫃檯傳來一陣笑聲, 幾個職員 (他們所有會面對客戶的都叫做 "演藝人員") 包括幫緊我手的哥哥仔一齊忍不住「卡」一聲笑出來.

「點解呀?」

「......媽咪你快o的帶佢去餐廳啦...!」 (媽咪 (夫人) 都笑緊)

之後那餐下午茶一吃已經4點正, 上去取房後才醒起, 女王之前係極之想睡的, 為免一陣入去樂園訓著無得玩, 我們決定 - 一家大細眠一眠先! (好明顯, 係我同太太好眼訓吞 pot 啦...)

不過女王見到咁多米奇, 初時都好興奮, 搞好耐先肯訓.



聽過朋友提醒, 要帶女王的枕頭和被袋, 有佢自己陣味佢會訓得好o的. 雖然證明不了但係的確女王好安穩地在加床的那床仔中訓了一個小時有多. 即係話我們坐得車入返樂園的時間係 - 6 點有多了... -.-

原來今年聖誕期間, 迪士尼傍晚會有多一個節目, 就是關上大街的燈光, 再用煙火效果慢慢將燈光重新點起, 說是米妮送給米奇的禮物喎... (但米妮又點識變魔術呢...? 奇...!)

點知, 一開始有煙火, 女王就覺得好大聲, 好驚, 要伏在井我們的懷裡. 結果, 呢一刻咩相都影唔到, 等我仲裝o左支 50mm f/1.4 想幫佢影o的人像...

天寒地凍, 睇完呢個嚇親女王的煙火後, 都已經 7 點, 所以又走去住o下火車, 打算跑個圈, 等女王看一下整體的景象後再入幻想世界, 希望可以在晚飯前玩個木馬什麼的, 再去睇煙花 (其實佢咁驚仲睇唔睇到呢o下...)

點知, 原來女王連火車都驚... 因為那觀光車會經過冒險世界, 夜晚燈光弱了, 有點黑, 女王又畀個不安樣出來. 我知道, 又 "領野" 喇...!

雖然後來入了幻想世界後, 女王終於都識得笑, 但係因為怕遲無位, 我們最後都決定, 只去那什麼 "皇室宴會廳" 食飯便去睇煙花了.

記得這 "宴會廳" 是食西式快餐的. 因為訂不到大街餐廳的位置 (三年前夫人也一樣訂不到...), 所以又跑了來. 夫人吃的是個 burger & chips, 我就是個什扒餐, 一齊再分少少給女王. 不過女王仲有少少咳, 所以登把軟了的薯條才給她. (都仲係咁死貴, 兩份餐食o左百六蚊...!)

聖誕的煙花是在晚上 9 時才放的. 之後樂園才休息. 因為多人, 而音響效果又勁. 所以... 女王果然係一開始就勁驚, 基本上係完全唔肯睇, 連她最愛的顏色 - 藍色的煙火也不看.

連帶, 我o的相都影唔到 (咁無帶腳架係咁o架喇... 都唔太關女王事的).



o係有少少覺得搵自己笨的情況下回酒店, 幫女王洗澡, 佢又好野, 雖然應該已經好倦, 但還和麻麻 & 婆婆講o左電話, 仲話好驚o的煙花...

希望女王之後一天會覺得好玩o的啦...! (見另文)

聖誕 2010 之 - 我的十大證婚場地

一般的情況下, 聖誕節和復活節期間, 老朽不會去為人證婚, 因為身為教友, 這兩個節日是最多教會的事務要去幫手的. 而且通常在這些長假期之中我也會找一兩天煮個比較豐富的小家宴給父母 or 外父一家.

不過今年有些特別.

大半年前一位教友找我, 說他那位未領洗的弟弟希望找律師在數天假期當中一天為他們證婚. 地點是 Grand Hyatt 酒店.

唔... 這個是老朽 "集郵" 的 "收藏品" 之一. 所以, 當下就應承了. 最後亦無後悔, 因為和新人認識多了後, add 了 facebook, 見到他們的結婚照片, 才第一次見識到 grand hyatt 的總統套房是甚麼一回事... 家庭有 support 的確係唔同... 不過, 呢篇睇到尾你就知...!

至於何謂 "集郵" 呢... 是這樣的, 證婚有不同的地點, 老朽一向都不介意去任何地方證婚 (之前都有 entry 提過, 去過公園, 私人地方, 酒吧和人家屋企, 甚至是祠堂證婚). 不過自己心目中, 是有一個想去的 "十大場地" 的. 包括: (講明先, 只是個人想去的地方, 也不是說這些地點特別 "高貴", 是沒有特別原因的)

- 四季酒店大 ballroom
- 半島酒店 salisbury room
- 半島酒店 7 樓露台
- grand hyatt 酒店 ballroom
- 淺水灣酒店
- 淺水灣海灘
- 伯大尼教堂
- 金鐘香格里拉酒店香島殿
- conrad grand ballroom
- the one 的煌府 (貪佢條橋夠得意)

想下想下其實仲有幾個的. 不過係咁意 list 出呢十個先. 證埋今次, 只剩下四季 ballroom 和淺水灣海灘未證過. 去年聖誕原本是有人找我去四季的, 但就是因為開初說的理由, 我推掉了. 至於金鐘 island shang, 其實係因為我自己當年結婚在那裡擺酒, 而淺水灣海灘嘛... 其實, 是老朽和夫人十多年前還是學生時, 第一個度過情人節的地方... (面紅了...) 一個情意結而已...

grand hyatt 那晚的確係相當, 相當o既衣香鬢影的. 有不少大家不太認識, 但見到個樣又會覺得好熟口面的社會名人都到賀. 新郎家長是世家, 做大生意的, 識埋識埋自然成村人. 但另一方面, 這晚的新老爺就真係幾 "頂癮" 喇...

正所謂有辣有唔辣, 世家子弟自然比較多家庭的規典, 而這位新老爺就真係當中之極了. 我當然了解他是第一次當老爺, 緊張一些好正常, 但好多時候, 可以人家就得佢多, 佢唔自覺地過了火位.

證了唔知幾多百對新人, 老朽真係第一次試一去到會場, 新老爺極其 "主動" 兼 "權威" 地告訴老朽 "阿律師呀... 我呢, 就覺得個婚禮呢, 應該咁樣行法..." (之前和新人一早傾晒, 老爺係唔係而家來加把咀嘛...) 好在佢所 "覺得" o既野同我同新人傾開o既無咩大分別, 所以都未有出事.

之後就 "o黎料" 喇. 新人已經畀佢點到暈陀陀, 我要向他們做個 final briefing 同埋解釋香港法例 "一夫一妻制" 的條文. 呢個時候有兄弟通傳 "有長輩話有人等影相, 畀多三十秒律師喎".

我不以為然, 繼續 briefing.

廿秒後另一位兄弟好 "驚青" 地跑來, 說 "有 daddy 話唔等喇, 要叫新人出去影相, 最多畀多十秒律師咋"

即刻, 平日極之林善的老朽真係火都o黎埋, 用相當沉實和粗線條的聲線哮道「話畀佢知, 律師解釋緊法律要求同埋條文, 邊個都唔阻得, 唔係就行唔到禮!」那併兄弟畀我嚇一嚇, 就走去找那位老爺了. 我就當然即時變返個 nice look 繼續和新人講解.

當下有幾個在場的兄弟 & 姊妹笑住拍手, 原來, 他們齊齊畀佢點來點去, 都忍了一整天. (當然, 我一解釋完就即刻找回那位兄弟 "salum", 佢都知我唔係想話佢的, 因為, 佢都係忍o左成日的一份子...) 但當然, 到我親自面對新老爺的時候, 說話就比較客氣些, 話晒都係教友的父親, 而且, 正如上面講過, 我是體諒他的心情的.

講開又講, 呢排都見到有o的朋友的朋友結婚, 在 facebook 見到人家的相, 有時會見到一些行家在證婚, 總會覺得 "點解唔搵我呀!" 的感覺, 這感覺, 尤其在如果新人找的是所謂 "出名" 的 "星級" 行家時就更強烈. 因為, 老朽自知 (唔係自覺) 我功力和他們相比有過之而無不及. 尤其係知道一部份所謂出名的行家的做人處事方法之後...

不過, 細想一下. 又有點不同的想法. 始終, 不同人有不同的要求, 十個人有三個覺得你好, 又或者, 仲有四個覺得你還可以, 而另外的幾人, 大概就會覺得有別人好過你了. 你不能要求 100% 的人覺得你係最好的, 否則, 這個世界只有你一個律師好了.

或者我都係想得太多了. 根本, 我自己就無咁多時間出來為更多新人證婚 (要 maintain 設而家的 quality 喎!). 最近在處理三四月的新人, 剩係搞佢地約開會都搞到頭都大埋... 仲有一堆打電話來問我年尾和出年年初的朋友們, 加埋自己平日要 "跑數" 的工作, 真係連電話都覆唔切人家...

聖誕2010之 - 平安的 mulled wine

可以說是恆例了, 平安夜是舍妹生日, 所以在家搞 party, 不過今年最特別的是, 我和老家兩邊都 "家不成家", 都在裝修. 加上其中一位舅父舉家外遊, 今年妹妹的生日會變o左個縮細版. 不過都好, 唔使訂咁多野食就自然唔會食剩咁多了.

但雖然人少少, 吃不了整隻火雞, 我都一樣訂了一大件火腿. 聖誕節吃的, 最好是烤 virginia ham, 因為是用丁香來調味的, 那味道和玉桂一樣, 就是 "聖誕味". 近年見馬會自家烤的那個都是用古法將火腿打上幾十支 "丁香釘", 不過今年馬會竟然只提供 6 kg 的 gammon ham, 只好轉去 citysuper 訂 2.5 kg 的 virginia ham (以前馬會那個係 1.8kg, 剛剛好); 難得是他們也一樣用了丁香釘而不只是掃上丁香水, 不過竟太大件...

另一樣係馬會o既極品就係佢地o既自家製鵝肝醬, 每年就只有這時候會有得訂, 500 大元但係有成 kilo; 堪稱全香港最抵. 一早知一家人食唔晒呢, 所以就和老友食家鮑魚先生分了一半.

今年是在中環老家的會所 book 了間房來開 party 的, 因此回教堂幫手也快了. 而今年, 我不再任性說要去影相, 而是再次擔起 "接待+保安" 的工作.

今年, 真係大話夾好彩; 年年都有人要搵醫生呀, 暈低之類. 今年連醫療輔助隊甩左底無派員來幫手但係無人有事又無人暈, 真係執身彩.

我們一班 "secu" 好得意, 每次大禮之後都會去中環的其中一間 "翠華" 食野聚一聚. 就算今年我好飽和返屋企仲近也一樣會去.

25 日, 又回到教堂, 不過因為遲起身, 參與唔到彌撒. 咁究竟我返去做咩呢...?



其實係 blog 殺兼故友 kuB 弄了個薑餅人和聖誕鐘給女王, 叫我回教堂取的. 好得意, 真係好型呢...! 多謝晒!! ^^ (佢O既薑 & 玉桂味比出面買到的勁好多O架! :) )

夜晚就和女王 &夫人去了中環　Press Room 食飯, 好耐無飲過 mulled wine 了, 叫了一杯, 真係天寒地凍都唔驚...

連我自己都發現, 原來我整個聖誕都是食食同埋食... @@"

周年紀念

已經唔記得o左寫自己生日的 blog; 不是過了結婚周年去了食個凍到僵的 grand hyatt poolside grill 所以想寫返, 根本自己都唔記得o左自己生日去了哪.

其實老朽是天秤座的, 所以十月就是生日月, 不過, 做了三十幾年人, 有時對於生日都有少少麻木; 但人有時就係應該找些東西來開心一下才對, 所以正日就和太太去了慶祝 (女王就暫由麻麻托管半天), 食飯的地方是多年前去過念念不忘的日本正宗懷石, 我們當年結婚酒店樓下的「灘萬」 (nadaman).

已經三年有多無去過了, 上次去是 lunch, 再之前和女友 (夫人是也) 去食懷石已經是結婚前的事了. 最近在 facebook 見到友人去食 (仲係個個月去!), 又「勾起條筋」, 而夫人又竟然心有靈犀, 告訴老朽說準備生日去食灘萬.

灘萬可以說是幾乎每間香格里拉也會有的日本餐廳, 當中的懷石是香港吃到比較像樣而價錢又不是太貴的那款.

因為夫人不太吃魚生, 刺身大都跑到我肚去, 食到飽.

至於禮物, 就收到一份巨型的 segafreddo 家用咖啡豆, 以每天兩杯左右份量 expresso 的我, 足足喝兩個多月了...



說回聖誕前的結婚周年, 因為夫人多次想去食 grand hyatt 的池畔 bbq, 但都未能如願, 所以今次一早訂了, 點知那晚就正是氣溫急降加落雨的晚上, 戶外食 bbq, 認真 "滋味".

初時以為他們今晚不開了, 但下午打來又說照常; 去到時見已經是寒風加細雨, 難得夫人說這個夠浪漫, 咪照去囉.

見到的確係好多人, 細問之下原來今晚有兩間公司搞 annual dinner (成五百幾蚊一位, 呢兩間公司都幾豪o下...), 酒店話今晚實有人來, 而且其他酒店食肆已經 full house.

即係話, 其實酒店係因為 "實有人來" 而缺定開場的, 而唔係因為天氣不差...

不過呢, 雨真係愈來愈大, 而且開始見到有坐在池邊的人問酒店要大毛巾來蓋上.

其實那處是十分好吃的. 頭盤先有極大量的海鮮, 有蝦 cocktail, 翡翠螺, 花蟹, 龍蝦, 琵琶蝦... 剩係食呢堆都抵 (其實係食呢堆最抵!) 他們可以配的醬汁有幾款是他們自行調製的; 食落真係一個字 - 鮮!

仲有那十款不同的沙牛和自配沙律, 用真正 Romain heart o架人地...

他們仲有一些很不錯的 proscriutto (ham), 吃落應該不是 parma 但係好夠濃味 (雖則意大利腿中我自己喜歡 san danielle 多些, 鮮味重一些). 更加攞命的是 grand hyatt 有兩款特別的肉醬 - 自製的 salmon pate 同埋 liver pate. 配以他們那個外脆內軟的農夫包, 食到呢度都已經飽了一半有多.

相比下,他們的主角今晚稍為失色, 因為扒類不應太乾. 他們是烤得好, 不過是晚大家都怕了跑來跑去. 雖然他們有 staff 在露天位置為客人打傘. 所以肉類明顯是乾了一點.

的確係愈來愈大雨, 而且突然間覺得好凍, 原來是後面一檯人可能受不了太凍, 提早離開. 再食多一陣, 我都覺有點不舒服, 寧可早點走好了.

最後, 我真係冷傷風了一晚...

婆媳關係

唔使擔心, 佢地無事. ^^

其實打從開始兩屋同時裝修, 和夫人都已經決定暫住在我父母家. 住了一星期有多. 夫人之前說 "陌生床, 訓不慣", 但此外大家都相處得不錯. 起碼無拗撬, 而既然女王喜歡 "黐" 麻麻 & 姑姐, 我和夫人也可 "天得一以清, 地得一以寧".

之前一直多年都係相安無事的. 不過我老爸成日覺得, 夫人和他們關係不夠密切. 有點像客客氣氣的.

不過, 我倒覺得, 有時一個媳婦, 在家中對長輩有點客氣, 也是好事.

起碼, 客氣其中一個要素, 就是避免有任何正面的衝突. 背後講咩又另一回事. 不過, 和夫人談過好多次, 她自己也覺得夫家對她已經好好, 尤其係奶奶. 反而係家父呢, 有時比較多點傳統要求.

其實, 奶奶不野蠻, 不無原因.

自己當年細個, 但也知道我媽媽和祖母關係不佳, 簡直可以用 "水火不容" 來形容. 但她們, 是住在同一屋簷下的.

父親說當年是祖母成勸, 說自己會忍讓我母親, 所以才保住了這頭家. 不過之前, 聽說祖母本人也是相當霸道的. 只是 "炮仗頸" 幾年後, 人也溫和了. 但當時母親火氣仍十分大. 這情況到了祖母病得行都行唔到才改變. 大概是一次母親見到幾乎連房間也出不了的祖母跌倒, 走去扶起她那一刻. 當時, 相信她們兩人也同時地想到... 「仲鬥咩呢...?」

但一切, 已經太遲. 祖母過多不了一年, 已經就木. 父親大人當年只不斷覺得自己對不起祖母. 至於母親大人呢, 仍因為自己也是 "炮仗頸" 所以絕口不提, 但極明顯地, 自己也變得溫馴了. 尤其是當我開始拍拖, 甚至結婚後.

很難說她是不是怕有 "報應", 不過我一早將這件歷史事件和夫人提過. 而母親大人也有所覺悟 - 就係 "相見好, 同住難", 所以一直不想和我們同住.

到了夫人懷了女王之後, 情況又有了些微妙的改變. 因為母親提供的照顧比外母更厲害, 但卻一點也不 "壓迫", 每事也讓夫人選擇. 可能是人老了, 心態也轉了.

我自己也認, 自己有少少大男人, 身為獅子座的夫人, 有時都會就我. 這陣我們在我老家 (他們裝修時暫租樓上另一單位) 暫住, 父母讓了主人房給我們, 可以放埋女王的床仔. 又好像剛才, 我見妹妹和媽媽在弄一道我們鄉下在冬至會吃的湯糰 (是純糯米粉搓成條狀, 用來放湯或糖水), 我便叫剛洗完澡的夫人說 「既然千年唔逢一潤我們在冬至前夜在這邊, 不如你也幫手整o下啦」, 夫人初時不太願意, 但之後就入了廚房幫手, 首次弄這古怪的湯糰. 我自己, 其實好感恩天主.

對住呢兩位女士, 有時夾埋我個妹入去, 當然仲有女王, 我真係覺得幾好笑. 她們唔會熟到 "攬頭攬頸", 但係有講有笑, 仲想點?

學校大聯盟之二 - 聖誕嘉年華

旅行後又過多一個月.

如是者女王病o下又好o下咁, 竟然已經差不多聖誕節了. 上兩星期, 正當老朽元帥府準備搞裝修搞到火紅火綠之際, 某日收到國子監班主黃老師的電話, 除了提及女王在校被同學不小心 (定係有心呢..?) 用手指刮到面珠燈少少損之外, 就是:

「女王好叻喎, 我叫同學跟我講野, 佢跟得最好, 可以做司儀呀」

當天外母大人接放學時也收到同一訊息, 不過當時我不以為然; 直至上星期中, 一家人為準備搬上我老家, 夫人為清假期時也順便休息一天兼執拾一下, 有空就帶女王回校, 回校時聽到老師說「下星期聖誕表演, 我們會找女王做她班中代表司儀, 因為她講得好好, 只係一句簡單的開場白, 你們在家可以再教一下, 我會將內容交給你們」

之但係同日下午, 我又收到電話:

「唔... 啟稟太上皇, 我們原本係搵o左女王下星期做司儀的; 不過呢, 頭先佢見到校長來睇綵排都好怯場, 即刻唔敢講, 所以呢, 我地都搵定後備o既, 但我們都會繼續試用她, 可以的話都會希望女王當日可以出到聲; 不過都已經找了同學幫手, 如果, 萬一的萬一, 到時見到不是女王做司儀的話, 萬勿介意」云云...

那場表演, 家長是可以去參觀的; 我雖然有點失望, 不過學校都有難處, 大家都切忌迫他們, 畢竟, 只係兩歲人仔啊! 當然, 老師未有將有關的司儀稿內容再交畀我地.

之但係, 那日晚上, 女王食食o下飯無啦啦突然講...

「歡迎爸爸媽媽o黎睇我地o既『聖誕嘉年華』! 請大家細心欣賞」

唔通就係呢句?

於是, 我地都心存少少希望, 開始鼓勵女王講一下. 不過女王有時又醒過籠, 竟然「請大家"大" 心欣賞」, 又或者扮晒o野唔肯講. 所以, 我們的希望, 的確不很大的.

好了, 到了正式表演的一天. 時間是中午 lunch 左右, 大概是方便家長抽時間來看吧.

先和遠道由加拿大回來探親的大細妹 O記一家食飯 (之後另篇再述) 再趕回學校, 雖然早到十分鐘, 但正面的小椅子已經被其他家長更早來霸了. 真不夠他們勁!

好在都還有幾張第一行的位置, 方便影o下相. 好快就見到成班小朋友出來了. 亦聽到班主任請其他老師帶司儀出來, 的確, 那是女王和另一位同學一起的. 女王見到我們時, 竟然識得微笑打招呼但係又不會衝出來, 我已經覺得佢好叻了.

呢個時候, 佢同那同學 (都係女仔) 去到台前, 老師拎著咪, 請了「今日o既小司儀」出來. 幾十個家長個個似足國務院記者會的, 舉晒機等開 show.

另外那位同學原來是負責英文的, 不過只聽到好細聲的 "Welcome, daddies and mammies... xxx, yyy, zzz... Enjoy the show".

之後到女王了.

呢個時候, 有一位都見過 "出o左名" 比較內向和不太懂表達的男同學突然 "嘩" 一聲哭起來. 女王被打窒一下. 但之後就開始微笑一下, 講出...

「爸爸媽媽... 呀... 歡迎各位爸爸媽媽o黎睇... 我地表演... 聖誕嘉年華... 嗯... 請大家細心欣賞」

一o的都唔覺怯場, 而且, 雖然少少窒, 但係好清楚!! 而且, 仲講得多過在家練習時喎!

唉呀突然好想衝出去攬住女王呢...! 好叻叻呀~! 對住幾十人講野喎! 我自己細個時有玩唱歌比賽 但第一次在台上說話已經是5歲的時候, 也是繼承爺爺十歲時上台的天份.


之後就係正式開始唱歌了. 最落力的依然係班主任, 初時所有小朋友都掛住望住自己家長, 無咩點跳, 慢慢 warm up 後就不同了. 大部份同學仔都開始有o的動作, 女王就係細幅度但係郁得好快, 另外仲有幾位真係天生跳舞天才來的. 又唱又跳直頭上身一樣. 同開始時直情兩個人咁款.

學校都算公平, 開初那隻歌的時候, 女王被安排企較後位置, 到了後半開始時, 老師就會將前後兩排互換. 不過有兩個同學就可能因為想見到自己父母, 不斷的走到中間, 擋住女王, 老師見到又好笑喎, 聯同校長一起 "執" 返佢兩個去側少少的位置.

都估到著到聖誕咁款跳舞會幾熱, 也見到有些同學著住大大套動物衫就成身濕晒. 估不到女王著小精靈的披肩加聖誕帽一樣身水身汗, 跳到尾聲時仲開始放蚊同埋少少「流灘」. 跳完之後簡直像虛脫一樣無咩反應, 看來那天下午佢去到婆婆家中食飯前應該會幾好訓...

學校大聯盟之一 - 秋季大旅行

已經是十月尾的事了.

那天是女王學校的大旅行日子. 地點是 "老遠" 的大埔海濱公園.

一早是想去陪女王的. 不過後來發現了一件案件, 當中有一名被告是沒有律師代表的. 但凡有此類案件的聆訊, 不論是多簡單的程序聆訊又或是核對清單的聆訊, 與訟的所有人都要出庭, 不可像雙方都有律師代表的一樣可以用信寫給法院, 大家同意了一些指示後由法院蓋印作實便可.

所以唯有硬著頭皮上庭. 初時又希望可以在上庭前後去大埔和女王 & 夫人玩. 而那天的旅行時間是上午九時至下午一時, 聆訊卻是上午的 11時半. 正所謂半天吊的. 最後決定早點先飛的的去大埔和她們拍照影相才回灣仔上庭.

因為自己不能和她們一起吃, 午餐當然是由我去準備啦. (其實由夫人大肚開始, 但凡有便攜午餐的話, 多數也是我去準備) 今次做的是簡單的薄切 virginia ham 三文治 (加了一點日本紫菜醬的) 和一些以色列來的溫室蕃茄仔, 有枝葉那種. 好看好食.

通告說是上午九時正開車, 8:45 要回校. 但平日女王是返下午班的, 早上也是 8:30 至 8:45 才起床 (係我衰o既, 我都起唔到早...), 要她早起是比較辛苦. 卒之 -- 我們 8:45 才出門口, 跑到學校門時剛剛 9時正!

原來仲有不少同學是遲的. 所以還好, 未開車, 而最後都等到 9:15 才開車. 我就即刻 call 的的, 飛入大埔. 但同時間, 收到夫人電話: 「原來可以加錢上旅遊車的」

o下....!!?!? @@"

但係那時我剛剛跳上的士了... 而且, 比他們早到了十多分鐘.

加上那旅遊巴又遲開車, 所以前前後後, 他們到了上午 9:50 才到達. 第一個官方節目就係 -- 影團體相. (可能係趁小朋友未玩到倦先影吧!)

搞o下呢樣等o下o個樣的, 竟然好快又 10:20. 大隊才去登什麼回歸塔呀同埋去其他自由活動的地方 - 話時話, 當另外發現有 5至7間學校在同一天去同一度旅行, 仲邊有位 "自由活動" 呢o下...

呢個時候, 搞搞o下竟然已經又 10:45, 要在 11:45 在灣仔上庭的我, 在影了一輪相後已經又要飛車回香港島. 最後是日為了影共 20 張相, 用了港幣 380 元坐的士... @@

人間正道是滄桑

(行文於2010年12月10日, 但因 hang 機所以今天才發表...)

今晚, 是 2010年12月10日的晚上, 同一個月亮會照遍挪威, 也會照著北京的秦城監獄, 也會照著遼寧的錦城監獄.

今晚, 奧斯陸燈火通明, 提琴響徹; 台上正中燈光, 將會...

照著兩張空凳.

真的不知道, 我們的祖國為何會這樣. 先判了個劉曉波, 再來個更無辜的趙連海. 劉先生為的是簽了個名, 趙先生為的只是為自己中了毒奶粉害的幼兒討公道.

中國憲法說明有結社和言論自由. 但同時又有危害和癲覆罪. 執行起來, 就是人治的天下了. 做了順民就大家 happy. 但問題是, 有當權的不講理在先. 那如何可以服眾?

現在的中國, 文明進步, 才開始出了泱泱大國之風. 尤其是 2008年, 搞一個京奧, 當時全國言論頗為開放, 網路上也是大鳴大放的. 全世界都以為, 中國真的進步了.

可惜, 京奧後一場毒奶粉事件, 一切回到當年.

之後的四川豆腐渣工程, 溫爺爺是說得溫情了, 但之後卻拘留了要找真相的人; 毒奶粉就苦主變被告. 現在又搞個不知何來的保外就醫給那位其實幾健康的趙先生.

一次諾貝爾, 更淪為全世界的笑話. 一些國家不出席頒獎. 最後有些又回來.

評審委員長說得好: 「很遺憾, 得主本人來不了, 而他太太和親友也來不了, 這本身就已經說明了, 這個獎頒給他, 是必須和合理的」.

國務院的發言人姜小姐打個官腔打得更好: 「真是一場政治鬧劇」; 不過, 我覺得, 鬧劇主角不是劉先生, 不是挪威, 更不是評審, 是誰? 不用我說吧...

小裝修, 大煩惱

近數星期 update 的時間少了很多. 有三分之一原因是因為工作好忙, 趕 "跑數", 希望聖誕節前可以有點成績讓老闆不用 "x 口x面" 的對住老朽.

有三分一原因, 是近數星期竟然是老朽聱稱為了「減壓」, 所以開始了玩一個已經玩到已有不少人不再玩的 facebook 遊戲 「二戰總動員」, 一有空閒時間便不由自主的開了來建屋練兵. 又花了點時間.

另外的三分一, 卻是因為家中決定搞個裝修, 將客房變成小朋友的房間, 而此房間最多是可以容納三人的.

先別誤會, 夫人暫未再有喜, 只是個 planning.

同時間發現了我們主人房的套廁玻璃有滲水發霉啦, 天花的燈糟因為在冷氣下積了水開始有剝落啦, 客廳的牆身有下來水漬 "撲起" 啦. 總之樣樣都唔係大事, 但樣樣都想整. 加埋加埋, 有半間屋是有地方要弄的.

也就是說, 還有半間是不用做任何東西, 就會用來擺放要做工程的房間搬出來的物品了. 至於我們幾個, 就會暫住在我父母在中環的家.

之前數個月都想整, 但人就是這樣 - 怕煩, 加上夏天天氣濕, 髹漆也不易乾, 又容易在待乾時入水, 一打風就仲死, 要趕住去閂窗, 否則在通氣的房間就會即時入水了.

於是就真的等到十一月尾才決定. 但同時, 收到的消息是, 父母家也要裝修, 會搬上樓上. 他們可是大陣仗的, 全屋幾乎拆掉再建. 說是因為兩年前舊屋收購時入伙太趕, 設計不周; 所以讀設計出身的妹妹要搞過晒. 連父親大人也說住得 "唔聚財", 所以又豪花幾十萬去裝修. 全屋除了其中一個洗手間和出面的平台花園不用裝修外, 都全拆了.

話之前入伙時無點搞, 但我記得兩年前係花了近廿萬喎! @@ 唔係化...!

不過, 連老人家也 "頂唔住" 要裝過, 為免家嘈屋閉, 也由得他們 - 又唔使我畀... (我畀自己屋企已經死死o下了)

找了和父母同一設計和裝修公司. 希望會平一點, 不過原來平埋都唔夠蝕. 父母家的工程開始後, 間中又會發現工人和物料供應夾不上時間. 他們要裝修三個月, 現在還是爛屋一間, 父親最擔心的是農曆年前未完工的話大家就真係 "企o係度" 了.

至於我屋企, 死執之下卒次有點眉目. 希望這兩天執通後, 將鋼琴運出客廳中心包好放好, 在新妹夫協助之下又搬好o的電視呀等等大件頭傢俱. 下星期真正開工時可以順順利利...

至於搬了上去父母家後, 那三幾星期間, 佢地而家就好地地o既婆媳關係會更進一步丫, 定係大倒退呢... 呢樣, 我真係唔敢諗住喇...

去年今日

剛去了九龍尖沙咀東為朋友的朋友 (朋友是個魔術師, 佢都有去表演!) 證婚, 因為夜了, 想吃點東西才回家. 就在這時, 經過了我們現在叫做 「九香」的九龍香格里拉酒店.

雖然天文台說下週才會轉冷, 但即時想起了去年東亞運時候的開心事, 做這次義工, 忙得很, 卻極之開心. 每天不同時間當值, 卻多數是早上 8 時己回到九香的義工辦事處和貴賓接待處.

去年的12月1日, 大概是開始多貴賓入住的日子吧, 記得整間九香都是人, 還有那些到現在都念念不忘的靚女 receptionist 們, 當然還有那位好在台型的接待處阿頭 edward, 就是他教曉我怎樣去尊稱大馬拿督的.

再路經, 故意入去撞鐘, 因為肚子空空, 所以想去 deli kool 買份三文治食.

見到人面依舊, 各位之前的人員竟也認得我個樣, 不過可能因為我轉了著西裝, 和那 "藍精靈" look 的義工領袖衫好大分別, 他們都忘了在何處見過我了.

進去為的是買三文治, 但上到去 deli kool, 竟然見是剛剛收檔, 再看看錶, 已經是晚上 9 時 10 分... 原來他們是晚上 9 時收工的, 最頂癮的是, 多數這級數的酒店也會盡量替客人安排一下. 但昨日他們竟然說... 「明天請早」... 倒是始料不及.

結果就是空著肚子回家, 待女王睡了後煮了一碟 penne 意粉加茄醬, 還有少少 iberico ham 吃過算了. (其實都幾豪...!)

最近見到不少人在說申亞, 多數都是嫌辦一次運動會貴. 但我又不是這樣想.

既然政府都已經不會將太大數目投放在公益上, 教育又要 cut 人 cut 錢, 根本辦不辦亞運, 政府的儲備都不會再有其他更佳的用途 (或者根本他們不想用!); 多點運動設備, 點都「好過無」 - 雖然政府在東亞運後被發現有些承諾過的設施壓根兒沒有上馬建過.

在一個區域, 一個城市, 一定會有他自身的問題, 一定不可能是整個城市都是無憂無慮食飽等屎出的人; 是不是因為運動會是個悠閒無聊的活動, 就要留給一個完全無經濟問題的城市去搞? 問題是 - 根本無一個這樣的城市. 又或者, 如果真是這樣的話, 每屆都只可以輪流在中國內地, 高壓政權, 和西亞油國 (如上屆卡塔爾) 來辦好了.

不是說就因為這樣可以亂花錢. 但是連建設也不做的話, 那連國際都會的名也除得了.

原本我不太覺得申亞有多好, 就算現在也不太覺得. 不過早幾天見運動員上了立法會, 說出自己的感受後, 竟然有人連佢地都鬧埋, 又話擦鞋又話博乜. 人家將自己的職業生命也賭上了, 說句自己體會的話, 有錯嗎?