夫人牛一

一年一度, 屬獅子座的夫人牛一. 除了和兩邊家人食飯外 (分別去了小南國和百樂潮州), 當然要有些搞作.

因為美食太多, 相也多, 所以不勁加 comment 了. 希望自己都留個紀錄.

夫人一向都鍾意食日式的紅豆燒餅, 有時都畀我話佢係 "叮噹"... 早前書展見到有介紹和果子的書, 不過細細妹說她有辦法幫我找到食譜, 所以最後無買, 而結果呢...

登登登登! 呢個就係由搓粉到煮紅豆 (北海道十勝o既大納言豆來的!) 都係自家製o既...



銅鑼燒!! 雖然樣唔夠出面看頭. 但係用了三溫糖和大納言豆的出品味道絕對贏晒出面買到的!

謝謝細細妹, 去年夫人牛一, 我的自家製 marcaroon 也是在你協助下完成的, 真係好感激你哦!

和夫人一起都已十幾年, 老夫老妻, 有時都無話咩禮物唔禮物了; 反而是她在生了女王之後手指粗了戴不下當時的求婚戒指, 為使她在年尾姨仔結婚時可以戴返隻好o野 (都...ok 大 & 好火o既... ^^) 見人, 所以去了旺角某大店再鑲嵌過, 也叫她隨便揀其他款式的細石來重鑲, 那店子是之前老朽協助過的一單官司的答辯人之一, 和他們熟了所以找他們博有折扣. 豈料太太揀極唔o岩款, 最後只係改了 size, 只需幾百元; 店長更為我簽了單, 最後呢那幾百都慳返... @@" (不過夫人保留了遲o的揀o岩再鑲過的權利...)

夫人又喜歡吃些兒時見過, 現在失蹤的小吃, 今年畀我搵到兩樣, 一是 tang 橙粉, 二就是珍珍的一隻花生夾心餅 (喂真係幾好食o架!). 兩隻現在都轉了是攻南亞市場, 竟然畀我在一間菲律賓店中找到. 在成間都係菲菲印印的地方買小吃, 感覺好「異鄉」 - 係我好似外地人咁!



來到正日, 中午和女王&夫人食中環 ifc 的 union bar; 下午就跑了去 cova 食件餅; dinner 一餐就請了老媽媽幫手照顧女王, 我們就去了拍拖, 今年地點是想去了兩年都沒有去的 - Joel Robuchon.

一早已聞三星大廚松哥之名, 香港的 "分陀" 去年也獲得兩星, 今年既然有緣碰上夫人生日是星期六日時間, 便去了一試.

作為 "後現代法菜" 掌門人 (現代法菜的教父則可算是 Paul Bocuse 和 Pierre Gagnaire), Robuchon 真的不是浪得虛名. 當晚我試了他們今年的 tasting menu; 太太就點了一道龍蝦頭盤, 青豆湯和慢烤 john dory, 大家都 share 來吃.

首先是每週不同的開胃菜, 是用鵝肝打成茸, top up beet root 的湯水, 吃出了和其他地方的分別; 但未去到一試已經覺得極品的味道



這時我點了杯 Riesling Kabinett 白酒, 少少偏甜正好配上是日的菜式, 因為眼見餐單上多是較為 "海鮮類" 和清清地的, 點白酒比紅酒更佳, 而夫人一向不愛酒, 點款甜些的她也會接受.

之後是他們的名菜 Bolero, 就是那名曲的名字 - 解作圓環和迴旋. 靚女 waiter 解釋原因是這道 blue lobster 龍蝦菜式除蝦鉗外所有東西都切成圓形, 包括下面的醬汁和伴碟的菜餚 (她詳細講了是甚麼醬汁但一時忘了). 食到這個菜, 入口時有些觸電的感覺, 因為比之前在 petrus 食過的極品龍蝦鉗味道有過之而無不及, 縱然質感比起 petrus 的清湯煮稍稍差那一點.



同時間為我上的是 La Crabe, 就是蟹肉和龍蝦 jelly 配上 leek 打成的 creme/cream




之後的是他們另一道鎮山菜式 - 酥炸薯絲溫泉蛋配 oscietra 魚子 (俄羅斯五十年鱘) 加三文魚, 一吃的時候又係一個好美妙的 touching, 夫人當下便問道: 這菜式所有東西都是早餐入面可以找到的, robuchon 是不是在食早餐時想出這菜式? 當然, 得到的答案係 "唔知喎又..." but 我好欣賞夫人這想法, 因為, 真係幾似...



再來是另一道存在 menu 中很久的菜式: La Tomate, 這菜分兩部分, 一是用蕃茄加 basil 烤成, 另一半就是蕃茄清湯 jelly 伴了一點一點的 mozarella cheese cream. 蕃茄, basil 和 mozarella, 不就是傳統的意大利沙律嗎? 但他們的 presentation 和比例, 吃下去完全是另一世界, 那清湯 jelly 是熬煮出來的, 吃得出那一點的 jelly 已經是十個八個蕃茄的精華, 是澎湃, 但不洶湧的蕃茄味.



之後是兩個湯, 甜粟米湯配鵝肝和青豆薄荷湯. 正好是用來讓吃到興起的我們稍稍停下的菜式, 上菜的次第就像《黃河協奏曲》第一 movement 中段一樣, 有一段用鋼琴慢慢地表達祥和的流水, 使人可以稍息.





之後便是魚肉的菜餚了. 先是日本脆鱗甘鯛配了柚子芫茜醬, 真係好脆o架o的鱗!



再來就是兩個大盤: 煎封 (seared) 鹿兒島牛; 和太太的 john dory 魚子黃酒汁.

牛是和牛沒錯, 但如我所料, 沒有即溶的脂肪, 因為我覺得這不會是 robuchon 的作風, 他用的不需要是 A5, 因為這會襯不起他的醬汁. 保留一點咬口嚼頭更加緊要, 這個我和他的想法一致 (妄想掹車邊了...)



魚是比我之前做的滑十倍, 無法呀, 靚女說他們的爐比我家的火力均勻得多, 慢火 slow cook 的去 grill. 這 inspire 了我下次的做法 - 切薄些再慢火欖油浸, 或者會好食o的. 夫人說那黃酒的提味功能極佳, 有酒味而無酒氣.



甜品是我的 discovery/tasting menu 的兩款, 一是 raspberry jelly 加西柚碎冰...



另一款就加了生日牌, 是鳳梨脆糖衣球裹著鳳梨雪糕配鮮椰子 sorbet, 整晚一個極圓滿的句號, 不過當時因為開始有 live 唱生日歌, 我又掛著安排他們不要這時才 "臨尾香" 而無影相, 失敗呀...

靚女拎出了公司機, 是 canon 550D加支 580EX 燈, 不過角度取得不好, 反正影到那甜品的一角...



原來在 jardin de joel robuchon 食的賓客都會獲贈是日 salon de the 即焗的蛋糕取走, 靚女說是因為在 入面 atelier de joel robuchon (可以望到廚師工作的高桌) 多數是試食者, menu 選擇更多; 而來 jardin 的客人多是像我們一樣慶祝特別日子的, 這份小小蛋糕 (嘩, 朱古力加蜜餞果皮呀!) 是他們給生日者的小心意哦, 這時我的咖啡和跟上的 petits fours 也到了. 也意味著這幾千大洋的晚餐夠鐘收工, 亦說明了我們夠鐘去湊女王回家喇... 你問貴唔貴, 就真係好 x 貴, 但係抵唔抵呢, 又其實係幾抵喎!





夫人呢日當然開心啦, 食到松哥大作之餘又可以拍o下拖...

講開又講, 其實, 老朽最大的夢想, 是有能力和成家人來食松哥; 這不單是錢可以做到, 而是一家人齊齊整整地食米記三星, 呢個, 係一種極大的福份.

維持有限度服務...

唔係地鐵, 係老朽o既證婚 service. 不論係幫朋友又好, 公家都好, 都要大幅度「減產」.

o岩o岩上星期同夫人嘈完幾句.

都唔係嘈o既, 只係畀佢話o者. 其實又無咩事. 我咁 "林" 點會唔就佢丫! :P

不過呢, 就係要犧牲左老朽其中一項最大的興趣 - 證婚的 service.

話說老朽 & 夫人都而家都仲係請緊華藉保姆照顧女王的, 夜晚就係我們親自操刀了.

不得不承認, 女王在我們的照顧下, 雖然體質上都仰係稍稍細粒 (當然醫生都話正常啦), 但腦部發展係相當不錯的, 起碼各樣反應都好好, 多多野講, 只係返到學校呢兩日有點未適應晒但係都唔錯 (另文再述).

但係每週末, 夫人都因為不用上班而我要, 所以夫人要照顧多大半天, 如果晚上加埋證婚的話, 那麼夫人就要頂多一天. 而如果上午一單婚禮, 晚上又一單的話, 夫人就係當足一天更.

老朽極喜歡為人證婚的感覺, 之前都已提過. 雖然錢唔係多而且一般都要同公司交數, 但依然係開心的. 但夫人就覺得每個月得四個星期六日, 即共 8 天, 如果有四對新人的話, 可能就會有四晚走o左去的話已經唔見了一半的晚上放假時間 (咁多數新人都係開席前行禮o既又...) .

作為夫人, 她的心情, 老朽當然理解. 不過如此一來, 老朽之後每個月可以幫到的新人就會得返好少.

一向我都係用 "私房" 的形式運作, 即不像一些行家的出去賣晒廣告又或者四圍宣傳 (更加唔希望用個 blog 來當廣告). 只係一班老友用過 service 後的口啤推介, 間中會有一兩對「飛來蜢」; 不過並非老朽認叻, 正所謂接朋友介紹都做唔切 (本身亦不想做多, 因為自己知自己事, 總要交人的). 而家仲要再減的話真係只可以再「揀擇」些. 有時連行家「彈」來的也不敢接.

無法子, 因為老朽證婚也是希望重溫對夫人當日的承諾, 如果連陪都陪唔到, 仲講咩對她的承諾呢...?

或者, 可能要等請了全職工人之日, 老朽才再次自由地幫新人證婚了...

老闆與 Facebook

真的好多人用 facebook 的.

有時用著用著, 都會有同事話 add, 而又不會拒絕的. 這包括一般大家都係 "咁高咁大" 的同事.

不過說到老闆呢, 就真的有點頭痕.

如果看這裡較多的朋友都會知道, 我口中是有一位 "好友老闆" 的. 這位大哥好耐之前有個 facebook 的戶口, 不過去年覺得太易被揭個人私隱, 所以 "deactivate" 了戶口. 但他沒有 delete 到.

今年可能因為他生了位千金好想與人分享吧, 總之就重新啟動了戶口, 更 request 了 add 老朽作朋友.

這下子可麻煩了.

不錯, 他是好友, 也算係相當好人的.

不過, 他也是老闆.

不過因為不少其他同事都 add 了他, 老朽都不能免俗, 尤其是老闆特別致電我, 叫我 add 他.

於是, 由兩個月前起, 絕大多數有關公司的牢騷都不能明目張膽地在 facebook 發出來, 有時好隱晦的講兩句, 好友老闆就好「關心」地 (多數都真係關心o既又...) 問候一輪, 有時又懶醒地說「估到你諗咩啦」之類. 有時更加勸老朽身為中層人士; 不要將公司事公開地說給其他人知道.

大佬, 有時估到咪估到囉, 我就係唔想畀你知丫嘛!

唉, 而家開始覺得都幾煩. 開始知道, 點解有些頗有名氣的老友 bloggers 要開兩個 facebook account. 我絕不 "名", 不過也會有不想人知的時候.

有話說不得, 有時真係會覺得幾仆街的.

如果老闆們不幸看到這 blog, 又或者你(們) 估到我係邊個, 拜託, 當睇唔到, 除少數好友外, 我也不會公開身份和公司的 identity, 無人知道的. 所以你地唔使慄, 當畀返少少空間小弟.

唔該.

香茅兩食 - 香茅煎魚柳 & 香茅茶

因為進入了夫人的生日期, 而最近又多了其他的濕碎事務 (工作除外, 另文再述), 所以近兩星期都無自己下廚試菜, 最多是煮些大路的 A 炒 B 或者煎 cdefg 之類, 無咩挑戰性. 倒是上兩星期夫人約了朋友食飯, 老朽便下廚煎了件魚和女王一起吃, 當然女王那份是撈落飯仔之中啦.

某日上完 court 之後, 路過金鐘的 great; 見到有些香茅, 一扎扎的賣 (其實有時其他超市也有); 便記起早年去泰國做完 spa 飲的香茅茶, 也想弄一道有香茅的菜式出來但又不想次次都 香茅豬/雞扒的, 便買了一大件野生舫魚 (john dory), 用拍碎的香茅, 魚露, 少少粗海鹽, 少少糖和少少白胡椒醃一夜之後煎香了. 而又見到有些牛肝菌 (porcini), 便又買了幾朵 (中國產但係都貴到死, 四十大洋先得幾大隻, 仲要切o左個蒂), 切薄片後用牛油和少少蒜爆起炒香了 (因為女王會食所以唔落白酒了), 同時也見到一些好可愛的泰國迷你茄子, 便撲些粉半煎炸到起脆面 (茄子有時好衰, 唔蒸的話要走油才會內軟的, 一唔係就好似上次咁放入焗爐焗差不多半小時).

今次的裝盤係用牛肝菌墊底, 左右各放三片剖開的脆茄子, 一旁正面放, 另一邊碟的茄子反轉放, 牛肝菌上面就放了煎好的魚扒, 上面再加一片牛肝菌和半條細切拉開的香茅, 美觀又可以用來擦一下魚身提味.

至於香茅茶就更簡單了, 將剩下的幾支香茅拍鬆和切度後放五六碗水煮滾, 再煲廿分鐘出味, 加糖 (to taste) 便成了, 飲剩仲可以放雪櫃.

女王見到我將o的大件魚和爆到鬼咁香o既牛肝菌加入飯仔度畀佢食, 直頭係咁食飯, 一陣就食完, 同平日差得遠咯...



不過計起來, 呢味都唔平 -
香茅 5 蚊
件魚扒 130 (係大件o既)
牛肝菌 40 大洋
茄子 10 用了一半即係 5 蚊

= 承惠港幣180 大元! 所以出面食野生 john dory 都好死貴...

分顏色與揸筷子

好簡單講o下o者... 上兩個月女王姨媽送了一套用小貨車載著一排排的顏色小骨牌的玩具, 是用來排骨牌玩的; 不過女王卻鍾意把骨牌仔取出來當積木地玩. 於是, 這就順理成章的做了女王學分顏色的道具.

搞了好幾天, 終於懂得分開和知道何謂藍色黃色橙色了...



另外, 早幾個月已經買了一對 winnie the pooh 的初學筷子, 不過上面說明是 3 歲才用的. 但女王麻麻又買了另一對是米奇的, 畀女王見到後又鬼殺咁嘈話要用, 所以就請保姆姨姨開了來洗乾淨, 又估不到這有三個小圈的筷子, 女王學得好快哦...



夾呀... 夾呀... :D

要孝, 不准不孝...

前晚證婚, 還和夫人帶了女王去了尖沙咀在證完之後食 main st deli. 點知夫人在我 "開工" 之時將 bb 袋留了在海運大廈內, 搞到我在證完後原本可以舒舒服服地食飯的, 卻 "淪落" 到要著住西裝跑回海運的店舖取回 bb 袋 (仲撞著係一家剛收舖的 bb 衫仔店). 所以整晚的行程都夜了. 而女王都係差不多 11 點半才入睡.

之後老朽洗個澡後 (已經成一點了) 便準備和夫人看一會電視, 就在老朽準備入浴之際, 屋企電話響起.

夫人將電話拎來, 說是細妹十萬火急找我.

「 daddy 頭先訓訓o下想飲水, 跌跌o下咁行出來, 而家企o係廚房又斟唔到水又唔郁, 成身硬晒同埋出汗呀!」

我:「你試o下叫佢話幫佢丫」

妹: 「試o左喇, 佢猛話唔使唔使」

我: 「咁你叫媽咪出手幫佢拎走手上物品洛先, 之後 "的" 佢出廳睇佢咩反應」

「無咩反應喏」

因為老朽不在場而妹妹一個人點頂呢, 我和她都極之擔心父親是中風, 所以大家都好快決定馬上打999, 因為之前在醫院工作, 多少知道「中風」係要好快醫的, 遲o的都好大件事.

好快救護車來到. 救護員上來. 我和妹妹保持電話聯絡.

十分鐘後打來「而家佢醒返少少喇, 救護員話佢血糖太低喇, 得1.4 (正常人要 10 左右). 但係daddy當時血壓好低, 血管太幼打不到針畀糖水, 而家將糖水畀佢飲埋先. 跟住就去醫院了. 應該無咩事的, 起碼有反應」

但老朽聽到又點會放心!? 雖然是知道應該不像是中風, 而佢又開始 come round, 不過既然係咁就一定要去醫院驗一下的. 於是便著他們跟救護車去醫院先, 老朽叫夫人先睡和照顧女王後便飛的去瑪麗了.

去到時, daddy 已經上緊內科病房, 他已經好精神, 同埋開始肚餓. 不過對於「覺口渴」之後所有事都不知道. 而過了一會, 已經是凌晨三時, 醫生來正式檢查收症, 診斷為因家父有糖尿, 上星期加了藥, 而他因而對飲食過份小心, 之前一天因為飲宴, 故意比平日食得更少, 但藥力唔會理你肚有無食物嘛, 於是就照樣發作, 所以便「領晒o野」.

雖然知道父親無大礙, 不過我都等到吊好糖水他準備休息, 和病房職員趕才出去 (非探病時間嘛, 人家見你剛入醫院畀你留多陣, 好畀面了). 醫生說觀察一下第二天便可以出院.

凌晨三時半的瑪麗...



回程時, 老朽只想著麥嘜中, 春田花花幼稚園校訓第 53 和 54 條:

要孝, 不准不孝

東亞運回憶之 - 我要頒獎音樂!!!

在去年東亞運時, 相信大家都聽得多那首 「衝出世界」, 又有中文又有英文版. 而在 wikipaedia 去 search 呢, 資料是這首歌被廣泛用於整個運動會和頒獎儀式上的.

但其實呢, 在頒獎儀式開始的一刻直至播冠軍的國歌前, 大會是準備了另一首歌曲的, 這音樂聽起來是《衝出世界》的變奏純音樂版, 既找到原曲的影子, 卻變得莊嚴祥和. 不過 -- 卻沒有多少人記得. 或者在此老朽提供當日港足贏得金牌時, 亞視的頒獎片段 (幾間電視台以他們聽得最清的背景音樂); 不過錄影者 cut 片位置問題, 第一段片的 9'05" 才開始正式的頒獎音樂, 而其他主要音樂片段就要在第二段才聽到:

(記住 disable 了上面的音樂播放機才 play...)





其實在東亞運期間, 老朽已多次聽到這歌, 亦試過問相熟的友人義工 (包括了做頒獎儀式領袖的 ken sir 呀, gigi 呀仲有阿 mo), 但他們都沒有這歌在手, 而到東亞運結束後, 我又問了其他義工和一些友人, 都說他們沒有這歌; 有些朋友 (甚至場地義工) 更說不知老朽說的是甚麼音樂, 還是我給他們看上面的片段來醒起「好似有首咁o既音樂喎」

其後, 連「橫手」都出埋, 透過義工局的友人「施壓」(都係問o下o者)問了東亞運公司的活動總監呀, 負責東亞運音樂製作的香港電台的有關人士呀, 還有東亞運公司內做頒獎的同事. 不知是真神假鬼, 大家都說無這音樂在手, 而港台就說只負責提供錄音室和設備, 沒有留底. 連金培達那邊的人士 (不是他本人) 也說金先生不是負責這首歌的. 不過義工局都好有心, 為我找來了不少 CD/DVD 等, 不過當中全都沒有這音樂的.



找了半年, 一回頭緒也沒有, 不過老朽真的覺得這音樂做得很好, 甚至比北京奧運時譚盾那首《金聲玉振》更加莊嚴 (當時金聲玉振是有官方 music video 放上 youtube 的); 如果有朋友見到這段而知這音樂下落的話, 有勞聯絡我, 薄酬呀o下!!

委實不想一首好音樂從此消失...

東亞運回憶之 - 辛苦搵來自在食...(東亞運期間飲食錄)

一篇都幾長, 又 hold o左好耐的 blog...

真撞鬼咯... 找自己之前寫下的草稿時, 才發現原來東亞運後有這麼一篇寫了一半也不到的, 一直未有出街. 因為老朽對去年尾東亞運實在是餘情未了, 所以特別完成它來紀念一下...

在九香 (即九龍香格里拉酒店, 是大會的貴賓酒店) 當值, 不像在其他場館當值樣, 是沒有提供飯菜餐膳甚至是飯盒的, 因為酒店方面實在係比較貴 (貴賓們倒是有每人每天八百港元的實報實銷餐飲券), 而且尖沙咀附近又有不少食肆, 所以每天當值時的午晚餐便成了我們一班在九香義工的每日話題.

老朽為食程度之高一向令人嚇親的. 曾經在大埔工作後為了一碗豬手麵而飛的去粉嶺 (群記). 而當然身在尖沙咀東部, 吃的都盡量找些古怪地方. 更曾希望和另一位也是義工局委員的義工去九香的意大利餐廳 Angelini 食 lunch, 但因為身穿義工制服有點不便而作罷.

不過話得說回來, 人是群體生活的動物嘛. 也是要和其他義工頭們共同進退, 有時也要將就將就. 記得第一天當值 (11月30日) 中午就是因為人生路不熟, 只是和另外一兩位已認識的義工去了「扒王」食了塊大雞扒. 反而是第二天才和另一班義工們返幾年之前食過幾次的好時沙嗲食其海南雞和印尼沙律 gado-gado (為免我們的「禮賓府」無義工領袖當值, 我們一班義工頭是分兩三批「放飯」的). 這頓是相對來說好吃的.

不過有時就無咁好彩了, 記得正式開幕前數天, 大量貴賓開始「湧入」香港, 而他們的行程又開始亂起來 (當然了, 自認為貴賓的大佬們多數都會無通知無跟大會無尾飛陀但又會想用大會提供的 24 小時 on call 全新寶馬 5 系!)我們一班做聯絡的義工頭做到無停手, 食飯就會在近近地的快餐店解決 (盡量都不要老麥啦, 原因下述). 不過有一晚食著的是一塊有一半是全生的豬扒, 這個就有點嚇人了. (唔好以為淋o左紅汁就唔覺得o架, 食死人o架生豬...!) 不過那晚又係趕到發瘟所以當食少半塊算, 無再叫過.

謂起茶餐廳, 不得不想起一班義工頭在食飯時, 好似一家人的「叫送」來吃. 雖然只是茶餐廳的格局 (硬係覺得叫送食飯是在大牌檔或者打麻雀會所才最像樣的), 但係那同撈同煲的感覺好特別. 大家知道, 過了這幾星期, 又要各散東西, 不知何時才可以有機會再聚, 大家就把握今次的緣份, 吃一餐開心高興的.

之前提過, 12月初幾日是大量外賓到港的日子; 在11月尾開場 briefing 時大會的 staff 已經提點過. 既然知道那兩天是忙得很, 那老朽就作一兩次東, 夾硬用了義工局 council member 的名義請了各同事和義工食 delifrance 的簡單 lunch, 大家一邊開會討論處理貴賓的方法一邊吃; 到完成最忙的一次開幕式後就買了一次九香 Cafe Kool 的西餅開 evaluation 時食 (係幾好味o既); 當慰勞又好, 當係趕開會食又好, 當益自己友也好吧. 總之大家開心就成了.

當然, 另文都提過開幕那晚, 在忙完一大輪之後, 老朽叫來了Outback 外賣和一眾 VIPPA leaders 和 staff 吃, 邊吃邊看開幕式, 不過上次那張相有人話我們似「拜祭」緊霍生 (o岩o岩放了一堆食物在電視檯前, 而電視正好播著他講話)!

之前的相再 post 一次...



提起 cafe kool 就要提一下 deli kool, 是九香的外賣簡餐部. 我因為為食但有時又無時間, 「放飯」時就去那兒叫了三文治或者漢堡包. 他們和 Main Street Deli 雖然還有距離, 但他們有一下獨門秘方, 不知何解他們炸出來的薯條, 放涼了一小時後仍然極之香脆, 除熱度一定減了之外其他食味全無改變, 堪稱一絕.



一向得知老尖有間隱世的日式炸豬扒飯叫做「萬豚」. 想試好耐了, 因為自己相當愛吃, 又一向覺得食極都無人做得好過 Tonkichi 所以都想試. 不過千辛萬苦的等到位後和一班愛吃的義工頭食完; 又係同樣 comment - 幾好o既, 不過同 tonkichi 比都係仲有距離!

反而呢, 韓國菜就有驚喜了. 有一天下雨, 自己去了那「韓國街」食一間小店 「秀」; 吃的是炸醬麵, 麵十分煙韌, 醬也似韓國見過黑黑的; 吃下去也是甜甜的. 覺得滿足; 而另一間老店「錦城」, 就是和一班人去食的; 我們中一位義工頭是香港射箭總會的國際裁判. 眾所周知, 韓國是世界射箭一哥, 所以這位裁判都成日去韓國; 她對於錦城的 comment 竟然是「牛肋骨做得還過得去, 不過睇佢個冰鎮冷麵就知佢地好懶」喎...

而當然, 在極忙的日子, 幾乎全九香的義工們都係食外賣都係去百周年廣場的 -- 老麥!

我們是當 「貴賓助理」的, 而每位貴賓都會有一大份紀念品, 當中有不少是贊助商送的, 其中奇華就送了一盒特別版的香港禮盒, 盒面即印了東亞運 logo 的; 這些 for 貴賓的東東, 我們是碰不得的; 不過負責的官員就「暗啞底」以「你o地都要知道入面有咩, 唔覺意有貴賓問起時都識答嘛」為理由, 開o左幾盒, 等大家無飯開或要小食時, 除我們自己做 "補給"外提供多個選擇.

「甘鏞風暴之清盤行動」

不好意思, 雖然老朽認識鏞記部分人士, 不過一不是兩位甘生, 二也不打算講人家事, 我關心的是有無得吃. 既然有, 就不擔心了.

去年年初一班中學同學搞了一次 「九星連珠」, 因為 facebook 的力量約成了十幾位多年無見的中學同學出來晚飯, 地點就是鏞記; 而今年負責的搞手班長又想即興的來多一次, 所以上星期初就急急的約了星期五晚再戰鏞記. 而就因為他們的官司, 所以班長將是次飯局定名為「甘鏞風暴之清盤行動」 (真衰...)

因為認識的經理病了, 老朽的檯雖然訂了, 卻無人負責寫菜; 倒是之前幫多好多次手的 philip 哥幫忙才訂下了菜式, 還因應一班衰公要求, 將一些「海鮮價」的菜式價格酌減.

一上到去, 竟然見到甘老闆坐鎮 (其實他幾乎每天都來巡場, 不過未必碰上), 因為是老前輩, 老朽老遠就朝天子的打了個揖, 老闆微微一笑回應; 因為和他不熟 (不過他倒認得我是常客), 故未有攀談.

一早說了幾位會帶酒, 既然如此, 老朽也就不帶紅酒, 改帶些古怪東西了.

兩年前買了日本島根縣山田錦 (著名釀酒米種, 其他的有 "美山錦", "五百萬石" 和 "出羽燦燦"等) 「李白酒造」兩支大吟釀: 限定版「月下獨酌」和他們用來比賽的絕版「斗瓶圍」(限千多支, 有 number 的); 多次飯局都已經 "帶埋出來", 但係竟然一直都 "飲唔到佢地". 因為一般清酒都是數年內要幹掉, 故今晚帶了月下獨酌出來, 希望到最後不用真的「獨酌」了. 也買了一支意大利的甜酒 Muscato di Siracusa, 不貴, 只是港幣 200 大元左右. 叫做有個甜酒作當晚小結.

其他好友帶來的, 逐人逐人現身就逐支逐支來到;最後竟然見到總共 8 支酒, 還有一支是 magnum (雙瓶裝), 即份量上有 9 支酒. 而我們 12 人中, 只有 10 人飲的, 那就是說平均每人差不多飲一支! 而計飲我次序, 我們一班酒徒看了一會, 得出以下次序其識: (揀酒的次序極之好玩o架!)



李白 - 大吟釀限定版 - 月下獨酌 (島根縣 山田錦)
Gevrey-Chambertin 07 - Burgandy
火谷 04 - Margaret River (Aust.)
Frontera Cab Sauv (Magnum) - Chile
La Grange Neuve de Figeac 03 - St.Emilion
Pichon-Baron 04 - Paulliac (與 Frontera 同時間開瓶)
Pavillon Rouge du Margaux 04 - Margaux (與 Figeac 2nd 同時間開瓶)
Moscato di Siracusa 03 - 意大利餐後 dessert wine, 配甜品同吃

一直以來老朽都好希望吃到他們的家鄉鵝姑, 就是選清明至重陽間, 四斤以下的「鵝乸仔」 (即未生過蛋的) 釀入江南正菜, 冬菰, 金針, 雲耳等, 封口才上皮再燒製, 像烤火雞一樣; 因此這個燒鵝一定要全隻預訂, 而且要有貨才有得賣. 計價大約六百多元, 其實咁多人食又咁大隻, 已經幾抵了.




席間有位柳東兄膽粗粗, 問一位阿姐拎「董事長腐乳」吃; 記得上回老朽訂了「二十四橋明月夜」後問四樓經理時, 她夾了兩磚出來; 今次柳東兄的「粗膽」卻竟然得來六磚, 似乎靚仔真係比較有著數的.



其他菜式都係食過但好想再吃的, 其中一味老朽極喜歡的夏天菜就是「銀絲萬縷」, 是濕炒冬瓜絲, 此菜是平價料, 但考工夫的菜式, 他們做得十分好, 冬瓜先煨入味才炒, 卻仍帶點爽身. 鏞記只在夏天提供此菜, 正所謂不時不食.



大概是酒精多了點. 我們當中有一些根本「斷了片」, 連老朽問他們收錢時他們都只是「畀o左算數」, 第二天卻再叫我收錢 (!); 還有一位做了白鶴派, 不過吐完卻沒有告訴老朽, 看來下次去的時候要向清潔部賠個不是了...

福有攸歸...

大熱天時, 屋企冷氣竟然壞了.

冷氣是香港人今時今日不能或缺的東西. 不過又是個惡性循環, 愈開得多, 世界就愈熱, 但係不開呢, 女王跟本就是不勁跳勁玩也會成身汗. 倒不要問老朽點解, 總之女王就是 "熱底" 的.

這個冷氣是當年跟屋苑來的, 是 "專心做冷氣, 一定更完美" 那牌子; 不過用落, 倒真的完全不覺得他們的機器有幾好... 年年都會輪住來壞的.

咁都仲係 "福有攸歸"? 唔係嘛?

不過世事往往就是這樣巧合.

之前一兩年, 見冷氣開始有時壞, 時常都會借著保養請師傅來看看, 而咁o岩多數都係同一位師傅. 後來有一次, 我問他是受聘還是 contractor, 他說是 contractor. 之後我便問他會不會自己當接 job 的幫我洗冷氣, 他也說可以. 於是有一年多的光景, 老朽是用平一點的價格找這位師傅來洗冷氣的.

某一次, 這位師傅穿著了奧比斯眼科飛行醫院的汗衫來, 原來他之前參加過他們的活動, 也是他們的捐款人; 而碰巧老朽也是有捐助奧比斯的 (咁真係好有意義嘛), 所以那次有一本他們的通訊寄來放在飯桌面, 師傅也見到了. 大家就說, 原來大家都係同路人.

又過了大半年, 今年年初時我又請師傅來為我們洗一次冷氣, 因為其中一部又開始不凍了. 不過今次他不來, 反而告訴老朽:

「你們的屋苑那些跟樓來的冷氣機, 開始有壞大機或漏雪種的情況; 見你都係捐開奧比斯咁有心, 提醒你們喇. 我寧可不接你們的 job, 你做返保養啦; 萬一真係要換零件甚至壓縮機的話, 你畀三兩千保養係有賺的」

老朽初時真的不太相信, 不過既然師傅連自己錢都唔賺, 那姑且又花了幾千大洋做了保養.

好喇, 六月尾, 冷氣又唔凍喇喎!

另一位師傅上來, 看兩看, 說要搭棚洗室外機, 是要額外付款, 不過有保養就平些.

心中已經暗暗多謝那位 "奧比斯"師傅.

和不少新式私人住宅一樣, 在屋苑搭棚是要向管理處申請的. 而老朽在填表時, 就聽到隔鄰是樓上的台灣夫婦, 說要換室外壓縮機, 無保養, 收...

港幣一萬二千元! (仲係一部咋喎!)

好喇, 搭好棚, 又另一位師傅上來. 一看...

「呢位阿生, 你們的壓縮機其實要換喎!」

「嘩... 上次又無人講..? 好在我有保養」

「哦, 咁你好彩喇! 除搭棚外一毫子都唔使出」

今次好在有 "奧比斯" 師傅, 咁就真係福有攸歸喇!

就係下面呢部黑古勤突o既o野值港幣一萬二千大元. 真係講都無人信!

女王登基兩週年慶典

六月尾, 就是女王生日, 和英女皇的壽辰假期差不多 (有說女皇是4月生日的, 不過將就了英國的天氣所以在6月放假).

和往年一樣, 搞了兩次生日會, 一次是內務府的, 就是在正日和自己家人出外用膳和切蛋糕. 一次呢, 就是「總理各國事務衙門」的, 就是和各親戚搞個 party. 這個是我媽媽那邊的親戚的傳統. 他們每位舅父阿姨的小朋友都會搞三幾年; 既然是這樣就當是個家庭的聚會吧...

當然, 一連串的生日活動還包括去了九里路咁遠的公園拍照, 今次選擇了香港公園. 萬里尋親的去到, 不過今次和去年女王九個月時相比, 當時去了馬灣公園 (那時候諾厄 (基督教譯挪亞) 方舟還未開放, 那回因為女王未識行, 真係有自唔在了. 今次就不同, 女王識行識走識講o野, 還不知熱的跑來跑去身水身汗. 老朽當然是充當攝影師係咁影影影 (今次只帶了 17-35mm f/2.8), 但夫人就見玩了好一會 (都未夠一小時) 便說見熱 (又真係好熱o既...), 說要返商場嘆冷氣兼開餐了.

女王第一次食意大利 semi buffet, 之前不愛蕃茄的她無啦啦不停嚷著要食蕃茄 - 可能意大利的羅馬茄好吃吧!? 還有中東小米 couscous. 她愛吃得不斷問我「咩來o架?」當我答 "couscous" 時, 女王就會說: 「doo doo!! 哦~!」

隔鄰幾檯見到女王勁 cute 成日撩佢...




和家人食飯, 就是去了和民, 因為去年某次他們的食物中被我們發現了有些不知是鐵片之類 (當然是意外), 和民便送了張永久 VIP 卡給老朽, 最大用就是可以訂位了. 不用等對於一家大小來說, 相當緊要. 女王平時見到麻麻或者姑姐又或者外婆還有姨媽和姨姨的男友都會特別 hyper 的, 今次一次見晒咁多人, 直頭興奮到連飯都唔想食, 只顧在房 (訂了房嘛) 中係咁跑, 好似上左鍊停不了的. 不過呢... 夫人訂了她自己最愛吃的 simply life 香蕉批就似乎不是太多人欣賞... (其實幾好食o架!)



至於那個 party 呢, 其實都係一班親友玩o下聯誼o下, 不過今次老朽就是去了西環的名老字號「森美」訂的外賣. 他們各款東西都做得不錯. 尤其是一款迷你漢堡... 不過, 今次他們的漢堡包的牛肉未熟, 直情係中間生那隻, 結果勞動了老朽妹妹去將那幾十塊迷你扒「返煎」, 有點煞風景.



不得不提的是女王今年的生日禮物. 當然, 各界友好送來的有整間超市咁多的玩具 mini 食物, 一間廚房 (!) 和一個如果喝水真的會 wee wee 仲要換片的公仔. 還有爺爺麻麻送的 kitty 手袋和手錶 - 老朽記得, 自己細個時恨有隻手錶, 恨到三年班下學期才有啊!

之但係, 老朽和夫人就送了一套小孩用的桌椅, 是 ikea 出品, 當然女王訓覺後可以用來當茶几 (仲係世界盃某夜姨仔男友來訪睇波時兩人夾手夾腳砌的) ;) 而女王就喜歡坐著玩和飲奶奶... 放這桌椅的地方, 就是由她7個月起放網床的地方. 眼見著這個地方由無o野變有搖籃, 由搖籃變網床, 再由網床變桌椅, 望著這同一位置的變換, 老朽凝住了, 眼角也開始濕了...

超級歡喜冤家

老朽好少寫我的證婚客人的. 因為寫極都寫不完, 每次都有不同的驚喜, 而每次雖然誓詞差不多, 老朽聽誓和監誓時自己的感覺也不同, 唯一相同的是, 每次都會想起自己當天在教堂讀誓詞的情景. (之前都提過...忍唔住講多次 :P)

不過上星期證的其中一對新人, 實在係有點 "爆", 也是讓老朽十分感動的.

這對新人, 一點也不花巧, 他們也只是擺了三兩圍, 請了自己的至親來.

他們對我說「因為我們兩個都離過婚, 今次真的不想鋪張」而誓詞的選擇, 他們也只用了最普通的「政府版」.

不過兩家人似乎都已經完全接受他們的過去, 而且從心感覺到他們的甜蜜.

老朽去到那間都幾多人去擺婚宴的集團酒樓; 外面的 staff 已經認得我「老朽律師, 呢邊呀」「咁都畀你認到?」「你拎個咁o既篋, 遠一遠就知係你啦」(咁我個證婚 "架生" 篋又的確係幾 "律師" o既... )

入到去, 幾檯人, 包括兩位襯家媽媽正在打牌, 新人見到我打個招呼後老朽便例牌的覆述一次之前已夾好的程序.

問新人拎戒指準備放在戒指枕上. 之後提他們 - 你們簡單的禮儀, 唔會揭頭紗O架喇, 咁使唔使我提你鍚新娘先?

新郎話「呢層呢... 我們自動波啦!」

...結果, 到交換戒指後, 新郎係好尷尬地問「我...得喇可?」

反而係新娘這個時候輕聲叫「衰佬快O的啦!」

而戴戒指時, 不知何解他們說自己的手指肥了 (其實可能因為緊張所以手指充血脹了), 男的就對女的話「哦! 隻戒指係咪買畀我O架...」 女的反應就係 "搣" O左佢一O野...! (行緊禮O架下O個陣)

畀佢地激死; 不過, 這些細節, 不是一對熱戀中的人應該有的嗎?

呢O的咪係難得有情人囉!



我為朋友證婚, 好多都是開席前, 大排筵席的有, 西式的有, 玩教堂儀式的也有, 而都有不少的新人是比較簡單的十圍八圍自家人吃個靚飯註冊. 不一而足. 今次新人也只是擺了三圍自己屋企人. 行禮時也不拘小節, 只請德高望重的長輩坐下, 其他的親友就好 warm 的圍在檯旁. 人不多, 但真的有 warm 的感覺. (warm 到今天有另一對新人找老朽查詢時的也 share 了這次的經驗給他們)

如果是一家人, 又或者三兩圍食飯的話, 除請他們最好 book 間房外, 老朽都會提他們最好在間了房後多放一張檯, 就算是麻雀檯加檯布也成, 以免在食飯檯上證婚, 一來不夠莊嚴 (我們的守則講明要保持婚姻與婚禮的莊嚴性質), 二來有機會弄污證書就大件事. 因為我歷史上證過最頂癮的一次, 就是在某集團火鍋店中, 新人沒錯是有間房, 不過地方細點, 也無妨, 不過總不成開著個爐, 標晒煙的證婚吧? 叫他們熄了, 好快就有酒樓人入來著返; 呢下都未算, 最正係那位酒樓同事見老朽坐下無飲茶, 便將現時火鍋店檯面好流行的那一盤 「九宮格」佐料推過來, 向我叫道:

「先生, 你未『混醬』呀!!」

混醬.............. -_-"

清醬味醂焗肉排

早兩星期六, 一時想不到煮甚麼, 想起之前曾經做過一道炸的一宇排做得不滿意, 於是想再做多次. 但去到街市時見到有些賣相很不錯的腩排, 便買了回家才算.

點知夫人話自己喉嚨有點不舒服 (夜睡喎! 但佢又無睇波, 真奇...) 所以炸不成了. 唯有做一道炆的. 但又不想太濃味, 所以便亂打亂撞的去試一次新東東, 不過試完後竟然覺得相當好味, 搞到一向不會將份量記下的我都要記下今次自己做過乜...

腩排斬大件 (手指咁長) 出水煎香; 之後再用薑蔥, 還有兩粒八角, 一小片桂皮來起鑊; 將腩排放回炒兩下後落料炆. 用的是 2-3湯匙的頂抽 (即雙璜頭抽), 2湯匙白砂糖, 1湯匙左右的花雕, 因為想有些甜酒味, 於是加入約 2 湯匙左右的味醂 (即係之前提過, 悅壽司老闆送的那些極品味醂) 再加水到面炆1小時, 之後熄火焗半小時, 再炆十多分鐘, 最後焗多十多分鐘就食得.



中西廚作烘或者炆都有個共通的 rule, 就是烘/炆完後要關上蓋蓋焗一會, 中廚沒有特別解釋原因, 只說是會 "林" 些. 但西廚說的就是 "redistribution of juice" 所以會更 tender. 而的確, 運用之妙在一心. 這些大道理是全世界通用的. 煮東西時不妨都參考一下...

心電圖

女王呢, 由出世時開始, 醫生都聽到話心臟有點雜音.

一般人聽到可能會有點驚, 而有醫學常識的人聽到或者會擔心是不是有機會有水漏呢?

老朽夫人就係驚呢樣, 所以女王出生無耐, 去政府健康院和去私家醫生診所打針時已經問有無需要去醫院詳細檢查. 所有醫生當時都話幾年之後應該會變回正常的.

不過早排去私家醫生取份用來證明健康的入學報告時, 女王首席醫官鄒醫生就說「我都覺得係 functional murmuring, 即係就算有雜聲都無事的, 不過兩年都仲咁明顯就少見些」.

一聽到, 老朽當然覺得無問題, 但夫人就騰晒雞, 過了幾天, 忍不住和老朽說, 不如叫我之前在醫院的舊同事找個兒科看看. 又或者照o下心電圖之類.

雖然我真係覺得無需要, 不過既然夫人如此擔心, 就順一下她. 打了個電話找舊同事. 他們說以前老朽的老友某院兒科阿一姐楊醫生已經退休去了環遊世界, 不過現任的阿頭蘇醫生「唔知點解」仲記得我, 於是為夫人安心, 而且仲有保險 cover 大半, 所以就用了他們新增的 "政府醫院私家病人計劃" 帶了女王去睇.

那老朽當然要帶女王去醫院, 當探舊朋友也好嘛!

身為香港兒科學院理事的蘇醫生極之好人 (雖然我真係唔記得幾時和她開會認識過...) 她說女王的心跳雖然多數無事, 不過真的比一般的 functional murmuring 來得大聲, 所以都親自帶我和女王去照心電圖和照超聲波, 老實說, 女王初時都好驚, 不過佢驚就係唔識反應, 成碌木咁, 所以醫生以為佢好乖... 但後來和醫生護士玩了一會後, 女王就熟晒仲笑晒... 倒真的未見過有人一路照心電圖一路笑o既...

嚇人相一幅:



一路照, 醫生都好細心, 仲同老朽講起當年的小小部分工作 (老朽這才記起幾時幫過他們手), 女王就差點睡著 - 因為照超聲波是要關燈醫生才看得準電腦屏幕o架嘛! 照完了, 女王仲問 - 貼o係肚臍o的貼紙呢!?!? (其實係 3M 的心電圖導電貼)

好快, 蘇醫生已經話 - 乜事都無, 唔使返來覆診喇!

即係話, normal, 無 diagnosis, 而無 diagnosis 的話, 好似 claim 唔到保險喎...!!! 呢幾千銀咪凍過水!?

突然有少少想問返夫人...「喂好似係你話要去睇o架咋喎可?」

極品世界杯小食之 - 雅支竹蒜蓉多士

又是意大利友人店子的出品.

去食意大利菜, 好多時都會有一款前菜小食 "Bruschetta", 是烘到極乾的麵包多士, 有時會加入香草, 而上面就會在食時加上用蕃茄, basil, 蒜茸和橄欖油制成的醬汁, 灑上少少鹽. 找來這網上照片參考一下:



不過今次看世界杯, 西班牙 vs 葡萄牙一場時, 吃的不是這個醬, 而是意大利北部近南法地區的一款 artichoke (雅枝竹) 蒜油醬.



不過呢款包, 如果用來睇波食的話, 一來要自己搽, 二來呢, 食多三幾塊呢, 就係幾 "un" 胃的. 只宜乎上半場食, 否則食完不久就睡覺, 消化不掉反而會不舒服... :P