新裝修, 舊招牌

公司大裝修和搬房已經全部完成, 連個新的大書櫃都入埋房了, 以後放 file 多點地方, 最緊要係, 大櫃都有門, 唔似書架咁, 一亂少少就畀人 (尤其係比較愛靚的好友老闆) 指住來話... :)

在好友老闆爭取下, 房中加設了射燈, 除了光猛不少外, 對於我呢種 classic 人都覺得比較似律師的房間. 之後可以在房見客 (尤其係證婚的客, 一對對的上來) 都不會覺得太樣衰... (不過呢, 始終房都係稍細, 可以的話都會用返會議室, 再加上... 而家客人坐在前面時會被遮住塊面, 詳見下述)



正在物色一幅字或畫, 最好是有點輕鬆的禪意的, 之前都有提過想找蔡生或萬荷堂主幫手, 但暫時都未有定案.

另外就係自費為慶祝搬屋搬廠搬寫字樓, 買了個 Philips 22" 16:10 的 professional mon. 雖然唔係 同 "執相 pro mon" EIZO 一樣用 IPS panel, 但係質素已經好高, 用了 spyder 執色後睇相都會好靚.



當然, 就係因為呢個 mon 太大, 遮住了坐我前面的客人... 哈哈哈哈...

為甚麼要證婚

講明先, 呢篇 entry 都幾長o架o下! :P

不是問大家為什麼要找律師證婚, 而是從老朽的角度, 看看我, 又或者一個律師為什麼要幫人證婚.

首先, 當然是金錢, 律師都係人, 律師都要開飯. 呢句係一定o既事實, 話唔係就一定係呃你o既. 不過因為要湊女王, 又不忍心星期六日丟下夫人自己看管, 所以我接證婚的 job 不多, 不少都推給行家了.

但普通一個律師, 為公司辦事的話, 每小時收費 (公司數, 並非自己收) 由二千多到三四千不等, 證婚收的價錢, 整個 package 一般也是由二千多到四千左右, 又要開會見新人又要出差行來行去仲要等餐飽o既 (有幾多對新人真係準時得o架...唔通下下子要收人 OT 錢咩, 自己結婚時咪又係遲晒開席...!), 加起來兩三小時的總工作時間. 而且證婚多數是晚上或辦公時間之外. 這條數, 不化算.

不過說回來, 不少律師都覺得證婚 "無咩風險", 工作上較輕鬆, 所以即使收得比其他 case 來平也值得的.

老朽一向喜歡 "當官" 的感覺, 覺得為新人證婚, 就像是一個 "官定" 的角色, 也是莊嚴的一個角色 - 縱然這角色好多時都有輕鬆的一面. 但不少人, 也有時會有些新人, 覺得證婚律師只不過是他們婚禮中的一個 "服務提供者", 有些行家也是這樣想的. 也有新人認為我們的服務不過爾爾. 還不是 routine 的講兩句, 聽誓詞, 簽個字之後收錢走人.

對不起, 老朽不是這樣想.

當然, 我們提供的, 的確是「服務」; 然而, 婚姻和婚禮是莊嚴神聖的, 就在新人簽字一刻, 法律上他們連在一起, 一聲 "合法夫妻" 就是他們日後生活在一起的憑證. 有資格說出這話的, 是一個由法律和政府制度認可的人物, 不是在商場內又或者在街邊找到的服務可能比擬的. 因此, 老朽雖然在證婚時也會有一兩個 "gag 位", 但對那些每次也說著相同 gag 或者爛到爆的那些 (例如簽字時 "望o下隔鄰那個係咪自己o個個先, 唔好認錯呀, 簽o左咁就一世o架喇!"), 老朽就覺得好反感. 這些話不是不可以說, 但不應是出自正在監禮中的律師口中. 平日係點無所謂, 但由開始說出「o係兩位未結為夫婦之前, 本人o係職責上...」一刻起, 監禮的律師就是莊嚴的官方代表, 可以輕鬆, 但我覺得, 絕不可以輕佻.

又有些新人有時會提出一些比較少見, 又或者特別的要求. 因為他們覺得, 新人是 "服務使用者", 當然有權叫 "服務提供者" 作出任何他們認為合理的服務. 最常見的就是要事先見律師才決定是否找他.

老朽對此不反感, 因為見一面, 知道要找的律師口才和態度, 是合情理的.

但有時, 見到面後, 新人就會問老朽好多有關整個程序的問題, 試過一問便是一小時, 老朽亦清清楚楚的解釋了各項程序和要留意的事, 還加了少少以前幫朋友做 wedding planner 所學到的東西. 老朽之前已說過, 答問題可以, 但希望不要在未 confirm 前由過大禮問到三朝回門的所有程序. 用了這麼多時間, 新人卻說「我地考慮一下再找你」當然, 之後就去如黃鶴了.

又試過有一對新人, 在問了老朽的價錢後, 相當不禮貌地說「點解你覺得自己可以收呢個價」.

係呀, 我一般來說, 我的價錢和最當紅的那幾位行家, 相差無幾. 但遇有經濟能力真的不佳的, 又或者真係好友推介的, 老朽在不影響公司情況下打個折, 時常都有.

但另一方面, 律師會規定, 不能說自己比其他律師的工作來得好. 所以老朽只可以回答說「我覺得我的工作係值呢個價, 我包o左 abcde, 而且我不會 "走場", 即一晚做幾對新人...」 之後那對新人就沒有找我了. 老實說, 我也不想幫這對新人, 如果你想找平的律師, 坊間大把. 我自己知自己的定位, 和可能是 "較貼身" 的 service, 也包括了 wedding consultancy, 因為我當年曾經幫過幾十對新人做 wedding planner, 有時還幫人影埋結婚相. 你們找我還和我傾了這麼久, 就是覺得我可以幫到你們. 如果你覺得我的 service 夠好還要問這問題, 那你就算最後願意付這個價錢, 老朽也不希望見到你黑口黑面的. 我寧可不接這生意.

結婚是開心事, 但好多香港人搞結婚搞到面燶燶的, 連老朽自己當時都係一樣, 還差點因為兩邊老人家一些不必要的堅持搞到結唔成. 我就係知道呢點, 好希望以過來人的身份多點幫新人. 因此我的 "服務" 一向都包埋所有有關婚禮籌備的 consultancy service, 呢點相信全香港千幾二千個監禮律師都係得我一個做到喇o卦. :P

不少朋友或找老朽證婚的都說老朽用的十多款誓詞「幾特別」, 其實說穿了還不是加入一些教會的元素, 希望新人多點浪漫, 也多點承諾.

老朽特別推荐新人用的誓詞是這樣的:

「我請在場各人見證, 我xxx, 願以你xxx 為我合法妻子；並許諾從今以後，無論環境順逆，疾病健康，我將永遠愛慕尊重你，終生不渝。」

這是老朽和夫人當年在教堂行禮時用的誓詞。

每次為新人證婚監禮, 就像自己經歷多一次當日自己在天主前宣誓一樣. 也重溫一次. 每次一聽到, 都暖在心頭. 因此, 我十分感謝天主給了我這機會去 refresh 自己對夫人作出過的承諾.

可能, 呢個先係老朽喜歡為人證婚的最主要原因...

想起這些, 也說了不少廢話, 就因為上星期為好友的弟弟證婚, 禮成後新娘的爸爸媽媽走過來捉實我的手, 說老朽在禮成前的一小段話說中了他們的心聲 (每次證婚我都會即場想起一些合那對新人的說話, 老實說連我自己事前都唔知會講咩)



ps: 證婚律師多數都不會留下食飯的. 但上星期好友那餐因為太多高記師兄弟了, 盛情難卻 (我除o左超特價仲做足禮o架!) 單尾的叉燒蔥油撈麵勁正! 好少可去飲有呢樣野食的... :P

花雕蛋白菜式對聯 「半步麒麟踏醉湖, 一樹梨花壓海棠」

食得煎炸東西多, 有時總會來些清淡的.



先用三隻蛋, 只用蛋白, 加入雞湯 (蛋白:湯大約係 2或3:1)和雞油 (有的話), 打勻 (不要打到起大泡)之後加上保鮮紙, 中火 (和一般大火蒸的菜式不同) 蒸 5 分鐘左右; 另外蒸好星斑柳 (厚切的, 可在 citysuper 或 great 等地買到) (連皮); 放上蒸好的蛋白面, 加上少少已經 "過火" 的花雕便成事.

至於 「下聯」:「一樹梨花壓海棠」 , 就係花雕雞油蛋白蒸松葉蟹腳, 耍先將蟹腳蒸至半熟, 之後將大半蛋白蒸好後, 就將蟹腳加入蟹水和餘下蛋白及湯一起蒸至熟, 而蒸蛋白的做法和之前提過一樣, 才不會弄散本身極滑的蛋白得來又會使蛋白有蟹味. 最後排盤上碟時贊上一點點熱花雕和蔥花. 不過我今次用的碟太小了點, 排蟹腳時 "虛白位" 不足, 而且蟹水因為貪心之故, 用得太多, 導致整碟成品尚有點未蒸得夠身, 和構圖不夠美觀.



不過食味是相當好的. 而整副不工整, 不過好玩好食的對聯就成為:

半步麒麟踏醉湖
一樹梨花壓海棠

日式汁燒鴨胸

想煮鴨已經很耐, 但都一直無機會找到好的鴨件/鴨胸. 最後都係 "的" 起心肝, 買了件貴價貨 rougie.

做法是簡單到無止的, 因為鴨皮極多油, 所以用皮那邊白鑊煎一分鐘左右, 再反另一邊煎. 煎完就拎去放落汁底之中. 至於個汁呢, 就係簡單o既 "醬油:清酒(料理酒):糖", 比例大約係 2:1:1.5. 其實還可以落少少味醂的. 個汁不用太多, 剛蓋過鴨件面就成.

煮滾後放入鴨件, 中慢火 8 分鐘左右已經 ok 了. 之後將鴨胸取出切片, 同時間開大個火, 個汁自然幾分鐘後會收稠, 淋回鴨胸上就已經食得了.

整道菜太簡單, 無技巧可言 (所以本篇 blog entry 好短), 唯一就是 "以本傷人", 因為法國或匈牙利的鴨胸雖然比內地貨貴得多, 但真的比較好食, 質感不太硬之餘亦不會太大陣鴨臊味.

食時可以加少少芥醬. 而我就再加點日本的海草沙律伴碟. 可以下飯又或者用來送酒都相當唔錯. 整的時間短, 直頭可以世界盃時一路睇住食呀!

求婚大作戰 (下集)

... 所謂遊戲, 就是大家估o下主角的反應, 以老朽觀察, 她一定會大叫 "呀~! 你班友... 黐線o架! xxx 你快o的出o黎呀o下!"

當然, 那天是老朽買了 17-35mm 鏡後第一次行街街, 老虎都帶埋出去影.

當日係要返工的日子, 不過我早了走, 去到集合點時就見到十來個熟識和三幾個未見過的面孔. 龍頭大佬就briefing 了程序: 每人一支花, 先由兩位主角成日見的人出現, 之後提她出面仲有好多人, 等主角輪流叫我們名, 叫中就入去送多一支花; 最後就當然係男主角加一大扎花同埋戒指出場.

呢個場面好多人都用過, 但係好多時都管用 因為每個女生見到呢個場面, 都多少會希望發生在自己身上.

一切就緒; 「起錨」! (呢期用呢個 term 真係小心o的)

而成個程序都好順利, 只不過 -

主角見到我們時, 平日大癲大肺的她竟然平靜得好緊要, 不過衰在我地成日 "鼓勵" 佢喊 (有人仲衰到開盤口, 話平日大情大性的她一定喊), 佢就死頂, 大大聲話 "我係唔會喊o架!" 搞到場面變o左個搞笑版... 大家 *包括我* 都跌晒眼鏡...

搞笑是一方面, 另一方面, 到男主角出場後, 大家都聽到一段好真心的說話, 老實說, 老朽都聽到眼紅紅差點影唔到相. 不過女主角竟然都仲頂到.

呢o的求婚, 99% 會成功, 今次都唔例外. 之後龍頭還請了一眾有幫手的朋友食飯, 負責做 video 紀錄的將我們之前估反應的 video 給了她看.

「呀~! 老朽扮我的反應, 其實的真係咁o架! 之不過我死頂之嘛...」

wakakaka...

求婚大作戰 (上集)

以前打開 wargame 一班朋友, 大家年紀都慢慢大, 開始進入 "三十代", 有些亦已入了 "四十代". 而當中亦大多數進入三十代的, 已經結婚 (好似老朽咁), 甚至有埋小朋友 (亦係好似老闆咁).

不過我們一班戰友之中, 年紀差不多是最大的一位, 大家都當他是 "龍頭大佬" 了. 他和拍了十年拖的女友就遲遲未有打算打埋天窗. 然而, 大佬背後是有一個他的故事的.

十多年前, 龍頭大佬有一位很不錯的女友, 拍拖多時, 當時老朽還未認識龍頭, 還是後來龍頭自己告訴我的.

這位女友, 在他們行到差不多有意思結婚的時候, 卻患上了血癌, 很快很快便離開了世界, 也離開了龍頭.

像極了電影情節的事, 的確活生生的發生了.

同期, 女孩子和家人反面, 離家出走. 不知怎的像 long vacation 女主角一樣, 找到了龍頭, 借了他地方, 也像山口智子一樣, 有時傻傻更更的. 慢慢地; 龍頭由迫自己不去忘記去世的女友, 變成覺得是已不在的女友派這個新的女孩來, 代替她去照顧和愛他.

就這樣, 兩人開始了. 也順理成章的同居起來 (咁都已經借了他屋企咯). 但龍頭一直未能釋然, 也自覺未能好好給女孩一個家. 所以拍了十年, 從未有意思說結婚.

然而, 上兩個月, 龍頭找老朽.

「老朽, 有樣野找你幫忙」

「講!」

「我想你幫我求婚」

「o下!?」

「我一早已經決定了, 就要的起心肝做; 上兩個月的事, 雖然是我自己有點戇居, 但卻使我更加知道, 我無o左佢唔得. 而你又係上次我倆出事時幫我們重新走在一起的重要人物之一. 所以好希望你在5月 x 日在 yyy 集合, 和另外幾位朋友一起操上去我女友公司, 戒指我都買好o架喇!」

至於「上次的事」, 就只是糊塗帳一筆. 簡單說就是女孩子又傻傻地的以為龍頭出去 "玩" 別的女子; 幾乎散得, 不過後來數位朋友力勸, 加上老朽誤打誤撞的扮有型去 "分析" 事件後, 女孩竟然更傻傻更更的覺得自己對不起龍頭. 兩人關係就更進一步. 至於龍頭的事, 查屬虛報, 大家都替他捏一把汗.

就係咁, 好快就到了求婚那天, 大家準時集合; 開始 "出兵" 前還玩了個好玩的遊戲... (待續)

鹹蛋薑醋

早前各生了千金的兩位好友都派了薑醋. 其中一位問老朽說「我老豆話想加鹹蛋落薑醋, 得唔得o架」?

老朽即時搶答: 「唔該加多兩隻, 連殼落, 每天煮一次, 兩日後畀我食!」

兩年前女王出生時，我家陪月話在薑醋中加鹹蛋, 我都問同一個問題.

試了一隻, 竟然係夾得要緊!!

鹹味早被中和, 但醋味又不會太突兀. 兩者加起來, 竟是甜味!

此後逢有朋友問起煮薑醋, 我都會提他們加鹹蛋.

提起薑醋, 吃過老朽女王的薑醋都讚不絕口, 記得公司當時是吃完我兩珵 10斤的豬腳薑後, 把薑醋珵交還我時, 是沒有洗的, 意思就是說大家還想添食, 還 "匝" 了利是一封 (記得是一千大元, 當是公司賀禮 - 當然未計個別同事自己做的禮啦). 這個老人家說是好兆頭, 人家欣賞你才會想添食, 而且公司當時的老鬼們還要走來一邊說著 "恭喜你呀! 恭喜你個千金又醜樣又豆皮呀~!" 之類的 "反話", 話要 "話醜得吉" 喎. 老朽記得, 當時是去了三四轉中環「八珍」添買醋的.

這個醋, 其實當年分別由家母, 外母和陪月姐姐煮的, 但三煲各都有點不足: 家母的太甜 (因家母自己不太喜歡食薑醋, 連她當年坐月子時也是), 甜到有點焦, 但豬腳好正; 外母的酸o左o的同埋未夠身, 但醋底煮得好好; 陪月煮的則有味但未夠甜, 不過做蛋她做得最好; 最後係老朽將三煲集起來再較味才得出如此 "正斗" 的薑醋...

有人話吃薑醋可估到小朋友日後聽話與否, 如果好似女王呢個 case, 咁即係點呢o下...?

鹽田仔? 鹽田梓?

十年八載前, 大概無咩人聽過 "西貢鹽田仔", 又或者 "鹽田梓村".

直至馬會在滘西洲開了個大眾化的高爾夫球場, 建了一座橋接通才多點人知道那裡原來多年前是 "種鹽" 的地方, 只是近二十年都荒廢了. 更成了幾齣港產恐怖片的取景場地.

更加少人知道的是, 原來這片小島是百多年前香港首先出現天主教堂的地方之一.

不要問為何會在這個當年都是人煙不多的地方建起座小教堂來, 因為天主化工, 從來都是神妙莫測的.

還是香港出了位陳副主教, 作為副主教和鹽田仔原居民的他, 積極推廣這個被荒廢的小樂園. 再加上本土近幾年有些 "生態團" 都會路經這個當年用天然方法來產鹽的地方, 才再次使這個小島活起來.

上星期是天主教聖若瑟堂百二週年. 全島的原居民幾乎都回來了, 原來倒真的有不少是去了外國的.

陳副找了我們幾位師兄弟來幫手影相, 才見到這豆腐潤大小的地方, 當全島都擠滿人的時候, 想行步路都唔容易. 而且那個「公投日」, 天氣有點點熱. 不過, 我倒樂得有機會出來影相, 只可惜當天那 17-35 廣角 zoom 未到手. 而那天, 島上就有一位原居民領洗, 而付洗主禮的, 就當然是陳副了. 仲話上次島上教堂有人領洗, 已經係五十年前的事了.

小小教堂, 迫滿了不知是否教友的人, 還有特地來幫手為堂外新的銅鐘揭幕的發展局長 "林鄭". (島上數十年前設銅鐘, 有事就會敲響, 響得全島都會聽見, 用來召集村民; 不過多年前被人偷去, 是陳副在早幾年前托人在意大利訂購一個新的)



在這個小教堂中, 找到了一份在大教堂找不到的感覺, 就是寧靜, 不浮誇, 沒有雕龍雕鳳, 一切都係淡淡的 -- 其實和那新的鐘有點不大協調, 大概, 要經過歲月洗禮, 兩者慢慢才會融為一體. 就好像袁中道《香山》所言, "然要以數十年後，金碧蝕於蛛絲，階砌隱於苔蘚，遊人漸少，樹木漸老，則恐茲山之勝，倍當刮目於今日也".

禮成後陳副出西貢宴請我們一班工作人員食海鮮餐, 畢竟我們大班人除了一份簡單三文治或一兩件燒肉外, 整天都未吃東西 (聖體除外呀o下!). 當然, 一般的西貢海鮮餐不是甚麼超級來頭, 不過大班人聚聚, 得啖笑, 仲想點?

入手...

一早想買多支 ultra-wide 的 zoom 鏡, 不過又覺得貴了點; 但見了不少師兄的大作, 和不少新人的相後, 最後還是忍不了手; 不過雖然考慮了幾星期, 又訂o左幾星期, 最後 short-list 了:

14-24 f/2.8 港幣萬四

17-35 f/2.8 港幣萬二

16-35 f/4 VR 港幣一萬

好不容易找到了相熟的店子, 找個人來幫手找了幾支來試. 短評係

14-24: 太重, 足足 1 kiko, 又太貴, 仲用唔到 filter, 前面有隻 "大眼" 咁, 好易整花; 但係成像 sharp, 仲係非常銳利o個隻. 世上只有呢支 full frame zoom 有 14-24 有咁勁效果. 而且係 "大三元" 之一. 不過邊位變形亦係最勁.

17-35: 中間啦, 角位在光圈全開時有黑角, 變型倒不是太嚴重 (都有o架喇), 唔算重又可以用 filter; 都 ok sharp. , 而且係可用大光圈; 呢支亦係出得最耐的鏡, 1999 年出廠到而家都仲有市場, 真係 "有o的野喎"!

16-35: 試完後覺得夠輕, 而且有 VR 防手震, 但諗諗o下: ultrawide, 無太需要防手震嘛, 但係夠平 (比較上), 又比 17-35 闊了1 mm (別看小, 可以好大分別的); 但係呢, 相質在放大下, 稍稍不夠 sharp.

經過兩星期的考慮, 最後決定:





試後覺得, 無後悔!! 唯一有少少遺憾, 就是 "大三元"　就只缺了那支 14-24 了...

騎呢的母親節

今年母親節, 老朽因為時間不足, "只是" 根據早幾星期由夫人處得知她近來有甚麼想要的東西 (例如一個有軟墊的 "人體工學 mouse pad" 之類); 總之夫人開心就是了, 禮物不用太貴.

又是食飯和食飯. 今年老朽唔煮了, 而且老媽子一向比較 "潮", 和老爸一樣, 比較喜歡試不同的菜式. 想起之前提過專食燒排骨的老 "骨場" Tony Romas. 她說之前老朽只和她去過 Outback 食 blooming onion (但老朽明明記得和她食過 onion loaf 的). 而且夫人又想再去食 ribs, 所以就有母親節前夕去了吃.

普普通通的中上一餐, 無特別驚喜, 但除了個串燒蝦比起 Bubba Gump 差和太軟 (忙懷疑肉霉了) 外, 也想起他們的蘋果批加雪糕.

因為外母家庭多了幾位女婿, 大家都要就日子情況下, 今年正日由外父發辦, 去了他之前飲開茶的相熟店子, 就是銅鑼灣的 xx 皇宴.

外父好多時都是個有點怪的人, 可能因為是家中獨子, 自小已經無人敢向他 say no. 就算大都不一定滿意他的也照樣 "去馬". 久而久之就養成了他真正地以為自己的決定天下無敵.

不是說他有不是之處, 只是覺得怪, 好怪.

言歸正傳, 就是那 xx 皇宴, 多了一條樓梯. 大家吃了一餐要睇時間交檯. 所以吃完時間尚早, 就係咁出事.

夫人話想同女王影些我們三個的 "全家幅" 哦. 見到人家是個婚宴場地 (雖則我成日去) 有條樓梯幾靚, 所以想影, 點知影影o下又掛住望住女王, 而酒樓的逃轉樓梯的一邊又特別窄, 結果就一下子滑倒, 坐在樓梯滑了幾級, 條腰 "un" 到樓梯的一級了...

夫人初時話無事, 但係職業病發作, 老朽都係向酒樓備個案, 之後去了私家醫院睇睇... 照埋 x 光...搞到晚上十時半才回家, 好在女王由外母和女王細姨同埋佢男友一齊睇住先.



後記: 兩星期過去, 夫人都係間中話痛, "卒" o左藥膏都係咁... 不過我覺得... 有少少係心理作用, 成日 "蝦" 我要我幫佢卒囉. :P

三杯酢

日本人喜歡做醃菜, 這個九成九都是中國傳過去的風尚. 兩地還有韓國, 加起來幾個地方, 醃漬物都各有特色.

日本人醃漬分好多個不同種類, 有甜酸為主, 無需發酵的 "福神漬", 再細分不同款式的酢; 有以鹽味為主的 "淺漬"; 也有加入了木魚湯的 "土佐漬"; 加入乳酸發酵的 "千枚漬"; 加入昆布和豉油等等的 "松前漬" 等, 凡數十種; 每款產物用不同的方法醃漬, 出來的效果都大不相同.

而在多種的日式漬物之中, 當中以福神漬類別的 "三杯酢" 比較容易製作, 也是不少香港人的心頭好.

製法都好簡單, 一般來說就是用米醋, 味醂和日本淡口醬油 (無淡口醬油的話用普通日本醬油也可, 但份量稍減和要加多一點點醋); 最後加入砂糖調味. 一般來就, 醋, 味醂, 醬油和和糖的份量大約是 5:2:2:2~3. 將汁料稍稍煮至微滾放涼就可以使用. 記得不要熱漬.

至於最常見的漬物就是青瓜 (胡瓜) 和海帶乾 (日本超市有售, 一浸水就會發大). 切青瓜有個妙法, 可以切出不斷的扇形, 就是用筷子夾著來切, 刀就不會到底, 到切完後才每幾片切斷:



青瓜切好後抓鹽放十分鐘左右就會出水, 用少少力榨乾出水就可以和浸軟的海帶一起醃了.



一般來說最快半小時食得, 但我就喜歡醃過夜才吃. 吃前再加入櫻花蝦又或者買回來的糖煮小蝦, 可以提鮮, 又無咁 "寡", 亦可 "加色". 呢碟東西仲可以送唔少飯, 又可以放多一兩天; 不過長放就唔好喇, 因為青瓜會慢慢吸收了醬色, 不美觀, 都係兩天吃完好了.

戒尿片.......

女王已經一歲十個月了, 過幾個月就要去 "維記" 返學. 雖然身型都係奀瘦少少, 不過好多東西都進步了好多. 全句句子對於女王來說已經無難度, 有時和她傾計都好搞笑, 但另一方面又怕女王太 "老積", 好矛盾. 有時女王都會自言自語地講一大輪, 好好笑.

而前幾天最大的驚喜是女王竟然識得聽英文步操口令; 其實是因為女王之前喜歡聽音樂, 而聽到一些軍樂時又會跟住拍手 (因為軍樂節奏相當清楚, 所以用來訓練 bb 的拍子最好不過), 所以老朽試過幾次教她聽 "Attention!", "General Salute, SA-LUTE!", "Hands Down!", "Fall Out!", "Guard of Honour, Eyes Front!" 之類. 女王聽埋聽埋, 前日無啦啦突然自發地叫 "sa-nud!" (salut!) 之後將右手擺額角位, 之後又 "hen-down" (hands down") 就放低手, 極之搞笑.

另一個近兩星期的主要 task 就係要準備幫女王戒穿尿片. 先由保姆姨姨幫她著 "戒片褲", 就是一些較厚的內褲, 如果尿褲子的話會覺得不舒服, 之後每半小時問她要不要去尿尿, 那她應該慢慢會知道要去尿尿的時間的. 有時 (尤其是星期六日無姨姨在的日子) 就會著即棄的方便褲子.

開頭三兩天, 的確是比較 "痛苦", 而且女王多數都不太知道我們的意思是想戒尿片, 所以一天下來已經尿濕了六條內褲. 連 hi-chair 和 play-pan 都濕埋要換墊子. 但慢慢地過了幾天, 她開始 get 到我們希望她忍一會才去洗手間用加上去的 hello kitty 小廁板.

雖然這兩天有時女王都會尿濕了戒片褲或方便褲, 不過每天只是換兩三次 (隔晚的就算真的乾淨都會換啦...!). 而每朝早都會先帶她尿尿一次, 老實說, 當我們見到一條乾的隔晚尿片, 和聽到成功的尿尿滴落廁所的聲音, 真的有點安慰加上欣喜的.

這種感覺, 未當父母的, 不會明白... ^^"

美酒匯萃... (都唔係賣廣告o既...)

好友的好友在元朗區一向都有點家勢, 有辦飲食業的, 也有辦其他生意. 早大半年就和一些老行尊開了一間酒窖, 地點也是在元朗西菁街. 早前和友人去 "八卦" 一番, 只知道他們一向都會賣靚酒, 不過就估不到有點平易近人的 collection...

他們基本上全店的放酒 condition 都甚佳; 所以靚貨貴貨就這樣的 display 出來也不會影響酒身; 不過將 Le Pin, Cheval Blanc, 甚至意大利的 Sassicaia, Ornellaia 等等 super tuscany 都有... 當然, 價格不菲, 但比較中價的好酒, 他們一樣有, 而且長年都有一兩位品酒師可以在場提供意見又或者和 "飲家" 交流一下. 老朽就覺得真係 "唔買都來睇o下".

更加吸引人的, 是他們有一些比較罕有的靚酒, 不過那些酒老朽真的只會看, 暫時 (可見的將來) 都不會, 也無錢買的, 例如美國被炒到飛起, 幾皮o野 (仲要搵到先係喎!) 的 Screaming Eagle, 又或者著名 bordeaux 紅酒莊出來 "應酬" 佳客的白酒, 以至於 "一門十二傑" 的 Burgandy "神之水滴" Romanee Conti (即所謂 DRC, 康堤莊)... 等等之類.

雖然店頭的確有不少好貨, 不過秉承老朽一向的精神, 有此站不會賣廣告, 所以有興趣的朋友 (去參觀都好丫) 可以試著用地址找他們的網站, 好似他們在尖沙咀另有一店的.

越南米網皮

好耐之前見過有一種好得意的像春卷皮的, 但個樣就 "一岩一斬", 不過就是炸起後 "有排都唔返潮" 的. 後來讀到黃鍵欽師傅的《點心世界》, 見到有一款好似樣的東西, 原來叫做 "越南米網皮". 不過找了好久都找不到, 最後才知原來來貨少, 多數是酒樓取貨才有; 後來知道相熟的一間賣生貨的粉麵廠有得訂, 便試o下玩, 原來都要廿元一包, 每包廿張左右. 都真係好心機, 原來每張都用簿膠一層分開防潮, 賣得貴都抵啦... (亦因為咁所以少人買)



見到是要輕輕噴濕或拍濕網樣才用的, 原來一濕就好快軟身, 不過包東西就最好包一些條狀的, 好似呢個香芒雞肉條, 不過建議雞肉醃好後先炒至七成熟才和芒果條一起包, 否則由生炸熟的話肉會比較鞋口. 黃師傅的食譜就用蝦, 蝦易熟又不易鞋, 所以可以生包現炸. 不過點包都好, 盡量用稠生粉/麵粉水封口封得好些, 否則網皮一受火比較容易鬆開, 而五六秒後又會即時硬身, 返唔到轉頭了.

炸好後配合沙律醬加入七味粉和柚子粉食, 更加香口.



食完見仲有少少濕了水, 包了些華記永昌號買回來的急凍蟹粉, 仲整個糖醋醬點; 不過今次就衰o左, 因為蟹粉好易穿過網皮漏出來, 而且本身太濕, 好快會弄到網皮穿開... -_-" 下次都係包返件頭的東西好了. (下圖有少少焦不是因為網皮炸得久, 而是蟹粉漏了出來燒得有點焦香, 因為蟹粉之前已落薑汁酒炒過, 所以即時起鑊上碟不會再焦下去)



網皮仲可以用來炸現成的 "鵲巢兜", 用來載炒的粒粒仲可以做個食得o既盞, 既美觀又好食. 而且炸硬身後耐少少才離火都唔會太易燒焦. 真係試得過. ^^

玩飛燈...

寫了這篇很久都未埋尾, 原來過了復活節已經一個月了...

話說復活節假期最後一天, 終於找了個時間, 和太太 "二人世界".

過了中午後, 夫人去了買 "生滋堂" coupon 的化妝班, 老朽就先帶了女王去麻麻屋企. 至於夫人要去化妝的原因, 就是約了老朽晚上兩公婆去 1881 夜影兼玩「飛燈」.

原本是想早幾個月邀請有極豐富 model 經驗的細細妹幫手做飛燈 model 的, 不過細細妹身經百戰, 近得大師多, 我呢o的師弟級尚有自知之明, 為免出醜貽笑師姐, 都係遲點等練好些才找她好了. :P

有玩開攝影的師兄師姐都知道, 飛燈係相當好玩, 又有時有點 "蝦人" 玩的. 早前提及, 和好友老闆一早買了兩支燈腳, 又問了舊同學樹熊老闆借多一支閃燈, 都係 SB900 來的. 試o下唔用引發器來飛.

結果係 -- 好好玩! 夫人尊容就唔出街喇 (費事你地睇蝕晒, 嘿嘿...) 雖然飛燈的 set 位要時間再慢慢改進, 但係試到不同地點不同距離出力, 還有高低角度等等, 真係有著明顯的不同, 已經好開心.

不過有樣奇, 就係有時支燈要在相機的右側才會 sense 到, 可能是因為相機的 sensor 都在右邊, 而我又不是用 SU-800 的 remote control, 發射不夠強... 當然, 其實我可以用一些平價的 radio 發射器, 老朽都有買, 不過今次就真的想試飛 TTL 燈, 可以連相機的數據都傳送埋. 比就咁用普通的 radio controler 好得多, 也精細得多.

自己都覺得有需要買多一支用來玩的飛燈, 可能是副廠的 nissin 又或者德國牌子 metz; 兩個牌子都是 2000 元以下, 似乎也幾化算.

不過, 我仲要買碳纖腳架同埋一支 17-35 廣角 zoom 喎!! 點算好!?!?

另, 影完後和夫人去了 1881 的露台 parlour 餐廳晚飯, 水準不錯不過又未去到拍晒手的地步...