女王都已經一歲半有多, 早前已經好似好多家長一樣, 為她報讀幼兒園, 即 pre-nusery.
一早就當自己「坐定粒六」, 因為自恃女王都算聰穎, 而且父母都係「根正苗紅」, 原本覺得問題不大, 所以最初只報讀了港東東區一所較為出名 (也較為貴) 的幼稚園的幼兒分校. 後來再報了樓下另一間慈善機構搞的幼稚園, 不過就發現新的這間原來無需 interview, 但要排凳仔, 而且要小朋友一歲半才可以交 form. 但到女王一歲半, 乖乖交表的日子, 他們卻告訴老朽, 說已經過了今年的收生時間, 要等明年一月, 那就是說女王如果等的話, 只可等到三歲讀幼稚園 (nursery).
老朽自問也有點外出的功夫, 如果真的要在教會學校 "霸位" 大概也不會有大問題, 一句聲, 請神長或修女寫信總不成問題; 但老朽就是不希望這樣做. 況且香港的教會學校比較少幼兒園.
但這個想法上星期有點點改變. 就係因為女王去了 interview.
第一件事, 就係原本有朋友找我當天證婚的, 但為了女王, 唯有推掉, 已經損失了數千元生意...
而 interview 分兩部分, 先由其中一位家長帶她和其他小朋友在老師帶領下玩和聽故事. 另外就是另一位家長 (如有兩位出現的話) 與其他同時段的家長和校長或者英文主任會面一齊 "傾偈".
美其名係 "傾偈", 實際上, 明眼人一望已知, 係 "圍耷".
老朽和夫人一早 "分工", 由較善辭令的老朽出去 "圍耷", 而夫人就會 "陪太子讀書". 結果老朽那 part 當然順利完成, 因為老朽一來早問了其他朋友有關此校的 interview 心得, 二來自己認為校方那 "英文人" 問的問題老朽都答得不錯, 大致係點教女呀, 有無講故仔呀 星期六日點過呀之類.
可能老朽 & 夫人睇得電視多, 見到別人 "in" 幼稚園都係執到正的, 於是就有樣學樣, 更為女王準備了三套戰衣以備天氣有變時穿著, 而老朽就係西裝乙套, 夫人就係 "初級飲衫" 加少少化妝.
點知見到的人全部都著得好 casual. :-/
另一方面, 一向都覺得做律師不是甚麼高尚職業, 但為女王去 interview 總有點點著數吧. 點知...
同一間分校, 同一年, 同一個 interview 時段, 老朽已經見到三個行家, 都唔知有無其他行家係唔識o既添.
平日又唔見香港咁多律師周街走... 頂...!
而雖然老朽的圍耷都 ok, 不過女王似乎無預期中的順利.
一入去課室就見到另一位 "英文人", 當然怯了點, 因為平日老朽多數都係中文台, 亦從不覺得 "母親講中文, 父親講英文" 係有甚麼好處, 反而會使我 miss 了她初生時期跟女王相處的時間.
比較無咁好彩的是女王之後和另一位中文老師雖然玩得好開心, 而那位老師似乎都好留意女王, 不過碰巧其他 "同學仔" 都在另一張檯邊玩, 只有女王和老師在這邊, 好在女王都好 "親民", 後來主動過檔和其他小朋友玩, 不過其他小朋友卻剛好 pair up 了, 使女王開初又係一個人和老師玩, 幸而好快就有個男仔想要她的玩具, 女王呢下子就發揮平日水準, 相當禮讓.
之後聽老師說故事倒還可以, 而到唱遊部份她更是頭兩個 "聞歌起舞" 的 (好在平日都有聽開 Old Mc'Donald o者! 直頭 bingo!). (ps, 夫人話老師即係老師, 平日訓練有素, 講故仔叻過我們十倍!)
好了, 玩了半小時後, 來到 byebye 的時候了. 夫人知道, 女王就算點見陌生人, 人家講 bye bye, 佢一定會揮手回應的.
靜晒, 呆望.
不過說回來, 據夫人所描述, 女王只係比平日靜些, 未去到 "標青到一定收" 的 level, 我們依然是 reasonably optimistic 的. 而且, 就算真係有咩 "冬瓜豆腐" (雖然唔希望發生) 入唔到, 總可以找其他學校, 又唔信女王咁醒都搵唔到!
(不過大家都幫手祈禱丫唔該...) :P
