周年紀念

已經唔記得o左寫自己生日的 blog; 不是過了結婚周年去了食個凍到僵的 grand hyatt poolside grill 所以想寫返, 根本自己都唔記得o左自己生日去了哪.

其實老朽是天秤座的, 所以十月就是生日月, 不過, 做了三十幾年人, 有時對於生日都有少少麻木; 但人有時就係應該找些東西來開心一下才對, 所以正日就和太太去了慶祝 (女王就暫由麻麻托管半天), 食飯的地方是多年前去過念念不忘的日本正宗懷石, 我們當年結婚酒店樓下的「灘萬」 (nadaman).

已經三年有多無去過了, 上次去是 lunch, 再之前和女友 (夫人是也) 去食懷石已經是結婚前的事了. 最近在 facebook 見到友人去食 (仲係個個月去!), 又「勾起條筋」, 而夫人又竟然心有靈犀, 告訴老朽說準備生日去食灘萬.

灘萬可以說是幾乎每間香格里拉也會有的日本餐廳, 當中的懷石是香港吃到比較像樣而價錢又不是太貴的那款.

因為夫人不太吃魚生, 刺身大都跑到我肚去, 食到飽.

至於禮物, 就收到一份巨型的 segafreddo 家用咖啡豆, 以每天兩杯左右份量 expresso 的我, 足足喝兩個多月了...



說回聖誕前的結婚周年, 因為夫人多次想去食 grand hyatt 的池畔 bbq, 但都未能如願, 所以今次一早訂了, 點知那晚就正是氣溫急降加落雨的晚上, 戶外食 bbq, 認真 "滋味".

初時以為他們今晚不開了, 但下午打來又說照常; 去到時見已經是寒風加細雨, 難得夫人說這個夠浪漫, 咪照去囉.

見到的確係好多人, 細問之下原來今晚有兩間公司搞 annual dinner (成五百幾蚊一位, 呢兩間公司都幾豪o下...), 酒店話今晚實有人來, 而且其他酒店食肆已經 full house.

即係話, 其實酒店係因為 "實有人來" 而缺定開場的, 而唔係因為天氣不差...

不過呢, 雨真係愈來愈大, 而且開始見到有坐在池邊的人問酒店要大毛巾來蓋上.

其實那處是十分好吃的. 頭盤先有極大量的海鮮, 有蝦 cocktail, 翡翠螺, 花蟹, 龍蝦, 琵琶蝦... 剩係食呢堆都抵 (其實係食呢堆最抵!) 他們可以配的醬汁有幾款是他們自行調製的; 食落真係一個字 - 鮮!

仲有那十款不同的沙牛和自配沙律, 用真正 Romain heart o架人地...

他們仲有一些很不錯的 proscriutto (ham), 吃落應該不是 parma 但係好夠濃味 (雖則意大利腿中我自己喜歡 san danielle 多些, 鮮味重一些). 更加攞命的是 grand hyatt 有兩款特別的肉醬 - 自製的 salmon pate 同埋 liver pate. 配以他們那個外脆內軟的農夫包, 食到呢度都已經飽了一半有多.

相比下,他們的主角今晚稍為失色, 因為扒類不應太乾. 他們是烤得好, 不過是晚大家都怕了跑來跑去. 雖然他們有 staff 在露天位置為客人打傘. 所以肉類明顯是乾了一點.

的確係愈來愈大雨, 而且突然間覺得好凍, 原來是後面一檯人可能受不了太凍, 提早離開. 再食多一陣, 我都覺有點不舒服, 寧可早點走好了.

最後, 我真係冷傷風了一晚...

婆媳關係

唔使擔心, 佢地無事. ^^

其實打從開始兩屋同時裝修, 和夫人都已經決定暫住在我父母家. 住了一星期有多. 夫人之前說 "陌生床, 訓不慣", 但此外大家都相處得不錯. 起碼無拗撬, 而既然女王喜歡 "黐" 麻麻 & 姑姐, 我和夫人也可 "天得一以清, 地得一以寧".

之前一直多年都係相安無事的. 不過我老爸成日覺得, 夫人和他們關係不夠密切. 有點像客客氣氣的.

不過, 我倒覺得, 有時一個媳婦, 在家中對長輩有點客氣, 也是好事.

起碼, 客氣其中一個要素, 就是避免有任何正面的衝突. 背後講咩又另一回事. 不過, 和夫人談過好多次, 她自己也覺得夫家對她已經好好, 尤其係奶奶. 反而係家父呢, 有時比較多點傳統要求.

其實, 奶奶不野蠻, 不無原因.

自己當年細個, 但也知道我媽媽和祖母關係不佳, 簡直可以用 "水火不容" 來形容. 但她們, 是住在同一屋簷下的.

父親說當年是祖母成勸, 說自己會忍讓我母親, 所以才保住了這頭家. 不過之前, 聽說祖母本人也是相當霸道的. 只是 "炮仗頸" 幾年後, 人也溫和了. 但當時母親火氣仍十分大. 這情況到了祖母病得行都行唔到才改變. 大概是一次母親見到幾乎連房間也出不了的祖母跌倒, 走去扶起她那一刻. 當時, 相信她們兩人也同時地想到... 「仲鬥咩呢...?」

但一切, 已經太遲. 祖母過多不了一年, 已經就木. 父親大人當年只不斷覺得自己對不起祖母. 至於母親大人呢, 仍因為自己也是 "炮仗頸" 所以絕口不提, 但極明顯地, 自己也變得溫馴了. 尤其是當我開始拍拖, 甚至結婚後.

很難說她是不是怕有 "報應", 不過我一早將這件歷史事件和夫人提過. 而母親大人也有所覺悟 - 就係 "相見好, 同住難", 所以一直不想和我們同住.

到了夫人懷了女王之後, 情況又有了些微妙的改變. 因為母親提供的照顧比外母更厲害, 但卻一點也不 "壓迫", 每事也讓夫人選擇. 可能是人老了, 心態也轉了.

我自己也認, 自己有少少大男人, 身為獅子座的夫人, 有時都會就我. 這陣我們在我老家 (他們裝修時暫租樓上另一單位) 暫住, 父母讓了主人房給我們, 可以放埋女王的床仔. 又好像剛才, 我見妹妹和媽媽在弄一道我們鄉下在冬至會吃的湯糰 (是純糯米粉搓成條狀, 用來放湯或糖水), 我便叫剛洗完澡的夫人說 「既然千年唔逢一潤我們在冬至前夜在這邊, 不如你也幫手整o下啦」, 夫人初時不太願意, 但之後就入了廚房幫手, 首次弄這古怪的湯糰. 我自己, 其實好感恩天主.

對住呢兩位女士, 有時夾埋我個妹入去, 當然仲有女王, 我真係覺得幾好笑. 她們唔會熟到 "攬頭攬頸", 但係有講有笑, 仲想點?

學校大聯盟之二 - 聖誕嘉年華

旅行後又過多一個月.

如是者女王病o下又好o下咁, 竟然已經差不多聖誕節了. 上兩星期, 正當老朽元帥府準備搞裝修搞到火紅火綠之際, 某日收到國子監班主黃老師的電話, 除了提及女王在校被同學不小心 (定係有心呢..?) 用手指刮到面珠燈少少損之外, 就是:

「女王好叻喎, 我叫同學跟我講野, 佢跟得最好, 可以做司儀呀」

當天外母大人接放學時也收到同一訊息, 不過當時我不以為然; 直至上星期中, 一家人為準備搬上我老家, 夫人為清假期時也順便休息一天兼執拾一下, 有空就帶女王回校, 回校時聽到老師說「下星期聖誕表演, 我們會找女王做她班中代表司儀, 因為她講得好好, 只係一句簡單的開場白, 你們在家可以再教一下, 我會將內容交給你們」

之但係同日下午, 我又收到電話:

「唔... 啟稟太上皇, 我們原本係搵o左女王下星期做司儀的; 不過呢, 頭先佢見到校長來睇綵排都好怯場, 即刻唔敢講, 所以呢, 我地都搵定後備o既, 但我們都會繼續試用她, 可以的話都會希望女王當日可以出到聲; 不過都已經找了同學幫手, 如果, 萬一的萬一, 到時見到不是女王做司儀的話, 萬勿介意」云云...

那場表演, 家長是可以去參觀的; 我雖然有點失望, 不過學校都有難處, 大家都切忌迫他們, 畢竟, 只係兩歲人仔啊! 當然, 老師未有將有關的司儀稿內容再交畀我地.

之但係, 那日晚上, 女王食食o下飯無啦啦突然講...

「歡迎爸爸媽媽o黎睇我地o既『聖誕嘉年華』! 請大家細心欣賞」

唔通就係呢句?

於是, 我地都心存少少希望, 開始鼓勵女王講一下. 不過女王有時又醒過籠, 竟然「請大家"大" 心欣賞」, 又或者扮晒o野唔肯講. 所以, 我們的希望, 的確不很大的.

好了, 到了正式表演的一天. 時間是中午 lunch 左右, 大概是方便家長抽時間來看吧.

先和遠道由加拿大回來探親的大細妹 O記一家食飯 (之後另篇再述) 再趕回學校, 雖然早到十分鐘, 但正面的小椅子已經被其他家長更早來霸了. 真不夠他們勁!

好在都還有幾張第一行的位置, 方便影o下相. 好快就見到成班小朋友出來了. 亦聽到班主任請其他老師帶司儀出來, 的確, 那是女王和另一位同學一起的. 女王見到我們時, 竟然識得微笑打招呼但係又不會衝出來, 我已經覺得佢好叻了.

呢個時候, 佢同那同學 (都係女仔) 去到台前, 老師拎著咪, 請了「今日o既小司儀」出來. 幾十個家長個個似足國務院記者會的, 舉晒機等開 show.

另外那位同學原來是負責英文的, 不過只聽到好細聲的 "Welcome, daddies and mammies... xxx, yyy, zzz... Enjoy the show".

之後到女王了.

呢個時候, 有一位都見過 "出o左名" 比較內向和不太懂表達的男同學突然 "嘩" 一聲哭起來. 女王被打窒一下. 但之後就開始微笑一下, 講出...

「爸爸媽媽... 呀... 歡迎各位爸爸媽媽o黎睇... 我地表演... 聖誕嘉年華... 嗯... 請大家細心欣賞」

一o的都唔覺怯場, 而且, 雖然少少窒, 但係好清楚!! 而且, 仲講得多過在家練習時喎!

唉呀突然好想衝出去攬住女王呢...! 好叻叻呀~! 對住幾十人講野喎! 我自己細個時有玩唱歌比賽 但第一次在台上說話已經是5歲的時候, 也是繼承爺爺十歲時上台的天份.


之後就係正式開始唱歌了. 最落力的依然係班主任, 初時所有小朋友都掛住望住自己家長, 無咩點跳, 慢慢 warm up 後就不同了. 大部份同學仔都開始有o的動作, 女王就係細幅度但係郁得好快, 另外仲有幾位真係天生跳舞天才來的. 又唱又跳直頭上身一樣. 同開始時直情兩個人咁款.

學校都算公平, 開初那隻歌的時候, 女王被安排企較後位置, 到了後半開始時, 老師就會將前後兩排互換. 不過有兩個同學就可能因為想見到自己父母, 不斷的走到中間, 擋住女王, 老師見到又好笑喎, 聯同校長一起 "執" 返佢兩個去側少少的位置.

都估到著到聖誕咁款跳舞會幾熱, 也見到有些同學著住大大套動物衫就成身濕晒. 估不到女王著小精靈的披肩加聖誕帽一樣身水身汗, 跳到尾聲時仲開始放蚊同埋少少「流灘」. 跳完之後簡直像虛脫一樣無咩反應, 看來那天下午佢去到婆婆家中食飯前應該會幾好訓...

學校大聯盟之一 - 秋季大旅行

已經是十月尾的事了.

那天是女王學校的大旅行日子. 地點是 "老遠" 的大埔海濱公園.

一早是想去陪女王的. 不過後來發現了一件案件, 當中有一名被告是沒有律師代表的. 但凡有此類案件的聆訊, 不論是多簡單的程序聆訊又或是核對清單的聆訊, 與訟的所有人都要出庭, 不可像雙方都有律師代表的一樣可以用信寫給法院, 大家同意了一些指示後由法院蓋印作實便可.

所以唯有硬著頭皮上庭. 初時又希望可以在上庭前後去大埔和女王 & 夫人玩. 而那天的旅行時間是上午九時至下午一時, 聆訊卻是上午的 11時半. 正所謂半天吊的. 最後決定早點先飛的的去大埔和她們拍照影相才回灣仔上庭.

因為自己不能和她們一起吃, 午餐當然是由我去準備啦. (其實由夫人大肚開始, 但凡有便攜午餐的話, 多數也是我去準備) 今次做的是簡單的薄切 virginia ham 三文治 (加了一點日本紫菜醬的) 和一些以色列來的溫室蕃茄仔, 有枝葉那種. 好看好食.

通告說是上午九時正開車, 8:45 要回校. 但平日女王是返下午班的, 早上也是 8:30 至 8:45 才起床 (係我衰o既, 我都起唔到早...), 要她早起是比較辛苦. 卒之 -- 我們 8:45 才出門口, 跑到學校門時剛剛 9時正!

原來仲有不少同學是遲的. 所以還好, 未開車, 而最後都等到 9:15 才開車. 我就即刻 call 的的, 飛入大埔. 但同時間, 收到夫人電話: 「原來可以加錢上旅遊車的」

o下....!!?!? @@"

但係那時我剛剛跳上的士了... 而且, 比他們早到了十多分鐘.

加上那旅遊巴又遲開車, 所以前前後後, 他們到了上午 9:50 才到達. 第一個官方節目就係 -- 影團體相. (可能係趁小朋友未玩到倦先影吧!)

搞o下呢樣等o下o個樣的, 竟然好快又 10:20. 大隊才去登什麼回歸塔呀同埋去其他自由活動的地方 - 話時話, 當另外發現有 5至7間學校在同一天去同一度旅行, 仲邊有位 "自由活動" 呢o下...

呢個時候, 搞搞o下竟然已經又 10:45, 要在 11:45 在灣仔上庭的我, 在影了一輪相後已經又要飛車回香港島. 最後是日為了影共 20 張相, 用了港幣 380 元坐的士... @@

人間正道是滄桑

(行文於2010年12月10日, 但因 hang 機所以今天才發表...)

今晚, 是 2010年12月10日的晚上, 同一個月亮會照遍挪威, 也會照著北京的秦城監獄, 也會照著遼寧的錦城監獄.

今晚, 奧斯陸燈火通明, 提琴響徹; 台上正中燈光, 將會...

照著兩張空凳.

真的不知道, 我們的祖國為何會這樣. 先判了個劉曉波, 再來個更無辜的趙連海. 劉先生為的是簽了個名, 趙先生為的只是為自己中了毒奶粉害的幼兒討公道.

中國憲法說明有結社和言論自由. 但同時又有危害和癲覆罪. 執行起來, 就是人治的天下了. 做了順民就大家 happy. 但問題是, 有當權的不講理在先. 那如何可以服眾?

現在的中國, 文明進步, 才開始出了泱泱大國之風. 尤其是 2008年, 搞一個京奧, 當時全國言論頗為開放, 網路上也是大鳴大放的. 全世界都以為, 中國真的進步了.

可惜, 京奧後一場毒奶粉事件, 一切回到當年.

之後的四川豆腐渣工程, 溫爺爺是說得溫情了, 但之後卻拘留了要找真相的人; 毒奶粉就苦主變被告. 現在又搞個不知何來的保外就醫給那位其實幾健康的趙先生.

一次諾貝爾, 更淪為全世界的笑話. 一些國家不出席頒獎. 最後有些又回來.

評審委員長說得好: 「很遺憾, 得主本人來不了, 而他太太和親友也來不了, 這本身就已經說明了, 這個獎頒給他, 是必須和合理的」.

國務院的發言人姜小姐打個官腔打得更好: 「真是一場政治鬧劇」; 不過, 我覺得, 鬧劇主角不是劉先生, 不是挪威, 更不是評審, 是誰? 不用我說吧...

小裝修, 大煩惱

近數星期 update 的時間少了很多. 有三分之一原因是因為工作好忙, 趕 "跑數", 希望聖誕節前可以有點成績讓老闆不用 "x 口x面" 的對住老朽.

有三分一原因, 是近數星期竟然是老朽聱稱為了「減壓」, 所以開始了玩一個已經玩到已有不少人不再玩的 facebook 遊戲 「二戰總動員」, 一有空閒時間便不由自主的開了來建屋練兵. 又花了點時間.

另外的三分一, 卻是因為家中決定搞個裝修, 將客房變成小朋友的房間, 而此房間最多是可以容納三人的.

先別誤會, 夫人暫未再有喜, 只是個 planning.

同時間發現了我們主人房的套廁玻璃有滲水發霉啦, 天花的燈糟因為在冷氣下積了水開始有剝落啦, 客廳的牆身有下來水漬 "撲起" 啦. 總之樣樣都唔係大事, 但樣樣都想整. 加埋加埋, 有半間屋是有地方要弄的.

也就是說, 還有半間是不用做任何東西, 就會用來擺放要做工程的房間搬出來的物品了. 至於我們幾個, 就會暫住在我父母在中環的家.

之前數個月都想整, 但人就是這樣 - 怕煩, 加上夏天天氣濕, 髹漆也不易乾, 又容易在待乾時入水, 一打風就仲死, 要趕住去閂窗, 否則在通氣的房間就會即時入水了.

於是就真的等到十一月尾才決定. 但同時, 收到的消息是, 父母家也要裝修, 會搬上樓上. 他們可是大陣仗的, 全屋幾乎拆掉再建. 說是因為兩年前舊屋收購時入伙太趕, 設計不周; 所以讀設計出身的妹妹要搞過晒. 連父親大人也說住得 "唔聚財", 所以又豪花幾十萬去裝修. 全屋除了其中一個洗手間和出面的平台花園不用裝修外, 都全拆了.

話之前入伙時無點搞, 但我記得兩年前係花了近廿萬喎! @@ 唔係化...!

不過, 連老人家也 "頂唔住" 要裝過, 為免家嘈屋閉, 也由得他們 - 又唔使我畀... (我畀自己屋企已經死死o下了)

找了和父母同一設計和裝修公司. 希望會平一點, 不過原來平埋都唔夠蝕. 父母家的工程開始後, 間中又會發現工人和物料供應夾不上時間. 他們要裝修三個月, 現在還是爛屋一間, 父親最擔心的是農曆年前未完工的話大家就真係 "企o係度" 了.

至於我屋企, 死執之下卒次有點眉目. 希望這兩天執通後, 將鋼琴運出客廳中心包好放好, 在新妹夫協助之下又搬好o的電視呀等等大件頭傢俱. 下星期真正開工時可以順順利利...

至於搬了上去父母家後, 那三幾星期間, 佢地而家就好地地o既婆媳關係會更進一步丫, 定係大倒退呢... 呢樣, 我真係唔敢諗住喇...

去年今日

剛去了九龍尖沙咀東為朋友的朋友 (朋友是個魔術師, 佢都有去表演!) 證婚, 因為夜了, 想吃點東西才回家. 就在這時, 經過了我們現在叫做 「九香」的九龍香格里拉酒店.

雖然天文台說下週才會轉冷, 但即時想起了去年東亞運時候的開心事, 做這次義工, 忙得很, 卻極之開心. 每天不同時間當值, 卻多數是早上 8 時己回到九香的義工辦事處和貴賓接待處.

去年的12月1日, 大概是開始多貴賓入住的日子吧, 記得整間九香都是人, 還有那些到現在都念念不忘的靚女 receptionist 們, 當然還有那位好在台型的接待處阿頭 edward, 就是他教曉我怎樣去尊稱大馬拿督的.

再路經, 故意入去撞鐘, 因為肚子空空, 所以想去 deli kool 買份三文治食.

見到人面依舊, 各位之前的人員竟也認得我個樣, 不過可能因為我轉了著西裝, 和那 "藍精靈" look 的義工領袖衫好大分別, 他們都忘了在何處見過我了.

進去為的是買三文治, 但上到去 deli kool, 竟然見是剛剛收檔, 再看看錶, 已經是晚上 9 時 10 分... 原來他們是晚上 9 時收工的, 最頂癮的是, 多數這級數的酒店也會盡量替客人安排一下. 但昨日他們竟然說... 「明天請早」... 倒是始料不及.

結果就是空著肚子回家, 待女王睡了後煮了一碟 penne 意粉加茄醬, 還有少少 iberico ham 吃過算了. (其實都幾豪...!)

最近見到不少人在說申亞, 多數都是嫌辦一次運動會貴. 但我又不是這樣想.

既然政府都已經不會將太大數目投放在公益上, 教育又要 cut 人 cut 錢, 根本辦不辦亞運, 政府的儲備都不會再有其他更佳的用途 (或者根本他們不想用!); 多點運動設備, 點都「好過無」 - 雖然政府在東亞運後被發現有些承諾過的設施壓根兒沒有上馬建過.

在一個區域, 一個城市, 一定會有他自身的問題, 一定不可能是整個城市都是無憂無慮食飽等屎出的人; 是不是因為運動會是個悠閒無聊的活動, 就要留給一個完全無經濟問題的城市去搞? 問題是 - 根本無一個這樣的城市. 又或者, 如果真是這樣的話, 每屆都只可以輪流在中國內地, 高壓政權, 和西亞油國 (如上屆卡塔爾) 來辦好了.

不是說就因為這樣可以亂花錢. 但是連建設也不做的話, 那連國際都會的名也除得了.

原本我不太覺得申亞有多好, 就算現在也不太覺得. 不過早幾天見運動員上了立法會, 說出自己的感受後, 竟然有人連佢地都鬧埋, 又話擦鞋又話博乜. 人家將自己的職業生命也賭上了, 說句自己體會的話, 有錯嗎?

脆皮羅勒焗魚柳 Pesce con Crosta di Basilico

上兩星期趕住在10月尾前完成律師會規定每年必修的律師持續進修學分, 跑了去金鐘 conrad 酒店上課, 中間 break 時卻跑了過去 island shang 食早餐, 因為有張 VIP 卡 (o係o個度擺結婚o既人多數都會送一張, 永久通用的). 見到人山人海都是說意大利語的. 仲見到有 G4又有架有意大利國旗的車, r 晒頭.

下課後就跑了去金鐘 PP 的 great 買料想回家準備之後一天 (即萬聖節) 做這道菜, 而這個菜式就是在老老老友 Massimo (意大利雜貨店 Il Bel Paese 老闆) 處見到一本意大利菜的雜誌上偷師得來的. 又竟然畀我在 great 的 zambra coffee bar 見到 Massimo 同班朋友飲緊咖啡喎, 一問之下原來當日意大利總統 (唔係那鹹濕總理) 來港, 所以意大利社團組織一齊食餐飯.

言歸正傳, 這個簡單的魚就只要幾款材料: 一件白身魚, 可以是 cod, halibut 之類; 切碎的鮮 basil 葉 (因為要取其色, 所以用新鮮好好多, 新鮮焗完都已經會有少少 dull colour), 碎松子 (剛買不到, 用了杏仁碎, 都 ok 但一定無咁香); 麵包糠; 上面幾樣加起來可以蓋在魚肉面一層就行. 另外原作是用 parmesan 芝士碎, 因為我不吃改了用蛋黃撈生粉, 是用來 bind 埋o的乾身料在魚上面的.

先將上面的用料撈好; 魚柳反轉, 有皮一邊向底. 放在焗盤上用海鹽和少少胡椒粉輕手醃一下. 之後鋪上混合好的料在面. 焗爐預熱到攝氏 190-200度, 入爐焗廿分鐘左右 (視乎魚柳厚度) 便可以了. 不要焗太久 (我就是因為留在爐內久了一點, 魚身變返少少鞋口, 唔夠滑).



無理由只是吃件魚吧? 所以弄了個方便的意大利雲吞. 看過北歐靚仔名廚 andreas viestad 的 "田野煮磨菰法" 後, 覺得其實煮磨菰濃湯可以好易, 買個可以放入個煲的攪拌器打碎o的菰加忌廉就得.

今次的是黑松露雲吞, 也是在 great 買的. 弄好後頂頭放一小匙松露醬, 圍邊滴些松露橄欖油就已經好好食, 又好「豪」了.



既然係萬聖節, 整少少南瓜畀女王食囉. 佢一向都鍾意食o既. 對於不愛食菜的小孩來說, 有時吃多點南瓜倒可以多點纖維 - 不過有人話黃/紅色蔬果不宜食太多, 以免皮膚色素太勁喎...



不過無煮o野幾星期, 為了照顧女王所以煮些容易少少的, 不過個雲吞真係幾好食...

姨仔結婚了之 ... 真的結婚了!

「因此, 人要離開父母, 與妻子連合成為一體...」(創 2:24) 這是《聖經》所說的.

上頭之後的一天當然就是出嫁的好日子. 一早起身, 連女王也早起了, 我已經換好衫, 對女王說「今日要早起身著靚靚呀」

女王仲勁, 竟然識朦朦o下眼咁答...

「係呀, 今日係姨姨同拔拔哥哥結婚丫嘛!」 聽到我眼定定.

快速的為女王換好戰衣 (係我換o既, 因為夫人化緊妝...), 因為怕遲到, 所以夫人便準備了女王其中一樣至愛早餐 - 維他奶, 加上我的 EDO 餅, 一家三口便著到勁靚的出門口, 樓下 "實Q" 一見已經知道 - 你地去婚禮!

我早上是幫手影相的, 所以帶了長短火連大背包加 lowepro 的鏡頭鼓, 不過我一向好 "知訂", 會同真正的攝影師講定晒我只係影少少 snap, 加上今次我係半個主人家兼證婚律師, 斷估攝影 sam 哥 (之前見過幾次了) 都不會 (亦唔敢) 唔畀面嘛.

好在去到時也不算遲, 不過就在酒店樓下已碰上了新郎拔拔. 他們早到了, 還在裝飾花車. 另外也見這酒店也有三對新人在準備, 今日果然係好日 -- 難怪早前另有兩對新人想找我今日為他們證婚, 不過都被我推掉了 (白白唔見了幾千銀呀陰功!), 我可不想被姨仔 &/or 夫人「批低兩吋」呀!

好了, 上到去, 開始影影影同埋影, 影到夫人都話 "你掛住影人唔使理個女o架啦" .

噢, 弊! 原來唔記得畀頭先帶出來o的早餐女王食呀~!

「等你都蚊訓啦, 食緊喇」 我唯有賠笑影o下佢兩母女囉...

好快又到了接新娘時間. 玩遊戲呀做o下扮瑜伽動作呀講所謂愛的宣言呀之類例牌菜都唔使點提o架喇. 不過拔拔答有關姨仔生活的問題 (例如最鍾意食咩生果呀, 開始拍拖那天係星期幾呀之類) 都答錯了一半就真係瘀少少.

接到新娘之後開始斟茶, 呢個時候攝影師都會搵o的催淚位出來, 又叫新娘攬o下媽咪呀, 叫兩老畀o的訓示之類. 不過外父外母兩個一向都係唔太鍾意講呢o的o野o既. 講兩句之後自己窒住, 哈, 又無喊喎 (同我當年一樣). 不過就因為唔想喊所以就無講落去喇. 反而係我太姨 (即夫人家姐) 無啦啦自己諗o左幾句祝福o既說話咩 "相敬如賓" 之類.

到我和夫人了. 有少少緊張, 因為... 其實今次係我做了三十幾年人第一次有人結婚斟茶我飲呀!!

摸o下個袋, 利是都有喇, 夫人金器都一早準備好.

嘩! 之前幫人整呢隻茶就整得多. 但係飲真係第一次. 原來... 真係幾甜o架喎! ^^ (唔知係咪今次佢地有落糖蓮子?)

攝影師又問我有咩講. 我就話 "我講好多o架, 留返證婚時先講啦".

點知佢之後無再問夫人有咩講, 畀夫人白了我一眼. :P (後來才知原來夫人想又「求其」講少少, 費事搞到家姐講完之後佢無野講咁...)

到敬茶之後, 影o下相又係出門的時間, 例牌菜就係新人出門新娘唔可以望返轉頭, 亦不應和其他新娘出門撞面. 但最搞笑係因為外母掛住招呼親戚同埋畀女王係咁好似樹熊咁 "冤住", 所以送姨仔出門時係極之求其的講句「拜拜今晚見」就收工, 所有想o係呢個時候影o下相搞o下感動樣o既師兄都大跌眼鏡 (包括我)...

因為有 "女家男丁不過門" 的說法, 故雖然我不算真係女家的人, 但亦無隨大隊過門 (仲要湊住女王呢). 不過就和外父大人一家匆匆飲茶午飯後就像前一篇提及回公司幫姨仔搞埋個座位表呀咁. 轉埋個證婚公事包 (裝好多零食o個個呢...)後又去金鐘為他們影相.

到達時他們剛開始. 始終因為他們有正式攝影師, 我 (還有姨仔那位 MUA, 都好鍾意影相, 在其他婚禮都有見過) 就在旁只是拍兩張算了.



估佢唔到, 影一陣已經差不多下午 5 時, 因為他們想在 6 時正註冊 (無咁嘈雜喎, 都o岩o既), 所以便又拉大隊去酒樓.

一般證婚, 老朽真係駕輕就熟, 但係今次台上一個係姨仔, 一個係外父, 一個係成日一齊睇波o既 "兄弟班", 另一個就係之前已經搵過我幫手o既客 (拔拔老豆, 之前有第二樣野搵我幫手). 加上之前幾次姨仔的朋友都係我證, 次次都帶給她們一些特別的回憶 (因為我在證婚時那段次次不同的分享), 所以她們 (有些今次係姊妹...) 竟然一齊同我講話 "好期待我今晚會講咩"... oh my god... @@

但今次, 我自己都有少少語塞, 想起和他們一起籌備婚禮的時間, 想起他們呢一對又喊又笑的歡喜冤家, 想起一切, 我開始講的時候竟然呆了一呆, 係之後回一回神, 才再次好似 "上身" 一樣可以繼續說下去. 不過為免自己忍不住也眼濕濕 (咁唔夠 pro o架嘛!), 故意講得慢o的.

果然, 雖然加埋都係一分鐘多少少, 但講到一半, 已經見到外父和姨仔開始拎紙巾, 拔拔好醒, 搶先拎出來; 哈, "目的達到", 收工! 事後到了晚宴開始時她說起證婚一刻果然係即刻再次喊到收唔到聲...

整晚都好好玩, 而且食物比想像中好得多, 尤其係金湯蟹黃翅 (雖然而家成日話唔好食翅, 不過真係好足料), 同埋熱葷之一的沙律蝦球伴油炸鬼 (唔記得改o左咩名了, 反正不用 "油炸鬼" 便是了)



之但係因為影相人多, 司儀即場安排稍欠秩序, 而且不少搶上台的是男家賓客, 有些是他們的同事, 我身為姐夫的又不便插手了. 所以時間比原定的遲了, 導致女王到好夜都未走, 又開始扭計... -_-" 之後一天都係一家大小躲在家中好了.

姨仔結婚了之 ... 上頭

昨晚是姨仔上頭的日子. 成村人去了姨仔 (女王婆婆) 屋企食晚飯. 點知女王一去到婆婆屋企就唔畀佢走, 連去廚房煮飯也不行, 勁扭計 (因為無睡午覺之故, 次次下午無睡就係咁, 萬試萬靈). 而我們放工又早不了幾多 (唉, 因為要替工交貨畀好友老闆, 而佢對落的徙弟又因為佢 "chur" 佢而 "chur" 我, 比較奇的是, 身為見習律師去 "chur" 一個律師去做一樣唔係呢位律師本身應該做的事o既時候, 係咪過份o左少少呢? 雖然最後佢有同我道歉, 但係心理上有點不爽) 所以搞到開飯時間也遲了, 亦間接導致上頭也遲了, 好在按老朽翻查通書黃曆, 昨晚由9時至凌晨3時也不會沖撞 (有時傳統野咪做少少囉, 同我宗教無咩關係), 所以都算數了.

食完飯等食上頭湯圓時, 姨仔在自己房內鬼殺咁嘈, 仲聲震震的. 原來係未來妹夫幫她 print 的座位表 print 錯了. 開始「發晒茅」.

新人有此情況, 我都見得多. 當年幫手做 planner 時都做o左唔少次「嫁/娶前抑鬱症」o既 consultant counseling. 今次的係好 typical 的. 不過佢過o左一陣自己 calm down 返, 我又話幫佢今天正日下午在屋企和公司幫他們 print 過晒o的o野 (係呀, 我今日返公司取了公司 10 張紙的資源咁大把, 而家咪就係等緊佢地由男家去金鐘再幫佢地影相囉!) 所以好快佢就無事.

但係女王始終不可以太夜訓, 所以最後都未等到佢上頭我就和夫人帶了女王返屋企先, 原本想為外母 & 姨仔影上頭相的計劃亦告吹. :P

在回家途上, 夫人說過, 當年外母大人為她上頭時只可以點一會的蠟燭 (因為酒店不准的), 今次她們就醒少少, 先 check in 酒店, 準備回家上頭後才回酒店; 不過到最後我收到知會, 說因為太夜了, 外母話唔好去酒店訓喇, 都係留在家啦... 姨仔仲話蝕晒本.

其實, 外母點諗我點會唔知丫, 個女聽日嫁人喇; 之前的最後一晚, 梗係想留她在家中訓啦. 夫人仲話, 佢結婚時上頭, 外母太緊張, 又係聲震震的, 講「一梳梳到尾」已經開始手都震埋, 搞到夫人都想喊埋一份...

我而家已經諗緊, 女王日後嫁得出時, 我會哭得怎生模樣?

姨仔結婚了之 ... 試衫

差不多到姨仔的大喜日子了. 她自己當然要去試衫啦, 但我說的是女王.

女王太細個, 未可以做花女; 不過姨仔和夫人都特別想她在我證婚時和晚上都靚靚. (咁其實我都想o既) 所以就去了揀花女衫.

早揀又怕女王長大, 遲揀又怕秋冬多人結婚無貨, 去名店又怕咁鬼貴只穿一兩次又不合身, 買得平又怕寒酸甚至穿第一次已破了; 最後在十月尾才去了金都一間賣花仔花女衫的店子, 整層二樓有數間這類店, 但唯獨是這間最好生意, 無他, 是態度問題, 他們招呼相對是殷勤過另外兩間店. 而且用料也不賴 (都係平o的名店 1/3 左右咋!) 所以夫人便選了他們.

同場加映上月夫人和姨仔去金鐘 PP 掃貨時贏得的抽獎禮物: 金鐘PP zelo 的下午茶 buffet. 因為姨仔趕住嫁人要 keep fit, 所以便送了她那份 coupon 給我可以和夫人& 女王去食.

這店子當年最初叫做 Bistro de Paris, 是做傳統一點的法國鄉土菜的, 後來同店改名做 La Fourchette (即是 "叉子"), 改做新派法菜, 不過不太受歡迎, 後來再改為現在食 fusion 的意/法混合菜.

之前去過他們的 buffet 相當抵吃, 用料極佳, 連女王都鍾意; 不過今次去到, 食物選擇少了一半; 細問之下原來就是因為要做 promotion 所以老闆諗縮數...

之前有, 而家無蜜瓜 (竟然變o左鳳梨) 跟o既 prosciutto ham (應該唔係 parma, 佢鹹過 parma 但係又無 san danielle 咁濃香) :


食完之後便匆匆去金都. 自己知道逢年尾的週末下午金都一定勁多人, 所以都揀夜少少先去. 可能係因為真係年尾啦, 都仲有唔少人.

女王試完, 膊闊o左少少, 初時老闆娘仲話唔係呀唔係呀, 到時你著返年底衫啦, 天口涼呀咁. 係後尾我同夫人係咁講, 又話下星期著喇, 咁多間店你地至好呀之類之類; 佢又話好忙要做一條龍過大禮服務, 最後, 我唯有同佢講:

「一場行家, 咪玩啦; 最多我介紹多o的客畀你, 你聽日同我搞掂佢啦」 之後遞上寫上婚姻監禮人的卡片乙張.

「哦... 哇, 唔好意思, 真係走漏眼, 你聽日下午來啦, 實幫你搞掂佢; 有咩真係多多關照!」

第二天已經改好晒, 靚靚!

食布冧

女王之前生病時, 好多生果都唔食得, 中間斷斷續續都病了個多月, 女王助理首席太醫話唔食得橙又驚咳, 只可以食蘋果和啤梨之類. 好在屬漿果類的布冧不在此列. 而因此, 女王也愛上吃這些梨子.

一晚, 我切了布冧一大個, 去了皮 (自己吃掉好過浪費), 再切丁.

女王一見到端出來, 便叫 "呀, 布冧呀!".

我和她便一人一些的吃著.

到差不多最後, 剩兩粒.

我說「一人一粒啦, 好唔好?」

女王「唔好, 我要!」

「一人一粒啦, 分享丫嘛」 (當然我是故意的)

女王好快手自己用牙籤 "拮" 了來吃. 剩下一粒. 她搶了隻小碟後再拮.

之後...

女王將牙籤遞給我, 說「爸B 我餵你食丫!」

「唔使喇...乖, 你食啦」

Oh My God...!!

望著個女慢慢食, 差點兒沒哭出來...

夫人在旁, 不過無這份福氣, 哈, 因為她是從不吃布冧的. :P

從報紙再看女王

女王又病了, 國慶後又發燒, 之後再放兩天病假, 碰上學校 term break 和打風 (3 號風球呢...) 放了個多星期後, 已經無事.

上星期一再返學, 唔夠兩日又o黎過. 突然間又好多痰, 而且又再發燒.

那天, 我真的好無心機, 好 sad, 好 frustrated.

老朽的開心果形象突然變了黑面神. 不, 是 "灰面神". 因為真係好煩, 見女王又咳又發燒, 又怕會傳染 (她已經曾「成功」傳給我們幾個成年人了). 真的覺得, 她只是兩歲吧? 還受得了? 她不應該有這樣的病啊! :(

女王是夜晚咳得勁些的. 而且係好勁那種, 但因為太細個, 聽得出好多痰但吐不出, 試過一次半次太多痰, 像嘔吐的出來, 我們見到, 雖然又要洗衫又要清理, 但心反而安一點.

每次晚上聽到她狂咳之後又睡著, 我的心 (相信夫人也是) 都揪得很. 每一次的咳, 都會驚醒我, 望著睡著但睡得不香的女王在咳, 有時仲咳到震晒, 心中只想, 咳的人是我就好了. 因為, 我願意代她「受o左佢」.

不過衰又衰在女王好多時好扭計, 如之前提過的一樣, 唔多肯食藥.

都要等到昨天和女王姑姐影了畢業相後, 昨晚的咳才慢慢的收了一點.

今早讀報, 見到那位 13 歲就離開人世的小以孩留給父母的信, 一看已經忍不住, 馬上關上了公司房門, 讓眼淚自然流著, 心中, 為了她, 和所有小孩的健康祈禱.

我的公事包 (特大版)

好多律師出庭都會用一個大大的公事包, 我也不例外. 打從做學師時代起, 已經要為公司的老闆拎大皮箱去法庭.

做跟班有時都會有陣式的. 老式的去法院行列是行路的, 因為大狀樓多在中環金鐘, 不太熱時行去法庭比乘車快得多. 大狀和老闆行頭, 他們不會拎任何東西, 又或者只拎好少物品, 如大狀自己的假髮或者件袍 (寸o的o既直頭著住行), 後面就是大師爺拎個箱, 之後就是大狀徒弟和學師的見習律師, 都是拎箱的. 你好命的話師爺們或者會幫你拎多少少. 如果無師爺/文員的話, 那見習律師就要自己拎晒皮箱了. 而且那些皮箱, 都是放得下三個三吋大文件夾的, 放滿後重得很. 後來加了些有個轆的可以拉, 但係個轆本身都有重量o架嘛. 所以個箱又大o左.

後來世界慢慢轉變了, 大狀多了自己拎東西, 這樣我 "架勢堂" 都少見了.

但話得說回來, 這些皮箱不論是大型或是細一點的, 都可說是律師的標記. 因為這世界大概無人會用這麼笨的箱裝這麼多的文件, 裝錢又不會用這個箱的, 貪招搖麼? 所以一看就知是律師來著.

老朽一向自己有個細一點的, 用來裝去法庭的小量文件, 遇有不需整個 file 帶去 court 的話就會用. 而後來就發現這個箱子用來裝證婚的物品, 加上借出的羽毛筆, 戒指枕和簽名墊套等加起來, 剛剛好...



用了多年, 這個由一位 uncle 由美國帶回來的箱子也開始殘舊了, 所以便要找個新的, 但找了好幾個月也找不著, 因為一般律師不會用這麼細的箱, 一不就是用其他的名牌公事包等. 找了好久, 竟然意外在一之上庭後在荃灣的千色店找到一個像樣的:



此後就可以帶它四圍去, 舊的也可退役做後備了.

不過, 其實這個箱最重要的目的, 就是幫我這超級為食鬼上糧之用, 大量零食拿回公司也沒人察覺!

好事會不會多磨?

近幾星期證的一些新人, 當中有幾對都有o的幾 "經典" 的 "場口".

先不提 10.10.10 的那對酒吧 fans. 另外有一對朋友 (真是朋友哦!) 一早找了老朽想證婚, 這是早大半年前的事. 不過日期後定.

到四月中, 收到女的打來: 我們想早點結婚, 因為, 我有了孩子.

不打緊, 雖然老朽作為天主教友對此有一點點保留, 不過既然一早有意結婚, 也就無所謂了.

新娘子 & 準媽媽告訴了我, 說她之前離過婚. 這個也沒大所謂, 總之完成了就好. 一樣可以辦手續的.

點知到了 5 月準備時, 她將文件給我, 才知道原來那位新娘子是當年在外地結婚的, 三分鐘熱度的她在婚後三個月已經分開了 (真奇!) 不過拖拖拉拉的, 到今年才離婚 (不知是知道已經有了現在老公的孩子才去辦離婚呢...); 但係...

原來佢係 4 月才在外地辦手續, 不是 4 月已經離婚. 該地也是行英聯邦例的, 離婚令分 "暫准" 和 "絕對令", 以 "絕對令" 為要. 計埋都要搞兩個幾月, 也就是說, 最最最快 7 月才可以 "成功" 離婚.

「o下? 但係我地已經 book o左 6 月擺酒喎! 有無得通融o下?」

對唔住, 呢個唔係入境處可以接受的理由, 而且在入 "擬結婚通知書" 時的婚姻狀態是法例要求, 一定一定一定要是單身/鰥寡/離婚才行.

「老人家未知我離過婚, 其實... 連我男友都唔知o架! 可唔可以唔畀佢知o架?」

又係對唔住, 唔得. 老人家唔知還可以說得過去, 但自己男友唔知就無可能 - 因為起碼這 status 的英文會在結婚證書上出現的. 再說, 這個咁大件事, 怎也不應連自己男友也暪吧...

力勸之下, 女方都和男友講了. 不知是真的愛得咁勁丫還是因為孩子, 男的好快已經接受了, 而且表現完全無異 (希望係堅啦o下!). 夾手夾腳對所有親戚話佢地會先擺酒再飛外地註冊, "蒙混" 過去.

又搞了幾個月, 女方的孩子都 "見肚" 了, 外地才寄來那張等到頸都長的正式離婚令. 即幫佢入紙.

又來另一樣.

登記處說女方離婚是人不在當地, 要證明自己當時位處何方, 是否真心與前夫離婚等等. 又搞了幾星期.

最後, 成功入紙. 女方說十月初預產期, 只想 9 月中左右旬可能註冊. 呢個倒係求仁得仁, 時間上剛好.

咩都搞好晒, 登記處都 confirm 了. 連夜幫他們整理好所有文件, 準備一天後幫他們行禮.

facebook 傳來一句 status, 是前一晚深夜的: "I am on my way to hospital, BB can't wait... haha!"

我估計準媽媽已經陣痛到鬼殺咁嘈 (事後證明是對的), 所以即刻打畀佢男友.

「咁使唔使我即刻來醫院證呀?」 原來新郎係公務員, 結婚後才生仔福利和住院都好o的.

「我都想... 但係... 我地而家入緊產房喇!!」

@@!

結果, 他們成了我第一對我一邊食薑醋, 一邊在他們家中證婚的新人...哈哈哈哈...

恭喜晒!! ^^



(呢隻係另一對新人的蛋糕頂公仔, 叫做 "不願意的新郎". 係新娘買的, 超抵死!)

10.10.10

相信好多人今年的10月10日一係就自己結婚, 一係就去觀禮, 一係就去飲了吧?

的確, 2010年10月10日是好日子, 不論是中西曆也是.

見到報紙報導某黨的前委員 (也是律師) 說自己這一天為百多對新人證婚, 相信說的是他有份開的證婚公司吧? 本身一人不可能一天證那麼多場啦. 另一位好出名, 可說是行內第一的行家就合理一點, 說只為三至五對證婚. 這位行家老朽當然認識, 以前還時常在法庭做「對家」, 做到變了朋友; 不過後來他整份業務中, 9 成已經由訴訟變成證婚. 因此亦已經少了見面.

當日我原本都有兩場的證婚, 但有一單在之前為他們準備擬結婚通知書時突然甩底, 是朋友的朋友, 好像是說他們由原本在晚上酒席開始前證婚, 改了下午用一間證婚禮堂來行禮. 本來也是小事, 但他們之前在我多次催促下也沒有回覆我, 但我最初又不敢貿然將那日期改給別人 (有人問我但我推了...), 因為知道是朋友的朋友, 又知道那天會好多人結婚, 所以找不著也不敢推, 最後只好找那友人再幫手才找得著, 原來就是已經有別的安排. 但又不告訴我, 唉...

另一對就好玩得多, 不過新人是對極之 "爛玩" 的人, 而證婚地點, 原本是在他們家中的 (!), 因為只想一家人大家開心一下後就狂隊酒 (新人也是朋友的朋友, 有 "千杯不醉" 的 "朵" o架!); 但在準備擬結婚通知書一刻, 就說要改在一家他們附近的相熟酒吧舉行, 因為太多朋友想來了.

好呀, 賴豎就是未試過日光日白在酒吧證婚. 來吧! (在人家中證倒已試過, 最近一次更加別開生面, 遲點有機會再說)

好快, 又到了大喜日子. 去到酒吧, 見到的是一堆又一堆的氣球, 成座山咁多的啤酒, 幾十支紅白酒和烈酒排晒隊. 而新人是飲食業有關的 (是菜欄東主), 所以又有友人在不同的餐飲店中抬出各種魚生壽司沙律鵝肝燒豬烤魚之類之類.

基本上呢個係一個好高興o既 "趴地"; 我一去到已經畀人拎住幾支酒行埋來, 好可惜, 自己應承自己, "開工" 前一定唔飲酒, 所以無飲到...

那既然新人是做菜欄的, 那中間那段說話, 我便即場 (係呀, 都係即場, 之前都無諗過) 用了買菜來比喻新人的成長, 哈, 新娘無事, 不過講到新郎哥就流o左一滴眼淚. :P

禮成後, 係咁意留低和自己的幾位朋友食o下飲o下, 不過都係唔敢飲酒, 因為女王仲未好返, 唔想一陣回去時畀佢聞到一朕酒除. 都幾可惜.

之後一天是星期一, 例牌會有律師會的每週 update circular. 見到...

哈哈, 奇妙x典請人 (駐場監禮律師) 喎! 都知佢地多人, 但係成日都諗, 為他們做 contractor 的話, 點返自己公司呢? 仲要駐場喎... 加上佢地有特定o既收費和服務模式, 無好似我和其他行家一樣的自由和容許新人 customize 咁多野, 咁樣同在註冊署的監禮官有咩分別?

牛陣

雖然工作上多多事實, 不過人總要吃東西, 而兩公婆也需要一點拍拖的時間. 所以有時也會放下女王給老人家幫手睇住. 兩公婆跑出去吃飯 shopping - 雖然好多時都係買野畀女王!

上兩星期又找了個機會拍拖, 拍到去尖沙咀. 因為我知道 The One 剛剛開幕, 而當中有一兩間酒樓是試業中, 遲點要去證婚的, 於是便走去先望一下, 睇場嘛.

除了The One 外, 老尖也開了另外兩座大廈 - K11 和 iSquare. 當中都有不少食店, 今天就誤打誤撞的找到了一間之前想吃的 "牛陣". 上午訂了位, 說是下午 6時15分有. 之後便要 9:15了. 納悶著竟然有這樣得意的食肆.

去到之後才知道雖然主打的是牛沒錯, 原來卻是全 shabu shabu 的, 而且是放題, 難怪會多人去.

好不幸, 我們真的遲到了 8 分鐘 (因為等那些極多人的升降機!), 而檯, 也真的給了別人. 正在想著應不應去別處時, 夫人見到門外兩張告示:

「慶祝中秋，22至26日全店日本和牛套餐八折」

「凡本店放題顧客可同時享用 haagan daz 雪糕任食」

好快我們已經決定: 等!

好在「只」等了 40 分鐘左右 (嘩, 其實都唔少時間!) 就有位. 我們之前已揀定想吃的套餐, 不過兩個都覺得叫最貴的那個好像太奢侈, 而且 A5 的和牛油花太多, 灼後得返好少, 無咩好食. 所以便點了次一等的和牛.

牛是不錯的, 還跟埋黑豚, 但因為一早無想過會是放題, 所以無 "留力", 只吃了兩三碟.



他們有樣怪招, 就是在你開始前, 一見湯滾便加點涼了的湯, 使之不再滾; 太太一見其他桌是這樣, 已暗地告訴我知 "這是之前 "幸x樓" 的陰招, 一會兒叫他們不要加".

原因是, 當你第一轉的時候, 多數人都會等湯滾了才下料, 遲些才滾的話, 公司就慳了多 5-8 分鐘, 你們就食少了 5-8 分鐘了這限時 90 分的放題.

不過, 他們一來時, 就算我點叫他們, 已經用好快的手倒下了湯, 見到夫人黑黑地面, 才拋下一句 "不好意思" 就走了.

另一招就是, 當問他們要蓋子, 希望湯快些滾時, 答案就是 "沒有".

不過, 和夫人苦笑後, 便出去取些其他佐料. 奇就奇在, 日本放題竟然有大量的百福豆腐, 中式魚蛋呀, 唐生菜呀之類, 反而日本菜蔬如春菊, 水菜等通通欠奉. 這個大概是慳錢之故了. 不過, 港式的蔥蒜混醬豉油加了日本醬油, 卻又配得幾好, 而且他們還起碼有正式的日式酸汁和芝麻醬用來蘸牛肉. 想起了當年去日本吃淺草今半和京都的木曾路...

食到尾, 僅趕及吃完四款雪糕, 每樣少少的已經好飽. 真的童叟無欺, 都是「哈記」的. 有十多款, 每次出四大桶, 吃完即換.

八折後的單, 不平, 但好抵!



最開心就係可以間中和夫人一齊來拍拖嘛. 食食o下想起好喜歡吃牛 shabu shabu 的母親大人, 要她照顧女王而自己在食和牛, 心中, 開心之所以有一點不忍.

女王2歲零3個月新聞報導

雖然工作未能真係釋懷, 但女王近日好多古靈精怪, 使人哭笑不得的事, 真的要記下逸事來, 免得日後真的會忘了 (正如女王近數天找回一年前玩過的玩具, 竟然唔多記得曾經玩過似的!)...

1) 睇醫生記

個個都話下返學就易病, 之前都唔信, 但打從上個月帶女王食完壽司發燒後, 一直都未停過有小病. 事就無咩, 但係每兩星期睇一次醫生, 就係一路o係度流鼻水同有少少咳. 繼續每兩星期進貢給御醫... 希望天氣快點轉定呢, 就應該無咩事o既. 但一時又多兩聲咳, 都幾煩惱...

2) 講故事

女王返學後正如之前提過, 好好好黐身, 不過呢, 上學時聽埋o的故事又會回來和我們傾喎, 仲要我地幾個坐低, 加埋o的公仔呀, bear bear 呀咁圍起來聽佢講. 十足我自己細個一樣. 不過因為英文未係好得, 所以成日講埋o的奇怪英文, 笑到我地碌低.

3) 小勞作

女王最近愛上了剪貼, 而且在夫人的帶領下, 愈玩愈多. 而夫人亦因此多了和女王玩的機會. 老朽自問 fine art sense 近乎 0, 夫人這樣雖不是好高分 (起碼無姑姐咁勁讀 design 丫), 但係已經好夠和女王玩. 玩一大輪過多一兩天又可以再拎出來 "加工", 之後就會找我幫手 "貼堂" (放在家中飾櫃中間), 睇睇o下, 都幾靚丫... ^^



4) 中秋夜 & 姨婆燈籠

中秋之夜, 和夫人&女王按傳統到了老朽的老家, 搬了之後多了個平台小花園, 大就不是好大, 倒放了數十盆我爺爺留下來的花卉小樹和一些桌椅, 每年大家就在此 bbq, 賞月等. 今年當然也不例外...



早前父母和老朽妹妹去了日本千葉自駕遊, 買回來的千葉八街花生, 聽說是「天皇皇后兩陛下御獻上品」, 我吃下去覺得不太特別, 但夫人說是特脆和特別重花生味... 這粒, 像不像一隻鴨? @@





但女王原來不只外婆有 art 的天份, 連姨婆 (老朽母親大人的妹妹) 也有, 似乎更厲害...



5) 煲雞湯

差不多每星期六日都會有一次, 是老朽要上班, 而夫人獨個照顧女王一朝的, 老朽就會為女王的中午餐籌謀. 多數為不要夫人太操勞, 夫人都會煮麵呀, 意粉給女王吃, 而女王也樂得吃些其他糧食. 因為不太想用有味精的湯水, 所以每星期吃雞時都會留下骨頭放在冰格, 星期五凌晨又或者星期六就會由我先煲好了這清雞湯, 等夫人可以煮給女王, 有時也加入自己的麵裡. 又煮又冷卻又撇油的, 真係搞幾個鐘先放得入雪櫃. 呢勻真係 "眠乾睡濕"...



6) 領洗

老朽是天主教友, 但雙親不是, 為希望女王領洗, 和他們說項好久, 一直他們都不太願意的, 但最近因為知道小學學位真的緊張, 再以此為題, 卒次得到爺爺首肯 (我不想完全逆他們意, 所以不到最後我不會像自己當年一樣自己跑了去領洗). 這是近兩星期我最開心的事哦!!

7) 講大話!

死啦, 有時女王學識了講大話, 明明是她倒瀉水, 她會指說是媽媽做的, 點算好

8) 畀人咬.....???

今天 (7/10) 下午老師致電夫人, 說女王放學時畀後面的同學咬, 可能是因為爭先恐後的想走, 霸了後面同學的位置. 老朽未回到家, 未知傷勢, 反而擔心女王會心理上害怕... 容後再報.

姨仔結婚了之 ... 過大禮

下月結婚的姨仔, 在老朽介紹的擇日師傅安排下, 定了在十月一日納聘 (即係過大禮).

詳細有關過大禮的習俗呢度唔講喇, 都無做 wedding planner 咁耐, 而且出面大把人講咩係納聘納徵. 反而一 check 之下, 見到十月一日是個 "破日", 不是傳統嫁娶的好日子. 之前有一兩次, 新人將日子交給我時都有此發現. 而老朽第一對 "街客" 當時更曾經唔開心了一段時間, 以為人家 "玩佢".

細問之下, 原來擇日有兩個大類, 一就是跟通勝再夾八字. 另一類就是按通勝之內的 "董公擇日要覽" 來擇, 不過後者有學說認為是過時的. 至於按通勝日子, 原來會就著新人命格去找日子的. 如果新人有所謂 "命硬" 又或者父母緣較薄 (即細個已去外國留學, 又或者有父母已不在堂) 的話, 就要用一些一般人的 "不好日" 去相沖, 反而會有好效果. 而 "命硬" 只係一個 concept, 本身係無話唔好的, 唔好畀個字嚇親.

而未來襟弟拔少就係細個已經放洋那種. 師傅亦說過他父母緣稍欠 (不過佢本身係好孝順的), 所以揀了這日.

因為老朽是女家的外嫁女的男家人 (好複雜呀可?), 所以一般是不會去接大禮的, 而且那天傍晚要到紅磡證婚, 最好不要四圍走. 不過姨仔臨時打來, 說無人幫他們拍照, 所以便過去當幫手了.



他們沒有按傳統, 新郎和新翁姑是不應親自過大禮的, 不過現今有時都無咩所謂了. 就由拔少自己來. 而外父講明唔使要鮑參翅肚, 利是搭夠, 所以他們兩大籃東西, 加個大禮金盒已經夠. 和老朽當年比, 他們簡化了許多, 雖然我自己比較喜歡大鑼大鼓的, 熱鬧得多, 不過都無所謂了.

不過新娘要迴避呢樣佢地就有做返. 姨仔知道男友上來便逕自入房唔出來, 原來就趁機用手工紙剪了一些圖案來, 給女王玩用的. 真係多謝晒!

過禮後打開那奇x 的禮金盒, 原來o的餅卡放晒入去. 原本禮金盒咁大呢, 其實係用來放紅豆綠豆蓮子百合之類 "墊底" 的. 不過佢地又無做. 但外母正如當年一樣, 準備了幾十條小毛巾, 逐條包起來, 用作回禮的 "賀帷" 之用, 是用來大日子當天敬茶時送給長輩的. 有說是用來抹口水, 當然唔係啦, 賀帷其實最初係用來包金器的, 不過點解人家送完金器畀你你要畀返條包金器布人就不得而知了.

不過有樣傳統, 連老朽都查證不了的, 就是不知道新娘是否可以吃過大禮的餅食, 如果有人知的話有勞通知聲喎!

"生意淡薄" 續篇...

今日大老闆卒之捉o左老朽入房 "開拖". 當然, 佢都 "只係" 好有禮貌咁問我一般的情況和點解條數未返, 大概因為我一早已經準備 "發難", 正如 "公主嫁到" 入面所講, 「見得人, 拜得神」, 所以好理直氣壯咁同佢講我的「極品」銀行客戶 (下一兩篇會講) 和我仲有 capacity 之類之類. 佢見我答得咁快手仲有少少拍檯 feel, 所以都無點繼續 "chur" 我. 老朽當然識得 "見好就收", 雖然數要繼續跑, 但係都 "世界" 返一次, 多謝了他咁 "關心" 我和為我安排多點工作. 不過, 而家先加 file 的話, 得返半年未必可以跑得切...

想起早兩晚和同事大雄仲有另一位已 "上岸" 的 consultant 同事 (係一位都幾出名的證婚律師來的, 近來醒目的他轉了做調解員 mediator 搵真銀) 談起不少公司的事. 上岸同事提提老朽, 人到三十幾, 是時候想想究竟應在此 "靜候" 上位的機會, 還是出去闖一次, 抑或轉另一種工作的模式?

其實老朽依然想在此留著, 因為此地的工作環境對不愛受時間拘束的老朽來說, 是個 "無掩雞籠", 只要你搞掂工作條數, 話知你每天只返半日, 也不理你自己的工作到幾夜幾早. (正如現在凌晨時份, 老朽在家還在用 dictaphone 錄下一份給客戶的 advice, 只是悶悶地寫一篇) 所以, 除非真的因為跑數原因或人手問題被裁, 否則老朽暫時都不會他去, 因為要轉就要諗好多野, 近來諗屋企裝修, 諗要唔要多個小朋友和女王的成長問題已經頭都大, 再加工作問題的話我驚個頭會似那隻傷風頭痛藥廣告的頭一樣 - 爆頭!

莫非生意淡薄, 不如賭博...?

去年老朽都寫過, 我們在中型(或以上)律師樓的律師, 其實和一個跑保險或金融界的 sales 無大分別. 因為我們是要 "跑數" 的. 不同的是, 律師樓多數都是由大老闆的客戶提供 file, 老闆就負責 "派 file". 自己有客戶的話就算是 bonus 了.

去年也都提過, 自從上兩任的秘書小姐在生完仔回來工作了幾個月後監生被老闆 layoff 後, 我便要忍受那半個「我唔想佢幫, 佢亦唔想幫我」達半年之久, 最後她成了我做了三十幾年人唯一 (希望係我成世人唯一啦o下) 一個我頂唔順要炒的秘書. 而在她的 "服務" 期間, 我根本就無人幫我手, 所以我去年中有近半年時間不能有能力再由老闆處取新 file.

亦因此, 去年的 quota 算是僅僅跑到 (加上之前一位秘書前年大肚, 有兩個月左右我也是無秘書用的), 但一般而言, 一單官司打大半年, 到雙方 "齊料" 方會和解, 和唔到就再多三幾個月就真係 "開波" 或者 "砌". 那就是說, 一場 "standard" 的索償官司, 大概要大半年至一年才會完結 "收工兼收錢". 去年年中的檔案, 就是今年初至中才會完.

既然去年無辦法開 file, 今年年初 "無水回" 乃幾乎係必然的事. 當初炒人的是你們, 唔畀新人我用的是你們, 而家又係你們叫我交數? 等多幾個月啦唔該.

不過可惜, 老闆唔係咁諗野o既.

再者, 好奇怪, 打從半年前前任大老闆和當今老闆 "炒起" 唔撈之後, 的確有些之前合作開的客戶少了找我們的大老闆.

公司又唔係唔掂, 不過短期內少了工作又係不爭的事實, 老朽唔係盲o既. 見到咁o既情況, 由半年有多之前已經同各位相熟老闆講明盡量開新 file 畀我. 仲要係個個月都提佢地. 但係結果亦不太理想. 而且有時開著幾隻係晨早對方已經想草草了事, 又或者係對方根本無 case (即係亂咁告), 畀我嚇兩嚇已經縮晒沙; 這些細翳野, 我們可以收到的律師費相當有限.

而本月份由財政年度起計, 又已是半年光景. 大老闆又開始卒人行動. 老朽自是 "被召面聖" 之列.

解畫解完, 其實自己都相當一肚氣. 早幾年順風順水, 那就證明老朽並非工作能力有問題了.

自問從來不是個有風駛盡裡的人, 不過大老闆不問原由不問世情就來卒, 這個是我相當相當反感的事.

老朽一向待人如「圓通大師」一來不得罪人, 二來不斷的會自我安慰 (that's why 就是有一點 "圓通" - 即是阿Q的別號). 但一樣還一樣, 數始終要想辦法交, 所以近一兩個月的 blog entry 有時都會疏些, 盡力將手頭上工作推快一點, 希望祖先有靈對家醒水, 快點收工又收水.

不過, 有時人心肉造, 回到家中始終有時是未能盡情開懷大笑的, 其實有點對不起夫人和女王 (雖然一直都無因此對她們發過一點的脾氣), work hard play even harder 的個人承諾有時自己都兌現不了.

證婚的工作相對於打官司來說是極小巫見大巫的律師費, 一單八個月左右的官司律師費大約是一單證婚的四十倍左右, 所以在我老闆眼中, 接得多證婚仲蝕本. 因為證婚工作實際要的時間不止那一小時的價值 (香港一個十年八載經驗律師正常情況下可替公司每小時賺三千元左右, 正是差不多一宗證婚的價位).

多謝大家聽老朽在呻幾句. 平日的老朽在人前也好, 在網友前也好, 在誰前也一樣是個開心果, 是個快樂人, 也是個幸福小肥仔, 每次證婚都可以找到經典來勉勵新人, 甚至是個專幫人解決困難的百曉生. 但其實, 我也是人, 也會有擔心的時候, 有時甚至連祈禱也未能控制的.

不過, 我依然是個幸福的小肥仔, 因為我在不開心後, 總會相信, 天主在看, 而且, 在照顧我; 因為祂派了我的家人, 夫人, 女王, 朋友等等來做我的守護天使.

船, 一定會去到橋頭的.

冷氣的下場

早幾星期不是說了幸運地因為聽了一位相熟師傅說老朽府中客廳冷氣快將就木, 所以建議了我做保養, 從而慳了一筆的? 這故事, 尚未結束.

換了那黑 "mung "mung" 的機頭後, 開心了大半個月, 有一天, 冷氣突然完全靜下來, 之後, 再次出熱風, 變了暖氣機.

先打了電話給那位相熟師傅, 他說可能是因為這 "山寨版" 的機頭始終不是原廠, 所以有問題的, 並叫我 "拿拿聲" 打電話去原廠問還有無即時可供轉換的機頭, 原來因為政府剛在 7 月規定所有新入口的冷氣機要用新的環保雪種, 甚麼 R401 的, 舊的 R22 買少見少.

馬上聯絡了那 "專心做冷氣" 的公司, 找到一位都幾好人的負責人; 不過回覆卻真的是 "晴天 pig pig" - 他們最後一個機頭就是換給我的那個. 而家連條喉的規格都不同了. 而且機也要新買.

更加 "抵死" 的是原來他們已經沒有正式的 3 匹分體 (即 27500BTU 或以上), 而只有一些 21500 的, 沒有看錯, 是 21500, 即是只有 2 匹. 對於直身客飯廳加起來近 400多呎的地方, 用兩匹機無疑是想它 "死快o的". 不過負責人說這是他們可以做到最好的了, 因為根本沒有任何機可以用. 他們甚至說因為沒有機種, 所以寧可退回相關的保養費給我.

在「燢過火屎」的情況下再找相熟師傅叫救命 (仲要係上次打風前一星期, 熱到要命!); 他便教路說可以嘗試找負責人問另一隻牌子的機種, 因為原來 "開x" 和 "x芝" 香港機有些是共用的, 而維修也是同公司.

可惜負責人說共通零件不適用, 但折騰了半天後, 他們說可以有一部商業用的 25000 給我, 但只可當新機賣, 折扣了給我這 "舊客" 後是 9500 大洋.

以分體機的散熱來說, 這不算貴, 但我可是因為你們大寶號無貨才要買這機的. (不過倒過來看, 壞機要換, 要買新機, 也一樣是客戶付款的...) 相熟師傅教 "死螺".

結果是減了五百大元咁大把. 好過無. 為免老朽這死肥仔和女王這 "燥底人" 每天都成身大汗仲要又勞氣又無冷氣, 唯有乖乖畀錢.

外婆小心意

一般而言, 老人家都係特別鍚o的孫o既. 當然同時地, 好多孫都係特別 "黐" 老人家o既. 女王亦唔例外, 不過有時就太過誇張. 連外婆和麻麻自己都說, 不知畀了些甚麼女王食, 食到咁黐身...

當然, 仲有姑姐和姨媽啦...

呢個係一般的情況, 但如果女王在開始上學後變本加厲, 而且差不多完全唔鍾意佢自己媽媽 (即係夫人) 呢, 那就有問題了.

這一兩星期都是這樣. 只要見到我們的話就一定不會要媽媽. 有時甚至我不在, 都竟然會對著夫人哭叫要找爸B.

我知夫人有時和女王玩的時候的確係比較 "流灘" 左少少. 但總不成不喜歡媽媽吧? 有時候, 她自己哭鬧了好一會後, 自己都會知道自己錯, 但下次又一樣會繼續. 我知道, 夫人其實都幾傷心的. 試想一下, 一個只是兩歲的可愛孩子成日說唔要媽媽, 但同時還要照顧她, 一邊不斷聽著同樣的 "唔要你呀! 我要愛爸B" 之類. 心中, 真係會好難受的.

我不知有甚麼可以補償夫人, 但帶她離開點, 兩個人去拍拖的話就會更加少機會接觸個女, 又係一個惡性循環. 大概現在可以做到的就是忍忍忍... 因為多數小孩在上學完全適應後都會回復 "正常" 的.

說回婆婆, 她和麻麻的做法又不同. 麻麻提供的是地方和時間 (因為我老家地方較大, 可以多點地方放成間廚房咁多的玩具, 而且婆婆雖然住得近, 但時常要去應接我那位比較多要求的外父大人 所以要走來走去), 不過像一些早一輩的老人家一樣, 她有一對 "不太巧" 的巧手 (講巧手我父親大人勁o的, 一個人一晚可以用硬卡紙變一座「巴比倫空中花園」出來做展覽用, 不過遲些有機會才說), 但心意不減. 今年中秋除用了一些印有 bear bear 的雜誌做了一個小燈籠外, 還做了幾支 paddington bear 的魔術捧, 用來 "tum" 女王食飯飲奶的...



雖然 "土炮" 一點, 但係好 cute, 配合我o既演技下, 有時都幾好. (不過今朝唔得喇. 女王唔肯自己坐, 因為婆婆有時見女王扭計, (竟然) 會抱著她飲奶的, 這個我不能妥協, 但其他方法都不行, 還故意拎住杯 "chok" 瀉了小半杯奶, 真係火都o黎埋... 但這時哭著的女王依然要我唔要媽咪, 一來搞到夫人又唔多 happy, 二來更累我今朝開會遲到! - 係呀, 我星期六都要返工o架...)

金不換豬肉卷 & 怪味汁燒豬頸肉

星期六日煮的東西, 有時都要做些方便快捷的出來, 總不成次次都搞成個幾鐘無飯開嘛.

和做玻璃蝦球的同日就弄了另一款菜. 不就是有些金不換葉 (的確是用了泰國來的) 嗎? 之前試過用來做豬頸肉的, 不過今次那條頸肉另有用途, 所以就用來加入已輕輕煎至半熟的豬肉火鍋薄片 (當然是已經用普通方法醃好才煎的, 記得煎好後放涼才卷), 再用網皮卷起來 (網皮因為都放了一段時間, 所以也要噴上水花至真係腍軟才用), 稍稍泡一泡油, 便成了一道在處署之時的開胃菜式.



至於那條頸肉, 我都不記得用了甚麼了, 只大約是一些柱侯醬, 一些海鮮醬, 又加些三溫糖, 少少紹酒和麻油的, 醃了大半天後就原條放入 170c 的焗爐, 大約廿分鐘後再開大火燒焦少少面頂, 已經食得了.



女王一試了一點網皮, 即刻大叫道「嘩! 好味呀~!」之後又自動食飯, 不過不斷咁叫我同夫人加o的 "脆脆豬肉卷" 畀佢, 要剪成合她的小口都剪到手軟!

今年月餅

和去年一樣, 老朽喜歡四圍找月餅, 之後將吃過好吃的和人分享.

今年可有點失望.

卓越的旦黃金腿依然卓越, 好鬆化, 不過中心的蛋黃油水稍減. 而今年吃的蘇式月餅就選了九龍城新三陽的. 頗有驚喜, 因為今年他們的酥皮做得很薄, 真的很 "酥". 而且鮮肉餡真的按傳統 - 肥肉切幼粒, 瘦肉剁成糜才造餅. 而金腿月的鮮腿就稍稍無咁香, 但酥皮就更酥化.

有點可惜這是我今年吃過最 "似樣" 的月餅, 不論是哪個地方出品的.

自己一向不吃奶黃或者冰皮月餅, 喜歡的是傳統的廣式, 潮式 (圈圈酥皮, 炸皮或者白糖酥皮), 台式 (綠豆椪暗酥皮), 當然有上面說的上海蘇式月餅.

但今年的廣東月餅卻令人十分失望.

在百貨公司試食過一些剛開了不久的, 不是蓮蓉太淡 (扮健康) 就是蛋黃油不夠.

跑了去由阿爺做月餅會那代開始幫襯的蓮香, 今年卻是最不濟, 蓮蓉不同香 (名不符實), 蛋又無油; 真懷疑他們是不是早幾個月要入貨訂料時掛住打他們的家族官司所以無理會入貨.

有人吃過黃雙如的出品說好, 不過未有機會試 (雖然她的店很近我公司), 又有一些團體送了個 citysuper 果籃給我, 今年他們自行出月餅, 還過得去, 白蓮香不太差 (卻只是不太差) 油水也有. 不過開第二個時蛋黃就差了點. 虧我還將他入選入年的嚴選月餅之內, 送了給兩位朋友, 有點罪過, 不知他們的餅開了後怎樣?

有友人說今年竟是美心和奇華的好. 不過又更為 "竟然" 的是暫時都未有機會試. 往年公司是每人一盒奇華的, 因為以前的大大老闆是奇華有關的人士, 今年可好了, 發的是現金五百大洋. 不過就沒機會吃奇華了. :P

潮式的去年選了上環皇后街熟食中心的曾記, 他們焗的酥皮美得要命, 今年雖然都十分似樣, 不過吃下去時似乎用油少了. 但他們的焗酥皮比龍城老店貴嶼和記隆也佳. 不過就只有貴嶼和記隆有出蛋黃芋泥. 而且也只有貴嶼和記隆有炸皮和白皮.

潮式餡料方面曾記就跌了 watt, 烏豆綠豆還可接受, 芋泥就欠香, 貴嶼和記隆的芋泥不錯, 很有芋香; 不過綠豆就十分不濟.

食來食去, 今年似乎... 剩係食上海月餅好了... 唉...! (不過為了試食, 屋企成堆餅呢!)

玻璃蝦球

早前看電視, 見到有大廚炮制 "玉簪蝦球", 想起很久之前在上環「桃花源」吃過的玻璃蝦球, 當時吃下就覺得不甚了了, 到後來才知道, 要將大明蝦弄到變雪白玻璃, 係要極大工夫的.

首先, 買了巨蝦 (大虎蝦或者大明蝦, citysuper 平均 40-50 大洋一隻!) 回來後, 如係生的話要雪暈; 已凍/chilled 的就先去頭去殼去腸, 之後盡量快手快刀地用菜刀/片刀將所有蝦身灰綠色表皮褪去. 尾部都會修去 (因為尾部有灰綠色外皮) 原因是這些皮就是熟蝦紅色的來源, 玻璃蝦要白色的話就要去盡這些皮. 問題是, 原來, 真係好鬼難o既... 黐到實一實, 又要片又要用o的力咁. 搞了十分八分鐘才舞完一隻巨蝦.

之後就要用頗大量的蛋白和一般的味料去醃一晚. 醃好後用大滾水出水四分鐘至大半熟. 同時呢, 燒一鍋滾油, 出水後就即時泡十多廿秒油, 作用是收緊出水時可能鬆散的蝦肉結構, 以防變得霉爛. 留極之小心的是, 因為一出完水就走油, 所以一定彈油彈到飛起, 新手入廚者要有心理準備.

製成品:



要檢討的是我出水長時間了一點, 可以三分鐘即起; 另外又走油太久, 以為蝦隻太大, 泡了半分鐘, 所以外面稍稍硬了, 與桃花源相比, 外觀差了一大截, 下次一定要小心控制時間. 另外就是出水時可以用隻大匙將蝦放入, 可以保留多點蛋白做裙邊, 看起來鬆緊有緻, 會較美觀. 而且 "界花" 時可以多點下刀, 上碟前吊一下雞湯雞油就會靚o的添.

剩下的蝦頭當然不會浪費, 畢竟是巨大的虎蝦, 蝦頭有極多膏. 最好就是加點味椒鹽上粉, 慢火炸了來吃.



用了不少蛋白, 剩下的小小蛋白和那幾隻蛋黃點算? 因為另外做了一道金不換豬肉卷, 有些金不換葉剩下來, 不就是加點魚露炒個金不換蛋囉!

女王學校生活 - 私人紀錄

這篇不算真的是公開 blog, 只是我個人寫來留個紀錄而已. 不過又無所謂和大家分享一下咁解...

上星期二 (14日) 下午國子監七品博士王老師 (即係班主任) 六百里加急來電, 謂女王昨日於學校時因唇焦舌燥, 用小手指去「搣」上唇, 被發現時已 "搣" 了好一會. 而且告訴老師痛痛. 故老師致電通知希望我們為她剪去多餘的外皮和塗些潤唇膏.

但其實我覺得老師真正想說的是另一件事: 日前 (13日) 女王在校為想快點取得老師派的立體心型貼紙, 以超速由地墊起來, 之後... 左腳踢右腳, 跌低!

右膝蓋係瘀o左o既, 女王無喊, 不過老師就睇佢係幾痛o既. 所以即時叫了太醫院駐國子監的外值吏目鄧姑娘替女王敷冰和塗上 "喜療妥", 稍事休息後女王都無咩事; 其實外婆當晚已經發現不過見無咩事就又擦點喜療妥算了. 我問老師, 女王跌倒時的神情時, 老師就說女王當時係好 "呆" 的. 之後我說了一句: 「咁似乎都跌得幾... "甘"喎!」

-- 其實那晚我都有問囡囡, 她說原來是不想出醜所以無喊, 是實上, 當時她是幾想哭的...

講完呢句, 老師登時畀唔到反應我, 因為對住老師, 其實... 總不成講好 "甘" o卦!? 但當時我的確想不起有任何字眼比個 "甘" 字更加貼切 ("甘" 比 "嚴重" 更貼切喎!) 所以最後老師都說...

「呀... 係呀...! 都幾 "甘" o架」 :D

既然老師打到來, 當下就問多句女王在校情況, 結果與我們估計差不多: 因為女王少和其他小朋友接觸, 所以比較黐老師, 尤其是這位王老師, 還有另一位 (我覺得幾靚女o架!) o既助教鄭老師 (「滅井」- miss cheng). 不過學習上就好 ok 囉. 而且在校有時都可以戒片 (排洗時間自行噓噓呢). 但成日就只和老師玩, 置其他同學「生死」於不顧. -.-

得意在呢幾天女王開始在家中叫其他小朋友的英文名, 不過呢... 叫到一舊舊, 唔係因為外婆八卦和其他家長等接放學時吹水, 真係唔知原來女王叫緊o既係其他同學o既名!

有點頭痕的是女王小病了兩星期, 成日流鼻水和有兩聲咳. 每星期進貢一次給首席醫官鄒醫生, 進到入面o的姑娘都認得我們, 連打電話聽聲都知. 剩係呢個多月已經墊支了一支 Nikkor 50mm f/1.4D 了, 好在夫人公司保險包了小朋友的八成, 唔係真係睇醫生睇到破產!

滿口法北滋味 - La Creperie

在香港談法國菜, 一般都指巴黎為主的中北部菜式, 和一些做得很精緻的菜色. 另一個極端, 就是指三文治形式的簡餐如法包或牛角包等.

但其實, 法北的 artichoke 和 crepe, 法東南的豬肉鍋 (cassoulet) , 南法的海龍皇湯 (bouillabaise) 都好有不同的鄉土氣息, 不過香港不容易可以吃到真正的法國地方菜, 無辦法, 始終地方不同. 正如外國吃中國的地方菜也甚有不足之處.

當年學法語到中級 (好似係 level 8 定係9) 時, 開始介紹不同法國地方的文化, 其中有一系列是介紹法北 bretagne / breton (英文係 brittany) 地區的, 當時見書中的法國佬吹著像風笛的 binou, 飲 cider 和食 crepe 煎餅不知幾開心. 有說英國 Great Britain 地理上就是由 Bretagne 分開漂出去而成的, 這點英國人或者未必一定同意, 不過 bretagne 有著一套介乎英法之間的文化和方言就是不爭的事實.

背景交代完. 早前聽過不少朋友都說灣仔近幾個月開了一間專食 crepe 的店子, 仲話好多法國佬去幫襯云云. 見上星期六放工後有時間, 便一支公走了去食個 lunch.

在皇后太道東的樓上店也不難找. 一入去見到那幾十人的店子都坐了半滿, 而且也有十多人左右是說著法語的. 心想都無死錯人了.

坐下後第一眼見到的是法北的藍白旗和藍白燈塔畫...



定一定神, 再望一下餐牌, 當中都有不少款式, 有海鮮的, 也有肉類的 crepe, 而肉類 crepe 多數都有芝士 (是 emmental).

見到老闆 yan, 便開他有甚麼介紹. 他第一時間就推介了一杯 Cider 先, 仲問我要飲 fort (strong) 定係 doux (柔和點, 甜些的). 日光日白都費事飲得太勁, 便點了一碗 (對, 法北人是用碗飲的) cider doux. 同時又點了一份黑麥的香腸 crepe (La Rennaise). 但自知對芝士有少少抗拒, 所以叫 yan 減了一點芝士.

好耐無用法文與人溝通, 聽到大半, 講就得一半, 但係講到的那 part 倒還算流利, 剩下的就英語搭夠. 不過呢... 唉, 當年從法協 diploma 畢業到教小朋友法文, 十多年後的今天, 竟然淪落到連食飯都不可以全部用法語, 真係哀哉!

請返食物, 上來時好似好大份, 而 cider 也極香甜. 不過查實摺埋來食, 份量一般 (收七十元好似貴了一點點), 但係條 toulouse 香腸就有極佳的食味, 而減了份量的芝士也恰到好處, 好快連埋沙律清了場.



之後 yan 問我要不要甜品, 我想也沒想就說 oui (yes), 還 order 了 le defi, 是用 caramel 焦糖雪糕再加焦糖淋上白 crepe 的. 這一款一到, 我即刻食食食, 配了杯咖啡, 好食到停唔到, 又係極快消滅.



不知其他食品有幾高 level, 不過呢度我一定一定再來, 因為真係好有那種 feel...

濟公假蒲團

是一個半偷師半創作的食譜.

食上海菜, 不少人都知道有一道名菜叫做 "麵筋塞肉" 的. 而江獻珠前輩亦有做過一道 "佛法蒲團", 是將素菜炒熟後釀進生根袋內煎香.

既是如此, 就索性將兩味合二為一, 變成了這個假蒲團.

才料是用了豬肉 (枚頭, 肥少少的, 剁碎, 可以的話唔好買絞碎的, 無咁好彈性), 一份左右, 另外素料方面也是加起來一份, 我用了本菰, 秀珍菰和甘荀, 都切到好碎.

起鑊分別將各料炒熟後再加在一起炒, 這時落蠔油糖芡, 目的是使這些餡料黐埋少少.

餡料炒熟後放涼少少, 同時將完整的生根剪一個長一吋左右的闊口, 之後出水兩次再沖熱水 (這是江前輩教法, 試過原來真係要出兩次才會真的軟身, 也要沖熱水才可以將最後的油跡洗去), 之後放到稍稍乾身.

釀入餡料後用濕生粉封口, 再兩面煎一會, 喜歡的話可以入少少汁料焗一陣 (我就是加了日本燒汁, 雞湯, 蠔油和糖調出來的甜醬, 做一個少少焦香的效果), 出奇的是生根 "返潮" 的機會細. 估不到可以將皮煎到香脆, 比想像中好, 卻又多肉了一點. 下次可以多菜少肉, 應該更好吃.

女王爛 gag 又一則...

在 facebook 發表了, 覺得真係幾得意所以都記下來...

真人真事來o架o下!!



一日...夫人教女王講英文.

夫人: 「呢隻係咩呀? 」 (指著隻大象圖畫)

女王: (懶叻樣)「大笨象!」

夫人:「o岩喇! 咁大笨象英文係咩呀?」 (滿心歡喜狀)

女王:「欸里墳 (elephan) !」 (笑住)

夫人:「係『欸里墳-t (輕聲 "遲" 音)』(elephant) 先o岩呀!」 (發音是準確的)

女王: 「哦! 『欸里墳-t』」 (準確, 抵讚!)

夫人: (極滿足樣, 心想可以逆向教授)「咁 elephant 中文係咩呢?」

女王: (充滿信心地)「『大笨象-t 』!」

姨仔結婚了... (揀誓詞)

太太的妹妹要結婚了, 一早準備是年尾的新娘子. 新郎「拔少」是她的舊同事, 高大威猛但好好人, 見過咁多次連女王都好喜歡他, 起碼他夠高抱起女王去拎放在櫃頂的玩具. 早排上我屋企睇完世界盃德國季軍戰仲幫我手將放在高處的花瓶放好. 我輩矮仔真的望塵莫及.

原本不會這麼早就寫出來, 因為我一來是為他們證婚, 二來也會幫他們拍些 snapshot 照, 諗住到時先寫, 但上星期他們來我 office 入擬結婚通知書時就發生了一件小插曲, 實在覺得應該記下來的. 因為, 真係, well, 容許我講, 有點好笑.

我身為教友, 而且又有不少基督教友人, 加埋證了這麼多次婚, 所以和不少新人們都有自訂一下他們會用的誓詞. 都會儲下好多不同版本的誓詞. 所以都會讓他們做個選擇.

因為上星期 "夠鐘" 為他們準備擬結婚通知書, 所以便請他們上來順便開會傾一下他們婚姻的流程等等. 又因為我有個 "特別的" 外父 (我外父咪係我姨仔的父親囉!!), 好多時會比較無啦啦地硬頸 (當年我有一段短時間, 差一點結不了婚就係因為佢同我老豆鬧交), 所以也要和這位未來襟弟早點研究一下, 以防萬一. (講返先, 好歹他都係我外父, 而且8成時間佢都係好好人的, 唔好畀我頭先一段嚇親)

傾流程倒還無咩特別, 因為他們已一早準備了一個好 prelim 的 rundown, 之後就會再加加減減. 而且因為姨仔當年就是有份幫我和夫人結婚時準備 rundown 的人, 所以對此道可說瞭如指掌.

到講到證婚一 part, 我便請他們揀誓詞. 像好多新人一樣, 他們左揀右揀, 呢款又靚o個款又浪漫的, 好半天都無頭緒. 姨仔說「拔少成日都想講好長o架, 但係我驚會講講o下喊喎」

呢個係好多新人的 concern.

其實當日真係喊又點呢o下? 因為認真, 因為愛, 因為發自內心, 才會對這一堆字有反應, 才會感動嘛!

不過姨仔比較誇張. 我們之後傾返當年外父帶我夫人慢慢步入教堂時, 行到一半他已經開始想喊, 而到祭台上後, 平日易哭的夫人竟然笑住捉住我隻手指指外父外母成家人, 話

「嘩睇o下, 佢地全部都喊緊呀」 (佢自己又笑喎! 真係... errrrr... 「無人性」)

講到呢度, 我姨仔又望o下o的誓詞...

突然間...

「死喇...我而家都想喊呀...」

o下唔係嘛...!?!?!? 我同拔少兩個都呆晒, 睇住佢對住一張又一張o既誓詞, 眼濕濕的, 開始拎紙巾出來抹抹抹...

呢個實在太爆, 我證o左咁多新人, 真係第一次揀誓詞揀到喊, 自己都覺得一定要記低...!

(蝦... 究竟佢係見到邊款誓詞 trigger 到佢喊得咁勁呢o下...)

初訪麥當勞 (女王初訪悅壽司的下集...)

正所謂好又食o下, 曳又食o下. 上次去完了「悅」食壽司, 今次去返間加o左價都未算好貴的餐廳, 麥當勞.

而且, 在我們心目中, 老麥的食物只係一般, 而且形象始終不太健康. 不過對孩子來說, 他們是有絕對的吸引力的.

話說女王之前睇電視, 見過有老麥廣告, 是「開心樂園餐」的; 成日唱著 "Happy Meal" 的. 連女王都成日唱, 而且返學時多次經過一間老麥, 已經認得那 "M" 宇餐廳, 仲話要拎件玩具回家.

講得多都要應承一次先得嘛. 所以上星期六晚就帶了女王走一轉, 而且真的要了個開心樂園餐. 是芝士漢堡, 細薯條和一包 QOO 豆奶, 另加一盒粟米大家 share - 雖然粟米是主糧不是菜蔬, 但間中吃一兩次當菜也不嘗不可的. 至於薯條就只是給她吃數條, 其他的當然是入了我和夫人的口了.

QOO 豆奶是 "新嘗試", 因為女王之前在學校是不肯飲豆奶的. (按老師向那天接放學的外婆表示).

可能真係麥當當的魅力沒法擋, 女王知道去麥記是已經跳跳扎扎, 到達時直頭想奔向那座位, 到買了東西回來時就笑到見牙唔見眼, 或者, 她覺得終於可以和我們一樣拿著大個包吃吃吃了.

結果她真的吃了大半個芝士漢堡, 三至四湯匙份量的粟米和數條薯條, 外加整盒 qoo 豆奶呀o下... 這個食量, 可說是空前的 (但一定不會是絕後!), 而且一邊食一邊笑得好好開心. 仲話... 「嘩! 你買漢堡包我食呀? 同埋, 你買粟米畀我呀? 你又買薯條我食呀? 你又買玩具我玩呀? 嘩! 小飛飛呀! 仲有麥當勞豆奶, 我好開心啊!!」

聽到我地勁笑, 不過背後, 我還有一點點的感動呢...



而那天, 也是我 "試鏡" 的日子, 因為剛買了 nikon 的人像鏡 85mm f/1.4D; 沒錯是就來出新的 G 鏡, 但看了外國的 preview 後我覺得 D 鏡已經好夠我用, 豈料一買之後, 屋企的冷氣又再壞過, 而且斷定是死症要換機!! 這是後話, 下篇才再說了, 唉...!

初訪悅壽司

和基哥相識近十年, 由完全唔認識開始食到變成朋友, 由在他師父老店 "順" 到現在自立的 "悅"; 由他單身寡仔到今日娶了個像極日本娃娃的美人, 我當然也由小肥仔變了個已有個校花太太 (係呀, 我晒命o架! wakaka) 有女王的死肥佬. 既然女王開始食街外的食物, 那當然一定要帶她探一下 uncle 啦.

要探 uncle 都要準備銀彈的, 所以就趁夫人去了和友人吃飯, 帶了女王去找基哥.

由我致電給基哥說我帶女王去, 他們整間店都已經十分雀躍 (使唔使呀...). 又準備特別的凳子給女王可以坐壽司吧 (原來係成套o架 有一張訂製的 bb 椅), 又問有咩食得之類. 搞到我都唔好意思.

既然食好野, 幫女王著得 sexy 一點, 就著雞翼袖背心啦! 哈哈, 肯定靚絕全場呀!

女王甫坐下就見到前面有一支支她一向喜歡的粟米, 即刻大叫「呀!粟米呀!」; 哼, 佢就識食呀, 這個咪係可以生食的北海道未來粟米囉! 但我又怕女王生吃粟米始終有點 "un" 胃, 所以就將個 order 分開半份生吃半份燒. 基哥的助手見到女王想吃, 便主動用刀將粟米切出了粒粒給她.



女王呢期不吃青菜但吃蘿蔔, 所以又請基哥著廚部用麵豉湯底煮了些紅白蘿蔔出來; 那他們的蘿蔔應該是日本來的, 比我煮的更清甜, 女王不斷的吃.

來到壽司了. 女王吃的先是甜蛋. 雖然有半件蛋是我吃掉, 不過她可能覺得蛋好甜所以食食o下直頭問我「你做咩食我o的蛋呀~?」

又叫了件燒海鰻 (anago) 壽司, 因為雖然有細骨但都是吃得下的 (我當然另外有揀了純魚肉那邊啦!); 不過怕燒汁太濃, 叫他們下少了一半, 不過依然相當香. 女王又幹掉了大半件.

至於我就梗係食返夏末初秋的生秋刀啦! 今天原本還有九州和本州交界來的關鯖 (是將太的壽司中提過的沒錯), 早兩年食過, 它的魚味較其他鯖魚淡身但均勻, 而且肉地彈牙豐滿; 不過今天日間時已經賣完了, 可惜我是臨時打去找基哥的, 早一點的話就可以留到了.

我當然仲有其他 "大路" 的壽司啦. 而女王食完呢兩件壽司後, 基哥就好開心咁出來話要同佢影相喇. 仲專登做了一件細工壽司, 是一件小型版的燒三文魚壽司 (全熟型), 又弄了一件大件版的給我, 兩件拍埋影了相...



點知女王食埋都係話唔夠, 又叫了一碗牛肉烏冬和她 share, 食了不少 (三分一碗), 仲要整多件蟹柳壽司 (即係食了差不多三件, 大半碗飯了!)

呢個時候師傅仔取出了一條壽司紫菜, 女王一見到就唔知點解話知道係紫菜, 師傅一畀佢就即刻笑晒拎住吃埋...

最後唔少o既就係同我 share 了唔用錢的豆腐雪糕, 原來基哥說送多一球給女王, 不過女王真的不可以那麼放肆, 所以只要了一球.

吃到飽飽的便回家, 女王仲即刻去了廁所 "清倉", 好不 "暢快"!

不過... 唉, 咪係著得太 sexy 累事囉... 我無一直觀察她的體溫, 原來已經畀冷氣吹親了; 之後一天, 就係去文武廟那天, 女王發燒了... ><"

開筆大典

女王上兩星期開學, 原本是之前按傳統俗例往文武廟「開筆」和在家中開筆寫字及「祭孔」的。不過因為爺爺之前入了醫院, 所以推遲了.

老朽是主內兄弟沒錯, 不過對於傳統, 我是十分恪守的. 我不信孔子, 張育和關二哥幾位變成了神, 卻覺得是值得尊崇的人物. 而且家父也認為, 「開筆」對於小孩有一定的 "定性" 作用. 所以我們都一致覺得要為女王舉行這個儀式. 上香這些就留給家父處理啦.

女王去到文武廟, 當然就不知何謂「開筆」, 只見到有好多不同的哥哥姐姐都在 (都有成廿幾位小朋友在 "開筆" 或拜文武二帝), 而爺爺就取出了三本傳統的 "紅皮書" - 《三字經》《千字文》和《啟蒙詩》

前二者大家可能都有點印象, 後者就未必聽過了. 不過講一句大家就會知道原來係呢o的詩...

「天子重賢豪, 文章教爾曹; 萬般皆下品, 唯有讀書高」

呢首就係第一首, 仲有好多例如宋真宗o既《勸學文》「安居不用架高堂, 書中自有黃金屋; 娶妻莫恨無良媒, 書中自有顏如玉...」, 雖然功利o左o的, 但係都無講錯喎!

講返那日. 成村人去到文武廟, 因為天氣實在熱, 所以都係快快手手, 等家父和女王拜拜幾下, 上了炷香後, 就由夫人抱著女王去 "掂" 那文昌筆頭和大關刀柄, 寓意文武全材; 之後又去敲鐘打鼓的 (鐘鼓齊鳴, 是告知廟內神明說是來過拜拜了),女王有得玩都不知幾高興.



反而, 老朽這時正如每次經過文武廟一樣, 都會走去包公壇前, 恭恭敬敬的叩首; 始終, 他是中國傳統法法與人治的典範, 作為律師, 能在工作時效法他的話, 就可以公平公正地解決案件了.

回到父母家中, 就是另一 part 儀式 - 拜聖人 (孔子), 只是簡單地朝當天拜幾下, 由爺爺讀一篇他不知從何得知的短祭文後, 便取出一早準備好的文房四寶, 由爺爺執著女弄的小手寫起了「上大人 孔乙己」來 (女王寫得好開心喎!), 再教她讀一遍《三字經》開首幾句 (因為女王唔肯再讀埋《千字文》和《啟蒙詩》, 大佬, 都好悶o架嘛!) 便算開筆禮成, 準備吃飯去也!

柳丁桂花糕

話說女王開學頭一星期後已經無點喊 (係要返到學校一刻喊兩句), 而之後到兩星期後的今天已經完全無喊 (按保姆的證供啦o下...) 當然還未知道原來她變了在早上變得極之黐身, 所以應承了她弄個橙味果凍她吃.

雖然女王都有吃過外面買到的日本 jelly, 但自己整就多點心思, 於是就決定加入桂花糖, 弄個「柳丁桂花糕」出來.

因為想出來效果似糕多過o者喱, 不想太韌, 所以用的是日本寒天粉 (有點像大菜糕的); 但又不想一咬即斷, 所以又加入了葛粉 (kudzu 粉) 加一點點韌度.

用料是四個紅肉橙 (超市有售, 16 元 5 個不貴, 而且比較甜, 弄起甜品來有色水又不用像血橙一樣貴嘛), 開半起肉 (留橙皮兜作模) 後都榨了汁, 加入幾湯匙的三溫糖和一兩湯匙桂花糖, 煮至糖溶便加入 10 gram 的寒天粉, 葛粉用了 4-6 gram 左右, 先開一匙水 (少少夠) 再加入仲熱的 mixture, 一邊加一邊搞勻; 到放涼後便可倒回橙皮兜內.

初時用的寒天粉不夠, 放了幾小時還無反應所以再 "回煲" 加了點; 不過這次火比較弱因為唔想煮到所有維他命無晒, 熱熱地加入寒天粉就算了; 這次就好快已經結了成糕.



橙味極濃而且天然, 效果比預計中好得多, 桂花味不夠勁, 下次可以加多點; 不過... 唉, 女王在第二天就開始發燒, 病了幾天, 所以最後係我和夫人食晒的, 女王無得食...

北海道醃鯖魚

一向愛吃些酸酸的東西. 這個大約是承自家父, 反而我媽媽不愛酸味, 連生我的時候也沒怎吃薑醋.

在日本料理中, 有一道是用米醋生醃魚的菜式, 多數是用鯖魚或小肌 (kohada) 來做的; 做法和南美的 ceviche 有點異曲同工之妙. 鯖魚叫做 saba, 醃好後就叫作 Shime Saba (しめさば). 有時加入了一些其他佐料就會成為小吃.

早前 (其實都差不多成個月前...) 崇光辦了個北海道食品節, 給我找到了一款, 是加入了藪之子 (kazu no ko, 即飛魚子), 醃酸薑和山菜 (不是生菜哦!) 的. 好吃得很. 好可惜呢樣東東不是整年有售, 可遇不可求.

買了二百 gram, 之後跑了去調了來銅鑼灣 sogo 的 V 記朱古力檔 alice 姐, 請了她食一小件, 換來了三顆新上市 V 記的試食, 一比之下, 抵返晒!!

扭計

女王開學一星期後, 開始轉為兩個鐘一天. 到後日 9 月呢就會轉為 3 小時.

不知道其他同期的家長會不會遇到同一個問題, 就是新生因為缺乏安全感, 又或者一些不知名原因, 會變得十分之依賴屋企人和黐身.

不要跟我說 "有得黐好黐喇, 日後你想佢黐你都難" 之類. 我們要她上學就是因為想她成長, 而這個是成長的必經階段. 我都知道日後要她主動抱我都難, 但現在, 我真的希望可以安安樂樂的睡一覺.

昨晚和今早, 女王都不斷地要人抱, 甚至尿尿了在床上 (已經著了片, 都唔知佢點解可以咁勁咁都玩到我們!); 老實說, 火都o黎埋, 但係心知她只是想賴著我們. 已經完全沒有火氣, 只是不斷地說著道理, 告訴她我們不會不理她, 又問是不是因為怕上學後父母會見不到而這樣; 但女王只不斷地重覆說要抱抱.

最後, 只有抱她一會, 說 "只是一下咋" 她才會收聲, 但可能三幾小時後又會 o黎料. 有時狠心不理, 換來的就是哭個死去活來口水鼻涕成面都係, 到時要收拾仲慘!

工人保姆就用了個 "八卦" 的說法, 說是可能因為上學時見到其他同學的媽媽大肚, 有 "衝撞" 喎! 雖然我不相信這回 "衝撞" 的事, 不過保姆說煲些中醫生可以 "安神定驚" 的湯水, 這個既是湯水我又不介意哦.

希望呢個情況只係三幾天啦... 唉... 昨晚畀佢咁搞幾次, 大家都無得安寧. 整天都是 zzz... 好在唔使上庭, 唔係的話等畀官炳都得喇!

黑色的一天

昨日至今朝, 全香港99.99% 的人, 同聲一哭.

已有不少 bloggers 都講過, 昨天早上我也是 12 點 15 分左右就已由 facebook 收到有關的新聞. 初時見到又放人又輕鬆的, 心想一個半天都會完滿解決. 就算下午槍手提出了時限也是, 因為大家都覺得, 槍手算有人性.

反而老朽和一些對軍事有點興趣的人一早已經發現幾個小問題.

一直在看直播, 卻從不見到有官員和槍手對話, 也沒有提過有電話聯絡. 這後來得到菲律賓總統的證實, 他也支持無需要由高級官員對話.

另外, 槍手初時幾次露面時 (到下午也是) 完全沒有防範, 也沒有避彈衣和人盾. 當時新聞就當局已有神槍手 (sniper) 部署好, 為何不可以一槍了結了他?

不談又不打, 不是意志消磨戰, 而是增加槍手的怨氣. 一個人發脾氣, 最忌不是有人和你鬧交, 而係無人理. 只靠他那也是當差的弟弟, 而後來甚至拘捕了他, 指他是同謀之類的. 又再加上當地申訴專員當晚就寫了一封函件拒絕他就自己被撤職的申訴. 這些全都是致命地使槍手覺得自己陷於絕境的低招.

使人陷入絕境有兩個結局, 一就是投降, 而正常來說這也算是合理評估, 但一定要有高官前來作為開導. 因為不論人有多硬撐, 在絕境時見到有 way out (例如投降) 就會心動.

不過這個槍手, 根本不適用於此例, 因為他是 "傻傻地" 的. 從何得知? 其實他早上無啦啦放人, 但放人是無 "章法" 的. 而且身為警察, 作出 "復職" 要求根本又是不可能的. 如果他說要錢放人倒還說得過去. 但他這樣的要求, 一早已經可以被界定為精神有問題的. 不可以用常理去推測.

營救方面又是敗筆, 等到夜晚行動的確是不少特種部隊的戰術, 尤其是當目標巴士位處空曠位置時. 但是進入車箱實在太太太慢, 可能又導致人質受傷, 他們進入車箱時, 也可能受到逃出的司機誤導, 以為人質已被殺, 所以沒有小心進入. 如果屬實, 這在軍警行動中可說是極嚴重的失誤.

最新的新聞 (24/8 下午) 又說有傷者頭部可能是受重物 (警方鐵鎚?) 撞擊, 更有可能有死者是由警方發射的子彈致命的.

一切一切, 都是流傳, 唯一可以知的是, 起碼有六個家庭, 家破人亡. 還有那人人讚好的導遊, 也不過是三十歲出頭. 可惜他們不能像廿年前的電影 "安樂戰場" 一樣, 反攻槍手, 不然, 大概結果會有點不同...

夜晚見到菲國總統見記者, 雖然他是個親民總統, 整天掛著笑容; 但衰就衰在他連這些正事他一樣是嬉皮笑臉的. 大概, 他可能覺得, 這在他們國度, 「日日都係咁發生o架啦!」仲要卸責話傳媒太廣泛報導有份致害, 更引用俄羅斯的劇院事件 (那也是個極失敗的救援例子). 作為總統, 實在不是說這些話的人吧?!?!

但話得說回來, 香港人, 難得的團結, 而特首也可以說是少見的做得好和快. (可能是因為菲律賓總統唔覆佢電話搞到佢好燢, 同香港人一樣同仇敵愾)

希望的是, 一班團友回港後, 可以團結一起, 大家共渡難關. 這個是死別的關口, 是特別難過的.

希望的是, 香港人不要遷怒在港的菲律賓人, 他們比我們更難受, 起碼, 我們唔使每天都對住呢班廢官和廢柴.

希望的是, 香港人在哀痛之後可以正面正視, 第一件事, 就是珍惜眼前人. (次次有人有事都咁講o架喇... 有幾多人真係聽得入耳呢又...)


Rest In Peace...

女王開學了...

前文大略: 女王之前獲加銜「維多利亞女王」. 於8月11日親訪學校開學也.

而家o的學校一開學時只會返一小時, 由家長陪同以便適應; 之後時間才會慢慢加長, 其實, 有點呃錢之嫌. 不過作為家長又不敢不陪太子讀書, 當然也包括老朽.

一開始, 可能因為女王一向無玩開 playgroup, 所以雖然成日同其他小朋友打招呼, 不過講到一起玩就要我們提才懂. 不過和 interview 一樣, 好在同人都有溝通. 反而係有點怕老師們, 尤其係外藉老師, 一講故仔, 聽唔明之餘就一定要走埋我身旁. 而玩其他遊戲時都不太投入, 成日好在顧忌的望我在何方, 遠少少都會走埋來的. 係要黐住.

五天的 "一小時陪伴", 我陪了兩天, 太太一天, 外婆一天, 祖母又一天, 因為他們都是會有接放學的人, 而大家都想看看女王點返學, 所以大家基本上係爭住來的.

不得不佩服老師們, 畀著我對住班唔識又無咩眼神仲會係咁喊的小魔怪, 我真係無咁好心機 (對住個女例外). 她們就極有耐性, 而且仲用一些容易上口的兒歌使學生慢慢適應 (例如「吹呀吹呀吹個大波波」又或者 每當一齊行時就唱「有一架巴士在馬路上走, 砵!砵!砵!砵!走過來; 有一架巴士在馬路上走, 喂喂我要上車喇!」, 要坐低時就唱 "Everybody Sit Down Sit Down Sit Down Sit Down, Everybody Sit Down just like me" 之類啦) 連我們聽幾次都已經記得, 女王回家後也有唱呢!

五天的最後一天是由祖母陪的, 似乎不太樂觀, 因為女王根本不想離開她. 而且開始勁喊, 唔肯自己玩.

好了, 過了五天之後, 就 "加鐘", 是每天兩小時的, 而且開始要 "同校分離", 老朽就負責第一天的同校分離, 送了到班房門口 (而家又話入班房要換鞋玩衛生嘛) 後就走, 但我又唔知, 仲留o係度一陣, 畀女王見到我, 當時有一位老師抱著但開始喊 lu, 不過我叫她說 "爸B要去買 jelly 你食喎!" 佢雖然仲係喊緊但係已經無咁犀利.

赫然見到她的班房內有好多紙巾在地上, 又見有支消毒藥水, 其後班中的嬸嬸卿姐就全副武裝的; 心想一定是有位同學喊到嘔, 所以老師就帶了其他同學 (包括女王) 出去操場玩.

既然留在校內都無咩用, 我便索性真係去了買東西飲, 之後才施施然回學校, 夠鐘接女王時, 忍不住問班主任一句「佢o既喊包指數係...」

班主任回頭問負責帶女王的肋教老師「佢點呀?」

「佢之後無喊過喇喎!」

「唔係嘩...! 咁勁?」 (我知對住老師實在唔應該咁講野, 但係當時我的反應的確如此)

「係呀!好叻呀佢!」

咁我都信老師唔會講大話o既. 當下就讚女王 "Good Girl!" 同埋話返屋企整好味o既 jelly 給她吃.



不過接回家交給保姆後我再回公司, 太忙了, 當晚回家整唔切 (呢樣野夫人唔整, 只會食我整o既... @@") , 唯有用之前買到的大杯日本 jelly 頂住先.

希望之後女王都一樣咁 ok 啦! 當然, 心中無啦啦又間中會有一點點不捨得她長大的感覺...

雞油菌上湯焗斑球 & 大根昆布出煮

前兩天星期日晚上不知煮些甚麼才好, 又因為知道女王平時和其他小朋友一樣是不喜歡吃菜, 甚至會吐出來的 (lur 咪 lur 囉, 使擇日呀... 唉...!) , 不過她較喜歡吃些有味的蘿蔔, 之前有一陣子愛吃冬瓜和節瓜的不過現在又不喜歡了... 因為星期六日是我們親自餵食的, 而女王又好衰地, 平日由保姆/祖母或外婆餵食就會好快食完 (30至45分鐘內); 但要是我和夫人呢 就會 "恰" 我們了. 食到想訓都未吃完. 所以也要想些法子出來, 又或者搞些好味道出來.

女王這兩個月基本上就算出街食飯也和我們吃同一樣的街外食物了. 在家就也和我們吃一樣的飯菜, 只是飯會稍稍軟身. (連帶我都要食軟飯, 真慘)

今次又係東星斑柳, 不過起了球, 下了點味和蛋白醃了半天後先泡嫩油 (所謂七八成油), 其實那油不是很多, 就是泡一會又炒一會的, 因為不想浪費油嘛. 反正不需要弄到全熟.

原本想用些新鮮的雞酒菌的, 不過買不到, 只有乾的; 嘩! 原來多沙到死. 已經好努力地浸一回再洗一次, 之後再浸再洗了五六回, 用的水多到沖涼都夠了. 再浸大半小時. (點知最後都仲食到有少少沙!!!) 以薑蒜起鑊後爆香雞油菌, 到爆到o的菌熟之後再將魚球回鑊, 這時炒一會後便下點雞湯, 上蓋焗兩三分鐘, 讓湯味滲入魚中. 之後開蓋, 煮一陣收乾少少, 再埋個薄芡便成了.

因為魚和雞油菌一起焗過, 會有一陣特別的香氣. 這種香氣新鮮菌和乾菌用起來是各有不同的. 不過吃起來用新鮮的話多點東西吃, 比較清新, 乾菌始終會咬口多點.



至於另一道菜, "出煮" 日文是 "出し煮" 就是用木魚或麵豉湯底 (出し - dashi) 去煮一味菜, 加入昆布就是 "昆布出煮" 了. 因為想女王吃多點纖維, 唯有想些將蘿蔔入味 (仲要去腥) 的方法. 直頭似係煲湯咁款呀... 食落比較清淡, 但試過後發現可以放涼後作為前菜也相當不錯. 蘿蔔可以切條或切件都得. 而在湯底加入日本醬油和糖 (橫豎屋企有, 就用了三溫糖) 可以提升味道無咁悶.



女王吃下兩味後竟然覺得甚佳, 都肯在四十五分鐘內食晒o的飯 (好勁o架喇!!), 算今次我們兩公婆執到, 得一晚安寧了!

夫人牛一

一年一度, 屬獅子座的夫人牛一. 除了和兩邊家人食飯外 (分別去了小南國和百樂潮州), 當然要有些搞作.

因為美食太多, 相也多, 所以不勁加 comment 了. 希望自己都留個紀錄.

夫人一向都鍾意食日式的紅豆燒餅, 有時都畀我話佢係 "叮噹"... 早前書展見到有介紹和果子的書, 不過細細妹說她有辦法幫我找到食譜, 所以最後無買, 而結果呢...

登登登登! 呢個就係由搓粉到煮紅豆 (北海道十勝o既大納言豆來的!) 都係自家製o既...



銅鑼燒!! 雖然樣唔夠出面看頭. 但係用了三溫糖和大納言豆的出品味道絕對贏晒出面買到的!

謝謝細細妹, 去年夫人牛一, 我的自家製 marcaroon 也是在你協助下完成的, 真係好感激你哦!

和夫人一起都已十幾年, 老夫老妻, 有時都無話咩禮物唔禮物了; 反而是她在生了女王之後手指粗了戴不下當時的求婚戒指, 為使她在年尾姨仔結婚時可以戴返隻好o野 (都...ok 大 & 好火o既... ^^) 見人, 所以去了旺角某大店再鑲嵌過, 也叫她隨便揀其他款式的細石來重鑲, 那店子是之前老朽協助過的一單官司的答辯人之一, 和他們熟了所以找他們博有折扣. 豈料太太揀極唔o岩款, 最後只係改了 size, 只需幾百元; 店長更為我簽了單, 最後呢那幾百都慳返... @@" (不過夫人保留了遲o的揀o岩再鑲過的權利...)

夫人又喜歡吃些兒時見過, 現在失蹤的小吃, 今年畀我搵到兩樣, 一是 tang 橙粉, 二就是珍珍的一隻花生夾心餅 (喂真係幾好食o架!). 兩隻現在都轉了是攻南亞市場, 竟然畀我在一間菲律賓店中找到. 在成間都係菲菲印印的地方買小吃, 感覺好「異鄉」 - 係我好似外地人咁!



來到正日, 中午和女王&夫人食中環 ifc 的 union bar; 下午就跑了去 cova 食件餅; dinner 一餐就請了老媽媽幫手照顧女王, 我們就去了拍拖, 今年地點是想去了兩年都沒有去的 - Joel Robuchon.

一早已聞三星大廚松哥之名, 香港的 "分陀" 去年也獲得兩星, 今年既然有緣碰上夫人生日是星期六日時間, 便去了一試.

作為 "後現代法菜" 掌門人 (現代法菜的教父則可算是 Paul Bocuse 和 Pierre Gagnaire), Robuchon 真的不是浪得虛名. 當晚我試了他們今年的 tasting menu; 太太就點了一道龍蝦頭盤, 青豆湯和慢烤 john dory, 大家都 share 來吃.

首先是每週不同的開胃菜, 是用鵝肝打成茸, top up beet root 的湯水, 吃出了和其他地方的分別; 但未去到一試已經覺得極品的味道



這時我點了杯 Riesling Kabinett 白酒, 少少偏甜正好配上是日的菜式, 因為眼見餐單上多是較為 "海鮮類" 和清清地的, 點白酒比紅酒更佳, 而夫人一向不愛酒, 點款甜些的她也會接受.

之後是他們的名菜 Bolero, 就是那名曲的名字 - 解作圓環和迴旋. 靚女 waiter 解釋原因是這道 blue lobster 龍蝦菜式除蝦鉗外所有東西都切成圓形, 包括下面的醬汁和伴碟的菜餚 (她詳細講了是甚麼醬汁但一時忘了). 食到這個菜, 入口時有些觸電的感覺, 因為比之前在 petrus 食過的極品龍蝦鉗味道有過之而無不及, 縱然質感比起 petrus 的清湯煮稍稍差那一點.



同時間為我上的是 La Crabe, 就是蟹肉和龍蝦 jelly 配上 leek 打成的 creme/cream




之後的是他們另一道鎮山菜式 - 酥炸薯絲溫泉蛋配 oscietra 魚子 (俄羅斯五十年鱘) 加三文魚, 一吃的時候又係一個好美妙的 touching, 夫人當下便問道: 這菜式所有東西都是早餐入面可以找到的, robuchon 是不是在食早餐時想出這菜式? 當然, 得到的答案係 "唔知喎又..." but 我好欣賞夫人這想法, 因為, 真係幾似...



再來是另一道存在 menu 中很久的菜式: La Tomate, 這菜分兩部分, 一是用蕃茄加 basil 烤成, 另一半就是蕃茄清湯 jelly 伴了一點一點的 mozarella cheese cream. 蕃茄, basil 和 mozarella, 不就是傳統的意大利沙律嗎? 但他們的 presentation 和比例, 吃下去完全是另一世界, 那清湯 jelly 是熬煮出來的, 吃得出那一點的 jelly 已經是十個八個蕃茄的精華, 是澎湃, 但不洶湧的蕃茄味.



之後是兩個湯, 甜粟米湯配鵝肝和青豆薄荷湯. 正好是用來讓吃到興起的我們稍稍停下的菜式, 上菜的次第就像《黃河協奏曲》第一 movement 中段一樣, 有一段用鋼琴慢慢地表達祥和的流水, 使人可以稍息.





之後便是魚肉的菜餚了. 先是日本脆鱗甘鯛配了柚子芫茜醬, 真係好脆o架o的鱗!



再來就是兩個大盤: 煎封 (seared) 鹿兒島牛; 和太太的 john dory 魚子黃酒汁.

牛是和牛沒錯, 但如我所料, 沒有即溶的脂肪, 因為我覺得這不會是 robuchon 的作風, 他用的不需要是 A5, 因為這會襯不起他的醬汁. 保留一點咬口嚼頭更加緊要, 這個我和他的想法一致 (妄想掹車邊了...)



魚是比我之前做的滑十倍, 無法呀, 靚女說他們的爐比我家的火力均勻得多, 慢火 slow cook 的去 grill. 這 inspire 了我下次的做法 - 切薄些再慢火欖油浸, 或者會好食o的. 夫人說那黃酒的提味功能極佳, 有酒味而無酒氣.



甜品是我的 discovery/tasting menu 的兩款, 一是 raspberry jelly 加西柚碎冰...



另一款就加了生日牌, 是鳳梨脆糖衣球裹著鳳梨雪糕配鮮椰子 sorbet, 整晚一個極圓滿的句號, 不過當時因為開始有 live 唱生日歌, 我又掛著安排他們不要這時才 "臨尾香" 而無影相, 失敗呀...

靚女拎出了公司機, 是 canon 550D加支 580EX 燈, 不過角度取得不好, 反正影到那甜品的一角...



原來在 jardin de joel robuchon 食的賓客都會獲贈是日 salon de the 即焗的蛋糕取走, 靚女說是因為在 入面 atelier de joel robuchon (可以望到廚師工作的高桌) 多數是試食者, menu 選擇更多; 而來 jardin 的客人多是像我們一樣慶祝特別日子的, 這份小小蛋糕 (嘩, 朱古力加蜜餞果皮呀!) 是他們給生日者的小心意哦, 這時我的咖啡和跟上的 petits fours 也到了. 也意味著這幾千大洋的晚餐夠鐘收工, 亦說明了我們夠鐘去湊女王回家喇... 你問貴唔貴, 就真係好 x 貴, 但係抵唔抵呢, 又其實係幾抵喎!





夫人呢日當然開心啦, 食到松哥大作之餘又可以拍o下拖...

講開又講, 其實, 老朽最大的夢想, 是有能力和成家人來食松哥; 這不單是錢可以做到, 而是一家人齊齊整整地食米記三星, 呢個, 係一種極大的福份.