恭喜發財!

當然係祝大家新年進步, 財源廣進, 身體健康, 出入平安, 貴人高照, 方方吉利, 快高長大, 聽教聽話 (呢幾句係同我個女講o既)

年三十才剛病愈大半, 又話要過年, 家中真係 "咩都未整", 好容易搞定自己家, 又要去老家幫他們新屋點綴, 而且老父做足傳統, 年初一半夜拜神, 見佢拎來拎去都不忍心, 所以我也會回去幫他 (老朽夫人好少理, 一早同埋女王覺覺豬).

家中一向放吊鐘花和水仙, 打從老朽開始拍拖之時就多了放一株桃花, 後來老朽業務開始有做生意, 便買棵大點的所謂討個彩頭.


揀桃花真的講手神, 因為買的時候多數是扎起的, 只能從枝條密度, 已經綻開的花色, 樹底的老勒程度, 還有 "疑似" 花蕾的分布密度等去揀. 不知是否金融海嘯的原因, 今年的6呎高桃花只要四百多一點已經成交.

漏夜放好和修剪了桃花, 還有外母大人 "" 得好靚的水仙後, 一望個鐘, 竟已是年三十的凌晨六時, 剛剛好可以看到 《Cable 早晨》!

筆攻不公

兩單大新聞, 一是落馬洲六命車禍, 二是三鹿案件宣判.

先講三鹿, 一句講晒 -- 死的是殺人者 (奶站落毒者). 不過點解有人殺人唔使死? 仲有一大班驚阻住京奧的省市官員呢? 唔好話重判, 連 charge 都無, 會唔會離譜o左o的呀!!

唯一可以一讚的, 是今次的審訊過程中, 多次讓記者採訪, 到判刑時甚至每半小時派員向記者報告, 不過依然不讓家屬內進 -- 但, 這些不都是一早應該做的嗎? 為何有人可以想鋏制他人可以去到這個地步...? 真真不明白.

法制被政治影響, 在當今世上還有效地執行的, 大概也只剩下中國, 北韓和極少數的地方, 奇就奇在, 倒也還有不少人真的不覺得這是一個問題.

落馬洲一撞, 人人都話酒後駕駛和危駕導致他人死亡的法院判例過輕. 這點老朽倒是101% 同意. 其實若干程度上, 在路上將自己和他人的性命亂在賭注, 不是誤殺是甚麼? 終身停牌, 我認為已經是最低刑罰了. 不判返三幾年以上, 一班喜歡開車前係要飲兩杯的司機們會收手嗎? 一班枉死的冤魂又會安息嗎?

六個家庭, 一下子就這樣散掉了, 悲... 仲要就過年添啊... (><)"

臥病之時 - they will be met!

三日未退燒, 看來今次西醫無靈, 要向中醫埋手了.

友人鮑魚先生提議, 因發熱不退, 小便清長而無大便 (唔怕核突啦, 事實嘛!) 似外感傳裡 (呢樣我都知), 表寒實症, 建議我用桂枝大黃湯, 不過我尚有覺得喉乾舌燥, 而且痰涎帶青, 覺得桂枝對此會不會太燥呢... 驚咳到死, 都係唔太敢用.

先祖母當年無書讀, 只係幫鄉間有米姊妹做o下工時聽o的姊妹讀書而自學; 竟然學到唔識字但係識背詩, 也識做生意, 更甚的是看得懂醫書, 聽埋睇埋, 倒也成了半個街坊中醫. 不過當年無需註冊, 否則祖母可能被人拉...

家父自祖母口傳, 亦略懂少少藥理, 所以好多時有少少頭暈身燢, 我們幾個自少都係聽佢老點去食中藥. 又多次畀佢扑中, 服兩三次後也藥到病除. 睇來 今次都係要搵佢出手了...

家父年紀開始大, 記憶也慢慢地變得不清, 有時也會烏烏o地, 或者, 我都應該跟他學學醫藥, 雖不能懸壺濟世, 也可自救於無形.

***

臥病訓到七個一皮之際, 聽到有把勁似新城 DJ 的聲說道 "And may I present, President-Elect, Barack H. Obama!" - 呢位應該就係報上所說的「海軍靚聲王」了.

不是看 CNN 都不知道, 原來美國憲法註明, 候任總統在就職那天的中午12時正, 就算未正式宣誓, 也會成為總統, 所以在12時正的時候, 雖然仍是馬友友和 Izhark Perlmann 在表演中, CNN 已經打出了 "奧巴馬剛正式成為總統" 的字樣.

總統就職演說和好多其他演說一樣, 忌重覆和冗長. 奧巴馬在這點上運用恰宜, 一句 "... challenges... are real" 同埋 "they will be met!" 點題, 而且 -- 在安慰美國人心之外, 更道明 "無咁快搞掂o架! 畀o的時間唔該".

奧巴馬的親民形象, 由他年少時已然建立, 他的非洲裔血統, 還有官方刻意避開的中間小名 "H" -- "Hussein" 也為他打開回教世界友善之門提供一條絕佳的鑰匙. 老朽且希望他可以一如選民期望, 為美國和世界帶來希望與和平, 千萬唔好整整o下變多o左個「阿扁」出來就 「阿呢吉帝」了!

抱恙

已經無咩力了, 前兩日可能在東亞運義工的 training 時著了涼 (下午突然覺得冷氣開得大了, 之後就覺得凍一凍, 已經知 - 又衰o左). 前晚已經看了醫生, 但係可能中的招不同, 所以o的藥無咩效, 昨日更進一步, 發埋燒, 成個人嗚o下嗚o下咁, 同事同我講笑玩我都全無反應. 唯有再睇多一次醫生... 今晚, 又無得湊女了. ><"

仲要衰到原本睇開的醫生已經收工, 轉了去一位比較少睇的, 醫生仲串我 "哈-- 想問問, 其實呢, 你們揀邊個醫生睇呢, 有咩原因o架呢?"

我的原因好簡單, 因為老朽夫人有保險 cover 另一位醫生囉.

以和為貴

《易經》第六十一卦 中孚：豚魚吉,利涉大川,利貞.即以誠信取得吉利的意思.

老朽多數案件都是為保險公司抗辯人身傷害, 但也有小部分是為傷者追討賠償的. 早兩年有位客戶就是因為作為其他案件的證人而認識, 不幸這位先生後來遇上交通意外, 頸脊受傷, 於是找我幫手索償. 他家境相當一般, 故此便申請法援, 並批出予老朽.

這官司一直被對方的一間保險公司拖長, 到後來, 這位客戶的部分駕駛執照更被吊銷. 失去了部分的謀生技術. 於是他開始變得消極. 但此時, 對方才計來一筆一早應該來的金額.

太遲了, 這位客戶原本還會考慮收取這少數目的賠償, 但現在他日後的生活也開始有問題, 又實在難以就此了事.

不過他自己也愈來愈鑽了牛角尖, 而且總覺得自己的生命被人拖累; 但是對方的賠償提議又不吸引. 如是者, 僵持了一年. 直到最近, 案件即將正提開審, 我又三催四請的; 雙方的差距才收窄, 上星期尾還費盡了唇舌, 真係說到牙血都出埋, 才撫平了客戶的心情, 接納了一筆其實已經不錯的金額.

老朽好多時都覺得, 做人呢, 有時唔好去得太盡. 或者你覺得自己好慘, 但客觀因素往往就是不會如你自己所願. 見這位客戶早前成個人落晒形, 一邊替他家人擔心, 一邊也替自己的案件擔心 - 因為如果未能和解, 而最後由法官聽審後得出的賠償額比對方的和解提議更低的話, 正式審訊時的雙方訟費是要由客戶支付, 或又賠償額中扣除. 那就會出現「水瓜打狗」 - 唔見一大截的情況, 到時受影響的不只是他一個人, 還有家中等他開飯的家人. 齊齊「食蕉」. 現幸而雙方終於可以和氣收場, 老朽都鬆o左口氣.

上面一段, 好似平鋪直敘, 大概吸引不起大家的興趣. 不過工作就係咁, 好多時沉悶得要命. 如果餐餐都係緊張刺激的話, 老朽一早心臟病發死了!

海嘯下的稀麥糊

今日睇生果報, 見到英國有人在這金融海嘯期間推介人吃稀麥糊 (gruel), 即是用麥片加水和少少奶煮成的糊狀食物, 而當年在 Charles Dickens 筆下的 Oliver Twist (苦海孤雛) 就是吃這東西過日子, 而書載他一週可以有兩餐加入生洋蔥作調味.

講就講到食 gruel 好慘, 其實, 稀麥粥/糊可以幾好食的... 詳見 "Ask Mr Breakfast" 網站... :-)

生果報引述外電謂有人吃過後覺得味道其實不錯, 十分返璞歸真. 使老朽想起近兩星期都係畀兩餐粥仔女王食的情景.

清淡, 但係女王食得幾開心 (雖然間中會扭o下計 "氹" 一輪先肯食埋), 因為小朋友無咩要求, 食得飽飽o地又 "嗲" o下你咁就已經好高興, 不過我o地女王就多樣野, 就係有咩唔滿意的話好快就會鬼殺咁嘈, 又八卦, 同佢換片成日就想起身望o下你班大人搞乜, 又鍾意自己拎住張片, 拎拎o下就想放埋口睇o下食唔食得.

人就係咁, 無咩要求就易開心. 而家點解咁多唔同o既苦主四圍走? 其實就係因為佢o地有要求, 當年對於自己生活有要求所以落疊, 而家就因為對銀行有要求所以出o黎嘈. 但係, 你們對自己又有無要求呢? 點解唔問o下自己可唔可以好似小朋友咁無咩要求呢? 可唔可以又問o下, 點解唔要求自己醒少少呢? 又點解唔試o下諗, 無咩要求的話自己一早唔使出來四圍行四圍用o的預先錄起o既大聲公四圍唱, 仲可以有o的錢去銀行換新銀紙過年呢?

過年, 祝大家更加清醒, 更易滿足. (包括仲唔知死食緊幾十蚊一盒三文魚醬 (salmon rillette) 搽餅乾當宵夜的自己)

媽子牛一

我們家有個好怪但係幾搞笑的傳統, 就係一人一年起碼做兩次生日. 一次公曆, 一次農曆.

點解已經無從稽考, 好像是小妹想出來, 希望家人多點聚聚的方法, 大家也樂於食多餐又或者收多份禮物, 所以一到年尾就一家人吃過不亦樂乎.

早兩天是家慈新曆生日. 家慈嗜牛, 之前幾次買的澳洲和牛不知何解都不夠, 可能部位買得不好, 今次重鎚出擊, 買入了一塊大的佐賀 A4 肉眼. 承惠港幣五百六十大洋. 點解買A4而不是A5? 因為肉眼本身除肉腍外, 已經比較多油, 而和牛係以　A/B/C 再加上數字分級的, 好多人都知 A5 為之頂級. 不過油花太多就會變得無肉吃, 所以寧可吃 A4. 反而西冷的話, A5 或者會較佳.


另外準備了一些黑豚和三文魚腩給不吃牛的老爸, 再叫兩個 pizza hut 細 pizza, 點都夠了. (叫 pizza hut 而捨 pizza express, 是因為早前已吃過 pizza express, 今次轉返吃港式口味.)

切定一堆蔥蒜茸和炸定一些蒜片, 吃起來就有點似日本料理的鐵板燒了. 難得成家人個個讚不絕口, 看來今次的五舊水用得其所.

***

另, 是日早上女王突然無啦啦自己由車仔上 "跣" 了落地, 老朽上班, 夫人嚇到花容失色, 好在檢查後女王內外都無事, 一額汗呀真係!

世仇

其實由始至終都唔係好明點解以色列同巴勒斯坦要搞到世仇咁款.

聖經記載, 好耐之前. 上主應承了以色列人, 說梅瑟 (摩西) 帶他們離開埃及及, 便可以去到 "客納罕地", 即是 "流奶流蜜的地方", 讓以色列人永遠安寧. 他們行了幾十年, 終於到了, 原來就係中東十帶.

然而, 當地本身有一班其他人士, 就是巴勒斯坦人的祖先. 無辦法, 一笪地, 兩幫人爭地盤, 一定打起來, 而且打了幾百年都無停過.

奇就奇在, 兩邊都話自己係神助之士, 點解打極唔贏?

老朽的答案係 -- 因為根本神唔想你們打仗, 只係你們一班瞀里 (即俗成「茂李」) 自己曲解經書. 而以色列方面, 亦有一派基督宗教聖經學者謂他們在自由的情況下殺了耶穌基督, 所以已然喪失上主特選民的資格, 也不能在客納罕地居住.

一邊就找來一班婦孺做死士, 用可蘭經曲解來迷惑人心, 更把平民當人盾. 但另一方就更可笑, 明知你搵手無寸鐵的平民做人盾, 即係話打都打唔到真身. 你仲打?

前日更加殘忍兼折惰, 一炮打散兩間聯合國的學校, 殺了好幾十個小朋友, 之後話 "我見對方有武裝分子入了學校打我們, 所以我們還擊". 天呀, 即係你明知係學校都照打, 就為了有槍手走了入學校? 你老味o的死人理由有無荒謬o的呀? -- 容許我的粗魯, 我實在覺得呢o的解釋係歪理中的歪理! 有無當過平民係人呀??

咪話我話, 兩幫人咁樣冤冤相報法, 係咪想搞次世界大戰??? @@" 呢個時候, 專做架兩的美國佬就會出手, 幫晒以色列咁.

遲少少奧巴馬仲係一半非洲血統, 以色列可能連呢個靠山都無埋.

寫了這篇, 其實係因為昨日在報上見到空襲學校後的小朋友屍體... ><"

戰利品

是日早上在區域法院渡過.

為的是一單為銀行追供樓數的案件. 銀行在斷供後大半年才正式控告斷供的債仔, 對得佢住有餘了.

債仔也算知機, 雖然拖了好些日子, 但是上次上庭時已經向法院提出 "知衰" 以及希望和銀行洽商和解. 故此老朽亦不會強人所難, 逐申請將案件押後至今.

雙方既已和解, 老朽亦願意將律師費酌減, 希望與訟雙方可以開心的達成協議. 而結果亦與估計一樣. 所以今天老朽上庭, 只係形式上通知法院雙方的圓滿結果. 法官亦樂見我們大家開開心心的離開法庭.

既然開心, 我又會走去買野食了...

今次竟然在灣仔見有新的冠華食品廠台舖, 入面又見到...



酸蘿蔔食得多, 酸沙葛倒少見 (其實以前的遊樂場和戲院外甚多, 都係一大瓶, 和酸菜頭呀, 馬蹄等一起放). 立即買下一小瓶. 回公司關上房門, 慢慢吃...

唔... 有點喉涸. 看看成份, 已經估到佢一定有糖精 (現稱 "甜度調節劑"), 不過估不到的是佢竟然用酸度調節劑 -- 即係醋精, 而唔用白醋. 老實說, 味道差了一大截. 我寧可你用醋再加入醋精都好少少丫!

唔睇唔知, 沙葛原來英文叫 "Yam Bean", 和芋頭似乎關係不大吧...?

唉, 又少一樣真正的古早味矣... 哀哉!

兩單證婚...

兩日來接了兩件證婚 job, 都係朋友介紹. 竟然一單係內地人, 一單係台灣人.

兩單都要遞一輪平時見都未見過的文件, 而且其中一單一位朋友也是離婚人士, 更加多文件.

好後悔無收返佢正價...

上工治未病, 不治已病

... 其實只係突然想起呢句, 並非有何特別意思.

謝謝 facebook 朋友的關心, 女王病了兩天, 吃了藥後已經好返. 起碼今日放工回到家中見到女王時叫佢個名, 已經好活潑咁望住你笑, 呢個表情即係話「 daddy 我無事喇!」

但點都要講句, 係 daddy 魯莽, 對你唔住啊... 我以後唔敢咁白癡了!

女王病了 vs 王府餃子

唉... 係老朽和夫人照顧不周... 一連串的失誤, 整到女王傷風了... ><"

今日上一個遲些推行的民事司法改革 course , 上完後買了王府餃子回家 "白煮" 來吃. 吃得起勁, 和太太都無留意到囡囡無啦啦 boo boo 了... 但因坐在小餐車上, 唔覺唔覺, 便便都漏了出來, 這時才驚覺, 她的褲子和餐車都已經污染了... 而老朽覺得今天中午 17 度左右, 無需回房開暖氣便叫夫人替囡囡在客廳換衫... 就係咁攝一攝, 傍晚開始流鼻水和打噴嚏了... :( 今晚也睡得不好, 老朽和夫人都後悔得很呢!!!

***

至於點解食餃子食到咩都唔記得晒... 一向覺得王府餃子出色, 打從七.八年前灣仔的 "虹橋麵家" 和元朗的舊"北京水餃麵" 結束後, 老朽要找好吃而又抵食的北方餃子, 難矣 - 直到王老太在中環開了這麼一間小店.

次次去到, 一個人吃兩份餃子 (廿隻) 加個豌豆黃/驢打滾或者其他的甚麼小吃. 吃到王老太都問我 "你一個 "o靚仔" 點食咁多呀... 吃到王老太都少回店了, 才見到不知何處的成班傳媒呀, 蘇施黃等等來訪問.

今日老朽去到, 一買就買了三盒仲加個豌豆黃和五香排骨便已經趕回家煮了. 吃到不知人間何世, 故有上述事件發生... 唉...!

(註 - 豌豆黃/驢打滾為北京甜食, 本是較 "粗" 的甜品, 在香港一直無人做得似北京的, 將其變成幼細的是鹿鳴春 (不過 menu 係無的), 北京樓的豌豆份量少些, 不太入流; 但鹿鳴春龍哥說現在老師傅退休後已經無人做這 "雙色涼糕" 了, 甚是可惜!)

搞鬼相...

最近有幾位朋友都透過 "photofunia" (www.photofunia.com) 整了些搞笑相, 老朽不甘後人, 當然用女王整了幾張...



唔係講假, 真係笑到我們碌地!

***

昨日 blog 漏記一樣... 就係老朽父母和妹妹慣例, 除夕倒數完後會在老朽家中過夜, 第二天的 lunch, 今年老朽整了 okonomiyaki - 姑且譯為「御好燒」, 即係大阪燒餅. 因為易整丫嘛... 將粉加蛋加水再加椰菜絲, 之後再加埋自己喜歡的餡料 (蝦仔呀, 魷魚呀, 肉呀之類啦) 煎起兩邊, 落埋個汁 (係用生果和香料煮成的, 我都係買玩成咋) 同埋白汁, 上面灑上木魚花, 青海苔和紫菜就已經食得. 仲要幾好食添!

元旦日...

正如之前提過, 昨晚家人在我家過夜.

早幾天老朽已經透過網站買了一盒 beanstalk (和女王奶粉牌子一樣) 的米糊, 開奶吃時開稀少少, 畀女王試食; 初時見女王不習慣, 又怕她像十一月初 (好似是 5 號) 時試蘋果汁一樣, 皺起個樣來不肯吃. 不過慢慢地, 可能米糊用奶開, 所以她跟著便已經自動開口想吃了. yeah, 成功!!

到了元旦日, jola姑姐買了個小飯煲來煲粥仔, 試了一次, 女王又 ok. 還食食o下微笑, 應該也是時候給她慢慢轉食粥仔了... 上月尾醫生還說試粥仔兩星期後可以加菜和加少少勁碎的肉 (不過要瘦肉). 老朽要開始訓練女王做食神二世了!!! 哈哈哈哈...!!