謹賀新年

呢句係日本用的祝賀語, 多數用在卡上.



happy new year!

忙了幾天, 今日可說是有個 happy year end.

早上替一位好冤枉的司機打甩了不小心駕駛罪. 呢位仁兄成單意外最傷係佢, 做了十多次手術, 但係因為不知何解的休克導致了意外, 所以被告不小心駕駛. 但係在呢位生命鬥士身上真係睇到何謂永不放棄的精神. 抵佢甩的!

當然, 庭上表演的工作交由大狀負責. 而贏官司後正是午飯時間, 大狀問想食「清少少」的壽司, 去邊度食好... 人在九龍, 當然去尖咀. 想起多月前因故「入冊」的見城, 大夥就馬上跳上大狀的坐駕, 直奔老尖, 吃個豪豪o地的 lunch... 是日竟然見到見城親自坐陣. 於是二話不說 - 自選壽司定食, 不過我唔揀, 留畀見城揀. 結果當然係不負所托, 不過見到佢 「出冊」後明顯消瘦了.

***

正如早前提及, 舍妹牛一的 party 改了在今晚舉行, 來的有十多位親戚. 吃的多是外賣食品, 不過都揀了老朽好幾天...

頭盤-
泰式凍沙律蝦 (city-papa 一早買定回家)
鵝肝無花果醬批 (馬會, 早前提過 - 將一公斤的一半留起再一半... (即係幾多呢?)) ^^
魚生船一隻加北寄貝 (都係 city-papa, 不過今次係定o左)
凍松葉蟹腳 (吉吉島急凍貨, 本來係買鱈場蟹的, 貪佢多肉 & 好食o的; 不過松葉蟹特價)
芒果鮮蝦沙律 (美心訂的, 只係為o左有少少菜食)
泰式拼盤 (又係 city-papa 訂定)

主菜-
煙原隻火雞 (7 磅左右, 最鬼憎食燒火雞, 所以去 citypapa 一早問定有無凍食的「煙」火雞, 貪其僅熟, 滑好多)
煙 virginia ham (今年去美心訂, 2lbs, 但竟然同我切晒片!! 去年馬會的同樣價錢竟然有4 lbs...)


飯麵-
焗豬扒飯 (美心訂, 純為各 "飯人" 而設
香腸粟米肉醬意粉 (都係美心訂, 純為各意粉精的親友而設, 本人覺得太太煮的意粉更 al dente 得多!)


甜品-
Panna Cotta (當然又係太太拿手之作, 不過今次係我幫太太隔雲呢拿籽的)
o者喱糖 (由杏花村舅母自製提供)
-- 當然唔少得o既係生日蛋糕, 今年因為時間關係, 無去到 cova 或者 islang-shang 訂, 去了山崎 - 竟然都唔錯喎!

正常情況下, 15 個大人應該吃不完上列食物的. 不過我們當中有兩位發育時期, 成隻火雞髀"隊" 都仲得!!

講真, 老朽係極愛美食, 不過當一班人柴娃娃時, 有時都要食返多少呢類 "大鑊飯" 應應節... 對於食物要求, 或者有需要稍稍下調.

****


晚上大家未走, 雖然老朽的女王已經覺覺豬, 不過大家還是在家中倒數. 而老朽最鍾意在倒數後準備一些 toasting 的小食. 今年和早兩年一樣, 用日本新年的食品...

- 紅豆沙日式年糕 (都係買回來整, 自己點整都煮唔到日本買回來咁甜!)

- 蒲鉾 kamaboko (其實即係日本魚蛋, 但新年時他們用的是鯛魚, 而且煮得較靭和甜)

- 伊達卷, 有人稱為「錦玉子」 (係本人至愛, 乃係甜蛋加上魚茸煮成似卷蛋的糕點, 吃下去感覺似蛋糕 - 強強強強烈推介!!)



日本人有樣奇特的習俗, 就係新年吃的特別食品在平時不會做出來的. 如上面的伊達卷, 真的只在過年時才做來賣, 平時去日本都不會找得到的. (可惜!)





又如往年, 老朽在倒數後會用鋼琴彈出 Auld Lang Syne 來送舊... 今年老朽過得實在太特別了... 彈彈o下有點想哭的感覺, 不過人多, 眼淚都流回肚子裡...

09年, 期待挑戰!

下廚

已經有一段時間無真正自己下廚煮東西了. (整個麵那些當然唔算)

打從請了工人開始, 已經少了煮. 因為星期一至五都有人煮中式餐膳的話 (而且都煮得不差, 亦偶有佳作), 你到星期六或日已經不想再煮, 又或者想試試其他菜式了.

不過不知打從何時起, 每年我總會煮一次給外父外母食, 多數是在聖誕前後. 其實這不成文的規矩係幾怪, 不過可以將我開始退步的廚藝暫時止住, 也未嘗不是好方法.

今年因為時間關係, 只煮幾樣簡單的, 因為要湊女丫嘛...

玫瑰豉油雞 (由外母整定拎過來 "加料")

芙蓉滑蛋海鮮 (即係蝦仁帶子滑蛋, 不過今次略嫌有少少唔夠滑同埋炒得散o左少少)

金華紹菜卷 (華腿切絲, 釀入已略蒸至焾的娃娃菜卷起, 之後 "贊" 上湯同加入冰糖碎再蒸)

XO 海皇醬爆夏果雞丁 (普通一味, 不過今次 XO 醬落o左後o的雞回鑊時兜得唔夠快手, 又或者唔夠油, 個醬底 "掛" 唔到上雞肉度, 無咩XO醬味)

雜菜粉絲豆腐煲 (因買不到包仔 or 炸豆腐, 結果買硬豆腐自己拉油)

蠔油炒雞髀菰 (此味由老朽夫人製作, 總不可以所有o野我整o卦...)

特別鳴謝外母大人幫手洗我浸落但係唔記得o左扭的女王衫仔數件, 及夫人家姐贊助吉吉島大型果盤乙個.

***

餐後仲準備了一些日本過年的食品如伊達卷 (即是一些蛋和魚煮到溶之後再整成似 "卷蛋"蛋糕的卷物, 是凍食的) 和鯛蒲鉾 (也就是大家食開的日本魚蛋, 不過過年時吃的會有紅白綠等顏色). 還有每年必備的馬會鵝肝醬 ($500 一 kg, 抵得很, 不過可要同朋友分一半才食得晒!) 不過除了姨仔的男友外, 其他人已經捧住個肚, 無福消受也.

出牙仔喎!!

又係一節女王新聞速報:

今日 (2008年12月25日) 早上, 老朽女王在玩耍時, 笑起來被人拍得下顎相片乙張, 相中可見中間部分有兩點白色, 初時專家認為可能係奶漬, 後來經再三驗證, 證實係乳齒的芽位, 即 "牙芽". 而女王亦開始多用牙膠. 可為佐證.

呢節新聞速報完畢.

聖誕快樂!

各位, 聖誕快樂!

一如往年, 老朽在平安夜也會和家人一起, 因為老朽的妹妹是平安夜生日的.

不過今年不再是切火雞, 而是因碰巧平安夜是外婆農曆生日, 身為後輩的妹妹要讓路, 除夕才補飛. 而是去了和媽媽那邊的家人食飯.

也是一如往年, 老朽在飯後就會回天主教主教座堂參加子夜彌撒, 亦會幫手; 唯一不同的是今年要先回家安頓好女王才起程. 不過老朽因為少少感冒, 所以暫時唔使埋身湊女, 可以早點回教堂.

又係一如往年, 老朽都係做陳日君的 "實q", 不過今年是守在祭台旁而不是守正門.

老了, 他真的老了. 所以也要退休. 大概今年是他最後一年以香港教區主教的身份主持子夜彌撒了. 或者, 是這原因, 所以主教座堂比之前的子夜彌撒稍稍多了人. 堂內外加起來有二千多人參禮.

一向禮儀都會有一些接待員幫手, 不過每逢有由我們堂區主辦的大禮儀的話, 就會有數名至數十名有點 "拉雜成軍" 的教友成為保安隊伍, 專責處理突發事件. 我們這一 team 人是由禮儀接待組, 交通控制組和禮儀組的前成員兼任, 以前是沒有的, 但自從數年前發生同性戀人士突然在彌撒時示威衝擊祭台, 和自從多了人會在大禮儀上以自己方式 "表達意見" 後, 我們便成立了. 大家工作時都會以無線電通訊, 而且對聖堂內外的環境都會十分熟悉, 也會協助禮儀的進行.

今年不論是參禮教友或是參觀的人都相當 "乖", 一路都無事無幹. 而年年都會有的 call 白車 (即有人暈倒之類) 事件, 竟然都無喎... 直到...

陳日君: 「... 因父, 及子, 及聖神之名, 降福你們」
執事:「彌撒禮成」...

「僻啪!!」

就在禮儀完成的一刻, 後排近正門有位少女暈倒了.

在禮儀行列 (都幾長o架!) 回到 "後台" 的祭衣房後, 老朽回到正門, 赫見醫療輔助隊 (AMS) 正替一位少女急救, 於是走過去望望.

可能因為禮成關係, 在場竟然無醫生出現 or 出手, 其他近百的工作人員也都全部不知所蹤, 或是自己在 "後台" 影相. 老朽於是問問 AMS 朋友, 其中一位抬頭望望老朽, 說「CALL 白車啦, 度唔到脈搏」

畀佢咁嚇一嚇都幾係野! (其實相信係因為血糖低)

暈倒的少女似乎悠悠醒轉, 而身旁有另一位朋友 (老實講, 雖然時間不足, 但一看已覺這位朋友係標緻女生一名) 自稱係護士, 此時突對AMS 說傷者要趕功課, 「唔入醫院得唔得」, 當然 AMS 梗係話唔得啦... (有事邊個揹飛先?... 仲話畀人知你 nurse...靚女都係咁話啦!)



最後, 就由老朽打電話 call 車 (上圖二), 等得來再去和其他禮儀人員食個宵夜回到家, 已經是凌晨4時... 眼訓到無止也!

有段小插曲, 就是是晚在散場時, 我們幾位伴隨樞機身後行到整個行列回到後門的祭衣房時, 有個叔叔模樣的男子突然走過來跟老朽說「一場聖誕彌撒, 你們搞到好似 G4 咁樣, 好唔祥和呀!」之後老朽都未及有反應, 該男子已由妻子帶走.

... 大佬呀, 你估我o地好想呀, 你未 "舐" 過o野梗係唔知點解要整幾件搞到似 G4 咁o既人啦...

急驚風, 慢郎中?

近兩日城中話題, 頭條新聞, 都是明愛醫院的大件事.

有幾大件事? 人命一條. 一位司機和他兒子經過明愛醫院附近, 作為父親, 本身有心臟病底的司機突然心臟病發, 做仔o既連忙送他到醫院去. 他們趕過去就近的明愛醫院, 在差不多到達時, 病人已不支倒地. 那兒子即時跑到明愛醫院的其中一個 block, 找到一位文職人員, 告知情況. 希望醫院派人幫助.

醫院職員的回應也好快: 「你快o的打 999 啦!」

這一打, 糟了.

消防處救護車即時出動, 由旺角區趕過去深水步區, 點知中途塞車, 改派另一輛, 也有阻滯. 前後用了十五分鐘才有救護車到場. 這時有位明愛醫院的急症室醫生路過, 已經開始替病者做心外壓及心肺復甦法. 不過依然無起色.

救護車卒之到了. 病者的心臟已經有纖震 (fibrillation, 即係心臟亂咁震動), 車上有 defibrillator 除纖機 (即係成日睇電視聽o的人叫 "clear!" o個o的...). 這時已經差不多是事發後半小時. 病者已經無晒知覺. 而隨即送至明愛醫院 (車路仲要繞個大圈) 急症室, 但已經證實死亡.

議員開始出聲

傳媒開始出聲

病人組織開始出聲

街坊也開始出聲

千夫也是指著明愛醫院的職員和制度來罵罵罵, 一句 "僵化" 似乎要將明愛醫院鏟平. 死者兒子也當然是氣憤難平, 當然, 睇住自己父親在失救下走盡了人生, 眼巴巴看著他逝去.

一句 "你快o的打 999" 成了名句.

有無人諗過, 點解明愛, 或者其他醫院, 要請人打電話先呢?

今次事件是在明愛醫院外發生. 那人人都指著明愛, 說應該召急症室醫生和人員來. 明愛解釋那是程序. 而且急症室的 defibrillator 太大, 搬不走. 大家罵的還有那是明愛的一街之外, 那我問問, 如果是兩條街外呢? 應不應該叫人來? 那, 三條街外呢? 也好近啊! 四條又如何? 只是三條街外多一條呢! 那麼係醫院外幾多條街外才應該打 999 而不是跑到醫院呢?

那制度, 大概就係這原因而定出的.

其實, 說到底, 還不是公眾形象問題. 職員按章辦事, 現在出了事, 大家就只會看著醫院做得有幾差, 也不問問上面的問題.

或者你會話涼薄, 但係, 我提出的也是個 issue. 事實上是有這個問題.

另一方面, 法律責任也是個未解之謎. 今次事件, 也是須呈報死因庭之事件, 醫院也已經做了. 或許, 也要等等解剖報告才知道死者是否心肌梗塞 (infarct) 或者血管收窄 (stenosis). 如果是即時已經會導致死亡的話, 那法律上就不構成醫院導致病人死亡, 也就是法律行內所說的 "Causation". 粗俗一句就係 "你係咪都死梗, 而家你死o左也不是我的作為或不作為導致的".

但看來, 職員就是不算做錯, 但也有做得更好的地方. 畢竟真的是醫院外. 最好的做法, 是一邊著他們打 999, 另一廂就派一兩位醫護人員即時出門口看看. 那就算真的出了事, 也已算做過所有可以做的事了.

謹為死者和他的家人祈禱, 也希望他們不要被摯愛的逝世而被人利用或是蒙蔽. 更希望有關的職員早日平復心情. 說到底, 制度不是由她可以定出的.

財壯人膽

今晚係公司週年聚餐.

一般律師樓的聚餐, 多在酒店book function room 呀, 或者起碼都係吃自助餐的, 敝號另樹一格, 憤例在某集團的中菜廳搞. 不過更特色的不是餐飯, 而是現金抽獎.

聽落好似好 cheap, 不過大家都十分受落. 講真, 幾時都係錢好.

不過不知何解, 每年公司都會買三四盒朱古力作為抽獎之部份禮物, 大家當然極不願意抽到. 誰也不想食食食而無錢落袋.

而另一怪怪o地的慣例, 就是律師抽到獎的話 99% 都會畀了自己的秘書的. 今年老朽抽到的也是現金獎細獎. 所以就算畀了秘書都無所謂. 反而師妹就抽到大大獎, 不知她在交給她秘書時心情如何...?

提起小師妹. 她去年這時候去了 "避世". 不願出席週年聯歡聚餐, 就因為不好意思, 自己去年無甚建樹, 開的單也不夠, 所以與其坐在同一圍檯上面左左, 不如不見.

今年情況大大不同了. 師妹一早 "夠數", 反而係老朽今年不似去年, 可以話係 12 月就已經可以唔使做. 所以師妹今年講句說話都大聲o的 (正如去年老朽都可以好大聲). 老朽倒不會因為未夠數而不出席, 不過對住老闆們, 始終無咁大聲. 似乎「財壯人膽」確係不變的定律.

至於老朽點解未夠數... 一來早幾個月的事件, 老朽成個月無新 case. 二來秘書放了長時間的產假, 期間根本無人可以真正幫到手. 開鬼到單咩...

總之呢兩個月就真係要追單追到索氣啦...

繁星 流動

無咩特別, 只係因為好難得今晚天朗氣清, 在女王訓著後走出露台向西邊望, 赫然見到滿天星斗 (當然唔係暈o左). 一數, 竟數到十二粒, 有一粒仲相當光和閃閃o下的. 另外又有三顆連成一直線.

老朽一直提不起興趣 & 時間學觀星, 但總覺得星星有一股攝人的魅力.

無呀, 都係講o下咋, 見到靚咪記低囉, 乜 blog 唔係咁用o架咩?

***

另外, 一年將盡, 大老闆又再次向我們追數, 又問老朽開o左幾多單, 仲有幾多開緊, 收返幾多之類... 唉, 今年無去年咁堅抽o者, 應承你做到條數咪得囉... 鬼殺咁嘈, 知唔知會影響人工作情緒o架!

唔想講都要... 妖...!

女王新聞

一節女王新聞速報

不知在 facebook 關心過我囡囡的朋友們有無看這裡了. 昨晚我們最後決定將她的奶減到 4 餐, 份量維持. 又竟然好好訓無扭計... 真吹脹.

希望今晚都得啦. ^^ 當然, 係時候準備加入粥仔之類了...

聖誕花環...

打從小開始, 已經有將一個花環掛在家大門口過聖誕的習慣. 一直都係用膠做的, 也可以翻用.

不知從何年 (大概係五年前左右) 起, 老朽妹妹成為 "草月流花藝" 的一份子, 開始學起插花來. 更開始用真花真松自製聖誕花環. 在無錢買真聖誕樹的時候也可以有個花環發出陣陣松香. (一棵真松 Noble Fir / Douglas Fir 6-7尺今年大約 1200-1500 不等)

老朽對松香係有個偏好, 因為總有一種節日的氛圍 festive mood. 為生活稍稍舒緩壓力.

今年妹妹讀中大設計, 忙得要命, 得了獎學金的她雄心壯志, 也不好意思打擾了, 所以去了買一個.

中環買要 400 大元, 旺角買差不多的只要 150, 但時間尤關, 到時坐的士過海兩程都唔只, 所以都屈服了, 在中環買個又重又貴的, 仲要係 plain, 最後都係請妹妹過來看 bb 時順手將松果和紅果子掛上去.

唔... 或者, 下年籌錢都要想想買棵真的松樹開心o的...

周年紀念@ petrus

一年一度, 又是老朽的結婚周年.

今年多了位女王, 所以慶祝活動只有在請老人家幫手睇住 bb 的情況下, 回到我們四年前結婚晚宴的地方晚飯. (當然, 結婚酒是在 ball room, 晚餐我們去了酒店的著名法國餐廳吃)

一切歷歷在目, 原來已經過了四年, 簡直有如早兩天的事一樣.

這天也有人在我們當年的地方擺著結婚宴. 老朽和夫人不知幾想入去祝福今天的一對新人.

講返食, 是晚的餐廳 petrus 最近 "只" 被香港米芝蓮 "贈" 了一粒星. 和員工攀談起, 大家都覺得可信程度大大減少. 以我的 dining 經驗, petrus 大概應有兩星 - 自從主廚數年前換人後, 這餐廳可以說是由三星下滑了.

但依然是吃得過的. 因為老朽根本不信一班歐美人士可以評中國菜評得好. 歐洲菜式倒還可以一看.

因為囡囡身體仲係唔知點咁, 晚上仲要照顧, 所以只喝了一杯香檳 (Dom Perignon 2000). 埋單見到400大元一杯. 無辦法, 平日一個人無機會飲一支, 更無機會買到這 "香檳后" 的 vintage. 400 一杯, 不算太貴. 或者正確一點, "貴得來值".

反而一味白松露炒蛋, 竟然收我 900 元. 雖然那廚房白鑽薄薄的刨到成碟都係, 始終我覺得白松露係被炒得貴, 而且貴到唔抵的. 唔係聞到香氣忍唔住, 我係唔會 order 的.

其他菜式, 不過不失, 應該有的水準也在. 最開心的是 - 可以再和老朽夫人兩個人撐o下檯腳. 打從女王出世後, 老朽和夫人基本上係未曾試過拍拖的. 今次, 絕對係值得珍式的機會.

酒店方面知道我們是周年紀念, 在上甜品時也放了圖中相片的一小碟生果. 算是意思意思. 望住 petrus 無敵景觀, 老朽心中暗暗多謝天主.

創造傳奇 -- 第一刻

嘔還嘔, 今天的大事唔使審一定係東亞運義工培訓的第一節兼開幕禮.

之前負責 interview 部份義工, 身為小小委員一名的老朽自己亦係義工領袖之一 (其實有少少擔心自己的能力), 知道今天是開幕禮, 老實說, 老朽只想 "柄" 埋一邊做個小小學生. 所以並無一早通報有關當局我會出席, 反而和其他義工一樣打電話報到. 仲係昨日最後一刻才打, 仲要 (雖然唔係特登) 幾乎遲到, 希望坐得後後的聽書.

點知去到荔枝角政府合署門口, 已經聽到有當值義工叫 walkie "老朽到o左, 我見到老朽"...

... 唔使呀嘛...!

卒之又係做 "三陪" - 陪坐, 陪悶同埋陪影相. 大堆記者走來問霍老公子 (而家新一代先叫公子, 佢都尚可為 "老公子")有關東亞運射擊場館搞出來的大頭佛 (批地太遲以致新場起唔成, 用舊場要 cut 賽事). 老朽當然懶得行過去攝位, 坐在前角等開場好過.

見到數位自己 in 過而又入選的義工, 當中有部分都認得老朽, 大家打個招呼, 說聲 "加油" -- 要加油的原因是部分培訓講者的內容太 hardcore, 坐在頭一排的老朽真係有少少 "宗宗o地"...

(當然, 之後電話聽到囡囡有事即刻醒晒!!)

唔通... 出牙仔?

今日出席了東亞運義工訓練的第一場 & 開幕禮 (另文再談), 錯過了史上其中最慘烈一役.

下午6時半, 仲未回到家, 替更我姨仔同埋老婆大人來電謂女王訓訓o下覺嘔, 一床都係. 雖然唔係太多, 但係因為在床上, 所以就算趴著來嘔 (醫生話過都幾常見喎...) 都會搞到一面都係 (好核突呀!!!)

清理o左好耐, 張床褥才煩惱... 抹極都尚有餘味 (... =.= ...) 唯有掉頭用另一端 (不是另一面, 因為另一面是在 bb 1歲後才用的軟身面).

因為過往紀錄係一天最多嘔一次, 所以都好定檔喇... 點知頭先 11 點幾那餐又嘔少少, 30 ml 左右啦... (一安多o的)... 但係嘔完之後女王又對住我o地笑喎... 唉.. 真係激到彈起!

抹地洗衫已經悶了... 加上又擔心囡囡係咪唔舒服定係好似同事所講開始出牙仔導致呢? 真的不知道哦...! 更變態的是... 可能我已嗅慣了, 竟然開始覺得嘔吐出來的奶,... 有點甜味!!

所以, 我要上來急急記下, 當是發洩也好, 記事也好. 唉...

好 down... 係咪我唔識湊...?

呢幾日隔一日女王就嘔一次奶. 三次都係在我手時衰o左的.

早兩日老朽 & 夫人放了兩天假, 帶了女王上山頂玩, 亦係第一次在街外的餐廳畀女王開餐食奶. 又 ok 喎!

但係到o左夜晚, 女王可能太倦了, 食奶時好快睡著, 但係食完掃風時就醒了, 而且開始覺得頂住又未 "ur" 到氣出來... 於是開始喊, 喊... 喊...

但係佢唔會知道, 愈喊就愈多風入胃, 於是一下咳聲, 成餐奶嘔返晒出來, 又臭又核突...

無咩辦法, 只有用返 "麥太 & 麥兜" 的故事來安撫自己.

但係昨晚去到第三次, 老朽開始問自己, 係咪我其實唔識湊女呢?

好 down, 好 down, down 到我連飯都食少o左. 我知其實唔係個女唔聽話, 佢只係眼訓, 就算有錯都係我的問題, 但係見到佢嘔到一身都係 (連我自己都係一身都係!) 我就覺得佢好慘, 辛苦唔識表達, 我又慘, 仲要幫佢清理善後 (而家客廳梳化位前好乾淨, 因為隔日就會抹一次地... ><) 連想自己整個聖誕花環都無晒時間 (抹地兼洗衫仲邊度搵時間整?) 老朽夫人一放工回到家 (呢期佢比較夜) 就要幫個女換衫兼洗身仲要 "暗" 佢訓, 又係咁辛苦) 心情好低落...

上面張相係呢幾日 "事發前" 上到山頂的相, 睇o下笑得幾開心!!

不過好在, 到o左今朝早, 老朽叫囡囡起身時, 見佢 "趴" 轉o左訓, 已經醒o左, 一見到 daddy (即係我) 就笑晒咁望住... 真係咩唔開心都即刻無晒... 抱起佢就叫 "早晨!" ^^

高歌濃情中的謝幕

臨危受命始終係會有少少甩甩o地轆的, 只係別人不多察覺.

原來咁大間學校, 小弟作為大型舞會的 stage mgr, 可以調配的就只有自己, 合作的還有負責 floor 的老同學企鵝先生和整晚都要四圍騰的指揮士巴拿小姐.

尚幸在我們三個飛足全晚, 加上司儀都還算可以執到生的情況下, 沒哪幾位師兄會見到我們的斷片狀況, 否則真不可能告訴人知道高主教的金禧餐舞會竟然只有三個 floor/stage 的人. 請回來的女司儀仲要幾乎遲到 (不過又夾到身為在校生的男司儀, 而且表現又相當唔錯喎!)

全晚都係衣香鬢影, 老朽的新禮服和 bow tie/腰封套裝都見得o下人; 亦請來不少其他嘉賓 (或者係充撐一下都未定!), 部份藝人嘉賓亦被我們屈了上台免費開 show. 而神奇地雖然老朽成晚跑來跑去, 竟然最後都算係食晒整份西餐喎 (係狼吞o左少少o架喇...) !

又係見返一大班的老友和師長, 又一次被其中一位年屆八十的榮休校長叫錯名 (已經連續三次, 三次都係叫錯同一個名!), 亦為母校金禧的整個慶祝年劃上句號.

雖然老朽女王趕住出來, 不過老朽在活動開始時的彌撒上幫手, 現在在落幕前的 "grand finale" 也幫上一把, 總算對母校都有個交代吧!

當然, 最高興的莫過於在曲終人散後, 一班搞手和辛苦了半年的執委們一起將剩餘的 budget 和私幫掏腰包, 開了大堆的 La Grande Dame, Dom Perignon, Krug, Salon... 至於囡囡, 今晚留返畀太太湊, 自己開心一晚, 總可以吧!!

使人開心的甜品... (之一)

又到聖誕, 除o左火雞外, 就係甜食抬頭之時.

老朽嗜食已經人所共知咁滯, 早兩天為了使自己開心一些 (都係近來工作壓力較大而致也), 買了幾款甜食 "迎接聖誕" ("迎接" 的意思係而家只係 "迎接", 到聖誕時會再買再食).

圖中的是土耳其軟糖 (Turkish Delights) 和 Godiva 的橙味黑朱古力珠. 另外還買了一小條德國的聖誕麵包 (Christollen) - 不過太好吃, 即時被老朽清剿, 連 "遺容" 都影唔切. 下次買過先影.

一向不少人不喜歡土耳其軟糖, 因為太太太甜. 但老朽覺得好甜的東西, 吃兩口就會放下, 反而不會多吃. 而且濃濃的甜味螢繞在口內; 會使人有一種幸福的感覺.

另外的那款橙味, 一向都係老朽至愛之一 (最愛係橙皮 coat 朱古力). 見到的話都會買, 食o左幾年都完全無厭倦的感覺.

有朋友話, "stressed" 倒過來讀就成了 "desserts", 即係甜品係反壓力的佼佼者...

不過又醒起, 仲未買掛在聖誕樹上的朱古力哦!!

臨危受命 & 一鑊蹺起

老朽無啦啦畀個同事蹺起.

事緣是有關一件極鎖碎的蚊型刑事案, 被告斷正後想上訴, 但香港法庭的上訴基制係要在初審後14天內才可以 "歡迎申請", 如在14天後的話, 便要向法庭 "解畫" 點解會遲, 待批准後才可申請.

老朽今次便是遲了 - 哪怕只是遲了一天半天.

一早交帶了, 卻因為客戶和同事各有少少 oversight 而遲了那丁點. 但遲就係遲, 一樣要老朽上身.

解畫本身唔係大問題, 只係怕老闆如果見到的話又會諸多聲氣.

不知何解, 天下老闆 99% 都係喜歡將雞毛蒜皮的事無限放大, 之後就會將其他無甚關係的事夾硬連在一起. 再加上老朽早幾個月工作量和成果幾近減半 - 蓋因秘書去了放產假, 替更幫手的同事又做唔切老朽的工作, 所以老闆看起來更加 "有位入". 縱然老朽在秘書產假回來後已極速前進, 但老闆未見錢則不開眼, 一樣畀面色老朽睇. 看來情況還有成個月持續.

***

至於臨危受命, 則是因為老朽母校本年金禧 (早幾個月有提過), 星期六會有個舞會在香港灣仔的著名 ball 場酒店舉行. 老朽之前因為女王駕到所以無咩機會幫手, 但最後數天和另一位校友見到臨場指揮官一頭煙, 加上老朽曾是 wedding planner, 而校友更係 ball & events 的搞事分子. 所以自動請纓出手做臨場的 stage manager. 那校友就會睇晒 rundown 做 coordinator.

不過問題係 - 我未見過 stage manager 到 event 前一天都唔知有咩表演嘉賓囉!!

***

提起 events planning 就想起老朽剛看過網友 solo 姐的 blog, 她的好友在馬場擺結婚酒 - 老朽之前的業餘 planner 工作, 和開始對 wedding planner 產生興趣, 亦係由此地而起. 亦係當日情況混亂, 老朽突然發揮小宇宙, 安排了所有人的工作和整日的流程, 才發現老朽原來可以勝任此類工作.

馬會有樣好, 就係所有員工都不可以收 tips (不過大家去擺酒的話會收 10% service charge) . 還記得那日最後係老朽替新人刷了數萬元卡, 為的就是用特殊優惠免去那八千元的 service charge... 想起如果新人走佬的話老朽都幾頭痕!

無常...

有一點點的不快. 不太因為工作.

這兩日都在法庭, 就因為上星期有提訊的案件卒之都要正堂審訊.

對面突然撤銷了法援, 最後該名我個人覺得相當蠱惑的巴藉人士在無律師的情況下自己上庭.

在這情況下, 原本我是可以申請即時暫緩案件, 因為對方可能會浪費我們的律師費. (連法援都唔 show 佢, 佢又無錢, 明顯係因佢隻 case 根本無可能贏我們) 在暫緩時, 要等待原告將部份或者全部我們的律師費先交付法庭以作 “保證金” 才可繼續. 此法為普通法內重要一環, 原意是保障被告人不會被無謂地浪費律師費 – 即 “畀人誣告, 但係贏o左都要蝕律師費” – 的情況發生.

但問題來了… 其實原意是好, 但根據普通法, 如果案件遭到暫緩, 那法庭就不可就案件作出任何判決, 包括訴訟費的判決. 亦即是就, 我們在暫緩的情況下, 不可以贏回我們的律師費, 也未能向法援取回未撤銷時的律師費.

就係因呢個原因, 我和大狀商討後, 決定不提出此項申請. 始終申請分分鐘仲衰過唔申請. 寧可等待真正判決時, 盡量向臨場 “無義氣” 抽身的法援署索償.

在開庭前, 大狀和老朽吹吹水, 講起大家的子女. 講講下去了談由懷孕到出生. 大家都覺得當中會有不少的神奇事會發生, 而當今醫學雖然相當昌明, 不過 – 有不少事是難以預計的.

這點老朽十分十分同意. 也聽過不少平時無事無幹, 健康得很的準媽媽, 腹中小朋友總會扭扭計, 還有些不幸在媽媽懷內已經走了. ><”

早幾天看報紙, 看到內地有個準媽媽, 因為和她的媽媽在購物時和人爭執, 被購物中心的人一腳踹中肚子, 下腹當場流血, 而小寶寶就這樣走了. 還有早兩個月一位香港的準媽媽, 在網上受了邀請, 去了另一個 “假” 準媽媽的家中, 後來被此精神有問題的假準媽媽刺了一刀, 雖然這媽媽無大礙, 緊急開刀取出的bb 至今也不知道還在否…

這又想起, 或者有朋友會想起十多年前有一件轟動一時的縱火慘案, 就是石峽尾匯豐銀行案, 當時一名以為自己太太紅杏出牆的莽夫帶著易燃液體到那分行找一位剛好不在銀行的職員質問, 當質問不成時就點著液體, 豈料意外打翻, 人人奪門而逃, 但當時銀行的密封設計, 加上電門在保安系統下自動鎖上, 櫃檯內13名職員只有一位因為在洗手間內而逃過大難. 燃燒出來的濃煙, 造成11屍12命慘劇 – 當中有一名是有三個月身孕的準媽媽. 至於那莽夫, 以我記憶, 事後因誤殺被判二十年的精神治療.

以前已經覺得這些事件很慘, 現在有小朋友, 更加覺得有時人生真係無常.

連作為有宗教信仰的我都會問一句, 神做了甚麼, 為何不阻止慘劇發生? 然而, 神賜給人的不只是現在的快樂, 更重要的是 -- 「平安」. 但或者, 今天我已談得太多, 或者留待下次有機會再詳談這些比較沉重的理論.

至於現在, 或者讓大家為所有未出生的 bb 祈禱, 希望上天照顧他們和各位準媽媽, 不論如何, 總有平安.

彰顯公義...

昨日老朽本來就好開心, 因為成功地贏了一位對頭了好多年的外國律師. 這位行家在行內已經頗為出名 - 出了臭名 - 因為每次對戰他都係 "無得傾" 之流. 而且每樣事都係自己留到最後一刻才做, 之後就會刁難其他人為何遲滯. 到法庭時態度又極其傲慢, 連法官和書記都不放在眼內, 但又處處小心, 他做事雖然 "癲"; 不過癲得來又 "無位你入", 對住佢真係又愛又恨.

老朽早在多年前在醫療法律界工作時已和此人對手, 當時已經有少少想 "一把火燒o左佢間律師樓" (當然係誇張其詞之說 - 看官萬勿將老朽當為暴力之輩). 今次仇人見面分外眼紅. 事關此人之客戶在一件極可能由他自己導致的交通意外中數度在警方面前更改口供, 並謂自己是巴藉人士不懂廣東話, 被警員誤導等. 而事實上據警方資料, 此人已經來港40年, 而且廣東話流利過你同我.

不知何解, 此人竟然可以取得法援署的援助, 一直到最近準備正式提審, 對方律師 (即對頭人) 才向法庭透露其實一直未有法援支持至正式審訊.

於是對方提出押後正審, 但昨日就被法官拒絕. 老朽初時當然高興, 故仲走了去灣仔某酒店享用大早餐乙份 (見圖)

慌你唔死, 法援今日更進一步在此最後關頭撤銷援助.

本來作為辯方, 待悉對方無法援是好事. 但此時其他所有方面已經如箭在弦不得不發, 突然撤銷援助, 將導致我們陣腳大亂 - 蓋因以上述案情, 基本上我們一定 "贏梗", 而堂費 (即雙方訟費) 則由輸掉一方全付. 但此原告財力相當不足 (不然最初就唔會批法援畀佢啦), 現在法援突然撤銷, 但法庭又已經明令排期正審 (仲係下星期喎!) 那往後的訴訟費用 (剩係延聘老牌大狀都十幾萬o架...) 又邊個畀呢? 難道由應該贏晒官司的保險公司客戶畀? 法援今次在太遲的階段才撤銷, 可否以懲罰的方式要求其付款又言之過早. 想到呢度, 加上昨晚女王無啦啦突然在家母監管下毫無原因地擦損眼角 (但係又唔痛, 亦無流血, 女王又無喊; 家母當時仲嚇到呆o左剩係識打電話畀我). 搞到老朽而家心中都幾煩...

乜公義係咁樣彰顯o架咩...? ><"

昨日老朽為兩對新人證婚監禮. 開心到訓唔著.

原因唔係因為今次記得收錢了, 也不是因為簽名後那小段分享成功整喊新娘; 而係因為之後得到兩對新人和賓客們的認同.

在其他朋友的婚宴上, 見過有些行家, 甚至係師叔輩的行尊做證婚. 禮貌是有, 卻不知何解好像欠了些甚麼. 當時老朽都仲未夠年資監禮.

搞o左一輪, 終於知道, 原來係因為老朽本身是教徒, 聽得神父講道多, 硬係覺得作為一個證婚的角色, 係使人信服的人物, 亦係法律授予的權力象徵. 作為一個這樣的人, 老朽個人會覺得, 在這樣一個大喜日子中, 應該抓個機會和新人分享一些同婚姻價值觀有關的正面信息 - 或者, 係教友的使命感使然吧...

或者咁樣講法, 太沉重了. 說出來只係一些簡短的生活分享, 目的就係使新人記住, 你在我面前對對方作出的承諾是恆久雋永的. 有人會覺得這些話說不出口, 因為有點肉麻. 老朽卻生出覺得呢o的只係真情的流露, 為何不可? 估不到因為呢個少少的天賦, 使老朽的新人客戶們有喜出望外的感覺.

有此機遇, 豈不感恩也哉?

***

是晚老朽因為要準備明早一個突發的審訊申請 (遲些才透露), 下午開始在公司閉關修煉, 煉出一份誓章 (即宣誓書) 後回家已是7時半開外. 頭痛欲裂, 故央了過來替更照顧我呀女王的姨仔幫忙餵她吃奶.

唔知咩料, 總之好快食完, 之後即刻出事.

未見過女王嘔得咁勁, 直頭係噴出來的, 真係何其壯觀! 仲連噴三口, 固真一地都係也. 呢餐基本的食量係 - 0. 唉...

義字當頭

2008北京奧運過了好幾個月, 老朽依然神往那次驚世的創舉.

中國依然有不少地方要改善, 卻為全世界帶來一個不會忘記的奧運. 老朽到現在也是用著頒獎典禮那首《金聲玉振》做電話鈴聲 (鐵竇內其中一首播放曲目).

緊接著其實還有09年尾的香港東亞運, 2010年廣州亞運, 和2011年的深圳世大運(世界大學生運動會).

遇上了金融海嘯, 香港2009年辦的東亞運即時大縮皮, 原本開幕式的海上巡遊可能要取消.

查實東亞運來參賽的只有九個地區 (中國, 台北, 香港, 澳門, 日本, 韓國/南韓, 北韓/朝鮮, 蒙古, 關島 [呢個真係唔講唔知!]), 其實最初老朽不是太明白, 搞來有咩謂, 不過既是上次「香港一定唔得」申辦亞運衰o左之後, 作為香港 "逐步來" 的第一步, 也未嘗不可.

老朽因為女王駕到, 上次去不了北京做奧運義工, 講真真係悵然若失. 所以今次 "退而求其次" (當然唔係認真啦), 成為了09東亞運義工的一份子; 又因緣際會, 也當上了整個東亞運義工計劃的 interviewer. 數月來見過不少想當義工或義工領袖的香港有心人.

不知是否奧運效應, 我們想找3000位義工, 一早已經超額報名, 所以呢期各委員和東亞運公司的同事見人見到手軟腳軟. 但係見到香港有咁多願意犧牲自己時間來參與盛事的朋友, 其實真係好感動.

縱然東亞運一定無京奧的大堆頭, 大製作, 不過我依然熱切期待那一天的來臨...

或者, 到時香港經濟有起色, 我們又可以像開一個歡慶 party 咁去迎接呢!

女王搞邊科...

都好耐無咁樣玩我咯...

昨晚食完宵夜 (12 點左右啦), 食得好地地, 食完一如既往, 已經差不多訓著晒. 開始掃o下風.

點知掃唔到風. 呢個都唔係太劑, 因為都唔係第一次, 有時都係咁, 慢慢就會 "下o左道氣", 之後好安好樂咁訓... zzz...

唉, 不過今次掃唔到之後醒o左, 佢可能開始 "覺得" 自己有風未掃頂住, 開始喊, 喊... 勁喊...

之後 "咕" 一聲, 有氣出, 諗住舒服晒啦.

... 點知即刻聽到有o的沖坑渠的 "咕嚕咕嚕" 聲發自我阿事頭o既喉嚨仔, 已經知道大鑊, 將的女王傾前少少, 一堆豆腐渣形式的奶固體即刻傾瀉而出.

... 今次嘔o左成安奶. 一地都係. 仲諗住好醒傾前少少, 點知都有o的落o左件衫度.

又係凌晨洗衫的時間, 初時於心不忍唔想叫醒老朽夫人, 但係情況比較混亂, 無辦法下唯有召喚出場幫拖.

女王好快就清理好訓得, 只係我又抹地 (「認住金寶鐘, 清潔無陰功」)又洗衫, 卒之又係凌晨三點先訓.

最大鑊係, 今朝9點半要上庭... -_-"

煙燻太爺雞

有朋友食完問我點整, 又一次在此拋磚引玉. 所以是日出多一篇.

其實講到好複雜, 但係就好易, 有心整就實得.

先用鮮雞一隻 (無的話, well, 冰鮮都殺o既), 用滷水汁煮滾後慢火先浸熟隻雞 (每邊15分鐘左右啦, 如個汁夠浸晒全隻的話就 20-25分鐘, 呢o的o野無一定o既), 夠功架的話滾起後可以唔開火, 熄火浸30-40分鐘. 如唔夠時間的話也可以用現成滷水頂住先, 我都會用, 不過自己再加冰糖, 花椒, 八角, 桂皮, 紹酒, 玫瑰露煮一陣, 又係自己較味.

用一隻大少少的中式鑊, 鋪晒錫紙 (唔係隻鑊好快唔使要), 中間落燻料如片糖碎, 黃糖, 米, 茶葉 (多用鐵觀音及玫瑰花蕾), 正宗太爺雞亦要用甘蔗燻 (不過今次我買不到). 加上蒸架 (都係鋪晒錫紙, 底面拮o的洞). 開中火將燻料煮到糖熔, 同埋起 黃 煙 (初時白煙時唔用要放煙, 因未夠香), 之後便可將雞 (甚至其他食品) 置上去, 蓋上蓋後燻3-5分鐘. 之後較埋個汁 (生抽, 糖, 酒, 蒜, 醋隨意). 注意揭蓋時逐少揭, 不然就成廚房都係煙燻味.

禮成! 可以切也可用手撕, 我覺得手撕的話吃起來仲有風味, 而且索汁更佳.

整整o下搞到肚餓... 都係快o的訓覺為上.

聖誕前的將臨期...

又是11月尾, 正如上篇所說, 終於開始凍了.

大家聽到的第一首歌, 是一首老朽很喜歡的聖誕歌, 是英國近代作曲家瑞特 (John Rutter) 的 "Angels' Carol". 個人覺得是一首聖誕歌, 也可作為聖詩. 更適合在子夜彌撒中 communion (領聖體) 時唱. 不過向教堂的禮節司查詢時, 回覆說原來可選歌曲必先經羅馬方面的條件審查, 亦要香港的聖樂委員會通過選定.

可惜, 大家去子夜彌撒時聽不到這歌了...

其實想說的不只是歌曲. 而是, 11月尾, 就是我們天主教會的「將臨期」, 也就是我們為了準備救主降生開始做準備的日子. 這時, 教會會和四旬期 (受難前四十日) 一樣, 用上紫色的祭布和穿上紫色的祭衣, 表示「期待」和「悔改」, 以迎接救主來臨.

更緊要的當然是心情. 或許, 各商場內已經開始了佈置, 我家中都會在11月尾或12月第一個星期內佈置聖誕. 然而, 又有幾多人 (包括我!) 可以真正的將自己的心靈佈置好, 迎接聖誕呢...?

(按, 是日老朽夫人工作至差不多凌晨才回家, 故老朽在囡囡訓著時行文)

無情夜冷風...

天氣轉涼, 正是我輩肥仔之福.

日間上庭又好, 開會又好, 就算揹住老披 (西裝是也) 亦不再覺得凍.

老朽一向愛冷 (或起碼涼) 天. 陣陣寒風吹來, 吹得人醒神之餘, 也想起, 離聖誕不遠, 離過年不遠了... 心中泛起一點 Festive Mood...

又想起, 今年要照顧囡囡, 早兩日忙著找一些哥哥姐姐 (我的朋友總不願被稱為 "auntie" 或者 "姨姨"...) 送定的冬天衫. 不知哪來的朋友, 送來幾套大得要命的衫, 寫明是9-12 個月的, 卻是冬衣... 想想看, 我女王 6 月出生, 9 個月就是明年三月暮春, 十二個月則是明年盛夏 -- 送呢套衫來把鬼咩... 仲要係系出名門, 意大利貨色. 真真只有望衣輕嘆. 有得睇無得著.

***

剛才老朽夫人突然感慨, 說道 - 仍然未慣有個女. 因為囡囡出生後幾乎無晒私人時間.

霎時記起公司一位大師爺說過的 「這是天職」 (一邊想起仲有迴音o個隻), 用來開解老朽夫人. 不過其實自己細想, 倒真的時間癲倒了不少, 但係 "自己攞o黎" o既. 生得出就要準備好 "長期作戰" 了.

(迷之聲: 天! 你唔使餵夜奶喎, 仲好講!?)

老朽喜歡想東西, 有時愈想愈遠. 冷天時喜歡泡一杯鐵觀音或是六安茶, 有時會倒一杯酒 (咩酒都得) 走出露台 (婚前就是屋外平台) 吹風加埋魂遊太虛. 現在, 不知是否年紀大了, 酒恐一個人飲不完, 茶又怕太 "溶" 睡不了, 多數只是開一杯日本梅茶 (是酸梅和昆布粉開水, 崇光或部份較僻之日本市場有售), 睡前又沉思一輪. 想到女兒, 自己也粲然, 有時又想到發噱處, 自己也會在風中笑出聲...

雖說冷風無情?

諦造歷史, 見證歷史...

標題講到好似好勁... 其實並非大是大非.

早前應承了太太舊同事的好友 (好似好疏..., 但都係太太朋友) 幫他們證婚. 估不到殺出一段小插曲之餘仲使老朽名垂青史...

事緣此友人為元朗原居民家族之一, 之前同老朽講可能要去他們的祠堂或出面的外圍證婚. 老朽今天去到元朗 (仲係早上 9 點入到去o個隻... zzz...) 才知那地方 (元崗村梁氏宗祠) 是法定古蹟, 而且原來係第一次有人在法定古蹟的祠堂行禮 (我都係聽村長講咋). 老朽都係去到時無啦啦見到村長出來迎接先知道 (初頭仲諗: 使唔使村長出來咁大件事呀...). 之後仲見到政府古物古蹟辦的人員來影埋 video.

當然, 在祠堂行禮要留意, 第一當然係你一定要係祠堂o既姓氏 (男家) 啦. 第二就係記得申請燒炮仗 (今日o個幾串喜爆一路燒, 一串都爆o左幾分鐘), 第三就係... 最好事先同村長/祠堂o既管理傾好晒o的o野同檯凳點 set. 今日就因為之前未確定, 所以臨時同新人 & 村長傾一大輪先 set 到. 第四就係... 要揀冬天先行禮, 今日都仲係熱少少, 著晒披無冷氣都幾係o野. 第五就係要好中氣, 因為除非另外預備小型 amp, 唔係的話一定唔會有咪你用. :P

行禮後本來想留低食盤菜, 但係公司太多野做所以無得留下. 不過老朽每次都會為新人講幾句有意思的說話, 今天就選來了《道德經》 (係呀, 又係佢, 咁祠堂傳統丫嘛) 第九章... 「天長地久, 天地所以能長久者, 以其不自生, 故能長久」-- 意即 "天地能長久, 是因為天和地都不會自私, 會與萬物分享自己" -- 同樣地, 兩個人相處要天長地久的話, 也要放低自私, 與對方分享自己.

再一次地, 老朽拎起個公事包想走時才醒起... 又未收錢!

要對新人講聲唔好意思, 無留下食盤菜, 雖則兩位盛意拳拳, 老朽亦想試O下幾百人打盤的滋味, 但始終俗務纏身, 未克參與, 自成少少一憾也.

鏞樓甘饌

不少老朽的朋友都知道, 老朽係個為食到發癲的人.

老朽四圍食, 偏偏未去過鏞記四樓和陸羽三樓兩個 "朝聖" 之地. 故好幾年前, 有位高官的兒子是老朽的同學, 老朽得知其自小與父母吃過不少珍味奇品, 故央了他介紹小弟去鏞記一趟, 此後老朽慢慢與部分樓面的前輩混熟, 亦試過幾次和老闆們或是客戶們開個飯局把酒言歡亦不在話下.

早前和部分行內友人再登鏞樓 (其中包括前文 《錢本草》的那位大狀), 是日精選有...

鵝腦凍 - 為粵水 (廣東滷水) 作餌, 將是日燒鵝之頭腦製成魚膠狀, 香滑得要緊.
清湯腩 - 為正宗爽腩位, 得幾份, 故每日限量供應, 清湯熬製, 入口即化, 連湯都飲埋!!
油鹽水灼心蒂 - 一味估不到在此食到的懷舊菜, 為豬心上之大動脈血管, 滑得來有嚼頭, 惟鹽味略略太重
爽滑魚皮 - 又係一款粥店名菜, 今次就對味了! 因為魚皮帶腥, 油鹽水即中和之道也.
滷水花菰 - 大概無人會想過, 粵水配花菰是個絕配吧? 花菰作為冷盤, 卻係 "唔知點解" 完全唔覺有問題. 奇...

餐前小碟食完就到大盤了... (其實以經小少少飽)

燒鵝姑下庄配肥燶叉 - 特別事先向樓面 Catherine 姐講明要鵝姑, 因其極嫩, 卻因得三數人未能以特別之順德祖方燒製, 故只能食番廣東燒法. 而取下庄則因為鵝係吊住來燒的, 鵝油鵝汁向下滴, 故下庄盡得珍藏.
不過今天的肥燶叉就有問題了... 又唔肥又唔燶, 絕對要打 pet pet!

太史五蛇羹 - 正路和友人上來例必先試杏汁白肺湯, 和陸羽或者港大同學會之作各有千秋, 不過時值秋天, 故特意食個蛇羹. 此處之蛇羹其實唔係太特別, 不過足料得很已經值回票價.

方魚炒玉蘭 - 原只係想加條菜食o下. 但係玉蘭暗藏功夫: 上檯時墨綠得緊, 一看還以為未熟, 但油亮的表面下是軟軟的菜薳, 至此方見真章.

古法班腩煲 - 個人不太喜魚, 卻為朋友而訂了這個煲; 杉斑腩拉油後係以火腩, 豆卜, 蒜子紅燒再扣, 炆足火路, 連我都連啖幾件.

鵝肝腸花卷 - 此物本來是伴著另一點心 「詩禮銀杏」吃的. 因詩禮銀杏偏甜, 加上花卷又係中和之道; 但可惜, Catherine 回大廚覆, 詩禮銀杏製作需時, 日間恕難供應, 但提起了鵝肝腸花卷又唔想唔食, 故照訂了此半, 當是作個願, 希望下次可以食埋詩禮銀杏...

單尾追加 - 太子撈麵 - 即鵝油撈麵, 非常簡單直接的一個麵, 只係因為第二代老闆 (即以前之太子爺) 食開, 所以得名. 但係細細一個麵餅, 加入鵝油青蔥後的確係幾好吃的.

甜品就是鏞記「出名」的「千年陳皮紅豆沙」(一笑, 甘老闆已經澄清絕無此物) 和「水雲玄采糕」, 加埋生果盤乙個, 五個人捧住肚子走.

特別鳴謝是日另一位大狀帶來上善如水大吟釀中的白瀧級別前來佐膳, 此物據悉為日本平成十九年之新酒鑑賞會的金賞得主. 滑過舌尖, 直入喉嚨時, 那如絲的順滑感, 確係使人腦中浮起《道德經》的第八章...

「上善若水.水善利萬物,又不爭.處眾人之所惡,故幾於道...」

西班牙文證婚...

雖然不是專職的證婚律師, 不過倒也為了幾對新人 (朋友居多) 做過監禮. 不過今日那對新人 (也是姨仔的好友) 卻是暫時證婚之中比較特別的一對: 新娘是本地人, 新郎是西班牙人, 他們在澳洲認識訂情, 現在回香港行禮註冊.

新郎的家人都由西班牙過來香港參禮, 不過有趣的是新郎的家人大部分 (包括雙親) 都不會說英語.

於是我便為了他們, 學了幾句西班牙文, 今天用來「招呼」他們之用.

在香港證婚監禮, 一般只可用中英文, 除非有合資格的翻譯. 這點老朽不可能不知道. 不過為了向新郎家人表示尊重, 我便先以中英雙語進行, 而到了某部分的介紹時我便加入西班牙文.

老朽不是個懂西班牙文的人, 不過法語倒也曾經學到可做老師的 level (而家唔好問我, 一早唔記得o左大半). 聽過西班牙文後倒也易上口.

是日證婚, 地點是在 "卻敵灣" (即淺水灣是也, 因 Repulse 即有「退敵」之意). 地點煞是浪漫, 而且是露天, 連對面巴士站的人都聽到我們的 process.

阿彌陀佛, 我之前查到和嘗試講的西班牙都通過了新郎哥的事前測試, 亦因為咁, 所以是日證婚在無驚無險下完成.

正在陶醉於自己有幾成功, 正欲離去之際, 方才醒起...
...
...
...
... 原來我唔記得收錢!

錢...

早兩天到一位相熟的大律師辦公室開會 (大律師或稱訟務律師, 因其業務主要是出庭抗辯為主, 並非因其特別「大」) , 見到以下一文, 以秀麗的行書書上和裱在牆上, 撮之為要:

錢,味甘,大熱,有毒. 偏能駐顏,采澤流潤,善療肌寒,解困厄之患,立驗.能利邦國,污賢達,畏清廉.貧者服之,以均平為良.如不均平,則泠熱相激,令人霍亂.其藥,採無時,採之非理則傷神.此既流行,能召神靈,通鬼氣.如積不散,則有水火盜賊之災生;如散不積,則飢寒困厄之患至.
一積一散謂之道,不以為珍謂之德,取予合宜謂之義,無求非分謂之禮,博施濟眾謂之仁,出不失期謂之信,入不妨已謂之智.以此七術精米煉,方可久而服之,令人長壽.若服之非理,則弱志傷神,切須忌之.

此為唐代張說先生所著之《錢本草》, 一看或以為是「得啖笑」, 久而啖此文, 會覺得其味甚豐...

錢, 不重要嗎? 一定不是, 而是對待舷態度要小心. 講得容易, 老實說, 我自己行起來也覺甚難... 因為老朽本身有多少「享樂型」, 有時真係 "使o左先算" o個隻...

但有錢唔使, 亦非正道, 最近外父無端惹了一個前列腺癌, 雖然尚算初期, 理應以手術可以根治, 不過醫返都嚇餐飽.

外父平日比較慳吝, 雖然未到孤寒那類, 但幾乎從不使錢去玩樂, 我在想, 今次一個病來, 大吉利是講句, 可能以後無咩機會四圍去玩, 儲埋咁多錢 (都應該唔會少的), 倒頭來可能還是無用.

... 以此理論, 我係咪應該去買返枝恨o左好耐o既 MP40 呢..... (MP40 為德國二戰手提機槍, 近兩年電動氣槍出了新版)

不幸, 意外和自然死亡...

多份報章昨日和今天都有提到兩件事, 一就是美國大選, 二就是一宗醫療事故.

大選過一兩日再寫 (橫豎奧巴馬都贏o左咯!) 覺得有點奇怪的是一位五歲小孩因為先天心臟血管瘤，用微創手術切割時出事, 即時死亡 (行內稱 Die on Table).

原本已是數年前的事，今日又被揭出來. 為的是死因裁判官就文件上已裁定，小朋友死亡原因為「意外」 (died in an accident). 這就引起死者家人不滿，要就死因裁判官的決定做司法覆核，又要找傳媒出來，總之沒完沒了，非要開庭審理不可.

老朽之前因為在醫療機構工作關係，多次接觸死因庭. 其實今次的問題，不在於裁判官，而在於翻譯和法律上的字眼。

一般而言，死因庭的裁判官每次收到「應呈報之死亡」 (Reportable Death 在法例上有一清單說明死亡而需呈報的情況)後, 會聽取及獲取多方面有關的事件及醫學報告，以及驗屍報告 (Autopsy 或 Post-mortem report) 之後會決定有無需要開庭. 而不論開庭與否，最後都會有一裁決，一般就是以下數項之一:

1) 死於自然: (Natural Cause of Death) 這是最普通，沒有任何可疑之處的死亡. 一般來說，如果有人投訴死者生前可能受醫療事故影響的話, 這就是醫院方面最想見到的結果.

2) 死於不幸: (Misadventure) 「不幸」並不是說他們很不幸運或者 "好唔好彩死o左". 而是指當一個人死前曾被人以合法手段「搞過」, 而此手法或手段正是直接導致其死亡的原因.

3) 死於意外: (Accident)　這裡並不是說死者又係因為一個意外如交通意外而死亡, 而是說被一些手法「整死」, 但此裁決比「死於不幸」來得嚴重.

4) 死於被殺: (Homicide) 這個就真是字面意思了.

5) 死因存疑: (Open Verdict) 這個就是裁判官或陪審團未能就死者的死因達成任何決定, 即係 "審完都唔知點死".

其實, 明顯地, 是次家屬是想死因庭說 "醫院有失誤", 但他們可能不知道, 死因庭一來只會就事實作出一個關於死因的決定, 如果在文件上已經可以就死因作出裁決的話, 是無需要開庭的.

是次事件，裁判官已經閱覽過所有有關的文件和醫學報告，以至於專家證人的報告, 說出死於「意外」, 其實家屬已經可以就此對有關醫院作出投訴或是訴訟, 又何需苦苦要求開庭, 又何苦要將已逝的兒子再一次擺出來呢... 為的, 又是甚麼呢?

公平抑或公正 (第二回...)

估唔到又要寫多次呢篇.

早數月前為銀行出庭對住呢兩位茂四. 今日又再次被他們成功押後.

其實元凶唔係對面, 而係個官. 突然主動出擊的問一些對方無提出過的案情. 即時口啞... 法官大人, 你幾時變o左對面o既律師呢?

但無法子呀, 銀行事實是可能計漏了數. 法官都即時指出要由律師 (即老朽) 代為計數實對律師不公. 但對面兩位茂李之一就乘機寸寸哄, 仲不斷咁話老朽散o左庭一定o係出面吹口哨. 更無啦啦 "老作" 話銀行十幾年前曾應承佢會減佢利息云云... 明明之前問晒無抗辯要再加, 今日又提出此新奇 idea. 最慘係法官唔知食o左咩早餐, 竟然又批准佢提出新理由. 仲要銀行找一下當年有無人應承過咁話.

老朽自問是希望公平公正, 起碼都公正丫. 但係此人面目表面正常, 但一開口就得罪人. 老朽今次因為銀行計漏數, "形勢比人強", 唯有再次讓案件押後, 等銀行解畫. 不過我暗地裡已經決定, 如果此人日後輸掉 (幾乎係100%會輸的), 所按揭樓宇未及還債的話, 老朽必定會提請銀行考慮進行破產訴訟. 實行告到佢甩褲.

好老實說, 我真係好少咁燢, 但這樣賴皮的人, 點講都係離譜.

大家拭目以待, 我放長雙眼睇條 pk 點死...

你個女乖唔乖?

近幾個月, 每次見到親戚朋友, 如屬近月少見者, 定必問一句 "你個女乖唔乖"?

而我都例必回一句: "托賴了, 食得訓得痾得; 最緊要係都算係戒o左夜奶 (即唔使凌晨三四點無啦啦哭啼鬧吃奶那種)"

收到的回覆多數是讚嘆的表情，已為人父母者就會加句 "咁就好咯" 或者 "嘩! 還得神落咯!"。

老實說, 我和太太兩個要上班, 請了個鐘點家務助理幫忙照顧, 又不想請外傭 (主要是因為不想家中多個人, 而且說實在的, 外傭煮菜不好吃 - 佢地自己家鄉菜另計) 於是辛苦了兩位長輩 (媽媽和外母) 平日下午過來幫手.

為的不只是這樣, 而是之前提過的親子關係.

今晚原本想烚少少蛋黃加入開水等我o地阿女王試o下的. 點知開好了, 吃了一小口, 不對味, 吐返出來; 老朽夫人唔甘心, 又一口, 又一吐; 如是者玩了十幾分鐘... 看了幾分鐘已經知無甚驚喜, 所以我繼續煮我的金粟芙蓉炒海鮮 (即係蝦仁帶子打個蛋白芡) 同埋香茅扎肉.

原來就係咁, 種下了禍根...

晚上9時許, 雖然已經無再 "質" 佢食蛋黃, 但胃口全失. 卒之因為不適應, 上演一幕獲利回吐, 嘔到成地都係奶 (仲有半消化的奶)...

已經好耐無試過, 不過每次囡囡嘔奶, 我們都會想起麥兜故事當中, 麥太的 "如何防止嘔奶"...

1) 如果嘔奶, 畀 BB 飲橙汁, 咁佢就唔會嘔奶, 只會嘔橙汁;
2) 如果嘔橙汁, 畀 BB 飲好立克, 咁佢就唔會嘔橙汁, 只會嘔好立克...

係呀, 幾白癡, 但係對於我們來說, 係減壓的方法. 每次當囡囡嘔, 我們氣炸的時候, 總有一個會講呢個爛到無止o既 gag. 之後我們就會笑作一團, 繼續幫囡囡清理, 囡囡呢? 就只會呆呆咁望住我o地好一會, 之後訓覺... (o岩o岩嘔完, 唔通仲同你跳返 part 舞咩!?)

雷曼不再好兄弟...

早兩天帶囡囡回已搬了的老家，經過某傳統豪宅區，例牌有一堆物業地產公司之類. 近幾個月都已經水靜河飛，不只門庭不再，簡直係陰森荒涼。

唯獨某行門外貼出一聯，覺得幾得意，書曰「雷曼不再好兄弟，唯有磚頭跟一世」。

初讀甚為搞笑，但細想背後，倒是笑中有淚。淚的不是雷曼苦主慘，而是整個市場。

細想一下，就算現在買了層樓，最多也只是一堆磚頭陪你一世，仲係要你供得起先至係. 否則的話，跟你一世的只有銀行，收數公司還有執達吏。

今年年初市道還是雄起得要命，當時已想，無可能一時間那麼好的，大概都只會係虛火，不過說出來，信的人不多。但係區區見到今次海嘯，香港人似乎已經學精了，大部份人不再盲目，不像 97 98 年的好似全城都愁雲慘霧的。因為上次跌得傷，大家已經知道變幻原是永恆。

但另一方面，身為雷曼苦主的人，有一半卻有怨天怨地，話銀行「老點」欺騙。

不是就苦主唔慘。說實在的，銀行職員想你買，當然會說中聽的說話，將風險說得低 -- 而事實上，全球的金融機構都信雷曼這百年老號 -- 而最後，當百年招牌被拆，員工只有拎住個牌返屋企當紀念品的時候，大家就會想：「銀行呃我」

賺錢的時候，你們又有無想過叫 「銀行早知呃我多o的啦」呢? 世上又豈會有毫無風險的投資? 買的時候又為什麼唔 "拏大對眼" 看清楚呢?

輸打贏要，始終係人的劣根性。

回來了...

自己應承自己要寫 blog, 寫了不到三個月就休息了三個月, 真不該。

女王在估佢唔到的情況下順利出世，中間有驚無險。

話說太太過了 due date 幾天, 醫生為她催生。點知痛了七個小時後先有事。

當時太太已駁了胎心聲機，而我總算在醫院做過幾年行政，知多少醫學鎖事。見到胎心聲機讀數有點不妥，但又說不出。就在此時，原本說好會離開醫院的主診醫生和兩位姑娘撲入待產房，一手指住我話：「作死你咩，見到有事都唔出聲」 (醫生知我有醫學知識的)

原來呢隻讀數代表的是: 女王貪玩，用臍帶繞住自己條頸；再等多陣唔知就會窒息。

吁!

醫生見住讀數，只猛搖頭說道「唔等喇唔等喇...」 之後都未問我們已經叫姑娘準備手術室，當作施行緊急手術處理。

呢個時候我先開始識驚。 (事後再問返以前醫院的醫生大佬，聽了情況後都話如有此情況，連公立醫院都會即時做緊急手術)

結果呢，女王在入手術室後15分鐘內已經出來了，平安無事。不過太太就訓到隻豬咁 (因為她好驚，要全身麻醉)...

算托福了，出生時輕磅的她，三個月來倒算根基長養，而且開始識成日笑和逗人說話 (不過喊起來都幾大聱...)

我寫少了 blog 的原因，其實最主要係因為而家晚晚都要湊女, 我們不希望請外傭長駐，故只請了更貴的鐘點... 夜晚就自己動手了。

或許是辛苦，但是我們無悔。女兒 Petrina 和我們的關係很近，不似有些人，交給傭人後自己連換片都唔識，過得一排親生仔竟然唔多認得自己，呢樣先可悲。

的確，我們沒有錯過這一段時間。而現在，大概都要 get some sleep, 明天才看看有無機會再寫點甚麼了...

女．王．駕．到!!!

嘩... 驚險刺激呀真係...

詳情不日公佈... 而家要趕返醫院...

阿女王, 夠鐘喇喎...

今天是太太的預產期。

心情倒不是特別的緊張，不過 - 暫時全無特別動靜 (正常的 "bb 踢o下" 就有o既)...

不知是否因為早兩星期我們驚醫生放假，所以其他孕婦在臨盆前會做的偏方 (好似行樓梯呀, 食西瓜呀, 飲白蓮鬚呀之類) 我們統統留到本星期初才開始做。所以仲未「叫醒」 bb...

醫生早兩天已經寫定紙，叫我們如果過多兩日就去醫院做o下檢查。最緊要 check 住胎盤功能正常。

做人真搞o野，早又驚早，而家遲又驚遲...

夠鐘出去買西瓜了... 希望明天 or 後天有好消息帶給大家吧!

第一個父親節...

今天算是老朽第一個作為父親的父親節吧...!

老朽夫人的預產期是下星期，大概都要再做多些準備了。繼上星期洗衫後，是日趁「好日」，砌了那張 bb 床。

起初望住說明書，一頭霧水。對住佢成 10 分鐘，同無睇過無分別。

反而一落手，15分鐘內已經砌好...

另外又開了那張 hi-chair 的搖搖/食飯兩用椅。時為下午五時，雖然一早約了家人晚飯，卻是這時才想起，我在父親節砌了給 bb 的床。

有點點感動。

想起一句「凡事先付出，才有收穫」。望住張床同 hi-chair, 有說不出的感覺。

就在這時，老婆捧出了一份自製的栗子甜品 - 我的收穫 - 巧克力脆皮栗子蓉加 haagan-daz 香草雪糕面配脆米餅底。說是我的第一份父親節禮物。

說實在的，很受用。食o左之後甜入心。

晚上第一次以父親的身份同埋家父 & 一家人食飯，順手睇o下場地o岩唔o岩擺滿月。結果係連場地都未定，酒家的經理已經擦晒鞋咁加送了甜品糖水生果等，服務也好到加零一。 先賺了。

一場師「亨」弟...

早兩日收到一位中學舊生會的大大大大師兄來電，有少少法律事務請老朽相助。

有點點受寵若驚，因為母校多年來已培育出不少比老朽成功何止百倍的律師，大大大師兄找老朽, 可算是老朽的榮幸。

雖然最後事情的發展是老朽未能全力相助而要轉介師兄去別間律師行，不過老朽都略盡棉力，給予少少意見。

不知從何，與師兄談起他家族生意的其中一瓣，便說到一間由赤柱開到銅鑼灣，再開到中環的曲奇餅店。更說到它的另一妙品 - 鳳梨酥。

吃過或者聽過的朋友都知道，此鳳梨酥與台式的鳳梨酥不同，並不是粉粉的餅皮，而是真的很「酥皮」，在網上找到呢張相...

按此看 openrice 的相...

多年前試過一次，當時已覺得好吃得要緊，之後一直都無機會買，現在它的名氣大了，更難買，報章謂訂鳳梨酥者都要等三個月。訂曲奇也要等上星期。

卻不知原來呢位師兄原來因在赤柱也有生意，和此家餅店相熟的要緊，只消一天，無啦啦師兄來電，說道明天會有人送兩罐上來，「師兄多謝o下你幫手, 請你食啦」云云。

就今早，回到 office, 檯面已有兩罐好好的放著。

我們「高記」就係咁，街上唔識就一件事，一知道你係師兄弟後，傾多兩句自有親切感。大家幫大家，真的似一家人多點。

想起一會後開了來吃，愈來愈覺得自己無投錯胎入錯校...

舞動．奇蹟!

原來上星期的心情依然不佳之餘，還漏提了一樣緊要得很的事。

對上的星期一，又是去醫生處覆診的日子。我們5點到了銅鑼灣，醫生問我太太「點呀... 頭仔轉o左未?」答案，當然係「未」。所以我已經連日子都擇定等開刀。

醫生話「去照一照先啦...」之後便同我太太入了超聲波房。

我還在整理我的 pda 找日子，之後便聽到醫生在房內好大聲 (幾乎係叫出來的) 話「唔係喎! 轉o左喎!」

我同太太眼都凸埋，望住呢個奇蹟o既發生... 已經 36 週了，原來係而家先轉，即係未必有咁快, 多數唔會「提早搶閘」了... 都係好事來的, 因為醫生跟手便同我們說她下星期中放一星期假，有要事要飛美國云云。

其他的，現在已經不重要，不過又想起 - 如果係咁的話，咁咪由「擇吉等待」變成「隨時候命」?

果然，呢個世界，係有奇蹟的! (Thank God!)

黑雨下...

上星期六黑色暴雨，本來打算洗定我們為女兒準備的新 BB 衫的, 都沒有洗(又要手洗又要晾乾，落雨落成咁點乾呀大佬...) 而且當晚小弟仲要去為朋友的朋友證婚 (無錯, 咁新人唔會因為黑雨就改期, 而老朽亦絕非趁火打劫臨時加價之輩) 亦因為咁，老朽硬著頭皮回到公司，為的是補回上星期趕不及的工作 (對不起，我們這些老式公司，係不可能有五天工作制的) ，還有打印一對新人當晚要用的特訂誓詞。

就係咁，老朽就在黑雨的早上，乘了 90 元的士由太古回中環... 亦因為咁，竟然成為了當日公司四大烈士之一!

話說在樓下，見公司附近水浸，唯有四圍想辦法「走後門」，找貨 lift 之類，找了好半天，後面傳來熟悉的聲音：「老朽!」(當然是叫真名) 回頭一看 -- 大老闆是也!

我不知大老闆為何會回來，只覺得暈得一陣陣，又再搞了好半天，終於回到公司，只見另外還有一位律師和一位師爺級的同事也在, 往其他部門走一轉，只見像 Resident Evil 一樣, 鬼影都唔見隻... 而大老闆塊面就同暴雨警告一樣, 時紅時黑。

呢個時候，我梗係匿埋打印我的誓詞，點知大老闆沒頭沒腦的走過來，突然說「你咁都肯返，多謝你! 抵我上次幫你!」 (指的當然是上次的 "Saving Private 老朽" 事件)

之後翩然而去。

嘩... 個心即刻諗「好在有返」!! 與此同時，也暗為另外無返的幾十位同事叫不妙...

無名腫毒 - 散瘀篇

早前的事件，更進一步發展成為 "Saving Private 老朽" 行動。

老闆早兩星期開始見工，目的是招聘一位人士，此不尋常舉動，似是要為我的未來「鋪路」。但原本另有文章...

「招聘會」開了兩星期左右便收工，不是因為已請了人，而是後來有老闆告訴小弟 - 請不到人。

其實老朽相信，真的要請, 正如欲加之罪一樣, 何患無辭。

尚幸各位老闆依然覺得小弟無辜，又或者尚有可為之處，網開一面 (原文作：網開三面)，側聞大老闆更多次為小弟找有開對口當事人「解畫」，以大老闆平日所言所行，此為稀世之舉動，老朽流涕都來唔切。只係時機未至，老闆未可對老朽言明。

好了，到了今天，大老闆將整件事揭盅，心情舒泰了不少，大概是上主記起小弟女兒即將出生，又記起各人為小弟的祈禱，更記起一句「上主給予的軛是你揹得起的軛」 (原文已經唔記得了...) ，所以將此事來個了結。

今次事件，記起我的師父當日說過，人生有太多的無名腫毒，根本防不勝防，憂慮也是「戇居」的... 這次，大概也是這句話，使我更有力量撐過去...

感謝上主，也感謝上主派來幫我渡過困難的朋友!

白癡的我與平安的我...

呢排講親都係近期的不開始事件，但今日我覺得有少少 relieved... 因為我和公司老闆開心見誠的傾談了好一會。

其實係我的老死老闆級同事鼓勵我去找大老闆的。雖然他無咩機會睇到我的 blog, 不過我係真心多謝佢埋大老闆的。我一直都以為大老闆很「老闆」，不過原來有時又未必...

但係最可惜o既係我們無辦法使個舊同事相信我真係從無呃佢。大老闆話佢要用o的時間去 figure out 點做, 同埋我真係第一次聽老闆講佢其實好 like 我, 做到o既佢會做之類。佢講時我真係睇得出佢係真心講的，所以我都幾乎感動到喊。

最得意係，我同大老闆都不約而同咁話我們有為此事祈禱。佢亦安慰我 go for normal life 先, 因為佢都知我就來做老豆嘛。

但始終，我暫時還是未知道我之後的路向 -- 究竟，我會面對甚麼呢?

唔講呢樣住喇，講另一樣開心少少o既事。就係昨晚 (5月18日星期日) 陳副主教和我堂區的婚姻家庭牧民組組長等來了我家，仲有另一位我堂區的準媽媽教友和她我家人一起。而我當然就有我太太，我也請到我的父母和我的妹妹來一起...

搞咁多人做咩呢? 其實有兩件大事：第一係我的「新屋」入伙已經三年幾近四年。但作為天主教友的我竟然還未找神父「聖屋」。 (「聖屋」只係大家 common 咁叫, 其實意思係祝福一個家庭和入面的成員) 於是早兩三星期 (當時我公司仲未有呢單大件事) 便趁副主教提起我和另一位教友即將分別為人父母，想光臨寒舍為兩位準媽媽及胎兒降福 (稱為「產前報佳音」)，請他「順手」「聖」埋。

昨晚副主教尚要主持彌撒，要晚上7時才乘另一位準媽媽教友的車趕過來。

始終我都係一個比較喜歡宗教的人，在聖屋和「報佳音」的過程中，我感到相當的平和與喜樂。的確，我這幾天的不開心都暫時放下了好一會。

內心的平安，我已經等了好久，這一刻，我和太太還有一家人 (雖則家父係正式佛教徒) 認真的享受了好一會這片刻的平安。還有那覆手的儀式，由每一位參與者輪流替的話兩對準父母還有兩位 bb 按心祝福，真使人有溫暖的感覺。

禮儀基本上一小時內完成。我咁為食，而整個過程又在傍晚進行。當然係要準備晚餐食物啦。不過近期心情的確受不少影響，所以原定想整好多野食都無整到，只係整o左豉油雞翼 (用李錦記汁底自行再加入桂皮花椒八角薑同酒)，烚蘆筍，泰式扎肉，薯仔沙律，之後就叫了 pizza 仲有一o的中式飯 (始終有長者在，都應該有少少米氣到肚的)。太太就整了最近學的 panna cotta作為神秘甜品 (知道副主教鍾意食 dessert 嘛)。

結果係：太太的 panna cotta 大獲全勝，包括副主教在內的來賓都對此甜品讚不絕口。

有機會的話，將 receipe 在此公開 - 不過要問准老婆大人先得。

雪中送炭的人

這幾天，在有點茫然中渡過。

其實上星期六是我秘書的結婚大日子，不過去了觀禮後匆匆回到 office, 無同部分一向都 friend 開的同事 (尤其係之前提過係好友那位老闆級同事) 去食早餐。

講真，係自己無面。

我係無做錯，但係累到人。而且人o地都未必想對住我。仲邊好意思呢?

幸而，我都仲有一些好友，教會的或者係其他的人。我知大家有為我祈禱。

更幸福的，是我有我的家人。父母和我妹妹，當然還有我太太和她肚內的囡囡。他們真係極關心我。亦開導我。

但係另外，我知我太太其實仲係煩緊囡囡 -- 已經 34 週了，但係個頭仲係側側o地。未有向下轉 (即係安全生產的頭上腳下)。這意味著，愈來愈有可能要開刀。

或者，囡囡已經好勤力，只係有少少位 "click" 住。不過我始終有點擔心。

太多o野煩了。今舖天主畀我o既考驗，確係好大, 好大...

一子錯...

早幾天的惡死舊同事事件，發生了天翻地覆的變化。

我一向都有以《易經》起卦來看我的事件，並深切覺得易經的卦象是 statistics, 與宗教 (天主教) 是沒有牴觸的 (這是個人的想法, 但聖經其實有一派學說是反對的, 遲些再談)。

六十四卦 - 頤卦
第二十七卦　山雷頤　艮上震下
頤：貞吉。觀頤，自求口實。 -- 應該是吉祥的

上九(即卦象第六爻) - 由頤，厲吉，利涉大川。
象曰：由頤厲吉，大有慶也。
　　在君位的「六四」，依賴「上九」，以養萬民；所以說，萬民是由「上九」所養。不過，「上九」是沒有地位的位置，由於君主的信任，地位竟然凌駕君主，就不能不戒慎恐懼，才會吉祥。然而，「上九」剛毅，又在最上位，能夠排除一切困難，毫無忌憚的救濟萬民；所以，「象傳」說：大有吉慶。
這一爻，說明供養是善行，值得冒險。

其實就係因為咁, 我就打o左去畀惡死舊同事。而事件的發展比想像中來得更煩...

上星期中午，本來是準備放假的。但上午上庭後秘書來 sms - 「大老闆搵你搵得好急，散庭後速回」
其實已經知道唔係好野了. 果然，回來後三司會審，照肺照足一天。真係肺都照甩。

我自問係問心無愧，不過大老闆有少少抱懷疑的態度。咁都無他o既，始終我係太信人，而發生在我身上的事真係有可能使人誤會的。我明白老闆們的處境，因為他們其實還要代我向自稱受害的舊同事解話。

大老闆仲話個客 (舊同事) 想去投訴我。我心諗 -- 唔係呀... 係都唔會為o左呢少少錢擺自己上檯啦！

今次講真，正如之前提過，有衰都係衰白癡，衰信一個以為信得過o既人。就係咁中招了！

這幾天，我不斷的祈禱；雖然我係無任何不軌，更加係無啦啦整撻 "la"。

最新的發展係，大老闆其實今次已經好幫我，佢都同人解了畫，說我係信錯人之後衰白癡。但係另一方面，如果以舊同事方面去睇，確係有點匪夷所思的。其實，我雖然係無錯，但係我真係想同舊同事講聲唔好意思，我可能真係畀人利用了，又或者確係太白癡。

至於卦象，點解係吉呢...原來我睇漏o左一段...

「象曰：山下有雷，頤。君子以慎言語，節飲食。」 - 睇來，我那通電話係打錯了... 唉...

而家，唯有希望事件慢慢丟淡過去啦。今次，真係瘀到無倫了。

有錢人的脾氣

去年的四月，我無啦啦畀人擺o左上檯。原因係因為我想幫舊同事。

舊同事係女性，一向我形象比較硬朗，而且有一個相當富有的丈夫。 唔知係咪因為咁，所以佢亦比較惡。不過我同佢做o左幾年同事，一直都估唔到佢惡成咁，簡直係人o地話「港女」中的佼佼者。

去年的事，由一單極普通的小索償引起。當時佢因為識我老細，又係我舊同事，所以想搵我幫佢追返o的錢。

初時相安無事，點知問題來了。

我找了一個之前幫過我工作的中間人去做一些驗證工作，在驗證後想找她傾一傾。剛好佢放假，又找她不著，唯有著中間人叫佢 hold 住先。

點知過了兩天，無啦啦收到那個中間人話我知已經整好o的o野 (咩野就唔講喇, 總之係普通o野)。我已經覺得勁奇怪。但係又搵唔到惡死舊同事。就在呢個時候，中間人又問「叫個客 (即惡死舊同事) 賣o左件野畀佢咪得囉」。

我心諗：「出事喇」

聽過有人話過呢個世界有o的「借屍還魂」呀之類事件。已經驚o左一o野。過多兩日卒之打到畀惡死舊同事。但係那時已經太遲了。車，已經整好o左件o野，聽講話仲整得幾靚添。

當時莫講話惡死舊同事，連我都好燢。惡死舊同事講明唔會畀錢，而亦因為咁，無啦啦惡死舊同事連我都嬲埋。最後係惡死舊同事話要自己丟o左件野佢。

過了好幾個月，好似無晒事咁，但係那個我已經無再聯絡的中間人無啦啦又打來，話 check 到件貨無丟到。所以呢，就即係話呢位有錢o既惡死舊同事 -- 其實係用o左人o地整好o既o野, 但係又唔畀錢。

其實去到呢度，我見個死人中間人可能知道自己衰，所以無晒聲氣，已經諗住收皮o架喇。點知...

早幾日就係收到個 fax, 竟然係中間人找我。

即刻打畀條友，佢話覺得點解有人可以咁惡，用o左 service 唔畀錢。咁我就唯有死死氣打畀惡死舊同事，點知唔問由自可，一問把幾火。佢即刻連我都鬧埋，仲話我係咪同佢o地夾埋，又話有咩事就打畀我大老細「篤」我同埋話我辦事有問題。

講真，我自問係好客氣，但係亦係不卑不亢咁打畀佢。我唔係「死狗」咁「翳」佢喎而家，我係平心靜氣慢慢咁講，但係佢就好似一來已經想殺人咁。仲話「我要投訴都仲有好多渠道o架」 -- 典型o既有錢人對白，使人極度討厭o既 pk 式廢話。

但係講真，畀佢咁講一o野，咩心情都無晒。我最嬲係我做好人，但係竟然畀惡死舊同事以為我係夾埋其他人謴 (即係廣東話「昆」字) 佢。早知當日就咩都唔整，叫佢自己搵人搞晒佢，初頭諗住搞咁好服務，點知而家畀人鬧到飛起。

問題係，而家單野點算好? 老實講我真係唔怕去到一個地步係佢o地班人告來告去，最多上庭做證人，我怕煩係因為佢話我要同大老細講。我呢個大老細，平日係 ok 好人的，但係一有煩野的時候就一定會覺得係你o既問題。大佬呀，我仲有成十年八載對住佢 (佢有排唔會退休而我亦無意離職)，我仲要等升職o架嘛! 畀條咁o既八婆 (原諒我一定要用粗口!) 累到就真係唔抵啦! 老實講，真係唔知會發生咩事。

說到尾，今次事件，我係一個白癡的蠢角色。我覺得我係太容易信人，所以當日就係咁，畀人過o左一幢，仲係大大幢o個隻。唉，今次就當係買個教訓。日後如果工作上仲會對住條惡死舊同事，都唔知有無手尾跟添呀...! 頂!

懷胎八月的心情... 太太，你好o野!!

寫的, 當然不是我自己懷胎，而是太太。

太太懷了孩子，一家人當然高興到飛起，講真兩老已經恨抱孫恨到出面，如今 bingo 就梗係大家 happy。

一直以來幾個月我同太太都好小心, 當然到而家都係小心為上啦。但係原來有o的o野, 你小心都小心唔來的。

BB 無事，呢期都不知踢得幾勁，直頭見到太太的肚皮撐o下撐o下咁，都幾得意。

不過太太自己呢，早排o的無名腫毒又無啦啦翻發，而家又話無啦啦多o左個瘤... 雖然應該似係纖維瘤，但係都使我經歷o左成個星期o既擔心。

講真而家我都未擔心完，反而太太就好似無咩事咁，覺得「有瘤又無咩事，咪好似醫生咁講生完走去切o左佢囉」。輕鬆得很。

都仲未算，醫生昨日下午話我o地知， BB 到而家 32 週都仲係成個泰國臥佛咁打橫訓o係媽媽肚內，舒服得緊。不過亦即係話，佢仲未將頭拎到準備出世的位置。意味著有可能是 size 又或者臍帶的問題，雖然唔係極大問題，但係醫生話過兩星期都未點轉位的話，就要考慮開刀。

開刀喎... 之前講就有講過o下，但係真係到現在醫生再認真提起，自己先識驚。我昨日一聽醫生咁講，其實我係成個人軟o左一o野，無晒反應的。因為自己做過醫院的類似行政工作，所以對於醫療事故和風險有一定程度的認識。無疑現在香港的醫療系統比全世界多數其他地方 - 包括歐美 - 來得優良 -- 所以唔該大家唔好再鬧喇，去第二o的地方睇o下就知 -- 但係當日工作對住的是其他人的事件和檔案，而家就有人話我知有個 risk 放在自己面前。醫生仲問 「咁你們想全身麻醉定係半身呢...?」

其實我已經有少少頭暈，但係仲要扮無o野咁，其實都幾怪。奇就奇在太太又係o個句「到時又睇o下全身定半身囉，我都唔知自己驚唔驚o架」 說時不無平靜，好似一早預o左咁。

的確，一向太太都是一個比較 "蛇瓜" (scare) o既人，今次的表現令我真係五體投地刮目相看。一直都口 "up" "up" 咁話「媽媽有幾偉大」；昨晚我自己一個人掉了一滴眼淚咁大把，為的不是太太即將要做的選擇，而是她的勇敢同埋偉大。

***

同場加映小插曲：跟相熟的基督徒同事講起，佢又比較轉接咁講o左比前文提過死黨同事知 -- 咁都唔係壞事o既... 起埋死黨同事走了過來，真誠咁傾o左幾句。當然，我唔知咁係咪代表 "friend 返"，不過都係破冰之旅來o既。

煩惱的一週

最近幾天真係煩到抽筋。工作上已經要無啦啦應付來自死黨同事的無形壓力 (咁點都係覺得怪o架嘛!)；另外，位於中環的老家又剛被某發展商收購了，而家家中兩老和我的小妹又煩緊搬去邊...

兩老其實唔係太老，但係都六十幾同埋五十幾近六十，講真如果要佢o地轉區的話其實極難。因為長者始終難適應新地方，但另一方面，因為小朋友快將出世，我和太太固然樂於讓我媽媽照顧，但係太太當然也希望可以大家住得近一點。這就觸發起老父重提當年我們搬得遠的事件。

這還不算；更"攞膽" o既係因為老家係唐樓，地方大而且見使，故此屋企人 (其實我自己當時都係) 儲埋的物品多不勝數，有用的無咩用的，以至於「雞肋中的雞肋」都有很多。

問題來了，就是要找新的地方，又要同區，又要多地方放東西，更重要的是在我們可負擔的價格內 (即起碼收購價錢可以全數付清，無需無啦啦拎錢供樓)。 我們一直以為自己早幾月前跟發展商的洽談是佔了上風的，但係到現在要買樓的時間，才知其實樣樣o野都只係o岩夠畀，所以一家人頭痕得很，也因為咁而大家鬧了幾場交 (雖然都唔係太大件事)。

問題又唔只咁喎, 仲有我又唔可以煩到太太，講真佢陀 BB 已經辛苦，再加上畀醫生講中o左，原來陀 BB 係會使以前的舊症翻發的。所以而家又要煩多一樣，就係成日同太太睇醫生, 幸而暫無大礙但係都要 check 住... 所以，呢兩星期其實係極度煩惱的，但係又講不出有咩實際o野煩，矛盾得要命。

有樣好, 就係我有宗教信仰，我會祈禱，但係始終我都係凡夫俗子一名，而且我其實係一個唔灑脫的人，我會介意人o地點睇。所以其實我都會唔開心，因為今次，老實講，我真係一個好無辜地被誤會的傻佬。

唔知呢舖要煩幾耐喇... 唉...

人際．人脈 - 續篇

早兩星期提過的事件，死黨同事後來說過一句「無o野o架喇」，一直以為已經終結，無事無幹。

這兩天察覺他好像和往人大有不同，故此借機會便向他說幾句私人話題。點知得到的回覆是「以後你呢o的o野唔使同我講o架喇」。

心都灰晒。

講真我一直都係待人以誠，尤其係呢位死黨同事。今次就係因為我另一位同事的事搞到佢以為我唔同佢「早響」，所以嬲o左我。

估唔到男人可以嬲咁耐；最抵死係佢話自己「無嬲喎」。

諗起當年大家幫大家，我有事時佢幫我唔少，到o左佢有工作上以至於私人問題要幫忙時我都即刻出手相助義無反顧的；倒真係幾 hurt...

究竟我在呢件事上，有無做錯呢? 另一位同事唔想我講，我為了守呢個秘密忍得幾辛苦。但係倒頭來又係自己唔 happy。

我之前一直都覺得就算畀我揀多次，我一樣都係會繼續守呢個秘密。但係而家如果再問我，我都答唔到究竟我仲會唔會守... 因為事件對我的 impact 實在比想像中大。

天啊，主啊，點解人要咁多猜度同埋猜忌呢...??

堅毅力行五十載

日期: 1958年4月10日
時間: 下午5時30分
人物: 太多，包括白英奇主教
地點: 香港半山羅便臣道2號

高主教書院，在今天由香港天主教教區主教白英奇主持奠基，標誌著天主教會在香港籌辦的第一間「直隸」學校，也是全港學界最高大樓的學校，正式啟動。

天主教不少辦學團體，早於百多年前已在香港扎根。然而，直接由羅馬教廷辦的學校，卻原來要到 1958 年才由高主教書院創此先河。而命名則是用香港開埠第一位「宗座代牧」高主教 (Bishop Timoleone Raimondi) 的名字 (不要問為何這個字會譯成 「高」, 我查了廿多年都唔知! 另, 宗座代牧即教區主教的「雛型」，管理一些新或者未成熟的區域，有機會再為大家詳解)...

x x x x x

日期: 2008 年4月10日
時間: 下午3時正
人物: 都係太多，包括陳日君樞機
地點: 香港半山天主教聖母無原罪主教座堂

一晃，時間已經是 50 年之後。以香港的學校來說，50年不算是很長，因為百年名校比比皆是。不過用 50 年而有今天的成就，高主教書院一班「高記仔」 (我都有份o架!) 大概是功不可沒吧! 而「全港最高學校」的 title, 也保持了近 40 多年，現在還未知已否被打破...

今天, 小弟有幸在天主教主教座堂中參與「高記」金禧慶典的開幕彌撒。能見證著一班良師益友成長，固然高興；另一方面，見到垂垂老去，有點老人痴呆的榮休中學校長莫禮理先生，還有年屆 82 歲仲「大大聲」的榮休小學校長謝錦裳女士。也讀到紀念品 pack 中當年盛世，還有已故的「惡死」肥校監祁良神父 (其實不知幾好人!!)；加上大家都唱到熟的天主經和校歌，還有師弟曾奕文為金禧校慶所作的「高歌．濃情」，不少師兄也如小弟一樣，唱到一半聲已哽咽...

人際．人脈

自問人際關係做得不錯，不是因為我圓滑，因為圓滑只可以帶來生意和點頭之交，是交不到朋友的。

對人的心是真的，但有時，有些東西是「不能說的秘密」，不是不想說，而是不能說。又或者是一位好友講明「唔好同任何人 講」，那就算係另一位更好的朋友，你也不能說，這是對人的一種承諾。

為一個, 或一些人守這類的承諾，往往要付出代價。最近就係衰o左呢樣o野，為了一個我無說的秘密，一位好友加同事覺得我「對佢唔住」。

一直以為係o的「同事三分親」的劇情，竟然發生在我身上。老實說，感覺十分難受。

不要以為男人老狗無這些問題，這回我不幸「辣著」的，就是一位男同事。

估計他不會有機會看到這文章，所以大膽寫出來。想說的是，其實我是最慘的一個。

另一同事的秘密本身不能說，但這秘密其實會影響我的工作的。但也不能說。只可以自己「一條友」頂晒。

到這秘密公開的一刻，好友便經其他同事質詢：點解唔早o的同佢另外講？語氣不無責備之心。

講得的話，一早講o左啦！這「秘密」，我是受工作上的影響。但係當事人就不只工作，而是整個人都會受易影響。我覺得，就算當事人無叫我，我都不應該講。

今鋪唔知好友同事會嬲幾耐，但這次我覺得我先係無辜o既受害者，希望大家體諒體諒...

我現在宣佈, 你們正式成為合法夫妻!

相信大家都聽過標題那句吧？ 不錯, 就是時常大家都覺得會由證婚官或婚姻監禮人 (律師證婚的正名) 說出的話。不說不知，其實呢句, 係杜撰出來的. 證婚官或監禮人根本不需要講這句。 不過，後來發現，原來唔講呢句，好多賓客係唔知道「禮成」同埋係時候拍手了，所以呢句咁 「娘」o既說話最終都要說出口。

幫朋友做得 wedding planner 多，自己已經變o左個婚禮狂. 早前卒之畀我「恨到」，成為監禮人了。在上兩星期的復活假前後，開始為朋友和一些客人證婚。

第一次難免有些緊張，例如法定要講o既開場白的一句 「... 你們o係本人同埋在場o既親友等人士見證下，公開表示以對方為你o地o既配偶，並且為此簽名為證之後呢...」就變o左做 「「... 你們o係本人同埋在場o既親友等人士見證下，公開表示以對方為你o地o既配偶之後呢... (漏o左成截!)」。好在即刻記得，保得返...

成日覺得，新人搵律師幫手證婚，唔係只為o左時間上可以多些人睇。最緊要的其實是一份浪漫和喜悅。作為教友的我，深知o的新人其實想行教堂，又或者一o的靚得來似教堂的場地；但係我都會建議新人想想，行教堂是為教友而設，背後原因不是因為靚，而是因為想教友記得自己是天主 (or 上帝) 的兒女。

說回那一份浪漫與喜悅，自己結婚時都想個個細節都做到呢一點。不過可惜呢個世界係無咁完美o既，亦係因為咁，所以我先會早兩年開始自動請纓為朋友義務做 wedding planner (哈哈... 雖然o的朋友都好識做，畀好大封利是我...) 。而家我就做了一個監禮的角色，o係 「我要做好呢份工」o既前題下，我多數都會除o左必要的入紙 (即係擬結婚通知書) 工作外，會問o下新人整個婚禮有咩唔明o既地方，同埋幫佢o地自訂佢o地鍾意o既誓詞。當然，自訂有個限度，總不能公開地說「我愛傻豬」之類o卦！

自從第一次幫人證婚後，發現自己會學o左神父，無啦啦在新人簽字後講兩句好似講道咁o既祝福說話。其實我係無一早寫稿的，只係當日或者當時的少少有感而發，希望一對新人能夠更加記住自己簽字一刻... 不過，往往一講呢兩句，就會整喊個新娘 (我都唔想o架！)。

上次有一次去酒店幫一對新人，佢o地已經住埋一段時間，而且識於微時，如今得成正果，大家都高興得很，而且佢o地o既表現似係「老夫老妻」o個隻，點知一埋位，新娘已經開始喊，之後在新娘旁準備幫我手傳遞簽證書的兩位姊妹又開始眼濕濕。好快就成班姊妹全部一齊梨花帶雨的，都唔知好笑定係扮鎮定好 (仲驚整濕張證書o架大哥大姐...)。而不幸地我手頭上只有一張紙巾 (大佬, 我之前提o左新郎哥帶紙巾o架喇!)，唯有遞給已經呆o左o既新郎哥，等佢幫新娘子抹一抹...而我自己，也浸淫在這個感人的氣氛中，搞到我「宣佈」新人成為合法夫妻時，幾乎漏了請新人起立。

三年前的四月二日

不知還有沒有人記得三年前的今天，天下同聲一哭？

2005年4月1日，我當時初任主教座堂的堂區議員，突然收到通知，謂主任司鐸 (副主教) 收到時任主教的陳日君爺爺通報，說「阿公」若望保祿二世病重，教會要求全球教友為他祈禱。當時我們即時組成了一個編制，在那幾天輪流和各處的教友一起在主教座堂內祈禱。

直到4月2日晚上，我祈禱回家後數小時，我依然難以成眠，看著有線新聞，再過了數小時 (好似快天亮了)，便傳來若望保祿二世病故，已回天鄉的訊息。

一個奇特的人，一次奇特的偶遇，使一個演員轉化成為千萬人的教宗，也一手促成了東歐鐵幕的倒下，更使香港天主教會經歷歷來最多人成為問道/慕道者的一年。

羅馬宗座的封聖程序已經展開，相信在群眾與教會內人士的要求下，若望保祿二世在不久的將來, 名字會加上 "真福" 二字，甚至乎一個 "聖" 字。

很多人，尤其是基督教朋友都會問為何教會會有「封聖」的程序，而權柄又何來呢？

其實已故教宗若望保祿二世在他的一篇「宗座憲令」 (Constituto Apostolica) 有提過，「在... 人當中，天主在各時代都揀選了許多人，他們緊隨基督的榜樣，以鮮血或英豪的德行的修煉，做彰顯天國的見證。... 教會從基督宗教創始時，即常常相信宗徒及殉道者和我們在基督內有更密切的聯繫... ... 許多人加入他們的行列，... 彰顯了天主的奇恩，因此獲得信徒的敬禮與仿傚。... 宗座以最大的尊敬和馴良的誠意接納上主的標記和呼聲。自無法追憶的時期開始，即受付託執掌訓導，聖化和管理天立子民的職權，因此將有愛德及其他福音德行光彩的男女展示給信徒仿傚，敬禮和呼求，並且經過應行的調查後，以隆重冊封的行動宣佈之為聖人或聖女。」 (參閱《天主教法典》) 「因為聖德是教會宗徒工作和傳教神火的秘密泉源...」 (《天主教教理》 para 828).

我熱切期待若望保祿二世早日被教會 recognize 神跡並封聖，畢竟，這個世界上，不幸的新聞太多，我們需要一些這樣的喜訊來「沖喜」一下...

自製吉野家牛肉飯 - 牛丼

好耐之前在一個飲食版 newsgroup post 過. 係日本鄰居教兼睇 yahoo japan 再自學的. 早前再整多次, 所以 post 出來自娛娛人...

材料:

薄牛肉片 (可以係 citysuper o既 kiritoshi 牛肉, 唔係的話可以買火鍋牛 - 百佳o既極品加拿大肥牛就似樣喇, 盡量片薄), 切到兩三吋長左右, 每人一百 gram 左右, 睇你幾大食.

洋蔥 (大約一人半個左右, 都係睇你幾大食) 切細少少 size

老薑一片, 切幼或切絲, 僻腥用

汁:

Dashi 汁 (唔知係咪譯做 "海鮮湯底" 喇) 見圖細細樽, 佢話一茶匙少o的o的 (4gram 左右) 可以開 600 ml 水, 我試過都差不多, 今次只要用 300 ml 左右, 所以開半茶匙多少少

日本酒 幾湯匙 (唔使太多, 兩三匙都 ok) 清酒都得.

味淋 (相中間個支) 又係幾湯匙 (我用o左三湯匙多少少)

日式醬油 (用萬字已經得, 用中身那種) (日本朋友教仲會用隻淡豉油, 不過唔用都得 - 費事又買) 4 湯匙左右

糖 (白砂糖) 3 湯匙 (朋友用 4 湯匙我覺得甜得滯)

先切好料, 將 dahi 汁加薑用小煲煲滾, 再落其他汁料 (或者將其他汁料撈好先,到 dashi 一滾一次過落), 再滾時落牛肉, 煮兩分鐘, 汁料加加埋埋o岩o岩蓋肉面就得.
牛肉差不多熟 (好快o者, 因為薄) 就落埋洋蔥, 如果汁面有o的肉渣o係度就用個小匙整走佢. 因為洋蔥會有少少出水所以頭先o的汁唔使太稀, 之後蓋上個煲細火焗三幾分鐘 (我好似5分鐘o卦...)

食得! 加汁撈飯或者整麵都可以... :)

留意最好避免用太肥的靚牛, 和牛更加不要, 因為太肥得來會浪費了牛脂.

服務態度

是日因家中洗衣機無故漏水, 特登蛇王回家等 惠 x 浦師傅到寒舍修理。



之前已經有師傅 check 過一次, 確定了是乾衣的部分出事, 要換一個甚麼「入水掣」。預約了時間後，今天上來的是一位未見過的師傅。

初時都還 ok, 向我說地板會有點濕，問我哪裡可以找到地布之類。告訴他後我就逕自吃我的麥當當 (大佬呀，蛇王就只可以食這些...)。過了好一會，吃飽之際，廚房傳來一陣水聲，料是師傅大人差不多了。回頭一看...

不看由自可，一看把幾火。佢老哥竟然將我用來抹手和抹洗淨蔬果的乾淨布用來抹地！！！

一睇就知那幾塊布係乾乾淨淨，白璧無瑕o架啦！！ 我瞪大對眼望住佢，細細聲話... 「你用o左呢兩塊布呀...？」 (真係細聲但係聽到o個隻)

呢位師傅仲毫無悔意，望望我，全不答話。之後又繼續在抹o左都唔乾o既廚房內遊走。我便在地上取回那兩塊已經開始被玷污的乾淨布打算洗乾淨...

之後我已經無心機理會師傅，繼續睇我o既有線新聞。再過多一會，師傅聲稱已經整好洗衣機，我便入廚房再看...

這次見到的是一片澤國汪洋。

師傅一邊極速收拾，一邊說「你試試洗衣機係咪已經 ok 返啦」便消失於我家內。剩下我一個人站在濕到無止的廚房，地上還有其他淋淋的地布，竟然還有數「舊」濕淋淋的廚房用抹手紙在地上！

我心想「你有無搞錯呀」，此時，已經決定了，平時甚少投訴的我，要打破沉默。

突然記起，我今早浸定好些雪耳，晚上用來煮甜湯的。望多眼，已發現雪耳上浮了少少污漬和油漬。

見到呢位師傅，實屬本人不幸。而下一步的不幸，恐怕要降臨到呢位師傅身上...

法庭雜記... 公平抑或公正? (之一)

今日係其中一間銀行客戶一單 case 上庭的日子. 本案一再被押後，原因只因為對方欠債者不斷的以自己不是律師為由，一次又一次的推諉。

觀乎其言行舉止，不是律師但可以用法庭術語，而且存入的宣誓書 (即行內稱為「誓章」者) 雖以中文書成，其公正企理真令我輩狀師瞠目。相信其背後已有律師或律師行辦事的朋友教路。

第一次上庭已經是去年8-9 月的事，當時我一時好人，他們向我說想與銀行接洽還款，便覺得應給予他們機會。我以往也有這樣做而多數人也真的與銀行「講數」，更可以獲得利息寬減 (銀行唔係想整死債仔o既!)。不過好可惜，我今次，畀呢兩位老兄跣o左一o野。之後他們更用其他理由如申請法律援助 (大佬呀，你有兩層樓在手點法律援助呀！？咪玩啦！)，向法庭投訴銀行計數出現問題等等。 結果法官也無可奈何，為免自己被投訴，唯有不斷的畀 adjournment (押後)。以前做律師可以好威，而家？對住呢o的我們稱為 "in person" 的大哥大姐，真係俯首稱臣都來唔切。

基本上，我想講的，只有一個「頂」字。頂！

老朽的第一天

三十幾歲人了, 才第一次學人寫 blog...

點解會寫? 原因實在太多. 之前有朋友話 "老朽, 你成個江湖佬咁, 唔寫幾句o徙o的喎!".

另外, 我係一個鍾意分享的人; 我的修女朋友同我講, 我係九型人格之中o既 2 搭 3 (定係 3 搭 2?). 講真,2 穿 3 落飛倒還懂一點. 究竟我是何許人也就自己都在探索中.

更大的原因是, 我和太太快要添一個小生命. 很多人都會選擇在這個時候為小朋友建一個 blog. 我不知我這樣做是對還是錯. 但我想分享.

這個想分享和感恩的心情在近兩個月更加明顯. 在教會和神父開會時, 神父主動說要探訪我家, 為我的非教友太太和將出生的小公主祝福. 我這個教會的叛徒 (已經有整個月無正正經經的參加彌撒了!) 還得到這樣的待遇, 仲唔感恩?

當然, 我極求為食的性格也是我臨老寫 blog 的原因之一. 成日有 friend 問, 食咩好? 或者我慢慢建立起呢個 blog 之後, 我可以叫大家： 自己睇啦! :)

我是個不太懂寫 blog 的人, 更加不知日後會否除我自己之外無人來睇我的 blog. 不過唔知點解, 還是想寫... 就由得我啦!

好, 向 blog way 啟航! 開張大吉!