東亞運直擊之 - 閉幕與東亞運之最

"折騰" 了近一星期, 也來到了閉幕的時候.

回想這個多星期, 是近年來少有連續的快樂日子, 除了唔使返工外 (其實我是間中有回公司處理事務的!), 更重要的是, 做了自己喜歡做的事. 是的, 好忙, 工作時間長, 但開心 (重覆一次, 仲可以成日見到九龍香格里拉的禮賓姐姐們).

在閉幕前一晚, 大家都看到了香港足球 "爭氣" 一幕, 這已經給不少人寫到 "爛晒", 老朽心情一樣激盪, 不過不再詳贅了.

老朽自己除了是今次的義工領袖外, 也兼是今次義工計劃合辦的義工局某某「二打六」小委員, 因為託義工局的福得到一張閉幕禮的貴賓入場券, 卒次搵返次唔使著住套藍精靈衫 (邀請函講明唔好著, 避免使人誤會我以義工身分入場坐在貴賓區), 以觀眾身份靜靜的坐下來.

整個閉幕禮不太長, 也不是十分的壯觀 (老實說, 連奧運閉幕都會細規模點的); 但當Eason 出場講今次東亞運的義工時, 講講o下我自己眼眶都有少少紅紅o地, 想起今次有份參與其中, 雖然之前幾多幾多說話要聽, 套制服連自己都覺得不好看; 但今天回看, 我真的好慶幸我參與了, 也成為 legend 傳奇一刻的一份子.

禮成後我們趁人少少上了台拍了照, 見到霍(震霆)先生也在, 黐了張相來影, 他見到我們幾位二打六委員, 竟主動伸手出來說 "真係多謝你們". 老實說, 平日的老朽握開的手或者有的比霍生更有份量, 但那一刻, 我真的不想放手, 為的是六千一百多名的義工和三百八十幾個藍精靈領袖, 我們接受這句話, 是代一眾同工接受的.

大家和一大班義工, 大細霍生, 還有部分香港隊成員影o下影好不快樂. 搞了半小時, 相, 影完了, 台燈也開始熄了, 大家才醒起, 真的是曲終人散的時候了.

之前一天, 回到貴賓助理辦公室簽了最後一天的 duty off, 腦中竟然相當大吉利是的響起了消防員那極不吉利的「三短一長」落更鐘聲, 還有降旗號角聲.

我知香港如果以現力搞2019 亞運的話, "瓜梗"; 不過, 呢一刻, 我的確幾想再幫手的...

***

整班貴賓之中, 最...

有派頭 - 當然係國際奧委會主席, 羅格伯爵

多人圍 - 係北京同埋天洋市長, 佢地到達香港前半天已經有人幫他們 check in 了房間

有米 - 兩位中東王子, 一位 HRH 臨時來不了, 另一位叫 "HE" 的我們想了好半天, 才知是 "親王大人" (His Excellency!), 好人一個, 不過用的行李是整套的 LV 包膠得別版, 一套八九件左右, 相信只是行李箱已值近廿萬元

雕轉 - 蒙古奧委會的主席, 個名長到根本無人讀到!

為食 - 係一位大馬來的拿督, 他到來時我們只見他的名字是 Dato'... 問酒店才知是大名鼎鼎的 "拿督" 的意思. 他四出找好吃的東西, 不過要 halal (回教唸經後來宰殺的) 過而又企理的, 除非找酒店, 最後都唯有帶他去 "清真牛肉館" (雖然比較 "茶餐廳" 不過已經係可以找到最開揚那種)

出入平安 - 一定是澳門那班, 因為他們每天來一次, 不在香港過夜的, 所以照顧他們的 PA 都辛苦了.

東亞運直擊之 - 辣更

東亞運義工手冊明文規定, 於東亞運舉行期間時, 義工不在當更時, 不得穿著義工制服前住有關之場館酒店等, 更不得惹事生非亂咁影相. 但不少義工 "情到濃時" 都會難以自制, 這, 不幸地, 當然也包括老朽, 但係只要唔好不斷地影影影又或者阻礙比賽或者其他人的工作 (甚至私癮的話), 各場地場主或場地負責接待貴賓的 "禮賓司" (有些是富經驗的義工領袖, 有些是職員或全職義務職員) 多數都會 "隻眼開隻眼閉" 的.

在開始了比賽數天後, 我們收到一個電話通知, 說有義工打電話找場地的 "禮賓司" 找不著時打了入貴賓休息室, 勞駕了一些外賓接了電話, 所以我們 "九九九中心" 一班領袖, 趁某天 lunch 後較清閒便跑了去紅館看看場地貴賓接待的流程 ; 又碰巧無比賽, 所以便乘機入去拍兩張相, 又找到了在場地工作, 之前 training 認識的義工老友吹吹水. 又有一天, 碰上老朽 "下班", 那天竟是排球決賽日, 於是老朽就少少唔聽話跑了去紅館後台; 又真巧碰到自己都 "玩開" 的幾位義工領袖, 分別在餐飲, 賽事和頒獎典禮工作的; 所以便在男排頒獎後台位 "呃" o左幾張相... (不過當然真係無阻住比賽進行啦)


(後台偷雞拍攝; 畀排總的工作人員攝o左位, 影唔到頒獎的曾德成局長 & 許晉奎先生)

(架相機 "浪" 在腰間, 身穿藍精靈衫唔敢舉機...)

(禮成後護旗手降旗)

亦見到貴賓休息室入面有o的好o野食, 不過多數都無貴賓食的, 「理論上」兩小時後要丟掉 (食物安全中心指引)... 實際上... 兩小時後... 為免班貴賓 「折墮」和為他們積福起見, 唔... 個蘋果批都 ok 好食的.

最最最可惜, 唔係無得同運動員影相, 而係... 身為今次的甚麼甚麼委員 (!) 仲要識得負責頒獎典禮的義工頭都唔記得和各禮儀小姐合照, 哈哈! 真係失敗!

東亞運直擊之 - 高人要求

高人, 不是劉翔, 而是一位外國來的 TD. (TD 解釋詳見上篇)

本來倒不打算寫太多, 不過前兩天在電視的世界籃球不知甚麼比賽的抽籤禮上見到他, 勾起了整個東亞運義工中老朽最不開心, 卻又最窩心的回憶.

開幕之後, 所有嘉賓都乘大會車輛回各自酒店, 而早走的嘉賓就會先自行步行回一些特定地方如貴賓酒店稍息等候道路解封.

碰上的, 就是一個這樣的怪人.

開幕禮成後不欠, 老朽一邊落酒店大堂視察環境, 向物流組義工朋友查詢幾時有車回來, 一邊又和 accomodation 的義工吹吹水, 更緊要的是和酒店的 check in 公關靚姐姐們打牙骹. 另外也要 "擒" 一位遲到兼 miss o左開幕禮的嘉賓, 於是便和另一位義工領袖在大堂遊弋. 也見到一位好高的外籍人士在酒店大堂黑黑地面的坐下, 有兩名義工和他說了不知甚麼後悻悻然而去, 一問而知原來這位不是我們 vip 的, 是今屆籃球的 TD, 也是賽場貴賓管轄範圍, 不過他的貴賓助理似乎不在附近.

過了好一會, 再巡經那處, 竟然見到一位義工小姐梨花帶雨的, 之前和那高佬對話的兩位義工就在旁相勸, 至於那高佬西人就懶得理的換了位置, 自坐一角閱報.

身為義工領袖, 呢個時候根本唔會理係咪我自己的組仔組女, 而見一個義工在酒店大堂哭哭啼啼的, 一來貽笑大方, 二來也應該關心一下, 於是和另外那位領袖商討後便由老朽過去查過究竟.

之後有幫忙的一位義工已告訴老朽, 原來是那位高人見路上已有車輛行駛, 便覺得已經解封, 不由分說便指責義工助手 (梨花小姐) 辦事不力, 未能即時 call 回他的專車 (TD 地位尊崇, 和貴賓一樣待遇, 有寶馬接送的), 而那義工怪委屈地打電話催促司機時, 又被司機罵了兩句說 "你都知而家塞緊啦, 打來催生晒把鬼" 之類說話. 小姐就是小姐, 見得呢的 pk (尤其係個外賓老細) 少, EQ 稍稍未夠高, 一時眼淺就來個淚灑當場.

既然著得起套藍精靈衫, 老朽就一定要做返o的o野, 便叫梨花小姐打給她遠在另一酒店的領袖, 簡單地講了事件 (當然不在主角前提及她喊緊啦!), 得知他們倒真的快速應變, 已經即時安排另一部後備車輛, 而且也會有另一位義工同行 (難道仲要梨花小姐陪呢個變態高佬?) 於是老朽就走上前去, 表明自己是 VIP 的義工領袖, 得知呢位高人有點不爽, 大會已經作出了安排, 盡早上車云云. 呢條 (真係用 "條" 字先得) 高佬仲問 "即係幾多分鐘內?" 好在呢個時候替更義工出場, 說車子轉彎就到, 呢個「高人」覺得自己係 VIP 級的待遇, 個樣即刻變返正常又讚香港呢樣好o個樣正... (睇見都不知幾想一拳打落佢度) 送埋佢上路 (上車先o岩) 之後再回頭, 見到各位義工又笑逐顏開的. 真係感受到一班義工朋友的團結, 不同的崗位, 不同的分隊, 在呢個時候, 就似六神合體的 "外禦其侮".

記下呢件事, 絕不是說老朽有幾勁, 因為勁o既係梨花小姐身旁的同工和遠處即時安排的隊友, 老朽只係英文講得流利少少扮晒蟹.

那晚, 下班下得夜, 要等所有 "羊群" 回到酒店後才走, 不過, 走得特別輕鬆.

東亞運直擊之 - 忽然上馬

開幕後兩三天, 打來 VIP office 的電話開始沒有那麼鎖碎 (嘩, 你都唔知早幾天打來的電話有 PA 問 "我幾時食得飯", "去唔去得廁所" 同埋 "唔記得問老細明天行程點算好"...); 但收到一個本身是老朽聯絡開的「組女」電話就有點擔心.

「喂喂 (死死地聲), 我 serve 北韓的 xxx 先生, 他看完跆拳比賽, 我們要回曹公潭了 (應北韓隊要求, 他們由上至下都住在那兒, 和其他國家分開, 原因自己諗), 不過... 我食錯o野, 而家又痌又肚痛呀...」

「位置?」

「仲在石峽尾」

哦... 跆拳場地.

我們即時嘗試找提供過 vip service 給北韓隊的義工們, 碰巧當天下午都有其他事辦, 結果老朽知道他們會再去小西灣看中港足球 (就是後來知道中國贏香港一球不過入不了決賽那場), 便走馬上任, 著義工徵得 VIP 同意後, 先行離開, 由老朽直接到小西灣接待那幾位北韓朋友 (又好彩有架 VIP 車在附近可以給老朽用), 問明了場地的工作人員入場位置後, 便直接打給北韓 VIP 的大會司機, 約好在小西灣等.



老實說, 第一次見北韓人, 心情多多少少有一點點緊張, 不過之後發現, 他們根本是相當相當 nice 的人, 而且可能是平日生活都刻苦慣了, 完全沒有 VIP 架子, 也無任何特別的要求, 那晚下了點點微雨, 他們更自己跑到車尾拎雨傘; 唯一就是他們常常喜歡抽煙. 但可愛的是, 他們也特別愛朱古力, 或許, 是北韓沒有幾多吧, 他們走到 tuck shop就問 "有邊隻係朱古力"; 之後買了幾十元 (早知帶他們去超市買平得多!) 後, 整場球賽他們也沒有吃過一顆, 大概, 是買給遠在北韓等他們回去的小孩吧...!?

更可愛的, 是球賽完結後, 他們又抽了煙才上車, 這時南韓隊的隊長又路過 (因為中, 港, 南韓, 北韓同組, 所以他們都有來觀戰), "兩韓相遇", 他們會做的, 就是主動握手, 寒暄三兩句, 之後大家交換一個平和的眼神便分開. 而他們又說不用我送他們回去 (因為... 他們車子多了兩位北韓足球隊員, 所以無位), 所以老朽那天任務又無啦啦結束.

不過回想起, 原來無問北韓的 vip 拎他們的紀念別針 pin!! -.- 難得可以取得北韓的 pin, 咁都唔記得直頭抵打!

東亞運直擊之 - 吹風開幕

而家講返個多星期前的事, 都不知還算不算直擊了...)

開幕日, 又有幾十個貴賓來香港, 整個 protocol office 又係炸了鍋的忙. 那幾位政府過來的同事更加擔心得很. 我們義工衰o左咪算囉, 但佢地衰o左就一定有鑊, 所以緊張也有道理, 而且看來他們都是盡責的公務員, 個個朝七晚十一的, 有時更加在酒店的 office 內睡, 都戥他們慘. 反觀另一廂其他 office, 有部分都是政府借調的人就清閒得很, 甚至在準時下班後如果找他們, 一定會說 "你打去.xxx 啦, 我收o左工"


說回那天, 雖然極忙, 不過卻還算井然有序; 因為之前我們一班 leaders (多數都是有活動搞手經驗之人) 已經開了幾次會, 就之前數天的經驗得出一個流程, 而老朽就負責將此流程記下, 大家看了也一目了然. 因此那天都算係順利.

來的貴賓中, 原來不只會有東亞的九個地區, 而且國際奧委會和亞洲地區的體育聯會也會派人來, 而不說不知 (有玩開運動的或者知), 每次有國際體育賽事, 那項目的國際總會也會派一位 technical delegate (TD) 作為該項目的技術最高總監, 所有問題都是這 delegate 說了算, 這人物不是我們 VIPPA 的範圍, 不過其中一個項目的 TD 之後會成為老朽其中一篇 blog e 的 "主角", 密切留意.

今次來的, 當中也有中東王子... 大概是代表亞奧理事會的, 不過其中一位原本打算住私人飛機來的, 就來臨起飛前致電說不能來了, 連同他的國家宰相也不來了; 我們大家不禁想 -- 他是否買了 "迪拜世界" 呢...? :P

另外的一位王子就來了, 詳情倒不太清楚, 只知道他和幾位隨從帶的九個行李箱都是包膠同款的 LV, 簡直是一門九傑盡出, 只是行李箱已經一定超過十萬港元的價值, 老朽真係望塵莫及. -_-"

另外還有一位大馬來的 "Dato' ...BAHN" 初時我們都以為那是他的名字, 而要叫他後面的姓氏, 即 Mr Bahn 之類, 後來經酒店禮賓經理 edward 叔叔指教, 才知這就是大家熟悉的 "拿督" 的稱號, 見到他, 就叫 "達督" (Dato' 本名很長, 這是縮短後的正確讀音) 可以了, 叫 "sir" 和 "mister" 都會貶低他身份的. (大馬不是東亞國家, 不過這位拿督是亞洲某運動聯會的會長所以在嘉賓之列)

當然, 最高的領導 - 羅格百爵也是我們的 VIP, 只不過他一行數人地位高得很, 政府和港協自動請纓接待, 我們這些小薯也樂於在酒店大堂旁列個隊算了 (結果列隊的小薯部隊回報說因歡迎人太多, 連羅格的影子也埋不了身), (至於祖國的國家領導就當然住在李首富的酒店, 與我等無緣了)

好了, 到下午, 所有嘉賓都分別收到不同機構的邀請出席幾個不同的歡迎和開幕酒會, 分發這些不同的邀請和向不同的 PA 說明他們的 "老細" 會去邊個酒會, 而最後大部分嘉賓也在不同時段由 "九香" 乘貴賓專用小巴前往文化中心會場, 因為封路, 所以所有貴賓車輛 (包括大會的二百架寶馬5系)都不能進出, VIP 都係咁話.

而所有貴賓, 也會在半露天之下吹著風看開幕. 這個就是他們吹風的座位表:



發生的插曲就是, 老朽正準備跑上跑下看看班 PA "仔女" 時, 突然被港協一位 "爆炸頭女士" 截著, 叫道 "喂喂你地o的大會車上得未o架? 要成班貴賓等餐死o既..." 呢位間中都有上電視的女士其實平日個人都 ok nice o既 (起碼那天早上等升降機時見到老朽都有笑笑口), 不過都出o左名一有事就比較容易 "爆發"; 她都無問老朽係咩職責就幾乎想抽起我衫領咁款, 好在老朽不死小寶神功耍了她一下, 便立即安排到 (其實 transport 那邊剛剛 ready) 上車, 唔係連自己 office 都返唔到.

好喇, 所有羊群都被趕了上車後, 卒之心安理得食餐好o既 -- 老朽叫了 outback 外賣, 就當係請埋一班義工 & staff 朋友食啦!

東亞運直擊之 - 幽靈班機

開幕前一天, 最多嘉賓抵達香港和入住 "九香". 整個 VIP office 的 leader 直頭像 "999控制中心" 一樣.

大家都知道那兩天係最多 vip 到港的日子, 所以一班 leaders 都一早安排好分工, 包括一位專責影印報到義工 (即係我們所謂 PA protocol assistant) 的資料, 兩位專責做 briefing 畀要出去機場或關口接 VIP 的 PA, 兩位負責落樓下酒店大堂 "擒人" (welcome 的 "come"), 其他幾位就真係似九九九中心的不斷接聽打回來問問題或者叫救命的在外 PA.

VIP 總部樓層


老朽早上就係負責做 briefing 的其中一位, 下午就會去大堂 "擒人". 這天因為幾十位嘉賓到訪, 所以一早7點半已經開始為 PA 做 briefing, 而因為好多時每位 VIP 都有特別安排或行程, 所以有時要逐位 brief, 尤其係北韓的代表, 因為住宿地點特別唔同所以又有唔同 brief.

老朽就係見著一位安排來做 PA 的伯伯, 見佢六七十歲人都咁有心, 當然高興啦. 點知一開始 brief 就知出事... 呢位伯伯, 老朽只是請他去到機場要打三個電話 (畀機場抵達離境組的義工, 同埋打畀我們同埋北韓隊的住宿康樂營)已經講o左四次, 而且他自己也有記下來, 但要他自己說一次時, 一開始已經去錯了地方, 連老朽都有點擔心伯伯會連自己都走失; 因此, 最後決定轉另一位內地市長給他帶, 就係咁, 一樣出o左事...

呢位市長的班機係改動過的, 佢會先去北京再轉另一城市後再飛香港, 因此有同事已經問定班機編號, 而亦有另一位醒目義工PA (因為臨時有事, 未及發機場禁區證給他) 一起去的.

去到機場已經用電話聯絡著, 點知第一通電話已經係:

"無你們講的班機哦!"

老朽: "O下..."

即刻 check, 的確, 世界上係無那個班機編號的, 十成十係工作人員問錯了資料.

"你快o的去搵返抵離的同事問最似樣的班機編號, 北京飛香港的"

"抵離組同事話最似樣的班機入面有一個 VIP 自己上O左車喎!"

"o下o下o下?!?!?"

伯伯加多句: "不過佢一個人去xxx (另一間) 酒店o者, 我地那vip一行兩人嘛"

"哦哦"

轉來的是醒目PA的聲音: "我無機場證呀, 要伯伯入去, 我話O左佢知點入O架喇!"

於是, 伯伯入了去禁區.

十分鐘後, office 收到東亞運組委的電話: "xx 市長個助手打手提來話佢兩個出o左閘無人接, 而家行行o下唔知去o左邊度呀... 你地快o的發散人搵啦!"

X街喇今次!!! 打畀伯伯, 竟然係 "你打o既電話而家唔通..." 打畀醒目PA, 得到的答案係 "我正話同佢講緊, 之後斷o左線!"

又五分鐘過去, 整個 vip office 的人都一頭汗地去找...

再過五分鐘, 電話響起, 是伯伯: 我而家在行李帶呀, 找不到貴賓呀...

再過五分鐘, 電話又響起, 好在今次竟然係一位本來去接另一位貴賓的姐姐PA: "我見到有兩個內地客, 佢走埋來問我知唔知點出去坐東亞運車, 我見佢地著晒西裝咁咪帶佢地去過關先, 而家去緊找行李"

老朽:"嘩! 阿姐姐你簡直係我地o既救星呀! 你打 12345678 搵一位伯伯啦, 佢會接呢兩位 vip o架喇!"

更奇怪的是, 就係呢位伯伯竟然一行兩人變o左一行五人, 仲自己唔知點解找來多一架大會的車輛, 即變成兩架車 (明明只可以一架裝一組 vip), 更神奇的是, 他們當中三人後來自己行返入禁區...! 變成同組的兩個 vip 坐兩架車(估係內地當局駐港的機場人員, 但係仲邊敢問佢呀真係...)... 連 office 內的 protocol officer 都超級搲頭!

算啦, 返到酒店已經還神喇今次!

(後記: 老朽驚出事, 同 protocol officer 仲有另兩位 leader 一起去擒那 vip, 但係見到的時候, 佢同那伯伯 vip 仲搭晒膊頭勁老友, 真係一額汗...!)

東亞運直擊之 - 霍生返來喇!

開幕前兩天.

百幾個 VIP 和他們的隨行仲有嘉賓之類物體, 在 "九香" 轉來轉去, 好不熱鬧. 而那晚會有會議, 而且有一餐晚宴是由香港 host 請所有東亞運國家委員吃的, 所以香港的 "大佬" 霍震霆先生會到場主持, 時間就是晚上7時; 不過他一直身在外地, 要到晚宴前半小時才匆匆趕來.

他老人家當然是我們的 vip 之一, 所以亦會有 VIP 的禮遇, 而我們也安排了一輛 VIP 用的寶馬給他. 不過在機場時現場消息說是他會坐自己的 "OLYMPIC1", 而大會貴賓車則根據他指示會用來載他的公子霍啟剛. (係完全無問題的, VIP 可以指派他的車輛接載其指定嘉賓) 因為時間比較緊, 所以大家都有點緊張, 不然東道主自己遲大到就比較丟臉了.

結果在下午6時半前, VIP 接待辦公室 (即老朽工作的地方) 電話響起, 說 "霍生車子已過青馬橋, 往中環駛去"

負責 pick 電話的同工說 "ok" 放下電話...

十分鐘後, 電話再次響起 "霍生車子已過青馬橋, 十五分鐘後回到九香 (九龍香格里拉)"

呢次負責的義工同工先猛然醒起之前一通電話: "往中環"??? @@" VIP 酒店在九龍香格里拉, 而車子又不應由機場去中環再回九龍吧? 何況是趕時間途中呢?

負責的政府同事 (不同部門會派公務員暫借遣派到東亞運辦公室的不同分部工作數月) 即刻請我們打電話給負責 "照顧" 霍先生的 "紅衫軍" 義工. 得到的答案是:

"去緊中環O既係霍生O的行李!"

(咁打返來把鬼咩?!?!)

好在五分鐘後大家見到 OLYMPIC1 出現, 成功 "接客". 點知...

之後五分鐘電話又響多次, 今次又係那位紅衫軍打來, "霍生返來喇, 五分鐘到"

乜得來又返多次?

又打多次去問: "霍生咪返O左來囉..."

"我講O既係霍啟剛先生呀"

(@#(#*&%#@XYZ... 下次早講清楚丫!!)

東亞運直擊之 - 我要上船!

這數天, 每日都係對住一班義工領袖朋友, 好似在 999 中心的應付著街外前線幾十名 PA (protocol assistant, 即係被派出去「人盯人」接待貴賓的義工朋友) 的查詢 & 問題 (九成都係班 VIP 老細問的). 當中有不少真係使人 O 晒咀的...

***

12月2日, 一位 "湊" 住某參賽地區團長的PA 打來, 問 "我個 VIP 問可唔可以開幕巡遊時坐船中間喎..."

O下? 咩中間話? @@"

不少人都知道, 今屆東亞運開幕禮在維港上舉行, 原來呢位團長想威威, 諗住登台出場之時坐在代表他們的船的中間. 咁就型過乜喇云云.

... 我們都好想幫到呢位團長, 之不過, 巡遊上的船, 只係用來睇同埋載幾個表演人員, 唔係載人o架喎!! 百幾個 VIP 都無人會上船, 你點上去呀大佬... (囧)

直擊東亞運 (1/12)

因為要上庭, 所以30/11 無回東亞運 VIP 辦公室工作.

今天再回去, 聽同工們說著昨天的神奇事件和最新發展, 真係聽到眼都突, 一天之內來了十多個 VIP, 有近半是突然出現的, 真係辛苦了他們, 更辛苦了各位 staff.

當然, 老朽30/11 散庭後都不是完全 "待機" 的. 因為初時以為大會會有 protocol 給我們去跟, 後來才知道是要我們一班 leader 自己訂下 protocol 同埋 system, 所以老朽便將之前一班 leaders 緊急召集會議的結果轉為一份份的 "天書" 文件, 等大家可以參考 (自己讚自己!). 總算有返少少貢獻.

不可不說的是餐膳的問題, 有其他的大會酒店或場地都會有提供飯盒給義工, 不過就是貴賓酒店例外 (因為太貴, 而酒店又不容許非合約的包伙食進場), 所以我們就是要了每人每天港幣四十大洋 (8小時工作) 或八十 (12小時工作) 的膳食津貼和港幣25大洋的交通費.

不過老朽咁鬼為食, 一餐已經食o左八十大元, 仲諗住去附近的 Sabatini 仲有東來順呀, Angelini 呀食o下咁 (不過著住義工的藍精靈衫又有o的怪!); 但係其他同工 (多數我們會一起分組食, 一邊食一邊傾, 有時仲傾返工作上的事) 又未必想食咁豪 (咁係我衰o既), 所以都好難決擇.



好在今天要接的「老細」不多, 但就預見到4-5號準備開幕的日子會有大量的工作 (和問題!) 出現, 所以寧可趁這兩天舒服少少; 但今晚收到我的一位 "組女" 的電話, 就大會剛通知她說她那位貴賓突然說要找一位懂日語的貴賓助理去跟 (好似話本來有帶翻譯, 臨時就無, 所以要求香港提供), 所以她唯一的一段服務時間也沒有; 雖然她仍然是 "待機狀態" 而大會也會頒 CERT 給她, 不過負責的她 (呢度要讚一下我的組仔組女, 雖然因為工種特殊, 我們一直無機會見到面, 也不像其他組別會有 gathering, 但他們真的好有心, 完全無 "揸流灘" 的現象) 說很希望有機會提供服務, "搵我影o下印都好丫!" 或者都真係睇o下有無辦法幫o下佢, 等佢真正可以投入今次的工作啊.

直擊東亞運 (29/11)

今天是老朽第一天到東亞運義工的 VIP office 報到.

點知碰上女王有兩聲傷風咳, 為了和夫人帶她去睇醫生, 竟然第一天 duty 便遲到了幾分鐘, 比較樣衰.

到達時, 根本可說是 "一舊飯", 因為完全不知道我們要 support 些甚麼, 蓋因多數貴賓不會在十一月尾咁早到. 不過可能因為未熟習, 而且大會無就我們 "如何提供協助予貴賓" 定下指引, 只說樣樣 "執生"; 於是一班義工領袖, 還有一班更辛苦的受薪員工 (有些是政府部門借調來的) 就得慢慢學起, 和在發現問題時大家想個解決方法.

到了下午, 大家已經想到頭都爆, 還要找一兩位原定到來接待貴賓, 一時間失蹤的義工朋友 (好在搵得返).

今天只是有數位貴賓到港, 貴賓有時問幾個問題, 例如北韓的團長無啦啦找 "服侍" 他的義工問明天可不可以臨時加個練習時段給他們的足球隊 - 這原不是我們的工作範圍, 不過貴賓問到, 我們基本上係無得 say no 的. 於是就要四圍找負責足球的工作人員, 仲有場地人員. 又有些 "老細" 們突然改變行程, 說明天甚至後天才來港, 一早 set 好的車輛和人員又要 "洗牌玩過".

set 一個 system 的雛型, 加上仲有好多未知的人和事, 撐到傍晚已經有點累了, 找來咖啡乙杯, 繼續頂硬上. 見樓下做住宿和負責其他義工同工登記的 "同事" 暫時比較清閒, 有點恨癢癢的; 但還是繼續頂到十點... 不過, 此時才來多兩位北韓大哥的問題, 又搞多半粒鐘, 連埋安排明早抵港的貴賓車輛, 最後近十一時才 "落更".

-- 但是, 區區數位貴賓下我們已經開始有點手忙腳亂, 難以作出 planning, 真不知到了過幾天多了好多義工來開工和當大量貴賓 (老細) 時, 大家仲會不會這樣想.

之咁, 我們落更時, paid staff 才集得齊明天的貴賓時間表, 開始安排明天義工的人手, 看來他們又要在酒店通頂工作了... @@"

一年一度一牛一

其實已過了兩個月, 不過今年的生日平淡得來又得意, 所以自己也要記下來.

食了幾餐, 其中和夫人去食了灣仔「蟹增盞」, 其中一個原因是和夫人早兩年去新加坡沒有去吃當地的胡椒蟹, 她怨了我成年, 之後有 bb 又唔敢食蟹, 搞o左幾年終於有得食.

不過, 全晚最好吃的不是蟹, 而是這隻頗有睇頭, 不過無咩尿蝦肉味的瀨尿蝦...



蟹就, well, 其實唔差不過. 可以再好o的. 最正反而是他們合炒的蔥, 煨過雞湯的, 比蒜更好吃...

可惜當晚他們無晒酥炸鮑魚仔, 否則真想試一試如何鮑魚可以炸.

之後就跑了去食第一次試的雪花冰, 比想像中要好得多 (似乎我住得背...)



另外和家人在農曆生日去了食齋; 這個是老朽的傳統. 雖然身為「天主門生」, 不過既是 「母難之日」而家父又是篤信佛教的, 那就食茹素一天, 當是積福又好, 清腸胃也不錯.

去了灣仔老店東方小祗園, 他們素菜做得老式, 不花巧, 而最愛的卻是每次都望好耐的素與齋二字, 真的好有意景, 看後心境都平和o的.


而最愛的, 就是他們的炸芋卷, 是一道不易做得好卻又賣不起貴價錢的東東, 愈來愈少齋菜館肯花這個心機. 這兒的就是那 "古早味".

仲有仲有, 唔漏得o既一餐, 就係某天早上收到一個 email 有張咁o野:



係細細妹 solo.

見佢玩得咁高興, 趁 lunch, 整返張回覆先:



內容大家未必睇到, 不過唔緊要, 總之得啖笑, 又有最愛的 dough ball 食, 仲想點.

原來真係仲有得想點的, solo 送了張紙給老朽:



竟然是一張男士美容的 prepaid coupon! 哈哈, 老朽都好久無做男士 facial 了, 因為怕 treatment 後泥足深陷不斷進貢給美容公司 (因為其實 facial 後的話係舒服o的的!) 在此再謝謝細細妹!

自己細妹就送左幾樣o野, 有半數其實是畀我送給女王用的. 但有一樣就令我哭笑不得:



整 macaron, 老朽之前咪學o左囉... 你都有份食, 除非你想女王都學埋一份o者... =.=

至於最 "好吃' 的禮物, 就是來自夫人的 Jean-Paul Hevin 朱古力...

雖然 valrhona 一直說 Jean-Paul 是用他們的朱古力豆, 不過他們者間的出品到入口時, 感覺完全不同, v 是極幼細的絲質感覺, 而 jp 就是帶點點微微濃味細塵粒感覺的另一款, 而且他們有幾款是「巨粒型」的, 吃下去感覺極之滿足; 兩者都是百年老號, 爭來做咩, 不如好似我同夫人咁, 兩樣都買 (不過其實... 好貴... 只買了十多粒加兩大件, 分成數袋, 已經唔見o左四百大元...) 不過拍下的照片一時間找不回來, 未有相睇.

老朽牛一壓軸節目之女王出巡之海浪公園 暨 進步大事紀

天氣上兩個星期無啦啦凍晒. 再之前都仲係晒到汗流浹背, 而就在那星期, 和夫人和家人一齊走了去海浪公園為外母大人 "賀壽", 也作為老朽生日的壓軸節目之一 (不過其實老朽係十月生日的) 少不得的當然是女王出巡的大陣仗.

好在夫人三姊妹各有男丁 (男友/老公) 幫拖, 帶多點女王專用糧水羅傘車馬都無問題. 不過女王天生燥底, 行兩行 (用車仔o架喇! 都唔使佢自己行) 已經熱到標汗, 成個額頭仔濕晒. 不過就相當雀躍, 成日見到o的人 (但係對其他海洋生物無咩興趣, 有點悶樣) 就指指點點鬼殺咁嘈, 講o的似大人又似 bb 話的東東, 笑到我們飛起.

不過這兩星期女王有點頑皮, 直頭去到有 "頑劣" 那種; 可以有時覺得不愛吃飯就吃一口吐一口, 給她吃我們的飯也一樣 (之前她不愛吃 bb 飯, 要吃我們的普通飯送); 問題係她又不會覺得肚餓, 看在眼裡, 心痛得很, 鬧過 "tum" 過玩過 "翳"過, 一律行唔通. 加上老朽和夫人懷疑由女王傳染了輕微的感冒, 這數天真的頂佢唔順, 有時吃不了也作罷.

不過女王這兩星期出多了六隻牙仔, 而且說話就突然有進步, 講多了好多東西, 自己識講好或不好. 得與唔得之類, 而且真的好像已經聽懂了我們絕大部分的意思. 不過反應就有時非常特別, (唔扭計時) 笑到老朽和夫人碌晒地.

原來 bb 說話是逐隻字加上去的, 現在女王可以自行連續說三個字, 又或者在引導下連續講四個字.

蝦... 幾時可以唸返首唐詩呢o下...?

給妙妙的信 - 小小後記

最後一對新人都決定照樣在今天行禮.

部分原因是他們問過為原準新老爺辦白事的師傅, 他們說新老爺未了的心願就是看不到文哥成家; 所以希望照樣註冊. 另一方面有個有點無奈 (卻又有點幽默...) 的原因 - 他們的戒指已經刻了今天 - 2009.11.21 - 的日期.

不過當然, 今天出現的, 只是一對新人和他們雙方的家人, 還有專程由外地飛回來, 本來飲喜酒變了奔喪的新郎兄姊們; 在另一間酒樓 book 一間房, 真正的 "簡單而隆重". 而也是老朽第一次見到證婚時全人類清一色穿黑色衣服的婚禮.

好在老朽父親當年在政府任職時曾兼任政府部門的 "典儀司" (即部門福利主任不成文的 "兼職"), 就是為部門的紅白二事籌備; 故老朽有此 "顧問", 便將應做的流程向新人解釋了.

正如之前提過, 老朽每次證婚都會有一兩句說話向新人講的, 每次也不盡相同 (咁先 touching o架嘛! 收你幾千銀交行貨唔係我o既性格), 今天, 我見妙妙怪委屈的, 知她一定是在這兩星期受了不少壓力, 於是便借呢個 issue 講了幾句, 點知講到一半妙妙同埋阿文兩個都畀我搞喊o左 (雖然老朽o既 short note 都唔係第一次搞喊新人o架喇! 哈哈); 當然, 他們的淚水, 多不在於我的言詞, 反而是他們壓力的釋放; 想到呢度, 竟然連老朽都有點語塞, 因為我自己都為之鼻酸... 幾乎講唔落去. 好在 "專業壓倒一切", 頂埋那十多秒的 short note. 唔係成為第一個證婚證到自己喊o既律師, 幾樣衰!

妙妙和阿文之後話希望遲o的搞返掂晒o的事後補擺酒時請埋老朽去飲, well, 我一向幫人證婚唔會飲埋o架喎; 不過今次唔知點解, 老朽有點想去 (當然會做人情!) 的感覺... 唔... 如果妙妙o的姊妹夠多靚女的話, 都可以考慮o下o既! 呵呵呵呵! :D (唔好畀老朽夫人聽到!)

傑出義工...

相信不少人都未必知道, 香港是全世界其中一個最多義工比例的地方. 大中小學婦女組織長者中心工商機構都有不少義工的組織, 有自發的, 有由老闆帶頭的, 也有由政府推動的.

老朽在機緣巧合下在義務工作發展局當個小小 sub-com 委員, 有機會跟各路的義工前輩學習; 也碰上了有機會參與今年的香港傑出義工的籌委和初選時 review 的工作.

重要的 interview 當然留給正式的評委去做 (當然係一班社會賢達, 還有我妹妹當年的偶像黎明), 我們只是初選出一班被 interview 的義工朋友們.

這個工作, 其實相當艱鉅, 不是說他們的質素平均, 又或者是大家都好好 (或者好差), 而是有個問題, 就是做義工, 多數不會有特別的紀錄, 因為既是義工, 就是不計報酬的. 那就是說好多時 "做o左都無人知". 但無人知無紀錄又點知你真係做o左呢? 而有做義工的朋友們又因為不計回報, 要問起來查證就有相當的難度. 而且要平衡一些人, 尤其是有知名度的人士, 他們做義工的背後有沒有一些他們一早知又或者附帶 (fringe) 的金錢或名利得著而去衝量他們的努力及成果, 就更加添了評審的難度.

老朽今次真係學習多於一切, 見到最後的結果, 和一班付出多年努力的義工 (有些老實說, 未有在老朽初選之列入圍, 不過有不少其他初選評審持不同意見吧). 也覺得為推廣香港的義工運動, 搞個獎來贈興都好.

圖為評委黎明先生 MH 接受贊助人范除麗泰大紫荊勳賢 (唔好問點解搵佢, 老朽負責搞手都唔知點解, 不過佢篇演說老實說講得相當不錯) 頒贈紀念品.



得獎人各單未放上網, 哈... 暫時未有消息.


p.s.: 今屆有一隊由四川來訪的抗震義工嘉賓出席頒獎禮; 老朽覺得他們才更值得表揚!

給妙妙的信

hello!

今天忙得很, 一次過跑下午和傍晚的兩場證婚, 在九龍城寨證完 wargame 友, 和其他友人等影相時, 收到你電話, 一看來電號碼已知, 心想, 下星期就是好日子的你, 梗係打來 confirm 你們的 "特別版" 誓詞啦!

「喂阿妙? 咁遲打來o既, 我o岩o岩證完另一對呀!」

電話傳來的, 是一把沉重的聲音.

「老朽呀... 唔... 我們婚期要改了」

「啊...!? 你們...無事嘛」

「阿文 daddy o岩o岩走o左, 心臟病發...」

世事, 就是這樣突然. 老朽都真的是第一趟遇到這情況, 都呆了好一會. 但是, 再想一下, 你和阿文現在最需要的是大家的支持...

阿妙, 認識你可以說是奇怪的過程, 去年你為哥哥找個律師去一間佛會證婚, 經過朋友找我而且已說會叫你大佬再找我 confirm, 不過同時地他同一天已 confirm 了另一位律師所以作罷; 倒無想過差不多半年後, 你們會找我, 說自己要結婚了, 和你一談就像一見如故的, 之後和你仲有文哥傾了好長的電話, 仲 add 埋 facebook. 突然聽到你這消息, 真係諗唔到畀咩反應...

「那我當然無問題, 你們其他的 supplier 呢? 他們點樣? 有無事要幫手?」

「除了租車外, 其他都 ok, 連酒樓都話可以幫我們 hold 起最長一年」

又難怪, 下星期 (09年11月21日) 是下半年中上佳的嫁娶日子. 不過你們今次真的是特別例子呀... 都可以通融一下吧?

千萬不要被今次的事嚇到. 誠如你 facebook 所講, 你都當自己是他家新抱, 老人家只是未及飲你杯茶, 是儀式上的一個遺憾, 但不要怪責自己, 更加不要想到要是自己的婚事危害到他, 因為根本沒有這樣的事. 緣起緣滅, 自有自然的定律, 我深信, 你叫做 "叔叔" 的準老爺很希望飲到你呢杯茶, 只是時也命也, 要以酹酒以代之; 你準奶奶也從無怪過你, 反而, 大家都應該多謝你, 你在這期間, 由你知叔叔發病起, 阿文的心情一天差過一天, 你好多時要獨自準備婚事的籌備, 而且有時也要忍受一下阿文的脾氣 (當然, 佢都唔想的!) 仲要安慰他和家人, 夾在中間的壓力, 一定不好受.

叔叔現在真正的安息了. 雖然你們的大日子要改期, 不過我相信你們一定能撐得過去; 到時你們必定會以更佳的狀態去迎接這天的. (相信叔叔都唔想你們殘晒咁結婚吧...!?)

老朽八拜
15/11/09

ps: 搞掂晒你叔叔的事後, 記得將你們的出生時日給我再幫你們夾日子, 當幫朋友, 我無所謂的. 不過入境處話雖然好同情你們的處境, 但下次一定要再入紙申請, 也要再收 $305, 法例所限, 他們好想通融都辦不來... 而且要我幫你們出信去他們 office 取消你們的證明書 (呢 part 我會搞o架喇! 放心).