你肚餓嗎?

經過網友 迷咪米 的 blog, 拜讀了一篇 youtube 的轉載, 是柏林電影節短片得獎作品; 很值得一看, 也值得一想...



老朽極愛吃, 不過不可以浪費, 更加希望 "人人有飯吃", 大家又諗諗, 點解我o地豐衣足食, 佢o地水都無滴?

Recover 中...

出了那段 facebook 的 "皮質醇" 短信給幾位朋友後, 收到了不同形式的回覆, 幾位好友除了分享外, 也為老朽祈禱, 雖然大堆大堆的工作依然好似水機咁 "泵" 入來, 也隨時無端會突然有大鑊電話打來, 老朽一向的樂觀卻也開始回來了. 謝謝大家!

而其中, 教堂禮節司田少的回覆, 老朽覺得好想和大家分享的...

「有時，天主總會製造一些機會，讓你親近祂多一些，因我祂知道，當「人」開心或如意的時候，總會忘記祂，但當有痛苦或失意時，又總會掛念祂，所以這是祂給你的神恩，亦是一種磨練，正如拜苦路一樣，基督背負的十字架是我們的罪加給他的，再倒轉想一想，我們所受的苦，是是分擔了基督痛苦的一小部份，雖然過了四旬期，但我們每天都要過四旬期，幫助耶穌基督分擔痛苦，願上主祝福你，賜你力量去面對及解決困難，因父、及子、及聖神之名…！」

好一個禮節司 (Magister Ceremonium), 他的宗教分享和神學觀 (好似係由陳樞機教授的) 有時真係高到呢...

依然未有新秘書, 依然頭痛緊幾時係下一隻鑊要補, 但係內心平靜返好多, 有點「明鏡止水」的平和. 呢期有其他友人都有點生活的小 pebbles 阻滯, 老朽也借花敬佛, 在 fb 轉寄了這 messsage 給她, 真的希望她也可以有些得著.

亦係因為雖然工作仍像呢兩天的天氣, 但係心境點都開朗設少少, 所以是日上庭後, 因是金鐘高院, 就跑了落金鐘的 Great 看看有無甚麼好吃的. 即場被一位朱古力檔的 sales 吸引住.

的確係靚女一名, 仲係上鏡那類, 又想起家父之前作為專業影師提過的那句. (即早兩篇提過的)

是不是上鏡標緻倒是一件事, 饞嘴如老朽, 一見原來是 Valrhona 的檔口, 唔使諗, 對腳已經唔聽話行o左埋去...



細細盒的是橙味朱古力珠, 以 dark chocolate coat 面, 包著的是細粒的橙皮粒. 老朽是橙+朱古力的超級 fans, 但次次食 Godiva Orangette (橙皮朱古力條子) 一來悶, 二來太大條, 一陣就食完. 所以試一試這款, "襟食" 好多. 而且 V 記的黑朱古力用的是非洲豆為主, 約66%的 darkness, 夠黑夠搶味, 配起來比 G 記的中東豆更加夠勁. (但老朽覺得 Godiva 依然係 50-60% 之王)

另外一支就是用來 "唧" 上雪糕面的朱古力醬. 用 V 記朱古力唧上雪糕面咁鬼奢侈, o岩老朽呢幾天用來療養之用!

唔... 要去買多幾次朱古力先得... :P

女王新聞速報

又係一節女王新聞報導...

1) 上星期日 (24日) 於公公婆婆家中晚飯時，家人因避免女王有得睇無得食而給予蘋果一個在嬰兒車內以供把玩，斷估都無咩壞。豈料因最近發現女王已出八隻牙關係 *(註), 於餐後發現於該蘋果表面出現一 1.5吋 x 1吋, 深半吋之坑洞, 而女王口中出現粉紅色泡沫, 女王成長管理局常任秘書長斧頭姨接報後大為緊張，即時通知於附近高處餐檯用餐之女王七姑婆及八姑婆, 並封鎖現場及通知同檯食飯之老朽及夫人 ，經專家化驗後證實泡沫為蘋果汁, 粉紅色乃因蘋果皮而致。最後女王成長管理局首席執行官老朽夫人指示處理執行官老朽以紙巾夾硬挖出女王口內未能吞下之小片蘋果皮 (好核突呀!!) 其餘蘋果皮/肉相信已被女王消化, 現場於二十分鐘後解封.


2) 據夫人引述女王"麻麻"星期一 (25日) 晚現場消息指, 女王現能無需扶持任何物品站立達半分鐘之久 -- 尤其係睇 Baby TV; BabyFirst TV 或有線新聞時. 點解係有線而無線就唔得呢就唔知, 老朽現正向麻麻了解.


3) 同 (25日) 晚老朽回家, 由麻麻手上準備接過女王時, 聽到女王有意識地向老朽叫 "爸! 爸!" 據了解, 老朽當時呆立當場, 經過兩次試驗, 依然聽到女王叫 "爸!"

... 惟當晚較後時份, 老朽夫人依然聽到女王叫 "爸"... 並玩緊舊咬牙膠 (車! 我係唔會畀你打擊到o架老婆!! 哈哈哈哈...)

然此舉動已使老朽即時忘記所有公司做到初四咁樣的工作, 直到當晚女王就寢後方再次發作. 並因皮質醇過度偏高而寫了一極長之 facebook message 發予數位好友 (有部分應該都有來睇我 blog o卦), 打搞了, 希望唔會嚇親你們... 希望好快無事啦


註: 「新聞通識」‧消息及牙科專家指出，一般而言嬰兒於一歲前應該會有3至5年牙, 出了8隻牙比較罕見，老朽已向健力士紀錄大全申請將女王經歷登入大全內, 惟健力士通知老朽 -- 「打錯呀!!」

殺人不成, 就惟有...

承上篇, 當然不是真的殺人.

好勉強完成了死線前的工作, 正是十個煲, 但係得九個蓋, 係咁冚, 好似朋友話齋, 「摩打手」工作先得. 但係有時老朽的摩打手係會失靈的, 尤其係好似之前所提, 殺人唔成的時候, 就要搵些東西來使自己開心.



想買一架最近都幾興o既超輕身遙控直昇機好耐, 今次趁唔 happy, 一於走去買回公司, 關上房門, 玩一輪先...

之後發現地方唔夠大 (房間始終太細了...), 於是到放工時份, 夾硬放下手頭上的工作, 去了會議室...



不過有未走的同事聽到聲過來看看發生何事, 他們還以為那摩打聲是電動牙刷!

***

又一晚, 放工後, 和友人去了新蒲崗一間 studio 玩o下影相, 友人約了一位 model 小姐出來, 我們成班就不斷的在影影影... 又買了一堆小蠟燭作 moody 的小道具.



以前問過家父, 見到女孩子時最留意的地方是哪個部分; 他的答案是: 「整體」, 因為作為一個四十年經驗的影友, 本能就是要捕捉整個人何處影得最佳, 哪個角度可以為他的作品帶出最大的味道, 甚麼方法可以影到個 女生/model 最靚.

當時以為老父扮高深, 到今日, 我拿起相機, 才知道他這是個至理明言, 因為我正做著他當年一模一樣的事.

***

趁星期六, 中午放工晏了, 自找吃去. 去了中環相機街附近一間英式老店子 chippy.

是一間好 "街坊" 的店子, 英藉的老闆廚師 Martin 早年交了給人打理後, 水準一度下降, 但近期又好返少少.

吃了個傳統的 steak & kidney pie; 即是英國留學生所講的 "臭肉批" - 蓋因凡是腰腎位, 處理 (去筋啤水等) 不夠的話一定臊味十足, 但處理得宜則是天下美味. 另外還有一樣來自火星的物品...








是炸 marsbar - 即是將那條焦糖朱古力像炸魚柳的上啤酒漿炸了來吃, 仲要加雪糕! 味道是出奇的夾, 但也一定是出奇的肥和膩, 食完老朽動彈不得, 故回家稍遲兼畀夫人鬧阻住佢出去約朋友食 tea 云云... :P










***

又係食.

上星期日其實和夫人 & 女王去了老尖的老店 "喇叭" 食法菜, 因為都差不多兩年無去了; 原意是想減壓的, 不過最後發現兩樣o野, 一就是帶女王出街暫時依然係要由頭跟到尾, 根本 enjoy 唔到那餐相當不錯的法國菜; 二就是呢樣:



女王原來好鍾意睇 menu, 後來在別的店子再試也一樣, 一見 menu 就會拎住不停地睇, 就算當中只有字無圖畫也一樣!! 笑到我們碌地!

要減壓, 至叻都係女王!!

做到想殺人...

老朽的 blog 一向多數都係比較開心和有點 "玩樂主義" 的. 不過呢幾日真係做到死死o下. 忍不住來呻兩句.

早前無啦啦監生無o左個秘書之後, 基本上話就話有人幫我手打o下文件之類, 亦另外有人幫我手接電話. 但不幸地, 以老朽比較易接受人的性格, 也接受不到這位打字同事的工作. 或者她本身因為已經要幫另一位律師手做秘書的工作, 所以無暇替老朽打一份好的文件/信件. 次次交工作給老朽時, 總會見到極大量正常秘書不會錯的地方. 初時老朽都仲還可以改一下, 但改極如此的話, 老朽真係心都淡埋. 但呢位小姐態度上又係好有禮貌的, 而亦因為佢唔係老朽正式秘書, 難以 "調教" 也.

至於聽電話的同事, 其實完全未有接受過接老闆電話的訓練, 是故每天的電話十通會有兩通是忘了打進來的是誰, 又或者連來電者的名字也抄不清楚, 要麼就是來電者打來的事務或原因也是唔清唔楚的. 老朽看到 message 後根本不知是何人打過來.

如是者, 過了個多月; 開始出亂子了.

之前秘書會幫手記下一些案件入文件的日期 "死線", 老朽雖也會記下部分日子, 但工作一多, 就要秘書記下之後到時到候提點一下. 很多律師這方面都要靠秘書的. 不幸地, 現在無人提點下, 老朽真的差點兒完全忘掉其中一件案件的答辯日期, 真的好在天主保佑, 在最後一刻神推鬼擁下取出檔案一看 (就知差不多出事了), 又在最最最最後一刻, 記起此案其實打落去是 "輸梗" 的, 便拿出檔案來, 看見原來已經曾建議客戶 "割地賠款", 便馬上聯絡客戶, 就在最最最最最...後一刻, 找到客戶同意無需抗辯, 直接就索償金額打下去. 不然的話, 畀對方強行勝訴, 老朽一定樣衰到死十次都得...

另外, 年前另一位律師離職, 留下了某銀行的討債 files 一大堆要老朽執手尾; 不過呢位師兄o的手尾認真一般, 好多時加上銀行的各項貸款名目又多, 唔係自己一手一腳根本就無從入手; 現在有幾隻呢類 files 就來到期見官又或者正審了, 老朽又係一頭霧水; 偏偏在這時候來沒有了秘書, 而大老闆又根本唔會理老朽的死活, 這間銀行客戶又不是他們的大客, 所以也不會調動大量同事來幫手, 來來去去就是好心師爺大雄哥和之前的那位律師秘書 (她現在主力幫另一位老闆級律師, 只是好心兼奉命客串幫老朽)兩人, 其他都是老朽一腳踢, 真係踢到腳跛!

平心而說一句, 之前兩位同事其實都係好人, 也是做好本份的人, 只是未必人人夾得到, 也不是人人夾得好. 但說到尾, 老朽自問無咩得罪人, 點解會忙成咁呢... 幾時先可以請返個秘書幫手呀..........!!!!!!!!?????

母親節特別版

今年是夫人生了女王後第一個母親節.

當然女王唔會叻到一歲未夠就去整野 or 買東西氹夫人啦, 呢家o野, 暫時都係由老朽代勞.


夫人雖然不下一次說不要浪費, 但她喜歡收花, 也是不爭的事實, 今年因時間關係, 怎也不能跑到中環夫人最愛的中西花店買, 又或者要他們送貨 (因為真的太貴了...) 故此老朽在家附近一間比較 "企理" 的花店訂了, 就在當天早上為夫人買早餐時一併取花, 之後抱起女王, 由女王獻花. 初時都驚夫人覺得花束不夠 "elegant", 但當夫人見到老朽和女王一起抱起花束時笑到見牙唔見眼就知都無買錯了. (吁... 一額汗...)

因為始終是 "兩頭住家" 的關係, 而家母和外母喜歡吃的心頭好又有所不同, 所以今年決定在正日前一晚由老朽下廚煮畀外母食, 而晨早指定今年想食日本菜的家母就在正日在中環食.

之前數天已經開始想一下弄些甚麼作為 "家宴". 而每次這些家宴都要想一下, 如何配搭不同的主料和食製, 要包括紅, 白肉, 也要有海鮮類, 要有素菜 (外父食得比較清淡), 煮法方面要兼顧有煎炒煮炆炸湯, 盡量不重覆煮法; 搞了好幾天, 和夫人想出了這菜單:

鮑魚煲老雞
江南涼拌茄子 (由老朽夫人製作, 佢話要整返一樣以示孝心喎; 以白醋, 生抽, 蒜肉及芫茜作膽)
蘿蔔清湯腩 (初時想普通炆柱侯腩, 但竟然畀老朽買到一幅好靚的崩沙腩 (即爽腩), 唔做清湯的話對唔住隻牛也!)
松露焗薯仔片 (呢味之前介紹過小量製法)
薑蔥爆桂花魚鬆 (即川味杜甫五柳魚)
豉油皇煎豆腐 (以八珍雙璜頭抽精製, 已達頂抽級數, 煎呢味係最普通, 但就真係最考功夫了)
粉絲雜菜煲 (外父至愛, 之前弄旖; 今次本來已有清湯腩, 想唔整呢味, 但夫人指示下, 繼續有呢煲上桌)
窩貼明蝦 (即蝦多士, 首次製作, 故早幾天自己試菜一次先 ^^")
海南雞 (呢味最搞笑, 本想自己浸雞的, 最後一刻先醒起家中只有一個大湯煲, 都用o左來煲湯咯仲點浸雞呢... 最後唯有出去買隻白切雞回來沖數, 湊合夠八味菜)



今次係老朽首度一次過煮六七個菜, 唔計之前一晚切定蝦多士的麵包同埋醃蝦那幾分鐘, 和一早煲定個老火湯的話, 就只係個腩做得長時間一點, 由下午4時開始. 其他菜六時才開工; 晚上7時15分食得 (不過主角未到...) =.= 以老朽來說, 算有進步了...

至於母親大人就在正日去了中瓖賀菊, 因為她愛食蟹 & 啖牛, 所以點了個松葉蟹 + 燒和牛餐, 還再點了一條燒喜之次魚給愛魚的父親大人...




那天下午我們三個還先去了 cova 食 tea, 女王之前次次出街都呆呆的看街, 今次竟然和 cova 的 waiter 們玩得好開心, 笑到我們飛起.

老套地說句, 一家人齊齊整整, 平平安安, 真係最最最開心的... :)

去年今天

去年今天, 大家都未知道, 有八萬人只剩下不到廿四小時的生命; 亦不知道, 原來自己明天就會變成孤兒, 鰥寡, 無依的人. 有人還想著, 如何慶祝在5月11日的母親節.

在香港, 大家還準備慶祝明天的佛誕假期, 和入長洲看飄色巡遊. 至於老朽, 去年這時工作上有點煩惱, 加上女王就來出世, 有少少一頭煙的感覺.

然而, 在去年的明天, 下午2時28分左右, 老朽和家人 (還有尚在夫人肚內的女王) 在北角飲茶之際, 就覺得突然好像有架大貨車在門外經過, 當時夫人就問, 點解張權震o既? 老朽就話 - 係咪冷氣機風櫃 (我們坐得好近個冷氣機位) 震呀.

十多秒後, 靜了, 原來其他茶客都覺得有點震, 不過當時無人想過, 這一刻, 地動山搖, 已將以萬計的人活埋了.

大概, 這幾天會有不少以 "一年了" 為題的文章, 網誌等. 也大概, 會有很多人這幾天再次回望. 老朽, 還在為生者亡者, 祈禱著...

北川這已經廢棄, 準備用作紀念遺址的縣城這幾天開放讓家屬回去拜祭, 一個個再度悲傷的面孔, 走回一處處根本不知道自己摯愛是不是在那裡罹難的地方, 已經夠受的了; 最乞一憎就是在這時, 有一架公安車走過, 車上裝著兩個巨大擴音器, 前面紅底黃字書上"法制宣傳"; 大大聲叫道 "嚴禁任何人出示橫幅... 聚集遊行集會... 煽動情緒...".

好刺耳.

這就是地方政府的手法嗎? 一年前大家的關心和開放哪裡去了? 當時中央也好, 地方也好, 廿四小時直播, 雖然是巨大天災, 但內地官方從未試過的開放, 所有共產黨正常下容不了的畫面, 廿四小時內已經遍傳世界; 全球哀悼同時, 為中國擊節讚賞.

慢慢地, 豆腐渣和貪污的新聞浮出來了; 縱然中央無意封鎖, 地方卻愈收愈緊.

其實不論如何, 逝去的人也不會回來, 民眾要的, 是一個交待. 和一個日後不再重蹈覆轍的承諾.

為何他們還要做縮頭烏龜? 是心虛嗎? 是不是睡醒的時候?

攞o黎搞

有時有些人就是硬頸. 硬得有點離譜.

最近有一件交通意外, 有位司機被控不小心駕駛, 遲少少就會上庭. 他找了老朽和一位大狀, 準備抗辯, 因為他覺得他自己當時沒有錯, 錯的是對方司機, 將電單車高速 "攝位" 導致他轉線時收掣不及, 不過沒有碰撞, 只是兩車太貼所以電單車司機 "篩開" 跌倒.

老朽在向警方查詢搜查證據時, 發現原來警方當場找到另外的一些獨立證人, 都是指出我客戶的駕駛模式有點問題. 不過他們的幾份供詞有點細位上的出入. 老朽客戶讀到有這些出入, 於是便向老朽指出, 要找大狀幫忙 "盤" 對家的證人.

這位客戶十成十是看得電視或者道聽途說得太多了; 老朽所見, 正常情況下三數份口供有出入是正常不過的事, 不然的話更似夾口供. 這些出入位絕對不會構成當庭法官覺得這些證人不可信的理由 (當然, 如果證人在庭上表現有問題又或者到時上庭口供和供詞上有很大出入就另計). 在這情形下, 基本上這位客戶可以打贏的機會是 - 零.

不過呢位客戶硬係想畀錢人使, 也硬係覺得自己唔算做錯, 更覺得就算是 "抗拒從嚴" - 即打輸會比認罪罰多三分一左右 - 也在所不計. 那經過一輪解釋後, 老朽一眾都有點搲頭地幫這位仁兄抗辯的.

開完個 "燢" 高采烈的會後, 老朽已經想碌低訓覺, 且已是辦公時間開外, 不過公司依然成檯東西, 已經註定晚上要夜回家, 未能和女王 (&夫人) 共晉晚餐了; 既是如此, 又係對自己好o的的時間... 和 trainee 兩人跑了去還算新開的 ifc Agnes b cafe - le pain grille 飲杯咖啡食份三文治.

驚喜的是他們有一款短期推出的橙酒餅 Grand Marnier (不過他們讀得好怪...當然, 老朽不會像當年教學生的教他們這法語正音), 好吃得來不太甜, 但有餘韻; 大家有興趣的話下星期尾前好去試了.

放假食食食...

豬流已經唔再係我的 concern, 因為放假大過天, 話知佢...

又係因為放假都仲要幫友人的友人證婚, 所以有放等於無放, 加上夫人希望有時間 shopping, 放了她大半天去自由活動, 三天假期加埋加埋無o左大半, 剩下的, 只有對自己好o的, 食o的o野安慰一下自己.

先是自煮行動, 來一個差不多一年無玩的簡單東西 - 叉燒. 正確來說, 今次是「桂香叉燒」...



今次買到半斤不錯的脢頭肉; 不過時間關係, 我只用了同珍的叉燒醬 - 揀同珍是因為它偏鹹, 我今次想加桂花糖. 其實有時間慢慢玩的話, 應坐溶麥芽糖, 以玫瑰露, 糖, 蒜肉, 鹽, 生抽, 味精/雞粉, 麵豉醬(原味o個款, 即原豉醬) 自己搞個叉燒醬出來的. 之後加入一茶匙左右的桂花糖.

醃兩小時起碼, 而醃時記得在肉面用叉開少少洞, 入味快得多. 之後放家用焗爐高低火焗佢半小時, 反轉再半小時, 之後上皮 (用醃汁料同埋蜜糖水掃面, 焗十幾分鐘另一面又係咁). 食得.

今次個肉好靚, 但係因為我想食燶同埋脆口的肥肉, 導致另一端角位的瘦位軟得來太乾, 硬係美中不足, 不過桂花香留了在肉上, 都還算成功.

五一那天晚上要做其中一單證婚, 於是為慰勞夫人一個人睇住女王, 所以早上先一家三口去買衫仔畀女王, 之後去了 ifc 的 Union Bar lunch:



夫人個法式洋蔥湯個芝士味勁到震, 我個 Clam Chowder 就相當飽肚, 所以我們兩個只再吃了焗薯皮 (個芝士好香, 老朽唔好芝宜都食o左半碟) 同一份 ribs.

下午和她們行街街後就去了中環的三星店 "盧布松" (L'Atelier de Roubouchon) 買幾件 cake 回去, 又見到他們的 macaroon - 竟然只係 8 元一件 (雖然 size 細少少), 平過好多地方 (人o地多數賣緊十幾蚊), 心想盧sir 的macaroon 點都唔會差, 唔使講, 即刻整返一套8件.

前幾日仲去了利園的 Caffe Vergnano 1882 食, 好多人知道他們的咖啡是不錯的, 但係知道他們 pizza 做得好的人不多, 好老實講, 他們的 pizza 做得正宗意式口味, 餅底係自己整的, 擀得很鬆, 烘得很脆; 而且平實簡單, 唔會落好多古怪料子; 夫人一吃已經愛上, 老朽食過亦覺得和在意大利食到的真係沒有兩樣, 分分鐘仲好過 pizza express.



好似賣廣告咁, 但係老朽講o既係事實, 大家可以去試o下. 他們的 pasta 亦係相當 al dente (有人或者會覺得韌得滯), 最抵死係佢o地o的野食一o的都唔貴, 幾十蚊至百多元的一份, 仲抵過佢o地o的咖啡.

不得不提的是屋企人借住女王登極十個月, 買了個美心天使蛋糕來, 出乎意料的好吃, 尤其當灑上了焦糖粒之後...



一家六口 (女王都食o左少少!) 團結就是力量, 一晚 KO 了呢兩磅 cake, 飽到捧住肚子去睡...zzz.

抗疫...

4月30日晚, 在湯漢主教的就職祈福彌撒之中渡過. 老朽被編了值班主教座堂正門保安, 而攝影則因為是次為教區中央大禮, 故交由教區影視處負責; 老朽只係手痕影了兩張自娛; 比較搞笑的是禮成後部分教友不守秩序阻住通道搞到曾特首走唔到, 門口的主教又呆等...

與此同時, 就係呢一晚, 有一位由墨西哥經上海來的公務遊客, 和其他外國人一樣, 正正常常的入來香港. 那晚, 他開始發燒和感冒.

還算他知機, 記起自己是墨西哥人, 於是通知入住的酒店, 送了他去律敦治.

唔送尤自可, 一送就大件事. 即刻整單 "疑似" 個案, 過多半日, 確診了.

全港震撼.

六年前的回憶, 一下子回來了...!

當時, 老朽身處醫院處理法律有關的行政工作, 日日對住班醫生. 同某高層開完會, 兩日後佢竟然中招, 同某同事在醫院開一次會, 同一天竟就是某醫生中招的那一天 (後來死埋!). 自己的某老闆又竟然托人叫我 "無咩唔好返去了, 有咩更加唔好返去" 云云... 人情冷暖...! 每天放工回家, 自我隔離半小時, 用1:99 係咁噴自己o的衫, 之後頂唔順咁臭又用返o的 linen water 噴噴噴, 和家人食飯分開食 (係我自己提議的), 和女友 (而家變了夫人了!) 只講電話, 每個月只見一次直到 sars 完結的那天. 每天的地方就是自己房中, 辦公室同埋 canteen...

大佬... 諗起都驚, 真係千萬千萬千萬唔好整多劑... 拜託!!!