禪語...

雖然老朽是天主教徒, 但也喜歡看看其他宗教書籍, 加上家父為佛門居士, 聽埋聽埋都幾多不同的說法.

春有百花秋有月
夏有涼風冬有雪
若無閒事掛心頭
便是人間好時節

以上一段, 為近千年前慧開禪師的偈語. 慧開禪師是禪宗的其中一大家, 一向不少禪宗的前輩都提供不少學佛的方法, 即 "法門" (註), 而慧開的 "無門為法門" 道理則提出了 "其實咩都無所謂"; 也符合了他上面一段的那種 (我覺得啦o下) 近乎道家的 "無為" 的心理.

另外, 聖一法師也在某口述著作 (對不起, 是老朽打書釘讀到的, 真係唔記得書名了) 說過人點解會不高興, 就是因為 "接受唔到" 痛苦的發生. 如果能夠接受 "人生就係咁o架喇" 的話, 那就可以經過 "苦" 而成 "集". 之後可以 "滅" 去這些苦緣, 從而入了 "道". 但更高的層次, 就是去到 《心經》所提的 "無苦集滅道", 即係連呢四樣野都唔使去想.

當然, 要接受痛苦, 係一個好高o既 "呢"; 其實呢個講法, 同基督各宗派的 "信靠上主, 因為祂安排了最好的路" 有點不謀而合, 卻是不一樣的境界. 因為基督宗教所說的是 "有指向" 的, 即以神為依歸, 但佛家的接受和放下就是 "無指向", 即以自己為中心, 雖然好似係高一點的層面, 但卻是一個更難達到的地步.

或者, 老朽都係因為近兩日聽埋o的消息都唔係太好, 不論係友人或者社會上都係咁, 所以無啦啦發o下翕風. 如有佛門高人指點, 則老朽獲益也!

***
註: "法門"是真有其物的, 據悉以前在一些古老街上有時會有設置一度度的門, 上面刻有些經文, 從此經過便算諗經, 也可提供一個反思的機會; 由於這樣門是為方便大眾, 而且也是同一個佛理, 故此後來便有 "方便法門" 和 "不二法門" 的成語了.

詳和的 cake

老朽今晚以 "名譽法律顧問" 的身份出席了某專業團體的周年大會 AGM. 美其名是 "名譽", 其實就是 "義務". 不過這義工, 老朽當得開心, 就如早兩年某報訪問過老朽 (當然唔話你知係幾時同埋邊份報紙了) - 難得可以用自己的專業來幫其他人嘛.

一般的這些團體, 不論是專業團體或是社區組織, 多數都會有些搞事分子, 要法律顧問鎮場, 就是必要時提供 "緊急咨詢", 老朽試過有某團體, 請了好幾個 (包括老朽) advisors 來, 另外在台上放了一把不會用的木鎚, 一本相關的公司法例 (香港法例第32章), 一副戰鬥格, 一晚下來, 不下數次有人 "叉x住" (challenge) exco 和大會決定, 我們一班 advisors 交頭接耳, 搞到連我們幾個中場吃過飯後一起站起來, 都會有 exco 問我們是否有大事要退席商量. 真係唔知好嬲定好笑.

但今晚這個專業團體, 不知是否因為他們多數都係對住o的花草樹木了, 大家都是詳和得很, 老朽第二年幫他們了, 大家都係嘻嘻哈哈的, 連問題都唔多個, 壓根兒大家就是想快點完成 AGM, 一起吃個飯. 老朽真的十分欣賞他們, 真心的為個會, 也真心的為大家開心去著想.

不過老朽夫人近來極忙, 不忍留下她一人晚上對住女王, 故此辭謝了今晚的晚飯 (菜單上的金湯蟹黃翅其實係老朽心頭好!!). 回家報到.

想說的, 其實不是開會又或者顧問工作, 而是今晚在灣仔街頭回家時, 發現 zoe 新開了分店在灣仔.

這間就是很多人都推介過的餅店. 老朽之前和夫人都試過, 確係相當靠得住, 不過價錢也十分 "靠得住", 拍得住酒店餅房有餘.

因為老朽是晚心情跟隨那學會 AGM 的詳和, 所以花了九十大元買了三件餅, 就是他們的 Mud Cake, Blue-lemon, 仲有 Blood-O.

Mud Cake 就是將濃味朱古力整到好杰身, 真係如名, 淤泥咁樣才用來 "meng" 上蛋糕. 老朽至愛之一. 今次呢件, 朱古力濃度合格有餘, 卻未如澳洲的 Max Brenner 那陣不可抗拒的香味. 但都已經交到貨了.

Blue Lemon 就是 blueberry 加 檸檬了. 有點人工化, 一般.

Blood-O 就真的是用西班牙血橙加入蛋糕 mousse 整出來的. 夫人鍾意呢件多o的. 老朽都覺得正, 尤其係橙香的餅, 加了個黑朱古力做的餅底, 襯到絕!

女王就食飽飽, 睡著了... 我們兩個先可以咁嘆咋...

我們兩個一邊食, 一邊傾偈 -- 唔係晒命, 也唔係晒話件 cake 幾貴 -- 而係覺得 - 幸福. :)

我哭了...

唔打喇, 自己睇啦... 我已經唔忍心再見到那兩張相...

遭 父 拋 入 滾 水 燙 傷 　 台 女 嬰 拔 喉 去 世

... 呢o的咁o既老豆, 死十次都補唔返... ><"

又想起今朝我返工前, 女王見我著外衫, 即刻喊著伸晒手要我抱... 雖然有事o既係遠在台海對岸的小孩, 但淚水已再一次忍不住, 我都忍唔住問天主, 點解有咁o既事發生...

古法紫蘿咕嚕肉 vs 超肥鮮肉酥餅

承前文 《女王出巡之 studio 攝影》; 老朽因為見夫人影女王相唔多 happy (係真的有少少不爽那種), 所以決定以一味 “古法紫蘿咕嚕肉” 希望 “乙水”(氹) 返夫人.

呢味介乎大菜和小食之間的菜式, 理應用較肥之梅頭肉切件醃好後, 上蛋粉漿, 溫火炸之至熟, 其後猛油翻炸, 方為鬆脆. 不過是日老朽倥偬之際, 第一只能買到腩肉, 其二就是簡單點, 用了炸粉開漿. 其三就是用油, 始終是家庭式, 我已經用了半支「豬頭嘜」 油有多, 但是在翻炸時仍然不能 “全面覆蓋”, 所以嘛… 有差不多近半的咕嚕肉件是不夠脆的.

尚幸都仲有一半係脆o既… 之後, 就再靠個汁了.

紫蘿, 就是子薑和波蘿, 而現在一般的咕嚕肉汁醬都是用茄醬, 醋, 糖, “喼汁”開成的. 其實, 有看一些飲食節目的朋友可能會記得, “古法’ 的咕嚕肉, 在鏞記, 陸羽和港大同學會等地方, 是用山渣做個底的.

老朽買不到新鮮山渣, 卻記起有師傅提過其實山渣餅係可以用的. 不過就要好好地調校味道. 於是, 買了一袋山渣餅, 用了十分鐘校味. 偷了個懶, 用少少熱水坐住掰開了的山渣餅, 快點嘛.

當然, 用了山渣做底無話不可以加返多少茄汁 & 喼汁嘛. 不過在用了兩筒山渣餅後, 其實只要用白醋, 再加一點點茄汁和少少喼汁已經好夠味了. 不過因為是用山渣餅的關係, 顏色不會太鮮紅或橙, 但當然了, 更加天然.



料頭除了 “紫蘿” 外, 當然少不了青椒, 爆香後落汁料, 加波蘿, 子薑 (其實子薑在初夏先最靚), 可以用少少生粉水收汁, 最後落埋已經翻炸了的肉件略炒, 緊記不能有汁剩下, 一定要掛上肉面; 大功告成.

老實說, 老朽和夫人食後都覺肉可以再炸得好o的, 但係個汁唔係賣花讚花香, 真係幾好… 所以夫人都笑返晒, 女王呢個時候亦一路笑, 一路…
…
…
…嘿嘿… 辦了”大事”!! 老朽和夫人就要即刻… 唉…

***


同場加映, 在買肉時見到街市有呢樣o野賣...


回家當消夜, 一開, 真係肉香四溢, 香蔥和酥皮, 還有甜肉的香味由廚房攻到出客廳, 不過一吃, 肥得要緊, 當然了, 餡料的肉九成是冰肉 (即全肥肉) 嘛! 吃一件真係減壽十分鐘的!
(唔怕, 我有紅酒燒脂頂住!)

女王出巡之 studio 攝影

話說女王在六個月時, 夫人提過想帶女王去影樓影相, 不過又唔想搞o的cutie 造型. 所以就揀了銅鑼灣崇光樓上的一間攝影公司.
等了好一會, 揀了昨日星期六去影. 仲買了一大埋不同的衫用來襯不同的場景, 務求女王一出場就艷壓全場.

好喇, 十一點半去到, 一般而言會影個半鐘左右. 點知女王鬼咁有性格, 平日我們一撩就笑的她, 今天不知是不是不習慣人o地 studio, 由頭到尾笑的時間少過五分鐘, 中間仲加埋因為太倦而睡著的差不多一小時, 即係話我們影足三小時. 又好在剛好那天另一位小朋友取消了預定來影的 schedule, 所以女王才可以留咁耐.

不過話得說回來, 負責影相的姐姐同埋 assistant 都好好玩, 一o的都無介意女王咁多事實, 而且逗小孩也的話有一手, 只是女王對著陌生環境不大理睬 (似足佢阿媽... -.-) . 但另一方面, 他們打燈在老朽看起來似乎 “千差” 一點, 稍嫌求其o的. 不過老朽看 preview 都 ok. (雖然他們用的是 canon 機… well, 老朽覺得, Nikon 好o的囉…) :-)

老朽亦自備相機, 當然, 江湖規矩我不會在別人的收費影樓自己影相, 不過就和他們傾過, 會用老朽的 D700 做道具, “影我影女王”. 但係中間實在忍不了手, 偷偷影了三兩張 (不過當然無影樓燈, 因為那些燈是要引發器才會閃, 而引發器也當然裝了在正式攝影師的機上了), 就影下了女王畀人影的模樣…



影得來, 三點幾, 我們連飯都無得食, 只有去食下午茶頂肚, 夫人就更加有少少黑面, 咁又係o既… 女王平日唔唧都笑, 今天就 warm up 了半朝都係一樣唧都唔笑. Subject to 下星期睇睇o的相啦, 夫人就覺得o徙錢囉… (又係你話影o既…)

下星期老朽睇o左相辦後再作詳細報導…

庭上奇人

老朽的主要工作就是民事訴訟, 好多時亦要親自上庭.

今時今日, 自己打官司唔請律師的大有人在, 其實好多時除了程序上稍有不熟外, 有不少我們稱為 in person 的都幾醒, 有些更是打得官司耐, "久病成醫", 對法律和有關程序有時比我們更熟.

不過老朽昨日遇著一位死纏爛打的, 卻是熟到走火入魔, 更加是精神好似有點問題的原告人.

此君十年前開始打官司, 為的是他買錯了一架不知甚麼的儀器, 於是狀告多人, 而那儀器最後卻證實無問題, 有問題的正是這人.

此君於三十年前在內地經歷過文革, 或者因為咁而覺得全世界都欠了他似的. 所以狀告多人, 包括國家主席, 香港特首, 各級司長, 當然少不了拉埋各級法院的法官落去. 老朽代表的是其中一間半官方機構. 之前由另一位律師師兄 handle, 不過師兄年前已經辭職做其外間法律顧問去也, 留下此 "蘇州史" 給老朽.

對著這樣一個的原告人, 當然無律師會幫他手, 而各位行家對著佢, 也因為他太 "勻循" 的關係, 根本不能以常理去推測他下一步的棋會怎走.

呢單野已經開始了幾年, 其實已經完結, 這位 "高人" 亦已上訴了幾次, 到了上訴庭亦已被駁回, 現在尚餘的手尾就是訴訟招致的幾十萬費用 (梗係貴啦, 佢咁玩法, 開了四單不同 case, 再上訴加上訴加更鍥而不捨的上訴!)

法院的訟費評定聆案官已經做出了裁決, 但此高人當然又一次不服, 又一次上訴. 雖然老朽要 "陪佢癲", 不過搞了老半天, 都不知他要上訴的是甚麼, 只是不斷地重複自己幾委屈, 將奧巴馬, 溫家寶, 泰國總理阿披實, 他信, 曾特首以至於江澤民都搬出來大鬧一番, 更指著老朽咆哮道 "到我當權一日, 我一定要你們律師行關門大吉!!"

哦, 好啊.

法官又好心機, 等到佢講o左大半, 發洩完了, 才問: "無o野講啦嘛? 頭先你藐視法庭, 無證無據出言侮辱各法官喎, 我畀次機會你, 再係咁的話, 我即刻將你收監" -- 當然, 老朽同意, 法官唔畀佢講返咁上下的話, 佢又唔高興, 又會上訴.

結果當然是佢老人家的上訴被駁回. 老朽兼得其實此君畀唔起的堂費 (唉!)

雖然未知收唔收到錢, 但老朽的法律行政員同事和委託的訟費評定員 (Law Costs Draftsman, 即專門以幫律師計律師費(即訟費/堂費)的特定人員, 他們有資格代律師就訟費問題出庭的) 今次幫了老朽一個大忙, 所以請他們食個正o既午餐, 理所當然.

哈! 他們提議去中環北園. 仲話一定要食 "流沙包".

有網友又o岩o岩去完, 亦係大讚那店的流沙包, 不過老朽去幾次都未食過, 想不到原來真係咁出名.

食落, 唔係講笑, 包地軟熟 (個包種發得靚之故), 中間的流沙直頭係多到 "真係" 流出來的. 恐怖得很, 外表真係睇唔出.



(老朽無預到去呢度, 所以只能用手機拍下粗糙照片)

呢餐 lunch 食o左六百幾蚊, 不過好老實講, 好食不在話下, 多謝一班仆心仆命的兄弟, 呢個價錢, 遠遠還不夠...

女王登基九個月慶典:馬灣出巡之有自唔在攞苦o黎辛

復活節假當然要同夫人同個女王出o下去啦... 夫人就提議去馬灣公園.

老朽就諗, 既然有人有機, 應該帶相機去影o下相的.

就係咁, 復活節星期日, 一家三口就坐船去了馬灣.

唔去尤自可, 去到先知死... 帶了女王兩餐 (一餐糊仔一餐奶), 加冷熱水仲有 standard 換片裝備一大袋已經係基本的了, 加上帶兩件玩具驚女王上鏡唔 happy, 仲有帶多件衫仔呀, 被仔呀... 仲有架車仔呢... 真真似搬屋搬廠搬寫字樓.

呀... 唔記得o左, 影相梗要有相機啦...加多支鏡, 至於腳架... 算啦, 唔帶喇!

這樣一帶, 三個人都係似走難多o的.

一抽二拎的到了馬灣, 不過遇上的是濕熱的天氣, 但不知何解, 可能是因為女王高興啦, 我們三個流著汗, 一邊自嘲 "有自唔在攞苦o黎辛", 但係一邊又笑晒咁行來行去, 夫人抱著女王, 影個不亦樂乎.



原來, 馬灣公園有部分地區好適合影結婚相, fb 上有找過老朽證婚的友人都話去過那兒拍婚紗照, 那日所見, 不下五對新人在此拍照 --




老朽已經好耐絛同夫人出去影相了, 當年拍拖, 除o左用鋼琴之外, 就係用當時老朽其實不太雀躍的攝影功夫去追到夫人的 (當時呢個世界都未有正式大型 DSLR, 老朽仲用緊初期的電子單反機 EOS, 更甚是用緊 Nikon FM), 現在拎起 D700, 有點唏噓, 卻又有一股衝動係咁影係咁影...

影了一堆女王 & 夫人, 又見到有不少瀑布, 忽然記起早前去打書釘, 看到慢時間細光圈影瀑布的流水, 老朽決定在無腳架的情況下一次, 以下就係座了在石頭上, 用 manual 1.6秒加 22 光圈的結果...





中午食飯就在沙灘邊的意大利菜, 個 pizza 一般不過個沙律就超正... 係蘋果牛油果沙律加埋 gorgonzola 芝士, 老朽雖然唔食芝士但係夫人就超愛呢隻...



食完又影過, 不過到下午三時左右, 其實三個人已經謝晒皮 (大佬, 開心都會疲倦o架嘛...!) 所以提早收工, 奉夫人懿旨 - 去中環替女王 shopping 買衫喎!

樞機的最後一塊...

復活節, 身為天主教徒的老朽, 自要參與禮儀.

今年因為多了架相機的關係, 奉召成為主教座堂攝影師之一. 並負責在週六晚, 由陳日君樞機主禮的領洗入門聖事做拍攝工作.

本身有數名的攝影師, 加上老朽, 共五名影相佬, 而且母校的副校長新近成為教友, 也嚷著要幫手影他的友人們, 並得到神父批准, 所以今次陣容鼎盛, 共有六人之多.

不過正如老朽在 facebook 所言, 今天是老朽的第一天 (做攝影師), 卻是陳樞機的 "最後一天" - 今晚之後, 他不會再以香港主教的身份到主教座堂主禮了.

當然, 樞機只係由香港主教的位置退下來, 不是自此消失.

由禮儀開始, 老朽拎起相機, 才發現原來自己一直都無去承認自己原來一直繼承著家父五十年攝影生涯的無形使命, 更發現自己原來流著的是一個攝影師的血 - 縱然技巧有待改進. 老朽提著相機, 追趕跑跳, 趷高坐地, 戰績就是支 105micro 鏡身花了一個小點, 肉痛得很...

在此, 要謝謝兩個人, 一個當然是家父, 是他讓我在十歲時已經要學幫他用板打燈影廣告相, 是他教我咩係光圈先決; 提起相機的一剎那, 我好實在的感受到我係我老豆個仔. (好玄呀可...?)

另外一個就是我的好友老闆, 是他 "迫" 我買 D700, 唔係佢我真係無機會發掘到自己原來有呢個興趣, 仲係如此的濃得化不開, 也打開了我內心的一扇門...

隨著入門聖事, 百多位新教友在喜樂中領受了第一次的聖體聖血, 老朽身為教友, 但又在工作中, 當然讓其他教友先領, 自己就跟著攝影組大哥之後.

卻是想不到的, 就是我這樣一讓一站, 竟就由爺爺手上領過當晚的最後一塊聖體. 而今晚之後, 他不會再在此作為主教去送聖體了, 那就是說, 那是他作為香港主教所發的最後一塊聖體. 後來是禮節司告訴老朽的, 我知道後, 想起的就是這句聖經:

"我是「阿拉法」和「敖默加」最初和最末的, 元始和終末." (默示錄22:13)

****
有小弟 facebook a/c 的朋友可以參考相片, 無的話, 在 fb 打 "陳樞機" 應該都可以找到的, 因為為了方便教友, 這輯相老朽 set 了所有人都可以看到.

你使唔使戴假髮的?

老朽開始有o的甩頭髮 (年幾大丫嘛!) 不過唔係講呢個問題.



網友閒人乙問老朽有關律師戴假髮的問題, 老朽就不如在此分享一下.



都係拋磚引玉, 如有行家或大狀 (例如陳大狀) 到此一遊的話, 見到老朽所言有錯或者講漏者, 有勞不吝指教, 以正視聽也.



其實係大律師 (訟務律師) 先會戴假髮的, 而且係區域法院或以上級的公開庭才會戴, 如果係 "內庭聆訊" (即多數用來解決法律觀點或有關司法程序之爭拗) 之類, 就不用戴, 亦無需穿袍. 所以各裁判處的律師都唔會戴假髮的. (例外就是當裁判處的法庭因為上級法院 "爆棚" 而被徵用 "當" 成區域法院時)



假髮分幾類, 1) 大律師假髮; 2) 御用大律師典禮用假髮; 3) 法官假髮 (幼細o的, 比較銀灰色o的); 4) 高等法院以上級法官典禮用假髮. 2 同埋 4 就係長長的垂到肩上, 平日他們都會用返自己的短假髮開庭.



點解戴呢就簡單講, 一千年前英國律師唔戴假髮, 法官亦不會戴, 反而坐堂時係會戴方形頭巾, 圓帽; 假髮係幾百年前的 "上流玩意", 由皇帝話 "呢o的似係官式o野喎" 開始, 律師到庭打官司時就開始戴起來,



法官方面, 自從皇帝話戴o左型仔之後, 法官的守則亦改成要戴假髮, 而且整多樣 "典禮假髮" 出來. 反而方形頭巾, 圓帽就開始唔戴, 只保留頭巾在隆重頒令時戴 -- 亦演變至今只有在宣佈死刑時戴的黑色頭紗. 而圓帽就 "縮細" 至今日法官假髮頂頭的一個小圓凹位.



或者可以參考o下呢度 (我都係參考呢度咋):

http://legal.edeandravenscroft.co.uk/EvolutionOfLegalDress.aspx

呢間係英國的皇室御用製袍師 Ede & Ravenscroft 的公司網頁, 詳細介紹了各式法官和律師衣著的演變.

東亞運義工領袖訓練第二擊 - 義務工作管理

其實早兩星期已經上了這堂, 一直想在此記下和分享, 因為除了部分遊戲冗長一點外, 奧運馬術公司的總監分享實在係好精彩, 這個星期天過得比我想像中快.

最正斗的莫過於中西對 "義工" 的分析, 博士指香港將 Volunteer 譯為 "義工" 最為合適, 因為台灣的 "志工" 和內地的 "志願者" 都有點不足之處 --

志工一個 "志" 字, 是為了個人的意向, 但係正式的 volunteer 是不計較個人的, 所以有點不合;

志願者字面看來, 是沒有理想或者理念的, 所以也不太符合.

唯獨是 "義工" 的 "義" 字有很長的意味, 更用到孟子的 "仁 仁之心也 義 仁之路也" 和 "生我所欲也,義我所欲也;兩者不可得兼,捨生而取義也" 來解釋, 真的貼切得很.

而至於西方的 loyalty 也可應用於義工之上, 因為在無酬之下要為一個目標服務, 要的正是忠心 loyalty. 連千年前的思想家蘇格拉底 Socrati 亦提到 "為陌生人的責任" (duty of care to strangers).

點點滴滴, 好多是已知但係又成日唔記得的道理, 雖然這天 (3月15日) 整天都是 "lecture" 的, 卻沒有 "釣魚" 打瞌睡, 更見返之前第一次 training 的部分朋友, 大家在 facebook 已經打成一片 (to Volunteer Leaders: 唔係講柔道高手 ken sir 被我用背負投打那張相!!) , 今更老朽又影了一堆相, 又成了 fb 熱話...

上課時據了解, 奧馬當時是沒有 "義工領袖" 的, 但是義工們自發出來了一些 "義工頭" (volunteer of volunteers); 老朽除向其致敬之外, 更加希望向他們學習 - 因為我們不是甚麼領袖, 而是 co-ordinator, 在必要時就要做決定同埋負責風險的人; 也要減低團隊內的怨聲, 因為正如博士所言: "義工路已難行的山路;怨氣如在你的行山鞋內灌水".

或者, 呢篇文不是個個看得明, 不過老朽想記下, 也希望日後和老朽並肩作戰的義工們參考參考, 咁就阿彌陀佛了!

夢幻仙境...

聽過 "夢幻仙境餐" 未呢?

係以前一間叫做 "哥登堡" 的餐廳的一個 set. 太太細個時好多時去到都會吃, 當中有:

- 雜果實治
- 炸雞髀沙律
- 雪糕o者喱

好多人都聽過, 孕婦有時無啦啦想食o的怪o野的; 去年夫人懷孕時, 曾經多次提及想食返呢個餐, 但係第一, 北角哥登堡已經執o左, 九龍那間沒有呢個餐; 第二就係成個餐一係生冷一係熱氣, 孕婦都唔食得, 因為當時老朽 (口快快) 應承o左夫人, 在女王降世後會整一次呢個餐畀夫人食. 搞搞o下女王都已經九個月大了, 老朽真係唔太記得, 夫人一提, 當然馬上準備:



材料簡單到無止, 不過舖頭雜果賓治要用 Grenadine 石榴糖漿的, 所以又買了一支 - 廿幾蚊不過有排用, 放o係度其實唔知點算好... =.=

至於炸雞髀, 唔好意思, 港式餐廳o既炸髀我做唔到, 因為無萬年油同埋我功力未夠, 所以去灣仔買 - 本來是去老牌炸髀餐廳 "樂景" 的, 點知而家星期日唔開, 四圍又無第二o的餐廳有炸髀喎 (咁奇!!) 唯有去地鐵站附近的熟食店買.

港式的茶餐廳沙律, 內容應該會有一些不易 "出水" 的 "鐵腳" 料如薯仔, 蘋果, 甘荀, 少少雜果, 或者會有西芹但係易出水所以唔用. 要重現這沙律, 其實一定要用頂好牌或者卡夫白汁 (唔係奇妙醬), 不過日本 QP (BB頭) 事實係好食O的, 所以都用返 BB頭. 另外, 就係加入少少 (1茶匙左右) 的洋蔥末, 係真係切到好 "茸" o個隻; 有人話蘇施黃有教, 不過老朽唔知, 因為幾年前夫人整沙律時已經有咁用. 仲有, 蘋果驚切開後未落醬會生 "鏽", 可以搵白醋浸一浸之後沖水, 吸返乾先用 (唔係咪又出水囉...)

o者喔找來了兩隻似樣的杯, 一隻係靴型的, 另一隻就係矮酒杯 (saucer) 型. 不過雪糕我都係用返 Haagan-Daz - 因為牛奶公司細盒無晒.

大家睇o下女王有得睇無得食個樣係咪好無奈呢... 其實昨日帶o左佢去飲茶, 畀o左少少叉燒包個包底, 仲有少少云呢拿蛋糕佢食o架喇!

***

同場加映 - 不少朋友會見到復活節前的星期日, 很多天主教徒會拎住一枝枝的棕櫚樹枝. 其實這當然不是 "清明柳", 而是紀念耶穌基督在被釘前進入耶路撒冷, 當時大家仲以為佢係來救他們離開羅馬帝國統治, 出來迎接他, 用的就是棕櫚枝.

現在天主教堂每年在復活節前的主日都會紀念這事, 派發祝聖的聖枝. 此舉不是讓信徒回家後僻邪啦, 而係等大家紀念同埋加強大家o既信德.

不過今年總堂o的聖枝唔知咩事, 硬到飛起, 拮手拮到怕.

證婚公司執笠...!! @@"

o岩o岩先o係 esdlife 知道一間都做得幾大o既證婚/統籌公司 2in1 結束, 講真都幾 shock, 因為呢間我一向都覺得佢o地做得幾好.

雖然老朽都係律師, 但我一向不希望用個 blog 來宣傳, 只係作為一個前 wedding planner 去提供少少意見希望受影響新人唔好咁頭痕, 不過 esdlife forum o岩o岩 down o左做 maintenance 所以無得留言; 如果咁o岩你見到呢個 blog entry, 可以推介畀你認識的受影響新人來參考:


1) 如果你的大日子在 4-5 月的話, 時間緊迫, 建議改在晚上開席前註冊, 如果係因為有部分客人不會請飲的話, 可以考慮 book 架巴士電車或者遊艇. 成本唔使咁高.

2) 如果係酒店的話, 將註冊儀式改在酒店另一間房進行, 可以用返下午時段, 仲可以整個細 cocktail.

3) 將儀式改至一o的靜少少o既公眾地方, 但請勿去康文署的公園, 因為要申請好耐的. 可以考慮在酒店 book 間 conference room, 或者去一間你們覺得靚靚o地o既餐廳包場1小時. 如驚地方偏遠, 可以考慮 book 架車, 或 extend 租車時間 (如果你係租 24 座 van 的話可用埋來車賓客來往港鐵站)

4) 已經印好帖o既朋友, 你們可以用 printer print 一o的靚少少o既紙, 將 A4 一開四, 攝入帖度, 但耍大字標題註明 - "註冊地點訂正" (用呢個字眼溫柔o的, 唔會太刺眼)之後用筆在原來帖上的資料刪去, 一筆過, 最好用銀色幼身閃筆, 唔使成撻色亦無咁礙眼但係又 eye catching.

5) 已經派埋帖o既朋友, 無辦法, 只有打打打打打電話.........

暫時係諗到咁多, 有咩唔明留言問o下大家研究o下. 至於追唔追究呢就真係下一步的問題了... 因為那公司好似話已經資不抵債, 恐怕追來無謂哦... :(

再講多次, 純粹係作為一個婚禮狂想幫o下手, 完全唔係想招攬生意.

另外, 老朽為各位新人祈禱...

Act of Generosity - 對自己好o的

上星期日晚, 自煮行動.

主角不是美國安格斯西冷, 而是: 松露新薯批 (其實都唔係真正的批, 只是砌到好似批

係由肥媽私房菜的名廚馬保利啟發, 之後加上《酒經》的劉致新校長在 Petrus 食過一次松露千層批的食經融合而成. 製作簡單到飛起, 直頭可以入選齋哥 - 歐陽應霽先生的 "十分鐘味覺小宇宙"...



1) 準備: 新薯數隻 (一人一隻左右),可以連皮食那種細新薯; 松露醬/片 (我無咁o既豪氣去買原粒松露, 用返黑松露醬); 松露橄欖油少少 (用o左白松露油, 變了黑白雙煞...其實少少不倫不類)

2) 新薯用刨刨成薄片, 煎香, 之後在焗盤上排成花形 (參考圖4), 每排一層就掃少少松露油和松露醬, 放入焗爐高火 (或 220c 左右) 焗十來分鐘, 等薯片開始變色.
原本馬保利係將成個煎 pan 放入大爐內, 但家中無法咁做, 故就想起酒經提過的做法, 先煎好才放焗盤上排花

3) 呢幅唔太關事, 係牛油加黑松露醬再加少少橄欖油 & 香草, 放在焗爐頂等牛油融化後用來點麵包食

4) 慢慢用匙同埋細鏟將薯批/餅由焗盤起出. 可用來墊主菜扒底或另上.

呢味實在簡單, 而且好正, 用來請客都好大方兼好味.

另, 鳴謝 solo 姐教用 software 將相 "黐埋" 變成一張.