彰顯公義...

昨日老朽本來就好開心, 因為成功地贏了一位對頭了好多年的外國律師. 這位行家在行內已經頗為出名 - 出了臭名 - 因為每次對戰他都係 "無得傾" 之流. 而且每樣事都係自己留到最後一刻才做, 之後就會刁難其他人為何遲滯. 到法庭時態度又極其傲慢, 連法官和書記都不放在眼內, 但又處處小心, 他做事雖然 "癲"; 不過癲得來又 "無位你入", 對住佢真係又愛又恨.

老朽早在多年前在醫療法律界工作時已和此人對手, 當時已經有少少想 "一把火燒o左佢間律師樓" (當然係誇張其詞之說 - 看官萬勿將老朽當為暴力之輩). 今次仇人見面分外眼紅. 事關此人之客戶在一件極可能由他自己導致的交通意外中數度在警方面前更改口供, 並謂自己是巴藉人士不懂廣東話, 被警員誤導等. 而事實上據警方資料, 此人已經來港40年, 而且廣東話流利過你同我.

不知何解, 此人竟然可以取得法援署的援助, 一直到最近準備正式提審, 對方律師 (即對頭人) 才向法庭透露其實一直未有法援支持至正式審訊.

於是對方提出押後正審, 但昨日就被法官拒絕. 老朽初時當然高興, 故仲走了去灣仔某酒店享用大早餐乙份 (見圖)

慌你唔死, 法援今日更進一步在此最後關頭撤銷援助.

本來作為辯方, 待悉對方無法援是好事. 但此時其他所有方面已經如箭在弦不得不發, 突然撤銷援助, 將導致我們陣腳大亂 - 蓋因以上述案情, 基本上我們一定 "贏梗", 而堂費 (即雙方訟費) 則由輸掉一方全付. 但此原告財力相當不足 (不然最初就唔會批法援畀佢啦), 現在法援突然撤銷, 但法庭又已經明令排期正審 (仲係下星期喎!) 那往後的訴訟費用 (剩係延聘老牌大狀都十幾萬o架...) 又邊個畀呢? 難道由應該贏晒官司的保險公司客戶畀? 法援今次在太遲的階段才撤銷, 可否以懲罰的方式要求其付款又言之過早. 想到呢度, 加上昨晚女王無啦啦突然在家母監管下毫無原因地擦損眼角 (但係又唔痛, 亦無流血, 女王又無喊; 家母當時仲嚇到呆o左剩係識打電話畀我). 搞到老朽而家心中都幾煩...

乜公義係咁樣彰顯o架咩...? ><"

昨日老朽為兩對新人證婚監禮. 開心到訓唔著.

原因唔係因為今次記得收錢了, 也不是因為簽名後那小段分享成功整喊新娘; 而係因為之後得到兩對新人和賓客們的認同.

在其他朋友的婚宴上, 見過有些行家, 甚至係師叔輩的行尊做證婚. 禮貌是有, 卻不知何解好像欠了些甚麼. 當時老朽都仲未夠年資監禮.

搞o左一輪, 終於知道, 原來係因為老朽本身是教徒, 聽得神父講道多, 硬係覺得作為一個證婚的角色, 係使人信服的人物, 亦係法律授予的權力象徵. 作為一個這樣的人, 老朽個人會覺得, 在這樣一個大喜日子中, 應該抓個機會和新人分享一些同婚姻價值觀有關的正面信息 - 或者, 係教友的使命感使然吧...

或者咁樣講法, 太沉重了. 說出來只係一些簡短的生活分享, 目的就係使新人記住, 你在我面前對對方作出的承諾是恆久雋永的. 有人會覺得這些話說不出口, 因為有點肉麻. 老朽卻生出覺得呢o的只係真情的流露, 為何不可? 估不到因為呢個少少的天賦, 使老朽的新人客戶們有喜出望外的感覺.

有此機遇, 豈不感恩也哉?

***

是晚老朽因為要準備明早一個突發的審訊申請 (遲些才透露), 下午開始在公司閉關修煉, 煉出一份誓章 (即宣誓書) 後回家已是7時半開外. 頭痛欲裂, 故央了過來替更照顧我呀女王的姨仔幫忙餵她吃奶.

唔知咩料, 總之好快食完, 之後即刻出事.

未見過女王嘔得咁勁, 直頭係噴出來的, 真係何其壯觀! 仲連噴三口, 固真一地都係也. 呢餐基本的食量係 - 0. 唉...

義字當頭

2008北京奧運過了好幾個月, 老朽依然神往那次驚世的創舉.

中國依然有不少地方要改善, 卻為全世界帶來一個不會忘記的奧運. 老朽到現在也是用著頒獎典禮那首《金聲玉振》做電話鈴聲 (鐵竇內其中一首播放曲目).

緊接著其實還有09年尾的香港東亞運, 2010年廣州亞運, 和2011年的深圳世大運(世界大學生運動會).

遇上了金融海嘯, 香港2009年辦的東亞運即時大縮皮, 原本開幕式的海上巡遊可能要取消.

查實東亞運來參賽的只有九個地區 (中國, 台北, 香港, 澳門, 日本, 韓國/南韓, 北韓/朝鮮, 蒙古, 關島 [呢個真係唔講唔知!]), 其實最初老朽不是太明白, 搞來有咩謂, 不過既是上次「香港一定唔得」申辦亞運衰o左之後, 作為香港 "逐步來" 的第一步, 也未嘗不可.

老朽因為女王駕到, 上次去不了北京做奧運義工, 講真真係悵然若失. 所以今次 "退而求其次" (當然唔係認真啦), 成為了09東亞運義工的一份子; 又因緣際會, 也當上了整個東亞運義工計劃的 interviewer. 數月來見過不少想當義工或義工領袖的香港有心人.

不知是否奧運效應, 我們想找3000位義工, 一早已經超額報名, 所以呢期各委員和東亞運公司的同事見人見到手軟腳軟. 但係見到香港有咁多願意犧牲自己時間來參與盛事的朋友, 其實真係好感動.

縱然東亞運一定無京奧的大堆頭, 大製作, 不過我依然熱切期待那一天的來臨...

或者, 到時香港經濟有起色, 我們又可以像開一個歡慶 party 咁去迎接呢!

女王搞邊科...

都好耐無咁樣玩我咯...

昨晚食完宵夜 (12 點左右啦), 食得好地地, 食完一如既往, 已經差不多訓著晒. 開始掃o下風.

點知掃唔到風. 呢個都唔係太劑, 因為都唔係第一次, 有時都係咁, 慢慢就會 "下o左道氣", 之後好安好樂咁訓... zzz...

唉, 不過今次掃唔到之後醒o左, 佢可能開始 "覺得" 自己有風未掃頂住, 開始喊, 喊... 勁喊...

之後 "咕" 一聲, 有氣出, 諗住舒服晒啦.

... 點知即刻聽到有o的沖坑渠的 "咕嚕咕嚕" 聲發自我阿事頭o既喉嚨仔, 已經知道大鑊, 將的女王傾前少少, 一堆豆腐渣形式的奶固體即刻傾瀉而出.

... 今次嘔o左成安奶. 一地都係. 仲諗住好醒傾前少少, 點知都有o的落o左件衫度.

又係凌晨洗衫的時間, 初時於心不忍唔想叫醒老朽夫人, 但係情況比較混亂, 無辦法下唯有召喚出場幫拖.

女王好快就清理好訓得, 只係我又抹地 (「認住金寶鐘, 清潔無陰功」)又洗衫, 卒之又係凌晨三點先訓.

最大鑊係, 今朝9點半要上庭... -_-"

煙燻太爺雞

有朋友食完問我點整, 又一次在此拋磚引玉. 所以是日出多一篇.

其實講到好複雜, 但係就好易, 有心整就實得.

先用鮮雞一隻 (無的話, well, 冰鮮都殺o既), 用滷水汁煮滾後慢火先浸熟隻雞 (每邊15分鐘左右啦, 如個汁夠浸晒全隻的話就 20-25分鐘, 呢o的o野無一定o既), 夠功架的話滾起後可以唔開火, 熄火浸30-40分鐘. 如唔夠時間的話也可以用現成滷水頂住先, 我都會用, 不過自己再加冰糖, 花椒, 八角, 桂皮, 紹酒, 玫瑰露煮一陣, 又係自己較味.

用一隻大少少的中式鑊, 鋪晒錫紙 (唔係隻鑊好快唔使要), 中間落燻料如片糖碎, 黃糖, 米, 茶葉 (多用鐵觀音及玫瑰花蕾), 正宗太爺雞亦要用甘蔗燻 (不過今次我買不到). 加上蒸架 (都係鋪晒錫紙, 底面拮o的洞). 開中火將燻料煮到糖熔, 同埋起 黃 煙 (初時白煙時唔用要放煙, 因未夠香), 之後便可將雞 (甚至其他食品) 置上去, 蓋上蓋後燻3-5分鐘. 之後較埋個汁 (生抽, 糖, 酒, 蒜, 醋隨意). 注意揭蓋時逐少揭, 不然就成廚房都係煙燻味.

禮成! 可以切也可用手撕, 我覺得手撕的話吃起來仲有風味, 而且索汁更佳.

整整o下搞到肚餓... 都係快o的訓覺為上.

聖誕前的將臨期...

又是11月尾, 正如上篇所說, 終於開始凍了.

大家聽到的第一首歌, 是一首老朽很喜歡的聖誕歌, 是英國近代作曲家瑞特 (John Rutter) 的 "Angels' Carol". 個人覺得是一首聖誕歌, 也可作為聖詩. 更適合在子夜彌撒中 communion (領聖體) 時唱. 不過向教堂的禮節司查詢時, 回覆說原來可選歌曲必先經羅馬方面的條件審查, 亦要香港的聖樂委員會通過選定.

可惜, 大家去子夜彌撒時聽不到這歌了...

其實想說的不只是歌曲. 而是, 11月尾, 就是我們天主教會的「將臨期」, 也就是我們為了準備救主降生開始做準備的日子. 這時, 教會會和四旬期 (受難前四十日) 一樣, 用上紫色的祭布和穿上紫色的祭衣, 表示「期待」和「悔改」, 以迎接救主來臨.

更緊要的當然是心情. 或許, 各商場內已經開始了佈置, 我家中都會在11月尾或12月第一個星期內佈置聖誕. 然而, 又有幾多人 (包括我!) 可以真正的將自己的心靈佈置好, 迎接聖誕呢...?

(按, 是日老朽夫人工作至差不多凌晨才回家, 故老朽在囡囡訓著時行文)

無情夜冷風...

天氣轉涼, 正是我輩肥仔之福.

日間上庭又好, 開會又好, 就算揹住老披 (西裝是也) 亦不再覺得凍.

老朽一向愛冷 (或起碼涼) 天. 陣陣寒風吹來, 吹得人醒神之餘, 也想起, 離聖誕不遠, 離過年不遠了... 心中泛起一點 Festive Mood...

又想起, 今年要照顧囡囡, 早兩日忙著找一些哥哥姐姐 (我的朋友總不願被稱為 "auntie" 或者 "姨姨"...) 送定的冬天衫. 不知哪來的朋友, 送來幾套大得要命的衫, 寫明是9-12 個月的, 卻是冬衣... 想想看, 我女王 6 月出生, 9 個月就是明年三月暮春, 十二個月則是明年盛夏 -- 送呢套衫來把鬼咩... 仲要係系出名門, 意大利貨色. 真真只有望衣輕嘆. 有得睇無得著.

***

剛才老朽夫人突然感慨, 說道 - 仍然未慣有個女. 因為囡囡出生後幾乎無晒私人時間.

霎時記起公司一位大師爺說過的 「這是天職」 (一邊想起仲有迴音o個隻), 用來開解老朽夫人. 不過其實自己細想, 倒真的時間癲倒了不少, 但係 "自己攞o黎" o既. 生得出就要準備好 "長期作戰" 了.

(迷之聲: 天! 你唔使餵夜奶喎, 仲好講!?)

老朽喜歡想東西, 有時愈想愈遠. 冷天時喜歡泡一杯鐵觀音或是六安茶, 有時會倒一杯酒 (咩酒都得) 走出露台 (婚前就是屋外平台) 吹風加埋魂遊太虛. 現在, 不知是否年紀大了, 酒恐一個人飲不完, 茶又怕太 "溶" 睡不了, 多數只是開一杯日本梅茶 (是酸梅和昆布粉開水, 崇光或部份較僻之日本市場有售), 睡前又沉思一輪. 想到女兒, 自己也粲然, 有時又想到發噱處, 自己也會在風中笑出聲...

雖說冷風無情?

諦造歷史, 見證歷史...

標題講到好似好勁... 其實並非大是大非.

早前應承了太太舊同事的好友 (好似好疏..., 但都係太太朋友) 幫他們證婚. 估不到殺出一段小插曲之餘仲使老朽名垂青史...

事緣此友人為元朗原居民家族之一, 之前同老朽講可能要去他們的祠堂或出面的外圍證婚. 老朽今天去到元朗 (仲係早上 9 點入到去o個隻... zzz...) 才知那地方 (元崗村梁氏宗祠) 是法定古蹟, 而且原來係第一次有人在法定古蹟的祠堂行禮 (我都係聽村長講咋). 老朽都係去到時無啦啦見到村長出來迎接先知道 (初頭仲諗: 使唔使村長出來咁大件事呀...). 之後仲見到政府古物古蹟辦的人員來影埋 video.

當然, 在祠堂行禮要留意, 第一當然係你一定要係祠堂o既姓氏 (男家) 啦. 第二就係記得申請燒炮仗 (今日o個幾串喜爆一路燒, 一串都爆o左幾分鐘), 第三就係... 最好事先同村長/祠堂o既管理傾好晒o的o野同檯凳點 set. 今日就因為之前未確定, 所以臨時同新人 & 村長傾一大輪先 set 到. 第四就係... 要揀冬天先行禮, 今日都仲係熱少少, 著晒披無冷氣都幾係o野. 第五就係要好中氣, 因為除非另外預備小型 amp, 唔係的話一定唔會有咪你用. :P

行禮後本來想留低食盤菜, 但係公司太多野做所以無得留下. 不過老朽每次都會為新人講幾句有意思的說話, 今天就選來了《道德經》 (係呀, 又係佢, 咁祠堂傳統丫嘛) 第九章... 「天長地久, 天地所以能長久者, 以其不自生, 故能長久」-- 意即 "天地能長久, 是因為天和地都不會自私, 會與萬物分享自己" -- 同樣地, 兩個人相處要天長地久的話, 也要放低自私, 與對方分享自己.

再一次地, 老朽拎起個公事包想走時才醒起... 又未收錢!

要對新人講聲唔好意思, 無留下食盤菜, 雖則兩位盛意拳拳, 老朽亦想試O下幾百人打盤的滋味, 但始終俗務纏身, 未克參與, 自成少少一憾也.

鏞樓甘饌

不少老朽的朋友都知道, 老朽係個為食到發癲的人.

老朽四圍食, 偏偏未去過鏞記四樓和陸羽三樓兩個 "朝聖" 之地. 故好幾年前, 有位高官的兒子是老朽的同學, 老朽得知其自小與父母吃過不少珍味奇品, 故央了他介紹小弟去鏞記一趟, 此後老朽慢慢與部分樓面的前輩混熟, 亦試過幾次和老闆們或是客戶們開個飯局把酒言歡亦不在話下.

早前和部分行內友人再登鏞樓 (其中包括前文 《錢本草》的那位大狀), 是日精選有...

鵝腦凍 - 為粵水 (廣東滷水) 作餌, 將是日燒鵝之頭腦製成魚膠狀, 香滑得要緊.
清湯腩 - 為正宗爽腩位, 得幾份, 故每日限量供應, 清湯熬製, 入口即化, 連湯都飲埋!!
油鹽水灼心蒂 - 一味估不到在此食到的懷舊菜, 為豬心上之大動脈血管, 滑得來有嚼頭, 惟鹽味略略太重
爽滑魚皮 - 又係一款粥店名菜, 今次就對味了! 因為魚皮帶腥, 油鹽水即中和之道也.
滷水花菰 - 大概無人會想過, 粵水配花菰是個絕配吧? 花菰作為冷盤, 卻係 "唔知點解" 完全唔覺有問題. 奇...

餐前小碟食完就到大盤了... (其實以經小少少飽)

燒鵝姑下庄配肥燶叉 - 特別事先向樓面 Catherine 姐講明要鵝姑, 因其極嫩, 卻因得三數人未能以特別之順德祖方燒製, 故只能食番廣東燒法. 而取下庄則因為鵝係吊住來燒的, 鵝油鵝汁向下滴, 故下庄盡得珍藏.
不過今天的肥燶叉就有問題了... 又唔肥又唔燶, 絕對要打 pet pet!

太史五蛇羹 - 正路和友人上來例必先試杏汁白肺湯, 和陸羽或者港大同學會之作各有千秋, 不過時值秋天, 故特意食個蛇羹. 此處之蛇羹其實唔係太特別, 不過足料得很已經值回票價.

方魚炒玉蘭 - 原只係想加條菜食o下. 但係玉蘭暗藏功夫: 上檯時墨綠得緊, 一看還以為未熟, 但油亮的表面下是軟軟的菜薳, 至此方見真章.

古法班腩煲 - 個人不太喜魚, 卻為朋友而訂了這個煲; 杉斑腩拉油後係以火腩, 豆卜, 蒜子紅燒再扣, 炆足火路, 連我都連啖幾件.

鵝肝腸花卷 - 此物本來是伴著另一點心 「詩禮銀杏」吃的. 因詩禮銀杏偏甜, 加上花卷又係中和之道; 但可惜, Catherine 回大廚覆, 詩禮銀杏製作需時, 日間恕難供應, 但提起了鵝肝腸花卷又唔想唔食, 故照訂了此半, 當是作個願, 希望下次可以食埋詩禮銀杏...

單尾追加 - 太子撈麵 - 即鵝油撈麵, 非常簡單直接的一個麵, 只係因為第二代老闆 (即以前之太子爺) 食開, 所以得名. 但係細細一個麵餅, 加入鵝油青蔥後的確係幾好吃的.

甜品就是鏞記「出名」的「千年陳皮紅豆沙」(一笑, 甘老闆已經澄清絕無此物) 和「水雲玄采糕」, 加埋生果盤乙個, 五個人捧住肚子走.

特別鳴謝是日另一位大狀帶來上善如水大吟釀中的白瀧級別前來佐膳, 此物據悉為日本平成十九年之新酒鑑賞會的金賞得主. 滑過舌尖, 直入喉嚨時, 那如絲的順滑感, 確係使人腦中浮起《道德經》的第八章...

「上善若水.水善利萬物,又不爭.處眾人之所惡,故幾於道...」

西班牙文證婚...

雖然不是專職的證婚律師, 不過倒也為了幾對新人 (朋友居多) 做過監禮. 不過今日那對新人 (也是姨仔的好友) 卻是暫時證婚之中比較特別的一對: 新娘是本地人, 新郎是西班牙人, 他們在澳洲認識訂情, 現在回香港行禮註冊.

新郎的家人都由西班牙過來香港參禮, 不過有趣的是新郎的家人大部分 (包括雙親) 都不會說英語.

於是我便為了他們, 學了幾句西班牙文, 今天用來「招呼」他們之用.

在香港證婚監禮, 一般只可用中英文, 除非有合資格的翻譯. 這點老朽不可能不知道. 不過為了向新郎家人表示尊重, 我便先以中英雙語進行, 而到了某部分的介紹時我便加入西班牙文.

老朽不是個懂西班牙文的人, 不過法語倒也曾經學到可做老師的 level (而家唔好問我, 一早唔記得o左大半). 聽過西班牙文後倒也易上口.

是日證婚, 地點是在 "卻敵灣" (即淺水灣是也, 因 Repulse 即有「退敵」之意). 地點煞是浪漫, 而且是露天, 連對面巴士站的人都聽到我們的 process.

阿彌陀佛, 我之前查到和嘗試講的西班牙都通過了新郎哥的事前測試, 亦因為咁, 所以是日證婚在無驚無險下完成.

正在陶醉於自己有幾成功, 正欲離去之際, 方才醒起...
...
...
...
... 原來我唔記得收錢!

錢...

早兩天到一位相熟的大律師辦公室開會 (大律師或稱訟務律師, 因其業務主要是出庭抗辯為主, 並非因其特別「大」) , 見到以下一文, 以秀麗的行書書上和裱在牆上, 撮之為要:

錢,味甘,大熱,有毒. 偏能駐顏,采澤流潤,善療肌寒,解困厄之患,立驗.能利邦國,污賢達,畏清廉.貧者服之,以均平為良.如不均平,則泠熱相激,令人霍亂.其藥,採無時,採之非理則傷神.此既流行,能召神靈,通鬼氣.如積不散,則有水火盜賊之災生;如散不積,則飢寒困厄之患至.
一積一散謂之道,不以為珍謂之德,取予合宜謂之義,無求非分謂之禮,博施濟眾謂之仁,出不失期謂之信,入不妨已謂之智.以此七術精米煉,方可久而服之,令人長壽.若服之非理,則弱志傷神,切須忌之.

此為唐代張說先生所著之《錢本草》, 一看或以為是「得啖笑」, 久而啖此文, 會覺得其味甚豐...

錢, 不重要嗎? 一定不是, 而是對待舷態度要小心. 講得容易, 老實說, 我自己行起來也覺甚難... 因為老朽本身有多少「享樂型」, 有時真係 "使o左先算" o個隻...

但有錢唔使, 亦非正道, 最近外父無端惹了一個前列腺癌, 雖然尚算初期, 理應以手術可以根治, 不過醫返都嚇餐飽.

外父平日比較慳吝, 雖然未到孤寒那類, 但幾乎從不使錢去玩樂, 我在想, 今次一個病來, 大吉利是講句, 可能以後無咩機會四圍去玩, 儲埋咁多錢 (都應該唔會少的), 倒頭來可能還是無用.

... 以此理論, 我係咪應該去買返枝恨o左好耐o既 MP40 呢..... (MP40 為德國二戰手提機槍, 近兩年電動氣槍出了新版)

不幸, 意外和自然死亡...

多份報章昨日和今天都有提到兩件事, 一就是美國大選, 二就是一宗醫療事故.

大選過一兩日再寫 (橫豎奧巴馬都贏o左咯!) 覺得有點奇怪的是一位五歲小孩因為先天心臟血管瘤，用微創手術切割時出事, 即時死亡 (行內稱 Die on Table).

原本已是數年前的事，今日又被揭出來. 為的是死因裁判官就文件上已裁定，小朋友死亡原因為「意外」 (died in an accident). 這就引起死者家人不滿，要就死因裁判官的決定做司法覆核，又要找傳媒出來，總之沒完沒了，非要開庭審理不可.

老朽之前因為在醫療機構工作關係，多次接觸死因庭. 其實今次的問題，不在於裁判官，而在於翻譯和法律上的字眼。

一般而言，死因庭的裁判官每次收到「應呈報之死亡」 (Reportable Death 在法例上有一清單說明死亡而需呈報的情況)後, 會聽取及獲取多方面有關的事件及醫學報告，以及驗屍報告 (Autopsy 或 Post-mortem report) 之後會決定有無需要開庭. 而不論開庭與否，最後都會有一裁決，一般就是以下數項之一:

1) 死於自然: (Natural Cause of Death) 這是最普通，沒有任何可疑之處的死亡. 一般來說，如果有人投訴死者生前可能受醫療事故影響的話, 這就是醫院方面最想見到的結果.

2) 死於不幸: (Misadventure) 「不幸」並不是說他們很不幸運或者 "好唔好彩死o左". 而是指當一個人死前曾被人以合法手段「搞過」, 而此手法或手段正是直接導致其死亡的原因.

3) 死於意外: (Accident)　這裡並不是說死者又係因為一個意外如交通意外而死亡, 而是說被一些手法「整死」, 但此裁決比「死於不幸」來得嚴重.

4) 死於被殺: (Homicide) 這個就真是字面意思了.

5) 死因存疑: (Open Verdict) 這個就是裁判官或陪審團未能就死者的死因達成任何決定, 即係 "審完都唔知點死".

其實, 明顯地, 是次家屬是想死因庭說 "醫院有失誤", 但他們可能不知道, 死因庭一來只會就事實作出一個關於死因的決定, 如果在文件上已經可以就死因作出裁決的話, 是無需要開庭的.

是次事件，裁判官已經閱覽過所有有關的文件和醫學報告，以至於專家證人的報告, 說出死於「意外」, 其實家屬已經可以就此對有關醫院作出投訴或是訴訟, 又何需苦苦要求開庭, 又何苦要將已逝的兒子再一次擺出來呢... 為的, 又是甚麼呢?

公平抑或公正 (第二回...)

估唔到又要寫多次呢篇.

早數月前為銀行出庭對住呢兩位茂四. 今日又再次被他們成功押後.

其實元凶唔係對面, 而係個官. 突然主動出擊的問一些對方無提出過的案情. 即時口啞... 法官大人, 你幾時變o左對面o既律師呢?

但無法子呀, 銀行事實是可能計漏了數. 法官都即時指出要由律師 (即老朽) 代為計數實對律師不公. 但對面兩位茂李之一就乘機寸寸哄, 仲不斷咁話老朽散o左庭一定o係出面吹口哨. 更無啦啦 "老作" 話銀行十幾年前曾應承佢會減佢利息云云... 明明之前問晒無抗辯要再加, 今日又提出此新奇 idea. 最慘係法官唔知食o左咩早餐, 竟然又批准佢提出新理由. 仲要銀行找一下當年有無人應承過咁話.

老朽自問是希望公平公正, 起碼都公正丫. 但係此人面目表面正常, 但一開口就得罪人. 老朽今次因為銀行計漏數, "形勢比人強", 唯有再次讓案件押後, 等銀行解畫. 不過我暗地裡已經決定, 如果此人日後輸掉 (幾乎係100%會輸的), 所按揭樓宇未及還債的話, 老朽必定會提請銀行考慮進行破產訴訟. 實行告到佢甩褲.

好老實說, 我真係好少咁燢, 但這樣賴皮的人, 點講都係離譜.

大家拭目以待, 我放長雙眼睇條 pk 點死...

你個女乖唔乖?

近幾個月, 每次見到親戚朋友, 如屬近月少見者, 定必問一句 "你個女乖唔乖"?

而我都例必回一句: "托賴了, 食得訓得痾得; 最緊要係都算係戒o左夜奶 (即唔使凌晨三四點無啦啦哭啼鬧吃奶那種)"

收到的回覆多數是讚嘆的表情，已為人父母者就會加句 "咁就好咯" 或者 "嘩! 還得神落咯!"。

老實說, 我和太太兩個要上班, 請了個鐘點家務助理幫忙照顧, 又不想請外傭 (主要是因為不想家中多個人, 而且說實在的, 外傭煮菜不好吃 - 佢地自己家鄉菜另計) 於是辛苦了兩位長輩 (媽媽和外母) 平日下午過來幫手.

為的不只是這樣, 而是之前提過的親子關係.

今晚原本想烚少少蛋黃加入開水等我o地阿女王試o下的. 點知開好了, 吃了一小口, 不對味, 吐返出來; 老朽夫人唔甘心, 又一口, 又一吐; 如是者玩了十幾分鐘... 看了幾分鐘已經知無甚驚喜, 所以我繼續煮我的金粟芙蓉炒海鮮 (即係蝦仁帶子打個蛋白芡) 同埋香茅扎肉.

原來就係咁, 種下了禍根...

晚上9時許, 雖然已經無再 "質" 佢食蛋黃, 但胃口全失. 卒之因為不適應, 上演一幕獲利回吐, 嘔到成地都係奶 (仲有半消化的奶)...

已經好耐無試過, 不過每次囡囡嘔奶, 我們都會想起麥兜故事當中, 麥太的 "如何防止嘔奶"...

1) 如果嘔奶, 畀 BB 飲橙汁, 咁佢就唔會嘔奶, 只會嘔橙汁;
2) 如果嘔橙汁, 畀 BB 飲好立克, 咁佢就唔會嘔橙汁, 只會嘔好立克...

係呀, 幾白癡, 但係對於我們來說, 係減壓的方法. 每次當囡囡嘔, 我們氣炸的時候, 總有一個會講呢個爛到無止o既 gag. 之後我們就會笑作一團, 繼續幫囡囡清理, 囡囡呢? 就只會呆呆咁望住我o地好一會, 之後訓覺... (o岩o岩嘔完, 唔通仲同你跳返 part 舞咩!?)