正義道101號

爺爺的廚書

2012-02-06T16:00:00.000+08:00

不說大家可能不知道, 我爺爺當年曾經當廚師, 而且是個八十年前的西廚.

他和祖母早在八十多年前結婚, 婚前他曾在當時內地的內河船任水手, 後來婚後見行遠洋郵船收入不錯, 便去了走美國船當管房, 後來更曾在羅斯福號當候鑊 (大約是三廚), 有份接待這位二次大戰時的美國總統 (仲收左總統上船派的一支雪茄...). 自此他便愛上煮東西吃. 不過他曾經自言, 當時後生仔唔多肯學習, 大廚畀機會佢都唔識把握, 最後無在船上待到升 sou-chef (二廚) 已經走了. 係後來自己又買些廚書來自學一下, 再次燃起他煮食的熱誠.

爺爺曾當過好多不同的職業. 行船儲到錢後更曾經和人夾份開酒樓和戲院, 不過都是被騙損手離場, 後來因為他略懂英語 (咪係船上學返來囉...) 所以去了YMCA 當年的外國人宿舍做管房, 雖然人緣極佳但卻苦無成就, 他自己回想時都覺得不無可惜.

但際遇始終不減他對烹飪的興趣 -- 大概我喜歡煮東西吃都是由他「隔代遺傳」使然吧! 我知道他因為祖母不喜歡吃他煮的新菜式 (可能太古怪了), 有時他會找個得閒的時間躲在家後門樓梯位, 開個火水爐就煮將起來, 自得其樂. 在我細細個時, 他也會帶我去屋外的馬路邊, 那兒有棵大樹和一些石壆, 兩爺孫 (後來加入了我妹妹) 就會一邊食他做的餅呀, 唔知咩古怪包呀, 香腸呀咁, 一邊數車仔, 也一邊講下當時完全聽不明的做人道理...

我上個月意外地在書店碰上了香港數十年前一位大廚寫的專欄廚書《陳榮入廚三十年》. 看得津津有味, 之後記起曾經見過祖父一些廚書, 是教西餐的. 有小部份散失了. 卻在我那喜歡儲東西的父親手上留下了不少. 我便央老爸找來給我.

又畀佢找到喎~!

拿上手, 聞到的是樟腦的氣味, 看到的是數十年前的字句, 例如「沙律」 (SALAD) 當年譯作「洒辣」, 「市祖」原來是 "Stew" (燴煮); 另一本是全英文的, 八十年前識多少英文已經好勁, 成本書都係查字典後的解說. 還有一本是教煮不同形式的咖啡的. 當中有不少現在好少見到, 但如果上WIKI 可以找到的外國菜式, 連「西多士」的做法也是正宗法國那款 (即是要用軟包 brioche 索晒牛奶才加蛋煎, 而不是現在香港式的純蛋漿炸). 心想如果爺爺當年學晒的話, 在當年開一間小的西餐廳真的不愁沒外國人來幫襯...

不過, 際遇就是這樣. 爺爺雖然說不上有成就, 卻是個大好人, 為人設想的程度是難以令人想像的 (例如我們一家當年住在地下那層, 他會將舊雨傘拿出去屋門外叫其他住戶如果無帶傘的話隨便用, 又會主動幫送貨到樓上的人開門, 如果樓上無人仲有代收服務).

或者, 這是人心不古, 又或者, 我學不懂廚書的所有菜式; 但當我翻開爺爺廚書的一刻, 我就看到他在不遠處生個火自己煮食, 一邊數車仔和講道理, 又一邊叫人隨便用他的雨傘...

2012新春家宴第一場

2012-02-03T16:30:00.000+08:00

新年的首場家宴, 和去年一樣是宴請老友大俠的. 今年他太太要上班, 只他自己來拜年和探女王. 不過女王就好乖巧, 知道大俠識舞獅又識功夫, 就想問他點樣可以舞獅, 所以和他好快已經玩得熟絡了.

今年煮的時間不太多, 只是之前一晚做點預備的洗切功夫; 所以做的都不是太花巧的東西:

雛鳳還巢 (玉堂手撕花彫雞)

聽名字已知道, 本意是一道新娘回門 (回娘家) 的菜式, 用一般醃法加入多點的花雕去醃雞肉 (雞髀), 蒸10分鐘脫生 (不要全熟, 除非想當全冷盤食法) 之後起肉, 手撕出一條條肉來. 其他作料包括手切甘荀絲和手切西芹絲, 西芹先放涼的雞湯中浸半天入味. 之後排出如下面的巢型, 中間加上煎蛋皮絲 (懶的話可以買日式超市的現成蛋絲) 和雞肉, 砌起之後可以當涼拌, 而因為女王不太吃生和硬的菜類, 所以砌好後包上微波保鮮紙再合蒸三分鐘使西芹變軟身.

食法是像新加坡和馬來華人近年復興客家新年菜式的「撈起」. 因為已用雞湯和花雕去入底味, 無需要一定加入醬汁才撈的. 新正頭又好食又好意頭又好玩.

麒麟鮑片

更簡單的菜式, 就是: 1) 隔夜浸冬菰, 切斜片; 2) 之前一晚將上方的金華火腿切薄片, 用冰糖先蒸透兩次 (每次約15-20分鐘, 棄去鹹火腿水); 3) 5頭的罐頭蠔皇鮑魚, 又係打斜切片.

將 1) 2) 3) 排好, 一起蒸 5 分鐘, 之後將鮑魚的汁加熱後淋上面即成.

乾炸二鬆 (酥炸金菰拼乾炸芋絲)

這道可是有點工夫了.

金菰之前一晚切好後和芋頭刨絲一起放在當風處吹一晚爽身和收水, 先炸芋絲, 滾油再加點凍油, 之後慢火下一半芋絲, 即時用筷子在油鑊中攪拌, 如有見芋絲黐埋的就即用筷子分開 -- 因為芋絲就算吹了一晚都好易黏貼著的. 要待炸到少少企身才可由得佢慢火炸至唔見有水泡浮起, 就可以盛起隔/吸油, 之後炸埋另一半就可以了.

金菰呢就煩少少. 可能係我功夫未到家. 最後我是逐條放入炸漿和油鑊中才讓它慢慢炸的. 因為一上炸漿就好易糊在一起了. 炸一碟金菰用了十分鐘有多...

兩款素食炸好後排個太極形上碟就食得... (不過排得唔係好靚, 因為金菰炸起太長唔似太極形)

我煮開了一小碗做西檸雞的汁料當蘸醬, 免得次次都用桔油. :)

還有一道大地魚湯灼菜心苗就是用稀釋一點的清雞湯加入一茶匙流浮山和各大食海鮮的區域都有售的大地魚粉, 用來灼菜後加少少幼的薑絲在上面. 這道菜沒有拍照.

準備的工作不算太繁瑣, 當然老友食到咀舔舔, 仲話要佢那位煮西餐好叻的細佬 (過兩個月找我證婚的) 回請我一餐. 到時有得食的話再作報導. ^^

o係伯大尼做一日神父...

2012-02-01T09:00:00.000+08:00

在一個月內走了兩轉伯達尼/伯大尼證婚監禮, 一般來說不是很特別的事. 始終伯大尼是個好好, 好靚, 也是一個「爭崩頭」的婚禮場所. 不過當中一場中舉行了一些比較特別的儀式, 所以倒是值得記下, 讓新人參考也好, 自己當紀錄也好.

早幾個月收到個email, 是想問有無律師懂得以天主教或基督教形式主禮的. 原來新郎是菲律賓人 (唔好以為係阿四, 佢在某大投資銀行做 head 的), 新娘是新加坡華僑不過不太懂中文, 而他們因為一些個人原因而未有去教堂行禮, 所以想以「菲律賓式」舉行天主教婚禮.

老實說, 老朽真的未試過這類婚禮, 他們說又有讀經又希望有點講道 (!) 的, 但這個正中老朽的做法, 只是他們竟然要求「可唔可以講多o的, 長o的...」呢樣呢... well, 老朽唔係神父, 講一兩分鐘不是問題, 再長的話怕人會訓著喎...! :) 但當然, 有要求的新人, 是對自己婚禮的一種執著, 老朽知道他們緊張流程, 所以問他們會不會想在之前多開一個會議為他們 finalise 一下流程. 他們十分高興有此安排 (咁當然係因為我係「私房菜證婚律師」才可以咁做啦, 只係加三幾百就用多我成個鐘喎...). 將有關的資料全部都畀晒老朽, 連當日的其他時序都問埋我意見, 咁既然人家咁信我, 又唔係用多好多時間, 所以 "半賣半送的" 幫埋佢地手, 蝕少少當幫人算了.

由於是外地人士, 處理的文件會比較繁複, 好在都搞得切. 不過他們有樣特別的傳統, 是中國文化會有, 但估不到他們也一樣有的, 就係 "行禮前新人不會碰面", 而因為他們是全西式禮儀, 沒有 "接新娘" 的環節. 所以行禮前新娘就一直待在自己車上 (奇怪... 不是有間新娘房的嗎? 伯大尼的實Q 話無喎... 遲點有機會幫他們一位工作的同事證婚, 真要問問先.) 而所有臨場的確認就因為新人不能碰上, 所以都要講兩次.

他們的禮儀是全西式的, 所有姊妹都在前慢慢行. 新人希望我像神父一樣介紹他們, 先說幾句, 之後就是請雙方母親來進行「燃燭禮」 (即是由母親代表先點起兩支小蠟燭, 到禮成前再由迎人本身拎起小蠟燭去點中間的大蠟燭, 這是部分教堂, 尤其係外國還有的儀式) 再請朋友做見證 (讀經證道). 這些對於我這個前輔祭當然無難度了.

原本新人想再加入一些民族元素例如由好友為他們戴上一條特別的圍巾之類的, 但因為需要在主禮前跪下 (咁我唔係真係神父嘛) 而作罷.

因為多了幾篇經文, 所以比較長時間, 不過都係半小時左右, 而一宣佈禮成, 第一個撲出的, 竟然是伯大尼的實Q...

「呢度係歷史建築, 唔點得火呀~!」

(後記, 我初時以為伯大尼因為星期日有聖公會的崇拜而可以點蠟燭, 但原來是沒有的, 而且當年復修後原來差點火燭所以去年年中起就不准生火了)

守歲 & 開年

2012-01-31T08:30:00.000+08:00

已經是年初八, 開市了, 一切也回復正常.

今年的桃花是碰上了多年前買過, 又靚又好彩頭的那一年的花檔. 之前留了電話, 有兩年找不著, 今年無打去反而找回了, 還要是檔主首先認得我. 所以只用了比市價低一點的五百多元就買到心頭好. 正所謂頭由好到尾, 老朽買花是想放到元宵節的, 所以初一二的花比較 "生", 而到初六起就真是芳華正茂, 今年希望真有好意頭, 而且也見到結了桃子.

這是初一晚拍的...

到初六已經很不同了...

屋企老習俗是有守歲的, 而且年初一也一樣會食齋, 叫做合家作福, 雖然老朽是教友, 但老父拜祖先倒是有參與的. 只是夫人比較 "現代化", 見老人家無咩意見 (兩老又順得個家嫂放過佢) 就一早帶女王跑回家去睡, 年初一才上來, 老朽就一定會和妹子一起陪著老人家的. 而且也一定會在拜祖先後先吃一點齋才點自己家睡一會, 又去和老人家拜年了.

另一樣習俗就是開年, 先祖父是有做點生意的, 也將攝影檔留給老父「發揚光大」. 因此我們也有年尾做尾禡 (即「尾牙」), 年初二就會凌晨做「開年」的拜祭和開始吃肉 (無錯,又係拜完後吃的, 始終... 雞和燒肉都係新鮮吃比較好味...) :P

問過一些朋友, 守歲已經不是和家人一起, 而且跑了出街去玩了. 老朽倒是覺得, 你當我老餅好, 大男人好, 守歲是個不應廢除的習俗. 至於凌晨開年, 就是老朽覺得十分好玩和有意思, 一家人聚在一起的一個盛典. 就如一位每年都做蘿蔔糕給我的老友所言: 「新例不用加, 舊例不可違」, 當然, 或者只是我個人對老家的情意結, 但的確, 每次有呢o的 function, 我都覺得藉著節日, 就和家人連成一起了.

女王就一向都係夜鬼, 也好喜歡節日的活動 (她今年有幫手炸芋蝦架!!) 唔知過兩年大個左之後, 帶佢上老家開年 (「幫佢開年...?」 XD) 的話, 夫人會不會也想來湊熱鬧, 免得自己孤伶伶在家等初一呢...

團年飯

2012-01-24T09:30:00.000+08:00

說過了團年的情, 就記一下自己的團年吧.

夫人那邊, 即係外父母的團年飯, 因為姨仔癌症剛癒, 不便去外父母家 (那兒比較狹小和... 不知何解外母家比較多雜物和稍為...邋遢 (又唔係好離譜既...). 便去我家好了. 請保姆姨姨煮兩味普通點的. 外母會用白水浸魚和蒸雞.

原本我是想做些蝦蟹菜式的, 不過因為是星期五, 還要上班. 而且姨仔不太想食其他海鮮 (想戒口戒耐少少喎); 所以就炆個柱候骨, 煎個中式牛柳; 另外想用南乳煎腩片的, 不過她說不能吃醃製食品 (南乳), 所以我便改成薑蔥煎, 南乳汁另上好了.

點知, 前幾天問老友買了些海味, 意外留了一整包急凍海參 (8支一斤那些) 在公司的一個保冷袋中, 足足一天. 記得時已經解了凍, 所以臨場就整多一味蔥燒遼參, 和再做一點百花遼參 (是釀蝦的) 給我自己父母之後一天團年時吃了.

柱候骨 - 是腩排斬件, 用返柱候牛腩的方式去炆, 炆之前先出水和用薑蔥爆一下, 再爆柱候醬後加冰糖紹酒, 包尾加麻油和少少老抽上色. 為左索汁, 再加點豆泡. 不過吃到一半才記起無影相, 算了.

中式牛柳 - 由於家中無大紅醋, 所以色比較深. 這西汁就是用一份鎮江醋, 五份糖 (!!), 一份茄汁, 一份半蜜糖開成蒸開的. 牛柳件用生抽急汁糖紹酒麻油生粉還有少少水醃半天, 爆香洋蔥絲加牛件煎起, 之後就加汁「一兜二炒」即成. 想唔韌就要落少少本, 買靚少少的牛柳如安格斯之類, 請超市幫你切簿件 (快熟嘛!).

煎腩片- 南乳汁是一件南乳搗爛加糖麻油和少少紹酒, 再加一兩滴蠔油而成的, 至於加幾多糖就要視乎你件南乳有幾鹹, 之後又係蒸渦O的糖就可以了. 腩肉要買超市的, 因為切得好點, 切細方件後百鑊煎, 出油之後就落薑蔥蒜一起爆, 同時下點鹽巴, 最後加入南乳汁, 又或者當蘸汁另上.

蔥燒遼參 - 買來的是細支的, 已經好乾淨, 洗一洗之後一樣用滾水加薑蔥酒煨 (開蓋煮) 第一次去腥, 十分鐘左右, 放一會後復用蒜子爆香後加入雞湯, 少少蠔油和半塊片糖煨十五分鐘, 加蓋又煮十分鐘後焗十五分鐘, 再開蓋煮至收汁咁滯, 便加入約十條左右洗好及切開一半 (可以用叉由頭至尾「拉」成蔥絲) 的蔥段, 猛火炒幾下之後熄火焗十分鐘等蔥味滲入海參, 埋芡便可以了.

百花遼參 - 呢樣繁複少少. 海參去腥後只用薑蔥雞湯慢火煨至入味, 之後撈起放涼, 再釀入蝦膠 (唔自己打喇...) 蒸十分鐘, 打個薄的蠔油芡. 第一次整時我貪方便先釀蝦膠再煨, 為免蝦膠唔夠火路會霉我用大火了. 又怕海參會瀉所以只煮一會, 點知一開蓋就見到蝦膠因為直接受熱所以脹起來, 唔美觀囉...

當然, 老媽子又好, 外母又好, 都煮了不少菜式, 不過我要記下的當然是自己煮的那些而已... ^^"

Go!Go!Go! 新春糕糕糕...!

2012-01-21T12:00:00.000+08:00

去年新年整過一次芋頭糕, 加的粉不太對, 而且芋頭太重身, 水份多, 蒸起來死實實的. 今年就自己改一下份量, 又參考了好幾本專業廚書, 主要係將粘米粉和粟粉比例改少少. 再用多一點點的水.

同埋今年有樣醒, 就係先蒸一底迷你版, 之後試過OK喇先去馬. 因為糕一日未蒸, 一日都有得救的. 果然 - 撞鬼後來先醒起, 原來蒸第一底開粉漿前, 因為夜晚所以女王訓左, 但係又無啦啦醒左, 問我咩事唔訓喎... 又話要去廁所之類的. 所以... 最後我唔記得左在粉漿加鹽呀... 0.0 (好在就係試左一底先, 之後就記得喇...)

其他有關的食譜之類, 去年有交帶, 但網上不少記載都好正, 不一而足.

老朽係一個比較「鹹」的人 (!), 今年就係第一次蒸甜糕 - 馬蹄糕. 做法簡單直接, 100g 馬蹄粉, 開300ml 生水, 另外 120g 砂糖 (用紅糖好看點) 加入另外 300ml 左右的水煮成糖水. (按此比例可自行加減), 加入少少馬蹄碎 (兩三粒的份量). 熄火撞入一半的馬蹄粉漿, 快速搞拌, 一自再將另外一半生馬蹄粉漿加入搞勻, 好快會開始變得好黏稠, 跟住放埋入糕盤蒸廿分鐘就得了. 專業廚師想加色同香少少, 會加少少吉士粉, 家用就唔使都得喇.

馬蹄糕係十分易整的, 不過建議如果第一次整的話, 買日本城一o的細細個糕盤 (無蓋的, 要自己加保鮮紙保存) 好了. 我這個食譜份量可以整到三個細細底的.

至於蘿蔔糕, 硬係覺得姨仔老公的母親大人和的老友鮑魚先生整得好O的, 我老媽子整齋蘿蔔糕就有一手, 年糕就係我外母的強項, 大家夾手夾腳就成雪櫃都係糕了... @@" 當然, 最喜歡的, 都是大家成家人 (甚至幾家人) 夾手夾腳的時刻...

團年

2012-01-20T11:35:00.001+08:00

不是單一項記事, 而是記情.

為新人證婚多了, 見不少在婚禮上的感動位, 新人有時會流著淚去多謝家長和家人多年的照顧.

的確, 那天是特別的一天, 那刻是特別的一刻.

然而, 婚後是否真的願意, 又是否真的能夠一直 keep 到和伴侶一起, 也繼續和自己家人維持一個真的是"一家人" 的關係, 又是另一回事.

今年百事可樂不知用幾多錢, 請了好幾位中港台的大明星拍了個廣告, 當中用百事和樂事著片等等的「食字」位多得有點吃不消, 是十分「內地」的廣告. 不過當中的 concept 我極之欣賞.

你記得小時候父母對你說的一句特別話, 一件特別事, 或者一件特別的東西嗎? 長大以後, 會不會就讓其他的記憶蓋過了小時的印象?

不同的地方有著不同的世情, 內地人時時去外地打工, 回家過年是件大事. 但我們身在香港這福地, 要回家就不是易得多嗎? 而今早聽到一宗交通意外, 坐朋友車回家的男人就被一個醉駕司機撞死了. 當然, 他從不會知道, 他以後也回不了家.

身為一名「老豆」, 好易就可以體會到張國立在廣告劇中的心情. 這個廣告讓我感動. 我沒有收百事任何錢或利益, 但衷心多謝他們. 最抵死的是, 這廣告最後的署名, 是「一群在百事工作的年輕人」message 就是「我們已在回家的路上了, 你呢?」

學會珍惜, 不要給機會自己去後悔...

超錯與超蠢

2012-01-15T01:00:00.000+08:00

任何人呢, 間中都會做些蠢事, 有時蠢的程度真係匪夷所思的.

聖誕前的一通電話, 帶來一宗小生意, 是一宗刑事案. 案中兩名被告已經認罪, 希望找位大狀幫手求情. 大概是「干擾汽車」和「無獲授權下駕駛車輛」之類.

案情透露, 事發時兩人相約, 分別駕電單車去一個地方再轉乘其他車輛去, 去哪就不重要, 最緊要是本身不是去做任何犯法的事.

好了, 一人早到泊好自己的電單車, 見到旁邊有另一架不知何人的電單車泊著, 車匙竟然還插在車上, 還連著車尾儲物箱的匙.

早到者不知是八卦還是怎樣, 拔出車匙, 開了尾箱, 翻了一輪見沒啥特別, 便把尾箱再鎖上, 車匙插回車的發動掣上.

這時另一遲到的也來了, 泊好自己的車過來, 早到的大概是告訴了他有個「傻佬」泊了車忘了車匙之類的. 這遲到的便去看看, 又不知何解的, 竟然跨上了這電單車, 撻匙駛出來兜圈. 或者是見無人又好玩吧, 便駛去隔鄰街, 這時才發現自己原來已經遲了, 便求其放下了車在隔鄰街旁, 兩人便匆匆走了. 忘了車匙的原車主回來, 當然在自己的泊車位置找不到車, 也就報警了. 而警方也好快找回了失車, 因為就咪o係隔離街囉...!

當時無人知道, 整個情況都被旁的變電站閉路電視拍下.

數天後, 警察找到了其中一位, 他主動承認了是開了人家尾箱, 於是被捕. 他妻子致電開車的那遲到者, 他當然嚇得魂飛魄散, 即刻跑了去警局自首.

整件事看來都是不可能發生的事, 偏偏卻發生了. 好在法庭見他們紀錄良好, 而感化官報告也相當 (直頭係罕見地咁) 正面 (他們認罪當日由當值律師計劃代表, 他合理地向法庭申請取感化報告並交由正式代表律師處理 [即係老朽和相熟的為食大狀] 所以才會有此報告). 在大狀求情下, 兩人都是被罰社會服務令, 加上罰款便將社服令酌減.

蠢就不是我自己說的, 而是當事人在法庭和法官自己都說的. 至於係咪真係蠢同有幾蠢, 就大家自行評價喇!

親子入廚輕鬆煮 - 酥皮卷卷卷...

2012-01-13T17:00:00.000+08:00

女王成日都鍾意食o的香口野 (有邊個細路唔鍾意丫...) 上次去學校旅行時整了那酥皮後, 就一直念念不忘. 夫人亦想知道究竟老朽係點整的. 雖然老朽試過搓酥皮但係完全唔成功, 而且功夫, 好玩程度和價碼不成正比 (老朽本身不是極喜好整餅的) . 最後決定, 都係學外國好多節目的廚師一樣 - 買現成酥皮算了...

呢款酥皮餅呢, 仲可以畀新婚的夫婦們一個 impress一下你老公/老婆的機會, 因為好易得來又好味.

詳細的酥皮製作過程可以參考呢度:
http://www.wikihow.com/Make-Puff-Pastry
http://www.youtube.com/watch?v=Zg-ybzGok3U&feature=related

現成酥皮又好, 自己搓又好, 總之就有件酥皮啦... 之後就灑粉在工作板/平薄砧板上和件皮上, 再 roll薄佢 (如果無麵粉棍的話用高身樽, 我試過用長身廚房紙筒都得!). 薄到 1-2 mm 就o岩架喇.

之後可以準備餡料, 可以係...

- 切碎晒的煙肉 (唔使先煎/炒) 加入茄汁和 basil葉碎

- 炒香的洋蔥磨菰碎加少少忌廉湯底 - 切勿開稀, 做餡的話要好稠的, 唔係一焗就會瀉水.

- 叉燒粒加少少叉燒醬

以上幾款可以用來整批仔, 切大約4吋4吋的酥皮, 餡放中間, 用蛋漿掃邊, 對摺封口 (用叉子尖壓實批邊), 批面掃些蛋漿就可以放入已經鋪好錫紙掃了油 (橄欖油可矣, 防黐底) 就可以入爐.

如果好似我咁想簡單點又畀女王都玩埋一份的話, 就好似以下咁:

一款就係 Basil 煙肉碎, 另一款係買回來的香草醬 pesto. 仲有兩款無show到的係用黑松露醬加橄欖醬 (olive pulp), 唔建議用100% 松露醬因為太香太搶味. 我建議最多用一半松露醬, 少O的仲好, 其餘份量都係橄欖醬. 最後一款係買回來的蕃茄吞拿魚醬.

我就叫女王大約平均地塗上薄薄一層, 之後切開約一吋左右寬條, 兩邊卷埋 (想要簡單點, 好似我就叫女王直頭可以就咁卷起) 細細粒咁, 開口在底, 又或者用蛋漿封口;

如果係就咁卷起的話, 就又係排在掃了油的焗爐錫紙上, 中間要留一倍的位置等佢發大. 頂上掃點蛋漿焗起來會金黃點. 如果係兩邊卷的話就打橫放, 發得靚點. (我就係無打橫, 所以發起後有點歪...)

預熱焗爐至190-200 度後, 焗 15 分鐘左右便可以了. 喜歡吃芝麻的話可以掃上蛋漿後加一點點芝麻同焗.

可以係餐前小食, 前菜, 下午茶, 整定焗返熱當早餐... 之類之類...

女王食咁食, 因為其實都有點熱氣, 所以... 食左幾次後女王有點喉嚨發炎呀陰功...~!

正能量達人之 - 第二步曲

2012-01-12T00:00:00.000+08:00

幾個月之前 (大約都有大半年了...) 老朽寫過有關專業調解員 (mediator) 的課程. 老朽上了之後就開始排隊考試, 因為坊間似乎認受性最高的就是香港國際仲裁中心 (HKIAC) 的考試, 而且如果在 HKIAC 考取資格後, 是可以向香港律師會申請豁免再考律師會那 Panel 的.

因此, 這個panel 也是香港各大可有資格給予「認可調解員」的團體中最多人報考的, 也因此我去年4月左右報, 一排....... 就等到十一月尾才有得考. 據我認識有份參與評核工作的資深調解員所言, 是因為人手不足, 他們作為資深調解員每天工作本身都有一定繁重, 但作為「考官」他們不單要付出一整天的時間來為考生監考和評核 (後面有詳述), 而且可以得到的金錢補償是比他們當調解更少的.

背景就係咁, 所以其實去年11月就已經考了三天的試. 形式係好似 role play 的. 每天會有三輪考核時段, 每名考生 (surprisingly 原來只有三份一左右是律師, 多數係其他行業的從業員和專業人士) 只會在其中一次當被考核的調解員, 另外兩場就要做「戲子」, 當有爭拗當中的一方, 而且須按一份預早由總考官定下的 guideline 行事 (不過事後發現其實真係有不少考生會有 over-act的情況, 我以為係同班同學 practice 時才有人玩野唔跟 guideline 畀流料, 點知原來考核都有人玩, 仲係專登玩, 而且其中一人玩的係我!!).

當然over-act 的不會是我, 因為累死人的話對自己其實無咩好處. 所以每次我 act完之後考生都會來多謝我的 (唔係我點可以在我那班上取得導師的「最佳演員獎」呀...) , 不過其他人唔係咁諗呢...

考是考幾天的, 任你報幾多日, 規則訂明三年內只可以共考六天, 而當中最少要有兩次是得到評核官的推荐 (即係"合格").

我第一天考的就是碰到一位這樣的 "戲子". 當時我還以為她好好人, 後來過了那天, 有另一位做相同角色的朋友和我傾開, 才知道原來她根本是倒過來over-act的, 我平日都好老脾, 但我聽到老友咁講, 我即刻問返相熟考官, 得到的是相同的答案 -- 當時就真係激到彈起, 怕自己被人累死的. 不過後來才知道, 原來我那位考官都知道這個問題, 最後覺得我處理這麻煩人做得不錯, 所以都 "pa" 左我. 哈哈.

第二天遇到的是好parties, 不過衰在考官係出了名的殺人王. 其 comment不公程度是難以想像的, 我原本直頭打算上訴. 其他認識的考官一聽到這考官的名字, 畀了兩個忠告我: 1) 佢肥梗你架喇, 唔好奢望; 2) 佢既comment可以不理, 因為和大部分其他考官的就算唔係相反都唔係大路野, 聽佢講下次撞其他考官係死梗的. :P

第三天呢, 遇到個正路的考官, 也遇到兩位之前已認識的 parties. 但這位考官太正面, 當時反而在考完後 (是有個考官畀 comment 時段的) 根本只有讚無彈, 搞到我仲驚. 我問返佢係咪真係咁好, 佢竟然答: 「我真係咁覺得喎, 我畀唔到咩更加改善既意見呀~!」當然, 呢位考官就的確係高分 "pa" 我的.

當然, 可能有些人哥見到呢篇文會覺得「好小事唧」; 不過為我來說, 你當我蠢又好, 當我亂講又好; 畀完皮幾野之後其實真係覺得幾大期望, 最後我可以一著夾中無浪費金錢, 真係還得神落. 我知道, 和我一起練習的同班人士, 過半都係最多只有一次 pa, 要下次重考, 而按一位考官說, 報重考要等多八個月......... @@"

今次算係執身彩; 但當然, 之後會唔會有調解的生意, 又係後話了...

跨年家宴 2011-2012

2012-01-10T16:30:00.000+08:00

除外父一家的中餐外, 一如往年到大除夕, 老朽都會煮一餐西式的給父母, 食到跨年倒數再添些小食才去睡的, 今年女王也第一次咁夜訓倒數埋先睡, 佢就當然作晒反啦...

今年的 menu 是...

沙律-
松子仁鮮帶子茴香 (fennel) 沙律配柑橘橙汁, 係之前在看意大利煮書時見到有類似的, 自己做一次. 帶子是北海道大粒的刺身種, 開邊略煎就上碟. 柑橘橙汁就係榨汁後加入鹽和少少胡椒, parsley後用橄欖油打勻而成

鮮無花果意大利火腿沙律脆餅(紅糖黑醋醬) - 是用買回來的 crostini 餅, 放上小塊的 parma後加一小件新鮮無花果, 再glaze上一些自己煮的 basalmic cream. (errrr... 原本係煮來送給細細妹的, 不過自己試味又試味, 試試o下自己食晒... sorry... ^^")

餐湯-
洋蔥絲清雞湯 (加入了茴香那硬到唔食得的莖去煲的, 好香...)

主菜-
海鮮盤 (Citysuper訂回來的, 好大個...有麵包蟹有龍蝦半打青口半打海螺仲有半打大蝦)

煙燻法國走地雞 (馬會出品, 係由生煙熟的, 用焗爐低溫翻熱就食得, 仲非常好味...)

香蒜牛肝菌玉米粉 (polenta)

牛油炒菠菜

[以下三樣係原定菜式, 最後因為食海鮮同雞已經飽了所以留到1/1中午才煮...]
-意式蕃茄醬煎黑豚柳
-燒和牛肉眼
-檸檬鹽燒鱸魚排 (都係普通煎下燒下咁啦, 係個魚就用檸檬鹽擦勻, 兀一天後只煎有皮那邊, 煎脆後加入雞湯, 蓋上後「蒸」五分鐘使魚柳肉嫩滑僅熟, 之後打開蓋使皮再次變得脆身, 之後加上數片輕輕炸過的鼠尾草 sage點綴一下)

甜品
焦糖燉蛋(CrèmeBrulée ) - 呢樣就真係夫人的傑作了. 因為買了噴火槍, 好好玩...

之後倒數時吃的是例牌的日本式東西為主: 伊達卷 (加入魚漿的甜蛋糕), 丹波黑豆 (甜的) 和築煮魚, 還有一款又是 taste italia學的... 炸意粉...

是用幼身意粉煮好隔水, 之後將蜜糖加入切到好碎的果乾, glaze 上去後再灑些開心果碎和玉桂粉. 個 feel好聖誕新年的...

2011對我是個好怪的年頭, 公司多多事實, 最後離開了, 但又多了很多不同類型的客戶, 而自己煮野食又明顯有更進一步的 "功力", 女王又突然好似大個左好多咁. 再加上臨年尾和朋友搞了點小生意 (但又有些怪問題...唉...) , 不過又畀我考到 mediator 調解員喎 (此乃後話...) 這年實在是活得... 唔.... 用「太精彩」來形容都是對的...

再約我去迪士尼...

2012-01-09T13:00:00.000+08:00

第二場家宴前就是兩天的迪士尼之旅, 去年女王仲係細細個, 只係知道好開心但係咩都唔識玩, 仲驚 Winnie the Pooh, 今年呢就唔同晒喇...

我們係一家大細 (包埋爺爺麻麻 & 姑姐) 咁去玩的, 因為應承過女王話如果佢好乖的話呢, 就會畀佢同米奇一齊食早餐, 即係要 book "紅色酒店" (香港迪士尼酒店) , 我係十一月中打去的, 回覆竟然係...

爆晒.

得返一間好萊塢 (即係平少少那間) 我房 - 六個人點住... 不過, 佢都好人, 叫我留左先, 佢地會幫我留意同埋搵返我.
我都知道酒店行內多數會 hold 起部分房間, 而迪士尼的酒店人員又好玩喎, 叫我打多幾次去, 得閒就打畀佢地睇下有無房騰出來. 仲鬼咁好禮貌. 卒之...

到左12月1/2號左右, 有日下午我去拎回鄉證時 (係呀, 過左期要換, 因為可能遲少少有需要陪師兄成隊人回大陸開下會喎) 無聊又打去, 就竟然有喇, 仲乘機 book 埋酒店那間晶荷軒的什麼。「迪士尼特色點心」 lunch - 原來成250 大洋一份. 不過後來知道, 原來其他 set 都係差不多價錢, 而且呢 set野睇落真係好別緻, 應該可以 tum 到女王食多少少的 (事實證明果然如此, 而且唔係食多少少, 係多好多..., 另文再述) 所以也照訂了... 仲有就係, 因為家父堅持就今次係當家庭式旅行, 所以話酒店錢一定要佢畀喎, 咁我要畀的價錢又細左, 所以更為無所謂.

當然, 女王每次一聽到有得去, 就會變得好乖, 好乖, 真係有如魔法一樣. 而卒之都去到12月尾喇.

細個旅行時, 前一晚我好多時都會有少少訓唔到的興奮感覺, 不過女王又無喎, 不過本身都好夜, 因為剛裝修完去了她新的房間, 未訓得慣, 成日半夜起身要我陪佢在側邊的床訓... (所以其實無覺好訓既係我, 夫人就... 係 "鞏" 我過去陪個女, 自己又唔陪既罪魁禍首...) 但當然, 有得玩, 仲有佢至愛的姑姐和麻麻, 仲有爺爺係咁影影影影相 , 基本上我同夫人係可以休息一下的... 哈哈...

因為都係想 HEA, 所以都係中午才入去食飯, 剩係食呀, check in 呀之類都搞到下午三點. 係到左巡遊開始先入去, 好在都仲有位可以睇到. 女王一見到帶頭的米奇就已經o係度係咁跳好似上身咁款. 至於佢至鍾意的 winnie the pooh 今次無渣流灘死老豆咁款喇 (有關去年 pooh點慘法, 詳見: 呢度 ) . 女王就睇得勁開心, 爺爺就影得仲開心. 幾乎想行出去路中心度影咁滯.

因為係下午, 又係 hea, 而且係團體式移動, 所以大家都只係玩下木馬同埋小飛象 (女王又唔多驚喎飛到咁高), 又睇下雪亮聖誕的亮燈呀飄雪呀咁. 同埋睇埋一直都未睇過, 原來得香港先有的"米奇金像獎". 之後又已經夠鐘食飯 (都係求其去了 advertureland 食東南亞/印度飯麵, 講真成間迪士尼, 唔計酒店晶荷軒同埋那酒樓的話, 大部份食品都係填飽肚就算--尤其係自從無左明日世界的「叉燒漢堡」之後. :P

值得一提的是, 去年女王係怕煙花怕到飛起的, 今年呢, 竟然係 "皇麻麻" 抱住的情況下, 叫佢「怕就單起隻眼來睇啦」女王又受喎! 就係咁, 女王第一次真正睇煙花... (麻麻好野!!!)

睇埋煙花等散場, 回到酒店房, 都已經十點幾, 先記起日間在晶荷軒因為另外叫多了送菜和一個炒麵食唔晒 (嚴格來講係直頭食唔到!) , 我們叫留返夜晚做 room service. 沖埋涼叫得來, 竟然成12點先食 (女王都係呀下...)

成晚聽到女王係咁轉身, 梗係訓唔慣啦. 不過到第二天早上, 我起身時, 佢已經醒左, 仲記住要同米奇食早餐. 由於訂了9:30那輪, 當時刷牙洗面後都係9點而已, 我便叫女王一起出去酒店其他位影相. 佢三歲人仔又好合作喎, 仲鬼死咁鍾意擺 pose 畀我又換鏡又玩大光圈淺景深之類. 我呢個時候就諗起細個時老豆叫我同妹妹出去影相那種心情, 原來幫個仔/女影相, 真係好鬼死開心架... (唔通真係有遺傳...?)

之但係到食早餐呢就搞笑喇. 我同女王和爺爺比較早起的先去拎位, 之後各位女將們才到. 當日在翠樂亭餐廳的迪士尼朋友係米奇/黛斯 (唐老鴨女友) 同埋布魯托 (米奇隻狗, 唔係高飛呀下..!) 但係好奇, 米奇行了幾次, 都無經過我地張檯, 搞到女王食野都唔多開胃仲成日問米奇咩事唔過來. 最後係到左十點半喇, 爺爺按捺不住走去問陪米奇的工作人員, 要"夾" 佢過來才影到相, 之後女王先肯好快咁食食食. 但係又要 check out 去野去廁所之類, 出得到樂園又係12點幾...

今次當然係先去左昨晚早關門的新開 Toy Story 啦. 但係個遙控車太激, 我地無人敢玩. 只係成家人玩了彈弓狗車, 我和妹妹就也玩了跳降傘 (故事中綠色士兵) , 其他人就去取 winnie pooh蜜糖罐 fast pass 同埋食少少野先. 我們玩跳傘因為都係大人大姐, 所以都係排 single rider 那邊, 攝位排, 所以好快有得玩. 玩完仲有時間同妹妹玩下飄浮相.

講返 winnie the pooh , 今次呢, 女王唔驚喇, 一家人坐一架車, 女王仲睇得好開心. 真係大個左喇...

其實之後都係玩下咖啡杯 (故意畀爺爺麻麻同女王一起坐, 佢地唔轉個盤唔使兩老一嫩頭暈丫嘛) , 搭下火車排下隊, 又同pooh呀, 唐老鴨影下相, 就已經好夜喇. 竟然又已經到晚上7點, o係大家都唔多想在迪士尼食飯的情況下, 拿拿聲返香港食飯. 之後又拿拿聲回家, 因為老朽又要準備第二場「倒數家宴」了...

先飲茶 - 訂了迪士尼點心餐, 好貴, 點知原來其他食品都一樣咁貴. 反而特色點心係特別訂做而且要該酒店住先有得食, 所以值得一試.

心思- 連翠玉瓜炒蝦仁都切到似魔術手手 (即係米奇手套) 樣.

難得的襯家

2012-01-08T06:30:00.000+08:00

記得上星期我寫過, 我當年法語補習學生找我證婚嗎? 其實當天我還見到一個少見的現象, 昨日為另一對新人證婚時又見到類似的, 所以突然想寫一下.

我學生的父母和新娘父母之前係唔識的. 去到會場時, 我先見到新娘父親. 後來我學生的父母也到了. 之後見到的就真係有少少奇景... 我見到新老爺是結了 bow tie 的, 他走去問新外父

「喂老襯呀, 打唔打 bow? 」

新外父的回應也頂癮「嘩大佬你想我今日 "箍煲" 呀~!?」

「唔係啦! 我見到兄弟o的 tie 顏色, 諗住我地兩個老野都整條一樣色o既 bow tie 玩下咋, 我準備埋架喇!」

「既然係咁, 又好丫, 玩下丫」

「我幫你戴喇...」

呢段對話, 在婚禮上出現本身唔奇, 但如果說出來的係兩邊襯家的話就真係勁喇...

結o左婚o既都會知道, 而家香港地, 多數襯家都係無咩來往的. 結o左婚之後最叻咪係大時大節出來飲茶食餐飯之類. 至於結婚當天, 完全無交流的都係佔多數. 一係最多都係大家打下招呼吹兩句廢話.

至於昨日下午, 見到的仲奇... 今次係襯家第幾次見面就唔知, 但一定唔係成日見因為兩個老豆一見對方都係好客氣咁握手先既. 之後有人走去搵外父話 "派晒利是喇, 仲有無o係身"

外父: 「唔係咁快嘛, 我未嶔喎」...

呢個時候, 在附近的老爺拎出一疊五十大元和一百紅衫魚 (漏了提, 兩邊父親都似係有個錢的) 「喂襯家唔好走來走去喇, 拎左呢o的搞掂先啦」

呢位外父係我公司一位大師爺個客. 佢早兩日當新人改了 rundown 同安排想和我傾的時候, 佢話要上埋來. 初時我心諗佢梗係又係多意見的父母想來「阿之阿左」啦, 點知原來佢上來開會時真係唔智點請野; 而且仲似係真係想幫手同埋好好人, 又話要就返晒襯家加多點天主教元素. ...

撞到呢o的場面, 我都會好開心, 因為自己當年搞結婚時, 兩邊老豆幾乎開火咁滯, 的確如果四大長老有傾有講的話, 成件事都會順利得多.

就咁, 兩對新人的父母都有個共通點, 就係都係做生意的. 唔知係咪生意人特別會就人, 真神假鬼都好, 起碼人前人後都 friend 過打 band, 呢樣已經贏了...

年尾家宴 2011 - 第一場

2012-01-06T17:00:00.000+08:00

每年年尾, 老朽都會搞兩場家宴, 去年因為家中裝修所以 skip 了一年. 今年再次「開催」了. 第一場是中式的, 會招呼外父外母和夫人兩位姐妹&他們的老公. 今年多了一位特別嘉賓, 就是夫人在加拿大回港的姑媽, 早年我們去玩時她也招呼過我們好幾天的.

而因為自己知道早兩年一煮五六道菜以上的話就會煮得慢, 所以今年年初起逢到宴請親友都會先訂下菜式和記下買料單和訂一張像時間表的提場單, 而且會提早一兩天煮定一些可以先做的又或者長時間做的菜式. 因為 25 26 兩日假期都有證婚工作, 所以今年選了在27號搞.

這就是今年的菜單:
鮑魚三弄 (成本價竟然要八百幾大元...!!)

- 日式磯鮑煮 --就是之前煮過的那款, 一早炆定的.
- 蠔皇鮑魚扎 --是用清湯罐頭鮑早兩天用雞湯蠔油紅糖炆透後浸, 之前一晚將鮑魚起片 (一般師傅級的一隻湯鮑可以起出6-8片, 我功力差, 得5片...); 將白蘿蔔切條用薑湯煮熟, 露荀切半用雞湯燙過, 之後用鮑片卷著蘿蔔&露荀後用一條已經拖過雞湯的青蔥扎起.
- 竹笙鮑魚卷 --竹笙要用培養的, 天然的太不規則難以擺盤. 先浸軟後切齊口, 再釀入一兩條罐頭鮑魚的邊位和一些銀芽 (即已摘去頭尾的芽菜), 用罐頭鮑的湯低溫浸煮燙熟.

到上碟前擺好盤後上架蒸3分鐘, 再掃上蠔皇鮑汁芡便成了.

蝦子扒八頭花膠 (成本價約二百五十元, 是舊價, 現在花膠被炒貴了三至五成了)

就是早前買落的, 不是厚貨, 而是西非清水膠來的. 應是一公一乸. 不過發頭不錯, 早幾天浸好發好後都好大件下. 在前一天用薑蔥雞湯餵 (即係唔冚蓋煮) 半小時, 再加蠔油炆 (今次就上蓋) 半小時左右, 加入罐頭鮑汁少少又炆一陣, 見到個汁開始會稠身 (花膠本身的膠質) 就可以熄火焗半小時等入味, 芡都唔使埋. 再慢慢等冷卻後入密實盒, 可以放雪櫃, 到食前再回鑊煮返鬆, 灑上蝦子就得.

薑蔥撈海參 (成本價約 180元 - 兩條中size的海參)

呢個係冷盤來的; 之前阿一首徒李文基大師做過一道啤酒伴遼參, 我就試下用薑蔥. 海參都係用返急凍的澳洲石參, 一天半前解凍去腸後又係薑蔥出水. 再用雞湯煮十五分鐘, 又開蓋煮十五分鐘, 之後由得佢放涼, 切細件後連埋湯汁入雪櫃. 到食的當日上午隔去湯汁, 其時海參已經入味, 再加入少少頭抽, 老抽, 柚子醋, 麻油, 薑蔥茸撈一下, 試味後再放入雪櫃, 食前半小時取出避免因冬天而過冷影響食慾就可以上碟了.

川貝海底椰舞茸煲雞湯 (成本價約一百五十元)
這個不用介紹了, 只是加了多點蓮子百合和幾粒蜜棗)

西施芙蓉會 (芙蓉蒸海蝦仁豆腐) (成本約三十元- 兩碟)

做一道清淡點的, 老人家總不能全都是濃味的, 而且姨仔大病剛癒也不好太濃味. 就是將豆腐切大丁, 鋪上加了生粉的中蝦仁, 碟底注入蛋白雞湯和花彫後加上保鮮紙蒸6分鐘就得.

荔芋香酥鴨 (成本約七十元 - 用半隻鴨)

原本是想自己做鹵水鴨再用來炸的, 但因為禽流感, 無鴨賣, 只找到燒臘店的鹵水鴨起骨 (燒臘師傅代勞) 抹些生粉後鋪上那天早上已經蒸好搓好的芋泥 (加了熟澄麵,生油和五香粉), 食前上炸漿慢火炸透一次 (唔回鑊都得喎!) 便可以切細件上碟. 這款姨仔唔食得, 因為鴨和芋都係"毒", 對於腫瘤科病人 (雖然剛病癒) 不好, 但係佢老公拔少食完後個滿足樣使姨仔鬼殺咁嘈話要我等佢遲O的食得時再整... :P

三蔥香燒骨 (成本約一百二十元)

早上買一斤腩排 (叫肉販切大件) 回來出水後, 用鑊爆香薑片, 蔥段, 乾蔥和京蔥後放入腩排炒幾下, 再加入頭抽, 老抽, 花彫, 蠔油和冰糖 (糖多點無妨, 之後還可以較味, 一但太鹹就返唔到轉頭了), 又係例牌中火煮滾後慢火炆大半小時, 焗半小時, 又開慢火半小時, 又焗半小時, 食前煮返滾就得.

魚湯浸青蔬 (成本約二十元)
咪係史云生魚湯浸菜囉. ^^

瑤池仙菰會 (成本約二百元)

都是易煮的, 只是個菰我除了冬菰及草菰外我特別加入了一些羊肚菌和三隻黑虎掌菌才用珧柱絲和蠔油炆. 貴氣點, 也更有黑虎掌特別的香氣. 早上炆定放在砂鍋內, 到食時滾返埋個芡就得了.

蛋白杏仁茶 (成本三十元左右)

上個月買了架可以 "伸入個煲入面" 打茸的攪拌器 (因為之前那個送了給姨仔煮粥/湯用), 貪玩就做了這個. 因為外父好鍾意食的. 都係同網上食譜差不多, 一樣係龍皇杏對北杏係10:1 左右, 用半斤 (八個人份量分十人吃) , 加入一撮白米, 浸水四個鐘左右後打成杏汁隔渣 (我只用隔篩, 因為想留些咬口, 真係想好滑的話可以用煲湯袋分兩次隔) 煮好杏汁後加冰糖漿, 最後吊入四隻蛋白熄火攪, 但因為有人想留些蛋白粒, 所以我攪的時候係快攪兩圈後停幾秒, 又攪兩圈又停一下咁o既.

以下兩味係準備了但係因為知道吃不完所以無煮到的...
砂鍋爆龍躉球 - 最後龍躉肉益了姨仔, 畀佢拎走食. 因為我們食完那晚後第二天去迪士尼兩日, 留不了.
砵酒焗中式牛柳 - 最後已醃好的安格斯牛柳條每人分六七件拿回家自行煎來吃. 原來好腍, 正!)

真係唔煮唔知, 原來而家O的送錢貴左咁多. 煮一次家宴要二千元; 不過姨仔在家中做了一些蝴蝶酥 palmier, 而家姐就買了果盤來, 身為Crabtree會員的她仲幫我買了幾百元的貨品 (當中包括一支無咩人買的薰衣草燙衫水, 佢都係問店員才知他們有) 唔收我錢, 所以今餐也都無蝕底也...

冰糖蘿蔔

2012-01-05T00:00:00.000+08:00

早幾星期做過一道炆牛腩, 餘下細半隻白蘿蔔點算好...?

又碰巧在不知哪家大陸的電視台轉播節目中, 見到有一道叫「養生蘿蔔」的. 做法簡單得要命, 就是將蘿蔔切丁方後中間挖一小洞, 之後放入冰糖碎, 蒸它二十分鐘後, 冰糖就會溶入蘿蔔內, 而蘿蔔的寒氣也會消去 (真係怕寒可以加入少少薑汁), 最後加點蜜糖就可以上碟了.

一見到後已經覺得這是消滅廚餘的好方法, 跟著試做, 果然係出色的一道小點. 當然, 下圖因為是用廚餘所以切得不太美觀, 但管它! 好吃又簡單加上環保, 已經贏晒了!!

2011聖誕火雞

2012-01-03T20:00:00.000+08:00

去年聖誕, 女王仲係好細個, 今年就唔同晒, 整個人都好似大個左好多咁 (雖然其實都只係三歲...).

其實去年聖誕和夫人出去街影相時已經識得扮晒野擺pose. 而家就更上一層樓, 識得chok 樣... 聖誕前學校已開始放假, 爺爺麻麻帶她去中環影置地的火車時, 仲 chok 到連其他人都覺得女王功 cute - 不過呢O的都係爺爺話O既,仲話女王個得意look恨死隔離. 之咁, 我自己之後和夫人&女王去中環影 winterfest時都見到, 女王真係好識擺POSE 的. 仲影左幾張大光圈人像特寫, 我自己都覺得... 佢真係好cute... (會唔會hardsell 左少少呢...)

請返學校, 今年都有聖誕表演, 仲係 book了我家樓下的社區中心, 好有型. 不過今年女王就唔係攸司儀, 而係就咁表演, 咁當然, 總不能成世都係佢做司儀吧, 反而夫人就擔心女王無得做司儀會唔會唔開心, 但似乎個女完全無咁既感覺喎... 會唔會其實係家長太上心呢...?

不過比較頭痕的是今年表演當日我要上庭, 只趕得及在她表演的一段短時間去影相, 影完無耐又有第二樣野要回法庭. 無得和女王吃飯呢...

去年家中裝修搬了去爺爺麻麻屋企, 今年自己家中再次放那棵好耐歷史的聖誕樹, 而女王就真係鬼咁興奮, 因為係第一次有得裝飾聖誕樹哦!

搞掂晒裝飾後, 就輪到一年一度的 party了, 因為係我妹妹的生日, 每年都會搞個 party 請晒班親戚來當聚一聚的. 今年新公司工作上比較自由, 除了聖誕和 boxing day都要幫老友介紹的新人證婚外都唔太多野做 (正常聖誕我不會替人證婚的), 索性放自己幾天假好了. (不過後來好搞笑地, 差不多每天放假都電話接了一單生意, 雖然多數都係同事幫手處理, 但自己都要參與, 最後又係同無真正放假一樣...雖說!有生意係開心事嘛) -.-

搞party時記起好久沒有吃燒火雞了. 因為早兩年去了一位大狀的 chambers 參加他的 party吃到不錯的火雞, 是上環森美餐廳做的外賣. 之後只有上星期公司去金鐘 Island-Shang 的 Christmas Lunch 吃過, 也算夠滑, 但自己上次訂火雞已經多年前的事. 一來因為大隻, 二來因為那次去一間普通的餐廳訂的燒火雞, "鞋口" 得要命, 和美心訂到的差不多都係食剩晒; 所以一直以為大部分金火雞都係咁上下. 而因此我只會在 CitySuper 凍肉部 (不是聖誕食品部) 訂另一款的 "煙火雞", 因為係慢慢煙熟的, 所以滑得多.

但耐無訂又會想試一下. 所以便試一次馬會製作的, 以前訂過他們的煙大火腿都不錯, 所以一試, 圖片如下...

其他食品都是由快活和吉之島訂的. 但這隻火雞真係意外驚喜... 我從未吃過同此軟滑的火雞. 連胸肉都一樣, 一點也沒有"渣" 的感覺, 有點出奇十四個大人加6位小朋友加上那麼多其他食物, 也可以一餐內幹掉這火雞的9 成有多. 絕對沒有像麥兜那隻的一樣剩到出年. 呢個出年可以考慮 encore...

食到飽就有氣有力去教堂的子夜彌撒幫手做 secu了. 女王知我夜晚去教堂又想跟來, 不過佢得三歲人仔, 點捱丫. 唯有哄她聖誕節正日上多一次教堂 (所以搞到我無得訓晏少少, 而非教徒的夫人就好少理, 話寧願幫我們去定出面餐廳霸位食lunch喎... 激死...)

食得o既聖誕樹 - pandoro christmas tree

2011-12-27T09:30:00.000+08:00

一向有訂閱一本意大利烹飪雜誌 Taste Italia 的習慣. 那是本十分全面而用英文寫成的書. 當中介紹的菜式又意大利南到北, 簡單到複雜都有. 幾十蚊睇足整個月, 都好抵.

今期的聖誕特輯, 找到其中一款睇起來難, 但做起來原來都幾易的聖誕蛋糕, 不過其實不算是由頭焗起, 而是用買回來的意大利聖誕清蛋糕 Pandoro 做起的.

就起 pandoro 就一定會想到另一款香港人比較多吃的乾果蛋糕 panettone. 但panettone 吃下去會有點麵包的感覺, 而 pandoro就真是香草 (云呢拿) 味的蛋糕來的. 不過也一樣就是因為當中的酵母是加入一款特別元素, 所以不放雪櫃一樣可以放幾個月不壞.

說回我的 "聖誕樹", 是利用 pandoro 多數是凹凸星形的塔狀道理, 橫片出數片一樣厚度的蛋糕. 之後就打起忌廉和 fold 入橙酒糖漿 (自己煮的, 可以調較甜度) 及 mascarpone cheese, 用抹刀抹上每層的面, 之後每層也轉少少才 "貼" 上上一層, 之後放上一些 cake decoration 的珠仔, 最後篩點糖霜就成了.

不過因為我不吃 cheese, 所以改成用吉士粉打入忌廉, 打到 "企身" 就行了. 其餘步驟是一樣的. 容易得很, 而女王見到後已經大大聲話要食聖誕樹. 咁即係起碼都已叫做似樣先.

壯烈犧牲...

2011-12-24T00:00:00.000+08:00

上星期證的兩場婚禮, 都分別發生了一件相當搞笑的事...

首先是為一對朋友的朋友證婚. 他們最初時問兩位不同的朋友說想找律師, 而那兩位朋友互相是不認識的. 不過這兩位都竟然是由我替他們監禮證婚的, 所以這對朋友便得到兩個相同的 referral, 托賴就係咁所以我都未開價錢給他參考已經說「點都係搵你架, 我兩對朋友都強勢推介」(多謝先...)

這對新人的新郎是位演藝工作者, 也是一名比老朽更加「身型膨脹」的可愛肥仔 (真係可以咁形容架, 加上佢的「演技」真係 lum 死人架..) . 到行禮時, 不知道是否有人「搞過」個戒指枕 (強烈懷疑係攝影師影戒指相後自行再縛過但縛得太緊), 竟然唔可以一下就單手取得戒指 (我縛的方法是一位攝影師教的, 縛完後都OK實, 而且戒指可以用單手取出的); 我自己細細聲 "吁" 左一聲; 可能新郎以為我拎唔到, 所以想幫手解結, 點知就係咁, 兩隻「肥手」相疊, 而呢個時候其實戒指已經順利落在我手, 但係就係因為我隻肥手又掂到另一隻有點凍的可愛肥手 (可能因為佢緊張啦), 本能地一縮, 隻戒指就掉在台上... @@"

就係咁, 我個底就係咁花左... 第一次跌戒指... @@" 當然, 我極之鎮定地執起後對新人講一句: 「無事, 跌一跌才耷得正, 可以戴得實O的架」新郎都知係佢緊張所以都同我講對唔住. 而呢對新人我是用「上台演出」為題講幾句的, 講到半分鐘差不多完時竟然畀台下一眾戲劇界人士掌聲打斷, 我諗都挽回唔少面子吧...

其實, 犧牲了第一次的不只我, 還差點有我的戒指枕.

這是我第二個戒指枕了, 雖然我另外有一兩個後備, 不過多用一個 classic款的; 前幾晚另一場婚禮上, 輪到呢個「幫手」出事...

那晚的新郎哥成日話自己好緊張, 所以去酒店 ballroom 的飲品 counter 拎左杯紅酒話想壯膽喎. 呢個時間我同佢都在新娘房外等埋新娘換衫 briefing, 當下就有一位應該係佢同事的來恭喜新郎. 仲開始無啦啦o係度講公司野. 初時新郎都聽得好開心, 但係條友一路o係度講. 手舞足蹈, 卒之...

佢隻手揈到放在 drinks table上他的袋, 而個袋拍下撞到新郎杯紅酒, 杯酒竟然飛起倒下, 將紅酒濺向正在檯面縛緊戒指的我... 因張結婚證書就在戒指旁...

呢個時候, 當然係第一時間拯救左證書先. 一手拎起證書簽名冊, 另一隻手掃開戒指枕... 之後打開簽名冊, 發現只是誓詞濕了兩滴和一張普通的婚前聲明書濕了.

酒店方面都好快幫手, 來幫我去影印那張濕漉漉的聲明 (是普通白紙來的, 可以影印來用). 同時間地, 那位揈手同事仲唔知自己衰左, o係度係咁講野, 新郎都唔理佢想整返好隻戒指喇, 卒之係我好正經咁叫新郎過來, 佢先至識行開放新郎過來. 本來飲到少少面紅的新郎已經面都青埋, 不過我「匯報災情」後佢知道證書無事都放心了.

呢個時候, 我望一望戒指枕, 先見到原來上面有三"撻" 紅酒漬呀陰功...!!! 但係可能新郎唔為意到其實戒指枕係我借出的, 竟然只講了句 "我唔會介意的"... -.- 不過當然, 只係幾十元, 我亦從無諗過問新人 or even 那位冒失賓客賠錢.

好在, 昨晚網上 check 到用酒精慢慢抹係抹得走的, 個枕都不至於即時死亡, 不過抹極都仲有少少漬咁解囉... -.-

紅糟鹵牛肉

2011-12-22T21:30:00.000+08:00

不嬲都係鍾意食台灣那種牛肉麵, 即係牛腱 (牛展) 煮的那種. 喜歡那甜甜地又酥化的感覺. 而早陣子去了新公司一位舊的大老闆所開的酒樓食飯 (好複雜, 簡化了其實是我舊公司多年前的大老闆, 後來和舊公司的新老闆不太咬弦走了出來, 和我師傅一起去了師兄的公司, 我現在又一起去了師兄度); 這位老闆除了律師外也做不少生意,包括飲食. 他們其中一味小食是鹵牛腱. 細問他們廚師, 回覆只是... 用浸牛腱原湯加靚老抽和糖慢火煮. 當然, 這不可能是竅門.

決定一邊上網找, 一邊嘗試, 買了兩大條花腱 (金錢展) 來試, 因為記得那味道是甜甜的, 而且顏色有點紅, 所以自行鎖定會用紅糟加入去炆. 而另外就真是用了老抽和冰糖.

第一次炆是先炆煮了一個半小時後熄火焗一小時, 之後開火又炆半小時又焗半小時, 結果是:

見到是一件件的, 咬下去卻還有點韌, 不過又不是好韌那種, 喜歡咬東西的會喜歡. 味道就已經是差不多對味了. 我用的份量是半斤肉, 三四湯匙的老抽, 四湯匙左右的冰糖和兩湯匙紅糟, 牛腱當然先出水, 切大件煎一下再炆.

後來見網上的台灣名廚阿基師的做法, 就是要炆五小時的, 所以第二次做時就真係耐喇... 差不多同樣的料, 先炆個半小時後焗半小時, 之後又開火兩小時焗一小時, 又開火一小時焗半小時, 最後又開火大半小時焗十五分的... 間中加點水的, 而且加入了紅蘿蔔加甜度, 和白蘿蔔用它的酵素來使牛肉更腍; 而時間可能有點出入, 總之是耐到連自己都忘了, 到開蓋的時候:

賣相無咁好, 因為成件腱已經酥化到差不多爛的地步. 吃下去是鬆晒的. 我也有定時試一下味, 不過發現最腍竟然係炆完第三次後, 之後舊牛腱就開始鬆散同埋又無咁腍了. 真係奇怪...

現在那方是不錯的, 不過如果真係要驚為天人的話, 可能要再試多幾次才行...

「關係複雜」

2011-12-21T08:30:00.000+08:00

有時人與人的關係真係十分十分之微妙, 上星期幾對證婚的新人當中, 有一對的新郎是我的中學師弟; 不過我們最初的認識並不在母校.

話說當年老朽入大學不久, 開始替初中和小學生補習英文, 而當時香港還未興起初中去補習社的. 私人補習可說是不少中產或高收入家庭會替小朋友辦的事, 而當時也沒有像今天的那麼多不同形式的兼職可以做的, 補習可以就是最起碼的工作了. 每個月賺返三兩千已經好高興了.

老朽就比較特別, 因為「曾經」是香港法國文化協會最高那張 dip 的畢業生 (而家好多唔記得晒就真), 所以有時就會有些會考要考法語的學生找我 practice oral, 而又因為父母認識的一位友人, 他兒子當年剛讀初中, 成績不錯卻想他學多點東西, 所以竟然找我私人教授學法語, 而且學費比一般補習高一倍多. 我倒建議他出去學的, 始終語言是愈多人practice 愈好的. 但他父母卻說想他靜靜地學.

長話短說, 就是這樣, 認識了這位師弟. 卻又成了我的學生. 而現在, 我就成了他的證婚律師. 感覺十分之... 奇妙... 因為, 若干程度上, 看到一個關係的轉變, 兩個人 (指我和學生之間) 竟然也成熟了, 當年上課時有時一起搗蛋的事; 今天在馬場為他和女友作見證, 雖然和其他新人一樣, 我也有一段一分鐘左右的獨特對白, 但說的時候, 始終都是自己的親身經歷, 是有多少不同的... 而世伯世母見到我, 也一樣像當年一樣捉住我唔放的傾計. 一切就像回到十多年前去他家上課一樣...

同場加映, 又不說不知, "六條一" 當晚最後一對新人, 就是我一位中學同學, 就在 "面書" 發現, 他太太原來是我另外一對的證婚客的親戚, 而那對新人又是另一對我以前打 wargame 老友證婚時介紹認識的... 呢個世界真係好細...

「食物工房」- 聖誕食品點整出來?

2011-12-19T23:30:00.000+08:00

原來下星期已經是聖誕節了, 今天和女王回到教堂, 見到馬糟已經完全佈置好, 將臨期的四支蠟燭都已經點著了.

老朽有個怪習慣, 就是會錄下電視上各式有關飲食的節目來參考, 而前幾晚看電視就看到明珠台有個之前做過的BBC 節目, 叫做「食物工房」(food factory). 當中介紹的是工場人如何製造平日大家以為很容易的食物, 有時也介紹當中的化學原理甚至化學物質, 例如原來粟米片不是用粟米, 而是用白米高壓製成的, 又或者原來支裝的噴忌廉原來整支都是高壓氣, 真正的忌廉竟然不夠一隻咖啡杯的分量等等. 目的是為了介紹之餘也希望大家會懂得珍惜自己所食的東西.

今次的是 food factory的聖誕特集, 當中就介紹了以下的幾樣, 我覺得好得意也有點發化深省, 所以記下分享一下.

香港人比較少吃果蓉批 (mince pie), 原來用來製造的蘋果是在每年的八至十月採集的, 不然一個十一月尾根本無可能有這樣多的蘋果呢! 至於那麼多的生果, 為什麼收成兩月都可以不爤? 原來是放入無氧倉 (1% oxy) 儲存, 沒有氧氣就自然不會有生物, 也不會有氧化了.

到製造時, 是用一個機器來去皮的, 一分鐘可以替 650 個蘋果去皮去心, 而皮心等大家以為是廢物的東西, 又會煮一下搞爛後變成泥狀再入醬做成 puree, 至於果肉呢, 就是切碎後加入 vita c 防止變黃 (和做蘋果沙律時加入醋一樣), 之後就會用蒸汽噴機來殺菌來混成醬料. 最後才加入焦糖等使它變成深啡色的醬料.

而大家平日也不會去碰, 聖誕卻一下子殺一大堆的火雞又是如何「生產」呢? 原來為了使「全世界」的火雞都可以在感恩節時開始上市, 又是用凍倉來儲火雞蛋的, 之後用慢速來孵化, 再分成男女去處理 - 和雞一樣, 雞"la" (雌雞) 才會用來吃的. 因為雄火雞的肉都係好鞋口的.

同場加映的是煙肉 - 一般來說傳統上西式的煙燻食品都是用 smoke house (一個煙櫃) 來煙燻的, 而且好多時係用熱煙 (hot smoke) 去由生煙到熟或者半熟的; 不過美國近年來就多了用一款「煙水」 (liquid smoke) . 試過兩者的話就會覺得真煙會有好濃的味道, 而用煙水的話就會淡些, 不過食物的本味會出得好一點. 而原來這些煙水... 真係煙來架! 做法竟然係用一間好濃味的 smoke house中生產出好濃的煙, 之後用冷凝法「捕捉」煙變成液體.

原來為使我們可以過一個方便和愉快的聖誕節, 世界上是有一大班人努力了幾個月的. 大家真的要珍惜食物 (尤其係... 火雞!!)

七年之癢開始...

2011-12-17T23:00:00.002+08:00

計計下, 原來今個月是和夫人結婚七周年了.

人人都話有七年之癢, 我倒有點想知道, 我們的七周年會是怎樣. 我只知道, 轉工後部分生意 "回流" 速度未如想像中快, 加上物業市場真係好靜, 就算有炒家埋身幫襯, 人家近月都唔敢出手, 而證婚生意雖然可說是不絕, 但始終投放時間和資源不可以太多, 也不是老朽一門主要收入, 所以工作上近幾星期都好畀心機去撈客和約人傾談, 而且因為是顧問律師, 使費等都係自己畀, 要等待舊客有新 case之類, 又或者新客真正開始上路才可以真正的說是鬆一口氣. 不過, 沒有了舊公司的壓力和老闆的面口, 起碼老朽過的都是比以前輕鬆得多的生活, 財來自有方, 我想法倒是正面的.

當然, 努力工作是必須的, 所以, 近月以來我的確相當忙, 好多時都係靠夫人湊住女王的. 雖然老婆家務上的確係比較懶, 不過對住我父母以至於親友時的態度是十分不錯, 而且有時仲細心過我自己的, 而當知道我去證婚又或者去傾生意呀之類時, 夫人總會在家做好大部份的工作, 在背後不斷的支持老朽.

七周年那天, 我在面書出了這樣的一個 status...

「七年前的今日，我們在主前彼此承諾，從今以後，無論環境順逆，疾病健康都會永遠愛慕尊重對方。七年來都無咩資格畀幸福你，反而像麥兜-愈來愈肥，多謝你的不離不棄，仲帶來了女王。無拗撬就假既，但幸運是我們還記住這承諾。今天，透過工作和生活，我將這承諾與人分享，也有你的支持。老婆，你知我有多愛你嗎？;) 」

真的, 好希望大家看到這一篇後都會和自己所愛去分享. 不是在結婚, 喜慶那天才是有愛的一天, 而是在你需要支持的時候, 才更加可以發現, 愛就在身邊.

雕晒花的 "百子百花獻壽"

2011-12-16T16:30:00.000+08:00

外母大人今年六十大壽, 原本好應該和一眾親友食飯好O既, 就算唔係真係擺大壽都應該出來吃一下的, 不過一來外母大人佢一向都比較低調, 二來因為姨仔的電療尚未完成, 始終未出得來, 擺酒的話實好多姨媽姑爹問長問短, 所以決定作罷. 只是一家人自己吃飯, 而姨仔和拔拔妹夫就另外和外母食, 話費事女王易病傳染到佢. 咁又係, 始終已經係埋尾, 無理由臨尾香O架嘛... (大吉利是!)

洋曆生日那天是叫了外賣回來吃, 至於正日呢就由老朽下廚做幾個菜給她. 包括主打的燻雞, 因為天口凍而整的柱候蘿蔔牛腩, 還有這個...

賣相不俗吧? 這道我改名為 "百子百花獻壽圖" 是名廚甄文達 (Martin Yan - Yan Can Cook) 做有線節目的客席廚師時教的, 不過他用的是青江菜 (小棠菜), 比較梗身和易釀; 但為了遷就比較多聲氣的外父不吃小棠菜, 所以加入了大白菜, 只要小心點, 一樣釀得好.

本來是用蝦膠的, 不過外母有點蝦蟹敏感, 所以改用了四海買回來的魚肉 (當然自己打最好, 但時間關係嘛... 那天因為夫人有點不適, 我還要趕在外母到來前替女王洗澡 - 不然外母到來又會爭住做, 我就係唔想佢生日都要操勞丫嘛)

看來都幾型, 做法就好簡單... 就係切掉菜葉後用廚剪修一下外葉變成尖型, 內葉就間竹的修成低一點的尖型, 最中心位置盡量挖空才可以釀多一點魚肉的. 之後加上少少蟹子 (我用飛魚子避免外母敏感) 蒸八分鐘便成. 不過因為不知會不會還有點硬梗, 所以我先將菜的底部坐滾水拖兩分鐘左右, 放返涼才釀.

切出來的菜葉當然唔好浪費, 可以切細絲後溫火炸一炸, 十幾秒見顏色轉為碧綠就可以了, 撈起後吸油佢會慢慢變脆的. 中間再放一些蟹子/飛魚子裝飾, 一道幾好意頭又好看, 仲幾好吃的菜式便可以上碟了.

今次算做得不錯, 起碼外母鍾意食之餘, 連外父都拎架相機出來要影低拎去畀佢打波的朋友晒命的話, 應該都幾靠得住. ^^"

女王步行籌款

2011-12-14T07:29:00.001+08:00

老朽係義務工作發展局的二打六小委員就有部分 blog 友網友都知少少的. 上兩個星期日就係義工局步行籌款. 老朽都記得，之前有朋友提過，小朋友要入小學的話，最好多點可以提及的義工呀，幫人呀之類的東西. 所以便有個想法，除叫女王遲點一起一家人去賣旗外做多點事. 加上本身都希望個女可以真的知道為什麼爸B要成日去了開會和做緊咩, 所以二話不說便報了一家三口的名.

我倒是承認知道會有張 cert, 所以想和女王行, 最最最初的原意係想等女王有張 cert可以報小學時威威. 不過當女王上兩星期知道會去行公園時問我「點解要去行」的時候，我答了她...

「你記得之前給你看過有些人無屋住, 有些小朋友無得返學玩, 連想食飯都無得食嗎? 你行公園時就可以叫爺爺呀, 公公呀佢地畀錢捐助等大家可以幫下呢班小朋友囉」之後，女王竟然好積極咁問幾時有得行呀, 好想去行呀之類. 我覺得，比我呢個初時有點功利的想法強多了.

我問夫人, 應不應該帶定架車仔去; 夫人的反應是「完全無需要」.

好喇, 到了真正的步行籌款日子，秋日之中都算那日好鬼熱了. 加上行的時候, 我們才發現沿途多數都係無遮蔭位的, 夫人行了半小時未到, 即係都未到四份一路程已經覺得後悔點解無帶車仔. 反而女王呢, 我們一邊行一邊介紹花草樹木呀, 海邊的飛鳥之類的倒不覺得是大問題.

就係咁, 雖然行得好慢, 好慢, 慢到連沿途的茶水/急救站都在我們行過後不久收檔了 (我們後面還有一班九十歲長者, 和一班弱能的工傷朋友們) 我知不少人都有帶三四歲的小朋友來, 但我見到行了一會他們已經都嚷著坐了車仔呀, 以至於放棄不一而足. 而女王行到一半左右時, 只說了句 "好熱", 我這時就見到路邊有一株含羞草, 知道之前女王玩過的, 便叫她望一下. 女王果然好似見到朋友一樣, 即刻醒晒. 之後我們就一路在路上找含羞草來玩, 亦係咁, 女王真的 "親腳" 行足了兩小時 (原本大會估計路段係1小時20-30 分可以行完的), 係慢左少少, 但係我們真係好開心, 因為真的無想過她可以不休息地行)...

最後, 除了義工 cert 之外, 真係要獎返杯朱古力雪糕給她, 因為, 唔係自己讚自己個女, 而係我真係覺得, 佢好乖, 好叻... ^^

晚霞下的誓言...

2011-12-09T09:30:00.000+08:00

不少新人都有個夢想, 就是在一片晚霞訂下自己的盟約. 老朽新幾星期都見證過幾對戶外行禮的新人, 都是想在傍晚時份行禮的.

他們的行禮時間, 本來都不是 "正路" 的時間, 不過在老朽和他們開會時, 我多數都會關心一下他們選擇時間的原因, 一來有需要的話可以提供意見, 二來就係我都想了解一下, 如果日後有另外的新人想選擇的話可以幫下手. 不過這幾對新人之中, 只有一對所選的時間真係會有"晚霞" 的出現. 因為他們忘記了現在是冬天, 所以最後他們的時間都經過調整的.

有一對說想下午6時半, 希望見到鹹蛋黃, 地點是尖沙咀的一間酒樓, 是有室外證婚場地的; 但他們的婚禮時12月初, 那即是說其實日落時份係 5 點幾左右, 到 6 點都差不多黑齊了. 到時真係搵電筒照, 喊都無謂... 好在開會時我多口問句, 所以便提他們將時間提早點. 點知...

... 竟然係臨場時化妝做唔切, 5 點半先開始化新娘, 卒之都係 6 點行禮, 只係僅僅趕及晚霞最尾的一抹紫色...

另外一對是未行禮的, 我都好期待, 因為他們是我另一對證婚客 (也是我朋友) 的伴郎. 大概是見到我表現後決定找我的. 他們就比較 "貪心", 一邊想有日落的氣氛, 另一邊又想有日間的溫暖感覺, 時份呢, 就係一月; 而因為新人有做表演藝術的經驗, 竟然想在結婚時玩影 "逆光" 的相片. 但係下午時份日光照得正就話o者, 唔係邊度搵光畀你去逆得架... @@" 最後決定, 就係下午 3:30 開始, 4 點前禮成後開始影相. 結果會係點呢,下個月話你知. :)

當然, 選擇行禮時間, 多少是有點彩數的, 就算碰不著也沒有大不了的地方, 而當然可以的話, 新人總是想做到最完美, 以這完美的一天去開始人生的新階段.

咁多對想在晚霞下行禮的新人之中, 最好運的都要算我上次提過, 11.11.11 山頂行禮的醫生. 真係撞手神才可以撞到呢個對正鹹蛋黃的時間, 仲要係因為佢地遲左少少開始喎... 至於最醒目的, 應該要說是我第一對戶外證婚的朋友, 是姨仔的同學, 08年尾在淺水灣行禮的 (就是08年11月我另一篇 blog 寫過腦西班牙文證婚的那次...) , 他們是 4:15 行禮, 4:30 禮成時仲係幾好太陽, 之後好快就開始日落, 到5點左右影相去到中間時就真係晚霞出現; 而老朽因為姨仔的關係就留下來飲杯東西, 等到5:30 左右才走 (他們部分晚上上了去晚宴), 臨走前新人仲捉住影多張相, 就竟然碰上了最美的晚霞!

學校旅行2011

2011-11-29T23:30:00.000+08:00

今年的學校旅行在上星期舉行了. 今年地點是去西貢的有機農場, 仲可以自己整麵包仔同埋種返盤細細地的薄荷葉, 亦因為咁所以收成舊水一位. 錢就畀左, 但係夫人臨時公司有事去不了, 我去年就係因為要上庭所以去不了. 兩年都唔可以一起陪女王玩, 好可惜. 今年就找來麻麻頂住, 好過浪費了費用.

臨行前幾天預備食物啦, 問女王想食咩, 佢竟然話想食酥皮; 可能係因為早幾個月前和她一起做過酥皮盒, 所以提起. 還說做多整埋畀老師食. 不過, 我己知道, 整完拎去, 實淋晒喎... @@ 不過既然女王叫到, 都無所謂啦, 難得可以在靚女老師面前晒晒命丫嘛... XD (不過用淋左的酥皮晒鬼到命咩...)

為免甩轆, 所以還準備了一些薄切 deli ham finger-三文治, 包的一邊是塗上 Maille的蜜糖芥末 (Honey Mustard), 另一邊就是塗了"BB頭" 沙律醬. 中間除夾了薄火腿外, 還有一塊煎蛋皮. 至於沙律, 我就做了簡單的粟米粒配日式海帶沙律, 用的是醬油日式沙律汁, 上面再放一些大陸叫做「聖女果」的車厘茄.

成品... (酥皮未淋前...) :P

女王就開心喇, 因為好多野玩, 而且因為有跟過爺爺學種花, 所以在種薄荷葉的時候下泥和插苗都做得比大部分同學為佳. 起碼唔會一手泥先. 而麵包呢... 就太細個, 所以無睇頭, 不過在我和麻麻領導下都做到個其他家長見到都知道係 "米奇頭" 的包出來...

開餐前, 老師和女王一班同學跳舞唱歌, 呢個時候當然係我地係咁影影影啦. 有好多首女王在家中唱到「一忽忽」的歌, 卒之在老師和佢架 MP3機的帶唱下, 疑團都解開, 知道唱緊咩了... 哈哈...

女王近月大事紀: 家長日 & 運動會+萬聖節

2011-11-27T08:22:00.000+08:00

上個月的萬聖節, 其實作為天主教徒, 真正要慶祝的應該是之後一天的「諸聖節」才對, 不過既然女王學校和英文班的老師都會有活動, 而且連爺爺麻麻屋企的管理處都有個小 party的話, 也就不如照當玩一下好了.

之不過女王和去年的萬聖節一樣, 都係唔肯著玩野衫 (已經只係畀件紅黑袍佢著咋) 倒是後來佢最聽話的姑姐 (我個 designer妹) 出手才氹到女王著衫加戴埋個牛角頭箍, 仲拎了屋苑的裝扮獎 (竟然係一百大元 Toy's Rus禮劵呀下...!!) , 當然, 佢最關心的, 係拎左幾多糖回家...

因為萬聖節 party (是29 日, 即之前的星期六) 碰上我要證婚, 不能現場睇住女王玩, 其實都幾遺憾, 因為去年我party我又係去了證婚... @@"

但講開又講, 英文補習班老師打來說女王在上課時的英文大有進步, 雖不至應對如流, 卻完全 GET 到老師說話後可以簡單回應句子. 反而家練習時我同佢玩 flashcard 之類後問她時最多只會識講下 yes no 之類... 究竟佢在學校係咪真係咁堅就真係不得而知了... 不過呢, 起碼早兩星期去圖書館時, 女王都明咩係 "Now go and put this book into that bin, and get the cat's book from the shelf over there and come back"... 都算對得我地住喇o卦!?

之又不過呢, 上星期學校家長日, 我收到新的靚女班主任的 message 係女王似乎唔太肯主動在完全空白的紙上 "由頭畫起". 佢做剪貼又或者係有 guideline 去做就做得好快喎! 但係由頭畫起呢, 佢就會同老師話自 "唔識丫嘛!" (佢好鍾意 "丫嘛" 架...) 反而英文的肥肥老師就對佢讚不絕口. 至於普通話呢, 老師無咩講, 不過保姆姨姨因為都識普通話, 所以我聽得出女王係聽到o的講到o的的.

講起學校呢, 上兩星期仲係呢個親子運動會的日子, 去年因為要開工開會, 所以去不了, 今年轉了公司, 時間比較自由之下又可以去了. 其實都係跑跑跑一輪, 而且都係大家旨在掛o下隊參與一下咁. 不過見到她的老師 (還有去年的老師) 們時, 女王就興奮到飛撲埋去影相, 而且到拎紀念獎牌 (係人都有的...) 時叫佢埋國旗下影相, 佢仲識扮真正得獎選手o既 "咬獎牌" 招牌動作, 誓要笑死我們為止...

***

同場加映對話一則:

女王: (拎住空氣, 畀麻麻) 「送畀你丫」

麻麻: 「咩來架」

女王:「你估下!」

麻麻:「(望一望檯, 老作道) 係潤唇膏!」

女王:「o岩喇! 我要畀錢買o架」

麻麻:「買o左幾錢?」

女王: 「五錢!」 (唔係重量個 "錢" 音, 而係 "幾錢" 的 "淺" 音...) XD

11.11.11 四對新人四個故事之 - 父母恩

2011-11-26T00:00:00.000+08:00

好了, 到了六條一最後一場證婚, 其實是我的老友及同學. 他之前是說希望七月一邊求婚, 一成功就出來證婚的, 不過香港制度上不能這樣, 所以他便想在11.11.11 行禮. 不過他決定日子後竟然唔記得通知我, 係到了10月尾才說想在那天註冊. 這下我可難做了, 一來他已經夠晒入紙, 二來我已經沒有時間可以提供, 不過他倒知道自己遲了, 所以說會就我的時間, 在當晚證完其他新人後去他們兩家人吃飯的地點做註冊就可以, 而且「一定要留低食飯」.

亦因為係多年老友, 我便叫他盡快來律師行辦手續. 結果僅僅趕得及.

他們最後決定在尖東一間酒店的中菜廳包一間房, 兩家人 (即係會變一家人啦) 辦幾桌「家宴」. 又因為係老友, 雖然我最後都無真係坐低食, 亦都食了少少 snacks同埋同佢地一家人 toasting 飲o下香檳 (全日最後一對新人啦嘛, 所以無所謂, 飲返杯囉!) . 見到世伯, 其實我記得細個時係有見過的, 不過太久沒有見, 世伯雖然比較蒼老了, 卻極之精神, 而且仲好高興地找我飲. 之後他望著新新抱和已經仔都生埋的另外兩個仔女說...

「好咯, 最後呢個都結埋婚. 安樂咯, 搵次真係好輕鬆咁出海先...」世伯退休前是港澳的私人船的船長, 現在也還有大偈牌.

「以前睇住佢畀老師照肺睇死, 成日見家長; 而家都大個咯, 起碼唔使我煩都好丫」說時不無唏噓, 「你睇大o個兩個, 而家都生左喇, 一個歲半一個四個月大, 哈哈哈哈...」

哈, 何止唔使你煩呀... 而家舊同學係外國投資銀行O既 SVP, 咁多個同屆同學之中佢都算係撈得好掂那類, 起碼好過老朽先. 不過世伯講得O岩, 佢細個時的確係畀唔少老師睇死的. 係後來中五走左去外國後先至突然開竅. 之後就飛黃騰達了...

世伯繼續...「家陣都大個晒喇...大個晒喇... 轉行湊孫lu...」男人老狗講到聲都震, 好明顯感動中.

做左老竇o既我, 又豈止一次諗, 到女王出嫁那天, 我一定喊到豬頭咁款, 所以當然係 feel 到世伯的感慨. 唯一o既回應係... 「uncle 你咪好囉. 我仲有排呀... 」之後和他舉杯暢飲.

飲多兩杯, 都係時間回家去了, 都夜啦, 我都掛住夫人 & 女王, 都相信佢地都會好掛住我的, 分分鐘女王唔見我唔肯訓呢...

佢地兩父子話送我兼一齊出去煲支煙, 佢老竇仲問我食唔食.. 不過 sorry, 我一向都係反吸煙份子...

回頭一望, 睇住佢兩父子背影同埋兩條點著煙仔升起的白煙, 能夠為我的11.11.11 劃上一個好完美, 好感恩的句號...。

初冬時節好煮意 - 龍鬚東星柳 & 白玉藏金鳳

2011-11-24T16:30:00.000+08:00

在寫11.11.11 的第四對新人前, 先暫停數天, 轉轉去吃喝一下...

自從轉工後近個多月都未有煮些新玩意, 而且秋冬時節真的比較多婚姻監禮的證婚工作, 周末好多時都要出街工作的話, 不多時間在家準備煮菜; 只是上星期 11.11.11 之後休息了兩天才找個時間入廚房玩.

都是兩道可以不難制作, 平凡得很, 卻不失貴氣和賣相的家宴菜式. 先說龍鬚東星柳吧.

其實是在書店見到有一本很舊的 "香港粵菜精華" 當中見到的作品, 不記得是哪家酒店的名菜了, 當然, 人家做得大體得多. 我的做法只是將切了幼條和醃了味的星斑柳泡油之後撈上用冰糖蒸過的金華火腿絲. 人家是加了蛋皮絲才撈的, 不過那天不知發什麼瘟, 以為家中有蛋又沒有檢查, 到用的時候才發現沒有, 因為沒有了蛋這個中性的味道, 只有將就著用多點糖去蒸金腿, 不然就會太搶, 又或者會太鹹了.

至於白玉藏金鳳就是之前看無線的一個節目後將大師傅的做法簡化後得出的.

看上去無咩顏色, 因為燈光配得不好而且的確本身都係淺黃色的. 要就返所用的碟所以好難做得太突出, 先將日本白蘿蔔 (大根)切薄片 (我真係切, 唔係刨o架...), 用薑汁雞湯蒸一小時後放涼些 (留返蒸的雞湯後用), 同時間將一隻 (如果細隻就用兩隻) 已用鹽糖胡椒花雕和麻油醃過的雞髀蒸至僅熟後拆成雞絲 -- 因為之後會和白蘿蔔一起上菜, 所以不妨落重少少味才蒸. 而且不要過火, 因為一會後還要再蒸一陣.

用一隻大碗, 先將蒸至腍的白蘿蔔薄片沿邊一路疊一路排, 排了幾層後留中間一個窩位加入熟雞絲, 之後用一隻大平碟將碗中已排好的菜倒扣在碟上, 再稍稍蒸三至最多五分鐘, 另外將蒸過蘿蔔的薑汁雞湯加生粉水埋薄芡, 淋上圍在倒扣的蘿蔔邊上, 加少少杞子或金腿茸就可以供食了. 因為蒸得夠, 所以好腍, 女王唔鍾意食硬的菜蔬都食了好多.

這兩味都是 "見得人拜得神" 的菜式. 甚至可以在做冬時節做給家人吃, 而雞亦可以改為已炆至腍滑和入味的牛腩切薄後放入再蒸, 因為牛肉和蘿蔔味道係好夾的.

11.11.11 四對新人四個故事之 - 人呢?

2011-11-22T12:30:00.000+08:00

11.11.11 的第三對新人, 是在九龍一間頗出名, 幾乎專做婚宴的酒店擺酒, 是席前行禮註冊的 .

例牌早到, 不過跑了幾場後, 有點點倦, 所以要先飲杯茶充一下電. 不過五分鐘後便回過神來了. 這時, 見到台上的靚靚新娘子望全台下的兄弟姊妹發號施令, 是好有禮貌的, 不過, 卻十分之有威嚴, 甚至, 聽下去有點威嚇.

有點出奇, 因為之前和新人開會時, 新娘是「咩都無所謂」同埋對住男友就「你話啦」的那類人. 相反, 那晚見到的新郎哥 (係個空手道教練O黎O架下...) 似乎變了另一個人, 當日好有主見的樣子不見了, 換了一塊時時在陪笑的面孔.

大概, 當日的流程和預計中有點出入, 又或者差不多去到開席了, 台下只是有五成的入座率. 可能新娘有點緊張吧.

嘗試過和新人一起做一個「軟著陸」的解釋, 請他們放鬆點, 但今回似乎不太湊效, 新娘除對我有禮貌外, 對其他人, 尤其係兄弟姊妹相當之嚴厲, 包括「請XXX 即刻到台前, 唔該」 (第一次叫咪咋下).

停一停, 如果你也是類似的新娘子OR 新郎哥的話, 唔好意思, 雖然唔係話你, 但係都請你留意以下內容...

拉了酒店的 captain 埋一邊問個究竟, 但酒店方面似乎不太知道今天的事. 而另一方面, 攝影師自己都覺得好奇怪, 因為他所認識的這對新人, 之前的溝通等不是這樣的.

呢個時候聽到台上的新娘都頗大聲問「人呢?」

指的應該是其中一位負責首飾之類的姊妹.

那位姊妹戰戰兢兢的趕來, 新娘再次好有禮但好有權威地指示去取些東西.

其實我見好多姊妹都係花容失色的, 便在新娘和新郎去了斟茶時好客氣地問三位姊妹, 她們就當天沒有任何問題, 只是去到酒店後新娘就開始擔心. 不過倒真是無人知擔心什麼. 我便以旁觀者身份讚一下她們, 明顯地, 她們的面上即刻有返笑容, 我便接口說「拿, 而家你地咪幾好, keep 住啦, 新娘搵得你地做姊妹即係信你地, 咩都好都係好姊妹呀」

或者你可以話我八卦又或者多事. 作為證婚律師不應那麼做, 正所謂「關你鬼事呀」. 但一來我未上台, 我只是一個 caring 的參禮者, 二來更緊要的, 是我只想個個都在這好日子中笑笑口的.

既然沒有什麼其他地方, 我只有想一下, 我知道今次的男家和女家長輩各自是有一點事, 唯有在此埋一埋手. 找來攝影師給個拍照次序的提議, 同時和一樣係搞到無咩笑容的司儀兄弟姊妹 brief 一下. 最後我找那對剛換好衫的新人確認這個有點特別的安排. (不過我後來知道最後衰O左O係司儀手, 因為佢地講錯野...) 新人迎來了一份放心的笑容.

不過今晚比較頂癮, 的確地仲有十分鐘便是原定開席時間, 入座率依然係得6 成幾. 酒店方面就說過多十分鐘都要準備開始, 這個我是知道的, 因為廚房要準備了. 而且那晚是有好幾場婚宴在不同的禮堂舉行, 起菜時間要十分準確.

今次真係輪到我望住個禮堂問「人呢?」喇...

但說也奇怪, 就是臨開始前五分鐘, 突然間門口好似開閘咁來了幾十人; 我想, 大概是一些賓客要趕兩場, 先去另一處做禮拍照再趕過來吧, 否則我真的解釋不了這個現象...

點都好, 開始儀式, 一切順利; 係新郎哥可能驚魂未定埋檯就坐時行錯位比較蝦碌. 到禮成前一刻, 新郎哥微笑拍一下我的右手臂, 而新娘子就回復了和善的笑容, 輕聲說「唔該晒你呀老朽」. 我知道, 這對會是對歡喜冤家來的.

11.11.11 四對新人四個故事之 - 鹹蛋黃奪命狂婚

2011-11-21T14:30:00.000+08:00

「六條一」的第二對新人已經是下午的事了. 老朽先回公司將第一對 "11.11 變了 11.30" 的新人證書拿回公司, 再和另一對新人開會後下午就再去另一個地方 - 山頂.

新人係舊同事的老友, 大半年前已經找我幫手了. 之前開會時已經準備好夾定晒, 預算係5 點鐘行禮就可以就返冬天時節的日落時間, 始終唔可以太黑先行禮嘛...

所以我就定了4點正左右會到山頂的, 話晒都係偏遠少少, 早點到穩陣好多.

就係呢個時候, 外母打電話來說家中原本駁好了視像會議鏡頭之類系統的手提電腦鬆了線, 因為那晚外父會來我家吃飯和用 Webcam 和剛完成化療等開始做埋個電療去 "執手尾" 的姨仔, 而那晚我還在證婚中, 所以一定要預先駁好 (加上始終他都有少少火爆性格, 為免他用不著電腦而趕住走會累埋外母又要趕煮飯). 唯有飛的的回家. 打算再回中環纜車站上山頂, 始終纜車係比較穩陣而且較的士平嘛, 仲要最緊要好玩呢!

不過那天似乎真的好多人在條街上找的士, 所以我竟然在 3:15 還在中環找的士回家呢...

雖然外母致電叫我不要太急回去, 她可以「搞掂」外父的, 但始終一定會辛苦了她, 所以我寧可飛的的, 請的士司機在我家樓下等我一會後直接載我上山頂還好了. 當然, 交通費是我自付的.

就是這一趕, 我差點真的 "命都無". 簡單地說, 就是因為司機叔叔知道我趕, 好畀心機的找捷徑, 而因為的士台說海旁撞了車塞住, 所以我們便「走山」經大坑道和灣仔的山路, 再去馬紀仙峽道上山. 是好迂迴不過起碼唔使塞. 不過中間經過的兩個交匯迴旋處就好多車, 有架白色的司機明顯在講電話, 明明我們行先的, 一樣照衝過來 (仲要無減速呀下...) , 好在我架的士個司機醒, 見唔對路就突然加速扭呔避過了, 雖然嚇O左我一野但係唔係的話我已經畀架白色車攔腰撞到我上另一架「白色車」了.

僅僅趕及在4:15到達, 因為司機太好人, 平日唔留卡片的我留了張卡片給司機大佬, 說如果有介紹不論係咩類型的法律業務都好, 只要講出話係車我在11.11 上山頂的司機的話一定打個折扣. 哈哈... 之不過...

上到廣場平台...

呢個時候見到人了, 就竟然係見到工作人員剛開始 set 野, 場地經理話...

「新人會遲少少, 因為塞車」

............ (無奈中...) 但係都無法O架, 自己應承了就要盡量做到. 人家遲但人地係主角, 佢都唔想架...

但係錯有錯著, 最後他們要5:30 才可以行禮, 但係竟然畀佢地碰上了可遇不可求的... 黃昏鹹蛋黃做側側地的背景, 又未黑到簽唔到名喎. 真係連個天都幫埋佢地, 所以我即場就用呢個話題去說了勉勵新人的話, 新郎哥聽到覺得好有意思, 係咁點頭, 到禮成影相時仲攬住我搭晒膊頭的; 仲問我可唔可以留多一陣, 起碼飲杯野多謝我, 不過之後一對是九龍的酒店, 已經夠鐘起錨過海才不會遲過我應承那對新人的到場時間, 所以婉謝了. 但自問發自內心的祝福, 能得到新人的認同, 我自己係比起有得飲返杯更加 happy 的...

11.11.11 四對新人四個故事之 - 11.11.11.11.11.........

2011-11-19T17:00:00.000+08:00

上星期係11.11.11, 老朽當然會出動幫朋友證婚, 當我早上十時在「面書」留言說「出發」時, 就有朋友問我, 那天發達啦, 某著名律師會為幾十對新人證婚, 搵十幾萬呀之類, 所以老朽都應該搵唔少云云...

不過, 對唔住, 我之前都講過十幾萬次, 兩對新人中間一定要相隔兩粒鐘以上架嘛. 當我收四千大元一對左右啦, 由早上 11 點開始玩到夜晚, 加埋交通時間, 最多咪只可以幫四五對新人囉. 唔係點保持我o既 "個人化私房菜" 式證婚o既承諾呢... 所以那天, 我只接了四對新人, 的確有第五對問過, 不過已經 full 晒, 對唔住, 連我另一位同事都接爆了, 所以唯有推掉...

而那天的四對新人, 就各自有一個我覺得值得分享的故事..

講返那天, 第一對新人是我一位舊老闆的老友個妹, 本身是正式讀過書的 wedding planner 的她是想先註冊, 取得一張 11.11.11 的證書, 最好是上午 11:11 喎, 之後出年再搞一個大型的 "過門加擺酒" 的婚禮的. 所以她初時就說希望在我 office 簽字, 比較簡單. 也好, 因為之後幾對新人都是下午至晚上的. 太趕也不好.

點知人呢,就係咁頂癮, 一星期後收到她一個低沉聲線的電話, 說自己好煩不知道應不應在 11.11.11 註冊. 而當時已經入晒紙畀晒政府的收費.

原來她的家人一知道她會結婚, 便通知所有親友, 又竟然有幾家人即時說要由外國飛回來參加和食飯. 而且仲話點都要有返多少化妝呀, 租車呀, 婚紗 (!!) 呀之類喎... 咪即係全部有齊...?

就係咁, 她覺得非常煩惱.

作為證婚律師, 我不需要, 也不太應該參與他們的家事, 不過那刻我的婚禮狂又發作, 所以便問她的家人是否知道真的可以在極短時間內做到他們想的安排.

又勁喎! 她竟然答說: 「佢地已經幫我搵埋叫我去試化妝同衫添喇...我都試o左衫同個化妝小姐, 都可以o既...」

又唔使有效率成咁呀.... @@"

既然係咁, 即係她本身都想繼續在那天註冊呢. 咁唔使問啦...!

好了, 到大日子, 我10點45分已經到了他們在尖東的酒家, 酒家說他們那天晚上有兩場婚宴, 早上倒真是只有我的客戶這一對. 酒家外, 已經開始有聖誕裝飾了...

因為早到, 行過隔壁是東亞運的九香酒店, 餅房賣的 mousse cake 好似雪條, 好正呢...

入到去酒家, 同時間我見到新娘的姊妹和家人到場. 新娘在打過招呼後便飛去換婚紗, 至於新郎呢...?

「佢o岩o岩先換衫再開車來呀...」

「大埔出來喎?!」

「係呀...」

我計過, 到場後簽埋行禮前要簽的聲明和幾十秒解釋程序的話, 要 11.11.11.11.11 幾乎係無可能啦... 為避免新人一陣會黑面或者有不愉快事件, 我開始要做準備工夫, 先和新娘講一下既然已經去到註冊, 而且新郎都係因為希望做好少少而去拎車加上多人婚嫁所以屴街都係車, 要遲都無咩辦法, 咁都算佢係有 heart o既之類說話. 不過自己又望o下隻錶, 都 11:00 咯, 相當唔少行家就係呢刻開工啦...

結果在 11.11.11.11.11 的那秒鐘, 我正在望著一個開始焦急的新娘子和一班姊妹 & 賓客, 心中就突然想打個電話給夫人和女兒... :p

11:15 才見到的新郎, 的確係趕到似打仗咁樣的. 濕水雞咁樣, 我第一時間梗係叫佢定o的來, 幫佢整埋條 tie, 請埋已經唔嬲的新娘出來解釋個程序後才開始. 而呢個時候, 新娘竟然無啦啦喊起來. 不過佢既然肯埃落新郎度喊, 即係唔係嬲佢啦... 又搞一輪新娘平復了, 真係行得禮喇...

這場婚禮, 我正是用 "時間" 和 "臨時出現的婚紗" 來做主題去勉勵一對新人. 原本已經忍得住的新娘, 呢個時間開始又 "來料" 了. 我當然 "見好就收", 係咁意整個感動位好喇, 進一步的感動, 留返新郎哥去做啦...! :)

盤菜醉後三分醒的宵夜

2011-11-15T18:00:00.000+08:00

上星期是母校高記舊生會成立五十週年. 早幾個月不知是哪位執委在開會時爆了一句「不如返學校 bbq 又或者食盤菜啦」.

就係咁, 四月時搞了一次新校舍的 bbq, 今次呢, 就來一個大型的盤菜宴. 地點是舊校舍. 因為是和舊生會周年大會同日舉行, 而且今年老朽正式被編入 (騙入?? XD) 舊生會的董事機制中, 所以要撐足全日, 無得陪女王玩...

今次先用了 facebook 大肆向各舊生宣傳, 加上晨早講明 "地下操場座位有限" 之類. 所以係咁意一個 call 已經有五十圍檯. 當然, 高記雖然只係五十幾年歷史, 但舊生又何止數千. 所以向隅者都唔少也.

是日下午先又開 AGM 又去新的小學校舍參觀之類的. 折騰了好幾小時, 不過我地呢o的老套怪就真係驚見而家的校舍又有呢樣室o個樣室的, 仲竟然有一間叫做 "資優學習中心", 入面有o的書所講的理論話係畀小學五年級, 但係我地一班真係聽都未聽過... 間直係變變地態...

回到舊校舍, 又係參觀一輪後大家自由匹圍行, 又o係度講o的已經講o左幾十年, 但係大家聽起來親切得很的老作鬼故. 最後就係齊集o係大禮堂唱校歌和聽舊生會的匯報. 那種幾十年的震撼, 仲要見著一班漸漸老去, 有些連行都要人扶的老師和校長一齊唱校歌時, 真係眼都濕埋...

好喇, 卒之食得喇, 和一般打盤一樣, 幾乎所有檯都係食唔晒個盤的. 講真丫, 有邊個真係好旨在食晒個盤丫. 目的咪又係見o下面吹下水咁. 聯誼聯誼... 我地呢屆三檯人最勁, 其實埋檯的都係得廿人但係帶了8支酒, 老朽就一如既往專帶偏門野, 今次除了無飲到的一支 Lascombe 外, 就係一支 Taylors 的 Vintage Port, 係 late bottle的 2005 , 因為是 late bottle, 所以已經比較成熟, 開始有層次, 唔會得味甜, 也可以即飲. 最正係, 上星期友人翡冷翠小姐公司試酒 promotion, 只係唔使兩舊一支, 邊度搵!!??

而就係呢支酒, 我拎去四圍搵其他師兄弟「呃酒飲」, 竟然被我碰上了當晚的「神之水滴」-- Armagnac 1971. 亞曼邕係絕對可以和干邕齊名, 而且可以合法地以年份生產的醇酒, 就是一位1971年畢業的師兄帶來的. 我有幸用半杯PORT 換了一小口的「神水」, 簡直係覺得如在天上. 未試過的, 好難形容他和一般靚 Cognac 的分別呢...

亦因為咁, 那天晚上, 我係飲大了少少, 雖然不算是醉, 或者只是和一班老友們傾到醉醉地吧, 反正都夜了, 女王和夫人都一早睡了, 回家洗個澡已是一時多. 或許是之前大家根本無心食盤菜, 這時竟然有點點肚子餓的感覺. 記起日本人是有吃 soba蕎麥麵解醉意的, 便逕自弄了一點點來, 加上早一天買到, 好久沒吃過的醋醃鯖魚吃起來, 飽飽的才去睡, 雖然不健康, 卻好開心, 好平安... 哈哈哈哈...

「邊位呀...」

2011-11-14T19:20:00.000+08:00

實在係勁正, 唔寫唔得.

話說老朽一直都未收過玩人兼巳呃人的電話, 上星期卒之收到一通來自內地手機打出的電話. 來電的是個中年男人聲的人.

老朽委實是沒有內地的親友, 唯一有機會致電的的內地人士是一位客戶的agent, 不過是個女的.

「喂, 我呀!!」中年男人的聲是頗輕快的

「喂... 邊位呢?」

「我呀! 仲認唔到」

唔係我醒, 不過真係無內地親友, 所以呢個時間我已經知道呢條友係玩野的騙子, 但腦中即時轉動, 有咩方法可以玩返佢但係又唔會好激呢... 因為呢O的人一畀佢知道你已經知佢係騙子就會收線, 懲治唔到佢的. 唯一方法係累鬥累. 既然都唔可以點懲戒你, O徙下你電話費都好, 橫掂我千幾二千分鐘用唔晒.

記起舊公司有位同事的聽電話聲係"死唔斷氣" 的問 "邊位?" ,心中忍笑開始扮佢.

「邊位丫?」

「喂我大陸打來喎, 仲認唔到?」

「邊位丫?」一模一樣的死聲

「咁都聽唔出?」 (明顯地佢開始上當)

「邊位丫?」

「... 有無搞錯, 講極都聽唔到」

「邊位丫?」

如是者, 呢個蠢到發瘟的騙子竟然畀我問了不下二十次 (定係三十次? 已經忘了!) 死唔斷氣聲的「邊位丫?」 !!

...「邊位丫?」

「邊你老母呀!」咁耐先知, 輸O左啦你!

「你卒之覺悟喇? 大家咁話啦!」

窩心的服務

2011-11-08T20:13:00.000+08:00

做服務性行業的人都知道, 要個客開心的話, 態度和對人的第一印象是極之緊要的.

不單是說我們做監禮律師的, 而是一般性而言.

上幾星期我新的 Android phone (HTC) 壊了. 想找個地點拿去修理, 找來的盒子上寫著個電話號碼, 說是上門收機維修.

一見到這些所謂好服務, 其實心中都會打個顫, 因為多數都係要你等返三幾日才生安心的. 所以一開始見到有人接電話時我已經打算問可不可以自行交機去維修中心. 但問了幾句後, 得到的答覆竟然是「你拿來和等我們來修, 時間一樣」

聽起來我就以為是他們就算等我交機, 也一樣係等. 點知..

「一係咁啦, 我安排人來收機, 其實都好快, 我下午可以有人來了」

哇, 係咪堅O架...!?

姑且信他們; 到下午, 果然是3 點已經有 Local 速遞來收機, 仲有 service centre電話打來問他們的服務是否令人滿意咁. 咁體貼, 就算真係架機用幾個月壞, 都已經嬲唔落了.

收機時係星期五, 他們說星期六不辦公; 但神奇的時再次發生... 之後星期一下午我帶著後備電話出去工作, 到下午 5 時回公司時, 竟然見到呢個盒放在我檯面:

service 快已經係喜出望外, 仲有個咁抵死的盒, 感覺就真係好窩心了.

其實 service 就即係機壞才會有的, 但是他們能夠將客戶的失望用同理心去使人覺得安慰, 這個就是他們的辦法. 任何行業, 以至於任何人, 其實只要用這樣的心去做野的話, 畀心 complain 的機會一定大大減少.

呢O的咪係有 heart 囉!

女王領洗

2011-11-03T19:22:00.000+08:00

相當高興, 搞到女王三歲了, 終於成功讓她去領洗.

為何說 "成功" 呢, 就是因為來自我爸媽的小小阻力. 其實可能大家都知道, 我爸是沒有正式被通知我已經一早在大學時領洗的. 因為對於一個其實未真正可以放低 "貪嗔癡" 的佛教居士來說, 個仔同埋個孫要領洗就差不多說是 "日後死o左無人拜" 一樣. (well, 其實我問過神長天主教義是容許拜祖先的, 不過只會用香, 亦唔會叫祖先 "保佑")

卒之都係要用 "入學" 呢招, 最初我母親大人仲正, 話 "我個孫咁叻, 使鬼靠張領洗紙先入到教會學校咩!". 死未! 係到左佢都聽其他去幼稚園一起接放學的家長講起, 才知道有教友身份入學真係 "有著數" 才叫得佢地聽.

天主教會中, 為小孩的領洗是可以在四歲之前舉行的, 之後要領洗的話就要先聽道理學習教理了. 當然, 剃孩領洗後也需要在四歲開始上主日學和學習教理. 這個是我們身為天主教父母應做的事.

不過, well, 比較可惜的是, 夫人是個無神論者, 這個對於我來說比較麻煩, 起碼, 星期天早上, 她會想睡得多一點, 我就要一個人湊住女王, 要上教堂也是一樣, 所以搞到好多時都會遲到, 甚至是遲到成半小時的也試過. 有時, 真係覺得幾辛苦. 不過女王在教堂倒十分之乖, 無論聽唔聽得明都好, 只會細細聲和我說 "有點悶, 想出去玩..." 而不會吵鬧. 有時我會指給她看其他小朋友, 她又會靜下來. 乖乖地等到領聖體後的小朋友降福禮, 又會跟住其他小朋友一起出去接受神父的覆手. 之後就會好開心.

說回領洗, 做父母的原來和找來的代父母 (是教父/教母) 一樣是要聽完Talk 才可以讓小朋友領洗的. 就是教父母如何可以做個好的公教父母. 當日, 原來不只我夫人, 其他同期送小孩來領洗的父母當中也有不少是只有一位是教友的, 另一個就好明顯o係度打瞌睡...

其實領洗只是一個好快的程序, 但卻是教會內所說的「入門聖事」, 是七件人可以領到的聖事之中, 最初最基本的 (其餘6件是堅振, 神品 (即當神父修女執事等), 修和, 婚配, 傅油(病人聖事, 前稱臨終聖事)). 所以都是十分隆重的. 我們就是怕女王驚驚倒水落頭度. 所以之前試過幾次在家中「綵排」 ,結果成功訓練到女王唔驚, 仲識大大聲話「我唔驚倒水落頭O架!」

代父找來了教堂中的禮節司, 是我老友, 也是教堂內合作搞活動多年的伙伴. 一般上女仔係唔會找代父, 男仔唔會找代母的, 說是怕日後真係「有少少鍾意左佢」的話就煩. 不過如果年齡上差距大, 又得神父批准的話就可以了.

聖名方面, 如果看得此 blog耐的朋友都會記得, 女王英文名是 Petrina, 是用她出生的六月的主保聖人之一 St Peter 的拉丁語版本 Petrus 再轉為女性版, 也因為 Petrus　也是我愛的紅酒皇的名稱, 所以就採用了 Petrina.

十分感恩和難得, 到領洗前一天, 一直對女王領洗尚係耿耿於懷的家父突然問我「明天幾點呀, 我都要睇個孫領洗O架喎!」 (前一個星期才問「你同個女領洗都係等佢入學架咋喎可...?」) 仲一齊來觀禮, 又影N 咁多相同video. 女王見到佢地都不知幾開心. 亦都更加乖.

穿上領洗後的「白衣」的女王... :)

搞一大輪又有教堂和我一起作戰的攝影組師兄幫手影更多的相, 仲有相熟修女無啦啦來了, 送了一隻祈禱中的小熊公仔, 女王都不知幾鍾意.

當然, 完美的一天, 就梗係要食餐好o既, 既然都幾個月無去鏞記, 咪就去食返次, 唔係驚下次同客去的話, 班伙計唔識我呀... ^^

富家粵菜

2011-10-28T14:20:00.000+08:00

中秋節後距今天都成個月有多, 其實在九月尾轉工時節我還和一班中學的 "老死" 約了幾位恩師吃個飯聚聚舊. 而地點就選了灣仔天樂里的「富家粵菜」. 因為都一段時間無食咩好野, 來一次大堆頭的大家食一堆肥死你的, 也不為過吧...

因為要找個可以泊車, 又可以一班人自由點, 最好有間房仔, 而且又不想和之前食過幾間重覆, 所以找了做餐飲雜誌的老友問問, 為我們安排了富家.

又咁O岩撞正以前中學老校守夜之後一晚, 一班人見完一晚之後又見. 但就好像在學校時一樣, 大家有著說不完的話題, 可能是太久沒有和恩師見面吧...

當然, 菜式豐富, 不失矜貴之餘也不讓人覺得豪奢是富家的特色, 也是老朽欣賞他們的地方. 師傅程哥和他師兄基大師都是楊貫一大師的入室弟子, 先別論我對楊大師部分經營手法是否認同 (不是說大師的主店, 而是他集團其他未號, 行內人或者有部分會知道), 他的功藝和推動粵菜的熱忱係無可置疑的, 而他的真徒亦身懷絕技.

當晚菜式有...

四小碟: 酥炸金菰, 脆皮茄子, 油泡肚尖和燒焗鴨胸, 當中金菰最得人歡心, 而老師中現已轉任考評局高官
的 "包大人" 就對脆皮茄子讚不絕口, 仲話自己食咁多年茄子今次都算係極品云云.

爵士湯 - 只記得係用蜜瓜加入去煲, 但今次的爵士湯係咩 "底" 真係忘掉...

鮑汁鵝掌伴菜膽 - 鮑汁一向係 "楊家將" 首本, 用來伴咩都正O架喇...

蜜汁煎焗金蠔 - 大蠔先吊乾一晚後上蜜汁煎焗, 有點想不到9 月時節竟然有咁大又juicy的金蠔. 一人一隻都好夠, 但係係值得拍案叫絕的.

陳皮骨兩食 - 酥炸陳皮骨係程哥兩師兄弟的傑作, 食極都唔厭的... 兩食就係一邊係乾炸, 另一邊係上汁兜勻.

鵝肝醬釀鮮鮑魚仔 - 此乃係一道工夫菜, 其實鵝肝醬 (而且不是純鵝肝) 和鮑魚仔不貴, 但菜式有貴氣之餘好味又食得出成擔心機.

紅燒花尾疐 - 沙巴來的 (可能係龍皇熾哥的魚場吧...) 只要了少少尾, 寫菜時早已知悉, 因為已經好多菜式所以雖然明知他們做得好吃也不敢多要.

頭抽豉油雞 - 他們用的是著名的大孖生抽, 似乎呢度做得比師兄新加開的店 "富嘉閣" 來得更有心機. 上次食富嘉頭抽雞似乎浸得過火, 上色去得太盡而又有少少硬. 今次呢度做得好滑好香.

古法蝦子柚皮 - 唔使講, 又係工夫菜. 不過呢個時候大家開始有點飽...

魚湯浸青蔬- 用了白菜仔, 都要有菜到肚先得.

鮑汁蘆薈麵 - 每人細細碗, 係好彈好彈的. 不過呢個時候真係飽到飛起, 食了半碗已經定了鏡.

單尾一人整返碗蛋白杏仁茶, 雖然無特別驚喜, 但卻係畫龍點睛的一筆, 食完傳統老式粵菜硬係覺得佢好過紅豆沙好多...

是晚大家都比較 "收歛", 十幾人只飲了五支酒, 包括我帶去的 "意大利 "神酒"" Vin Santo...

不過席間無啦啦有人突問其中一位恩師 "豪哥" 「敢唔敢爆粗」, 豪哥不知是否兩杯黃湯到肚, 大大聲爆了個粗口字出來, 雖然大家都拍晒手掌, 唯獨係以前教中文的包大人一個趣怪表情, 不知是真君子還是假道學, 只是有人代了他爆粗而苦笑了...

四個婚禮一個葬禮...

2011-10-26T08:45:00.001+08:00

對於一些 "走慣場" , 又或者一天行幾轉的監禮行家, 讀罷這文章後或者他們會嗤之以鼻. 不過為我來說, 要用心一天來 "跑四場", 都幾富挑戰性...

在新公司已經坐定定, 不過比之前忙幾倍, 因為 "顧問律師" 呢個名, 可以話係僅次於"老細", 即係咩都要自己落手落腳搞, 因為始終係和師兄的寶號對分, 所以 "多勞多得"; 但亦因為咁, 而且加上舊秘書暫時未會過來, 新地方又未安排正式的秘書給我, 所以好多事濕濕碎碎的都要自己處理, 好在不同科目的 file 都有不同的同事幫手, 不致亂晒籠.

而上兩星期就是有新人告訴我是下半年度最好的週六, 原本是兩對新人找我, 後來又一對, 又有姨仔老友 refer 一對，　共要為4對新人證婚. 呢個已經係我的極限了, 因為為免遲到又或者造成不公平, 我兩對新人相隔都會超過兩個小時, 而當天分別是...

早上11時去淺水灣, 下午2時在跑馬地酒店, 下午 5 時去旺角, 和晚上7時半在中環.

再密一點我怕就會不能夠像我應承新人說的貼心服務了. 因為太多工作, 就會當成真的只為工作, 那種為新人著想的心, 點都一定會差少少. 所以早幾個月第五對打來的新人就和第一對撞了時間, 幫不了.

一早去到淺水灣, 新人都係剛剛到, 馬上 briefing 後, 個天竟然落了兩滴雨, 那對是外國回來的新人都呆了一下, 因為他們回來時和我開會, 說過最擔心的就是會不會下雨... 不過好在, 雨只是下了十分鐘就停了, 之後仲出埋太陽晒住, 碰巧他們在外國影的結婚相簿有一句和天氣有關, 非常有意思的一句話, 我就用了來說我當天為新人的第一段祝福. 這是新人之前意想不到的, 禮成後猛捉住我對手唔畀我走要我食埋, 雖然他們的父母都係在他們的界別中頗具名氣的, 留下大概都會派不少名片, 不過因為應承了另一對迎人, 所以多謝一聲之後都係閃人.

出到跑馬地都差不多十二時了, 食返個雲吞麵後又去下一度, 而因為我一向都係像戲行的做法 -- 飽吹餓唱-- 就是在證婚前不會吃太飽, 哈, 好在咋... 唔係的話就分分鐘會眼訓到唔記得提一陣個新郎的哈碌野了...無錯, 就係上一篇提過, 佢拎了自己的戒指想幫新娘戴!!

不過除O左呢個哈碌外, 個場就真係幾正, 第一次來這地方證婚, 那酒店的BAR 係好COZY 的, serve 的小食都精緻, 雖則我唔會食, 不過都用手機影低, 日後開PARTY 時可以試O下整丫嘛!! 個場內有不規則的流水, 像是護城河的繞著, 好靚, 好型. 不過因為半露天, 又係廿幾樓, 所以太大風, 最後... 大風到連匝住的證書套都吹走了...唯有將後備那個拎出來用... 既然真係咁大風, 就用風和飛機 (新娘剛由北京飛來) 來為新人說一些鼓勵的說話吧! @@"

呢場跑馬地, 係遲O左開始O既, 好在第三對新人係5 點半, 都仲講得切, 而呢對就O係太子的酒樓, 新人係我朋友介紹, 她是另一對兩姊妹都係我證婚的伴娘; 佢仲一次過介紹兩對新人來找我, 不過她自己呢, 聽聞未有耐結婚喎...

都咪話, 呢對新人一樣係遲了開始, 而且行禮後我都已經開始覺得幾倦... 話晒都係香港九龍一日遊嘛! 所以都爭取少少時間回公司坐一坐, 養o下神, 兼為晚上在中環的新人準備一下.

晚上的那對新人之前已去了峇里行禮, 不過無簽證書 (佢地話O架...因為長輩都去了峇里一齊玩, 想佢地回來先擺酒簽證書喎!), 所以就等到今晚了. 仲有他們在峇里的相和片段睇, 又係好靚哦... 而且兩家的長輩睇得出都一齊玩到癲晒咁. 好少可有咁好玩我老人家, 連 bbq 都夾晒龍蝦影晒相咁. 但就被我在片中留意到一個細節, 就係新人其中一張相身後面的雲彩 -- 係攝影師口中所謂的 "耶穌光", 好靚...

證埋呢對新人, 功德完滿之餘, 我相信大家都試過, 投入工作時完全唔覺倦的, 到稍稍靜下來才發現自己對腳堅係倦, 而且心中其實都好掛住夫人同個女o既, 拿拿聲去 ifc 的「鮨禮」, 飛撲去找佐佐木和漢哥兩位搞笑板前食個 "特快心靈壽司餐" (名係我亂蓋的, 因為我喜歡食住和板前傾偈, 但今晚又要食得快), 飛的回家...

不過回家後畀女王一見到就話 "你成日都唔見O左O架... 好掛住你呀爸B... 我同媽咪同姨媽去玩具反斗城玩你又無得玩... " (佢想講 "無得同你玩" 但係講得唔清楚, 三歲咋, 仲想點?) 聽到有少少心 UP! ><"

另一樣有點可惜的是這天本來是我母校前校長的追思彌撒, 但工作關係到不了, 只有在乘車時自己心中祈禱, 也在想, 大概, 老校有我呢個學生, 都唔會好丟架吧...?

哈碌... (II)

2011-10-20T08:46:00.001+08:00

上一篇提及那對基督徒新人已經結o左成年婚喇, 亦介紹o左五六對朋友給我幫手, 其中一對係上兩星期結婚的; 那天係星期日, 主日, 我應該是帶埋女王一起回教堂的. 不過因為夫人唔係教友, 有時佢真係會闊佬懶理的由得o的時間過, 所以有好多次都搞到我和女王回到聖堂時已經開始了講道, 按教律我係唔可以在該台遲成咁的彌撒領聖體的.

咁同我哈碌有咩關係呢?

那個星期天就係其中一個我去唔到教堂的星期天. 所以我想在傍晚為新人證婚後 (在香港島區) 趕及在 6 點半聽跑馬地聖瑪加利大堂的 mass. 那對新人無遲到, 不過個樣就好趕, 細問之下原來他們那朝 "甩轆" 所以全份 rundown 都遲了.

我 "甩轆" 的意思是, 他們的花車, 真係行行o下甩o左個轆! 而且架車被拎去整的時候, 才發現車上有件無人認領的 "小行李", 那天後來, 新人同埋兄弟姊妹到酒店喇, 大家才猛然醒起...

那個係化妝小姐個化妝箱呀...!

時間已經只係o岩o岩好, 不過好在介紹我給他們的那位舊客 (即係那對基督徒) 是新人的兄弟團 "團長", 亦係一位好細心的男士, 平日唔聲唔聲咁, 原來做起事來真係又快又準.

那天新人的行禮時間為下午5時半, 理論上剛好可以讓我趕及在6時半去到跑馬地的教堂聽當天最後一台主日彌撒, 不過到了5時正新娘的化妝箱才剛剛到場, 所以九成九不會準時的了. 當然, 我一向也有預計這情況, 只是當天我自己未去教堂, 硬係覺得未做完當天的事一樣.

到5時半, 新人都剛剛準備好 (化妝小姐好厲害!), 我便完成了briefing, 同時向新郎提出 "我好似未收費o既...". 呢個時候新郎拎了封利是出來, 我便收下了.

禮儀是相當順利的, 我見時間只是 6時正過一點點, 便飛的去教堂. 去到差不多彌撒開始, 才慢慢想到...

點解頭先封利是咁輕o既...? 拎出來一看...

五十大元.

的士就在此時到了教堂門口, 我自己失笑起來, 我想大概司機以為我是傻的.

哈, 原來新郎係聽唔到我提佢費用的問題, 當時佢只掛住 "畀多封利是先..." ; 當晚我都幾硬著頭皮打畀新人留言 (明知佢地一定聽唔到電話o架喇), 第二朝電話已經響起. 是新娘, 因為她本身是基督徒, 所以聽了我 "趕去教堂唔記得收錢" 的原委後笑到收唔到聲. 當然, 之後廿四小時內, 現金到手.

講開哈碌, 提一提新人, 上星期證了一對新人, 唔知點解叫極都係拎自己隻戒指幫對方戴, 一路提一路拎, 係咪真係緊張成咁呀大佬...

哈碌...(I)

2011-10-13T08:31:00.001+08:00

新人會哈碌, 而監禮證婚的律師, 有時都會哈碌的 (話完全無就呃你o既!), 不過老朽的哈碌多數都係無跡可尋, 又或者補到飛的, 唯一一樣比較滴汗的, 就是之後會講的其中一單.

先講新人哈碌丫. 上幾個周末, 開始踏入秋季的結婚旺期, 某周末連續兩天都幫朋友證婚, 星期六就係一早入大埔為當時東亞運義工朋友監禮, 佢地係一 pair 好好玩的新人, 新郎也是個好細心的好仔 (唔係都唔會不斷去做義工啦...). 他們的婚禮有兩個要點: 1) 要好玩, 新郎唔會著禮服, 而係著一隻新娘好喜歡的卡通人物裝. 2) 在大埔海濱公園的劇場行禮, 比較頂癮o既係佢地無擺 cocktail 或擺酒, 只有飲品, 基本上係一個相當慳家的婚禮.

一早已經和新人開了會, 雖然我們有項守則說是婚禮需要新人明白是「莊嚴的, 而且婚姻亦係有其莊嚴性」, 不過我深信呢位義工朋友, 正是因為明白婚禮和婚姻的莊嚴, 才找出女友最喜歡的卡通人物穿上身 -- 你估 9 月天時, 著到咁款好疏肝咩...

一切準備就緒, 老朽亦如其他新人一樣, 早大半小時到場, 仲和一班當年的義工友仔係咁影相. 點知...

就到行禮時間, 主角仍然 "在大埔塞緊車". 最後夠晒鐘才到, 不用說, 婚禮推遲了大半小時才開始.

唔係我晒命, 呢個就係老朽點解一般都會收得貴少少的原因, 因為新人遲到, 我一向的做法是兩對新人的預定行禮時間, 會隔超過兩個半小時以上, 如果我隔得少時間, 而有另一對新人排在後面的話, 那第二對新人就會被第一對新人累到了. 這個對他們會好唔公平.

好在攝影師係見過好多次的老友, 新人請回來的司儀亦相當 pro, 大家都合作得非常好, 所以大家都開 turbo 幫新人 prepare 好晒. 婚禮連影相亦僅僅在要交場前完成...

時間上哈碌反而係小事. 更好玩的兩款哈碌, 分別係...

1) 早幾個月幫一對年紀比較大的 "老新人" 證婚. 行禮前一刻那位年近古稀的新娘突然好心急找我:「死喇律師, 我唔記得帶戒指來呀! 你有無後備戒指可以借畀我用?」

~~ 「後備戒指??????」咪玩啦... 我開兩罐汽水畀個拉環你用好唔好...

當然, 其實交換戒指並不是法律上要求的環節, 無呢, 係完全唔緊要的.

2) 為一對基督徒在感恩聚會中證婚, 可能係新娘太投入唱詩啦, 到了簽紙一刻無啦啦望住我, 說...

「死喇律師 (都唔知點解o的人咁想律師死...), 我... 唔記得我自己個簽名呀...」

好在老朽唔知幾時開始鬼拍後尾枕, 每次都會帶一張新人的擬結婚通知書副本上台 keep 在底, 上面正是有一對新人的簽名樣式, 當然係神不知鬼不覺的在檯面 "跣" 個 copy 畀新人照抄啦. 而呢個情況, 竟然都發生過三次o架呀... (即係以老朽證二百幾對新人來說, 大約係 2% 左右...)

新人哈碌完了, 下一篇講o下, 我自己的哈轆...

一個好人...

2011-10-05T04:30:00.000+08:00

在舊公司處理的案件中, 早幾個月前有一單疑似工傷案件，由我的客戶 "彈" 過來，指明是有點古怪，懷疑是那傷者自編自導的「一台好戲」。說是一位臨時工在某地方 "自行倒下" 之後就控告僱主。因為那間酒樓當天是舉行宴會的, 有幾十位同事看著他自己倒下，而且躺在地毯上扮跌倒，誇張得要命。

老朽一向有做工傷CASE, 而且當年學師是就是靠這門專科"起家" 的。好多古靈精怪的案都接觸過，亦因為我有代表原告和被告雙方，所以見的人就更多。有些原告是連自己的律師也欺騙的，我也曾碰過，遲點有機會再講。

今次就奉客戶指示去找那班同事取資料，其中有一位特別好人的部長，傾談之間覺得他有禮之餘還橫有正義感，後來我問完他取資料準備一份陳述書，還約了他之後見面簽名作實，豈料在臨簽名前數天他同事打電話來，說他開始放病假。再問他何時回來，得到的答覆是「好難講，可能以後都...」

見他們支吾以對，我都知不妙，因為酒樓經理都是傾得之人，多問一句下才知道原來是肚子痛，跑去看一輪醫生才知是肝癌，而且已經是尾期 (第四期)，雖然沒有擴散，卻有十多CM 大的一個腫瘤。

後來再有機會約到他，因為當時客戶也希望在他還在生時可以取得他在陳述書上的簽署，雖然我覺得似是騷擾病人，不過因客戶和當時老闆的指示，所以我都照做了，沒想到竟然見到一個活生生的生命鬥士的故事。

約到這位部長已經是8 月的事，他告訴我一星期前根本連說話也有問題，不過總算捱過一輪治療，癌腫是縮小了。他才道出另一件事-- 原來他年紀才剛40 開頭，太太30多歲, 本來有個大女兒，去年底就剛添了一個小寶寶，不是這個病的話，他們一家倒應該是值得羨慕的，雖然父親工作未必帶來好豐厚的收入，卻應該是個小康。

酒樓同事說過，他在病發初時極度低落，不過就是因為家人支持，而家中的長輩都來照顧小朋友們，加上在病人組織的協助下，他開始明白自己要如何面對，所以初步應該是有點成效的，始終，癌科的病都有個奇怪的共通點，就是「愈低落，愈墮落」。

老朽之前有朋友的父母也是罹患癌症，後來在內地的醫院接受治療，中西醫合璧，算是末期和已經擴散多處也有進展，還 "續命" 好幾年，既然有機會見到人，雖然不知道應不應該, 又或者會不會有任何幫助，但最基本作為一個人, 正所謂上天有好生之德丫嘛. 當下便打電話給那位老友，介紹了給這位部長，真的希望他能夠吉人天相，起碼都睇到個仔慢慢大個丫...

銀鱈魚西京燒

2011-09-30T02:43:00.002+08:00

夫人至愛的食品之一, 就是銀鱈魚西京燒, 一直都想整, 不過提不起心機; 卒之的起心肝去看一些網友的 blog 和日本 yahoo 的食譜, 先是參考了 jubie 和 kristy 網友的大作, 再自己試味後做一次...

第一次整的時候, 糖落少了三份一, 即刻變得好鹹, 而且可以因為只醃兩天未到, 內裡位置比較腥, 和看起來的吸引 look 頗為不同.

做得不好就要學, 走去論教悅壽司基哥, 說是要加隻蛋黃一起醃, 而且一定要醃得耐, 起碼 2日至4日才會好味.

最後我的 recipe 就係...

信州白麵豉 5 湯匙
清酒 4 湯匙
味醂 4 湯匙
白糖 5 湯匙
加入一隻蛋黃

將清酒味醂煮熱, 在滾而未未滾之時加糖, 溶後趁熱打入白麵豉, 醃魚 2 日以上. 之後抹走積在魚面的麵豉, 用焗爐開 170 度燒 12-15 分鐘.

發起癲上來, 買了幾款不同的魚來試...

智利雪花鱸魚: 味好o岩喇, 完全無腥味; 不過肉略略唔夠滑 (始終唔係真的鱈魚嘛), 皮亦唔脆.

美國銀鱈魚 (英文就叫做黑鱈 black cod 喎!): 味可以, 比較鹹o左少少, 因為係魚尾所以比較易散, 不過就好滑. 一點也不腥.

仲有挪威銀鱈魚... 以為會幾滑, 但原來都幾鞋口, 仲有少少實肉, 呢款就真係似係用來做馬介休那款了...

最後幾次卒之真係似返出面日本料理的形象. 算可以交差給太太試食. 不過有部分位都係鹹得滯. 要再試...

終於開獎...

2011-09-29T05:10:00.001+08:00

簡單地說一下.

因為已經知道「此地不宜久留」, 所以好早已經開始有放一點風, 不過今次竟然唔夠快.

被大老闆急召, 原來各老闆已一早準備好, 就等我決定 --- 遞信. 唔係的話就等郁.

來得比我想像中早幾個月, 聞說是因為公司要搬去一個細點的地方, 縮皮所以乘機郁人.

唔使多講, 即遞啦. 都係遲早的事. 從容就義, 反而一樂, 秘書亦已決定不會留得太久, 幫新的律師只會幫到搵到工為止. 至於其他同事, 真神假鬼都好, 反而替我感到有點不值, 暗地都說老闆們太絕情, 做了十年都一樣落得如此下場, 又說我為他們找客之時又唔見佢地咁o既咀臉云云... 仲提點了私人聯絡方法日後大家交流一下, 什麼 "要幫手或者有問題研究下的話即刻找我" 之類話, 不絕於耳, 不過倒是聽得出當中起碼有三成係真心的.

新地方已經有了, 會以 consultant 顧問形式出現, 當然, 自家生意是重要的, 但更緊要的是, 會無o左跑數壓力, 呢樣係抵晒的; 亦因為已有著落, 所以各新人無需擔心, 不過我想放自己一星期假. XD

呀, 唔記得講畀舊老闆知, 我其實上星期剛接了一位富豪太太委託, 有幾十個物業放售又買入咁, 一半以上係豪宅, 物業共市值呢, 唔太多, 五億幾啦, 去新公司的話, 分到的佣金多過舊公司 10%. 舊老闆你地咁掂, 呢o的客你唔志在o架喇可? wakakaka... XD

書於 2011年9月29日凌晨5時, 剛掛八跑風球 -- 第一次覺得掛八號 "唔關我事", 哈哈哈哈!! :P

你叫咩名 & 你簽咩名

2011-09-21T18:30:00.001+08:00

在不斷的證婚當中, 每年總有一兩次見到一些見都未見過的名字.

名未見過不打緊, 連寫都唔知點寫, 甚至連電腦的所謂香港造字集都無的, 竟然也不在少數.

更抵死的是, 這些大名都是在新人的香港身分證上見到的. 那就即說, 政府是可以打到出來 (唔係又點整身分證呢...), 但係我就找來找去也找不到. 有時唯有問一問新人 "其實你個名點寫", 往往連他們也不知道原來自己身分證用的是怪字又或者係別字, 那既然如此, 我就曾試過搏一搏打最普遍的字, 但入境處負責審閱的 sir/dam 又點會放過我呢... 多數都會被 "發現". 之後就會有張 note 提醒我們在準備正式的結婚證書時要用回那些怪怪的字了. 因為, 結婚新人的名字, 是必須和身分證或自己國家護照完全一樣的. 連錯, 也要錯埋同一度. 都無可厚非.

呢樣都算喇, 但係當我問相關官員/主任時, 又支支吾吾的唔肯將他們的輸入法和造字公開給我. 即係話, 要你用呢個字, 但係又唔畀個字你. 好有禮地話 "無咁o既規矩" 喎...

和 IT 同事找了好一會不同的輸入法, 也是徒然; 唯一的解決方法就係自己用 windows 的造字程式出來.

十分佩服負責的同事大雄和我那位摩打手秘書, 不論新人的名字寫法有多神奇, 他們通常在半天之內就可以造出那個怪字, 而且看起來和身分證上的那個沒有兩樣. 而且他們我觸覺不比我差 (有時比我更勁), 好快可以發現一些極細微別字或者寫法的錯處.

不過, 我依然係相當不解, 為何有現成的字不可以用, 而要我們自己造呢...?

名用錯字, 一入擬結婚通知書就會現形, 倒話仲有得救. 結婚證書上簽錯名就真係神仙難 "掹". 多數簽錯的, 都是長輩或見證的老人家, 雖然都算罕見, 但數百對新人中, 倒也發現三幾次的. 試過是當場指住都可以錯的, 不過又咁, 通常呢, 指住請佢簽正本先的話就多數無問題的. 因為o岩o岩指完丫嘛. 不過呢, 到簽份 duplicate 時就有時指都指唔切. 真係兜野就簽o左落個仔/女隔鄰 - 又衰o既, 新人簽個位特別大, 而見證人簽個位又鬼咁細仲要打埋名, 仲細多o的呢...

呢個時候, 你係監禮人的話, 你會點做?

唔使估喇, 一句講晒 - The Show Must Go On!

第一時間, 自己要先 "扮無野"; 自己要說服自己 "呢o的好平常o者! 一來又唔係自己錯, 二來呢個世界係無野唔可以補飛o既, 又唔係瓜o左老襯!" (當然係內心自己同自己講啦), 之後即刻要安撫睇佢個樣都已經知道好驚嚇中的新人, 一句 "無事o既. 我幫你拆掂佢, 定o的來" 已經夠.

咁即係點先夠呢? 幾個做法啦... 視乎不同情況. 如果正本無錯的話, 而老人家簽的位又唔係太太太離譜, 可以照去馬, 之後由律師打電話去畀入境處補飛, 不過多數要補多封信去解籤o架喇.

當然啦, 如果連正本都衰埋, 咁就真係無得救, 禮成後就唔走得住, 拉新人埋一邊講o下即日補飛, 有需要的話就要問新人介唔介意畀程的士錢, 即刻回公司幫佢整過份證書晏o的回來靜靜地簽囉... 咁又唔係個律師錯 (如係律師無提新人 or 見證人的話就抵死, 自己畀啦唔該, 雖然呢個情況從未在我身上發生過). 呢o的有時呢, 時間上係蝕桌o左少少o架喇. 但係有時唔計得咁多. 新人又唔係想o既. 人家辦喜事, 呢o的野, 幫得咪幫o下囉. 收佢三幾百附加費又唔會發達o既, 而且仲分分鐘搞到佢唔 like 個老人家, 又於心何忍呢...

溏心風暴...

2011-09-17T01:00:00.003+08:00

好耐好耐之前, 屋企有o的好細隻的乾鮑 (出處不明), 基本上一係用來煲湯, 一係浸o左就咁用來炆, 叫做有鮑魚仔食o下咁. 真正做燜鮑魚對我來說係一件好 "神聖" 的事.

係去年唔知發咩神經, 在相熟的藥材店飲涼茶之時, 見到他們有同事在刷鮑魚的霉 (唔多唔少會有o既), 就順手問一下吉品的價錢, 當時 36 頭只係 4000 元左右, 我見都靚就買了半斤, 如是者有時又買少少咁, 朋友結婚過大禮想買我又要半斤, 家中便有數斤的 30-36 頭吉品. 不過都係唔敢買大隻的.

係到海嘯後想搵喇, 就真係貴到死, 亦因為咁, 我索性把心一橫, 買了些比較大隻少少的 20 頭南非網鮑, 都係 2200 大元一斤, 趁上星期中秋節先煮半斤 (11 隻左右), 不過加埋o的料都好多, 因為我用明火, 所以要買個大的砂鍋.

看過不少書, 又向相熟的海味業前輩查詢一下, 又向阿一其中一位高足程哥 (遲點再介紹他) 討教, 都說南非網鮑要比較耐火, 也和一般燜東西一樣是用 "停, 打, 停, 打" 的方法.

乾鮑先浸普通水過夜, 等佢慢慢吸少少水.

十小時後再煲滾水, 煮佢三幾個小時, 又焗過夜去腥; 呢個工序一般日本鮑唔使做, 因為日本鮑製得靚, 無太大腥味. 跟手剪埋鮑魚的沙咀.

之後就好多不同的方法了, 我就係將半斤腩肉切大件, 半斤肉排斬大件飛水, 放在有竹笪的砂鍋內, 平鋪一層, 之後放上鮑魚, 再鋪已飛水的雞腳 (也可以多放一兩條燒鴨頸, 鏞記做法當然是放燒鵝頸了, 甘老闆說是唯靈前輩教他的), 頂就是斬了大件的大半隻雞 (都係已飛水, 我連埋皮去燜, 貪多層油香, 有人會不連皮, 煲野出來效果就無咁 messy), 最後注冷水慢火煲. 同時間將余下的細半雞加一些雪雞件, 另外用煲飛水後煲一些清雞湯. 我先燜 8 小時, 焗 6 小時, 中間每兩三小時看一下本身的湯會否乾掉 (一般可以耐少少,但係我屋企個爐頭最細火都唔太細, 乾得快少少) 之後再加另外煲的雞湯 (加滾水都得o架, 但係我加滾緊o既湯會好味o的囉).

焗完後又煲 6 小時, 焗 4 小時左右, 最後再煲 3至4小時, 焗 2 小時.

到食之前呢, 又煲返熱1 小時左右, 之後取出熱的鮑魚, 接觸空氣大半小時後, 鮑魚面就會慢慢變成深色, 呢個時候將燜鮑魚湯汁取出自己覺得o岩的份量, 加蠔油, 糖, 生粉水煮成芡汁, 之後加老抽較色. 喂住放返熱的鮑魚入去後就可以加少少麻油亮芡. 煮起晒後其實唔係好大隻, 都係三吋左右啦.

老師傅教落, 食鮑魚要 "打長切", 中間近頂部的確係比吉品硬了一點, 不過鮑心相當有溏心那種瀨刀的感覺, 一發現瀨到o個下真係好開心. 其實鮑身質地都好軟, 連女王和家父都食到完全無問題. 成功呀! (因為之前未煮過較大隻的鮑魚丫嘛...而且, 南非鮑真係要有心機過吉品先得)

下次可以又試中東鮑, 同埋諗o下大隻的吉品... (死喇, 愈來愈大想頭了...)

從悼校長到九一一

2011-09-15T23:55:00.000+08:00

老朽中學時代, 高記那位榮休校長 morales 上兩星期走了, 是癌症併發和腦退化症.

記得的是老校從來都係一個好好先生, 不少師兄說過佢會扮惡 "凶" o下人先 (尤其係當佢要制止更加惡 (其實亦係更錫學生) 的死鬼校監 Fr Carra 想 "郁" 班學生時), 之後就會靜雞雞放生o的學生, 可能係當時的師兄們比今天的學生純品得多, 見到校長好人就唔會得寸進尺, 亦因為咁, 當年不少搗蛋鬼都得到莫老校的照顧, 真係春風化雨, 變成乖仔一名, 日後出人頭地. 不過老朽從來都係 "鵪鶉派" 一名當年基本上由頭至尾都係一個唔識出聲o既o靚仔, 一直都未有機會領教莫老校這招.

和老校的真正接觸已經是在中四那年, 當年香港的學校還未時興玩桌面 wargame/boardgame 又或者 RPG (如 D&D/AD&D 那些), 老朽和另外幾個同學爭取了幾位老師支持成立了應該是香港第一間學校的 RPG Research 學會, 要經校長審批, 因此和佢老人家開了好幾次會.

最深入人心的是他是個歷史通, 當年一本香港最多學校採用的西史書 "East Meets West" 就係佢大作; 到他退休開始患上退化才沒有再 update, 淡出市場. 而他明明識廣東話 (仲要好叻) 但係又扮唔識, 但不時又爆一兩句抵死啜核的出來 (例如「嘩! 你又毛搞初呀」 (有無搞錯呀)).

高記在他領導下過了差不多三十幾個寒暑, 老朽算是他最後一批學生了. 當年中七放榜, 老朽那屆是幾年下來成績最 "見得人" 的一屆, 我們 bio 班 29 人, 有廿個 straight in 香港的聯招大學, 當中11個係 Kong U. 我知道自己 "大步濫過" 後打回去學校找班主任報喜, 點知畀老校搶電話, 佢一邊聽我匯報邊個入o左邊間一邊笑; 但最後就提我記得查清楚剩下的九位同學的去向, 可見其實佢係相當關心我地呢班仔的.

查實都幾化學, 大半年前和舊生會開會都見到佢, 知道佢開始罹患癌症, 但精神相當不錯; 估唔到都幾快就要拜拜.

人就係咁, 呢一刻精神爽利, 下一刻可能已經碌低, 所以要 "珍惜眼前人" 呢句雖然聽到爛, 極老套, 但係永遠都係 the last thing that you would do.

十年前的911, 我初初成為律師未到一年, 剛在一間中小型律師行捱著. 老闆是個好好先生, 不過整天也為當時的經濟搖頭. 常常擔心生意.

就在此時, 來個九一一, 那天晚上我們一家人在看著亞洲電視, 又在飯後聽一會收音機; 突然聽到收音機有突發新聞, 而當時還未知道 "咁大年事". 到開了電視, 見到亞視已經開始了突發直播, 我記得當時的主播是現在去了 roadshow 工作的盧瑞盛先生, 當時在我們見到第二架飛機撞弱南大樓時, 他爆了一句 "大家唔係睇緊電影, 而係真實發生緊o架!" 無辦法, 實在係太震撼.

每年的 911 我也會看電視直播悼念活動, 因為我永遠記得當時的情景, 和當時看得到那人性的光輝, 那些知道危險但仍然衝入災場的消防員, 還有, 雖然有回悶, 不過我都會看一下家屬讀出死難者名稱時所說的話, 尤其是那些警察和消防員家屬的話.

十年之後的今天, 拉登已經被裁, 但恐怖主義一直沒有停過, 到今時今日, 根本沒有人可以完全確切地說誰是誰非. 但怎樣的錯, 也不是那班在金融機構上班的白領, 不是樓下賣熱狗那個人, 不是那 343 位消防員, 更不是那些出世不久就變了孤兒或單親的小孩吧? 大概, 他們在那天早上也從沒有估到, 自己的命運會在下一刻完全改寫吧?

兩座大樓的位置, 現在變成了一對長流不息的四方人工水池. 也刻上了三千名遇難者的名單; 原來這些名的排列也是經過深思熟慮的, 而且紐約政府更特別為此找人篇一套電腦程式, 去計算那三千人的互相關係, 之後就將他們分成 8 類人, 而他們的名稱就會相連出現, 例如一班消防的名字被放在一起, 同一公司的遇難者也是, 在一起遇難的友人也會蝦放在一起. 這個不得不佩服他們的心思.

我相信, 這個世界上沒有一個真正 "抵死" 的人, 包括老校, 911 的遇難者, 甚至是那班被洗腦的恐怖份子, 但願我相信的, 沒錯.

老朽於 2011年9月15日晚, 去完 "鞠躬" 之後...

動力

2011-09-11T19:00:00.000+08:00

早兩星期, 又收到一個令老朽有點聯想的指令, 就是之前提過一位我覺得不太尊重我的見習律師會升正做律師, 留在我的公司工作。而我就要和 share 我的超級堅料摩打手秘書, 人工不變。原因是老闆們都覺得以現時工作量, 新升的律師未足以需要另請一位秘書，而曾經由公司建議的 budget 請的秘書, 那位即將 "坐正" 的同事又覺得唔好 (即係公司畀唔起錢囉...); 而要 share 我秘書而不是另一位最 junior 的律師秘書的原因, 就是因為另外一位秘書工作比我秘書差得多, 一定唔可以應付兩位律師的工作。

share 秘書在行內其實都幾普遍, 不過我們公司是一間老套公司，因為連貼郵票, 寫細 voucher 等相當 tedious 的工作都是由秘書做的, 而且公司基本上是沒有真正的 database network 的; 所以和好多其他律師行不同, 秘書要找 "師傅" (precedent) 來幫律師完成工作時, 好多時係要靠自己的。也就是說, 一個秘書或者對一位律師來說是綽綽有餘, 但應付兩位律師的話基本上係 "遲早死"。尤其是當老闆們以為我愈來愈少工作 (因為他們沒有派工給我嘛!) 時, 但我自己接得愈來愈多證婚和其他 "手作仔" 的官司來做的時候，秘書的工作量自然會不被察覺地增加。

這可不是我亂蓋的, 其實我一早已經在 2005年和2007 年分別試過和其他律師 share 秘書, 每次都係幾個月之後就一定有人頂唔順出聲, 到時咪又係請多個... 不過以往的做法是公司會有老闆先和我商討一下, 今次公司是先作決定, 之後只由大老闆的秘書 (就是行政總管) 交代下來, 完全沒有任何咨詢, 連安撫的說話也沒有, 老闆們點諗, 我自己一早知道, 只是唔出聲而已。

其實對我的秘書來說，相當不公平, 又係那句: 工作愈叻愈好, 得到的不是升職加薪, 而是更多的工作 -- 問你死未!? 秘書已向我提過, 如果不是為幫我的話, 一早遞信走人。係呢o的制度之下, 點會有好的秘書願意留下來幫手呢又...?

見到如此情景，當然，老朽梗係唔高興，不過為免負面情緒增加影響工作 (尤其係我為新人證婚, 當然係開心事)，梗係要搵o的動力來增加正能量才行。

這是早前其中一次最熱的戶外證婚後, 新人寄給我的卡和相片。不少新人在完婚後都會給一個 email 多謝我幫手，不過 "現代人" 就好少真的會寄相和卡的。入面的 message 似封信, 都幾長, 又好 warm, 大致係覺得上天安排我幫他們做監禮人是他們的幸運之類, 更加希望我將來可以幫更多的新人完成他們的心願諸如此類.

別以為他們好似好假好行貨, 律師都係人, 有人用得咁多字眼去讚一個原來在他們生命中只是一個 "過客" 的人, 點會唔窩心? 簡直係讀到我有點感動呀~!

年尾開始極多新人上來辦手續和開會，其中一對是頗為多準新娘網友認識, 又以為人 (兼行文) 相當幽默抵死的 blogger mcwin; 她說過上來會帶 "手信" 給我, 原來係...

唔好睇小呢兩包細細包o既豆仔, 它們包含了一份真誠和謝意, 對於我來說, 係一個好好的鼓勵. 多謝你地呀呀呀~! ^^

反叛．進步．「牛魔魔」

2011-09-08T11:11:00.000+08:00

女王又開學了. 今年的班主任是去年也有份教的一位老師 (仲要都係靚女呀o下!), 所以女王都算好快已經適應了.

學校也像去年一樣辦了個迎新日, 由老師和校長介紹學校和班上的人和事. 其實和去年無咩大分別, 唯一係老師提示了, 今年開始會有即日要做, 明天要交的功課; 雖然只是十數分鐘可以完成的作業, 但卻提醒了我們一件事 - 女王開始大個, 開始要 "睇功課", 也是說, 快要準備學呢樣, 學o個樣了...

因為保姆姨姨普通話很好, 所以女王聽埋聽埋, 普通話反而說得清楚, 起碼 (她想說的時候) 大家會明; 不過英文方面, 因為我們自她細個時不想用英語去溝通 (硬係覺得好怪), 所以她英文程度的確係稍遜, 聽得明, 但說得十分好. 因為咁, 我地就幫佢報了某名人學校的英文讀書班當係補習.

之不過女王可能見那班係極小班教學 (得三四個學生), 而且一星期只返一堂, 地點有點陌生; 所以次次去到課室前都會驚驚同埋喊十分鐘左右才慢慢 "收聲". 呢樣真係幾頭痕...

但另一方面, 女王的生活習慣就被我一句無心的話帶來極之長足的進步.

話說有次女王一如平日一樣不肯擦牙, 我就無啦啦說了一句 "唔擦好o的「牛魔魔」今晚o黎鑿你o的牙仔喎!". 之後手舞足蹈的扮起那 "牛魔魔" 來. 女王就即時自動擦牙, "牛魔魔" 之後就會投降同埋 "逃走". 女王甚至抵死到一邊擦一邊 "叫牛魔魔出來, 擦畀佢睇". 間直是有點變態的反叛心理...

後來就將這項 "活動" 進化而成為牛魔魔會將女王不喜歡的食物放在碗內, 之後我就會用低沉的聲線就 "我特登畀你o既. 知你唔食丫嘛, 哈哈哈...". 之後, 好快女王就會將平日不吃的東西放入口內, 仲大大聲話 "睇o下, 我食o左喇". 真係問你死未!? @@"

不過, 雖然用這些反話會使女王好快去守一些平日她會抗拒的規則, 不過... 我依然有少少擔心, 就是女王原來是如此有叛逆性格的一個人, 而且有時我也要一人分飾幾角的來 "tum" 她, 真係驚我自己慢慢變了人格分裂! ><".

月餅 2011 - 第二 round

2011-09-05T08:55:00.002+08:00

繼續在未到中秋前係咁試試試食不同的月餅, round 2 食過的有...

上環曾記 (潮式):-
曾記在香港島呢邊係比較無咁出名但係 "潮人" 之中無人不識的食店, 因為他們的 "粿品" 可以話係出神入化, 不過好耐之前提過, 每年由農曆七月廿五起他們就會轉賣潮式月餅直至八月十四. 買了幾年, 他們的老婆婆 (人稱 "阿 ng", 即係潮州話 "antie" 意思) 一見到我, 已經問: 幾多個, 要邊樣...

酥皮烏豆: 餡維持水準, 不太甜, 而烏豆連豆衣的輕微粗糙感依然食得出-今年係做得比較滑, 可能係用多少少油之故; 酥皮係焗皮, 底可能煎過來所以有油泡 (請高手或老潮州阿直指正). 夠香酥, 而且相當齊整, 當貢品都得. 好睇又好食.

酥皮芋泥: 一向食他們都唔係貪個 "敖ni" (芋泥), 因為他們無用豬油而用植物油去捏餡, 所以始終無貴嶼仔咁香, 不過都係那句, 個皮贏晒.

新三陽 (蘇式) :-
銅鑼灣新三陽裝修, 老細話中秋前搞唔切, 卒次都係托在九龍上班的友人幫我買, 同時買埋貴嶼仔的雙黃酥皮芋泥. 今次係買新三陽的生料回家自己焗, 用 180c 焗 20 分鐘, 中間反底一次.

鮮肉: 好 juicy, 個皮都相當鬆, 個皮就贏老三陽, 鮮肉方面亦不相伯仲, 但肉味以新三陽稍稍勝出.

火腿: 個皮一樣勁鬆化, 不過火腿方面新三陽用得太多, 鹹香就好夠, 但係比較乾身o左o的. 火腿呢樣就係老三陽靚少少.

榮華:-
雙黃白蓮: 個黃好大, 大到有o的假咁樣. 但係蛋味夠, 蓮蓉也不差, blend 起來也可以合格, 最緊要係, 佢 "只係" 49 大元一個.

貴嶼和記隆(round 2):- 就係試個雙黃芋泥.

痴線o架!! 究竟貴嶼仔係咪買晒全香港所有靚o既蛋黃? 定係因為佢用豬油搓料所以蛋黃的油可以 keep 住唔漏? 好食到無朋友. 但係亦係貴到無朋友, 一個要賣 66 元... 不過, 無計, 照買!

富豪:-
雙黃蓮蓉: 雖則係以其 "米芝蓮大廚監製" 做賣點, 但一切開已見到似乎係 "健康月餅", 唔差亦唔好, 蓮蓉有香又唔太夠, 好在無咩糖, 係糕粉些微多o左. 都勉強叫做食得過.

上環卓越:-
其他都係一般, 所以今年係專注佢個蛋黃金腿.
一句講晒: 無差過, 依然係最正! (不過八仙o既同佢都拍得住, 只係八仙那個吃起來有點原始的 "粗" 的感覺)

元朗大同:-
雙黃蓮蓉: 質素算係好平均, 不過蓮子香唔夠出. 蛋黃亦算中規中矩, 油份也見到, 但蛋香不足係一個小小的弊病.

五仁金腿: 大同金腿係不少朋友的心頭好. 今年可有點失望, 因為五仁中的合桃太多, 也比較硬

蛋黃椰蓮: 有驚喜, 雖然椰油味稍稍重, 不過做得很鬆化. 加入的芝麻和瓜子也發揮出 blending 的作用, 中間蛋黃始終比較乾身, 可能係因為椰蓮餡鬆散吸掉黃中的油. 不過幾香口, 椰絲係輕輕烤過的, 所以比較香. 喜歡這類 "冶蓉" 的可以一試.

欖仁純白蓮蓉: 睇落都幾油潤, 食落算係幾夠香, 亦算好滑, 真係食淨蓉的話佢都可取, 加埋少少欖仁, 算佢有誠意啦.

特別的驚喜 -- 友人是飲食兼電視界名人 may 姐 (馮美基小姐) 的拍檔, 在 may's cookies 都話到事者. 今年推出幾款月餅. 老實說, 見到他們出的是 "燕窩月餅", 加上見到的是個迷你樣, 初時只真的打算試一試當撐場就算. 不過當吃了第一顆 "低糖蛋黃蓮蓉" 後, 竟發現今年少見的滲油現象, 而且蓮蓉可能因為少下糖, 蓮子香都算相當濃郁, 吃得出料子用得好, 而且係恰到好處那隻, 吃下去比黃雙如那款更香. 不過因為他們的 "綑綁式" 銷售, 一係就三款月餅六個一起買, 一係就要買兩個不同款搭兩包曲奇, 所以我好難推介作嚴選月餅之一. 強烈建議他們出年用一樣的料, 做大少少個餅 (做返 3-4 兩重的傳統 size), 而且可作獨立或兩個網的發售. 則愛吃月餅之士可以多一個選擇.

總體之下, 本年度元帥府嚴選月餅會由以下幾款組成:

西環卓越餅家蛋黃金腿或八仙餅家五仁金腿或上環蓮香蛋黃燒雞月一個,
上環曾記烏豆潮式酥皮 (焗皮) 月一個或貴嶼和記隆蛋黃芋泥潮式酥皮 (炸皮) 月一個,
老三陽 (銅鑼灣) 蘇式鮮火腿或新三陽 (九龍城) 蘇式鮮肉月一個, 或元朗大同蛋黃椰蓮月一個, &
有食緣 (黃雙如) 雙黃蓮蓉月一個

月餅 2011 - 第一 round

2011-08-31T11:30:00.000+08:00

一如往年, 老朽在中秋節就會四出揀選自己喜歡的月餅, 試過後就會自己 "砌" 出今年我揀來送禮的月餅, 看似好怪, 但都有幾位朋友每年都會 "等" 我揀來送的月餅, 因為, 哈, 都算係 "有 heart" o既.

老朽係 "老人家", 不喜歡新派的奶黃和冰皮的. 而古怪的新味也不太喜歡.

今年暫時試過的有以下幾間餅家, 所試的都是我覺得他們以往做得不錯的款式, 食到成檯都係...(同場加映一包八仙自家蛋散... :P)

蓮香:-
雙黃蓮蓉: 好不幸, 他們以往最耍家的蓮蓉已經連續兩年跌 watt. 甜度還可以, 不會太淡, 但香味極之不足, 有點像加得太多糕粉的結果. 而蛋黃也不太夠油. 一切開已經像放了兩天的. 唉...蓮香的蓮蓉已死乎?

蛋黃燒雞: 出奇的, 今年比往年更出色. 蛋黃雖然亦不太夠油, 但係燒雞十分香口之餘用的果仁不多, 很夠味, 而且相當鬆化.

雙黃綠豆 (因為顏色似, 所以又名 "雞油月"): 用的蛋黃油份 (可能係咁o岩) 比蓮蓉月為佳, 吃下去混了薑汁的豆蓉 (傳統上「豆蓉」是綠豆, 「豆沙」是紅豆)有點不錯的清新感覺, 而且加入的欖仁起了一種中和的作用, 話得說回來, 多年前連蓮蓉月多數有少少欖仁的, 不知是近十年大家懶還是成本問題, 都不加了.

五仁甜肉: 他們的五仁是沒有合桃的, 代之是蓮子, 不太軟卻不失咬口, 其餘「四仁」: 欖仁, 芝麻, 杏仁和瓜子也算交到貨. 用的甜味中和料是玫瑰糖, 頗有特色, 剛好可以中和了糖醃肥肉和冬瓜肉的質感. 不過比起蛋黃燒雞似乎稍遜一籌.

貴嶼和記隆 (潮式) (round 1):-
因為買不到蛋黃芋泥, 所以會再去, 不過他們比較 "寸", 試過去幾次都買不到, 又無得留定先. 畀錢都唔收, 死未!? 不過他們的炸皮一年衰過一年, 好似愈來愈無誠意咁. 係今年叫做好返o的. 食得過.

雙黃芝麻: 相當乾, 黃同餡都係, 完全唔可以接受!

淨芋泥: 呢味都可以 ok, 不過個芋泥稍稍不夠油. 但混起來吃好過去年. 亦係全港做出最似樣的芋泥, 所以都仲會幫襯o既...

八仙餅家: -
他們有做好多地方已經無的蛋黃椰蓮月, 但試買當日未出, 下星期又要去多次, 激氣...

金腿: 好鬆好鬆... 不過鬆到少少離皮, 而且火腿唔夠香, 同埋個合桃有少少硬; 但係佢地加入了一些檸檬葉碎, 頗有 "異味韾香" 之感, 有驚喜.

雙黃蓮蓉: 太太太普通, 和多數其他餅家一樣, 蓮蓉香味稍欠, 但又唔係無, 又唔算一味死甜, 但係合埋個黃又無驚喜, 個黃亦係中規中矩, 切的一刻有少少油附在刀上, 但係又唔可以話係好夠油.

雙黃豆沙: 個蛋黃同上-即係無咩點, 又無咩唔好. 豆沙倒係搓得唔錯, 唔太甜, 紅豆香亦頗出, 如果糕粉再落少o的會好o的添...

雙黃白蓮: 唔係佢出開o既野, 原本唔買o既, 但因為試買當時未有蛋黃椰蓮月, 自己又唔知點解想儲夠 4 個先買所以要埋; 個蛋黃又係一樣. 白糖份量唔過份, 反而香味出多少少. 算 ok.

奇華:-
雙黃蓮蓉: 當年 "媽打" 鄧碧雲在世時的廣告提過「做月餅呢, 鏟蓮蓉o既功夫就最緊要」; 無錯, 當年奇華o既蓮蓉係唔錯, 我覺得同蓮香, 多男, 得雲可以話係有得爭一日之長短 (廿年前的回憶...) 不過今時今日, 我相信奇華自己已經無鏟蓮蓉o既師傅喇. 除o左無o左個o的鑊燶之外, 靚蓮蓉o既香味都無埋... 不過, 味道都係中規中矩, 蛋黃香味都比較弱, 畀 "媽打" 知道真係死o左都激到彈起...

恆香:-
雙黃蓮蓉: 失手之作, 計正我根本唔應該買佢; 可能我對 "元朗恆香" 仲抱有一份情意, 因為當年細細個入去探親戚食個老婆餅覺得好正, 到自己結婚時的禮餅都係用佢, 連個過大禮禮金盒都係借佢地o既 (當年無大陸做o既即用禮金盒, 傳統上會問餅家連同餅盤一齊「借」, 用完就放封利是入去畀返人). 但佢地幾年前生意開始差同埋投資失利欠款後, 已經無錢買靚料, 今年都係相當相當一般, 個蓮蓉唔係係 "古法" 定係點, 比較 "鞋口". 個黃都係無特別 (全香港都係咁, 究竟靚蛋黃去晒邊?@@).

老三陽 (蘇式): 鮮肉同火腿都依然係不錯, 連續輸兩年給新三陽後今年個餡似乎有進步, 火腿香味好平衡, 但鮮肉個味依然唔夠香; 皮o既酥化度回升, 不過未試新三陽那個所以唔知會唔會強中自有強中手喇.

有食緣:-
黃雙如的寶號, 賣的食材貴過人, 月餅就同市面差不多價錢. 只有金腿五仁, 雙黃蓮蓉同埋淨白蓮蓉三款.

金腿五仁: 用的都是頂級靚料, 一食已知, 五仁都好正, 樣樣都獨當一面, 合桃夠膽唔用碎, 因為一o的都唔硬, 好鬆化, 中和 agent 係用桔餅, 唔搶味但夠香. 不過唔好以為我讚緊佢, 成個金腿就係衰o係金腿手上-唔夠香又唔夠鬆, 食得出係金腿但係無咩腿香, 師傅入模時壓得比較死實. 雖然唔差但係同去年卓越比較就唔得. (今年未試卓越同埋另一家出名金腿的元朗大同)

雙黃蓮蓉: 呢個係暫時食過咁多間之中最似樣的. 皮薄而平均, 蓮蓉有香唔太甜, 也好夠滑, 有油但唔多, 比例算係適中; 蛋黃雖然都係唔係好夠油但係已經算係幾好, 各樣平均發展之下 blending 在口中感覺良好. 呢款如無意外應該會入選本年度的尚膳監嚴選月餅 list.

在第一輪試食後, 本星期尾會有第二輪, 目標為曾記 (潮式) , 新三陽 (蘇式) , 榮華, 貴嶼和記隆(round 2), 富豪, 卓越, 大同. 希望今年大家都生生性性...

阿茂整餅...

2011-08-29T08:30:00.002+08:00

親子活動可以有好多種. 上兩星期就在女王一位舊同學家長安排下去了整餅.

做的是 cup cakes. 其實去到真正要做的也好簡單. 原材料一早已由那位本身也是媽媽的導師和她的女兒一起分兩碗調配好 (一碗是粉/幼砂糖, 另一碗是牛油和蛋), 只差在未攪勻. 不過女王一見到成班同學一起 "搞野" 就好開心, 齊齊係咁 "發發發". 之後撈好晒後就將佢放入唧袋 (由導師代勞), 再由女王唧入小糕杯模中.

因為時間關係, 導師一早整定三杯等班小朋友在等焗的十多廿分鐘時可以裝飾一下其他蛋糕. 就是用加了色素的唧花忌廉 (係打起了忌廉才加色素的) 和一些糖/朱古力粒裝飾餅面.

在老朽和夫人的帶領下, 女王的作品都相當唔錯, 見得o下人o架...

今次活動才知道原來女王有近半同學都轉了去別校又或者其他班上學, 每個父母為子女的心思都有所不同. 最後幾多小朋友真係可以成材, 又幾多小朋友會知道父母當年為佢地絞盡腦汁, 而最後又有幾多父母原來只係 "阿茂整餅 - 無o個樣整o個樣" 呢... (呢個阿茂會唔會係我自己呢o下...)

入紙入到一頭煙...

2011-08-26T08:45:00.001+08:00

年尾真的好多人結婚, 應接不暇之餘, 有時都會遇到一些「怪雞」事情。

金鐘的婚姻登記處本來是一列 L 字形的廿多個櫃位，當中只有一個是替我們監禮律師辦手續的. 後來 ad hoc 開多一個, 而其他櫃檯都是處理出世紙, 補辦手續又或者是辦理婚姻登記處呀, 海外預約登記呀或教堂行禮的.

不過做監禮的行家愈來愈多, 而且又愈來愈多新人採用律師證婚的方式, 所以入境處索性將 lift lobby 的另一邊原本是內部使用的辦公室位置, 僻一間約四五百吹的地方, 開了三個新櫃位, 另外放三四張長凳來給我們的行家或公司同事去 "入紙" 之用.

一般而言, 這個安排當然好, 不過上個月有位女士打來, 初時話幫朋友問定, 因為他們都身在外國所以未可以 confirm; 後來又過多兩星期, 到老朽已經 confirm 了其他新人後才說同一個星期六的上午想去淺水灣行禮; 好在, 計埋時間剛剛好, 便都接下來辦理. 不過因為新人都在外國, 入擬結婚通知書時就要當成是 "海外申請" 去辦理. 咁樣申請比當由律師入紙方便一些. 不過就辛苦了那天負責去金鐘幫我入其他新人文件的同事. 因為兩邊都要 "攞籌", 做了日本首相 (左藤右藤), 又怕遲了做不了跑法庭那邊文件的工作.

最神奇的是, 打來查詢的那位女士, 細問之下才有點忸怩的說她原來不是新人的朋友, 而是 "準新郎個 daddy 的秘書", 再以資料 "人肉搜尋" 了好一會, 才知道原來這位新翁是政經界薄有名氣的投資者, 唔怪得使個秘書來幫個仔搞結婚啦... 不過都好, 因為中間的電話和 email 通訊等等都有通知準新郎, 起碼比之前話單由媽媽打來 "全權處理便宜行事" 強得多.

另一隻更加一頭煙的, 就是一位姨仔的朋友.

他想今年10月初行禮, 年初已經打來給我, 我詢問之下, 他告訴我之前有另一後婚姻, 已經辦妥晒手續, 有法院的離婚令. 當時我循例請他 confirm 係咪有 "絕對離婚令", 「即係頂頭有寫住咩咩 absolute」o既. 佢話有.

大家睇到呢度, 好明顯已估到下一步發生咩事了. ^^"

因為新娘是內地人士, 也在北京/深圳兩邊走, 所以遲了點上來我 office 辦手續. 上來前我請他們先交資料給我, 當然, 成堆離婚文件中, 無一張係絕對令.

香港法院就有呢個怪雞之處. 但凡離婚令會先出 "臨時令", 六星期後無人反對就會自動轉為 "絕對令", 但只有 "臨時令" 才是用一般法院命令的格式, 兼且有 "order" 同埋 "decree nisi" (臨時令) 字樣在中間, 真係盲o既都睇到. 反而到絕對令的一刻, 往往只會由法院或有關的律師樓寄出一份像是信函的東西, 一版字講完, 就叫做 "Certificate of making decree nisi absolute" 就是 "將臨時令轉為絕對令之證明書". 呢呢呢... 就係呢張, 呢張先係絕對離婚令呀大哥... 新郎話當年搞完件事就搬o左, 無理到.

更玩野o既地方, 係原來一對新人之後要去外地工作幾天才回來, 連想快點去法院申請拎多張 copy 出來都唔得 (而因為當年我並非他們離婚官司任何一方的律師, 所以我不能貿然代他去法院申請副本的). 又等多幾日. 剛剛才收到新郎的電話, 說是回到香港, 剛跑去法庭取得這張絕對令, 好在, 都還趕得切入紙... 不過就搞到這幾天變得好 tight, 而他們自己都變o左趕頭趕命咁款囉.

要留意的是, 如果有這個情況的話, 入境處是不容許 "先入部份文件, 後補離婚令" 的. 有時有些文件, 入境處是容許新人後補的, 但有關身份證明又或者先前婚姻那些就天皇老祖都無情講. 所以如果咁o岩睇到呢篇的你是有這情況的話, 唔該自己快o的執生, 唔係到o左真係臨門一腳有咩 "delay no more" 就真係 "delay no more" 喇!

「漸入佳境」

2011-08-23T23:48:00.001+08:00

我自己係咪 "漸入佳境" 就唔知, 起碼雖然老闆依然係無任何新工作交給我, 我自己可還有 "底" 可 "撈", 而且證婚工作真係幾乎每天都有新人找我 (雖然有時 firm 唔到, 又或者有時已經撞了期), 有時仲一天幾對新人打來. 當然, 這些雖然不是什麼好大型的官司或工作, 但至少是我最喜歡的工作來的.

要說的不是我, 而是女王的保姆和姨仔.

先係咁意提一下, 原來之前沒有寫出來, 就是女王保姆無啦啦肚痛腸痛 & 大便出血, 之後照到大腸有 "幾粒野", 嚇了好幾星期, 後來我幫手, 透過舊同事安排她去照腸鏡, 知道原來是增生的 polyp (應是良性的), 當下即刻切除, 無得留低. 雖然她仲話有少少胃部頂住頂住, 不過無特發痛楚而又無內出血情況, 估計並非癌腫, 遲少少再照多次希望無咩特別事吧...

講返姨仔, 她的淋巴瘤化療去到 "第六針", 是時候做個 "中期評估" 了. 所以早幾天就去了香港唯一有私家照全身 CT 的醫院做個快速的檢查. 之前老朽也和相熟的友人打個招呼去找那位 "淋巴瘤權威教授", 希望他老人家親自看一下.

其實, 之前我們, 甚至係的的父母都幾緊張o下. 好似等成績表咁. 我老豆又係咁為佢唸經, 我當然同女王都有返教堂為佢特別祈禱啦.

好了, 看完, 教授 (姨仔同襟弟拔少話佢個樣好似我...) 話 "幾好丫!" 之後左睇右睇, "你又無發燒又無甩頭髮喎!" (其實都有不過唔太明顯). 照晒之後, 大家見到 report 寫住 signaficant decrease in mass... 之類, 都覺得好安慰. 不過教授話都要係咁意電返一個療程以防o的殘餘部隊「翻撻」, 同埋係打晒針落完藥先做o既.

好了, 檢查完, 大家都輕鬆不少, 出了去食飯 (當然化療中人要 "食自己飯" 啦, 因為怕外面食飯有微量污染), 見到拔少胃口唔錯, 又知佢為了陪姨仔好多東西都唔食得, 又食到好清, 所以就叫佢多揀一味肉類的. 佢諗都唔使諗就話 "中式牛柳!".

呢期, 真係辛苦o左佢. 結婚無耐就要陪姨仔打呢場仗, 完全義無反顧, 每天一放工就跑回家協助照顧她, 轉不了去自己喜歡的工作 (因為新工有時要返內地), 放棄一切自己的娛樂去陪她, 對一個三十歲的 "青年" 來說, 犧牲其實都幾大. 不過反而使我更加想起他們所揀選的結婚誓詞之中 "無論富有或貧窮, 健康或疾病..." 雖然呢場仗只係打了幾個月, 之後可能打多半年左右就可以休息o下 (希望之後都唔使 "翻兜" 再打啦!), 但係的確, 真係好能夠反映出呢段誓詞, 亦係活出呢段誓詞的最佳人辦; 當然, 我說起來, 可能是輕描淡寫, 而且呢o的比較 "唔老 o黎" 的事, 我唔可以在婚禮上和新人分享, 但真係好希望有機會睇到呢篇的新人, 都可以借鏡. 當然, 唔希望你們會遇到咁o既事... 不過, 他們原來到最後, 是最令人羨慕的一對.

不一樣的精彩 - 深圳世大運

2011-08-21T08:45:00.002+08:00

大概香港沒多少人像我一樣的喜歡看大型運動會了.

其實老朽運動無樣精, 不過對於大型運動會就有一項情意結, 或者, 說是一種投入參與感也行.

很久很久以前, 大約是 1984 年奧運會吧. 當時從電視見到受訪的義工 (現在內地稱為志願者, 台灣稱為志工的), 已經感受到現場參與的人的那種興奮. 銘記於心.

之前已提過, 08年因為女王出世, 老朽放棄了那原本應是垂手可得的北京奧運義工 (和那件到現在也是中國內備受尊敬的那件超限量版藍色義工制服); 只在 09年香港東亞運時擔心義工頭叫做自我補償了一點. 到現在卻發現, 原來不能參與京奧, 竟然變了在我心中深處的那一小點永遠不能彌補的遺憾. 雖然, 我從不會怪責夫人和女王的出現 (well, 女王出世都係我 "一手造成" 的...); 卻使我有點失去理智, 以至於歇斯底里地去追尋日後參與國際事件的義工的機會. 連參與不了的 (女王得o個幾歲, 點都放唔低佢o架喇) 也要從各途徑嘗試使自己知多一點相關的資訊.

好變態, 對吧?

暫姑勿論內地搞國際大型體育活動有幾勞民傷財, 但當地連受影響的民眾都有一樣使命感和投入感, 是香港學不來的. 起碼, 其實全世界都知搞大型運動會幾乎肯定要蝕錢, 但內地人不會覺得有問題, 而香港就會鬧得發慌.

無線是今屆句大運香港的獨家電視台, 不過 coverage 實在太少. 好在畀我發現了亞視轉播的深圳衛視原來做了 "大運視頻台", 幾乎全天都在播. 所以老朽也時常收看. 見到一個又一個的志願者幾咁投入去服務, 連得獎運動員的花束原來也有專科的義工去負責, 又見到當年香港東亞運的義工老友有幾位都上了深圳做義工, 真係羨慕到流晒口水. 連夫人見到他們和我的流口水表情, 都話 "你地真係 "一擔擔" 喎, 係咪真係做開有條癮, 唔做義工唔安樂o架呢?"

我諗, 答案一定係 "yes".

因為做義工好開心...而亦係參與盛事的一種 (之咁, 唔好話其實都有義工 friend 找我證婚和有其他生意. 當然這個純粹係 fringe 的; 更不應用來成為當義工的目的). 記得當年東亞運舉行期間, 著住制服去開工時見到義工的同工, 唔識的大家都會打招呼鼓勵一下. 呢種精神, 唔係做開義工o既真係唔會感受到.

講開又講, 原來傳統上, 世大運得獎的國家運動會在頒獎時會升國旗, 不過就不會奏國歌, 而改奏世大運聯盟 (FISU) 的會歌, 不過硬係覺得無得聽國歌, 有點騎呢...

今年世大運的主題是 "不一樣的精彩". 雖然我未可以親臨其中, 但約略都感受了一點, 中國搞大型活動的那種勁力, 不只是單單 "政府動員" 可以做到的, 先別說呢個國家的政府/地方官有幾乞人憎, 但搞起活動來, 全世界民眾都不得不寫個服字畀我地中國人...

家教

2011-08-16T15:48:00.000+08:00

女王剛放完第一次的暑假, 只有三星期.

開學前, 夫人有朋友介紹, 我們就帶了她去西環寶翠園樓下的一個室內兒童遊樂場去玩, 是要付款的, 都幾貴, 三人行要二百多元.

當日是星期天, 去到見到相當多小朋友在玩, 加上家長, 密質質的. 原來同時間有兩位小朋友在這裡租場舉行生日 party, 唔怪得full 到飛起, 連放鞋仔的地方都爆晒. (和好多室內的收費遊樂場一樣, 入去玩要脫鞋穿襪) 女王去玩時也一樣, 不過女王都好乖, 肯找個地方放下鞋子才慢慢玩.

見街外的小朋友真係如同萬花筒一樣. 幾百人就幾百種性格. 多數三至五歲的小孩都會和父母一起走來走去, 而且都比較細力; 而六歲以上的也不會太亂來. 而且都頗有禮貌, 起碼會走來有禮地問 "唔該個波波籃可唔可以借畀我", 就算答案係 "唔好意思, 我地仲玩緊", 佢地最多只係 "哦" 之後就走開, 唔會再有什麼行動.

不過有三數位就真的比較 "另類".

在玩一張似 "跳舞毯" 的遊戲時, 小朋友會在一排方格的燈箱上走, 有時要去一起鬧快踩一些地上燈光打出的波波, 有時就要跳起避開那一路 "跳過來" 的波波. 女王只是 3 歲, 有時的確係跳不過的. 中了, 那個波就會在地面的光格內散開. 而當一位年約 6 歲的瘦猴子男孩見到女王跳不過其中一個波後, 便衝過來將女王推跌, 之後就叫道 "哦! 你踩爛o左個波波, 輸o左呀你! 快o的走!" 嚇到女王呆o左, 好在我o係側邊, 我即刻伸手隔開, 之後同條死o靚仔講, 「你輸o左我推跌你好唔好? 」個細路見女王有大人幫拖, 即刻走o左去.

我向女王解釋可能係小朋友唔小心, 又或者佢太心急 (純粹唔想佢有陰影) 不過之後亦加多一句: 有時o的人粗魯, 唔好同佢玩喇.

我承認女王係細個可能唔識玩, 亦承認那位細路佢未必認識到女王係細個到唔識玩, 但係識玩與唔識玩, 以及輸o左, 唔係可以推撞和整跌任何人的原因. 更何況女王輸o左無累到佢都輸埋喎.

呢個時候我發現呢位小朋友附近係無家長在一起的. 後來就見到有位不知道是爸爸定係邊位男性家長有同佢傾幾句, 之後又走返埋一邊的長凳自己o係度睇報紙雜誌兼玩電話; 完全同個細路無帶無交流.

咁樣教仔法, 唔怪得啦!

這個時候, 我第一時間諗起的, 就係 "小學雞".

唉, 又多一個.

夏日好煮意 - 京都汁鬼馬釀花姿

2011-08-12T23:45:00.001+08:00

好古怪的名, 是嗎?

這一味是數年前我初初開始為當時懷著女王的夫人煮食時, 第二道她讚賞過的菜式, 另一道就是煙燻太爺雞. 就是這兩味菜和這兩句讚譽, 使我開始心雄雄, 覺得為所喜歡的人煮食是個樂趣.

好一段時間沒有做這菜式了, 之前試是用蝦膠釀油炸鬼, 所以叫做 "鬼馬釀百花", 當時只是炸熟就算. 今時今日就想玩o下野...

自己打墨魚膠真的划不來, 因為不像蝦, 墨魚真的要去衣剁碎花的時間長得多. 寧可買墨魚滑回來後加些味, 還有, 更緊要的是撈一小茶匙的生粉, 不然塗在切開的油炸鬼上時, 看似可以貼實, 但最後一炸就好易會鬆開.

生粉呢樣東西好神奇, 溝入軟身東西可以將佢變得企身, 加入醃肉可以鬆肉同埋使肉質變滑, 混在兩樣食材中間可以當黏貼劑, 埋芡可以收汁, 乾點可以使煎炸時炸得更乾, 蒸雞時加入可以使雞唔出水.

切開油炸鬼, 中間開條隙, 壓一下之後釀入墨魚滑; 慢火炸三五分鐘, 再大火回鑊十多秒; 就咁炸起其實都已經好吃了.

不過今次就貪玩, 在《大廚醬汁菜》中看了京都汁, 酸酸甜甜的應該都會唔錯. 不過今次無跟足, 就用了這個方:

茄汁四湯匙左右
o急汁三 dash
鎮江醋兩湯匙左右
紹酒一茶匙上下
糖就大約都係三四湯匙, to taste 的.
另外仲加了大半筒山楂餅碎

撈好後蒸二十分鐘等o的糖溶晒 (好過明火煮, 因為份量不多, 所以怕茄汁同埋糖快煮燶o的醋都未可以融入茄汁之內), 再起鑊炒軟少少洋蔥絲, 加入汁係咁意煮一下便可以淋上油炸鬼上面.

吃下去是好, 不過個汁都還是太搶味, 份量亦似乎多了點. 我估下次一係用別款汁, 一係用少一點, 而且不再淋上面, 改為點醮可能仲好.

但意外發現, 呢個汁完全可以用來炸好豬扒, 又或者一字骨 or 腩排後用來兜勻, 直情有九成京都骨的味道 (雖然唔係真正的京都骨用的醬汁).

自覺好食程度係 ok 的, 不過最開心係女王食完幾日都仲同人話 "爸B炸油炸鬼同 octupus (佢唔識墨魚), 好好食啊!".

好。趕。呀呀呀。。。

2011-08-11T18:00:00.001+08:00

近幾星期, 都幾 "突發", 除了一些朋友或曾證婚的客戶介紹不少新人來找我之外, 更加在兩星期內多了十幾通所謂 "飛來蜢" 的街客打來問我可否為他們證婚.

昨天就有一位女士打來, 她的姓氏比較特別, 所以我也比較留意.

不過她打來不是為自己, 而是為了自己的兄長而打來的. 原來他兄長和未來嫂嫂都身在內地, 而兄長就是香港人. 嫂嫂是內地江南一帶人士, 旅居深圳工作. 不過就想 9 月 (無錯, 係一個月後) 在香港註冊, 地點就無咩所謂, 大概會找一間酒樓一定食食飯前先簽個紙.

本來新人背景提來沒大用, 不過偏偏新娘的老家十分偏遠, 而且按呢位熱心的妹妹透露, 「連電單車都無」. 好在新娘本身在深圳工作日子長, 內地新人需要遞交的 "戶口薄" 同埋生育證明都有. 不過妹妹就透露未來嫂嫂因為有孕在身所以未落香港, 就是要靠香港的一紙婚書才可以落香港生仔.

先別談應不應該讓內地孕婦來香港生仔. 始終小 bb 的父親是香港人, 法理上也不能阻止他們在香港註冊, 而且按熱心妹妹所說, 嫂嫂 "陀得唔太穩定" 所以想落香港做檢查和安胎. 這個說法, 身為父親的我, 完全接受.

好了, 新娘因人在大陸, 所以要找新郎帶文件來給我, 文件相當快手齊備, 所以我也請他們不要眈擱時間, 盡快來律師樓入擬結婚通知書. 而且時間真係只係 "剛剛好", 遲多個多星期就真係想幫都幫唔到了.

不過上來見我的除朋新郎外就是他媽媽和家姐. 打電話來的妹妹就因上班未有出現.

一見到真人, 有點「唏噓」: 個人感覺就是, 見到新郎個樣, 成個吊兒郎當, 由頭到尾全無意見, 說話像不想回答的; 反而是新奶奶就相當雀躍, 而家姐也十分幫手 (當然打來問了不少問題的妹妹也明顯地十分緊張這頭親事). 即時就想起早幾天打來問價的那位媽媽. 今次, 新郎簡直像個木偶的, 踢一踢, 郁一郁. 喂大佬, 結婚呀. 點都好, 唔該歡容o的丫... 望住一個咁o既人就來做老豆, 除了替佢老婆 & 未出世的小朋友有點擔心外, 直頭「有少少想 "鐘" 佢」添呀~!

在呢一刻, 我反而覺得幫手的幾位女士們好可愛, 佢地唔似係煩人, 反而係知道自己個仔/大佬/細佬一向都係 "死唔斷氣" 的, 為了順利幫佢 "娶到老婆", 所以出錢出力 (連畀政府註冊的費用都係家姐幫手 "畀住先" 的...) 雖然未至於頭頂發光, 但係卻使我在對住呢位新郎時, 比較有動力.

到時希望可以使出「十二成功力」, 使呢個吊兒郎當佬可以明多少少咩係婚姻, 咩係責任, 同埋咩係盟誓...

夏日好煮意 - Hearty Soup - minestrone 意大利菜湯

2011-08-08T13:00:00.000+08:00

幾天的天氣都係熱熱熱. 連晚上都像個火爐的. 熱到有點恐怖. 真的什麼都不想吃.

多多少少要有點營養的話, 想到早前看意大利烹飪書 "Taste Italia" 介紹, 又睇埋之前提過英國田園廚神 Nigel Slate 的大作, 想起一款可能你和我在餐廳都飲過不少次的意式菜湯 Minestrone (just in case 你未識讀, 這個字不讀作英語 "mine-stone", 而是有點像 "mini-stro-ni" 的意大利/拉丁系音). 這個湯, 加一小份烤雞腿或者煎魚柳和一些灑上橄欖油和鹽烤香的粗粒麵包 (女王有份食, 所以唔落黑椒了; 不過食的時候可以加一兩滴檸檬汁, 女王唔知點解好喜歡食檸檬味的東西...) 食下去, 好有點窩心的感覺, 點解就唔知喇.

煮的方法其實好多不同的選擇, 我參考的大約是這個...

- 一盒有機清雞湯或者菜湯底 (西式超市有售)
- 半支台灣甘荀, 無泥o係面o個隻, 切細粒
- 一支西芹切細粒
- 一瓣蒜頭拍鬆
- 一件 fennel 大茴切薄片或者粒
- 一條意大利翠玉瓜 zucchini 都係切粒
- 一罐罐頭蕃茄粒 (因為罐頭茄是煮過和 reduce 過的, 比較甜和易融化, 加入去煮味道更好), 有罐頭茄就不用落茄膏了.
- 兩個羅馬蕃茄切粒
- 半個洋蔥切細粒, 炒香
- 少少 lentil 豆, 或者少少熟薏米, 又或者薯仔粒都得, 叫做飽少少
- 一茶匙 pesto, 最尾落的
- o的o的 basil 九層塔, 又係最尾喜歡就落
- 少少橄欖油, 都係後下.

望下去好似好多料咁, 其實切埋搞埋都係半粒鐘, 之後由得佢煮, 這時可以預備其他食物了.

無咩章法, 煮埋一齊, 細火煮半小時左右等o的菜粒都軟了, 食得. ^^ 因為女王愛吃蕃茄, 所以多加了, 連帶其他她不愛吃的菜都一併食晒! (其實目的都係咁...) 正!

嘩, 咁貴o既?

2011-08-04T16:39:00.001+08:00

之前睇出面話而家有些新入職的青少年, 見工都由屋企人 (以阿媽為主) 陪伴, 有事就由父母代 "頂" 代答. 我竟然都收到一個這樣的電話.

「喂, 我想找老朽律師」(是一位 antie 級的, 她當然是叫我真名)

「我是, 請問係...」

「我係 x 太, 係上兩個月你幫 y 太個仔證婚時o既客人, 我見到你做得『幾企理』, 想幫我個仔問一下你的價錢」其實係幾有禮貌的, 不過 "幾企理" 呢句好似係我同人講多喎... @@"

「係呀, 你快當新奶奶了? 恭喜! 請問令郎幾時大日子?」

「12月xx日」

「那日我下午已經有另一對在尖沙咀的, 唔知佢會唔會係 6 點後行禮? 唔係的話可能幫唔到你地手喎... 一係咁啦, 唔介意的話, 始終佢同你未來新抱都會直接係我個客, 不如我同佢地傾o下先丫, 最緊要新人開心」

「未使住o既, 而家多數野都係我幫佢打點好先o既. 佢有第二o的o野忙緊, 不過遲少少會等佢同你傾o下o既」咁都得?

其實我一向都希望可以先和新人傾好, 讓他們可以親自接觸我, 才決定是否委託我做他們的監禮人, 因為我和他們的 service, 不是一個純 "買賣", 而是一項貼心的服務,我也希望先和新人傾一下, 才知道他們是否應成為我的客人.

這樣說, 好似好寸, 但我只希望我所證婚的新人, 能夠真正地體會我點解會為他們證婚 (之前提過, 唔詳贅了).

阿伯友繼續發功「得o架喇. 有咩同我講啦; 係呢你咩價錢? 阿邊個邊個介紹, 平少少啦!」

之咁, 我一向就係中秋打後, 星期六日夜晚會比較貴少少 - 當然啦, 犧牲同屋企人 (尤其係女王) 一起的時間, 點都有多少代價o卦...

聽到價錢後, 伯友都彈起「嘩, 咁貴o既? 出面二千幾咋喎!我都有格價o架!」

聽到呢度, 其實可能大家都會諗以下幾樣o野:

1) 我係咪真係開得太貴?
2) 最後呢位 auntie 有無搵到我?

先一支開叉筆提一下. 之前都提過, 律師的價錢是每小時二三千元的, 監禮證婚風險較低, 有時可以收得平少少, 但用了星期六日的時間又點計呢? 或者好多人會覺得 "婚禮的 service provider 係預o左星期六日o架喇" 呢點我明. 但律師有點不同的是, 他們絕大多數並不是平日可以放假休息的, whereas 不少和婚禮有關的 service provider 不是婚禮的日子時可以開晏收早, 又或者休息一下. 講真, 畀o下面o的行家啦陰功...

有些新人在網上都評論過, 其實律師出場只係十多分鐘, 收幾千大元似乎太好賺了吧. 的確, 有些行家係只在行禮時出現, 之前只是好約略地見一下新人, 所以就會導致我上幾星期在親戚婚禮上所見, 個律師都幾有禮貌, 不過連新人参名字都不知道的場面了.

至於我自己, 因為 service 比較個人化, 我每對新人都會另外撥一小時以上和他們開會去傾他們的婚禮和整個流程, 所以收費的 scale 又難以一概而論. 但是, 始終有新人只是希望律師出現為他們見證宣誓的時刻. 所以便會認為律師的收費無需那麼高昂了.

哈, 至於那位伯友, 點做呢個 "母親的抉擇"? 佢最後都畀我說服到 (又未 confirm 住), 請佢公子同埋未來新抱下星期找我傾傾先. 因為我同佢講 :

「新人先係主角, 你身為阿媽/奶奶, 已經為佢地做o左好多野; 講真阿伯友你都係見我 ok 先找我o者. 小弟過到你o個關都好高興, 但係當晚台上面對住我o既係你公子同新抱丫嘛, 有咩得失, 我都交待唔到畀你, 累埋你就唔好啦!」

哈, 就係咁!

夏日好煮意 (矜貴升呢版): 鮑魚老雞響螺燉鮮野生松茸

2011-08-02T12:22:00.000+08:00

夏天是天然的野生菌種開始收成的日子. 當年和我一起在大學時代領洗的教友和她丈夫所辦的專業飲食雜誌 "現飲" 今期有提過, 所以便去了上環的一間菰菌店. 見到好多新鮮的菰菌, 好奇怪, 我一向好鍾意食菌類, 一見到就發晒癲的. 但見到唯獨是松茸那個架沒有貨.

原來是只剩下兩支, 店員收起了. 我最後花了百多元買了這兩支可遇不可求的珍品 (雖然有點誇張...), 就想起之前和老闆們還好關係時, 為了應酬客戶在鏞記吃過松茸燉鮮鮑.

因為上篇提及做西檸雞有隻雞殼, 平平地買多一隻老雞殼後, 先和金華火腿件慢火煲三小時成為清雞湯.

再用這湯來燉已經出水的鮮鮑仔 (只用兩隻, 因為另有響螺), 急凍響螺 (記得洗刷乾淨和出一出水僻腥), 當然還有切片松茸.

野生的鮮松茸好香, 洗刷好後據悉和吃鮑魚一樣, 一定要 "打長切" 才對. 為免腥味重, 可以加幾片薑, 亦有人會下些藥材如淮杞之類的.

雞殼是先出水的, 不會再 "漏油", 浮面的油係金腿油, 我唔捨得佢o的香味所以無先蒸火腿才放湯... ^^"

就只是時間, 這道湯難度係極低的. 最難都係刷松茸, 哈哈!

夏日好煮意: 西檸煎軟雞

2011-07-30T12:21:00.003+08:00

上次煮了香橙/橙花魚柳之後, 女王和夫人嚷著要 encore. 而我其實一直想做的另一道菜, 就是西檸煎軟雞.

和橙花汁一樣, 西檸汁其實不算難調較, 亦可早半天準備好, 我用的都是鮮檸, 沒有用香油之類的.

檸檬榨汁一個半 (其實一個都得的, 不過我不想用太多白醋), 白米醋兩湯匙 (想酸o的三四湯匙都得), 砂糖 (今次不用黃糖/三溫糖, 因為想個汁盡量 keep 淺色) 係三湯匙左右, 早少少加入醋入面煮, 同時將檸檬的表面黃色 "皮青" 刮大約一個的份量 -- 留返中間一個圈的檸檬要連皮切細粒的.

糖溶後將細粒的檸檬粒和皮青加入, 加少少水使糖溶得更好. 這時用半茶匙的吉士粉開少少水加入去, 煮開後就加入剛才的一個 (or 個半) 檸檬的汁. 煮滾試味, 之後用糖/水/醋來調味, 最後落少少鹽 "吊" 一下. 煮返滾後個汁便 ok 了.

之後的功夫, 才是真的功夫 -- 炸雞.

雞當然係以鮮雞為上, 我今次因為想用雞殼燉個湯 (詳見下一篇 - "夏日好煮意 (矜貴升呢版): 鮑魚老雞響螺燉鮮野生松茸" :P) 所以買一隻鮮雞請雞販起肉留骨.

炸雞好多時都會搞到硬過柴皮. 我之前都衰過的. 點解味送叫做 "煎軟雞", 是因為半煎炸的時候, 要大件少少, 肉比較易保持嫩滑; 火要先武後文, 老師傅就會加多句 "鑊要紅, 油要凍", 炸時大約5分鐘左右, 視乎雞件大小.

如此開了蛋漿, 上乾粉後將雞分兩批炸好後晾油; 最後再開猛火一次過將雞回鑊, 十多秒便可撈起, 這樣外皮才會脆. 而第一次炸時, 慢火浸熟才會有以下對話:

夫人:「嘩, 咩事一咬開舊雞有油o既?」
老朽:「係油的話就唔係咬開先有, 而係o係面啦! 食真o的啦!」
夫人:「哇哇哇... 係肉汁o黎o架! 」

當然唔好忘記個汁, 將之前煮好的汁煮滾, 加生粉水和最後 "補飛" 的調味後便淋上雞面 (我不太建議回鑊炒, 為免雞的脆皮脫落), 食得!

唔知係咪撞手神, 今次個雞的水準之高, 其實係我自己都估唔到, 下次都唔知整唔整得返...

遲到的新人

2011-07-29T12:00:00.002+08:00

上兩星期去了九龍灣某 "大場" "開工", 新人是舊老闆介紹的.

點解會提他們? 其實係因為他們之前一早說過想 5 時行禮的, 之後改了幾次, 都是說有長輩想早一點, 哈... 不會是希望多點時間打麻雀吧...?

我提醒了一下新人, 他們說改了 rundown 不會即日回門, 所以想提早一點. 不過, 在好日子前一星期, 他們再打來, 說希望下午 4 點前行禮. 這個... 有點神奇.

因為他們行禮的 "九龍灣大場", 是間大商場內的酒樓, 他們的好日子是星期天, 這類酒樓一般都會有中午茶市的, 而茶市 "落場" 都不會早於下午 2:30, 即是 3 點幾應該先可以勉強 "交個場" 畀新人. deco 搞大半小時已經好快, 那說是說, 4 點行禮是有點太過樂觀了. 不過既然係舊老闆介紹, 而且那天之前我沒有特別的工作, "只是" 和女王去玩 (其實仲緊要過工作呀o下!!) 都沒有所謂, 早點去準備一下也行.

一向老朽會比較早到, 大半數的婚禮我都是早大半小時到的, 因為有事時可以 "執生", 這次也不例外, 我3點已經到了, 不過太早, 我去了飲咖啡, 之後 3:15 才到會場. 門口 reception 已經好奇怪... 「阿律師你咁早o既?」
「我次次都咁上下o架啦」
「唔係喎, 你早過對新人喎」
「o下... 唔係嘛」
「車! 我地茶市都未完晒, 點畀個場佢o者又?」

畀我估中o左. 但係我連咖啡都飲完, 使唔使落去食埋個咖哩先呢o下...

我同靚女 reception 話, 我估新人都係有事未來到o架喇, 我坐陣先, 唔打畀佢地住喇.

但係愈來愈奇, 已經差不多 4 點了, 連一個來收場的兄弟也未有, 反而有十多位親友話來觀禮的就來了, 仲開始打緊牌, 搞到我都手痕埋一份, 當然, 我係唔會埋檯的.

卒之三點十一, 就見到一班著到都幾 '行" 的兄弟姊妹一行十幾廿人操兵的入來酒樓, 但新人依然芳蹤沓然.

忍不住捉住隊尾的攝影師一問, 得到一個極搞笑, 但又好真實, 而且真係幾令人沮喪的答案...

「唉, 頭先我地入o左男家門叫外賣食, 送錯野, 補飛搞到 2 點半先有得食呀~!」

我醒起男家係住o係一o的稍為遠的地方, 附近可能無酒樓餐館之類; 這樣的話, 所有人都應該會幾趕o下. 而呢個時候, 他們需要的係安靜和 confirmation.

又估中, 五分鐘後新人到來, 幾乎係跑入來的, 而且, 一如我所料, 係黑住塊面入來的. 新郎仲 "摺晒衫袖" 流晒汗咁款.

當然, 第一件事就係 confirm 新人, 我之後沒有其他 appointment, 之後我就做一個極簡單的 briefing, 之後就 "放" 新人去繼續化妝和跟酒樓談. 我就找了幾位兄弟姊妹 firm 一次流程.

幸運地他們有幾位好幫手的兄弟姊妹, 而且當中一位姊妹也很有經驗, 我問她是否 "time keep" 佢就話係. 我即刻話 "咁就得喇, 麻煩你交帶各位大哥大姐, 唔好太趕"

「唔, 但係新娘想快喎」好忠心的姊妹...

「但係你睇下出面個場 (當時在新娘房門口), 咩都未搞, 半個鐘內行到禮都偷笑啦, 就算急o既都係我急啦, 我都唔急咯你仲怕咩呢...」

「我怕新娘唔高興影響到心情」似乎呢位新娘今日已經有好多唔高興的位了, 不過, 呢位姊妹真係值得讚.

「得, 我同新娘講」

轉頭入去化妝間, 見到新娘... 「hihi! 你一路化妝一路講丫, 我唔敢阻住化妝師」

「預計幾點行禮?」新娘直接問我.

我:「而家 4 點10分, 你預 5 點丫, 我都唔趕」

「4點半得唔得?」

「梗得啦! 我宜得你快o的我可以返去陪個女玩丫嘛! 不過呢, 任你揀, 你想快定係想靚?」

新娘聽得出我意思, 「其實我係驚之後要影相同埋 rehersal 今晚進場呀, 今晚有花仔花女」

原來係咁所以想快...

「你會唔會行禮後切餅丫, 而家出面有 30 位親友左右, 行禮時多數都係佢地觀禮, 係咪?」

「係」

「請攝影師之一入一入來可以嗎?」我問

好快 video man 入來

「大師你估你班手足影出面已經來o左o既人, 禮成後影台相會影幾耐?」

「幾十人分十組八組左右, 最多咪廿分鐘」

「得, 掂晒. 行禮 15-20 分鐘, 禮成切餅 10 分鐘, 親友影相廿分鐘, 去到盡都係 45 分鐘左右, 一個鐘內點都 ok. 你都仲有兩個半鐘先到開席, 我計你地 7 點開始多人來丫, 都唔好話係 7 點半先多人來添喇, 影完相仲有成個鐘時間 rehersal 同埋換晚裝, 你地成班人行埋都係o個 50 m, 15 分鐘咩都 rehersal 完啦, 仲有 15 分鐘畀你地入來嘆o下呢度張按摩椅先至施施然換衫添呀真係! 而家最緊要係咪化好個靚妝先呢?」

「呀... 又係喎!嘩你好勁呀! 」

聽到新娘咁講, 最開心的, 唔係我, 當然係正在趕頭趕命的 MUA (化妝師) 啦.

當然, 最後唔使 5 點都可以行禮, 對新人當時無咩講, 但係兩星期下來, 佢地已經介紹o左兩對朋友找我年尾和出年證婚 (雖則有一對撞期幫唔到手). 仲想點?

***

臨尾加句後話 , 網上見到一位好出名的律師 - 他證婚時所說的部分說話竟然和我所講的一些鼓勵新人的說話相當相近, 我自問就真係無抄人, 人地有無抄我呢, 我相信無, 因為我咁 "隱世", 網上無咩我o既真實資料 (有都唔話你知啦 ); 不過細想一層, 其實只要真心去鼓勵新人和為他們祝福的話, 就算真的是抄我的又如何? 而且, 我幾乎每對新人都有一點不同的說法的, 呢樣相信無人抄到喇o卦!? 想到這裡, 即刻「身心康泰」, 安心去吃飯去了...

貴德宮

2011-07-27T23:50:00.002+08:00

聽過 "貴德宮" 這名字好多次了. 早知道是香港少見的素食私房菜. 有兩次有朋友約去也因故去不成. 但去過的朋友多數評價都不錯.

上次和家人與一班舊街坊去大澳 (即係老豆 "pk" 那次) 時, 他們相約了去試一次, 因為有位長輩去過幾次覺得好正. 既然有機會, 那就應該試一下吧.

去到坐下, 見牆上多幅字畫都甚有禪味...

是晚菜單相當豐富, 因為女王也有去, 老闆梁太便問我會不會照上整套的餐點給她, 我說既然食不完取走也可以的話, 那沒所謂.

甘露素菜包。這道是很清的菜湯, 泡著一件像小籠的包子, 菜味濃香, 不錯.

 小樹耳海珊瑚寿司併盤。這個盤據常客提過, 每次也會有, 但每次都有些用料是不同的. 今次用了皮蛋 - 忘了提一下, 他們的素是有蛋的.

 黃金綉球。是芋絲包著些作料炸成, 當然, 女王至愛香口的東西.

 芝士焗彩菌批。這一味是有點西化的, 用了牛油蛋撻皮, 加入切碎菌類再鋪一小片芝士焗成. 特別, 不過我不吃芝士...

 荔香燴露荀茵。是夏天菜, 因為當中加入了荔枝和杏肉, 雖然是濕炒的, 卻相當清爽.

 姬松海底椰百寶湯。這個湯比較椰味重, 可能是椰子 "太靚", 有椰油在中間, 椰漿我是十分 ok 的, 可椰油就有點牽強, 這個只喝一碗便算.

 照燒釀茄子。很好, 個汁較得好似葷食的... 阿彌陀佛...

 椰香雜菜咖喱。這個的素魚蛋也很像, 咖哩很淡, 椰味不太重, 但份量十足, 吃到這時大家都已經「手停口停」, 剩下一半要打包拿走.

 香草付皮卷。這個表面看來沒特別, 原來是泰式的, 有青檸香茅和辣椒; 好在女王這時已經食飽晒無吃, 唔係一定喊咁口.

 白玉味噌浸時菜。白玉是他們自家製豆腐, 滑得要命, 豆味也不錯; 加了赤麵豉意想不到的好吃. 菜是油麥菜, 也很配麵豉味的. 赤麵豉做得幾清, 因為整晚都是豆類和菌類為主, 這碟多點菜可以吃.

 有營十穀飯。 黃油法包。這是用來配那道咖哩的.

 圓玉杞子桂花糕。 生磨合桃露這個桂花糕加入了點蒟蒻, 有點韌韌的, 有少少嚼頭, 好吃.

一晚下來, 幾乎道道菜也有特色, 而且賣相都不俗, 下次當然可以再來, 不過價錢比想像中要稍微偏高一點, 要差不多二百大洋一位. 當然, 以私房菜來說絕對不貴, 不過用料方面其實很多都不是特別名貴的材料, 素食來說, 這個價可以食兩至三次東方小祗園了. 不過起碼夠特色, 我們也見到其他檯都全滿, 而且有不少外國人來吃 (但又完全不覺得他們是 "鬼佬中國菜" 喎!). 又是香港少見的菜式, 所以整的來說有 85-90 分了.

一個擁抱

2011-07-26T19:06:00.001+08:00

近日老朽和夫人兩個的工作都似乎有點怪問題.

證婚生意算係不錯, 但因為本身有其他工作在身, 而且夫人一直不想我接太多而在週末晚上 (證婚的旺場時間)放下家人 (尤其係佢同女王), 而且我一直都堅持每個月最多不會接多過八對新人以維持服務的 standard, 是希望可以達到 "貼身貼心" 的水平, 所以不能接得多, 差不多有一半不論是自己找我的, 又或者是朋友介紹的都要 "彈走".

但近幾個月下來, 其他更 "搵錢" 的業務上, 公司的老闆們似乎有點怪, 我自問工作上沒什麼問題, 起碼公司內有我份幫忙的大客戶對我的表現亦是滿意的. 不過老闆們, 包括之前比較 "老友" 的老闆們幾近兩個月和我可以說是零交流. 連新的工作也沒有交下來. 好在自己有些之前做落的 file 和客戶尚有些起色.

我知道公司大路的客戶近月的生意是少了一點, 但總不成完全沒有吧? 我也見到其他律師還有少量新的案件會接下的. 而我就比較奇怪, 找過有關的老闆傾過, 得到的回應只是說 "有新野就畀你啦", 之後又係不了了之.

但同時靠自己接下, 當原告的客戶, 又竟然相當 "不幸", 有近一半是有機會和我們各位老闆本身的大客是有對抗的. 在有機會有 conflict 的前提下, 我不能再接這些原告人當我的客戶. 眼白白睇住o的工作 - 還有錢 - 飛走.

大概是時候想想我在這公司的前途了.

一方面大老闆要 "捽數", 在早兩年我是完全沒問題的, 究竟今期的問題在哪裡我自己真的莫名其妙.

雖然我堅信上主為我安排的道路必定是最好的, 但這些時間, 我是人, 人就難免會有不安的感覺.

夫人工作又是差不多, 卻是和我倒轉, 我是突然沒有公司指派的新案件, 她則是被一名上司和另一名和她差不多同級的同事 "夾擊". 質質質晒一大埋工作給她去 head 住. 弄得她透不過氣來. 雖然再上一層的老闆對她很好, 但大家都知道, 頂頭那位不順的話, 幾叻都無運行.

所以夫人開始搵工. 大家都不知道她之後會不會很快的成功, 而且也不知道之後的工作會如何. 不過這一刻我知道夫人真係好 "頂唔順".

問心o個句, 我工作和客戶溝通相當不錯, 起碼得到客戶的信任, 但大老闆不是要一個和他一起找客的人, 而是要一隻牛, 就是默默工作的 "乖仔". 但這不是我的性格. 之前他要留住一些客戶, 而且有客戶指名要我一起去應酬和幫忙, 所以故意讓我一起. 我知他心中其實有點不服, 為何自己條 "o靚" 竟然會被大客 "睇中". 老實講, 我自己都唔知.

但當這客戶的生意定下來後, 他們公司最 "lum" 老朽的高層又辭職和退休, 大老闆便乘機 "飛起" 我, 那些應酬的飯局就不再要我去了, 連帶, 相關的 file 都少埋.

雖然明眼人一睇就知你忌乜, 不過我既然無心撬客, 你咁防我又有咩用?

最慘就係我根本唔知之後會點, 如果知道係死梗o既, 那我出去闖吧? 但另一方面, 這公司的工作時間和文化相當自由, 有得揀的話, 我希望留下.

就是這樣, 我心內就是不踏實.

當然, 我多謝大老闆咁「睇得起」我, 覺得我可以有機會構成威脅.

可能以前都寫過, 每天不論怎麼也好, 兩公婆有咩開心不開也, 甚至鬧晒交又好, 每天晚上我們一定會給對方一個擁抱, 現在就加多一樣就是和女王也三人一起.

以往當我或者夫人心內有不開心的事時, 一個這樣的擁抱, 不一定 (多數都唔得o既...) 可以解決問題, 但最最最起碼, 可以使你心內泛起一陣溫暖, 讓你知道有人關心你的. 也是替你充電, 等你明天可以繼續應付那些怪獸...

真的, 不要吝嗇你的擁抱.

夏日好煮意 - 咖哩白汁「加冕雞」 (Coronation Chicken)

2011-07-23T13:46:00.000+08:00

早前試過幾次做小食時將素沙律醬加入咖哩粉後用來炸素卷, 又或者用白汁加了咖哩粉來做一個少少辣的吞拿魚醬給回教的印傭們試吃, 當時只是一時口痕手痕加身痕, 沒想到原來這個東西是有名堂的.

上星期尾上完庭行金鐘超市, 見到有一樣英國佬醬料叫做 "coronation sauce", 成份竟然是咖哩和白汁為主, 加入一些乾果和香料. 好奇之下回家 search 一下, 原來大有來頭. 係當年英女王登基時所食之午餐之一, 到她老人家 2003 年登基 50 周年, 就改用了青檸去配白汁來做雞沙律 pasta 送給出席露天 concert 的嘉賓民眾當午餐.

當年係英女王的一位花卉園丁想出來的一道菜, 因為女王話打勝仗得o個幾年, 百廢待興唔想大使, 所以只係煮個牛扒整個清湯, 沙律就用呢個 "咖哩白汁雞". 當然, 仲加了些八角丁香之類印度香料 (因為當年印度都係剛脫離英國統治). 而家呢款菜式多數會用來夾三文治之類, 所以雞肉會切得細少少, 有時還會加入提子乾. 亦有說會加入芒果來吃的.

因為表味重, 有時也無需要落底味 (即醃味), 不過如果醃的話, 醃雞肉的時候最好加些少少酸的如檸汁/青檸之類. 可以中和香料的重味 (因為之後仲會加咖哩, 白汁未必夠重酸味). 有幾個可以參考的 recipes, 雖然看來無一個似係 100% 真係當年英女王那個...

http://www.timesonline.co.uk/tol/life_and_style/food_and_drink/recipes/article1980009.ece

http://www.retrofoodrecipes.com/coronation_chicken.html

想再簡單一點, 真的像我一樣切碎雪雞肉後輕輕炒/蒸熟就加醬料, 已經可以呃得o下人了. 當然, 加些洋蔥碎,再用來撈沙律或者配意粉食, 看起來有多少少誠意的. ^^

女王升呢...

2011-07-21T18:41:00.000+08:00

經過一年的 "學習", 女王的 pre-nursery 生捱完成. 似乎, 過得十分十分之快.

上星期收到學校的 "成績表", 就是什麼發展評估的, 想定之內, 女王所有 aspects 都係 "w", 即係 "發展良好". 而老師的評價都十分正面, 只係英文老師覺得有時女王有少部分活動要再有 "further practices", 主要, 係英文的理解未夠好. 所以我們亦已打算安排女王去上那間好出名又好貴的英文學堂補習一下. 夫人話係二百七十大洋一堂喎...

似乎靚女老師們都好開心知道女王和一半的同學會留在原校繼續 K1, 其實我真的有少少意思送女王去香港島唯一一間比較有名的天主教幼稚園的, 不過地點稍遠之餘, 又不太想女王那麼快又要再適應新學校, 所以便作罷.

派了 "成績表" 後兩天便是家長日, 今次學校可能汲取上次家長們死 "lur" 住老師唔放的經驗, 竟然想出了 "圍抽" 的方法: 就是將家長分成四批, 和小孩一起去學校觀察他們玩, 一邊就和老師傾, 但全批家長只有共同的半小時, 之後就要讓另一批家長進入. 即係得啖笑, 加上老師可能見大家都就放暑假, 真係比較 hea 少少; well, 同埋睇o下o的靚女 miss 著套裝囉... -_-"

不過比較有 gimmick 的是學校幫女王影了一張畢業相, 話PN 班都算係畢業所以影; 又衰o既, 雖然教育教學唔應該注重呢o的 gimmick 野, 不過真係幾靚, 我同夫人都睇得好開心... ^^"

之在最後那天是開七月份的生日會, 女王回家後話英文班主任 "喊呀佢!" "唔捨得我呀". 咁我問老師有無o係度 "木" 起個咀捽眼, 佢話有, 即係斷估都係講笑o者. 反而女王就感覺到出年返學會有第二o的老師, 就無啦啦話自己唔捨得靚女班主任喇. 最抵死係班主任在家長日最尾每個學生都 "攬o下先". 哈, 我都想畀佢攬o下. XD (純粹搞笑, 切勿以為本元帥係好色之徒呀o下...)

女王呢一年的確係叻o左, 近月又開心扮講英文. 好好笑, 不過同樣頭痕 (直頭係頭痛!) 就係女王竟然唔知幾時拎起支原子筆, 在家中走廊的每一幅牆上都畫了一些 (不是工整的) 花紋和條子, 呀~~!!! 激死我喇, 新裝修整好o架咋...~!~! 好認真咁同女王講, 搞到佢驚驚, 但我真係一o的都唔算鬧, 之後就話要影低佢 (佢就識驚喇, 唔知點解女王好怕畀人 "拍下罪證"). 其實因為我知我自己細個都有畫花牆, 呢個可以話係揸筆的必經階段, 所以都諗住在其中一幅牆上貼張巨型紙讓女王塗鴉寫字, 總好過她四圍畫...

一路在想女王放暑假有咩可以畀佢學, 殊不知原來成個暑假都係得三星期, 所以最後決定只係畀佢o係樓下玩一下普通話唱遊和準備八月返英文班, 九月才開始學音樂好了. 呢個暑假就等佢真係玩o下囉...

不過, 一班同學的家長原來都已經在 "密謀" 搞活動, 上星期就去了一個收費的室內遊樂場和食 pizza, 下兩星期就會去個 "親子整蛋糕班", 有呢班 fellow 家長一齊搞活動, 真係煩少好多, 而且 "團購" 仲有得平, 直頭係正! 所以我同夫人都好樂意參加. 起碼唔使下下自己想星期六日有咩搞丫嘛!

夏日好煮意 - 橙花魚柳

2011-07-18T18:55:00.002+08:00

又係夏天菜式, 而且係我睇完一堆不同的食譜後撞出來的一道汁醬.

一早就想煮橙或者檸檬味的菜式, 因為那道 "街外味道" 的醬汁為我來說有點令人神往. 硬係覺得, 要大廚的功力才煮到這類的醬汁出來.

素知 "煮橙", "煮檸檬" 係好 "蝦人" 的, 因為好容易變得酸, 苦, 又或者直頭似係 "美女廚房" 入面o的女仔煮到衰晒咁樣, 只將橙係咁意煮了一會, 變成一陣垃圾的酸臭味.

上星期六讀了萬里機構的《大廚醬汁菜》之後, 再參考了江獻珠前輩的「橘子肉」食譜. 自己就膽粗粗試煮一下這個橙花汁. 不過我用的 "方" 既不是書中所述, 也不是江前輩都提的. 但無論如何都是先煮了個汁, 之後再炸了個已醃了底味的魚柳才燴在一起的.

個汁又唔算太難, 不過 "橋妙" 在於幾樣野: 橙皮, 吉士粉, 橙酒.

我自己的最終做法是:

先將一個橙對半切開, 中間切出一個 "圈" 的橙肉+皮來留用; 剩下對半的橙榨出 (如不會用濃縮橙汁增味的話, 要用兩個橙才夠幾個人份量的汁) 的汁, 另外將此橙的橙皮青 (即不要白色部分) 刮出, 加入橙汁中. 用刨絲器刨出幾絲長的橙皮來使醬汁出來時有些視覺效果.

切出剛才那個圈的橙, 連皮切細粒. 先用細煲開砂糖水煮這些橙皮三兩分鐘至微滾, 變成 "蜜餞". 之後加入一小杯 (幾十 ml 左右) 的橙酒 (我用 grand manier), 半杯 (70-80 ml 左右) 的白米醋 (有人會用一個檸檬汁) 同用好少水開了三湯匙左右的砂糖, 一起煮至少少滾. 待酒精揮發一會. 之後加入又係好少水開了大半茶匙左右的吉士粉, 見到會好黃好黃的顏色, 和有香味的, 加入同煮.

加入剛才的橙汁+橙皮青 mixture, 攪勻, 記得試味看看夠不夠糖. 之後再煮至滾. 再試味, 慢慢煮到少少收汁就可以了. 但這時不要下生粉, 因為都未煮完個菜.

而那天, 就在下午四點幾想煮定個汁的時候, 發生了小插曲: 電話響起.

是外父大人... 哈哈, 原來佢老人家喊悶, 但又不好意思說過來找我們和逗孫子, 更加又擔心化療到 "第三四針" 的姨仔 (前幾天她很不舒服), 於來打來就只說 "你地今晚會唔會和姨仔玩o下 web cam 呀"

初時我都唔醒水, 仲話 "或者啦, 我煮緊飯, 煮完食完就睇時間囉"

"咁唔阻你住喇"

"咪住..." 我終於 "覺悟", "一係咁丫, 唔嫌棄呢, 你同外母都過來食丫"

"唔好喇, 阻你地" 仲係鬼咁客氣, 畀佢激死.

"過來啦, 我買多o左菠菜食唔晒呀"

"咁你煮咩呀, 我買隻雞過來丫"

"橙花魚柳... 呀!!" 我猛然記起, 外父不喜歡吃酸味的東西... "畀個電話外母大人丫, 我同佢搞掂買咩啦o下"

最後, 我決定會照煮個橙花魚柳, 不過呢, 白醋份量減了半, 因為真的怕外父不喜歡. 另外再加多了半湯匙糖.

係o架, 好甜o架. 但係一次半次就算啦. 煮了個汁, 自己聞一下, 都已經覺得好鬼似出面的酒樓了.

魚柳係咁意用鹽糖胡椒粉醃一下. 印乾後上炸粉脆漿炸起, 當然, 最後要所有魚柳再一次回鑊大火炸半分鐘才可以 keep 到脆耐o的.

再用乾蔥和洋蔥切絲起鑊, 炒軟身後 (不要轉色) 加入個橙汁, 這時才用生粉開水當埋芡. 最後下魚, 兜兩下好熄火了, 唔係個魚又唔脆喇...

因為減了酸味, 外父都好鍾意. 唔計酸味減了的話, 直頭有出面酒店中菜廳的感覺, 尤其係夏天呢o的時節就真係啦. 最緊要其實係女王見到有橙汁, 用來撈飯食得好快好快... 而且夫人都話 "呢個我覺得應該 encore 整多次".

進場點算好?

2011-07-16T12:40:00.002+08:00

證了 "n x 100" 咁多對新人, 因為時間和地點的關係, 大家的進場方式也有不同.

因為要 confirm 行禮的時間和 firm 埋張證書的內容, 就剛剛和一對一星期後行禮的新人傾電話, 他們想了又想, 想了幾星期也未決定如何在他們下午 5 時的婚禮進場才好. 或者在此分享一下一些我見過的, 又或者是我提議過的方式. 也當是一個 memo 讓自己日後也記得.

講得唔好聽一句, 新人點入場關個律師鬼事咩! 不過, 我就係八卦之餘, 真係希望新人可以有個自己鍾意又難忘的婚禮, 所以我寧可冒畀人話我係 "八卦律師" 的風險, 都會同新人傾埋呢樣.

大路來說, 主要當然是分 "一對新人自己入場" 或者是 "新娘入場, 新郎在台前等候" 兩大類.

而最簡單的, 亦有是沒有進場, 直接由司儀/律師請新人上台, 不過多數香港的新人都會希望有進場的環節的.

新人自己入場的話, 有時又可以考慮兄弟姊妹會不會一起在前頭進場, 又或者行前面時, 每幾步就有一對兄弟姊妹停下在兩側, 手持汽球或者花炮之類的, 待新人進場時造出一條 "路".

當然, 新人進場, 有時又會係一番的喜慶多出西式的浪漫. 正如有人會放炮, 但新娘如果自己入場, 或由父親/兄長陪同進場的話, 就不會, 也不應放花炮了. 因為, 形式上未 "禮成".

在西方, 一般傳統是沒有 "接新娘" 的環節的, 新人在結婚當天是各自去到教堂, 新郎先入去打點一切 (包括交租場錢畀神父牧師/奉獻) 新娘隨後在家人陪同下才到. 這樣就做成了新郎和神父牧師會先在教堂內祭壇側等待新娘的傳統.

以前新娘必定是在父/兄等男士長輩陪同進場的, 因為在父系社會, 一段婚姻需要有家長的 blessing (首肯) 才算是正統的. 後來不少人也覺得母親地位不亞於父親, 所以有時也見到由母親帶新娘進場的. 而且, 多數都會有一班姊妹 (不一定是一位) 陪同出出入入, 呢一項就有好多傳說, 其中最多人說的是因為千年前有隻結唔成婚的新娘化為一隻哀傷的女鬼, 時常整蠱行禮的新娘 (又唔係要攞命咁大劑o既), 所以為o左 "混淆視聽", 行禮時就會一班女仔一齊出出入入, 呢個同出門用紅傘呀, 撒米擋金雞倒有點異曲同工之妙...

到了現在, 新娘獨個進場已經是見慣了, 有時攝影師甚至會在影相時故意留些時間來拍新娘一人 "扮進場" 的片段, 因為出來的構圖其實很美.

另一方面, 曾經在一次教堂婚禮幫手做讀經, 那位頂癮神父 (網名大眼神父, 佢仲有個 blog 的; 天主教友一聽多數都知我講邊位) 話 "既然香港/中國新娘一早已經過o左門, 咁即係唔使由父親帶入來了" 可能神父係想用來安慰父親已經不在的新娘, 又或者係真都未定; 不過神父所言又的確係事實喎! 所以我此後都會畀多個意見新人參考的.

新人如果自己入場的話, 亦有多個選擇, 有時可以係兄弟姊妹一齊進場, 他們行先, 台前 (又或者沿途) 列隊, 呢個係 "喜慶" 一點的做法. 不過有新人曾經提過不希望在莊嚴的證婚前太過喜慶 feel, 想留返在成為合法夫妻後才特別的 "慶祝".

另外就仲有一種不得不提的人物: 花仔花女.

他們可以係好多 "事實" 的人, 亦可以話係全天婚禮之中, 唯一係可以 "出錯o左都無人會責怪" 的人. 因為, 小朋友大晒.

花仔, 英文名是 Ring Bearer, 就是 "持戒指人", 老朽當年幾歲人仔, 唯一一次做花仔就係拎戒指枕進場的, 好在都叫做 "幸不辱命".

現在花仔花女 "活躍" 好多, 有時真係叫極都唔聽, 不過又放心喎! 小朋友好奇, 平時幾曳幾唔聽話都好, 一到o左開始行, 多數都會怯一怯, 正經起來的. 唯一擔心係 - 唔肯行.

另一擔心係, 行到一半行返轉頭. 咁就連行禮戒指都無埋, 又或者花女 "返頭", 怕唔 "老o黎".

well, 我當時花女就係咁, 做伴娘的姨仔即刻黑黑地面拖佢返來.

不過唔使驚, 我同夫人今時今日仲好恩愛.

女王三歲了... (Part II)

2011-07-14T18:25:00.000+08:00

女王生日, 當然仲有好多不同的節目, 說穿了其實都係 "巧立名目" 來等一家人可以一起出去玩玩, 又或者搞些動作來聚聚而已.

前文說過, 在女王生日正日後數天, 就是學校的生日會. 剛剛收到女王學校的相片, 原來生日的 "主角" 竟然可以安排影一張 "造型照", 女生就會在 backdrop 前的一張道具 cutie 化妝檯旁, 有個巨型的假生日蛋糕和幾盒他們那天會吃的小食盒 (直頭似係而家無線o的劇o既贊助商咁款的放在一旁扮無野地賣廣告), 女王就好似有時我幫佢影樣咁 chok o左個 "v" 字樣出來. 係要笑鬼死你為止 - 不過, 又真係幾 cute o既...

七一那天我們一家沒有去遊行 (雖然其實都幾想去), 反而是早前應承過女王要去野餐, 跑不了山頂那麼遠, 便 "近近地" 去了香港公園. 其實去年兩歲也一樣去了香港公園, 不過不同的是當天是去玩遊樂場為主, 搞到身水身汗的. 今天就真的是為了玩野餐加 hea 下.

之前一天準備了 (無錯, 係由我準備的, 似乎夫人已經習慣了由我整野食, 亦係咁導致以下的黑面事件...) 小香腸做的 mini 熱狗, 火雞肉軟腸 (bologna, 不是有嚼頭的火雞火腿) 三文治, 蕃茄仔, 蟹子沙律 (我臨出門口先加沙律醬避免 "生水"); 女王都飲得到又鍾意o既藍莓汁, 仲有我同夫人都鍾意o既 "冬蜜青檸" 飲品. 一抽二拎的都係放在我的大背囊內 (是 2010年冬季奧運會的義工背囊, 身在加拿大的大細妹不知是否因為是贊助商的高層所以唔知點整o左件義工衫和呢個勁好用又防水防雪的大背囊過我用). 成個阿四的出發了.

女王就簡單地揹了我秘書送給她的生日禮物 - winnie the pooh 造型小水壺乙個. 至於夫人... 我都唔記得有咩拎了, 好像是由她照顧女王所以 "免役" o卦.

無錯, 個 list 係無相機o既. 因為已經好多野, 而且凍飲和沙律又用個冰袋加一隻保冷劑放在一起. 所以只係用手機做相機 "頂住先".

本來野餐都好地地, 不過唔知係咪熱得滯, 到o左地點 (係人工湖邊), 將食物取出後, 夫人一吃就說她不喜歡這款火腿, 之後只吃了少少就再沒有碰過三文治, 只吃了一隻 mini-dog. 人家整得辛辛苦苦, 唔 appreciate 仲要話我唔問o左佢先. 所以我都頂唔住, 幾好老脾都黑o左塊面; 加上連女王都係吃一件就沒有再吃, 連 mini-dog 個樣咁鬼 cute 都唔食, 所以我一個人吃了兩個大人的份量. 飽, 不過真係少少嬲.

好在夫人就狂隊o的蟹子沙律, 女王就係咁話要像果汁和食蕃茄, 唔係要拎返返屋企就仲激死!

之咁, 兩公婆邊度有隔夜仇o架... 食完之後無耐我地行去溫室 (其實係夫人諗縮數唔想留在室外太久); 行得兩行, 講真一家大細都倦到死. 最後竟然係... 入o左 Island Shangri-La o既 Island Gourmet 食 tea 同買 cake 食! 最抵死係之前去開的經理同大部分認得O既侍者都咁O岩不在場, 初時班細o既唔認得平日著西網幫襯o既老朽 (o個日又係幾爛身爛世o既...), 當我地三個透明, 係到o左我地 order 完, 我拎佢地張 VIP 卡出來就即刻唔同晒樣 (我覺得, 係都唔好做到咁出丫...) 又問使唔使 compliment 多o的 jam 呀之類畀女王食 scone 用.

之後一天就是 2/7, 是「總理各國事務衙門生日會」就是和其他親戚的小朋友開的生日會了. 暫時和女王的同學們未太熟, 所以沒有請他們來 (後來再有活動, 遲少少再記下).

一早訂了美心的 catering party food, 都係o的大路o野, 之後整個沙律 (今次都係海苔櫻花蝦, 不過人多, 所以加了一包意大利 romain 和夫人至愛 - 荷蘭來的牛油生菜) 就算. 但原來我 order 的東西大多是豬類, 而親友中有兩位印傭姐姐都是回教徒. 為免平日都好勤力的她們無咩食, 所以我另外自己做了一款咖哩吞拿魚茸配意大利香草餅給她們吃.

吃什麼是其次, 主要都是親戚上頭聚一聚, 又等女王可以和其他小朋友玩埋一堆; 亦因為咁我去買了些汽球即場吹給他們玩 (當然係用泵, 我可沒那麼好氣吹咁多波) 又買了幾套迪士尼的 party 帽&小玩具套裝之類的 (去 Toys Rus 買了一套才知原來灣仔玩具店都有仲平10%!), 希望氹到女王和一班小朋友; 事實證明, 小朋友們真係十分受落.

亦都例牌, 叫到成檯野食, 其實最為食的是我... 不過, 無入鏡的蛋糕牌上是寫上 "Happy Birthday and thank you Mom" 的.

女王是一個絕不介意和人分享的人, 她有呢樣好處, 幾時都好, 當晚也一樣, 有小朋友想要一件玩具的話, 她多數都會 (有時都會猶豫一下) 讓給別人. 這個據夫人說是去年在學校 interview 時已經見到, 亦相信係學校收女王的其中一個原因云云.

不過那晚都真係玩到 "創" 晒. 成十工點幾先肯去訓, 直接影響之後一天的單車「大會」...

3/7, 起床已經是十點有多. 已經去不了教堂早台 mass, 連帶單車大會也只可以近近地玩.

何謂 "單車大會"? 就是爺爺送給女王的生日禮物 - 藍色 (女王 favourite) 米奇三輪單車, 可以後面有家長輔助方向那款. 我們原本想走遠一點, 去太古城外的公園玩的, 但因為遲了, 而且夫人又勁怕晒, 所以唯有在自家樓下的屋苑花園當是練習好了.

第一次踏單車, 都不會預期她可以好順利的自己踩到. 行到幾步幾呎的已經算還神了. 不過女王都係貪新鮮, 見踩來踩去都係o個度, 又無咩小朋友一起玩, 所以半小時後已經喊悶要回家.

三年前, 見到的是一舊飯, 個樣似爺爺多過任何人的女王, 如今已經o係度咀 "jiao jiao", 一個在家一舍模樣, 在學校又係另一個乖乖女樣的女王. 又繼續講下大話 (真頭痕...時時問佢邊個整亂地方就會話 "婆婆 (或麻麻)", 但即時就會叫我地 "唔好打電話寺問佢呀" (真係笑鬼死你...), 又成日收埋我們的物品 (有時仲會收埋野食呀撞鬼, 試過成個蕃茄畀佢放o左入書櫃! 好在發現得快), 亦間中扭計, 不過, 她依然係個好可愛的女孩. 起碼, 她一定不會在商場鬧我和夫人為什麼帶她去像茶, 因為, 女王出街食飯都真係算相當定, 多數都可以 "支持" 到食完飯而不會扭四處走. 其他家長見到有o的直頭嘖嘖稱奇.

同埋講多句, 女王下午訓少了一小時, 有時也不再訓晏覺 (我就覺得有得訓晏覺先係最正!), 佢又開始對英文有興趣, well, 不過講埋o的多數都係聽到你耳都側晒的 "假英文", 但係聽起來就更加好笑.

人地話三歲定八十, 唔知女王之後會係點... 有少少老歌 "Que Sera Sera?" 的意味...

女王三歲了... (Part I)

2011-07-09T13:00:00.003+08:00

女王三歲了.

早前聽了一間 "高質明星幼稚園" 的講座. 當中不知是真的為了小朋友好, 還是氹家長的, 提到: "生日應該由小朋友多謝父母, 而不是只慶祝出生". 老朽自己是這樣作的, 所以農曆生日會和家人食素, 係唔係真係 "積福" 倒不太清楚, 起碼氹到父母開心先.

不過, 不慶祝又不太似樣, 所以在農曆生日 (碰巧是星期六), 農曆生日當天, 除了煮隻雞蛋畀女王食之外, 就是夜晚和爺爺麻麻公公婆婆去吃飯慶祝. 地點是夫人揀的, 因為也是感謝她作為媽媽嘛. 結果選了時代廣場新開的 "利小館", 是利苑的 "新派版". 他們的食物選擇也算多, 大江南北也有, 服務也不錯; 不過有樣不好, 就是只有長形的檯, 一家如果好似我們一行十多人一起食飯時傾計比較難.

為o左個女真係想食, 所以隻蛋係烚至8成後 (未熟到入面變粉黃) 加上 mayonaise 同埋黑松露醬, 洒上少少鹽花的, 不過因為趕趕地, 所以, 又無用線 "界" 開, 又唔係切得好靚...

而那天的下午, 就去了一個十分 "正" 的地方, 就是香港小交響樂團的小孩 concert, 專門為幾個月至幾歲的小孩而設的. 當中有人介紹不同的樂器和部門, 再用很多耳熟能詳的樂曲串成個小故事, 加上場內佈置得好像幼稚園一樣, 女王見到都好喜歡.

我原來是不知道這個咁好玩的 concert 的, 不過我有一對證婚的客人, 新郎是「小交」的樂師, 而在他們完婚後都成了我的好友, 他們也剛新成了父母, 所以他就主動找我問我有無興趣帶女王去聽. 果然係好介紹, 我都向朋友推介, 留意一下他們的 concert, 真係好多小朋友都有去聽, 而且氣氛甚佳, 同其他小朋友一樣o係個位度跳晒舞, 回到家中女王仲不斷嚷著要做指揮和唱歌...

至於正日生日呢, 因為是平日, 所以只是夜晚在家中我們三人靜靜地吃過飯後再切一個小小的蛋糕慶祝, 是個小型的天使蛋糕; 不過不是在大店買的, 而是在我一位朋友開的蛋糕曲奇店買來的. 這店是她和她 "師父" - 就是現在電視台廚師比賽節目的評判之一. 她們的蛋糕甜味比較輕一點, o岩女王食.

比較搞笑的是學校的生日會. 之前靚女班主任請夫人去和一班小孩一起玩. 後來仲話我都可以參加埋一份. 等我仲以為係生日的學生家長就會去, 而且仲可以陪他們起蛋糕之類. 點知原來只係和他們玩一小時, 之後我們便要離開 (可能又係那句: 學校不想我們 "阻住晒" 吧...), 而且原來只有我和夫人去到 (又或者係其他家長請不到假). 最大劑o既係...

我遲到!

最後呢, 夫人就和女王 & 同學玩了大半小時, 我就得半小時, 仲要中間有一陣係示範 London Bridge (係同夫人及幾位老師一齊, 成班大人大姐o係度玩, 仲畀老師影o左張相... 笑死). 不過夫人就相當相當受歡迎, 因為佢負責派貼紙畀同學! 我呢, 大家就記得早幾星期我講故事, 仲有同學問我會唔會再講故事添!

之後幾天仲有好多節目, 仲笑到反肚, 亦有搞到我黑黑地面的...

父親節2011 - 後記

2011-07-05T01:01:00.005+08:00

緊接著父親節的就是女王生日, 所以父親節後一星期的節目既是老父安排, 又當是成家人的 "outing".

家父有好些攝影界的朋友, 其中一位是他玩數碼機的 "師父", 又是大嶼山大澳區的 "地膽" 加鄉事派前輩之一, 早年帶他和一班 "同學" 去大澳拍攝龍舟競渡, 大家玩個不亦樂乎. 今年老父就自行前往, 並且和 "師父" 打個招呼希望找個靚位影相兼 "摸o下獎杯" 云云. 而且他又一早應承了和當年一起共同對付 "田X地產" 搞收購舊屋時的部分街坊食飯, 所以就搞了個小旅行出來. 呢個亦係女王3歲生日前一天的活動, 所以又多了半重意義.

一班舊街坊對家父可以話係極之尊重, 除了因為他年紀頗大之外, 更緊要係當年他組織了近 4 成的業主一起成功o係某大發展商同 "田x" 手上得到 08 奧運前 (亦都係雷曼事件前) 的最高收購呎價. 不過家父此後不知是否用得心神太多, 在收購完成後蒼老得很快.

怎樣也好, 除了有三戶在外地和一戶來不了之外, 我們一行十幾人就在上星期日出發. 打算去到東涌就坐巴士去大澳的.

因為夫人和女王也一起, 所以在東涌大家便行到 "散修修" 的. 到巴士站時, 我還在望著女王慢慢行, 突然有人向我叫道...

「你老豆跌親呀~!」

我直望十米前, 就見到家父成個人已經完全趴了在巴士站地上, 正有街坊扶他起來. 他起來後用手捂著前額, 而這時, 我已見到他手指罉有血流出來, 似乎都幾嚴重.

隻手一拎開, 嘩! o的血 "吧吧聲" 咁流出來, 用紙索都索唔切, 滴晒落地, 咁o岩女王由夫人抱著來到, 見到咁o既場面, 嚇到定o左鏡完全無晒表情黐住夫人唔放. 我阿媽因為天生驚見血, 一樣係定鏡中.

同行街坊說是巴士站的欄杆凸出位絆到他的, 我當時其實都有少少驚, 但記起我是家中除老父外唯一男丁, 總不能叫其他街坊指揮處理吧? 呢個時候老父呆呆地問道 "有無帶「平安膏出來」" 和他一起住的妹妹說沒有; 又問使唔使買 (佢都好醒) 我定一定神, 就想到既然老父 "信賴" 平安膏, 就叫妹妹即時飛去藥房買o左先, 用唔用一件事, 起碼等老人家定o的先.

即時使出當年醫院學回來僅有的急救術, 問老父有無頭暈有無擦到其他地方, 叫他用厚紙巾 "apply pressure for 5 minutes". 同時請街坊通知其實似係o係度聽緊馬o既站長, 站長當然唔會 "揹飛", call o左救護車來先算.

妹妹的平安膏和救護車差不多同時到達的. 這個時候有個好心的過路人畀o左一包全新的紙巾我, 又遞來兩條消毒膠布可以封住傷口先. 老父堅持要先塗點平安膏, 便先塗一點 "止住咳先".

和他上了救護車, 好在救護員檢查過後話應該 "只是" 撞爆額角位, 沒有傷到入面和腦部; 包扎好後問他去不去醫院, (他同時畀 "個人意見" 說 "其實多數唔使, 但係當然你地決定啦, 要就去瑪嘉烈") 家父覺得太遠驚玩唔到, 又識得講笑咁款, 所以我和救護員再三問清楚後簽紙便下車; 不過救護員就包扎得比較 "厚身", 可能是因為救護車內沒有太小型傷口用的 "哥屎" (gauze) 和包扎紗布之類吧! 他們另外給了我兩包 "四吋哥屎" 和一支 trisep 洗傷口用消毒水. 都是我當年在夫人割纖維瘤時學過用來洗傷口的, 救護員就說有需要時, 又或者傷者大汗要換 dressing 時可以幫他.

各大夥道個歉 (點都係搞遲晒成隊人, 足足大半小時) 後, 繼續上路, 亦因為遲了, 所以大家一到大澳就決定食o左飯先.

用飯的地點, 老父選了 "海韻", 原來是之前蘇施黃推介過的, 家父以前來過, 還認得他們的大廚文哥. 而他們最得意就係分開葷食和素食兩款, 而他們的雞係 "唔知點解" "咁似本地自養雞". (答案自行想像), 好老實說, 我真係好耐好耐無食過咁濃雞味的雞了. 正到不行. 而其他小菜和他們的素炸酥盒也一樣係十分精彩.

當然, 我一直沒有忘記家父的傷口, 自己都覺得有少少不厭其煩的每十分鐘問一次. 是到了下午開始真係去到海邊睇龍舟決賽時才作罷, 不過因為遲晒大到, 主看台已經爆晒, 所以都無去和他師父傾計 (都費事畀佢見到老父包到成個豬頭咁款啦); 只在終點影o下相, 行o下大澳買點東西的, 費事同人迫了.

最大的獎杯賽勝利一刻...

那晚和老父回家, 和夫人 & 女王決定留下來和他們吃晚飯, 先和他去找個醫生看一下安個心 (去醫院排餐死又費事, 暫又無打算真的追究責任, 所以不去醫院了), 點知星期日中環和半山的醫生都去了休息, 走了近根本無醫生在.

既然如此, 唯有是我幫他洗洗傷口, 明天才去看醫生了.

好耐無替人洗傷口, 也沒有想過有天會替他洗的, 但我開始倒 trisep 的一刻, 就馬上想起細細個時我病了的時候, 父親冒雨揹住我跑去睇醫生, 到了出來做事後不足一個月, 患上好勁的腸胃炎, 痾嘔了幾天, 都是家父不眠不休地替我 "刮沙" 和用薑敷的. 想到這裡, 其實心中真係感動到好想喊, 但係堂堂男人又成家人o係度, 無理由無啦啦流馬尿o架嘛, 於是便乾笑幾聲掩過, 家父問我點解笑...

「你個傷口好似個交叉咁款呀, 幫你貼兩張公仔膠布好唔好?」

父親節 2011 II - 素宴

2011-07-01T01:00:00.002+08:00

由去年起, 我在父親節會為佛門弟子的老父煮一餐素宴. 目的一來係 "tum" o下佢老人家, 另一方面, 也是當給我自己的禮物 - 或許, 我太喜歡試煮新的菜式了... 不過, 煮大菜的當下, 就要夫人看管著女王. 所以也是夫人 "送" 給我的禮物 - "時間".

去年煮的太多菜式 (詳見此處). 雖然前菜已有 "五味人生", 之後還有好幾味要煎炒炸 (不能事先做定) 的菜式, 共計九道菜. 所以煮到好夜, 十點半都未食完.

今年好一點. 有女王幫手 (見下文), 而且自己的廚藝的確有點進步, 起碼是煮得快了.

不過設計菜式一環, 依然是用了一星期的時間去看街市的菜式和修改. 改了三四次後才得出來的. 因為要盡量不重覆原料和煮法. 如要虔製真的佛門素菜, 是不可以用酒和蛋的, 五辛也不可用 (蔥蒜韮薤 [即喬頭] 渠 [即細蔥]), 因為五辛「熟食發淫, 生噉增恚」. 而且用的上湯就更不可以是清雞湯吧! 雖然我是天主教徒, 但本孝義而行, 總不能特登 "跣" 我老豆o卦?

既是如此, 首先是要做個素上湯. 因為我今年的素宴主要大菜會用不同的菰菌類, 所以就不再用重味的冬菰來做湯以免搶味. 材料變成: 粟米兩條, 黃豆半斤, 西芹三支, 啡磨菰六隻, 甘荀半斤; 煲起兩小時成三斤湯水左右. 大約夠用了.

先是前菜四喜拼盤:

陳醋雙耳 - 坊間做的是用陳醋和糖醃汆過水的木耳, 我就加了點雲耳, 而且又加一點柚子醋, 食味清新一些.

酥炸鷹爪菰 - 是先用微波爐叮至出水的舞茸, 抹/吹至差不多全乾後上椒鹽和生粉低火炸透兩次而成的. 原本我想做素食店 "心齋" 的那款酥炸 (有上粉漿的), 但不知如何使粉漿撲上後不會將成堆菰黐埋而作罷.

涼拌茭白絲 - 初時想做蒿荀 (烏荀) 的, 但找了幾間上海店也說近日蒿荀不好, 粗鞋有根, 所以便轉做 "美人腿" 茭白. 切絲出水一分鐘後取出加生抽和麻油, 少少白醋就好了. 這一味, 是女王幫手撈拌的.

赤麵豉京豆富串燒 - 買了日本木棉硬豆腐切粗粒, 慢火焗至出了大部分水後塗上赤麵豉再焗十分鐘左右.

之後是上湯羹, 很久之前已經知道有一道舊式的名菜叫做 "文思豆腐羹", 是明朝時文思大和尚練耐力打坐和達致心平氣和時所做的 "功課", 就是將豆腐切成一絲一絲的幼條, 放在湯底之中而不散爛. 香港暫時所見, 是銅鑼灣 "綠楊村" 做得最好. 我只伯斗膽試著做. 再加入青豆, 將素上湯加入馬蹄粉推成羹. 不過, 自知功力未及, 只有綠楊村一半, 也就是說比他們切得粗一陪...

這道不知是當前菜小碟或是當大菜了. 姑且叫做 "紫菜筋斗雲". 其實是麵包卷起了紫菜和素火腿後塗上混合了咖哩粉的素食用沙律醬 (無蛋的), 之後落油炸成; 卷的時候收口收得入少少, 成卷雲狀. 亦可以用生粉水或穿起一支牙籤來收口就會成壽司卷狀了.

節瓜會三珍 - 這道可是今晚的重頭戲. 節瓜乃係受物, 用素蠔油和清湯炆好後再用各自分開用自己浸菰水及上湯炆好的兩款珍菌: 雲南黑虎掌及羊肚(摩利)菌, 中間加上用日式甜醬油慢火烤成的松茸薄片. 而黑虎掌因為味重, 故外面食到的多數加入一些辣椒來煮, 我又怕太辣, 所以改用了胡椒; 而羊肚菌夠香, 不過味不太濃, 用清湯, 浸菰水和鹽炆已經幾入味了. 這幾款珍菌都可算是菌中之皇, 除非配搭用心, 否則最多只應該像這樣的分開煮完放在一起, 同炆的話好像浪費了點.

素菜煎餅 - 這個就是之前試一次用蝦來做的煎餅了. 今次用的是粟米和歐芹 (parsley), 夫人見我煮了成晚, 我開粉漿後自動請纓煎的, 她倒有心機慢慢煎, 也做得很薄, 我老媽子都話佢煎得好.

竹笙貫彩雉 - 葷食版是用穿好的竹笙炆雞的, 既然是素宴就用甘荀, 露荀和珍珠荀穿起野竹笙後, 用上湯煨過就可以了.

素三鮮鍋耙 - 清湯下藏的是鮮磨菰片, 蕃茄粒和西芹粒三種色的蔬菜, 推成芡後加上買回來的鍋耙.

最後是甜品 - 冰鎮甘栗馬蹄南瓜露; 原本是原個南瓜蒸好後挖肉, 加入忌廉和水慢慢攪勻後加馬蹄和栗子, 雪凍後放回南瓜內上盤. 不過我貪心, 想把南瓜蒸熟點, 挖肉方便, 結果蒸得太久, 南瓜外殼裂了, 不能當做盛器用. 最後, 只好改用個大碗了... -_-" 相中所見, 南瓜不算太 "茸", 是因為我沒有用攪拌器 (借了給姨仔用, 她在抗癌期間可能因沒胃口而要吃些易消化的東西, 會常用攪拌器的), 是叫女王來用匙一下一下壓成茸的. 個傻女中間仲想偷偷地擺一匙入口畀我叫住...

今晚的菜式, 我自己也算滿意, 係有部份時間關係擺盤時做得不夠美觀. 老父食完都話上得大檯. 做畀佢佛舍的師傅也都得.

當然, 我最開心除了是老父高興外, 就係有得玩. 哈哈!

父親節 2011 I - 女王的禮物

2011-06-30T04:00:00.002+08:00

今年的父親節, 因為一點一滴的小事, 變得難忘. 或者, 分開來說吧.

首先是因為姨仔繼續接受化療, 就返佢的日程表, 所以晨咁早 6 月頭已經和外父吃了飯來慶祝. 另一方面, 正日無人陪又好似唔知點咁, 所以我便提議正日晚上和他再吃一餐, 不論夫人的兩位姊妹會不會出來也好.

至於我自己呢, 就只簡單地在父親節當天和夫人及女王去了和民吃個 lunch, 不過之前的星期五就帶來了驚喜.

那天我放工後準備買部份星期六煮齋宴給我老父的材料, 身水身汗的趕回家. 成身臭晒的我回到家時, 見到幫忙睇住女王的祖母無啦啦拎佢支「高清攝影槍」出來, 以為又係影女王玩耍; 但之後我放東西入雪櫃時, 就聽到女王叫道 "爸B, 有野畀你呀!".

因為這數星期女王無故喜歡 "收埋野", 有時又講o下大話扮無知的, 令人哭笑不得. 所以, 當時我無放在心上, 直到三分鐘後.

她跑過來廚房, 見我還在整理雪櫃的素料, 之後將一份東西放到我手上, 說 "父親節快樂!"

都未睇係咩, 已經 "lum" 到暈暈o地.

原來係學校老師教她做的一張打手印的剪紙, 加上一張老師影的相 (相中的女王係作狀錫埋來的, 真抵死...), 嶔在一塊軟墊上, 成了一個 mouse pad. 呀, 還有一張由老師代寫上 "送架電腦畀爸B" (老師話你問女王想送咩禮物後才寫的), 和女王 "係咁意" 塗鴉扮簽名的卡.

雖然我都唔會用 mousepad (用laser mouse), 而且... 邊捨得用丫. 但係真係好開心. 雖然成身汗但係都錫o左女王一啖, 當然, 其實我阿媽係知情的, 全程影住我們.

呢個時候, 我只好在鏡頭側, 輕輕地用手指好快地扮抹汗, 將眼角一滴連自己也分不清是汗還是淚的水抹去.

份禮物就收得好地地的. 或者, 三數年後我再拎出來, 女王可能已不記得曾經做過這樣的一份禮物給我了.

可是, 我會記得.

夏日好煮意 - 麻香花雕手撕雞 & 香芹櫻蝦煎薄罉

2011-06-25T13:00:00.001+08:00

好熱好熱呀, 仲要又打o下風, 打唔成之餘, 下沉氣流又整到個人鬼咁翳熱.

去年整過一款 "七彩芝麻雞", (原來忘了出 post) 係很久之前在一間中環的小館吃過的. 是用甘荀, 西芹, 醬瓜(或者五柳中的酸瓜)加上手撕的雞肉, 灑上大量的芝麻之成. 是一道十分可口的夏日冷盤.

今年又做一次時, 想有點變化, 所以就改一改, 在醃雞 (用雞髀) 時加入了兩湯匙的太雕酒, 蒸之前沖一下 (不想酒味太濃怕唔o岩女王食); 蒸至僅熟後放涼手撕 (不應用刀切, 好奇怪, 切來不夠香而且沒有了咬口), 加上係咁意蒸或灼一下的甘荀和西芹絲 (刨/切也可); 撈了些日式芝麻沙律醬 (不要撈太多), 又是灑些芝麻, 竟然變成一味十分搶手的菜式. 連女王都話超正畀o左個 good 爸B呀~!

另外, 為準備父親節要煮的素宴 (遲少少出文), 最近將一些準備會煮的菜式改頭換面先煮一次試味. 其中會有一道煎餅的, 說穿了其實是煎薄罉. 又為了使女王吃些菜, 我在煎餅中加入了香芹 (唐芹) 碎, 又加了些超市買回來的台灣櫻花蝦乾仔.

薄罉粉看了些網上資料, 再向家母查詢一下 (我們老家長輩每年都會煎薄罉拜土地公的, 源頭就不知道了, 只知幾好食...) 就用了 5 湯匙麵粉, 加入 2 湯匙的糯米粉和一杯 180ml 左右的冷水開糊, 因為加入的料不同可以有所調整的. 這份量大約煎了 8 個小型 (3吋左右) 的. 煎時盡量將餅攤薄才會更脆. 煎一面分半鐘反另一面慢慢煎多一會就好了.

吃的時候可以加些白汁/沙律醬, 更加香口; 不過我太貪心, 落得太多香芹, 搞到女王食了大半去到中間時香芹味太重, 衰女剩係揀o的有櫻花蝦, 得少少菜o既來食... -.-

行山去 , 去行山, 行到半路返頭難...

2011-06-20T20:20:00.002+08:00

正所謂「子曰: 有朋自遠方來, 不亦樂乎」

和一位中學同學百揆兄相識多年, 後來兄台去了楓葉國留學 & 落地生根後, 鮮有回港, 每次回來總會問我去不去行山, 初時扭扭擰擰, 後來才慢慢和他行了兩三次.

上兩星期兄台 "無啦啦" 回來. 接風洗塵之外就特意安排了和他去行山, 是, 今次係我撩起先的.

之前發神經買了一本叫《BB也郊遊》的書, 書中述及西貢有幾條可以抱/揹BB行的路, 也是兩個多小時的光景. 既然連BB 也行得, 我們 "大人大姐", 總不會有問題吧.

就是這樣, 種下了 "禍根"...哈哈...

地點是某個平日下午, 我早了點走 (....) 和兄台在港島東我家出發, 飛的 (!) 去西貢黃石碼頭, 打算由黃石旁的 "大灘" 經海邊的行山徑行去海下, 在自然教育中心附近再乘的士走. 應該剛趕得及晚上約了其他中學同學去銅鑼灣「龍皇」為百揆兄接風. 路線就是下圖由最下一路行到最上的地點. (此圖可 click 放大)

在西貢入黃石前去準備糧水 (主要是水, 防晒防蚊等, 因為知道會幾熱), 我也找回以前買的行山 (正確來就是上山用, 直身的) 手杖; 原來百揆兄沒說他早兩天 "拗柴", 竟然為了回來行山而 "話知佢死" 照行可也. 我也是臨起步時才知道, 所以手杖就由仔所持.

真係撞佢個鬼, 原來入黃石係好遠o既... 去到時已經下午 5 點半左右. 不過陽光充足, 找了一會 (其實又浪費了點時間找正式的行山徑入口), 最後由我新電話的 google 的 gps 和 3G 網絡定位找到, 呢個時候我對於 android 就更加相信了. 而且手機有十分強力的內置電筒. 所以我們兩個傻佬就 "有恃無恐" 地開始行...

開頭景色什佳, 我和他二人都係咁影... 呢個係紅樹林.

行行下, 見到開始日落, 其實我就覺得雖然靚, 不過時間關係, 已經是 6 點20 分, 是否應該走回頭路呢...

不過百揆兄當時意興甚濃, 說道再走快一點便可; 而我又覺得應該 "捨命陪君子", 而且覺得我們也是沿海邊行, 有事起來求救也易吧...?

行到 7 點左右, 開始見暮色四合了, 其實, 我自己心內都少少打個突...

這個時候, 我們開始去到少少 "上山位". 就是地圖上差不多中間 "5" 的位置. 而這個時候, 百揆兄對腳竟然開始唔聽話...! 所以我們又要行得慢些. 同時地, 我們的電話都變了接收 "中國移動", 再進而連什麼也收不到 - 包括 GPS. 所以我找來找去都不知自己是否行著正確的路. 而且, 更麻煩的是, 我們無法找到我們原本約了吃飯的兄弟們更改時間.

有豐富行山經驗的百揆兄有少少歉意, 曾經問道 "使唔使打燈請海邊的水警來救我們?" 我初時以為他只是講笑, 後來才知原來他是認真的. 不過既然已經行到此處, 正是 "破釜沈舟" 的格局, 唯有前行, 一邊由手持行山杖的百揆兄驅趕開始出現的蜘蛛. 不過我們不論如何, 也搞到成身都係蜘蛛網...

人心急就易壞事. 我和百揆兄幾十年老友, 大家都 "幾十歲人", 深明此道. 所以決定在一上山而無樹的開揚位置 (即代表無咩蜘蛛) 休息一會. 大約是地圖上 "爐仔石" 對下的位置左右. 此時天差一點才黑齊, 我們遠望海邊之外, 點點漁火, 和有些夜釣墨魚的燈船, 其實, 景色 (尤其是日間) 應該很不錯的. 可惜我們兩個傻佬就是夜晚才來, 有點浪費. 而同時地我們又發現地上有不少 "新鮮" 的 "牛便便", 大概, 我們不會被牛撞死吧...

好在我們兩人都是用 android phone, 亦好在大家都是 "雙燈" 的, 就開了來照路, 其實, 那段路, 唔仆死已經係天主保佑了... 百揆兄曾提過不如抄地圖上的山中小徑, 不過我就覺得我們應該繼續沿海邊行, 因為一來山路可能被封而地政/漁農署都不知道, 二來真係要 (雖然我覺得唔使) 求救都易o的搵丫... 呢個時候, 早已過了原本約了食飯的時間, 電話再次接收到 "中移動", 無法啦, 當長途都要打畀一班老友 say sorry. 同時, GPS 再次生效.

最後去到差不多 7:50pm, 我們就行到了呢度... (其實相機都係斷估影, 因為真係已經純靠月色和我們的電筒照明, 不過, 老個老頑童倒覺得幾刺激的)

此時我們見到一塊牌, 寫著 "海下 1 1/4 km 1/2hr". 再前行十分鐘, 開始見返有 "垃圾桶和欄杆" 這些 "文明產物". 這個時間, 應該就是行山的人最高興, 覺得自己 "征服" 了一段路的時間吧?

經過海下村, 我們再次用 "中移動" 來 call 的士. 返到銅鑼灣都已經 9 點半有多, 仲去咩龍皇丫, 一班人去吃個日本碗飯算了...

其實這段路, 以行山來說, 絕不是什麼難行的路, 不過我們兩隻老鬼都幾年無行山, 所以用足3 小時 (仲耐過本書話帶bb 行!) 行完後已經死死o下, 更加覺得...

「點帶BB來行呀!?!? 本書都傻傻地o既. 咪玩啦!!」

換電話...

2011-06-15T22:05:00.002+08:00

一直用了 htc 的 P3600i 三年半, 仲已經係 windows mobile 6. 而架機近幾個月的掣開始不聽話, 到最近終於 "有下無上" (向上的掣 function 唔到), 而且連電話都唔係個個聽到 (又有顯示, 但係按咩掣都唔會去聽, 眼白白睇住個電話變 miss call...

仲頂緊幾星期, 但就在一次上庭時, 中午前老爺拋下了一隻 case 叫我和大狀看; 好在大狀有架 iphone, 就在中午時看了, 於是準備充足, 大獲全勝.

自我的威迫利誘下, 終於頂唔順, 跑了去換電話.

之前一直被同事和朋友遊說換 iphone. 不過自己有個毛病, 就是一定要用兩部電腦來互換資料, 自己在家也需要一個提醒的系統. 而 iphone 因為只可以與一部電腦的 itunes 去同步 (其實電腦朋友說技術上可以多於一部, 不過比較麻煩和有風險會 delete 晒o的資料). 所以最後就換返架 android phone.

只用了三天時間, 就決定了換成 HTC 的 Incredible S. 就是因為薄身和稍快. 而且入面的 apps (已由 htc 代為下載) 幾o岩我用.

出了電話數天, 便好在有此電話, 救了我和朋友一命 (係兩命先o岩)... 詳見下一篇 - 《行山去》

自煮行動: 柚子蜜桃乾燒雞球 + 鍋塌菠菜

2011-06-15T00:30:00.001+08:00

夏天還可以有什麼菜式? 好多人都會答: 生果入饌.

的確, 用生果想炒菜可以在春夏兩季增加食欲. 不過一般來說生果都不可以煮得久, 一久就會出酸味.

柚子蜜亦係一樣好多人夏天會用來煮送的佐料, 不知何時開始柚子蜜就多了很多 fans. 老朽夫人亦一樣. 不過又更不知何解的是, 多數韓國柚子蜜都係整到業務用那個款式, 鬼咁大罌, 唔用來煮一下又或者成日飲的話, 兩三個人根本無可能在食用期限前吃得完.

雞球就是一樣和柚子蜜配得很好的食材, 今次加了些罐頭蜜桃, 另外用了一兩湯匙的蜜桃糖漿來開柚子蜜, 仲專登畀女王幫手開, 等佢都覺得自己有份煮. 食多少少.

乾燒的意思, 就是要少汁, 雞髀肉用一般方法加糖鹽麻油生粉醃好後拉油或炒熟; 而之前開起來近一杯那麼多的汁 (三大湯匙柚子蜜和兩湯匙的蜜桃水) 要和佐料如洋蔥, 青椒等先炒一輪至收掉一半, 再落已熟的雞球猛火不斷兜炒不汁僅僅掛在雞上, 最後加入蜜桃係咁意炒幾下就禮成了.

而另一樣就是希望讓女王多吃菜的一味山東菜. 原本是孔府家宴當中的一道菜式 - 鍋塌菠菜.

鍋塌的意思是將煎或炸好的脆皮東東用上湯/汁再濕煎至汁收了大半, 而脆皮又變了 "韌皮" (故意的). 鍋塌菠菜的做法又每家不同, 我參考書和網上的其他作法後就是將菜切細後用生抽和糖醋浸一會, 之後加入蝦膠攪和後上蛋漿和粉, 再煎成餅 (雖然未有壓薄), 之後再用上湯埋芡收汁, 也可加入數滴麻油 "亮芡". 成品是尚有一點點脆和香口的, 而且無咩菜味, 所以女王都會吃.

蝦膠當然最好自己打, 不過時間關係, 今次用了買回來的, 比較吞撲. :P

戶外婚禮之下篇 - 藍天白雲

2011-06-12T22:50:00.001+08:00

話說上一篇提到, 我近日還有一次的戶外證婚是在極熱的環境下進行的. 就是端午節前一天. 地點, 竟然是大嶼山一個沙灘.

一對新人都是外國來香港工作的, 來香港後認識, 又是我其中一位老闆的客仔. 而和之前另一對一樣, 他們也已經有小孩, 還一生已經生了 2 個, 是個 "好" 字.

他們初時是想去註冊處登記的, 不過後來又覺得在自己 "地頭" 行禮會更高興 (他們在大嶼山住).

老闆找我幫手時,初時我都搲晒頭. 入到去梅窩還要再轉車. 好在那天我中午要證另一對在四季酒店的新人, 證完去 coffee 吃點東西再行去碼頭就 good fit 喇.

不過, 那日就真係熱到 pk. 我去到梅窩已經溶o左咁滯. 而且仲著住西裝. 雖然新人一早說過他們自己也不會著得太隆重, 不過我身為 "官家", 要似返個樣, 所以都先著了西裝去.

好了, 因為偏遠, 所以我更早到. 沒有坐新人提供的穿梭巴士. 入到去, 新郎已經 "換好衫", 就係一件極之薄的雪紡恤衫, 他劈頭第一句就係 "不如你都係唔好著西裝主持啦, 最多有咩事有人話你唔 pro 的話我幫你寫信去入境處" (咁又唔使...)

既然係咁, 我都無謂有不必要的堅持了, 索性脫了西裝和領帶.

新娘呢? 原來在化妝. 我快快手的解了一次之前已經傾好的程序. 又回到沙灘邊的餐廳, 即唯一有冷氣的地方. 餐廳老闆娘說已經差不多準備好沙灘的證婚檯. 請我過去看看...

問了在場的外籍兼職侍者 (都係後生的外國學生, 大約是20歲左右吧), 他們說沒有帳篷是新人的指示. 這時才想起新人是信西藏佛教那類的, 想 "天人合一", 所以不想有帳篷隔開個天.

不過呢層就頭痕喇, 因為雖然好好太陽, 但係海邊一樣好大風. 好易吹走o的架生, 吹起咩o野都事小, 吹走證書我就真係死得. 最後唯有等行禮前一刻才 set 檯, 又用我個鋼印當紙鎮的壓住.

要留意的是因為那不是康文署的 "官定婚禮" 的沙灘, 所以整個儀式都要在浮波線和管理員/救生員範圍之外進行.

在開場前三分鐘我 set 好檯面, 賓客也由沙灘餐廳過來了. 他們有香港人, 也有過半是外國人, 我之前只聽到少少, 未聽真他們的口音, 估他們是德/荷/南非人, 但這時新郎和伴郎埋來交戒指給我, 有位親友舉機影o左後, 就聽到佢用德文話 "影多一張丫" ("Noch ein Mal!"). 於是我本能地反應一句 "Hier? Ja, noch ein Mal bitte!" ("呢度多一張? 好呀") 跟住就望鏡頭.

呵, 原來係德國人. 老朽曾學過一年德文, 不過一早忘了大大半 (不像法文那麼長時間); 真係唔口快快講了都唔記得自己識... 當然, 呢點新人又加o左我分啦. ^^

進場是由一對子女行入來先, 之後外父帶新娘入沙灘, 新郎接過手之後, 就和新娘一人拖一名子女, 在我背景的海濱, 酷熱的藍天和微風下開始用我幫他們自訂的誓詞宣誓... 他們的誓詞, 是要見證雙方會成為對方的 "摯友, 戀人, 子女的父/母, 和我的丈夫/妻子; 我不論你的成敗也會尊重你, 不論你是健康疾病也會照顧你珍惜你, 不論在何時何節也願意和你一起成長"

聽起來好突兀, 是不?

但用英文說出來, 就是: "I call upon all persons here present to witness that I, xx do take thee, yy to be my friend, my lover, the Mother of my Children and my Lawful Wedded Wife. I will respect you in your success and in your failures, to care for you in sickness and in health, to nurture you, and to grow with you throughout the seasons of life."

成件事即刻浪漫晒, 係咪? ^^

我見今日沙灘這裡都幾大風, 就即場用了 "大風到連結婚證書都吹起" 來做主題說幾句勉勵一下新人 - 其實, 仔女都已經3-6歲了, 都唔 "新人" 了... :P

整個婚禮, 都係在十分莊重和諧加上輕鬆的氣氛下進行, 唔知點解, 大家都忘記了酷熱和汗臭; 更難得o既係之後新人留我吃飯和 cocktail (不過吃飯就不能了, 要去陪女王嘛!) 時, 他們說我 "make our day a perfect one", 同時仲有另外兩對賓客走過來說我 "帶起了他們自己婚禮的回憶". 所以到了影大合照時, 新人和長輩竟然叫攝影師 hold 住, 要等我行到差不多中間入鏡才肯影...

或許你們會說 "係人都鍾意人畀面啦"; 但其實, 唔係寸咀, 呢個不是畀面就會做的那種門面功夫, 我睇得出, 任何識去尊重婚禮和婚姻的人, 我深信, 一定能白頭到老的.

呢小撮花係幫我手看住個證婚皮篋的靚女 part time waitress 幫我摘的, 放了在我的篋上, 證完去 cocktail 時她叫我插在袋裡...

(後記, 但那日就係因為 cocktail 同影相, 搞到之後去女王親戚的麥當當生日會遲大到...仲飛o左四舊水的士呀陰功...)

親子入廚輕鬆煮之 - 熱狗

2011-06-11T12:40:00.000+08:00

在講另一次熱到飛起的婚禮前, 先醫醫肚. :P

近兩星期都好熱, 都不知吃什麼才好, 於是找了一個星期天和女王 (當然還有夫人) 舉行「熱狗大會」.

早幾年去美加遊玩時, 老友說過美國 (尤其是西岸) 好多家庭會當星期天中午是個家庭同樂日, 全家總動員的駕車去吃漢堡和熱狗, 之後四圍遊車河, 是家庭中的大事.

而米奇老鼠 clubhouse 的節目中, 又成日會食熱狗的, 所以索性整返次, 成家人一齊邊整邊食, 女王又有得玩又會食多o的.

材料就係:

- 切碎蕃茄及切片蕃茄各一個 (我用羅馬茄, 細個少少但甜o的)

- 切極碎洋蔥少少

- 沙律醬, 茄汁, 甜/酸/原粒的芥醬

- 當然, 烘過的熱狗包

- 更當然, 要熱狗腸, 因為係女王食, 所以用三花無衣腸, 係咁意焗一焗.

整整o下原來一樣成檯都係o野...

女王在我和夫人協助下自己整了一隻無咁多料的.

三歲人仔, 食一隻加多少少腸同埋蕃茄已經好夠, 又消磨o左一個中午. 同埋, 都 ok 健康丫. 起碼少肉多菜先. ^^

戶外婚禮之上篇 - 陽光下的皺眉婚禮

2011-06-09T00:15:00.003+08:00

呢幾日, 好熱.

如果有行婚禮的話, 最好當然係匿埋o係冷氣地方啦. 但係陽光又的確係一樣好吸引的東西來的. 相信不少新人, 尤其係新娘, 也會想在藍天白雲 (最好加埋個碧海!) 下行禮的. 不過, 新郎如果要著禮服的話就頭痕o的...

近兩星期證婚, 當中證了兩對新人是戶外行禮的. 碰巧都係熱到跳舞的日子, 但出來的效果就截然不同.

第一對新人是五月在大埔一間頗出名的西餐廳行禮的, 是由一位好人好靚女仲好 nice 的網友介紹的朋友. 據悉最初新人是想在沙田某酒店行禮, 但最後 "博一鋪" 想戶外行禮.

當日又係頂癮o既. 之前幾天都涼涼地, 就係那日就曬到發晒瘟; 加上餐廳安排 (外判) 的旅遊巴士遲到之餘仲只等了數分鐘, 見有六七個人上車就趕頭趕命, 不由分說的開車了, 剩下了幾十個不知就裡的賓客在火車站, 而新人就在場地乾等.

我? 當然一早坐的士到了.

新人想在中午行禮, 之後就係西式婚宴. 一般而言, 中午戶外行禮我和攝影師都會知道, 要避免日當頭影相, 而我見數聽到新人有此提議時, 亦會主動提一下. 不過那次係五月初, 最初新人話轉場時真係想不到會咁死熱的.

當時我一邊安撫心情開始差的新人, 自己都開始勁抹汗. 無法子, 一般情況下我們都係著住西裝的. 而因為戶外場那 part 無安排大風扇, 所以我和早到的賓客都躲在一個亭下乘涼. 新人就可以在新娘房化妝, 好在有冷氣.

最後賓客才慢慢到. 有些就係自己夾埋坐的士入來的. 至於那架旅遊巴司機的下場我就不得而知了.

這時既然人開始多, 天口又勁熱, 我又見餐廳侍者開始 set 些帳篷在後面的用餐區, 便召來 captain 問一下, 有無辦法弄來一些大風扇和也 set 一個帳篷在前面的行禮區或者禮台上. 可以的話我找新人問問也好吧.

captain 好有禮貌 (最後仲問我拎卡片); 不過答案就弊o的: "風扇就唔得喇, 因此唔夠插頭; 而帳篷就因為唔夠數和唔夠大, 亦放唔到..."

嘩, 預o左戶外行禮的地方, 呢o的野唔係應該一早預好晒咩...?

無辦法下, 唯有繼續啦.

好了, 卒之來到行禮. 新人是由自己的小朋友 (即個好可愛的女孩, 和女王也差不多年齡) 帶進場的. 好快完成了誓詞和交換戒指. 簽紙都 ok 埋喇.

老朽一向都會在這時段講半分鐘左右的說話, 而我見到大家個樣都已經曬到燶燶地, 也主動將呢段話 cut 到 20 秒. 我亦事先和相關的請返來的攝影師溝通過, 佢都話縮到 20 秒差不多幾好, 仲話我細心照顧o的賓客.

但就在這時, 一位充當影 video , 拎住架機仔的新人親戚一聽到我講說話, 我數過剛到12 秒時 ,就突然用手好大咁o係度劃圈.

係, 呢條架兩o係度 "圈" 我.

而台上司儀見到後, 又唔知咩事細細聲講 "呀...佢 "圈" 緊阿律師呀...", 當然, 幾細聲都入o左咪, 全場聽晒. 呢個時候條圈o既架兩仲懶搞笑地 chok 個死人得戚樣.

我當堂火都o黎埋, 我自己都已經好尷尬, 但為免影響新人; 我只有扮無野, 而又更加 "草草了事" 的將那段話最尾幾句自己吞回肚裡. 我知大家熱 (熱唔過我著西裝嘛!?) 已經減了時間; 你條 xx 仲o係度圈我? 你唔通十秒都唔等到? 唔知就唔好玩o野啦!

我唯有好快就宣佈禮成, 表面上, 我好似無咩咁, 但那次, 我可以肯定就係我咁多年來表現最差的一次. 因為我覺得, 作為主禮, 原本應由我控制的場面被奪去, 係好不禮貌地奪去. 我當日好快影兩張相就走o左, 連同介紹我的網友拜拜也沒有. 因為我知道塊面在一影完相後, 其實係相當黑的.

我知網友和新人都間中有看我這裡的. 好對唔住, 我真係唔想咁. 我可能亦少少辜負o左網友對我的期望; 但係當我應有的尊嚴被那位不知名親戚踐踏時, 我好難可以去到 100% 的表現. 我不是需要做 "神", 但我係一個 "主禮". 你咁樣, 唔單只唔尊重我, 仲係唔尊重對新人同埋個場合. 畀o下面, 唔該.

至於另一對, 是在一個更加熱的環境, 但卻有著極大迴異的效果, 下一兩篇再提.

賞善罰惡令...

2011-06-07T01:38:00.003+08:00

女王返學無耐就已經知道, 呢個世界有兩樣好得意的東西叫做...

1) 貼紙
2) 吸印仔

不過我地就好小心, 盡量不會將印仔和貼紙亂咁畀佢. 而剛好學校又有一個 policy, 就係有一本小書, 當中有一些格格, 就是說如果我們見到女王在家中有乖乖表現的話, 就可以給她一個印或者貼紙了.

咁講法好似有少少功利, 不過倒也是個相當不錯的方法.

但當方法行了好多個月之後, 進入 naughty 2 尾聲幾個月的女王就唔太受了.

意思是 - 貼紙照要, 計照扭.

唔知係咪全世界都一樣咁衰o架喇. 刷牙係最麻煩的. 一時又話支牙膏味道有問題又苦又辣, 換了三次牙膏, 卒之用 oral B 的 winnie the poon 牙膏, 是女王最愛的藍色 (藍莓味), 刷了幾星期, 無故這數天又開始 "發神經", 怎也不肯刷, 要扭差不多十多二十分鐘, 才讓大人幫她刷的; 但自己就大倒退, 之前試過拿相機出來她就會乖乖扮肯刷, 因為怕我將 "唔肯刷牙相" send 給老師. 但現在就只會跑開, 逃離現場. 如果我們不讓步幫她刷的話, 女王直頭扭計扭到勁喊, 喊足半小時唔收聲, 之後就會成頭大汗, 麻煩得很.

另一樣又係古古怪怪的, 就是女王之前有段時間 "做錯事不認", 早兩個月好一點, 但這數天再次如此; 昨晚又用蠟筆在雪櫃上畫了好多線 (有紙又唔畫喎), 前兩天已經畫了在自己的小桌子 (用來寫東西啦, 吃奶奶啦和玩的) 上面. 好在她還未衰到畫在牆上, 否則真係激死.
*清除蠟筆漬其實方法其實唔太難, 用硬的抹手紙加上少少水和牙膏捽捽捽一會就可以了.

最弊係當我問她「係咪你做o架呢」 (仲要唔係惡聲氣呀...); 佢就會話「... 唔係」; 「咁係邊個?」「... errr... 媽咪」「咁我去問o下佢係咪佢先」「唔好呀」「咁即係邊個做o架」「(都係)媽咪」

今次仲正, 答我 "邊個做" 時就係「... 媽咪, 不過你唔好去問佢呀!」

點算好...?

但有些東西, 女王是抵讚的, 比如她也會肯吃菜, 尤其愛吃蕃茄, 甘荀和粟米, 冬瓜也吃得幾好; 比較煮得腍的青菜也算ok. 而生果亦無問題, 係唔食西瓜 (雖然我和夫人都十分愛吃). 因此, 本月份學校搞個吃生果有貼紙的 campaign, 女王是每天也有貼紙獎勵的.

這個情況在吃藥時也竟然適用. 可能是之前在學校她試過扮醫生扮上癮吧, 我們安排她吃藥時她要自己搖個樽, 自己開蓋 (雖然試過兩次倒瀉o左兩次的藥份).

以三歲小朋友來說, 相信令不少家長羨慕吧...? (晒命中...)

「坐北向南, 坐東向西...」

2011-06-05T19:43:00.001+08:00

今日收到一個好得意的電話, 打來的是其中一對之前提過 "好趕結婚" 的新人.

「律師呀律師, 我老公個阿媽 (叫奶奶啦, 咁款都知係有o的唔妥) 話呀, 話而家我地訂來註冊o個日呢, 沖佢喎; 而家都唔知點算, 佢問我地有無得有咩野改一改喎...」

我當然係氣定神閒啦: 「我咪一早話o左註冊其實唔係出門過門, 唔使擇o架, 咁你地想擇咪就返一下o者...」

「我都知衰戇居o架喇, 而家佢阿媽 (又來了!) 話要就埋, 一係就諗o下有無野可以改o下呀, 例如坐位之類呢...」

「o下...唔...」

我都知我係律師, 唔係風水師傅, 而且我都一早講明我係天主教徒, 但係呢對新人又知我做過 planner, 佢當時講擇日時我都答到幾咀o既. 所以佢就問一下點算好.

咁老實講, 對住佢地, 雖然講明真係唔使擇, 但係我地呢o的, 都係想幫新人解決問題o架o者. 最緊要大家開心丫嘛. 所以就閂埋我房門, 取出本年度通勝; 先問:

「佢老人家邊年出世先?」

「19xx」

...「唔... 又真係咁o岩沖那日o既, 不過真係無事架喎」

「我夠知啦, 想佢心安兼收聲o者.」

「咁都好, 呢o的野, 大家就o下啦; 冤冤相報又唔好, 最好就解冤解仇o架喇」

「所以而家佢話咩我都好o架, 貴事煩啦, 初頭仲話叫我地返入新界註冊食飯添呀」 (嘩, 好在唔係o者...)

「呢個態度都好丫... (一路 check 緊) 一係咁喇, 佢真係戒意的話, 當日佢唔好坐東面; 今年五黃位o係東. 最好就坐東北, 係今年o既一白人緣桃花位. 而家你地最緊要都係搞人緣o者, 係咪?」

「你真係好勁呀律師! 唔知點報答你喇...」 (同時間, 我在網上找尋風水師話屬雞今年要佩帶的飾物)

「我地都係想大家解決問題開開心心o者! 唔通o個日見到佢 la 住個樣o黎見證你地咩」

「一定要請返你食飯先得」

「食飯就唔使喇, 那日下午我仲要證另一對新人... 醒多句畀你喇, 佢老人家真係好驚的話, 你地去文武廟買定隻玉石o既龍送埋畀佢戴, 買靚少少都係幾舊水o者, 你可以去問o下廟祝先o既; 咪當你初歸新抱送畀佢o架囉」

「真係唔該晒你呀... 一定封多封大利是過你先得喇...」

「咁又唔拘呀! 哈哈」

... 呢句係真心的, wakakaka..... :D

「開個價」

2011-06-03T19:00:00.001+08:00

天安門母親的召集人丁女士在電視說有遇難學生家長收到自稱是公安的通知, 只問 "開個價吧, 不再提六四事件". 當然, 當事人一定是反感的.

昨日和今天參與了桃花島主母親的兩台逾越聖祭. 主禮的慈幼會教省省長林神父就了幾個道理, 你可以說他是老生常談, 但的確是一個哲理.

其中有提到, 為我們基督徒來說, 人生的終結就是另一生命的開始, 我們就要去主面前領受我們的獎品了. 因為我們知道, 在今世我們所活的怎麼樣, 將來我們就可以領到什麼樣的獎品.

我一面深深為伯母將領到的獎品而感到欣慰 (雖然在唱歌和瞻仰遺容時我也差點哭出來), 另一方面, 也即時想到, 究竟天安門的學生, 在天主台前會領到的, 大概怎樣也比 "開個價" 強得多吧...? 因為, 生命, 無論是怎樣的生命, 也是無價可償的.

話得說回來. 內地辦事, 一向不可以用我們這些 "自由人" 的心態去理解. 或者, 向好處去想, 那些人, 正在慢慢地改變, 而一直以來爭取的人, 功夫可能沒有白費.

或許真的有一天, 真的如我去年提過, 我們可以在天安門廣場上, 在木樨地上, 在京華街上, 和女王一起放上一束小白菊而不會怕家中被人截水截電吧...

我十分, 十分的期待, 也相信這一天會來臨. 反而我想看看, 到時一班現在說過 "不要再提" 的人 (不論是香港還是內地/外地, 以至於傳聞不肯為六四亡魂演奏的那位鋼琴家), 他們到時會是如何的怪相...

香港的日式早餐

2011-06-01T17:07:00.000+08:00

去日本旅行的朋友們, 應該不少試過酒店內的日式自助早餐; 因為日本人在城市內不太多見有吃早餐的地方. 起碼不像香港一樣, 四周也見有茶餐廳的. 或者有, 但不易讓我們這些遊客找到.

在酒店, 我多數也會想試一下日式的早餐; 其實也沒有太特別的, 就是一頓 "早飯" 或者是粥之類. 不過加入的配料就是日式的燒魚, 醃菜之類.

在香港比較少機會吃到日式的早餐. 不過早前地震後, 位於金鐘的一間老式日本 "飯堂式" 料理店「四季」就推出了一系列的早餐, 是上星期和好友在金鐘上庭後她提醒我的. 而去到後就見到其中有一款是日式的:

又係那句, 看落的確係平平無奇的. 而且日本人比較少吃三文魚, 而多數會烤/煎一些如花魚/池魚/鯖之類的魚, 又或者是一夜干那種製過的半乾魚. 不過吃起來也算是饒有和風, 係貴了一點 (都要差不多四十大元), 不過份量之多可以當午飯來吃; 還有隻做得不錯的溫泉蛋, 仲想點呢?

又來認真的試酒會...

2011-05-31T19:16:00.002+08:00

上一篇提過, 老朽在和女王的班主任聯絡有關講故事時, 其實身在一個試酒會.

都好耐喇, 老友翡冷翠小姐成日都話因利乘便 (她是某大洋酒入口商的 marketing mgr), 要我幫佢手試酒, 有時要錢, 有時就免費的. 之前已經試過新的年份 port , 最後剩下一些超靚的飲不完仲拎了去焗蠔 (真折墮...)

今次有 delcare 新酒的是澳洲大莊 Penfolds. 而因為是全球同步的 webcast, 就要就返澳洲的時間, 所以香港時間係上星期某日的下午 4點半左右, 大部分人都未放工, 而老朽就因為要清假, 所以那天散庭後取多了半天, 和做 IT 的 kenny 和做急症室, 又o岩o岩 4 點正放下午工的金醫生一起去了一轉. 地點就是尖沙咀 sheraton.

借用 kenny 兄的相一用...

以下只係我個人的 tasting note; 同酒商/釀酒師的 notes 可能有幾大出入的, 而且亦無佢地咁詳細.

今次有得玩的酒共有 8 隻. 當中有兩款是白酒:

09 Reserve Bin 09A (Chardonnay) 我和金醫生都覺得最初入口有一陣發霉芝士味 (gorgonzola/cambozola 那類), 但在口中隨即突變為好 balance 的桃和散碎的礦物味, 還有少少citrus 的 finish 和少少烤果仁味. 係天上人間之作. 可惜, 香港只有數支來試, 暫未有得賣... 激死...

08 Yattarna (Chardonnay) 三人一致的味覺都是這支是一支極 standard 的澳洲 chardonnay; citrus 都幾 overwhelming, 好 fruity, 有檸檬和柚子的氣息. 收結和餘韻相當清新, 果仁味好少; 有少少無花果/李的香氣在口內.

紅酒就有以下 6 款:

07 St Henri (Shiraz) 我們幾個都覺得有好香的香草 (vanilla) 香氣, 不過酒廠方面話呢隻係 toffee 蘋果喎... 至於入口後, 我們就覺得係好勁o既黑加侖子同埋莓味, 仲有少少 creamy, 收結就係好緊的, 亦變得乾, 可能係仲係幾新, 係 tannin (丹寧) 作怪o卦...

08 Magill Estate (Shiraz) 我們三個一致裁定, 呢支係好好好好好典型o既澳洲 shiraz, 亦因為咁, 我們對佢無咩特別好感或者偏好 - 雖然唔係差. 如果成街都係呢類野的話, 做咩要飲你先...?

02 RWT (Shiraz) 咁多支呢支最 "老", 亦係最深色o既. 呢支我幾鍾意. 但係 tannin 仍然好足, 只係開始慢慢收緊. 亦係一支好有香黑莓味o既 shiraz, 但係去到中間就有甘草 (liquorice) 味喇. 最後係有少少好輕o既果仁味, 可能係橡木桶陳年導致的.

08 RWT (Shiraz) 同 02 有好大程度o既一致性, 但係佢有一種好得意o既花蜜 scent 同埋 initial 口感. 唔係太出, 但係細意品嚐一口就會覺得. 不過佢太新, 而 RWT 又係可陳年o既高格局酒, 所以相對 tannin 亦相當重, 仲有排先飲得.

08 Bin 707 (Cabernet Sauvignon) 這支我會覺得十分像法國酒, 甚至有點刻意模仿的感覺, 可能因為也是 cab sau 的原因吧? 但無可置疑, 佢係一支好 balanced 的酒, 有不錯的桑棗 & 香草 (herbal)氣息 (酒商話係 lavender...); 色澤好透, 係紫紅的, 好吸引; 至於味覺就係 "好莓", 仲有甘草香 - 仲唔係勁似 bordeaux!?

06 Grange - 全天的 highlight. 不過... 好可惜, 就o係呢個時候, 女王班主任打來 (見上文), 所以, 我無辦法試得真. 只記得係好有 power, 有少少 expresso 豆的香氣, 仲有好重的 "酒煮新鮮無花果" 甜味; 而少少 unmistakable 的果仁香亦係 grange 的特色之一. 唔飲唔會記得, 一飲就會醒起o個隻.

大部份這類的試酒會, 主要目的當然是打響頭炮的同時, 可以吸引人即時買酒. 不過最愛的白酒 09A 竟然無得賣, 而 02的 RWT 又太貴 (唔記得幾多了, 總之雖然唔係過份但係要整箱 12 支咁買, 和友人所喜者又各有不同, 所以最後都係無買到...)

場內的酒在 webcast 後係任飲的, 但係點頂到咁多得o架. 夜晚回家仲要食飯架嘛... 不過既然遇到好友, 大家就索性去了尖咀 sogo 地庫的紀文, 一齊吃著 oden 和督幾串日本魚蛋, 消磨大半小時才回家, 而他們一班衰公原來就約了一班舊中學同學食飯...(羨慕中...)

講古佬

2011-05-27T20:48:00.000+08:00

復活節前數天, 女王國子監的靚女班主任打來找老朽, 初時又以為係女王在校有咩事, 又或者傷風感冒之類, 即係有點緊張.

原來係... 「阿 daddy 你年初咪填o左張 form 話願意返學校為同班同學講故事o既? 我地想睇睇你下星期五下午有無時間回來講囉...」

哦, 係咁o者... 咁講咩先?

「你可以自己揀, 又或者我地準備畀你又得」

咁你揀啦, 你地準備一o的同呢幾星期學校有關o既課題故事啦咁.

...
...

好快, 又到了五月, 佛誕假期那天; 竟然仲未收到老師的故事書喎...!

之後那日我就打去學校, o岩o岩靚女老師行開o左, 之後才回覆說原來她因為又要開咩研討會之類加埋放佛誕假, 唔記得早多幾天畀定書我先. 仲話「今日o岩o岩將本書放左落去女王書包o架喇」

當時我正在 "蛇王" 在某日散庭後出席一個全球同步的試酒會 (哈, 遲少少講呢樣), 正 enjoy 緊之際, 所以只問了今期的主題係「植物」; 未有深究就收線.

返到屋企見到女王書包, 一看...

竟然係「三隻小豬」

究竟三隻小豬同植物有咩關係? 頂多咪係第一隻用草來起屋, 第二隻用樹木o既木材囉!? 真係 r 晒頭.

剩下大半天, 點算好呢?

相信好多小朋友也喜歡迪士尼吧, 就跑了去商務, 又竟然給我在十分鐘內找到一本 winnie the pooh 種南瓜的故事書. 正所謂天命所歸, 就即刻買了下來好了.

用一晚不到的時間去熟習和自己練習, 又用我的專長 - 扮聲 - 來盡量學習在 disney channel 聽到的各人物的聲音 (可惜今次唔係米奇, 始終我扮米奇聲 (廣東話版) 扮到試過連迪士尼的工作人員都話似o既). 真係玩到聲都沙埋.

好了, 之後一天帶女王返學. 之後坐在 reception 等了一會. 一位老師就請我入一間在操場邊的房, 入面好細, 三四十呎左右, 不過可以坐八位小朋友加兩位大人的. 仲有好多好多書. 呢個時候我就將原本學校的 "三隻小豬" 還畀老師, 仲晒命式的將自己帶來的書給老師看. :P

小朋友是逐組帶入來的, 點解唔係自己班房講就唔知喇. 或者, 係怕嘈聽不到, 又或者唔想我見到其他小組的老師教學法o卦...

一進來便是女王那組, 好奇怪, 女王真的和平時的舉止態度都完全不同, 靜晒乖晒咁, 又係細細聲講 hello, 鬼死咁得人鍾意. 而同佢一齊的同學都好勁, 又識叫 uncle 又午安咁. 於是我就開始講喇.

呢班同學都幾頂癮, 我一邊講仲會閘住我又問o的問題, 又自己發功話 "我都有食南瓜呀! 仲有蛋啦, 紅蘿蔔呀..." (!) 又唔好意思唔答咁呢. 所以就遲了少少, 老師都入來一邊影o下相一邊問我 "搞掂未".

好喇, 三扒兩撥埋尾, 同女王講 byebye 先; 之後就係第二組.

呢組入到來, 好明顯, 原來真係分組o既. 今次呢幾位同學, 原來係 "幾舊飯". 咁講好似好衰,但係佢地真係畀唔到反應你o既. 有一位仲一見唔到老師就想喊咁款. 唔通我肥得滯太樣衰?

因為呢組無咩反應, 反而講得快. 準時完成. 第三組和第四組好少少, 有少少反應, 不過就有位同學病病地, 我兼任幫佢抹埋鼻鼻...

一講完四次之後, 差不多大半小時, 我自己都覺得暈暈地. 靚女班主任這時入來問係咪完成晒, 我只識答「係呀, 我係咪自動消失得o架喇?」我唔係想撩阿老師, 不過真係覺得... 呆呆地. 同埋, 做幼師真係好勁, 同埋真係要好有愛心先得. 你諗o下, 佢地幾乎日日都要好似我咁將故事重覆三四次, 又或者對住一班可能完全唔識 (or 唔想) 畀反應你的小魔怪/小可愛/小淘氣, 畀著我真係好快碌低!

正所謂相由心生, 唔怪得大部分幼師都係靚女啦...

2011-05-27T18:56:00.000+08:00

告解...

2011-05-24T18:35:00.001+08:00

天主教會內, 有一項聖事為 "七聖事" 之一, 就是赦罪. 這個是由耶穌發給宗徒的權力「你們領受聖神吧!你們赦免誰的罪,就給誰赦免;你們存留誰的,就給誰存留」(若20:22-23) 而來的. 因為宗徒之長伯多祿 (彼得) 將這項權力一直傳下去給地上教會的代表 - 教宗, 而教宗又將此權力交給各位主教和神父.

怎樣也好, 這個是上主給予人一個改過的機會. 我當年學天主教道理時, 聽過有 "上等痛悔" 和 "下等痛悔", 就是 "真心懺悔" 或是 "為怕受罰而懺悔". 在復活節前數天, 老朽又回歸自己的教堂, 見到一位後生神父, 因為和他比較相熟, 而且又是由他當年做修士學生時已認識的, 便問他會否有時間替我辦告解.
碰巧那天我做了些磯煮鮑魚拿回去, 又請了神父吃; 哈哈, 於是他便講笑說看在鮑魚份上替我辦修和聖事 (告解) 好了.

我已經很久沒有辦告解了, 就似是一個有罪的人, 雖然不是什麼大罪, 卻怕面對, 怕被知道一樣. 日常生活中, 總有不少這樣的時候. 甚至有時是我們犯了些不知名的小罪而不自知的.

以教友角度來說, 我們相信罪過可以由天父赦免; 而從心理上來說, 人能夠得到人或者一個自己所相信的權力的理解, 同情 (即 symphathy), 傾訴和用一個輕量而來自這權力的判決/懲罰 (即是神父所訂下赦罪的補贖條件, 多數是祈禱多少遍經文, 或一些善工), 會有不少的舒緩作用.

今次和後生神父傾了二十分鐘, 不是用 formal 的舊式 "隔住個簾" 的做法, 仲輕鬆得多. 而最後我得到的 "懲罰" 是: 一星期要在每天的祈禱中加特別的意向, 和... 哈, 是 "一星期內找幾小時自己行開o下, 靜靜地去行山呀, 公園呀, 一邊祈禱一邊思索上主化工的神妙和要如何去感恩.

的確找了一天請了半天假, 去了很久無去過的動植物公園. 才發覺原來呢個自細已經去過數十次的公園, 已經面目全非, 只是原來的動物, 可能變成了牠們的後代了, 還在籠中嬉戲著. 好不熱鬧, 又見到好多學生, 和一些放假的小孩和家人一起去公園. 呢個倒提醒我原來可以和女王 & 夫人一起去呢度玩, 仲可以睇埋動物. 而的確, 在這個過程中, 我得到不少的正能量, 又可以回去再次為o左唔知咩來奮鬥了...

不過, 工作上依然有陰霾, 仍是揮之不去. 遲少少有機會 & 睇定o的, 再分享一下... 在公園這刻, 我心神是歡樂的.

翠塘豆腐

2011-05-20T17:23:00.000+08:00

春天的時間, 胃口多數比較淡, 要做些有味但又不會太濃的菜式來 tum 女王 (甚至係夫人) 食飯的話, 有時就要參考一下街坊大檔的菜式.

早兩星期夫人都有點咳, 有時仲咳得好勁. 所以平日請工人做的菜式都比較清少少. 到我煮的時候也只是清清地 "炒條菜" 或者蒸條魚 (or 石斑柳之類), 加個 "翠塘豆腐" 或者鮮腐竹魚湯浸菜之類.

食過大牌檔翠塘豆腐的, 可能會知道, 其實正宗的翠塘豆腐係無豆腐的, 係蒸加了雞湯和生粉水的蛋白. 蒸好後上面鋪上埋過蠔油/鮑汁芡濕炒的料頭; 可以有菜粒, 海鮮粒, 雞肉等等. 都係那句, 簡單, 但好味又不會太嗆. 想 "穩陣" 怕蒸極都係水的話, 用多兩隻蛋白, 雞湯用蛋白份量一半, 生粉水開得濃些而比雞湯份量又少一些便可. 蒸的時候中火, 上面蓋耐熱保鮮紙防止水滴下去 "整皺". 蒸幾耐就睇自己喇. 我今次中火蒸了 10 分鐘.

知道太湖有個得獎菜係有豆腐粒的翠塘豆腐, 食過味道都似樣, 不過加了豆腐粒硬係覺得唔得正常咁. 唔知係我錯定係佢錯喇...

母親節2011

2011-05-18T19:17:00.000+08:00

又是一年一度, 五月.

好奇怪, 我幾乎每年的五月也會有公事上的不快, 或者不安, 點解就無人知. (下一兩篇再講多少少) 不過既然每年5月, 既是教會中的 "聖母月", 又是母親節的日子, 我們總會興高采烈地想一下要如何慶祝.

其實, 到了自己做了父親, 才真的發覺, 之前父母說的 "不用怎麼搞了, 一定人齊齊整整吃個飯不就好了吧?" 一點也不是廢話. 因為, 自己也是這樣想的.

不過, 當然, 我是個死為食鬼, 總會盡量想些好地方來試一下. 不過這只限於我自己和我父母, 因為外父外母一向不喜歡吃得怎麼好. 他們的女兒 (即係我夫人) 都係和我指拖後先開始喜歡吃的. 而我在外父外母面前, 也從來不會像個四圍吃的人. 更不會將我吃的研究和去的老店向他們 (尤其係外父) 介紹. 因為外父大人當這些是窮奢極侈的玩意. 既然他心意如此, 也免得得罪他它人家了. 連夫人的姐妹也知道, 亦不會向他們透露我曾和她們去吃什麼好東西的. 不過可惜連帶也無咩機會和外母大人去食好野就有點對不起了 - 因為外父有樣奇怪的事, 就是幾乎每一餐飯, 也一定要外母和他一起吃, 你說他是愛外母也好, 說他是想有人陪又好, 想有人服侍也罷, 總之就是這樣. 亦因此, 每次母親節和外母生日, 也從不是她話事去哪兒吃的, 而是外父大人. 因為他不喜歡的話, 全家人也要陪葬.

不要當我是對他有什麼不敬. 有不少方面外父是個好好 daddy 來的. 不過今次說的是母親節, 暫且放下他它人家. 而今年就是就一下將開始化療的姨仔, 所以早一個星期在勞動節已去了潮江春吃了. 那天還因為要入場和中學舊生會一班執委一邊開會一邊睇個會的馬出賽入了沙田睇女皇盃, 遲了到...

母親節前一晚呢, 夫人就嚷著要 "慶祝", 原本是正日中午那餐才算的 (去了時代廣場利小館食點心和叉燒撈麵), 既然有要求, 人又在金鐘, 她又無啦啦想吃些京菜, 便跑了去北京樓 (雖然完全不正宗...) 吃了龍蝦蟹黃羹, 鍋塌鱈魚 (這倒還名義上是山東菜, 京菜的源頭), 黃魚泡飯和浸菜苗. 真係又貴又唔抵... 不過老婆話坐得舒服喎, 話點就點啦...

當然, 重頭戲是教了女王做點小禮物...

因為我自己 art sense 極有限. 整出來的卡呀之類多數唔掂; 而且學校已經教做了一張母親節卡和相架仔送給夫人, 所以最後決定, 教女王做 strawberry dip!

買了 v記的朱古力，　還買了一包 61% 一包 39% 的混合 (因為女王都會食, 而小朋友又點食黑朱古力呢...) 不過坐溶後太濃. 也好難點下去. 而且一點也不滑身, 真不知 godiva 係點整到咁薄咁滑的. 唔知有無高手可以指正一下!?!?

不過, 是女王親手做的. 有相為證...

當然, 食味也不錯, 話晒都係 v 記+長柄士多啤梨丫. 由女王送上時, 夫人梗係 lum 晒啦!

至於自己母親呢, 受了之前睇高榮新師傅在有線的節目影響, 我提議當晚去大喜慶吃時, 母親對眼發晒光.

訂了幾款菜式, 不過沒有訂一條魚來蒸, 後來才記起夫人也喜歡吃蒸魚的. (不過在外吃, 一定貴啦! 而且老朽調較蒸魚豉油也有一手, 不用在外吃了...) 吃的是...

百花蛋白蒸蟹鉗 - 唔得, 個蟹 ok, 但係百花蝦膠直頭好似霉霉地, 無鮮味.

玻璃蝦球 - 火候還可以, 夠爽身; 不過片刀工未夠班, 又或者無誠意, 咩叫 "玻璃"? 就係片去煮完變紅色的蝦皮. 但呢度只片了向外一邊, 內側無做到. 啤水也啤得不夠, 卻又唔太透明. 和桃花源比, 除了一樣放了一塊幾靚的華腿在碟上之外, 完全不是那回事...

頭抽皇煎大蝦 - 出色, 煎得好香. 頭抽味好夠但無損蝦味. 夠鮮.

鵝掌柚皮 - 大路貨, 中規中矩. 個鮑汁做得幾好, 火腿味足, 食得出係用靚腿茸來做底, 鵝掌酥而不爛, 柚皮完全無筋不澀.

金錢蟹盒 - 極之懷舊的菜式, 現在已經無人肯做了, 雖然肥 (因為盒外面的是肥豬肉炸成的), 入面做得很好, 料切得細, 配料如冬菰西芹等份量比例十分好, 不搶蟹味. 係出色之作.

黑松露蝦仁炒飯 - 係母親大人想吃的, 我成日覺得中式做黑松露用來炒飯的話, "石油味" 太重.

杏汁燉白肺 - 比陸羽或鏞記尚有大段距離, 但又不似港大同學會的粗糙, 之但係杏汁又唔夠港大濃味. 不過吃得過的.

之咁, 雖然有好味的菜式, 不過似乎貴得過份, 5大1細食o左二千幾銀. 這樣的菜式的話, 似乎真的太離譜, 而且高師傅係最尾才出現, 亦無和任何人打招呼, 只係在廚房話個廚有咩做得唔好. 雖然呢個係佢性格, 不過咁做法未免阻住o的客人了. 不過既然母親大人歡迎一試, 試過就算了. 最緊要各位母親 happy o者.

後記...

老友兼行家兼 blog 友桃花島主就剛在母親節丁母憂, 唯一可以說的是為她祈禱; 得悉她最後也領了洗, 也感欣慰. 雖然我知島主好少過來呢邊坐, 不過亦希望島主節哀...

趕住趕住...

2011-05-16T18:50:00.000+08:00

呢期唔知咩事, 兩星期內一次過出現幾單趕住趕住的證婚 service.

之又咁喎, 並不一定是大家所想的 "趕住生仔". 至於係咩原因, 真係樣樣都有.

有一對是姨仔的書友仔. 靚女一名, 原來係趕住和突然被調升去新加坡的男友結婚, 可以一次過 enjoy 埋公司的 benefit 搞 visa, 但就要以 "已婚人士" 身份過去先得. 呢間公司都幾頂癮...

另一對係一對之前 join o左我 service 的新人介紹的, 新人其中一方原本訂了年尾結婚擺酒, 就係因為即將離開一間公司, 而呢間公司就係有幾日婚假, 仲有一筆少少的禮, 所以就 "食得唔好o徙", 早點註冊, 就算最後拎唔到份大禮, 起碼都有幾日假. well, 老朽就唔太覺得咁係好可取, 因為正所謂山水有相逢, 畀舊公司知你咁玩野的話, 日後未必有著數. 不過新人話既然直頭係轉行, 都無咩機會同大老闆再見到咯, 正所謂不吃白不吃是也. 連佢公司 HR 都叫佢快o的結... @@"

之又有一對, 係屬於 "街客" 打電話來 cold call 的, 係因為不想屋企人煩所以自己跑來註冊的; 因為兩家人一時又話開席簽, 一時又想另外搞. 新人索性跑來簽了字算. 這對人倒好玩. 信風水命理信到十足十, 自己擇了日後 (仲要好趕喎!) 問我可唔可以用那天行禮. 而在和我開會之後, 又覺得我好適合他們. 更抵死的是, 我問他們為何會找著我, 答案就竟然係 "我信個天, 我打個個 list, 暗暗祈禱後 "篤" o左三間, 你就第一個覆我, 仲係親自打來, 又即時答晒我的問題, 所以其他兩間覆我時我都即時 ject o左佢地了". 當然, 聽到呢個答案, 老朽都係人, 已經樂了好半天, 雖然無再減價畀佢地 (有合作過的 wedding planner 話我 service 同第一流那幾位差不多, 叫我加價添呀...) 但係就再用了更多時間和他們開會傾細節, 不另收費就不在話下啦!

其實每次我也會請新人考慮一下, 簽字的意思何在. 地點可以是律師行, 可以是一些簡單但 "企理" 的酒樓等等. 但我真的希望新人不要因為想 "快點搞掂" 而求其下去. 因為, 婚姻, 是莊嚴的, 婚禮, 也是莊嚴的.

老夫老妻...

2011-05-11T10:22:00.001+08:00

復活節假期中有一晚, 去了即將開始化療的姨仔屋企玩 (就佢地方丫嘛, 佢屋企又有部 wii). 玩完之後已經係晚上十時, 飛回家都已經近11時, 女王都要睡了, 手提電話響起, 是外父.

外父大人一向容易動氣, 也是性子急的人. 呢樣係幾十年積落的, 無得改, 也無得救.

今次一打來就說外母不是... 「你外母呀, 頭先食完飯一返到屋企就開門, 硬係發緊夢! 開門又唔記得 "掹" 鎖匙, 我入到屋就跟手鎖門o架嘛. 而家屋內鎖o左, kick 住又開唔到, 條匙又o係出面插住; 你可唔可以來幫我試o下開返呀」係得最尾那句就有禮貌o架o者. :P

呢o的場合, 當然係我呢o的住得近o既去救駕啦. 去到, 有鎖匙也幫不上忙. 因為他們家除鎖匙和大門鎖外, 中間有一度閘, 那抽鎖匙就在已用橫閂閘上的閘和反鎖的木門中間... 而木門的鎖, 少說也有二十年了.

呢個時候, 我覺得, 應該係時候打畀姨仔找定個開鎖佬.

簡直是完全呆掉. 只聽到入面只有外父大大聲, 不過似乎比剛才好一點, 大概因為外母使出一招 "以靜制動", 又 work 喎, 起碼外父無再鬼殺咁嘈. 之後就聽到佢話, 「都係鑿開把鎖喇」, 再之後就係一輪耷釘, 最後十分鐘後就係成把鎖好沉重咁跌落來的聲音.

度門打開, 見到個仲成個雷震子咁款o既外父大人, 連忙入去拎走佢手上的斧頭斬鑿先.

真係咁鬼o岩, 呢個時候, 電話響起, 係姨仔老公:「係咪要搵開鎖?」

「唔使, 而家要防止家暴發生, 一陣搵你」

其實, 今次唔係外母一個錯晒. 佢鎖了匙後, 最後的門閂係由外父閂上的. 不過我當時的目的, 第一件事就係阻止外父火爆下去, 話晒佢老人家都有高血壓嘛.

經過約十分鐘左右的勸導, 外父都無點話外母了. 我都話, 既然把鎖都廿年喇, 而且又咁易壞, 都係時候換喇之類... 妹夫拔少 & 姐夫又打來幫o下口問候一下之類...

又過多幾日, 老朽正在的士, 趕往九龍灣證婚. 電話又響了...

「阿媽媽有無搵你地, 你在唔在家?」係外父大人, 聽得出有點緊張, 卻好有禮的.

「哦? 無事嘛...」

「無... 佢囉, 正話收衫後開我櫃桶放我o的衫, 整到亂晒籠, 成櫃衫跌晒落地... 之後我去沖涼, 出來就唔見o左佢咯, 梗係覺得唔高興啦!」

(咁中間o係o的衫跌落地直至你去沖涼期間發生扣事呢? 呢位阿生做咩唔透露呢o下..?)

「佢無找我地喎」

當下我就打了給所有姐夫 & 妹夫報警, 並請他們代為找一下, 因為我去緊開工嘛.

又咁o岩那天證婚地點之前另一對新人遲了, 所以我也等了一會, 臨開始前幾分鐘, 外父打來. 我剛想說 "o岩o岩準備開工喇爸ba, 一陣打畀你" 時,他說「佢返o左來喇, 無事喇, 唔阻你住」

之後一天係一早約了拜老婆外家山的日子, 見到外母, 我和姐夫拉佢埋一邊一齊坐一架的士上山, 我地都未開聲, 佢已經話「昨日呀, 我幫佢收衫放入櫃呀, 佢又發脾氣喇, 自己又唔 "擠" 衫, 我 "擠" 又話我亂來, 仲自己將成櫃衫扔晒落地; 嬲起上來我咪走o左去半日囉, 嚇o下佢都好呀!」 (哦, 原來唔係o的衫亂到跌落地...) 「梗係唔會啦, 櫃桶咁深咁咁高o的衫點自已跌晒落來呀」

我同姐夫都話「之後有咩事的話, 你打畀我地, 來我地屋企坐o下先啦, 唔係我地擔心呀」

「唔使! 你以為我會咁傻咩!? 我自己行一陣就返去o架啦! 呢o的係我地之間間中的相處方式來架嘛!」

其實, 平日的外母腍到無人有, 不過發起火來都幾勁o架!

兩公婆, 係咪一定要間中炒o下鑊先會長久呢? 威廉王子大婚, 為他們見證的其中一位是坎特伯雷大主教. 他在接受記者訪問時, 說「兩個人願意在一起, 是他們對於婚姻一套價值觀的認同」似乎, 外父外母用了幾十年時間, 將呢個價值觀發揮得淋漓盡致...

堆沙比賽

2011-05-04T23:55:00.002+08:00

女王學校早排搞了個堆沙比賽, 當然, 所謂 "比賽" 都是千千差差的, 絕大多數都是由家長主打, 那些兩至四五歲的國王, 女王, 王子, 公主們只是在玩沙而已.

地點是在石澳泳灘, 時間是 "晨咁早". 難得是當天竟然又無落雨, 但係又唔係好晒. 不過最煩係因為早起... 8:45 要去到上車地點呢樣比較頭痕. 因為... 一個字「懶」!

好在女王都記得要去玩沙, 同上次姨姨結婚一樣, 一早起身無扭計. 反而係平日憤了星期日遲起的夫人就死死下. 沒辦法, 平日她是早起的, 夜晚又不可以太早睡 (因為我夜, 她會陪我看電視和傾一會才睡). 所以都係由老朽一手包辦女王的起身各項任務.

聽聞話會玩到中午, 為免時間不足, 一早已經整好了塗上蒜香椏支竹 (artichoke) 醬的薄切火腿 (gourmet ham) 芝士三文治, 加上圓粒蕃茄仔同埋蘋果汁, 用來當午餐.

長話短說, 坐旅遊巴去到沙灘時, 女王都仲好高興, 點知對腳一行到o的沙的時候就開始好驚, 可能係因為沙粒會 "拮腳", 又軟軟的; 連見到自己的英文班主任也不肯行 (中文班主任是日 off duty). 真正 "企o左o係度". 搞了五分鐘, 見到有同班同學才有改善.

大會一早提示主題是海洋世界; 而當日也有派一張紙來教一些基本的技巧, 老朽也 "係咁意" 上網睇過外國堆沙比賽的注意地方. 但當然, 一班帶著三歲小朋友的家長, 正常情況下堆到少少東西出來已經還神了.

但又奇怪, 學校替我們分組時分了大部分也是女王同班的. 有家長提議堆八爪魚, 我初時打算提議堆海星, 不過最後大家都想玩八爪魚, 我也無所謂. 只是多了三隻腳而已 :P

早兩天夫人已經買定兩套沙灘玩具, 估不到玩具也幾好用. 我見有一隊是自行組隊的, 帶的工具也好專業. 我們雖然有少少羨慕不過既然大家都不是來爭勝的, 當和小朋友玩玩算了. (好在同隊的家長也一樣想法...)

有兩位好好力的家長開始挖得好深. 為免在女王面前執輸, 老朽也勉力而為, 叫做挖o左一條爪出來, 之後大家就開始將水灑上中間的沙堆來做個頭... 點知...

有一位小朋友果然是破壞王, 兜野就將個八爪魚頭批了一半; 他的父母當然紅晒面咁 sa 晒冧; 一班家長就笑笑口話無野, 其實心中好明顯就o係度咒罵緊點解唔睇實個細呀之類...

好在, 好快又堆過個頭出來, 整整o下又少少似樣喎! 於是一班家長又更落力, 連吸盤都整埋; 最後唔知邊位仲咁死好想像力, 將自己張八達通 (Octupus) 放o係八爪魚咀度...

就係咁, 一件古靈精怪的作品完成! 睇落... 其實有點外星人 feel... @@

當然, 我們咁o既款就唔會有獎o架喇, 不過大班人玩玩o下, 女王又開心咪幾好! 所以後來我們在復活節假時也自己也去了一次沙灘玩. 不過呢次比賽中, 帶兩套玩具去, 有幾件就唔知去o左邊了. -.-

正義道101號

爺爺的廚書

2012新春家宴第一場

o係伯大尼做一日神父...

守歲 & 開年

團年飯

Go!Go!Go! 新春糕糕糕...!

團年

超錯與超蠢

親子入廚輕鬆煮 - 酥皮卷卷卷...

正能量達人之 - 第二步曲

跨年家宴 2011-2012

再約我去迪士尼...

難得的襯家

年尾家宴 2011 - 第一場

冰糖蘿蔔

2011聖誕火雞

食得o既聖誕樹 - pandoro christmas tree

壯烈犧牲...

紅糟鹵牛肉

「關係複雜」

「食物工房」- 聖誕食品點整出來?

七年之癢開始...

雕晒花的 "百子百花獻壽"

女王步行籌款

晚霞下的誓言...

學校旅行2011

女王近月大事紀: 家長日 & 運動會+萬聖節

11.11.11 四對新人四個故事之 - 父母恩

初冬時節好煮意 - 龍鬚東星柳 & 白玉藏金鳳

11.11.11 四對新人四個故事之 - 人呢?

11.11.11 四對新人四個故事之 - 鹹蛋黃奪命狂婚

11.11.11 四對新人四個故事之 - 11.11.11.11.11.........

盤菜醉後三分醒的宵夜

「邊位呀...」

窩心的服務

女王領洗

富家粵菜

四個婚禮一個葬禮...

哈碌... (II)

哈碌...(I)

一個好人...

銀鱈魚西京燒

終於開獎...

你叫咩名 & 你簽咩名

溏心風暴...

從 悼校長 到 九一一

動力

反叛．進步．「牛魔魔」

月餅 2011 - 第二 round

月餅 2011 - 第一 round

阿茂整餅...

入紙入到一頭煙...

「漸入佳境」

不一樣的精彩 - 深圳世大運

家教

夏日好煮意 - 京都汁鬼馬釀花姿

好。趕。呀呀呀。。。

夏日好煮意 - Hearty Soup - minestrone 意大利菜湯

嘩, 咁貴o既?

夏日好煮意 (矜貴升呢版): 鮑魚老雞響螺燉鮮野生松茸

夏日好煮意: 西檸煎軟雞

遲到的新人

貴德宮

一個擁抱

夏日好煮意 - 咖哩白汁「加冕雞」 (Coronation Chicken)

女王升呢...

夏日好煮意 - 橙花魚柳

進場點算好?

女王三歲了... (Part II)

女王三歲了... (Part I)

父親節2011 - 後記

父親節 2011 II - 素宴

父親節 2011 I - 女王的禮物

夏日好煮意 - 麻香花雕手撕雞 & 香芹櫻蝦煎薄罉

行山去 , 去行山, 行到半路返頭難...

換電話...

自煮行動: 柚子蜜桃乾燒雞球 + 鍋塌菠菜

戶外婚禮之下篇 - 藍天白雲

親子入廚輕鬆煮之 - 熱狗

從悼校長到九一一